NHLOKOMHAKA YA XIDONDZRO 42
LISIMU 44 Xikhongoto Xa Lwa Nga Ni Gome
Ndlela Leyi U Nga Yampswisaka Ha Yone Swikhongoto Swaku
‘ Ndzra bandlukana hi mbilu yanga hinkwayu; ndzri yangule, Yehovha.’—AMAPS. 119:145.
NKONGOMETO
Ka nhlokomhaka leyi, hi ta dondzra hi swikhongoto swa malandzra ya Yehovha leswi tsraliwiki a Bibeleni.
1-2. a) I yini lexi nga hi sivelaka ku byela Yehovha ndlela leyi hi titwaka ha yone? b) Hi swi tivisa kuyini leswaku Yehovha a yingiseta swikhongoto swezru hi lizrandzru?
XANA minkama yin’wana u titwa ingiki ka swikhongoto swaku wo hlaya swoleswi swa swin’we nakone ingi a u mu byeli Yehovha ndlela leyi u titwaka ha yone? Loko nhlamulo yaku a li ina, a u wuswaku. Leswi hinkwezru hi tsrhamaka na hi khomekile, minkama yin’wana hi hamba swikhongoto swa ku goma. Kumbexana swa hi kazratela ku byela Yehovha ndlela leyi hi titwaka ha yone hikusa hi titwa hi nga faneleki ku tsrhindzrekela kwake.
2 Bibele dzri hi tiyisekisa leswaku a xa lisima ka Yehovha a hi ku tizrisa mazritu ya ku xonga loko hi khongota kambe i swikhongoto leswi sukelaka mbilwini. Yehovha a yingiseta ‘ku navela ka lava xanisekaka’. (Amaps. 10:17) Hi lizrandzru, yene a yingiseta zritu dzrin’wana ni dzrin’wana dzra swikhongoto swezru hikusa awa zron’weka ha hine.—Amaps. 139:1-3.
3. He swini swivutiso leswi hi taka swi hlamula ka nhlokomhaka leyi?
3 Kutani hi nga tivutisa leswi: Ha yini hi nga khongotaka ka Yehovha na hi ntsrhunxekile? Xana hi nga khongota hi ndlela yini akuva hi ya hi tsrhindzrekela ngopfu ka Yehovha? Xana hi nga dondzra yini ka swikhongoto swa malandzra ya Yehovha leswi tsraliwiki ka Bibele nakone swi nga hi pfunisa kuyini ku yampswisa swikhongoto swezru? Nakone i yini leswi hi nga swi yentxaka loko hi nga yi tivi ndlela ya ku byela Yehovha leswi hi titwisaka xiswone? A hi voneni tinhlamulo ta swivutiso leswi.
U NGA TXHAVI KU KHONGOTA KA YEHOVHA
4. I yini leswi nga hi pfunaka ku khongota ka Yehovha na hi nga txhavi? (Amapsalma 119:145)
4 Loko hi twisisa leswaku Yehovha i munghanu lweyi a dumbekaka lweyi a djulaka leswaku swi hi fambela ha hombe, a hi nge ti txhava ku tsrhindzrekela kwake hi xikhongoto. Mutsrali wa Amapsalma 119 a dzringise ku va ni wuxaka byolebyo bya le kusuhi na Yehovha. Yene a a ni swikazratu a wuton’wini, vhanu va kukazri va hlaye madzrimi mayelanu na yene. (Amaps. 119:23, 69, 78) Handle ka leswo, minkama yin’wana a a hela ntamu hi kola ka swihoxo swake. (Amaps. 119:5) Nambitanu a a nga txhavi ku byela Yehovha ndlela leyi a a titwa ha yone.—Dondzra Amapsalma 119:145.
5. Ha yini hi nga fanelanga hi pfumelela leswaku mimpimiso leyi hoxekiki yi hi sivela ku khongota ka Yehovha? Nyikela xikombiso.
