Mintlhamuxelo Ya Xibukwana Xa Wutomi Ni Wutizreli Byezru
3-9 KA JUNYU
WUKOSI BYI NGA BIBELENI | BA-LE-GALATIA 4-6
“‘Xikombiso Xa Ku Fanekisela’ Lexi Nga Ni Ntlhamuxelo Kwezru”
Perspicaz vol-1 p. 63 § 3
Agari
Hi ku ya hi mupostola Pawulo, Agari swanga xikombiso xa ku fanekisela afa a yimela tiko dzra Israyele wa nyama, ledzri tlhanganisiwiki na Yehovha hi twananu wa Nawu, lowu khanguliwiki a Nhaveni ya Sinayi, twananu lowu belekiki vana va ‘ntsrhamandangu kumbe xikazrawa’. Hi nkonta ya xiyimu xa xidoho xa vhanu, a tiko ledzri a dzri swi kotanga ku hetisisa twananu lowu. Hi nkonta ya leswo, a swi kotekanga kuva va-Israyele va va vhanu lava tsrhunxekiki, kambe va khatisiwe swanga vhanu lava nga ni xidoho ni ku faneliwa hi lifu; xileswo a va li swikazrawa. (Yh 8:34; Ro 8:1-3) Yerusalema wa masiku ya Pawulo afa a yimela Agari, hikusa a xifundzra xa Yerusalema, a xi yimela nhlengeletanu ya Israyele wa nyama, afa a li wukazraweni, kun’we ni vanakwe. Kutani, vakriste lava belekiwiki hi moya, i vana va ‘Yerusalema wa le henhla’, wansati wa ku fanekisela wa Xikwembu Nkulukumba. Yerusalema lweyi, ku fana na Sara, wansati lwa tsrhunxekiki, a nga zanga a va xikazrawa. Kambe, ku fana na Izaki lwa a a xanisiwa hi Ismayele, a vana va ‘Yerusalema wa le henhla’ lava ntsrhunxiwiki hi N’wana, va xanisiwile a mavokweni ya vana va Yerusalema wa xikazrawa. Nambitanu, Agari ni n’wanakwe va hlongoliwile, leswi yimelaka ku yaliwa ka Israyele wa nyama swanga tiko hi Yehovha.—Ga 4:21-31; vona nakambe Yh 8:31-40.
Sentinela 15/10/2014 p. 10 § 11
Vana Ni Lipfumelo Ledzri Tiyiki Ka Mfumu
A ntwananu wa Abrahamu wu hetiseke hi ku kongoma ka vatukulu vakwe loko va nhingene a tikweni dzra xidumbiso, kambe matsralwa ma komba leswaku a swiyenge swa ntwanano lowu swi tlhela swi hetiseka hi tlhelo dzra moya. (Ga 4:22-25) Ka ku hetiseka loku lokukulu, swanga hi lani mupostola Pawulo a tlhamuxeliki hi ku huhuteliwa hi moya, a xiyenge xa ku sungula xa mbewu ya Abrahamu i Kriste, xa wubindzri ku hlayiwa vakriste lava totiwiki hi moya va 144.000. (Ga 3:16, 29; Mpf 5:9, 10; 14:1, 4) Wansati lwa humesaka mbewu i ‘Yerusalema wa le henhla’—Xiyenge xa le tilweni xa nhlengeletanu ya Xikwembu Nkulukumba, leyi nga ni swivumbiwa swa moya leswi dumbekiki. (Ga 4:26, 31) Hi ku ya hi xidumbiso xa ntwanano wa Abrahamu, a mbewu ya wansati a yi ta buyisa matovoko a vhan’wini.
Djulisisa Tindzralama Ta Moya
Sentinela 01/04/2009 p. 13
Xana A Wu Swi Tiva?
Ha yini Yesu a xikhongotweni xakwe a vitane Yehovha swanga “Abba Tatana”?
