“ U Wa Lisima Ngopfu Swinene”!

1-2. Hi nga swi kotisa kuyini ku twisisa leswaku hi va lisima ka Yehovha?

MALANDZRA ya Yehovha i ya lisima ngopfu swinene kwake kambe man’wana a ma tivoni hi ndlela leyo. Swi nga yentxeka na vhanu va kukazri va ma khome hi ndlela leyi ma yentxaka ma titwisa xileswo. Xana u titwa hi ndlela leyi fanaka? Loko nhlamulo yaku a li ina, u nga swi kotisa kuyini ku twisisa leswaku u wa lisima ka Yehovha?

² Kumbexana swi nga pfuna ku kambisisa wudzrunguli bya le Bibeleni lebyi kombisaka ndlela leyi Yehovha a djulaka leswaku vhanu va voniwa ni ku khomiwa ha yone. N’wanake Yesu a a khoma vhanu hi ndlela leyinene ni ya xihlonipho. Ndlela leyi Yesu a khomiki ha yone vhanu a yi kombisa leswaku yene kun’we ni Papayi wake va va nyika lisima vhanu lava titsrongohataka nambiloko va titwa va nge na lisima. (Yoh. 5:19; Heb. 1:3) Ka xidondzro lexi, hi ta kambisisa tinhla tibidzri: 1) Ndlela leyi Yesu a pfuniki vhanu ku twisisa lisima ledzri va nga na dzrone ni 2) ndlela leyi hi nga tiyisekaka ha yone leswaku hakakunene hi va lisima ka Xikwembu Nkulukumba.—Hag. 2:7.

NDLELA LEYI YESU A PFUNIKI VHANU HA YONE KU TWISISA LESWAKU I VA LISIMA

3. Xana Yesu a va khomise kuyini vhanu va le Galileya lava a va mu djuletela akuva a va pfuna?

³ Nkama lowu Yesu a a zrezra a Galileya, vhanu vanyingi a va tsrhindzrekela kwake akuva va mu yingiseta ni ku tlhela va dahiwa mavabyi yavu. Yesu a vone leswaku vhanu a va “xanisiwa ni ku pepetsekisiwa ku fana ni tihamba leti kalaka ti nga na mubyisi”. (Mat. 9:36) Vazrangeli vavu va wukhongoti a va yanakanya leswaku vhanu lavo a va nge na lisima lakakuva a va ta va zron’wekela, a va tlhela va va vitana vhanu lava ‘zrukiwiki’. (Yoh. 7:47-49) Kambe Yesu a va nyike lisima vhanu lavo hi ku tinyika nkama wa ku va dondzrisa ni ku va daha mavabyi. (Mat. 9:35) Handle ka leswo, akuva a pfuna vhanu vanyingi, Yesu a wupfise vapostola vake leswaku va patsreka a ntizrweni wa ku zrezra a tlhela a va nyika wulawuli bya ku daha mavabyi ni swivavu.—Mat. 10:5-8.

4. Hi dondzra yini ka ndlela leyi Yesu a khomiki vayingiseti vake ha yone?

⁴ Hi ku va khoma hi ndlela leyinene ni ku va zron’wekela, Yesu a kombise leswaku yene ni Papayi wake va va nyika lisima vhanu lava hi makhambi manyingi va dzreliwaka. Loko u tizrela Yehovha kambe u ni ku ganaganeka ka leswaku u ni lisima kwake, pimisa hi ku zron’weka loku Yesu a ku kombisiki vhanu lava a va titsrongohata nakone a va djula ku dondzra kwake. Ku yentxa leswo swi ta ku pfuna ku vona ndlela leyi u nga wa lisima ha yone ka Yehovha.

