Dzrimuka Ku Patsra Van’wana Ka Swikhongoto

1. Hi swi tivisa kuyini leswaku a swikhongoto swezru i swa lisima ka Yehovha?

XIKHONGOTO i nyiko ya ku hlamalisa. Yanakanya hi leswi: Yehovha a yavele tintsrumi mintizro ya kukazri. (Amaps. 91:11) A tlhele a nyika N’wanake wutiyanguleli lebyikulu. (Mat. 28:18) Kambe swi li yini hi wutiyanguleli bya ku yingiseta swikhongoto? A wutiyanguleli lebyi Yehovha a vone swi yampswa kuva byi va byake ntsena. Yehovha i ‘Muyingeli wa swikhongoto’, leswi liki hi yene a hi yingisetaka hi ku kongoma.—Amaps. 65:2.

2. Xana mupostola Pawulo a hi bekele xikombiso xini mayelanu ni ku patsra van’wana ka swikhongoto?

² Nambileswi hi nga khongotaka ka Yehovha na hi ntsrhunxekile mayelanu ni leswi nga swa lisima ngopfu, hi fanela ku patsra van’wana ka swikhongoto swezru. Hi leswi mupostola Pawulo a swi yentxiki. Hi xikombiso, a tsralele bandla dzra le Efesa mazritu lawa ma liki: “Na ha tama ni mi patsra swikhongotweni swanga.” (Efe. 1:16) Pawulo a tlhele a khongotelela van’wana hi mavito. Hi xikombiso, a byele Timotewu a ku: “Ni tlangela Xikwembu Nkulukumba . . . a ni tsrhiki ku ku dzrimuka ka swikombelo swanga wusiku ni nhlikanhi.” (2 Tim. 1:3) Phela Pawulo a a ni swikazratu swake leswi a a ta swi patsra ka swikhongoto. (2 Kor. 11:23; 12:7, 8) Nambitanu, a tinyike nkama wa ku patsra van’wana ka swikhongoto swake.

3. Ha yini hi nga ha dzrivalaka ku khongotelela van’wana?

³ Minkama yin’wana hi nga ha dzrivala ku khongotelela van’wana. Ha yini? Makwezru wa kukazri wa xisati lweyi a vitaniwaka Sabrinaa a hlaye xin’we xa swivangelo swa kone, a te: “Ka misava leyi hi tsrhama na hi khomekile, hi nga ha beka miyanakanyu yezru ka swikazratu swezru lakakuva hi khongota mayelanu ni swivileleko swezru ntsena.” Xana na wene swi same swi ku yentxekela leswo? Loko nhlamulo yaku a li ina, nhlokomhaka leyi yi ta ku pfuna. Yi ta 1) tlhamuxela leswaku ha yini swi li swa lisima ku patsra van’wana ka swikhongoto 2) ni ku nyikela swidzringanyeto swa ndlela leyi hi nga swi yentxaka ha yone leswo.

HA YINI HI FANELA KU PATSRA VAN’WANA KA SWIKHONGOTO SWEZRU?

4-5. Xana ku patsra van’wana ka swikhongoto swezru swi nga va ni ‘ntamu nakone swi pfuna ngopfu’ hi ndlela yini? (Yakobe 5:16)

⁴ Ku patsra van’wana ka swikhongoto ‘swi ni ntamu nakone swi pfuna ngopfu’. (Dondzra Yakobe 5:16.) Xana ku patsra van’wana ka swikhongoto swi nga pfuna ku va ku txintxa swiyimu leswi va langusanaka na swone? Ina. Hi ku tiva leswaku mupostola Petro a a ta mu yala, Yesu a te: “Ni ku kombelelile ka Xikwembu Nkulukumba leswaku a lipfumelo dzraku dzri nga holi.” (Luk. 22:32) Na yene Pawulo a a swi tiva leswaku xikhongoto xi nga pfuna. Loko a pfaleliwe djele na a nge na nandzru, Pawulo a tsralele Filemoni a ku: “Na dumba leswaku hi kola ka swikhongoto swenu ni ta ntsrhunxiwa ni tlhela ni va na n’wine.” (Film. 22) Hi lani hi swi voniki ha kone, ntsrhaku ka loko Pawulo a ntsrhunxiwile a tlhelele ka ntizro wa ku zrezra.

