Yesu I Muprista Wezru Lwenkulu Lweyi A Nga Ni Ntwelawusiwana

1-2. a) Ha yini Yehovha a zrumele N’wanake lani misaveni? b) Hi ta vona yini ka nhlokomhaka leyi? (Vaheberu 5:7-9)

KOLOMU ka 2.000 wa malembe lawa ma khalutiki, Yehovha Xikwembu Nkulukumba a zrumele N’wanake lweyi a mu zrandzraka ngopfu swinene a misaveni. Ha yini? Xin’we xa swivangelo a a li kuva a ntsrhunxa vhanu ka xidoho, lifu ni ku tlhela a helisa swikazratu hinkwaswu leswi vangiwaka ha Sathana. (Yoh. 3:16; 1 Yoh. 3:8) Yehovha a a swi tiva leswaku a mfambu lowu Yesu a a ta va na wone swanga mhunu wa nyama a wu ta ya wu mu lulamisela akuva a va Muprista Lwenkulu lweyi a nga ni ntwelawusiwana ni ku hi twisisa. Yesu a sungule ku tizra swanga Muprista Lwenkulu ntsrhaku ka loko a babatisiwile hi 29 N.Y.a

² Ka nhlokomhaka leyi, hi ta vona ndlela leyi a mfambu wa Yesu hi nkama lowu na a ha li lani misaveni wu mu pfuniki ha yone akuva a faneleka ngopfu ku tizra swanga Muprista Lwenkulu lweyi a nga ni ntwelawusiwana. Loko hi ya hi twisisa ha hombe ndlela leyi Yesu a viki “lweyi a fanelekaka hi ku helela” ku tizra swanga Muprista Lwenkulu, swi ta hi nabyalela ku tsrhindzrekela ka Yehovha nambiloko hi hela ntamu hi kola ka swidoho kumbe ku tsrana kwezru.—Dondzra Vaheberu 5:7-9.

N’WANA LWA ZRANDZREKAKA WA XIKWEMBU NKULUKUMBA A TA LANI MISAVENI

3-4. I yini leswi Yesu a swi tsrhikiki a matilweni nakone byi ve hi ndlela yini wutomi byake bya lani misaveni?

³ Hinkwezru hi ke hi va ni ku txintxa ka kukazri a wuton’wini, ka ku fana ni ku zruzra hi siya vapswele ni vanghanu lava hi va zrandzraka. Ku txintxa loko a ku vevukanga kambe a ku na mhunu lweyi a samiki a va ni ku txintxa ka ku fana ni loku Yesu a viki na kone. Yesu a ve wa ku sungula ni wa lisima ka tintsrumi hinkwatu leti nga matilweni. Yesu a a zrandzriwa ngopfu ha Yehovha nakone minkama hinkwayu a a nyonxa hi ku tizra ‘vokweni . . . ledzra xinene’ dzra Xikwembu Nkulukumba. (Amaps. 16:11; Amapr. 8:30) Nambitanu, Vafilipiya 2:7 yi hlaya leswaku “a tsrhike hinkwaswu leswi a a li na swone”, leswi liki a tsrhike xiyavelo xake lexi tlakukiki a matilweni akuva a ta ta hanya a makazri ka vhanu lava kalaka va nga hetisekanga a misaveni.

⁴ Vona leswi yentxekeliki Yesu a ku pswaliweni kwake ni ka masiku yake ya ku sungula loko a pswaliwile lani misaveni. Yesu a pswaliwe ka ndangu lowu a va li swisiwana, leswo hi swi tiva hi kola ka gandzrelo dzra xiyimu xa le hansi ledzri vapswele vake va dzri nyikeliki loko a pswaliwile. (Lev. 12:8; Luk. 2:24) Loko hosi ya ku biha Heroda a twe hi ta ku pswaliwa ka Yesu, a djule ku mu dlaya. Akuva ku huluxiwa wutomi bya Yesu, ndangu wake wu tsrutsrume wu ya Egipta wu ya tsrhama kone ku dzringana nkama wa kukazri. (Mat. 2:13, 15) Nakunene a wutomi bya Yesu bya lani misaveni a byi hambane hi ku helela ni lebyi a a li na byone a matilweni!