5. I yini leswi hi swi tivaka hi wansati wa kukazri lweyi Yesu a mu tiviki a Galileya?

⁵ Yesu a nga dondzrisanga switsrhungu swa vhanu ntsena kambe a tlhele a kombisa ku zron’weka hi mun’wana ni mun’wana wavu. Hi xikombiso, ka wutizreli byake a Galileya, Yesu a tive wansati wa kukazri lweyi ku dzringana 12 wa malembe a a hluphiwa hi mavabyi ya ku humetela ngati. (Mar. 5:25) Mavabyi yake a ma mu yentxa a va mhunu lweyi a nyamiki hi ku ya hi Nawu, nakone mun’wana ni mun’wana lweyi a a ta mu khumba, na yene a a ta va lweyi a nyamiki. Swi nga yentxeka leswo swi yentxe leswaku a vhanu va nga hanyisani ngopfu na yene. Handle ka leswo a swi nga koteki kuva a gandzrela Yehovha ni vhanu vambeni a masinagogeni kumbe ka minkhuvu leyikulu. (Lev. 15:19, 25) Handle ka ku ganaganeka, wansati lweyo a xaniseke ngopfu he mizrini ne miyanakanywini.—Mar. 5:26.

6. Xana wansati lweyi a a ni mavabyi ya ku humetela ngati a dahisiwe kuyini?

⁶ Wansati lweyo a a kazratekile nakone a a djula leswaku Yesu a mu daha. Kambe a nga mu tsrhindzrekelanga hi ku kongoma, ha yini? Swi nga yentxeka a ve hi kola ka leswi a a ni tingana hi kola ka xiyimu xake. N’waninkama a a pimisa leswaku Yesu a a ta mu tlhelisa hi leswi a ngheniki a makazri ka vhanu na a nga basanga. Xileswo, a ye khumba mpahla ya Yesu na a kholwa leswaku hi ku yentxa leswo a a ta hanya. (Mar. 5:27, 28) A lipfumelo dzrake dzri mu hanyisile. Yesu a vutise leswaku i mani lweyi a mu khumbiki, hiloko wansati lweyo a mu yela a va a mu byela ntiyiso hinkwawu. Xana Yesu a yangulise kuyini?

7. Xana Yesu a mu pfunise kuyini wansati lweyi a a xaniseka ngopfu? (Marka 5:34)

⁷ Yesu a mu kombe wunene ni xihlonipho wansati lwiyani. A xiye leswaku wansati lwiyani a “a txhava a tlhela a zruzrumela”. (Mar. 5:33) Leswi a a twisisa matitwela yake, Yesu a mu zrulisile a va a mu vitana leswaku i ‘n’wanake’. Hi ku tizrisa zritu ledzro, Yesu a nga mu kombisanga xihlonipho ntsena kambe a tlhele a mu kombisa wunene ni lizrandzru. (Dondzra Marka 5:34.) Ko va ka khambi ledzri ntsena a Bibeleni lani Yesu a vitanaka wansati hi hlayela ledzro. Swi nga yentxeka Yesu a tizrise zritu ledzri dzra lizrandzru hi leswi a xiyiki leswaku wansati lwiyani a a txhava ngopfu swinene. Yanakanya ku zrula loku wansati lweyo a viki na kone! Loko Yesu a o kala a nga mu zrulisanga wansati lwiyani hi mazritu yake, a a ta va na a hanyisiwile hi le mizrini kambe na a titwa nandzru. Yesu a a ngo djula ku daha wansati lwiyani ntsena kambe a a djula ni ku va a swi tiva leswaku a a li wa lisima ka Papayi wake wa le matilweni.

8. He swini swikazratu leswi makwezru wa kukazri wa xisati wa le Brasil a kumaniki na swone?

⁸ Ni namunhla man’we ya malandzra ya Xikwembu Nkulukumba ma kumana ni swikazratu swa lihanyu leswi khumbaka ndlela leyi ma titwaka ha yone. Hi xikombiso, makwezru Mariaa lweyi a tizraka swanga phayona dzra nkama hinkwawu a Brasil, a pswaliwe na a nge na milenge nakone na a nge na voko dzra ximatsri. Yene a li: “A xikole vadondzrikulozri a va ni vitana hi mavito lawa a ma ni khunguvanyisa. Nambi maxaka yanga minkama yin’wana a ma ni khoma hi ndlela leyi a yi ni yentxa ni titwa na ni nge wa ntxhumu.”