Zritu dzra xi-Aramayika dzri liki ʼab·baʼʹ dzri nga ha ku ‘tatana’ kumbe ‘Yoh Tatana’. A ka makhambi mazrazru a Matsralweni lani zritu ledzri dzri humelelaka, i xiyenge xa xikhongoto nakone xi tizrisiwa ku kombetela ka Tatana wa le tilweni, Yehovha. Dzri tlhamuxela yini zritu ledzri?
Enciclopédia Bíblica Padrão Internacional dzri li: “Ka lidzrimi ledzri tolovelekiki a masikwini ya Yesu, ʼabbāʼ a ku sunguleni a ku li zritu dzra xinghanu ni dzra xihluwa lexi vana a va xi kombisa vapswele.” A ku li ndlela ya lizrandzru ya ku khanela ni tatana nakone a ku li mazritu ya ku sungula lawa n’wana afa a ma hlaya loko a sungula ku khanela. Yesu a tizrisi zritu ledzri na a kombela hi ku tlhaveka ka Tatana wakwe. A xizrambeni xa Getsemani, na a li kusuhi ni ku dlayiwa, Yesu a khongote ka Yehovha a ku “Abba, Tatana”.—Marka 14:36.
Buku ledzro dzri tlhela dzri ku: “Ku tizrisa zritu ʼAbbāʼ swanga ndlela ya ku khanela ni Xikwembu Nkulukumba, a swi nga tolovelekanga ka mabuku ya va-Yuda hi nkama wa va-Griki ni va-Roma, hikusa a va-Yuda a va vona ingiki ku khanelisa leswo i ku delela Nkulukumba.” Nambitanu “ku va Yesu . . . a tizrise zritu ledzri loko a khongota a swi hlaya leswaku afa a kandzrakanya mhaka leyi a yi hlayiki ya leswaku i N’wana wa Xikwembu Nkulukumba.” Matsralwa mambeni mabidzri lani ku tizrisiwaka zritu “Abba”—lawa ha wubidzri ka wone ma tsraliwiki hi mupostola Pawulo—ma kombisa leswaku vakriste va le dzaneni dzra ku sungula na vone a va dzri tizrisa zritu ledzri loko va khongota.—Ba-le-Roma 8:15; Ba-le-Galatia 4:6.
Sentinela 01/11/2010 p. 15
Xana A Wu Swi Tiva?
Mupostola Pawulo afa a hlaya yini loko a ku ‘hikusa ndzri zrwala a mizrini yanga a mintsrhosi ya Yesu’?—Ba-le-Galatia 6:17.
▪ Swi nga ha yentxeka vayingiseti va Pawulo a dzaneni dzra ku sungula va twisise mazritu yakwe hi tindlela tinyingi. Hi xikombiso, a minkameni ya Bibele a ku tizrisiwa a nsimbi leyi hisaka ngopfu leswaku ku fungiwa vabohiwa lava kumiwiki yimpini, vhanu lava yivaka a titempeleni ni swikazrawa. Loko mhunu a fungisiwa xileswo, a swi kombisa leswaku a dzrelekile.
Nambitanu, a hi mimfungu hinkwayu leyi a yi dzreleka. Vhanu vanyingi va khale a va yi tizrisa ku kombisa leswaku va lumba lixaka kumbe wukhongoti bya ku kazri. Hi xikombiso, hi ku ya hi Dicionário Teológico do Novo Testamento “va-Siriya afa va teka Hadade na Atárgatis swanga swikwembu leswa ku xwenga na kone afa va ni mimfungu ya swone a mavokweni ni le tinhan’wini tavu . . . kambe lava a va gandzrela xikwembu lexi vitaniwaka Dionísio a va li ni ntsrhosi wa kamba dzra hera.”
Vatlhamuxeli vanyingi va nan’waka va kholwa leswaku Pawulo afa a vulavula hi mintsrhosi leyi a yi kumiki hi ku bukuteliwa a ntizrweni wakwe wa wuzrumiwa. (2 Ba-le-Korinte 11:23-27) Swi nga ha yentxeka leswaku Pawulo a hlaya ndlela leyi a a hanya ha yone leyi mu kombisiki swanga mukriste ku nge mimfungu ya hakakunene.