5. I yini leswi Yesu a swi voniki lani misaveni nakone mfambu wake wu mu lulamiselise kuyini akuva a va Muprista Lwenkulu? (Tlhela u vona ni mufoto.)

⁵ Nkama lowu Yesu a a li lani misaveni a vone vhanu vanyingi na va xaniseka. Handle ka ku ganaganeka, Yesu a feliwe hi vhanu lava a a va zrandzra, va ku fana ni papayi wake Yosefa lweyi a mu wundliki. A wutizrelini byake, Yesu a vone vhanu lava a va ni nhlokonho, lava a va fe matihlo, lava womiki swizro ni vapswele lava feliwiki hi vanavu. Yesu a va twele wusiwana vhanu lavo. (Mat. 9:2, 6; 15:30; 20:34; Mar. 1:40, 41; Luk. 7:13) I ntiyiso leswaku Yesu a a va vona vhanu na va xaniseka nkama lowu a a ha li matilweni kambe loko kutani a li lani misaveni swanga mhunu wa nyama, a a ku twisisa ha hombe ku xaniseka loku vhanu a va kumana na kone. (Eza. 53:4) Mfambu lowu a viki na wone lani misaveni wu mu pfune kuva a twisisa ha hombe ndlela leyi vhanu a va titwa ha yone loko va xaniseka ni ku vavisa loku a va ku twa. Ku fana ni vhanu van’wana, Yesu a a xaniseka, a a kazrala nambi ku xukuvala.

YESU A KOMBISE LESWAKU A A VA ZRANDZRA VHANU

6. Hi dondzra yini ka wuprofeta bya Ezaya mayelanu ni ntwelawusiwana lowu a wu ta kombisiwa ha Yesu? (Ezaya 42:3)

⁶ A wutizrelini byake, Yesu a kombise leswaku a a va twela wusiwana ni ku va zrandzra lava a va khomiwa hi ndlela ya ku biha hi van’wana. Hi ku titwa hi ndlela leyo, Yesu a a hetisisa wuprofeta. Ka Matsralwa ya Xiheberu, vhanu lava va humelelaka a wuton’wini va tlhela va va ni ntamu, minkama yin’wana va fanisiwa ni jaradi ledzri txheleteliwaka ha hombe kumbe minsinya leyi lehiki yi tlhela yi tiya. (Amaps. 92:12; Eza. 61:3; Yer. 31:12) Kambe swisiwana ni vhanu lava a va khomiwa hi ndlela ya ku biha hi van’wana, va fanisiwa ni lihlanga ledzri gotsrhekiki ni motsre lowu nga kusuhi ni ku timeka, ku nga mintxhumu leyi kalaka yi nge na lisima ka vhanu. (Dondzra Ezaya 42:3; Mat. 12:20) Muprofeta Ezaya a huhuteliwe ku tizrisa swikombiso leswo akuva a kombisa lizrandzru ni ntwelawusiwana lowu Yesu a a ta wu kombisa ka vhanu lava tolovelekiki ni lava a va voniwa na va nga pfuni ntxhumu hi vambeni.

7-8. Xana Yesu a byi hetisise hi ndlela yini wuprofeta bya Ezaya?

⁷ Matewu lweyi a a li muevhangeli, a tizrise mazritu ya Ezaya ka Yesu loko a te: “A ku na lihlanga ledzri gotsrhekiki ledzri a taka dzri tsrhova, nakone a ku na motsre lowu nga kusuhi ni ku timeka lowu a taka wu tima.” Yesu a hambe mahlolana manyingi akuva a pfuna lava a va khomiwa hi ndlela ya ku biha, lava nambi dumbo dzrinene a va nge na dzrone. A makazri kwavu a ku ni wanuna lweyi a a ni nhlokonho lweyi kumbexana a a yanakanya leswaku a a nge he ti swi kota ku dahiwa ni ku tlhela a va kun’we ni maxaka ni vanghanu vake. (Luk. 5:12, 13) Siku dzrin’wana a vone wanuna lweyi a a fe tindleve ni ku tlhela a va ni xikazratu ka ku vulavula. Yanakanya ndlela leyi wanuna lweyo a a titwa ha yone loko a vona vhanu na va bula kambe nikutsrongo a nga swi koti ku swi yingela leswi a va swi hlaya. (Mar. 7:32, 33) Kambe ka ha ni swimbeni.