9. I yini leswi pfuniki Maria ku vona leswaku i wa lisima ka Yehovha?

⁹ I yini lexi pfuniki makwezru Maria? Loko a ve Mboni ya Yehovha, vamakwezru va mu txhavelelile nakone va mu pfune ku tivona hi lani Yehovha a mu vonaka ha kone. Yene a li: “Loko no djula ku tsraletela mavito ya vamakwezru hinkwavu lava ni pfuniki, ni ku yanela a ma nge yaneli ka kadernu dzranga. Ni mu tlangela hi mbilu yanga hinkwayu Yehovha hi kuva a ni nyike ndangu wa moya wa ku hlamalisa!” Vamakwavu va Maria hi tlhelo dzra moya va mu pfune ku vona ndlela leyi a nga wa lisima ha yone ka Xikwembu Nkulukumba.

10. He swini swikazratu leswi Mariya Magadala a a lavisana na swone? (Tlhela u vona ni mifoto.)

¹⁰ Vona ndlela leyi Yesu a pfuniki mhunu mun’wana ha yone, ku nga Mariya Magadala. Wansati lweyo a a ni 7 wa mademona! (Luk. 8:2) Swi nga yentxeka leswo swi mu yentxe a tikhoma hi ndlela leyi kalaka yi nga tolovelekanga. Leswo a swi yentxa vhanu va fambela kule na yene. A xaniseke ngopfu nakone swi nga yentxeka a a txhava hi ku pimisa leswaku a a nga li kone lweyi a a mu zrandzra nambi wa ku djula ku mu pfuna. Swi nga yentxeka Yesu a hlongole mademona lawa a ma kazrata Mariya Magadala a va yene a ndzruluka mudondzrisiwa wake. He yini ndlela yin’wana leyi Yesu a pfuniki Mariya Magadala ha yone ku twisisa leswaku a a li wa lisima ka Xikwembu Nkulukumba?

11. Xana Yesu a kombise Mariya Magadala leswaku a a li wa lisima ka Yehovha hi ndlela yini? (Tlhela u vona ni mifoto.)

¹¹ Yesu a zrambe Mariya Magadala akuva a famba na yene kun’we ni vadondzrisiwa vake ka mayendzro yake ya ku zrezra.b Swanga mabindzru, Mariya Magadala a tame a pfuneka hi ku yingela Yesu na a dondzrisa vhanu van’wana. Yesu a tlhele a humelela kwake hi siku dzroledzri a pfuxiwiki ha dzrone. Yene a ve mun’we ka vadondzrisiwa va ku sungula lweyi Yesu a vulavuliki na yene hi siku ledzriyani. Yesu a patsre ni ku mu nyika xiyavelo xa ku ya byela vapostola vake leswaku a a pfuxiwile. Awee swikombiso swa ku hlamalisa swa leswaku Mariya Magadala a a li wa lisima ka Yehovha!—Yoh. 20:11-18.

12. I yini leswi yentxiki Lidia a titwa na a nge na lisima ka vhanu van’wana?

¹² Ku fana na Mariya Magadala, vhanu vanyingi namunhla va lwisana ni ku titwa na va nge na lisima ka vhanu van’wana. Makwezru wa xisati wa le Espanha lweyi a vitaniwaka Lidia a hlaya leswaku na a nge si pswaliwa mamana wake a a djula ku xixa nyimba . Awa yi dzrimuka ndlela leyi mamana wake a a nge na mhaka na yene ha yone ni ku tlhela a mu tlhava hi mazritu nambileswi a a ha li ntsrongo. Yene a li: “Nkongometo wanga a wuton’wini a a li ku djula ku yamukeliwa ni ku zrandzriwa hi vhanu van’wana. A ni txhava leswaku swi nge na mhaka ni ku tikazrata kwanga, vhanu a va nge ti za va ni zrandzrile hikusa mamana a a tsrhamela ku ni byela leswaku a ni mhunu munene.”