⁵ I ntiyiso leswaku a swi tlhamuxeli swone leswaku hi ku va hi khongota hi ta sindzrisa Yehovha ku yentxa xa kukazri. Kambe a zreya ndleve loko malandzra yake ma khongota kwake nakone minkama yin’wana a teka xiboho xa ku yentxa leswi ma swi kombelaka. Ku tiva leswo swi hi pfuna ku khongota hi ku hiseka ka Yehovha mayelanu ni xiyimu xezru hi gama hi swi tsrhikela yene.—Amaps. 37:5; 2 Kor. 1:11.

6. Xana ku patsra van’wana ka swikhongoto swi ma khumba hi ndlela yini matitwela yezru ha vone? (1 Petro 3:8)

⁶ Ku patsra van’wana ka swikhongoto swi hi pfuna ku kombisana “ntwelawusiwana”. (Dondzra 1 Petro 3:8.) Ntwelawusiwana i ku vaviseka loku hi ku twaka loko hi vona van’wana na va xaniseka nakone hi navela ku va pfuna. (Mar. 1:40, 41) Nkulu wa kukazri lweyi a vitaniwaka Michael, a li: “Loko ni patsra swivileleko swa van’wana ka swikhongoto swanga ni swi twisisa ha hombe swikazratu swavu nakone leswo swi ni yentxa ni ya ni va zrandzra. Ni titwa ni li kusuhi na vone nambiloko vone va nga swi xiyi.” Nkulu mun’wana lweyi a vitaniwaka Richard a tlhamuxela ndlela yin’wana leyi swi pfunaka ha yone. A li: “Loko hi patsra mhunu mun’wana ka xikhongoto, hi susumeteleka ku va hi mu pfuna.” A tlhela a ku: “Loko hi yentxa xa kukazri akuva hi pfuna mhunu lweyi hi mu patsriki ka xikhongoto, hi ndlela ya kukazri hi va na hi pfunisa ka kuva ku hlamuliwa xikhongoto lexi hi xi hambiki.”

7. Xana ku patsra van’wana ka swikhongoto swezru swi hi pfunisa kuyini ku va ni vonela ledzrinene mayelanu ni swikazratu leswi hi lavisanaka na swone? (Vafilipiya 2:3, 4) (Tlhela u vona ni mifoto.)

⁷ Ku patsra van’wana ka swikhongoto swezru swi hi pfuna ku va ni vonela ledzrinene mayelanu ni swikazratu leswi hi lavisanaka na swone. (Dondzra Vafilipiya 2:3, 4.) Leswi hi hanyaka ka misava leyi yi fumiwaka hi Sathana Diyavulosi, mun’wana ni mun’wana wezru a lavisana ni swikazratu. (1 Yoh. 5:19; Mpful. 12:12) Loko hi titoloveta ku patsra van’wana ka swikhongoto swezru, hi dzrimuxiwa leswaku ‘vamakwezru a misaveni hinkwayu va kumana ni tinxanisa leti fanaka’. (1 Pet. 5:9) Phayona dzra kukazri ledzri vitaniwaka Katherine dzri li: “Ku patsra van’wana ka swikhongoto swi ni dzrimuxa leswaku na vone va lavisana ni swikazratu, leswo swi ni sivela ku va ni nga tsrhameli ku yanakanya hi swikazratu swanga ntsena.”

