A Lizrandzru Dzra Yehovha I Dzra Hi Lani Ku Nga Helikiki

1-2. He swini swikazratu leswi vakriste vanyingi va kumanaka na swone?

YANAKANYA hi boti ledzri nga lwandle hi siku dzra xidzedze lexikulu. Mavimbi lamakulu ma tlakula boti ledzro ma dzri yisa henhla ni le hansi. Loko mhunu lweyi a nga ndzreni ka boti ledzro o kala a nga peti hangi a matini, a mavimbi ma nga dzri yisa lomu ma ku djulaka. A hangi yi ta yentxa leswaku a boti dzri tiya dzri nga yingayingi.

² Loko u kumana ni swiyimu swa ku kazrata, u nga ha titwa ku fana ni boti ledzro. Matitwela yaku ma nga ha ya henhla ni le hansi hi ndlela ya ku fanekisela. U nga ha dumba lizrandzru ni nseketelo wa Yehovha kambe siku dzrin’wana u ganaganeka u yanakanya leswaku a nga swi voni leswi u kumanaka na swone. (Amaps. 10:1; 13:1) Swi nga yentxeka munghanu waku a ku byela mazritu lawa ma tiyisanaka u va u titwa ha hombe ku dzringana nkama wa kukazri. (Amapr. 17:17; 25:11) Kambe ku ganaganeka ku tlhela ku ku tela. U nga ha tlhela u tibyela leswaku Yehovha a ku tsrukulile. Loko u li ka xiyimu xa ku fana ni lexo, xana u nga yi petisa kuyini hangi a matini hi ndlela ya ku fanekisela? Hi mahlayela man’wana, u nga tama u dumba Yehovha hi ndlela yini leswaku a ta ku pfuna a tlhela a ku seketela?

3. Mazritu lawa ma liki “lizrandzru dzra ku dumbeka” lawa ku vulavuliwaka ha wone ka Amapsalma 31:7 ni 136:1, ma tlhamuxela yini nakone hi nga hlaya leswaku Yehovha i xikombiso lexi tlakukiki a mhakeni leyo hi ndlela yini? (Tlhela u vona ni mufoto.)

³ Yin’we ya tindlela ta ku peta hangi matini hi ndlela ya ku fanekisela loko u kumana ni mindzringo i ku dumba lizrandzru dzra ku dumbeka dzra Yehovha. (Dondzra Amapsalma 31:7; 136:1.) Mazritu lawa ma liki “lizrandzru dzra ku dumbeka”, ma nyikela mongo wa ku namazrela mhunu wa kukazri hi ku helela ku dzringana nkama wa ku leha. Loko hi vulavula hi lizrandzru ni ku dumbeka, Yehovha i xikombiso lexikulu a mhakeni leyo. Ku hlaya ntiyiso, Bibele dzri mu tlhamuxela swanga mhunu lweyi a “taliki hi lizrandzru dzra ku dumbeka”. (Eks. 34:6, 7) Nakone loko Bibele dzri vulavula ha Yehovha dzri li a zrandzra hinkwavu lava mu vitanaka. (Amaps. 86:5) Yanakanya hi ntlhamuxelo wa mazritu lawo. Yehovha nikutsrongo a nga ma tsrhiki malandzra yake ya ku dumbeka! Ku dzrimuka leswaku Yehovha awa dumbeka loko u li ndzringweni lowukulu swi nga tizra swanga hangi ya ku fanekisela.—Amaps. 23:4.

DZRIMUKA LESWAKU LIZRANDZRU DZRA YEHOVHA I MHAKA LEYI SEKETELIWIKI BIBELENI

4. Nyikela swikombiso swa timhaka leti seketeliwiki Bibeleni nakone tlhamuxela leswaku ha yini hi nga pfumeli kuva mhunu a hi yentxa hi nga kholwi ka mintiyiso leyo.