⁸ A masikwini ya Yesu, Vayuda vanyingi a va pfumela leswaku vhanu lava a va xaniseka hi mavabyi kumbe va nge na wuswikoti bya kukazri, a vo khatisiwa hi kola ka swidoho swavu kumbe swa vapswele vavu. (Yoh. 9:2) Hi kola ka dondzro leyo leyi hoxekiki, minkama yinyingi vhanu a va titwa na va nga pfuni ntxhumu. Akuva a hetisisa wuprofeta bya Ezaya, Yesu a dahe lava a va xaniseka ni ku va pfuna ku tiva leswaku Yehovha a a zron’weka ha vone. Xana leswo swi hi dondzrisa yini mayelanu ni ndlela leyi Yesu a titwaka ha yone ha hine namunhla?

9. Xana Vaheberu 4:15, 16, yi swi kombisa hi ndlela yini leswaku Muprista wezru Lwenkulu wa le matilweni awa va twela wusiwana vhanu lava kalaka va nga hetisekanga?

⁹ Dondzra Vaheberu 4:15, 16. Hi nga tiyiseka leswaku Yesu minkama hinkwayu awa yi twisisa ndlela leyi hi titwaka ha yone. Xana swi tlhamuxela yini leswo? Mhunu lweyi a twisisaka ndlela leyi van’wana va titwaka ha yone a susumetiwa hi matitwela ni ku xaniseka ka vambeni. A xiga xa Xigriki lexi ndzruluteliwiki xi va “ku twisisa”, xi tlhamuxela kuva hi tibeka a mbangwini wa mhunu mun’wana ni ku tlhela hi titwa hi ndlela leyi a titwaka ha yone. Pawulo a tizrise xiga xa Xigriki lexi fanaka ka Vaheberu 10:34 hi ku hlaya leswaku hi va twela wusiwana vamakwezru lava nga madjele. Loko hi dondzra a Bibeleni mayelanu ni ndlela leyi Yesu a pfuniki vhanu ha yone, hi vona ntwelawusiwana lowukulu lowu a va kombisiki wone. A nga dahanga vhanu hi ku djula ku hetisisa nawu ntsena kambe a yentxe leswo hi leswi a a zron’weka ha vone ni ku tlhela a djula ku va pfuna. Hi xikombiso, loko Yesu a dahe wanuna lweyi a a ni nhlokonho a a ta va a mu dahe na a li kule kambe hi ku susumetiwa hi ntwelawusiwana, a yentxe hi ku mu khoma wanuna lweyo, leswi liki swi nga yentxeka Yesu a ve wa ku sungula ku mu khoma hi khambi dzra ku sungula ntsrhaku ka malembe manyingi. Yesu hi wunyaminyami a suse wanuna lweyi a a fe tindleve ka pongo dzra xitsrhungu a va a mu daha a xihundleni. Loko Mufarisi wa kukazri a dzrele wansati lweyi a a tisolile na a hlampswa milenge ya Yesu hi minyembeti yake a tlhela a yi sula hi misisi yake, Yesu a mu yimelelile wansati lweyo. (Mat. 8:3; Mar. 7:33; Luk. 7:44) Yesu a a nga fambeli kule ni vhanu lava a va vabya kumbe lava a va hambe swidoho leswikulu, ku hambana ni leswo a a va yamukela a tlhela a va tiyisa ni ku va khoma hi ndlela ya timpswalu vhanu va ku tasu. Na hine hi nga tiyiseka leswaku a ta hi komba timpswalu leti fanaka.

NDLELA YA KU YETISELA MUPRISTA WEZRU LWENKULU NAMUNHLA

10. He wani malulamiselo ya moya lawa hi nga ma tizrisaka namunhla akuva hi pfuna lava kalaka va nga voni ni lava fiki tindleve? (Tlhela u vona ni mifoto.)