VONE VA VILELA SWIKHONGOTO SWEZRU

8. Nyikela xikombiso xa vhanu lava hi nga va patsraka ka swikhongoto swezru.

⁸ I vamani lava hi nga va patsraka ka swikhongoto swezru? Hi nga ha patsra ntlawa wa vhanu. Hi xikombiso, lava vabyaka, vampshwa lava va poyileliwaka kumbe va hlohloteliwaka ku yentxa swa ku biha hi vadondzrikulobye ni lava kumanaka ni swikazratu swa ku duhwala. Vamakwezru vanyingi va lavisana ni nkaneto ku nga ha va wa maxaka kumbe wa mfumu. (Mat. 10:18, 36; Mint. 12:5) Van’we ka vamakwezru swi sindzrise ku va va siya mimiti yavu hi kola ka mpfilumpfilu ya politika kasi van’wana hi kola ka timhangu ta ntumbuluku. Swi nga yentxeka hi nga ma tivi hi ku kongoma mavito ya vamakwezru lavo kambe loko hi va patsra ka swikhongoto swezru hi va na hi landzra nawu wa Yesu wa ku va hi ‘zrandzranana’.—Yoh. 13:34.

9. Ha yini hi fanela ku patsra vamakwezru lava zrangelaka a nhlengeletanwini ya Yehovha kun’we ni vasati vavu ka swikhongoto swezru?

⁹ Nakone hi nga tlhela hi patsra lava zrangelaka a nhlengeletanwini ya Yehovha ka swikhongoto swezru, va ku fana ni Huvo Leyi Zrangelaka ni vapfunisi va yone, Swihubyana Swa Mabetele, valaviseli lava nga mabetele, valaviseli va miganga, vakulu va bandla ni malandzra ya wutizreli. Vanyingi ka vamakwezru lava va lavisana ni swikazratu na hi nkama wu li wun’we va tizra leswaku va hi pfuna. (2 Kor. 12:15) Hi xikombiso, mulaviseli wa muganga lweyi a vitaniwaka Mark, a li: “Xin’we xa swikazratu swanga leswikulu i ku va kule ni vapswele vanga lava duhwaliki. Ha wubidzri byavu va ni swikazratu swa lihanyu. Nambileswi makwezru ni nuna wake va va hlayisaka, swa ni vavisa kuva mine hi ku kongoma ni nga swi koti ku va pfuna hi lani a ni navela ha kone.” Nambiloko hi swi xiya kumbe hi nga swi xiyi swikazratu leswi vamakwezru lava tizraka hi nkhinkhi va lavisanaka na swone, hi nga yentxa leswi hi nga swi kotaka akuva hi va patsra ka swikhongoto swezru. (1 Tes. 5:12, 13) Hi nga tlhela hi patsra ni vasati vavu ka swikhongoto swezru hikusa nseketelo wavu wu yentxa leswaku vamakwezru lavo va kota ku swi hetisisa ha hombe swiyavelo swavu.

10-11. Xana swikhongoto leswi hi swi hambaka na hi patsra vamakwezru hinkwavu swa mu nyonxisa Yehovha? Tlhamuxela.

¹⁰ Hi lani kutani hi swi voniki ha kone, minkama yin’wana hi patsra ntlawa wa vamakwezru ka swikhongoto swezru. Hi xikombiso, nambiloko hi nga yanakanyi hi mhunu wa kukazri hi ku kongoma, hi nga kombela leswaku Yehovha a pfuna vamakwezru lava pfaleliwiki madjele kumbe ku txhavelela lava feliwiki hi vazrandzriwa vavu. Nkulu wa kukazri lweyi a vitaniwaka Donald, a li: “Hi ni vamakwezru vanyingi lava kumanaka ni swikazratu lakakuva minkama yin’wana hi hamba swikhongoto leswi patsraka vhanu hinkwavu lava xanisekaka.”

¹¹ Xana swikhongoto leswo swa mu nyonxisa Yehovha? Ina! Phela a hi tivi swivileleko hinkwaswu swa vamakwezru lava hi nga na vone lipfumelweni. Xileswo, i swinene ku va hi patsra swivileleko swa vamakwezru hinkwavu lava hi nga na vone lipfumelweni. (Yoh. 17:20; Efe. 6:18) Swikhongoto leswo swi kombisa leswaku hi “zrandzra vamakwezru hinkwavu”.—1 Pet. 2:17.