10-16 KA JUNYU
WUKOSI BYI NGA BIBELENI | BA-LE EFESA 1-3
“Wuzrangeli Bya Yehovha Ni Ntizro Wa Byone”
Perspicaz vol-3 p. 554 § 6
Xihundla Xa Ku Xwenga
Mfumu wa Wumesiya. Ka mapapela yakwe, Pawulo a nyikela ntlhamuxelo lowu twisisekaka wa xivoniso mayelanu ni xihundla xa ku xwenga xa Kriste. Ka Ba-le-Efesa 1:9-11 Pawulo a vulavula hi ku va Nkulukumba a tivisa ‘xihundla xa ku xwenga’ xa ku zrandzra kwakwe, a li: ‘Hi wumbilu byakwe, lebyi a nga titiyisela khale a li yene (a mhaka leyi yi taka humelela a ku heleni ka minkama) leswaku: ‘A ta tlhanganisa hinkwaswu, a swa le matilweni ni swa le misaveni, ku Kriste, a va nhloko ya swone lweyi hi nga nyikiwa ha yene pfindla, hi leswi hi nga yimiseliwa khale, hi ku tiyisa loka khale ka lwe a yentxaka hinkwaswu hi kungu dzra ku zrandzra kwakwe.’ Mfumu wa Wumesiya wa Xikwembu Nkulukumba wu hamba xiyenge xa ‘Xihundla xa ku xwenga’. A ‘swa le matilweni’, leswi Pawulo a vulavulaka ha swone i va da pfindla va Mfumu wa le matilweni kun’we na Kriste. A ‘swa le misaveni’ hi lava taka fumiwa ha yene la misaveni. Yesu a tlhamuxele vadondzrisiwa vakwe leswaku a xihundla xolexo xa ku xwenga xi fambisana ni Mfumu, a te: ‘N’wine n’wi nyikiwe ku tiva xihundla xa mfumu wa Xikwembu Nkulukumba.’—Mr 4:11.
Sentinela 15/07/2012 pp. 27-28 §§ 3-4
‘Yehova Mun’we’ A Hlengeleta Ndangu Wakwe
Moxe a va byele leswi va-Israyele: ‘Yehova, Xikwembu Nkulukumba wezru i Yehova mun’we.’ (Dt 6:4) Swiyentxo ni nkongomento wa Yehovha swa fambisana. Kutani, ‘a ku heteleleni ka minkama’ Xikwembu Nkulukumba a sungule ku tizrisa ‘wuzrangeli’, ku nga lulamiselo ledzri taka tlhanganisa swivumbiwa swakwe hinkwaswu. (Dondzra Ba-le-Efesa 1:8-10.) Wuzrangeli lebyi byi ta hetisisa nkongometo wa byrone hi swiyenge swibidzri. Xiyenge xa ku sungula xi lulamisela bandla dzra vatotiwa leswaku va kuma wutomi a matilweni hansi ka wulawuli bya Yesu lweyi a nga Nhloko ya vone ya moya. Xiyenge lexi xi sungule hi Pentekosta dzra 33 a Nguveni Yezru loko Yehovha a sungula ku hlengeleta lava taka fuma na Kriste a matilweni. (Min 2:1-4) Leswi vatotiwa va hlayiwaka lava lulamiki na kone va faneliwaka hi ku kuma wutomi hi kola ka gandzrelo dzra tizrulu dzra Kriste, va swi tiva leswaku va tekiwa swanga ‘vana va Xikwembu Nkulukumba’.—Ro 3:23, 24; 5:1; 8:15-17.
