Swivutiso Swa Vadondzri

He yini “miyanakanyu” leyi ku nga li khale Yehovha a taka yi beka a timbilwini ta vafumi?

Loko Mpfuletelo 17:16, 17 yi vulavula hi masungulo ya nhlomulo lowukulu, yi li: “A 10 wa timhondzro leti u ti voniki, ni xihazri xa nhova, swi ta nyenya nghwavana swi yi tekela mintxhumu ya yone hinkwayu swi tlhela swi yi siya na yi nga yambalanga ntxhumu, nakone swi ta da nyama ya yone swi va swi yi hisa hi ndzrilo hi ku helela. Hikusa Xikwembu Nkulukumba a ti nyike miyanakanyu ya ku yentxa ku zrandzra kwake, ina, ya kuva ti hetisisa miyanakanyu ya tone leyi fanaka hi ku nyikela wuhosi bya tone ka xihazri xa nhova.” Khale a mabuku yezru a ma hlaya leswaku a “miyanakanyu” leyi Yehovha a taka yi beka a timbilwini ta vafumi i ku va ku helisiwa wukhongoti bya madzrimi.

Kambe ku ve ni xivileleko xa kuva ku yampswisiwa matwisisela yezru. A “miyanakanyu” leyi Yehovha a taka yi beka a timbilwini ta vafumi i ku va va nyika “wuhosi bya tone ka xihazri xa nhova”. Akuva hi twisisa ndlela leyi wuprofeta lebyi byi taka hetiseka ha yone, a hi hlamuleni swivutiso swa kukazri.

I vamani lava patsrekaka ka wuprofeta lebyi? A “nghwavana” leyi vitaniwaka “Babilona Lwenkulu” yi yimela wukhongoti hinkwabyu bya madzrimi. A “xihazri xa nhova xa ku pshwuka” xi yimela Ntlhanganu Wa Matiko (Nações Unidas), lowu vumbiwiki hi 1919 na wu ni nkongometo wa ku beka ku zrula a misaveni hinkwayu nakone a wu vitaniwa Ntwananu Wa Matiko (Liga das Nações). (Mpful. 17:3-5) A “10 wa timhondzro” ti yimela mimfumu hinkwayu leyi seketelaka xihazri xa nhova.

He kwini ku yelana loku nga kone ka nghwavana ni xihazri xa nhova xa ku pshwuka? A nghwavana yi “tsrhamise” henhla ka xihazri xa nhova. Leswo swi tlhamuxela leswaku yi seketela ni ku zama ku lawula xihazri xa nhova.

I yini leswi taka yentxekela nghwavana? A xihazri xa nhova ni 10 wa timhondzro “swi ta nyenya nghwavana” lakakuva swi phanga wukosi bya yone ni ku komba hinkwavu ndlela leyi nghawavana yi bihiki ha yone. A xihazri xa nhova ni 10 wa timhondzro swi ta hetisisa wuyavanyisi bya Yehovha bya ku helisa nghwavana hi ku helela. (Mpful. 17:1; 18:8) Lebyo a ta va wugamu bya wukhongoti hinkwabyu bya madzrimi. Kambe na leswo swi nga si na yentxeka, Yehovha a ta hlohlotela mimfumu akuva yi yentxa ntxhumu wa ku a wu si na yentxeka a matin’wini ya vhanu.

Xana Yehovha a ta hlohlotela mimfumu kuva yi yentxa yini? A ta yentxa leswaku mimfumu yi hetisisa “miyanakanyu ya ku yentxa ku zrandzra kwake” kumbe kuva mimfumu yi ‘nyika xihazri xa nhova xa ku pshwuka ntamu ni wulawuli’, ku nga Ntlhanganu Wa Matiko. (Mpful. 17:13) Yanakanya hi leswi leswo swi tlhamuxelaka swone. Xana mimfumu ya vhanu yi to suketana yi titekela xiboho hi ku swi zrandzra yi nyika ntamu ni wulawuli xihazri xa nhova? Im-him! A wuprofeta byi kombisa leswaku Xikwembu Nkulukumba hi yene a taka va hlohlotela akuva va yentxa leswo. (Amapr. 21:1; Dzringanisa ni Ezaya 44:28.) Xana ku txintxa koloko ku ta yentxeka ha kutsrongokutsrongo? Im-him! Ku ta yentxeka hi xitxhuketa. Kolanu, a xihazri xa nhova xi ta tizrisa ntamu lowu xi wu kumiki akuva xi hetisisa wuyavanyisi bya Yehovha bya ku helisa wukhongoti bya madzrimi hi ku helela.

Kutani i yini leswi hi fanelaka ku swi yimela? A hi fanelanga ku yimela leswaku madzrungula ma hlaya leswaku mimfumu ha katsrongokatsrongo yi ya yi seketela ngopfu Ntlhanganu Wa Matiko. Hi fanela ku yimela leswaku hi ndlela ya xitxhuketa Yehovha a ta yentxa leswaku mimfumu yi nyikela ntamu wa yone ka xihazri xa nhova. Loko leswo swi yentxeka hi ta swi tiva leswaku a nhlomulo lowukulu wu kusuhi ni ku sungula. Na ha ha yimela leswaku leswo swi yentxeka, “a hi tsrhameni na hi pfukile hi va hi tizrisa wuswikoti byezru bya ku yanakanya” hikusa ku nga li khale hi ta vona ku txintxa koloko ka xitxhuketa!—1 Tes. 5:6.