5 Yehovha a zramba nambi lava yentxiki swidoho leswikulu akuva va khongota kwake. (Eza. 55:6, 7) Xileswo, a hi fanelanga hi pfumelela leswaku mimpimiso leyi hoxekiki yi hi sivela ku khongota kwake. Hi xikombiso, mufambisi wa vhiyawu awa swi tiva leswaku a nga khanelisana ni vavoneleli va mavhiyawu hinkwawu lawa ma nga mpfhukeni loko a vilela mpfunu. Xana u yanakanya leswaku a a ta txhava ku vutisa vavoneleli lavo loko a li leswaku a lahlekile kumbe loko a yentxe xihoxo xa kukazri? Handle ka ku ganaganeka, im-him! Hi ndlela leyi fanaka, loko hi nga xi tivi xa ku xi yentxa kumbe hi yentxe xihoxo xa kukazri, hi nga khongota ka Yehovha na hi ntsrhunxekile.—Amaps. 119:25, 176.
NDLELA YA KU HAMBA SWIKHONGOTO LESWI TAKA HI TSRHINDZRETELA KUSUHI NA YEHOVHA
6-7. Xana ku yanakanyisisa hi matsrhamela ya Yehovha swi nga hi pfunisa kuyini ku hamba swikhongoto leswi taka hi tsrhindzretela kusuhi na yene? Nyikela xikombiso. (Tlhela u vona ni ntlhamuxelo wa le hansi.)
6 Loko hi byela Yehovha leswi hi swi pimisaka ni ndlela leyi hi titwaka ha yone ka xikhongoto, hi ya hi tsrhindzrekela kusuhi na yene. Kutani i yini lexi nga hi pfunaka kuva hi khongota hi ndlela leyo?
7 Yanakanyisisa hi matsrhamela ya Yehovha.a Loko hi ya hi twisisa matsrhamela ya Yehovha hi ta ya hi ntsrhunxeka ku mu byela ndlela leyi hi titwaka ha yone. (Amaps. 145:8, 9, 18) Vona xikombiso xa Kristine, makwezru wa xisati lweyi papayi wake a a ni tihanyi. Yene a tlhamuxela leswi: “Ku vulavula na Yehovha swanga Papayi a swi ni nabyalelanga. Ku kala ku hetiseka kwanga a ku ni yentxa ni tivona na ni nga faneleki ku tsrhindzrekela ka Yehovha nakone a ni pimisa leswaku a ta ni tsrhika hi kola ka swihoxo swanga.” He dzrini tsrhamela dzra Yehovha ledzri mu pfuniki? Yene a li: “Lizrandzru dzra ku dumbeka dzra Yehovha dzri ni yentxe ni titwa na ni sizrelelekile. Swoswi na swi tiva leswaku minkama hinkwayu a ta ni pfuna. Nambiloko minkama yin’wana ni pfana ni yentxa swihoxo a ta tama a ni zrandzra a tlhela a ni pfuna. Leswo swi ni pfuna ku mu byela matitwela yanga loko ni nyonxile ni loko ni kazratekile.”
8-9. He wani mabindzru ya kuva hi pimisa hi leswi hi taka swi byela Yehovha na hi nga si na khongota? Nyikela xikombiso.
8 Pimisa hi leswi u taka swi hlaya. Na u nga si na khongota, tihambi swivutiso swa ku fana ni leswi: ‘He swini swikazratu leswi ni lavisanaka na swone swoswi? Xana ku ni mhunu lweyi ni fanelaka ku mu dzrivalela? Xana ni lavisana ni ndzringo wa kukazri lowu ni vilelaka mpfunu wa Yehovha akuva ni wu hlula?’ (2 Tih. 19:15-19) Tlhela u dzrimuka ni leswi Yesu a hi byeliki leswaku hi khongota ha swone nakone pimisa ni hi leswi u nga swi kombelaka ka Yehovha mayelanu ni vito Dzrake, Mfumu Wake ni ku zrandzra Kwake.—Mat. 6:9, 10.