Xiyenge xa wubidzri xi lulamisela vhanu lava taka tsrhama a Paradeyisini kola misaveni hansi ka Mfumu wa Kriste wa wu Mesiya. ‘Xitsrhungu lexikulu’ xi hamba xiyenge xa ku sungula xa vhanu volavo. (Mpf 7:9, 13-17; 21:1-5) Hi nkama wa Mfumo wa Gidi dzra Malembe, vhanu va ntsrandzra-vahlayi lava taka pfuxiwa va ta tlhanganisiwa kun’we ni lava xitsrhungu lexikulu. (Mpf 20:12, 13) Yanakanya ndlela leyi a pfuko dzra vafi dzri taka kombisa wumun’we byezru ha yone! Loko ku hela malembe ya gidi ‘mintxhumu lemi nga kone la misaveni’ mi ta dzringiwa ka ndzrigo wa ku hetelela. Lava taka hlula ka ndzrigo lowo va ta tekiwa swanga ‘vana va Xikwembu Nkulukumba’.—Ro 8:21; Mpf 20:7, 8.
Djulisisa Tindzralama Ta Moya
Sentinela 15/02/2013 p. 28 § 15
U Nga Pfumeleli Ntxumu Xi Ku Sivela Ku Yamukela Ku Phatima Ka Xikwembu Nkulukumba
Ku tiyisela kwezru a ku yentxeni ka ku zrandzra ka Yehova ku ta pfuna vambeni ku yamukela ku phatima. Loko a tsralela bandla dzra le Efesa Pawulo a te: ‘Ndzra kombela akuva ndzri nga heli ntamu a ku xanisekeni kwanga hi nkonta yenu, hikusa i xidzrumu xenu.’ (Ef 3:13) Xana mahlomulo ya Pawulo a ma tlhamuxela ‘xidzrumu’ ku va-Efesa hi ndlela yini? A ku tiyimisela loku Pawulo afa a li nakone ka ku va tizrela, nambi leswi afa a ni mahlomulu, a ku komba va-Efesa leswaku a ndjombo leyi afa va li na yone swanga vakriste afa yi ‘tlakuke’ swinene naswone afa yi li ni lisima dzrikulu. Loko Pawulo afa e hela ntamu, xana vamakwavu a va nga ti yanakanya leswaku wuxaka byavu na Yehovha, wutizreli byavu, ni dumbo dzravu a swi nga li swa lisima? Ku tiyisela ka Pawulo ku twalise wukriste ku tlhela ku kombisa leswaku ku va mudondzrisiwa swi ni lisima.
Achegue-se a Jeová p. 299 § 21
‘Ku Tiva Lizrandzru Dzra Kriste’
Zritu dzra xigriki ledzri liki ‘ku tiva’ dzri hlaya ku tiva ntxhumu ‘hi ku kongoma kumbe ku va ni mfambu ka wone’. Loko hi kombisa lizrandzru swanga hi lani Yesu a kombisiki hakone, hi ku yentxela van’wana leswinene, ni ku hlamula swivileleko swavu ni ku va dzrivalela swi huma mbilwini, hi va na hi twisisa matitwela yavu hakunene. Hi ndlela leyo, hi tlhasela ku ‘tiva lizrandzru dzra Kriste loli tlulaka ku tiva hinkwaku’ hi ku kongoma. Nakone hi nga dzrivali leswaku, nkama lowu hi yaka hi fana na Kriste, hi ya hi tsrhindzrekela ka lweyi Kriste a yetisaka yene hi ku helela, ku nga Xikwembu Nkulukumba, Yehovha.
17-23 KA JUNYU
WUKOSI BYI NGA BIBELENI | BA-LE-EFESA 4-6
‘Tlhomani Switlhomo Hinkwaswu Swa Xikwembu Nkulukumba’
Sentinela 05/2018 p. 27 § 1
Vampswha—Yimani Mi Tiya Mi Ta Kota Ku Hlula Diyavulosi
Mupostola Pawulo a fananise mukriste ni masotxha lama nga ku lweni. Nakunene, a yimpi yezru i ya moya, ku nga li ya nyama. Nambitasu, valala vezru i va ntshima. Sathana ni mademona i valwi lava nga ni wuswikoti lebyikulu. A ku sunguleni, hi nga ha vona ingiki a hi nge swi koti ku lwa na yene, ngopfu-ngopfu vampswha. Xana vampswha va nga swi kota ku hlula nyimpi leyi? Ina, va nga swi kota, na kone va hlula swoswi! Hi ndlela yini? Hikusa va ya va ‘tiyisiwa a Hosini’. Kambe va yentxa leswi tlulaka ku kombela ntamu ka Nkulukumba. Va tilulamisela ku lwa. Ku fana ni masotxha lama wupfisiwiki ha hombe, va ‘tlhoma switlhomo hinkwaswu swa Xikwembu Nkulukumba’.—Dondzra Ba-le-Efesa 6:10-12.
