Swizro Swibidzri Leswimpshwa Swa Huvo Leyi Zrangelaka
HI 5 KA Outubru wa 2024 ku hambiwe xitiviso xa ku hlawuleka ka ntlhanganu wa lembe, lexi liki: Makwezru Jody Jedele na Jacob Rumph i swizro swa Huvo Leyi Zrangelaka ya Timboni ta Yehovha. Ha wubidzri byavu va ni malembe manyingi na va tizrela Yehovha.
Jody Jedele ni nsati wake Damaris
Makwezru Jedele a pswaliwe a Missouri, a Estados Unidos nakone a kulisiwe a ntiyisweni. Ndangu wake a wu tsrhama ka nsimu leyi a yi nga tizriwi ngopfu. Hi ndlela leyo, yene a tive vamakwezru va ku siyanasiyana lava a va ya pfunisa ka ntizro wa ku zrezra ka nsimu yoleyo. Lizrandzru ni wumun’we byavu swi mu kutxe ngopfu. Makwezru Jedele a babatisiwe na a ha li mumpshwa hi 15 ka Outubru wa 1983. A a wu zrandzra ngopfu ntizro wa ku zrezra nakone ntsrhaku ka loko a hete xikole, a teke wuphayona bya nkama hinkwawu hi Setembru wa 1989.
Na a ha li mumpshwa, vapswele vake a va mu teka kun’we ni makwavu wa xisati akuva va ya pfuxela Betele. Leswo swi pfune makwezru Jedele ni makwavu akuva va tibekela makungu ya ku ya tizrela a Betele, ku nga makungu lawa hinkwavu va ma tlhaseliki. Makwezru Jedele a tlhase a Betele dzra Wallkill hi Setembru wa 1990. A sungule hi ku tizra ka Ndzrawulu Ya Wubasisi ntsrhaku a tizra ka Ntizro Wa Ta Wudahu.
Hi nkama luwani, mabandla ya le kusuhi ya Espanhol a ma ya ma kula nakone a ma vilela vamakwezru. Makwezru Jedele a tipatsre na vone nakone a sungule ku dondzra a Xipanyola. Ntsrhaku ka nkamanyana a tive Damaris, makwezru wa xisati lweyi a a li phayona nakone a va li ka muganga wolowo wa wun’we. Hi wugamu va txhatile nakone va sungule ku tizra xikan’we a Betele.
Hi 2005 va tsrhike ku tizra Betele akuva va ya hlayisa vapswele vavu va ku dumbeka nakone hi nkama wolowo a va tizra swanga maphayona ya nkama hinkwawu. Makwezru Jedele a pfunise ka Xikole Xa Ntizro Wa Wuphayona nakone a tizre ka Xihubyana Xa Ku Vulavulisana Ni Swipiritana kun’we ni ka Xihubyana Xa Ku Yaka.
Hi 2013, vatekani va ka Jedele va tlhele va zrambiwa akuva va tizra Betele ka Ndzrawulu Ya Ku Yaka a Warwick. Ku sukela kolanu vone va tlhele va tizra a Patterson ni le Wallkill. Makwezru Jedele a tizre ka Ndzrawulu Ya Ku Dezenyara Ni Ku Yaka kun’we ni le ka Ndzrawulu Ya Ku Vulavulisana Ni Swipiritana. Hi Marsu wa 2023, a tivisiwe swanga mupfunisi wa Xihubyana Xa Ntizro. Loko a dzrimuka swiyavelo swake, a li: “Loko u yamukela swiyavelo leswimpshwa, minkama yin’wana u nga ha titwa na u taleliwa hi mintxhumu kambe hi kolanu u fanelaka ku dumba Yehovha hikusa hi yene a ku nyikaka ntamu wa ku yentxa leswi a ku kombelaka swone.”
Jacob Rumph ni nsati wake Inga
Makwezru Rumph a pswaliwe a Califórnia, a Estados Unidos. A wumpshweni byake mamana wake a a holile hi tlhelo dzra moya kambe a tikazratele ku dondzrisa n’wanake mintiyiso ya Bibele. Nakone lembe ni lembe makwezru Ramph a a pfuxela vhovho wake lweyi a a li Mboni ya Yehovha ya ku dumbeka. Yene a mu pfune ku va a nyonxela ntiyiso nakone loko a ni 13 wa malembe a kombele ku va a fambiseliwa xidondzro xa Bibele. Yene a babatisiwe na a ha li mumpshwa hi 27 ka Setembru wa 1992. Lexi nyonxisaka, mamana wake a tlhele a sungula ku hiseka hi tlhelo dzra moya nakone na yene papayi wake ni vamakwavu va sungule ku yentxa nhluvuku va tlhela va babatisiwa.
Na a ha li mumpshwa makwezru Rumph a vone ku nyonxa loku maphayona a ma li na kone. Xileswo, ntsrhaku ka loko a hete xikole a sungule ku tizra swanga phayona hi Setembru wa 1995. Hi 2000, a zruzrele a Equador akuva a ya tizra lomu ku nga ni xivileleko lexikulu. Na a li kohala a tive Inga, lweyi a a li phayona a Canadá lweyi hi wugamu va txhatiki xikanʼwe. Ntsrhaku ka loko va txhatile va tizre ka doropa dzritsrongo dzra le Equador lani a ku ni ntlawa wutsrongo wa vazrezri, namunhla ku nga ni bandla dzrikulu.
Hi ku famba ka nkama vamakwezru lava va yaveliwe ku tizra swanga maphayona ya ku hlawuleka nakone ntsrhakunyana ka leswo va ve ka ntizro wa ku yendzrela mabandla. Hi 2011 va zrambiwe ka turma dzra wu 132 dzra Xikole Xa Giliyadi. Loko va pase ka xikole lexo va ye tizrela ka ntlhanu wa matiko nakone va tikholise hi mintizro ya ku siyanasiyana ya ku fana ni ntizro wa Betele, ntizro wa wuzrumiwa ni ntizro wa ku yendzrela mabandla. Makwezru Rumph a tlhele a va ni tovoko dzra ku dondzrisa ka Xikole Xa Vazrezri Va Mfumu.
Hi kola ka ntungu wa COVID-19, vamakwezru lava va tlhelele a Estados Unidos. Vone va zrambiwe a Betele dzra Wallkill, lani makwezru Rumph a wupfisiwiki ka Xihubyana Xa Ntizro. Hi wugamu, va yaveliwe ku tlhela va tizra a Betele dzra le Equador lani makwezru Rumph a tizriki ka Xihubyana Xa Betele. Hi 2023 va zruzrele a Warwick. Hi Janeru wa 2024, Makwezru Rumph a tivisiwe swanga mupfunisi wa Huvo Leyi Zrangelaka. Loko a yanakanyisisa hi lomu a tizreliki kone, a li: “Lexi yentxaka xiyavelo xi va xa ku hlawuleka a hi mbangu kambe i vhanu lava u tizraka na vone.”
Hi wu nyika lisima ntizro wa vamakwezru lava nakone ha ha tama hi va ni ‘vamakwezru va ku fana na vone’.—Filp. 2:29.