9 Loko makwezru wa xisati lweyi a vitaniwaka Aliska a tive leswaku nuna wake a a nge he ti hanya nkama wa ku leha hi mhaka mavabyi ya kankru ka vongwe, swi mu kazratele ngopfu ku khongota. Yene a dzrimuka leswi: “A ni xukuvale ngopfu swinene lakakuva loko ni khongota a ni nga xi tivi ni xa ku xi hlaya.” I yini lexi mu pfuniki? A tlhamuxela a ku: “Na ni nga si na khongota, ni pimisa hi leswi ni nga mu byelaka swone Yehovha akuva ni nga khaneli ntsena ha mine ni mavabyi ya nuna wanga. Loko ni yentxa leswo na zrula nakone ni kota ku khongota hi mintxhumu ya ku siyanasiyana.”
10. Ha yini hi fanela ku dzringisa ku lehisanyana swikhongoto swezru? (Tlhela u vona ni mifoto.)
10 Tinyiki nkama wa ku khongota. Nambileswi swikhongoto swa ku goma swi nga hi tsrhindzretelaka kusuhi na Yehovha, loko hi swi lehisanyana kutsrongo hi ta va ni nkama wunyingi wa ku mu byela ndlela leyi hi titwaka ha yone.b Makwezru Elias nuna wa Aliska a li: “Ni dzringisa ku khongota makhambi manyingi makazri ka siku kambe loko ni lehisanyana swikhongoto swanga ni titwa na ni tsrhindzrekela kusuhi na Yehovha. Yehovha a lehisa mbilu loko ni khongota, xileswo ni nga heta nkama lowu ni wu djulaka na ni khongota kwake.” Dzringisa leswi: Djuletela nkama ni mbangu lowunene akuva u khongota hi zritu dzra ku tlakuka na ku nga na lexi ku hingeletaka nakone zama ku lehisanyana swikhongoto swaku u tlhela u swi yentxa nkama ni nkama.
Hlawula nkama ni mbangu lowu u taka khongota ka Papayi waku wa le matilweni na u nga hingeletiwi ha ntxhumu (Vona yava 10)
YANAKANYISISA HI SWIKHONGOTO SWA KU SUKELA MBILWINI LESWI TSRALIWIKI A BIBELENI
11. Hi nga pfunekisa kuyini hi ku dondzra hi swikhongoto leswi sukelaka mbilwini swa malandzra ya Yehovha leswi tsraliwiki a Bibeleni? (Tlhela u vona ni bokisi ledzri liki: “Xana Wa Yi Twisisa Ndlela Leyi A Va Titwa Ha Yone?”)
11 Swi nga yentxeka u vona swi pfuna ku yanakanyisisa hi swikhongoto swa malandzra ya Yehovha ya le minkameni ya Bibele ni leswi a va swi hlaya ka tinsimu ta ku dzrumisa Yehovha. Loko u yanakanyisisa hi ndlela leyi malandzra ya Yehovha ya le minkameni ya Bibele a ma kombisa ha yone leswi a ma titwisa xiswone, na wene u ta kutxeka ku byela Yehovha leswi nga mbilwini yaku. Swi nga yentxeka u kuma mazritu lamampshwa ya ku nyikela lidzrumu lawa u nga ma patsraka ka swikhongoto swaku nakone swi nga yentxeka u kuma swikhongoto leswi fambisanaka ni swiyimu swaku.
12. He swini swivutiso leswi hi nga tihambaka swone loko hi dondzra hi xikhongoto xa kukazri?
12 Loko u dondzra hi xikhongoto xa kukazri lexi tsraliwiki Bibeleni, tivutisi leswi: ‘I mani a hlayiki mazritu lawa nakone a a li ka swiyimu swini? Xana na yi twisisa ndlela leyi a a titwa ha yone ka xikhongoto lexi? Ni nga dondzra yini?’ U nga ha hamba wusetxhi akuva u hlamula swivutiso leswi nakone tiyiseka leswaku swi ta pfuna. A hi voneni swikombiso swa kukazri.