¹⁰ Swanga valandzreli va ku dumbeka va Yesu, hi tikazratela ku mu yetisela hi ku kombisa lizrandzru, wunghanu ni ku kombisa van’wana ntwelawusiwana. (1 Pet. 2:21; 3:8) Nambileswi hi kalaka hi nga swi koti ku daha lava fiki tindleve kumbe matihlo, hi nga va pfuna hi tlhelo dzra moya. Hi xikombiso, mabuku yezru lawa ma seketeliwiki a Bibeleni swoswi ma kumeka hi ku tlula 100 wa tindzrimi ta mavoko. Akuva ku pfuniwa lava fiki matihlo kumbe lava kalaka va nga voni ha hombe, a mabuku yezru ma kumeka hi braile hi ku tlula 60 wa tindzrimi. Nakone a mintlhamuxelo ya mavhidiyu leyi kumekaka hi maawudiyu yi humesiwa hi ku tlula 100 wa tindzrimi. A malulamiselo lawa ma pfuna lava nga voniki ni lava fiki tindleve leswaku va tsrhindzrekela ka Yehovha ni ka N’wanake.

11. Xana nhlengeletanu ya Yehovha yi kombisa ku zron’weka loku Yesu a a li na kone hi vhanu van’wana hi ndlela yini? (Mintizro 2:5-7, 33) (Tlhela u vona ni mifoto.)

¹¹ A nhlengeletanu ya Yehovha yi tikazratela ku pfuna vhanu va tinxaka hinkwatu. Dzrimuka leswaku ntsrhaku ka loko Yesu a pfuxiwile, a txhulule moya wa ku xwenga ka hinkwavu lava a va tlhanganile hi Pentekoxta akuva mun’wana ni mun’wana a kota ku yingela madzrungula lamanene, “hi lidzrimi dzrake”. (Dondzra Mintizro 2:5-7, 33.) Hi ku landzra nkongomiso wa Yesu, a nhlengeletanu yi nyikela mabuku lawa ma seketeliwiki a Bibeleni hi ku tlula 1.000 wa tindzrimi. Tin’we ta tindzrimi leto ti khaneliwa hi vhanu vatsrongo ngopfu swinene. Hi xikombiso, tindzrimi ta kukazri ti khaneliwa hi vhanu vatsrongo a n’walungu ni le nyingitimu wa América. A nhlengeletanu yi hambe mabuku hi ku tlula 160 wa tindzrimi leto akuva vhanu lavo va ti khanelaka va kota ku dondzra madzrungula lamanene. Nakone mabuku yezru ma tlhela ma kumeka hi tindzrimi leti tlulaka 20 ka vhanu lava vitaniwaka Vasiganu. Vhanu vanyingi lava khanelaka tindzrimi leto va yamukela ntiyiso.

12. He xini xipfunu xin’wana lexi nyikeliwaka hi nhlengeletanu ya Yehovha?

¹² Handle ka kuva yi pfuna vhanu akuva va kuma madzrungula lamanene, nhlengeletanu ya Yehovha yi tlhela yi pfuna lava weliwaka hi timhangu ta ntumbuluku. Akuva leswo swi koteka, vamakwezru vanyingi va tinyikela akuva va pfuna vamakwavu lava vilelaka mpfunu. Nakone a nhlengeletanu yi tlhela yi pfunisa ka ku yaka mimbangu ya wugandzreli, lani vhanu va nga tlhanganaka kone akuva va dondzra leswi yengetelekiki mayelanu ni ndlela leyi Yehovha a va zrandzraka ha yone.