13. I yini leswi pfuniki Lidia ku tivona na a li wa lisima ka Yehovha?

¹³ Loko Lidia a sungule ku dondzra Bibele, mintxhumu yi txintxile. Ku khongota ka Yehovha, ku dondzra Bibele, mazritu ni swiyentxo leswinene swa vamakwezru swi mu pfune ku twisisa leswaku i wa lisima ka Yehovha. Yene a li: “Nuna wanga a tsrhamela ku ni byela leswaku a ni zrandzra ngopfu swinene nakone hi ku phindaphinda a ni dzrimuxa hi matsrhamela yanga lamanene. Na vone vanghanu vanga va ku zrandzreka va yentxa leswi fanaka.” Xana ku ni lweyi u mu tivaka a vilelaka mpfunu wa ku twisisa leswaku i wa lisima ka Yehovha?

TIVONI HI NDLELA LEYI YEHOVHA A KU VONAKA HA YONE

14. Xana 1 Samuel 16:7, yi ku pfunisa kuyini ku twisisa ndlela leyi Yehovha a va vonaka ha yone vhanu? (Vona bokisi ledzri liki: “Ha Yini Yehovha A Va Nyika Lisima Vhanu Vake?”)

¹⁴ Dzrimuka leswaku Yehovha a nga ku voni hi ndlela leyi vhanu va misava va ku vonaka ha yone. (Dondzra 1 Samuel 16:7.) Ka vhanu va misava, a mhunu a ni lisima loko a li leswaku a xongile, a ni mali yinyingi kumbe loko a dondzre ngopfu, kambe a swi hi ndlela leyo ka Yehovha. (Eza. 55:8, 9) Xileswo, a matsrhan’wini ya kuva u tivona hi lani misava yi ku vonaka ha kone, dzringisa ku tivona hi lani Yehovha a ku vonaka ha kone. U nga ha dondzra wudzrunguli lebyi kombisaka ndlela leyi Yehovha a a va nyika lisima ha yone vhanu lava a va tivona na va nge na lisima, va ku fana na Eliya, Nawomi na Ana. Nakone u nga ha dzringisa ku tsrala mimfambu leyi u viki na yone leyi ku tiyisekisaka leswaku Yehovha awa ku zrandzra nakone a ku nyika lisima. Handle ka leswo, u nga ha hamba wusetxhi ka mabuku yezru mayelanu ni tinhlokomhaka leti nga ku pfunaka ku vona leswaku u wa lisima.c

15. Ha yini Yehovha a a vona Daniyele swanga mhunu “wa lisima ngopfu swinene”? (Daniyele 9:23)

¹⁵ Dzrimuka leswaku a ku dumbeka kwaku ku ku yentxa u va wa lisima ka Yehovha. Loko muprofeta Daniyele a ni kolomu ka 90 wa malembe, a titwe na a “kazrale ngopfu swinene”, a nge he na ntamu. (Dan. 9:20, 21) Xana Yehovha a mu tiyise hi ndlela yini? Xikwembu Nkulukumba a zrumele ntsrumi Gabriyele leswaku yi ya mu dzrimuxa leswaku a a li “wa lisima ngopfu swinene” ni leswaku Yehovha a a swi yingelile swikhongoto swake. (Dondzra Daniyele 9:23.) I yini leswi yentxiki Daniyele a va wa lisima ka Xikwembu Nkulukumba? A ve ku zrandzra wululami ni ku dumbeka kwake ka Xikwembu Nkulukumba. (Ezek. 14:14) Yehovha a yentxe leswaku a wudzrunguli lebyo byi tsraliwa a Bibeleni akuva a hi txhavelela. (Rom. 15:4) Leswi u zrandzraka wululami u tlhela u dumbeka, Yehovha awa ku zrandzra nakone ku fana ni leswi a yingisetiki swikhongoto swa Daniyele, awa swi yingiseta ni swaku.—Mik. 6:8 ni ntlhamuxelo wa le hansi; Heb. 6:10.