13. Hi nga dondzra yini hi ka xikhongoto xa Ana? (1 Samuel 1:10, 11) (Tlhela u vona ni mufoto ka .)
13 Dondzra 1 Samuel 1:10, 11. Nkama lowu Ana a hambiki xikhongoto lexi, a a lavisana ni swikazratu swibidzri leswikulu. Yene a a nga pswali nakone nsatikulobye a a mu bindzrisela wutomi. (1 Sam. 1:4-7) Loko u kumana ni xikazratu lexi ku bindzriselaka wutomi, u nga dondzra yini ka xikhongoto xa Ana? Yene a tinyike nkama wa ku byela Yehovha hinkwaswu leswi a swi mu kazrata nakone ntsrhaku ka leswo a titwe ha hombe. (1 Sam. 1:12, 18) Na hine hi ta titwa ha hombe loko hi byela Yehovha hinkwaswu leswi hi kazrataka.—Amaps. 55:22.
Ku dzringana nkama lowu a a nga pswali nakone a a poyileliwa hi nsatikulobye, Ana a byele Yehovha hinkwaswu leswi a swi li mbilwini yake (Vona yava 13)
14. a) I yini swin’wana leswi hi nga swi dondzraka ka xikombiso xa Ana? b) Ha yini ku dondzra ni ku yanakanyisisa hi Zritu dzra Xikwembu Nkulukumba swi hi pfuna ku tiva mintxhumu yin’wana leyi hi nga yi hlayaka ka swikhongoto swezru? (Tlhela u vona ni ntlhamuxelo wa le hansi.)
14 Malembenyana ntsrhaku ka loko a pswale Samuwele, Ana a mu yise ka Muprista Lwenkulu Eli. (1 Sam. 1:24-28) Hi xikhongoto lexi sukelaka mbilwini, Ana a byele Yehovha leswaku a a mu khensa hi leswi a sizrelelaka ni ku hlayisa malandzra yake ya ku dumbeka.c (1 Sam. 2:1, 8, 9) Ana a a ha tama a va ni swikazratu a wuton’wini kambe a a beka miyanakanyu ka ndlela leyi Yehovha a a mu tovokisa ha yone. Hi dondzra yini? Hi ta swi kota ku tiyiselela swikazratu leswi hi kumanaka na swone swoswi loko hi beka miyanakanyu ka ndlela leyi Yehovha a hi pfuniki ha yone ku ta tlhasa swoswi.
15. Loko hi lavisana ni ku pfumaleka ka wululami, hi nga dondzra yini ka xikhongoto xa muprofeta Yeremiya? (Yeremiya 12:1)
15 Dondzra Yeremiya 12:1. A wuton’wini byake, muprofeta Yeremiya a kazrateke ngopfu loko a vona vhanu va ku yentxa mintxhumu ya ku biha na swi va fambela ha hombe. A tlhele a kazrateka hi ndlela leyi Vaisrayele a va mu khoma ha yone. (Yer. 20:7, 8) Na hine hi nga titwa hi ndlela leyi fanaka loko hi vona vhanu lava kalaka va nga dumbeki swi va fambela ha hombe kumbe loko va hi poyila. Yeremiya a byele Yehovha ndlela leyi mintxhumu liyani a yi mu hlundzrukisa ha yone. Kambe a nga zanga a hlaya leswaku Yehovha a nga lulamanga. Loko a vone ndlela leyi Yehovha a va layiki ha yone vhanu lava va mu pfukeliki, ndlela leyi a a dumba wululami bya Yehovha ha yone yi ye yi yengeseleka. (Yer. 32:19) Na hine hi nga hlaya leswi hi hlundzrukisaka ka swikhongoto swezru, na hi dumba leswaku Yehovha a ta lulamisa ku pfumaleka ka wululami loku hi kumanaka na kone swoswi.
16. Loko hi vona leswaku a hi koti ku yentxa swinyingi hi kola ka swiyimu swezru, hi nga dondzra yini ka Mulevhi lweyi a a li wukazraweni? (Amapsalma 42:1-4) (Tlhela u vona ni mifoto.)