⁴ Ndlela yin’wana ya ku peta hangi matini hi ndlela ya ku fanekisela loko u kumana ni ndzringo i kuva u dzrimuka leswaku lizrandzru dzra Yehovha i mhaka leyi seketeliwiki a Bibeleni. Xana mazritu lawa ma liki “mhaka leyi seketeliwiki Bibeleni”, ma tlhamuxela yini kwaku? Swi nga yentxeka u pimisa hi mintiyiso leyi u yi dondzriki a Bibeleni. Hi xikombiso, u dondzre leswaku vito dzra Xikwembu Nkulukumba i Yehovha, Yesu i N’wana wa mativula wa Xikwembu Nkulukumba, vafi a va tivi ntxhumu ni leswaku ku ta va ni paradeyisi lani misaveni lani vhanu hinkwavu va taka hanya hi lani ku nga helikiki. (Amaps. 83:18; Ekles. 9:5; Yoh. 3:16; Mpful. 21:3, 4) Loko u kholwa ka mintiyiso leyo, a swi nge nabyali kuva mhunu a ku yentxa u nga ha yi kholwi. Ha yini? Hikusa u twisisa leswaku mhaka leyi u yi dondzriki i mhaka leyi seketeliwiki a ntiyisweni. A hi kambisiseni ndlela leyi hi nga vonaka lizrandzru dzra Yehovha swanga mhaka leyi seketeliwiki Bibeleni ni ndlela leyi swi nga hi pfunaka ha yone kuva hi fambela kule ni vonela dzra leswaku Yehovha a nga hi nyiki lisima kumbe a nga swi voni leswi hi kumanaka na swone.

5. Tlhamuxela ndlela leyi tidondzro ta madzrimi ti hohlotiwaka ha yone.

⁵ Loko u dondzre Bibele hi khambi dzra ku sungula, i yini leswi ku pfuniki ku fambela kule ni tidondzro ta madzrimi? Swi nga yentxeka u pfuniwe ku yelanisa leswi u dondzriki swone ka wukhongoti byaku ni leswi Matsralwa ma swi dondzrisaka. Vona xikombiso lexi: A hi nge a u kholwa leswaku Yesu i Xikwembu Nkulukumba wa ntamu hinkwawu kambe nkama lowu a u dondzra Bibele swi nga yentxeka u tivutise leswi: ‘Xana dondzro leyi hakakunene i ntiyiso?’ Kutani loko u kambisise leswi Bibele dzri dondzrisaka swone, u tlhasele magamu ya leswaku lowo a hi ntiyiso. Kolanu, u txintxe dondzro leyo ya madzrimi hi ntiyiso lowu nga Bibeleni lowu liki: Yesu i “mativula ya hinkwaswu leswi tumbuluxiwiki”, “N’wana wa Xikwembu Nkulukumba lweyi a pswaliwiki a li wuswake”. (Kol. 1:15; Yoh. 3:18) I ntiyiso leswaku tidondzro ta madzrimi ti nga fanisiwa ni “mintxhumu leyi dzimiki ni timitsru” nakone swi nga kazrataka ku yi tsruvula. (2 Kor. 10:4, 5) Kambe ntsrhaku ka loko u dondzre ntiyiso, awa ha kholwanga ka tidondzro ta madzrimi.—Filp. 3:13.

6. Ha yini u nga dumbaka leswaku a “lizrandzru dzra ku dumbeka dzra Yehovha i dzra hi lani ku nga hekikiki”?

⁶ U nga yentxa leswi fanaka mayelanu ni leswi Bibele dzri swi dondzrisaka hi lizrandzru dzra Yehovha. Loko u kumana ni ndzringo u va u ganaganeka mayelanu ni lizrandzru dzra Yehovha, tivutisi leswi: ‘Xana mayanakanyela yanga i manene?’ Yelanisa ku ganaganeka kwaku mayelanu ni lizrandzru dzra Yehovha ni mazritu ya Amapsalma 136:1 ku nga tsralwa dzra nhlokomhaka leyi. Ha yini Yehovha a tlhamuxela lizrandzru dzrake swanga ledzri “dumbekaka”? Ha yini mazritu lawa ma liki “lizrandzru dzrake dzra ku dumbeka i dzra hi lani ku nga helikiki” ma phindhiwa 26 wa makhambi ka psalma ledzri? Hi lani hi kambisisiki ha kone, lizrandzru dzra ku dumbeka dzra Yehovha ledzri a nga na dzrone hi vhanu vake i mhaka leyi seketeliwiki a Bibeleni leyi fanaka ni timhaka tin’wana leti seketeliwiki Bibeleni leti swi ku nabyaleliki ku ti twisisa. Vonela dzra leswaku Yehovha a ku vona na u nga pfuni ntxhumu nakone a u faneliwi hi lizrandzru dzrake, i madzrimi. Fambela kule ni madzrimi lawo hi lani a u ta yentxa ha kone ni tidondzro tin’wana ta madzrimi!