HLAYA MAVITO YA LAVA U VA PATSRAKA KA SWIKHONGOTO

12. Xana ku xiyisisa ha hombe swi nga hi pfunisa kuyini ku patsra van’wana ka swikhongoto swezru?

¹² Xiyisisa ha hombe. Handle ka ku va hi patsra ntlawa wa vamakwezru ka swikhongoto swezru, i swinene ku va hi va hlaya hi mavito. Xana ku ni makwezru wa kukazri a bandleni dzraku lweyi a lavisanaka ni mavabyi ya ku kazrata? Xana ku ni mumpshwa lweyi a heliki ntamu kumbexana hi leswi a lavisanaka ni ndzringo wa kukazri a xikole? Xana ku ni papayi kumbe mamana wa kukazri lweyi a wundlaka n’wana na a li wuswake a mu ‘laya ni ku mu dondzrisa milawu ya Yehovha’? (Efe. 6:4) Loko u xiyisisa ha hombe u ta tiyisa lizrandzru ledzri u nga na dzrone hi van’wana nakone swi ta ku susumetela ku va patsra ka swikhongoto swaku.b—Rom. 12:15.

13. Hi nga yentxa yini akuva ka swikhongoto swezru hi patsra vamakwezru lava hi kalaka hi nga va tivi hi ku kongoma?

¹³ Patsra van’wana ka swikhongoto swaku hi mavito. Hi nga yentxa leswo nambi ka vhanu lava hi kalaka hi nga va tivi. Hi xikombiso, pimisa hi vamakwezru lava pfaleliwiki madjele lava nga matikweni ya ku fana ni Crimeia, Eritreia, Rússia ni Cingapura. Ka pajina dzrezru dzra jw.org, u nga kuma mavito ya lava pfaleliwiki madjele.c Mulaviseli wa kukazri wa muganga lweyi a vitaniwaka Brian, a li: “Ni gungule leswaku ku tsrala vito dzra makwezru lweyi a pfaleliwiki djele ni gama ni dzri hlaya hi zritu ledzri tlakukiki leswo swi ni pfuna ku dzrimuka makwezru lweyo ni va ni mu patsra ka swikhongoto swanga.”

14-15. Xana hi nga hamba swikhongoto leswi kongomiki hi ndlela yini?

¹⁴ Hamba swikhongoto leswi kongomiki. Michael lweyi kutani hi buliki ha yene, a li: “Loko ni dondzra madzrungula ya vamakwezru lava pfaleliwiki ni zama ku twisisa ndlela leyi a ni ta titwa ha yone loko a ni li ka xiyimu xa ku fana ni xavu. Na swi tiva leswaku a ni ta kazrateka hi nkatanga nakone a ni ta navela ku tiyiseka leswaku a hlayiseka ha hombe. Leswo swi ni yentxa ni swi tiva ha hombe leswi ni nga swi patsraka ka swikhongoto mayelanu ni vamakwezru lava pfaleliwiki madjele na va txhatile.”—Heb. 13:3.

¹⁵ Loko hi yanakanyisisa hi leswi wutomi bya vamakwezru lava va nga madjele byi nga xiswone, swi nga hi pfuna ku pimisa hi mintxhumu yin’wana leyi hi nga yi patsraka loko hi khongota. Hi xikombiso, hi nga khongota hi kombela leswaku a valaveleli va le madjele va kombisa wunene vamakwezru ni leswaku lava nga ni wulawuli va pfumelela vamakwezru leswaku va gandzrela Yehovha na va ntsrhunxekile. (1 Tim. 2:1, 2) Hi nga khongota hi kombela leswaku Yehovha a tiyisa bandla ledzri makwezru lweyi a pfaleliwiki djele a lumbaka dzrone ni leswaku vhanu lava kalaka va nga li vamakwezru va vona xikombiso xa makwezru lweyo a pfaleliwiki djele ni ku yingiseta dzrungula dzrezru. (1 Pet. 2:12) Hi nga yentxa ntxhumu lowu fanaka loko hi patsra vamakwezru lava kumanaka ni mindzringo yin’wana. Loko hi xiyisisa ha hombe, hi patsra vamakwezru hi mavito yavu ka swikhongoto swezru ni ku hamba swikhongoto leswi kongomiki, hi va na hi kombisa leswaku hi va ‘zrandzra ngopfu’.—1 Tes. 3:12.