16 Dondzra Amapsalma 42:1-4. Lisimu ledzri dzri tsraliwe hi Mulevhi lweyi a a li wukazraweni nakone a a nge na ndlela ya ku ya tempeleni a ya gandzrela ni Vaisrayelekulobye. Amapsalma yake ma kombisa ndlela leyi a a titwa ha yone. Hi nga titwa ku fana na yene loko hi nge na ndlela ya ku huma kaya. Hi xikombiso, hi kola ka mavabyi kumbe hi leswi hi pfaleliwiki djele hi kola ka lipfumelo dzrezru. Minkama yin’wana hi nga ha titwa ha hombe kasi minkama yin’wana hi nga ha kazrateka kambe swi nge na mhaka ni ndlela leyi hi nga ha titwaka ha yone, hi fanela ku byela Yehovha hi xikhongoto. Leswo swi nga hi pfuna ku twisisa matitwela yezru ni ku dzrimuka leswi nga swa lisima. Hi xikombiso, a Mulevhi a twisise leswaku a a ta kuma mikhandlu yimbeni ya ku dzrumisa Yehovha. (Amaps. 42:5) A tlhele a yanakanyisisa mayelanu ni ndlela leyi Yehovha a a mu hlayisa ha yone. (Amaps. 42:8) Ku khongota hi ku hiseka ka Xikwembu Nkulukumba swi nga hi pfuna ku twisisa matitwela yezru, ku kuma ku zrula ni ntamu wa ku tiyisela.
A mutsrali wa buku dzra Amapsalma 42 a byele Xikwembu Nkulukumba hinkwaswu leswi a swi li mbilwini yake. Loko hi byela Yehovha hinkwaswu leswi nga mbilwini yezru swi ta hi pfuna ku dzrimuka leswi nakunene swi nga swa lisima ka xiyimu xezru (Vona yava 16)
17. a) Xana hi nga dondzra yini ka xikhongoto xa muprofeta Yonasi? (Yonasi 2:1, 2) b) Xana mazritu man’wana ya Mapsalma ma nga hi pfuna hi ndlela yini loko hi kumana ni swikazratu? (Tlhela u vona ni ntlhamuxelo wa le hansi.)
17 Dondzra Yonasi 2:1, 2. Muprofeta Yonasi a hambe xikhongoto na a li khuzrini dzra hlampfi leyikulu. Nambileswi a kalaka a nga mu yingisetanga Yehovha, Yonasi a a tiyiseka leswaku Yehovha a a ta yingiseta zritu dzrake. Ka xikhongoto xake, Yonasi a tizrise mazritu manyingi lawa ma kumekaka ka Amapsalma.d Swi nga yentxeka a a ma tiva ha hombe Amapsalma lawa. Hi ku yanakanyisisa ha wone, yene a a dumba leswaku Yehovha a a ta mu pfuna. Hi ndlela leyi fanaka, loko hi zama ku bekisa tindzrimana ta kukazri a nhlokweni, hi nga ti dzrimuka nakone ti nga hi txhavelela loko hi khongota ka Yehovha hi minkama ya ku kazrata.
TAMA U TSRHINDZREKELA KUSUHI NA YEHOVHA HI XIKHONGOTO
18-19. He xini xitiyisekiso lexi hi xi kumaka ka Varoma 8:26, 27 loko minkama yin’wana swi hi kazratela ku hlaya ndlela leyi hi titwaka ha yone ka xikhongoto? Nyikela xikombiso.
18 Dondzra Varoma 8:26, 27. Minkama yin’wana hi hlatiyela ngopfu lakakuva hi nga swi koti ku byela Yehovha ndlela leyi hi titwaka ha yone. Kambe ka swiyimu leswo a hi wuswezru, moya wa Xikwembu Nkulukumba wa hi “kombelela”. Hi ndlela yini? Hi ku tizrisa moya wa ku xwenga, Yehovha a yentxe leswaku swikhongoto swa malandzra yake swi tsraliwa ka Zritu dzrake. Loko swi hi kazratela ku mu byela ndlela leyi hi titwaka ha yone, Yehovha a nga yamukela mazritu lawa ma kumekaka ka swikhongoto leswo swanga swikombelo swezru nakone a nga swi hlamula.