7. Nyikela swikombiso swa tindzrimana leti ti hi tiyisekisaka leswaku Yehovha awa hi zrandzra.

⁷ A Bibele dzri ni mintiyiso yin’wana leyi kombisaka leswaku Yehovha awa hi zrandzra. Hi xikombiso, Yesu a byele vadondzrisiwa vake a ku: “N’wine mi va lisima ku tlula swindjengeletana swa swinyingi.” (Mat. 10:31) Yehovha ha byake a byele vhanu vake a ku: ‘Ndzri ta ku tiyisa; ina, ndzri ta ku pfuna; ina, ndzri ta ku seketela hi voko dzranga dzra xinene dzra vululami byanga.’ (Eza. 41:10) Vona ndlela leyi mazritu lawo ma nga ya ntiyiso ha yone. Yesu a nga hlayanga swa ku: ‘U nga va wa lisima ngopfu’, na yene Yehovha a nga li: ‘Ni nga ku pfuna.’ A matsrhan’wini ya leswo, Yesu a li: ‘Wene u wa lisima’ nakone Yehovha a li: ‘Ndzri ta ku pfuna.’ Loko u kumana ni ndzringo kambe u ganaganeka leswaku Yehovha a ta ku pfuna, tindzrimana leti a ti ku pfuni ntsena kuva u titwa ha hombe kambe ti nga tlhela ti ku tiyisekisa leswaku Yehovha awa ku zrandzra hikusa i mhaka leyi seketeliwiki a ntiyisweni. Loko u khongota ka Yehovha mayelanu ni ku ganaganeka loku u nga na kone ni ku yanakanyisisa ha hombe hi tindzrima leti, swi nga ha ku yentxa u phindha mazritu lawa ma nga ka 1 Yohane 4:16, lawa ma liki: “Ha swi tiva hi tlhela hi swi kholwa leswaku Xikwembu Nkulukumba awa hi zrandzra.”a

8. U nga yentxa yini loko minkama yimbeni u ganaganeka leswaku Yehovha awa ku zrandzra?

⁸ Kambe swi li yini loko wa ha tama u ganaganeka leswaku Yehovha awa ku zrandzra? Yelanisa matitwela yaku ni leswi u swi tivaka. A hi fanelanga ku dumba matitwela yezru kambe hi fanela ku dumba lizrandzru dzra Yehovha hikusa i mhaka leyi seketeliwiki a Matsralweni. Loko hi nga pfumeli leswaku Yehovha awa hi zrandzra, hi va na hi dzrela tsrhamela dzrake dzra lisima ngopfu swinene ku nga lizrandzru.—1 Yoh. 4:8.

YANAKANYISISA HA HOMBE HI NDLELA LEYI YEHOVHA A KU ZRANDZRAKA HA YONE

9-10. Yesu a a djula ku hlaya yini loko a ku: “Papayi awa mi zrandzra”, hi lani swi tsraliwiki ha kone ka Yohane 16:26, 27? (Tlhela u vona ni mufoto.)

⁹ Hi nga dondzra leswi yengetelekiki mayelanu ni lizrandzru dzra Yehovha loko hi kambisisa mazritu lawa Yesu a ma byeliki valandzreli vake loko a te: “Papayi awa mi zrandzra.” (Dondzra Yohane 16:26, 27.) Yesu a nga byelanga mazritu lawa vadondzrisiwa vake leswaku va titwa ha hombe ntsena. Ku hlaya ntiyiso mongo wa tindzrimana leto wu hlaya leswaku Yesu a a nga vulavuli hi matitwela ya vadondzrisiwa vake. A matsrhan’wini ya leswo, Yesu a a vulavula hi mhaka leyi hambaniki ku nga xikhongoto.