16. I yini lexi nga ku pfunaka ku vona Yehovha swanga Papayi lweyi a ku zrandzraka?

¹⁶ Vona Yehovha swanga Papayi lweyi a ku zrandzraka. Yehovha a djula ku ku pfuna, ku nga li ku vonetela swihoxo swaku. (Amaps. 130:3; Mat. 7:11; Luk. 12:6, 7) Ku yanakanyisisa hi leswo swi pfune vhanu vanyingi lava lwisanaka ni ku titwa na va nge na lisima. Vona xikombiso xa makwezru Michelle wa le Espanha, lweyi a a titwa na a nga li wa ntxhumu hi kola ka leswi nuna wake a a mu tlhava hi mazritu ku dzringana malembe manyingi. A hlaya leswi: “Minkama hinkwayu loko ni titwa na ni nge na lisima, ni zama ku vona Yehovha na a ni tlakulile a tlhela a ni xingazra hi ndlela ya lizrandzru ni ku ni sizrelela.” (Amaps. 28:9) Makwezru Lauren wa le Djoni, loko a sungula ku titwa na a nga pfuni ntxhumu a tibyela leswi: “Loko Yehovha a ni kokele kwake hi pindzra dzra lizrandzru a tlhela a ni yentxa ni va ka nhlengeletanu yake malembe hinkwawu lawa nakone a ni tizrisa akuva a dondzrisa vhanu van’wana, handle ka ku ganaganeka awa ni zrandzra nakone a ni nyika lisima!”—Hox. 11:4.

17. I yini lexi nga ku pfunaka ku tiyiseka leswaku Yehovha awa ku yamukela? (Amapsalma 5:12) (Tlhela u vona ni mufoto.)

¹⁷ Tiyiseka leswaku Yehovha awa ku yamukela. (Dondzra Amapsalma 5:12.) Davhida a fananise ku yamukeliwa ha Yehovha ni ‘xitlhangu’ lexikulu lexi sizrelelaka lava ku lulama. Ku tiva leswaku Yehovha awa ku yamukela nakone awa ku seketela, swi nga ku pfuna ku hlula mimpimiso ya leswaku a u na lisima. Kambe u nga swi tivisa kuyini leswaku Yehovha awa ku yamukela? Hi lani hi swi voniki ha kone, Yehovha a ku tiyisekisa hi ku tizrisa Zritu dzrake. Handle ka leswo, a tizrisa vakulu va bandla, vanghanu vaku kun’we ni vhanu van’wana akuva a ku dzrimuxa leswaku u wa lisima kwake. Xana u fanela ku yangulisa kuyini ka swidzrimuxo leswo hinkwaswu?

18. Ha yini u fanela ku pfumela loko van’wana va ku kulungela?

¹⁸ Loko vhanu lava ku tivaka va tlhela va ku zrandzra va ku kulungela hi kola ka matsrhamela yaku lamanene, u nga pimisi leswaku vo ku hembela. Dzrimuka leswaku Yehovha a nga va na a tizrisa vone akuva a ku dzrimuxa leswaku awa ku yamukela. Michelle lweyi kutani hi buliki ha yene, a li: “Ha katsrongokatsrongo ni ya ni pfumela mazritu lawa van’wana va ni byelaka wone. I yimpi ya siku ni siku kambe na swi tiva leswaku hi leswi Yehovha a djulaka leswaku ni swi yentxa.” Michelle a pfuneke ngopfu hi mpfunu wa lizrandzru lowu vakulu va mu nyikiki wone. Swoswi a tizra swanga phayona nakone a pfunisa Betele na a li kaya.

19. Ha yini u fanela ku tiyiseka leswaku u wa lisima ka Xikwembu Nkulukumba?

¹⁹ Yesu a hi dzrimuxa leswaku hi va lisima ngopfu ka Papayi wezru wa le matilweni. (Luk. 12:24) Xileswo, hi nga tiyiseka leswaku hi va lisima ka Yehovha. Hi nga txhuki hi swi dzrivala leswo! Ingiki hi nga yentxa hinkwaswu akuva hi pfuna van’wana ku vona leswaku i va lisima ka Xikwembu Nkulukumba!