19 Ku yanakanyisisa hi ndlela leyo swi pfune makwezru wa xisati wa le Rússia lweyi a vitaniwaka Yelena. Yene a pfaleliwe djele hi mhaka ya ku khongota ni ku dondzra Bibele. Yelena a a pfilunganyeke ngopfu lakakuva a swi mu kazratela ku khongota. Yene a li: “Ni dzrimuke leswaku loko ni pfilunganyeke ngopfu lakakuva ni nga swi tivi swa ku swi hlaya ka xikhongoto, Yehovha awa swi yamukela swikhongoto swa malandzra yake ya khale . . . swanga swikombelo swanga. . . . Leswo swi ni txhavelele ngopfu loko ni kumane ni xiyimu xa ku kazrata ngopfu swinene.”
20. Hi nga yi lulamiselisa kuyini mbilu yezru akuva hi khongota loko hi li ka swiyimu leswi tlhanyisanaka nhloko?
20 Loko hi le ka swiyimu leswi tlhanyisanaka nhloko swi nga hi kazratela ku zrulisa miyanakanyu yezru loko hi khongota. Akuva hi lulamisela a miyanakanyu yezru hi nga dondzra Amapsalma hi zritu dzra le henhla. Nakone hi nga zama ku tsrala leswi hi titwisaka xiswone ku fana na Hosi Davhida. (Amaps. 18, 34, 142; swinhlokwanamhaka.) I ntiyiso leswaku a ku na swinawanawana mayelanu ni leswi hi nga swi yentxaka akuva hi lulamisela timbilu tezru na hi nga si na khongota. (Amaps. 141:2) Yentxa leswi swi tizraka kwaku.
21. Ha yini hi nga khongotaka hi mbilu hinkwayu?
21 Swi tiyisana ngopfu ku tiva leswaku Yehovha awa ma twisisa matitwela yezru nambiloko hi nga si na hlaya ntxhumu. (Amaps. 139:4) Nambitanu, a djula leswaku hi mu byela ndlela leyi hi titwaka ha yone ni ndlela leyi hi mu dumbaka ha yone. Xileswo, u nga txhavi ku khongota ka Papayi waku wa le matilweni. Dondzra ka swikhongoto leswi kumekaka ka Zritu dzrake, khongota hi mbilu yaku hinkwayu, mu byeli leswi ku yentxaka u nyonxa ni leswi ku kazrataka. Swanga Munghanu waku wa hakakunene, Yehovha minkama hinkwayu a ta va na wene!
LISIMU 45 Ku Yanakanyisisa Ka Mbilu Yanga
a Vona “Man’we ya matsrhamela ya Yehovha ya lisima ngopfu” lawa ma kombisiwaka ka buku ledzri liki: Matsralwa Mayelanu Ni Mahanyela Ya Wukriste, ka nhlokomhaka leyi liki: “Yehovha.”
b A swikhongoto leswi hambiwaka a livaleni hi vito dzra bandla hi ntolovelo swi gomile.
c Ka xikhongoto xake, Ana a tizrise mazritu lawa ma fanaka ni lawa ma tsraliwiki ha Moxe. Handle ka ku ganaganeka, Ana a a tinyika nkama wa ku yanakanyisisa hi Matsralwa. (Det. 4:35; 8:18; 32:4, 39; 1 Sam. 2:2, 6, 7) Ka malembe lawa ma landzreliki, Mariya mamana wa Yesu a tizrise mazritu ya ku dzrumisa lawa ma fanaka ngopfu ni lawa ma tizrisiwiki ha Ana.—Luk. 1:46-55.
d Hi xikombiso, dzringanisa ni Yonasi 2:3-9 ni Amapsalma 69:1; 16:10; 30:3; 142:2, 3; 143:4, 5; 18:6 ni 3:8, lani a tindzrimana ta Bibele ti bekiwe hi ndlela leyi Yonasi a khongotiki ha yone.