Sentinela 05/2018 pp. 28-29 §§ 4, 7, 10
Vampswha—Yimani Mi Tiya Mi Ta Kota Ku Hlula Diyavulosi
Hi ku fanana, ntiyiso lowu hi wu dondzraka mayelanu ni Xikembu Nkulukumba wa hi sizrelela ka makhombo ya moya lama vangiwaka hi tindondzro ta madzrimi. (Yh 8:31, 32; 1Yh 4:1) Loko hi ya hi wu zrandzra swinene ntiyiso wa Bibele, swi ta ya swi hi nabyalela ku teka ‘muhelo’ kumbe xisizrelelo leswi hlayaka ku hanya hi milawu ya wululami. (Ps 111:7, 8; 1Yh 5:3) Ntlhantakubidzri, loko hi ya hi wu twisisa ku yampswa ntiyiso lowu pfaka ka Zritu dzra Xikwembu Nkulukumba, hi ta ya hi tiya ni ku wu tizrisa akuva hi hlula valala vezru.—1Pe 3:15.
A milawu ya ku lulama ya Yehovha yi fana ni xixizrelo a xifuveni lexi sizrelelaka mbilu yezru ya ku fanekisela. (Pr 4:23) A sotxha a dzri nge txhuki dzri txintxa a muhelo kumbe xisizrelelo xa nsimbi leyi tiyiki hi ya ku ka yi nga tiyanga, hi la ku fanaka a hi nge txintxi milawu ya ku lulama ya Yehovha hi yezru. A wutivi byezru byi hikiwile nakone a byi hi sizreleli hi lani hi vilelaka ha kone. (Pr 3:5, 6) Xileswo, nkama hinkwawu hi ta lavisisa leswaku ‘mabandi ya nsimbi’ ya muhelo lawa Yehovha a hi nyikiki ma ha tama ma sizrelela mbilu yezru.
Ku fana ni milenge ya masotxha ya va-Roma leyi a yi sizreleliwile hi swifambu leswaku yi ya nyimpini, a milenge ya vakriste na yone yi fanela ku yambexiwa swifambu swa ku fanekisela leswi va pfunaka ku zrezra dzrungula dzra ku zrula. (Eza 52:7; Ro 10:15) Nambitasu, swi djula xixixi kuva hi vulavula loko hi pfulekeliwa hi mukhandlu. Roberto wa 20 wa malembe a li: “A ni txhava ku zrezrela vadondzri-kulozri. A ni yanakanya leswaku a ni ni tingana. Loko ni lavisa ntsrhaku, ni vona leswaku a ku nge na xivangelo. Kambe swoswi ni nyonxile hi ku zrezrela tintanga tanga.”
Sentinela 05/2018 pp. 29-31 §§ 13, 16, 20
Vampswha—Yimani Mi Tiya Mi Ta Kota Ku Hlula Diyavulosi
Min’wana ya ‘mintumbana’ lemi pfuzraka leyi Sathana a nga yi tizrisaka i madzrimi mayelanu na Yehovha—a hlaya leswaku Yehovha a nga na mhaka na wene nakone wene a wu zrandzreki. Ida lweyi a nga ni 19 wa malembe a lwisana ni miyankanyu ya ku titwa a nga pfuni ntxhumu. Ida ali: “A ni tsrhamela ku titwa ni li kule na Yehovha ni leswaku yene a nga swi djuli ku va munghanu wanga.” A swi kotisa kuyini ku lwisana ni mimpimiso leyo? “Mintlhanganu i xisizrelelo xikulu xa lipfumelo dzranga”, hi ku hlaya ka lda. “A no ya ntsena, ni ya tsrhama ni va ni humisa xiswoswo na ni nga zanga ni nyikela yangulu, hi ku yanakanya swaku a ku nge na lweyi a a ta nyonxela ku twa yangulu yanga. Swoswi ni lulamisela mintlhanganu ni ku tlhela ni yangula kabidzri kumbe kazrazru. A Swi nabyali, kambe na nyonxa loko ni lulamisela ni tlhela ni zama ku yangula. Nakone vamakwezru va ni kutxa. Loko ni ya mintlhanganwini ni muka na ni tiva leswaku Yehovha awa ni zrandzra.”