¹⁰ A ku nge si na khaluta nkama wunyingi na Yesu a byele vadondzrisiwa vake leswaku va khongota hi ku tizrisa vito dzrake kambe ku nga li ku khongota kwake. (Yoh. 16:23, 24) A swi li swa lisima kuva va swi tiva leswo. Ntsrhaku ka loko Yesu a pfuxiwile ku feni, swi nga yentxeka vadondzrisiwa vake va swi navelile ku khongota kwake swanga hi leswi Yesu a a li munghanu wavu lwenkulu. Swi nga yentxeka va tibyele leswaku ndlela leyi a a va zrandzra ha yone a yi ta mu susumetela leswaku a yingiseta swikombelo swavu ni kuva a swi tlhasisa ka Papayi wake. Kambe Yesu a va byele leswaku a va nga fanelanga va yanakanya hi ndlela leyo. Ha yini? Hikusa a te: “Papayi awa mi zrandzra.” Ntiyiso lowu wu hambe xiyenge xa tidondzro ta masungulo ta le Bibeleni mayelanu ni xikhongoto. Vona leswi mhaka leyi yi tlhamuxelaka swone kwaku. Ka dondzro yaku ya Bibele u kote ku tiva Yesu u va u mu zrandzra. (Yoh. 14:21) Kambe ku fana ni vadondzrisiwa va le dzaneni dzra ku sungula, u nga khongota na u dumba leswaku Yehovha “awa ku zrandzra”. U kombisa leswaku wa ma kholwa mazritu lawo minkama hinkwayu leyi u khongotaka ka Yehovha.—1 Yoh. 5:14.

TWISISA LESWI SWI KU YENTXAKA U GANAGANEKA

11. Ha yini a swi ta mu nyonxisa Sathana loko hi sungula ku ganaganeka hi ku pimisa leswaku Yehovha a nga hi zrandzri?

¹¹ I yini lexi ku yentxaka u ganaganeka leswaku Yehovha awa ku zrandzra? U nga ha hlamula u ku Sathana hi yene a hi yentxaka hi va ni mapimisela lawo. U tiyisile, ku ni ntiyiso wa kukazri a mhakeni leyo, Diyavulosi a “djula wa ku mu hahlulela” nakone a nyonxa ngopfu loko hi ganaganeka leswaku Yehovha awa hi zrandzra. (1 Pet. 5:8) A ku zrandzra ka Sathana i kuva hi titwa na hi nga faneliwi hi lizrandzru dzra Yehovha. Kambe Yehovha a kombise leswaku awa hi zrandzra hi kuva a hi yentxele lulamiselo dzra xitizrulo. (Heb. 2:9) Xana loko hi ganaganeka leswaku Yehovha awa hi zrandzra, i mani lweyi a nyonxaka? I Sathana. I mani lweyi a nyonxaka loko hi hela ntamu lakakuva hi tsrhika ni ku tizrela Yehovha? Handle ka ku ganaganeka, i Sathana. A swi tiva ha hombe leswaku Yehovha a nga mu zrandzri. Kambe hi ku tizrisa ‘mazrengu yake’ a zama ku hi yentxa hi titwa na ku li hine hi kalaka hi nga zrandzriwi hi Yehovha. (Efe. 6:11) Loko hi tiva leswi nala wezru a zamaka ku swi yentxa ha hine, hi ta ya hi tiyisa ndlela leyi hi tiyimiselaka ha yone kuva hi “yalela Diyavulosi”.—Yak. 4:7.

12-13. Leswi hi pswaliwiki na hi nga hetisekanga swi nga hi yentxa hi ganaganeka leswaku Yehovha awa zrandzra hi ndlela yini?

¹² Ku ni ntxhumu wun’wana lowu nga hi yentxaka hi ganaganeka leswaku Yehovha awa hi zrandzra. I yini? Hi leswi hi pswaliwiki na hi ni xidoho. (Amaps. 51:5; Rom. 5:12) A xidoho xi hone wuxaka lebyi nga kone a makazri ka Xikwembu Nkulukumba ni vhanu. Xidoho xi tlhela xi hona ndlela leyi va pimisaka ha yone, va titwaka ha yone ni lihanyu dzravu.