KU VA NI VONELA LEDZRINENE MAYELANU NI SWIKHONGOTO SWEZRU

16. Xana hi nga va ni vonela ledzrinene hi swikhongoto swezru hi ndlela yini? (Matewu 6:8)

¹⁶ Hi lani hi swi voniki ha kone, swikhongoto swezru swi nga txintxa xiyimu xa kukazri lexi mhunu a kumanaka na xone. Nambitanu, hi fanela ku va ni vonela ledzrinene. Loko hi khongota, hi fanela ku dzrimuka leswaku a ho byela Yehovha ntxhumu lowu a kalaka a nga wu tivi nakone a hi fanelanga hi mu byela ndlela leyi a fanelaka ku xi lulamisa ha yone xiyimu lexo. Na hi nga si na swi tiva, Yehovha awa swi tiva leswi malandzra yake ma swi vilelaka. (Dondzra Matewu 6:8.) Kutani, ha yini hi fanela ku patsra van’wana ka swikhongoto swezru? Handle ka swivangelo leswi kutani hi buliki ha swone ka nhlokomhaka leyi, ku yentxa leswo i ndlela ya ku kombisa leswaku ha zron’weka hi vhanu van’wana. A lizrandzru dzri hi susumetela ku patsra van’wana ka swikhongoto swezru nakone Yehovha a nyonxa ngopfu loko a vona malandzra yake ma yetisela lizrandzru dzrake.

17-18. He xini xikombiso lexi hi pfunaka ku va ni vonela ledzrinene mayelanu ni swikhongoto swezru?

¹⁷ Nambiloko swikhongoto swezru swi voneka ingiki a swi txintxi a swiyimu swa kukazri, swi kombisa ndlela leyi hi va zrandzraka ha yone vamakwezru nakone Yehovha awa swi vona leswo. Vona xikombiso lexi landzrelaka: Yanakanya hi ndangu wa kukazri lowu nga ni vana vabidzri lavatsrongo, wa xinuna ni wa xisati. Lweyi wa xinuna awa vabya kutani lweyi wa xisati a kombela papayi wake a ku: “Papayi na ku kombela pfuna makwezru, a mavabyi yake i makulu!” Phela papayi wa vana lava a nga khondlanga mavoko, awa mu zrandzra n’wana lweyi a vabyaka nakone a mu hlayisa ha hombe. Papayi lweyo a nyonxa ngopfu hi ku vona ndlela leyi ntsrongwana lweyo a zron’wekaka ha yone hi makwavu lweyi a vabyaka lakakuva a kombela leswaku a mu pfuna.

¹⁸ Hi lani ku fanaka, Yehovha a hi kutxa kuva hi hlayisana ni ku patsra van’wana ka swikhongoto swezru. Loko hi yentxa leswo, hi kombisa leswaku a hi zron’weki hi wuhlayiseki byezru ntsena kambe hi kombisa leswaku ha va zrandzra vamakwezru nakone Yehovha awa swi vona leswo. (2 Tes. 1:3; Heb. 6:10) Handle ka leswo, hi lani hi swi voniki ha kone, ka swiyimu swin’wana swikhongoto swezru swi nga txintxa xiyimu lexi makwezru a kumanaka na xone. Kutani a hi yentxeni hinkwaswu leswi hi nga swi kotaka akuva hi dzrimuka ku patsra van’wana ka swikhongoto swezru.