MUPRISTA WEZRU LWENKULU A NGA KU PFUNA

13. He tini tindlela tin’wana leti Yesu a ti tizrisaka akuva a hi pfuna?

¹³ Swanga mubyisi wezru lwenene, Yesu a zron’wekela swivileleko swa moya swa mun’wana ni mun’wana wezru. (Yoh. 10:14; Efe. 4:7) Minkama yin’wana swiyimu swa wutomi swi nga ha hi yentxa hi titwa ku fana ni motsre lowu nga kusuhi ni ku timeka kumbe lihlanga ledzri gotsrhekiki. Hi nga ha hela ntamu loko hi kumana ni mavabyi lamakulu, loko hi hluleka ku tlhaselela kungu dzra kukazri kumbe loko hi tsruvulelane tin’hwembe ni makwezru wa kukazri a bandleni. Hi nga tikazratela ku vona swa ku tlula swikazratu swezru nakone hi beka miyanakanyu ka dumbo dzrezru hi wumundzruku. Nakone hi kola ka swikazratu leswi hi kumanaka na swone swoswi, swi nga ha hi kazratela ku beka miyanakanyu yezru ka dumbo ledzri hi nga na dzrone hi wumundzruku. Dzrimuka leswaku Yesu awa swi vona swikazratu leswi u kumanaka na swone nakone awa yi twisisa ndlela leyi u titwaka ha yone. Hi kola ka leswi a ku twelaka wusiwana, Yesu a djula ku ku pfuna. Hi xikombiso, a nga tizrisa moya wa ku xwenga akuva a ku tiyisa loko u hele ntamu. (Yoh. 16:7; Tit. 3:6) Handle ka leswo, Yesu a tizrisa “vavanuna swanga tinyiko [vakulu]” ni vamakwezru van’wana a bandleni akuva va hi tiyisa, va hi seketela ni ku hi pfuna.—Efe. 4:8.

14. I yini leswi hi fanelaka ku swi yentxa loko hi titwa na hi hele ntamu?

¹⁴ Loko u hele ntamu, dzrimuka leswaku Yesu i Muprista wezru Lwenkulu nakone pimisa leswaku swi tlhamuxela yini leswo kwaku. Dzrimuka leswaku Yehovha a nga zrumelanga Yesu a ta lani misaveni akuva a nyikela wutomi byake swanga xitizrulo ntsena, kambe xivangelo xin’wana a ve kuva a twisisa ha hombe swikazratu leswi hine vhanu va ku kala ku hetiseka hi kumanaka na swone. Loko hi hela ntamu hi kola ka swidoho swezru kumbe hi godola, Yesu a lulamele ku hi pfuna “hi nkama wa kone”.—Heb. 4:15, 16.

15. Tlhamuxela mfambu lowu kombisaka ndlela leyi makwezru wa kukazri lweyi a a tsrhike nhlengeletanu a pfuniwiki ha yone akuva a tlhelela bandleni.

¹⁵ Yesu a kongomisa vhanu vake akuva va tikazratela ku djuletela ni ku pfuna lava tsrhikiki nhlengeletanu ya Yehovha. (Mat. 18:12, 13) Vona mfambu wa Stefano.b Ntsrhaku ka 12 wa malembe na a susiwe bandleni, a kunguhate ku ya hlalela ntlhanganu wa bandla. Yene a li: “A swi ni nabyalelanga kambe a ni djula ku tlhela ni tizrela Yehovha na ni li ni vamakwezru. A vakulu va ni yentxe ni titwa na ni yamukeleka. Minkama yin’wana a ni xukuvala ngopfu hi kuva ni tsrhike Yehovha kambe a vakulu va ni dzrimuxe leswaku Yehovha na Yesu va djula kuva ni tama ni tiyisela. Loko ni pfumelile ku tlhela ni va xiyenge xa bandla, vamakwezru va yamukele mine kun’we ni ndangu wanga hi lizrandzru. Hi ku famba ka nkama nkatanga a pfumele xidondzro xa Bibele nakone swoswi hi tizrela Yehovha xikan’we.” Leswi Muprista wezru Lwenkulu a nga ni timpswalu ni lizrandzru, a nyonxa ngopfu swinene loko a vona lava tisoliki na va yamukela mpfunu lowu va wu vilelaka akuva va tlhelela a bandleni.

16. Ha yini u tlangela hi leswi u nga ni Muprista Lwenkulu lweyi a nga ni ntwelawusiwana?

¹⁶ Nkama lowu na Yesu a ha li lani misaveni, a pfune vhanu vanyingi hi leswi a va swi vilela. Namunhla hi nga tiyiseka leswaku a ta hi pfuna nkama wun’wana ni wun’wana loko hi vilela mpfunu nakone a misaveni leyimpshwa a ta hi pfuna akuva hi ntsrhunxeka ka xidoho ni ku kala ku hetiseka. Hi mu tlangela ngopfu Yehovha lweyi hi ku susumetiwa hi lizrandzru ledzrikulu ni timpswalu a hi nyikiki N’wanake swanga Muprista Lwenkulu lweyi a nga ni ntwelawusiwana!