¹³ Xidoho xi yentxa leswaku hi va ni matitwela lawa ma hoxekiki, xi hi yentxa hi titwa nandzru, hi hlatiyela, ku titwa na hi nga sizrelelekanga ni ku va ni tingana. Hi titwa hi ndlela leyo loko hi yentxe xidoho xa kukazri. Leswi hi swi tivaka leswaku a hi hetisekanga, swi nabyala ngopfu kuva hi va ni matitwela lawo kambe ku hlaya ntiyiso loko Xikwembu Nkulukumba a tumbuluxe vhanu, a a nga naveli leswaku va titwa hi ndlela leyo. (Rom. 8:20, 21) Ku fana ni leswi movha lowu boxekiki roda wu kalaka wu nga fambi hi lani swi djulekaka ha kone, na hine leswi hi kalaka hi nga hetisekanga a hi nge swi koti ku va ka xiyimu lexi a hi ta va ka xone loko a hi hetisekile. A swi hlamalisi leswi minkama yin’wana hi ganaganekaka leswaku Yehovha awa hi zrandzra. Loko leswo swi yentxeka, hi fanela ku dzrimuka leswaku Yehovha i “Xikwembu Nkulukumba lwenkulu ni lweyi a txhavisekaka, lweyi a bekisaka xipfumelelanu xake ni ku kombisa lizrandzru dzra ku dumbeka ka lava va mu zrandzraka ni ka lava va landzraka milawu yake”.—Nehem. 1:5.

14. Ku yanakanyisisa hi xitizrulo swi nga hi pfunisa kuyini ku fambela kule ni vonela dzra leswaku Yehovha a nga hi zrandzri? (Varoma 5:8) (Tlhela u vona ni bokisi ledzri liki: “Tivoneli Ka ‘Ntamu Wa Xidoho Lowu Kanganyisanaka’.”)

¹⁴ I ntiyiso leswaku minkama yin’wana hi nga ha tibyela leswaku a hi faneliwi hi lizrandzru dzra Yehovha. Nakunene a dzri hi faneli! Leswo hi leswi yentxaka lizrandzru dzrake dzri va ledzri hlawulekiki. A xi kone lexi hi nga xi yentxaka leswaku hi faneliwa hi lizrandzru dzra Yehovha. Kambe nambitanu, Yehovha a hambe lulamiselo dzra xitizrulo akuva a hi dzrivalela swidoho swezru hikusa awa hi zrandzra. (1 Yoh. 4:10) Dzrimuka leswaku Yesu a te lani misaveni leswaku a huluxa vadohi, ku nga li vhanu lava hetisekiki. (Dondzra Varoma 5:8.) A nga kone ni mun’we kwezru lweyi a nga kotaka ku yentxa mintxhumu hi ndlela leyi hetisekiki nakone Yehovha a nga yimeli leswaku hi yentxa leswo. Loko hi twisisa leswaku leswi hi pswaliwiki na hi ni xidoho, swi nga ha hi yentxa hi ganaganeka leswaku Yehovha awa hi zrandzra, hi fanela ku tiyimisela ku tama hi lwa hi lani hi nga kotaka ha kone akuva hi lawula ndlela leyi hi pimisaka ha yone.—Rom. 7:24, 25.

HLAWULA KU TAMA U VA MHUNU LWEYI A DUMBEKAKA

15-16. Loko hi tama hi dumbeka ka Yehovha, hi nga tiyiseka ha yini? (2 Samuel 22:26)

¹⁵ Yehovha a djula leswaku hi hlawula ku yentxa leswi lulamiki hi kuva hi “mu namazrela”. (Det. 30:19, 20) Loko hi yentxa leswo, hi nga tiyiseka leswaku na yene a ta tama a dumbeka kwezru. (Dondzra 2 Samuel 22:26.) Loko hi tama hi dumbeka ka Yehovha, hi nga tiyiseka leswaku a ta hi pfuna ka xiyimu xin’wana ni xin’wana lexi nga ha hi humelelaka a wuton’wini byezru.

¹⁶ Hi lani hi swi voniki ha kone ka nhlokomhaka leyi, ku fana ni hangi leyi petiwiki matini leyi yentxaka leswaku boti dzri tiya, hi ni swivangelo swinyingi leswi nga ha hi yentxaka hi tiya loko hi kumana ni mindzringo. Ha swi tiva leswaku Yehovha awa hi zrandzra nakone a ta hi seketela. Hi leswi Bibele dzri dondzrisaka swone. Loko hi txhuka hi ganaganeka leswaku Yehovha awa hi zrandzra, hi fanela ku dzrimuka leswi hi swi tivaka hi lizrandzru dzra Yehovha a matsrhan’wini ya ku beka miyanakanyu ka ndlela leyi hi titwaka ha yone hi nkama wolowo. Hi djula ku tama hi tiyiseka leswaku a lizrandzru dzra Yehovha i dzra hi lani ku nga helikiki hi lani Bibele dzri hlayaka ha kone.