Swanga hi lani xitlontlo kumbe kapaseti dzri sizrelelaka a nhloko ya musotxha, ‘ku lavisela ka huluku’ loku hi nga na kone ku sizrelela miayanakanyu yezru ni wuswikoti byezru bya ku yanakanya. (1Te 5:8; Pr 3:21) Ku lavisela ku hi yentxa hi lavisisa swidumbiso swa Xikwembu Nkulukumba ku tlhela ku hi pfuna ku lavisana ni swikazratu hi ndlela leyinene. (Ps 27:1, 14; Min 24:15) Kambe loko hi djula leswaku xitlontlo xi tizra, hi fanela ku xi yambala a nhlokweni yezru, hi nga xi khomi ntsena a mavokweni.
Pawulo a fananise zritu dzra Xikwembu Nkulukumba ni tlhazri ledzri Yehovha a hi nyikiki dzrone. Kambe hi fanela ku dondzrela tindlela ta ku dzri tizrisa ha hombe loko hi yimela lipfumelo dzrezru—kumbe loko hi lulamisa mayanakanyela yezru. (2Ko 10:4, 5; 2Tm 2:15) Hi nga byi yampswisisa kuyini wuswikoti byezru? Sebastian wa 21 wa malembe a hlaya leswi: “Ni tsrala ndzrimana yin’we ka ndzrima yin’wana ni yin’wana loko ni tidondzrela Bibele. Ni longoloxa tindzrimana leti ni ti zrandzraka. Hi ndlela leyi, ni titwa na ni fambisana ni miyanakanyu ya Yehovha.” Daniel, lweyi hi buleke ha yene ntsrhaku, a li: “Loko ni tihambela dondzro yanga ya Bibele,ni bekisa tindzrimana leti ni vonaka leswaku ti ta pfuna vhanu a nsin’wini. Ni gungule leswaku vhanu va swi nyonxela loko va vona leswaku wa dzri zrandzra Bibele nakone u yentxa hi lani u nga kotaka ha kone akuva u va pfuna.”
Djulisisa Tindzralama Ta Moya
Perspicaz vol-3 p. 527 § 2
Ku Xwenga
Moya wa ku xwenga. Ntamu kumbe moya wa Yehovha lowu tizraka wu kongomisiwa ha yene na kone wu hetisisa leswi a swi djulaka nkama hinkwawu. Wu basile, wu tengile, wu xwengile, wu lulamiseleliwe ku tizrisiwa hi Xikwembu Nkulukumba hi ndlela leyinene. Xileswo, wu vitaniwa ‘moya wa ku xwenga’ni ‘moya lowa ku xwenga.’ (Ps 51:11; Lk 11:13; Ro 1:4; Ef 1:13) A moya wa ku xwenga lowu tizraka ka munhu i ntamu lowu yelanaka ni ku xwenga ni ku basa. Swiyentxo hikwaswu leswi swi nga basangakiki swi ‘hlunamisa’ moya lowu. (Ef 4:30) Nambi leswi moya wa ku xwenga wu kalaka wu nga li munhu, wu tlhamuxela wumunhu bya Yehovha lebyi xwengiki, xileswo wu nga ‘hlunamisiwa’. Xiyentxo xi’nwana ni xi’nwana xa ku biha xi ‘tima moya’. (1Te 5:19) Ku phikelela ku yentxa swa ku biha, swi ta yentxa leswaku moya wa ku xwenga wa Nkulukumba ‘wu vaviseka’, kutani leswi swi nga ha yentxa leswaku Xikwembu Nkulukumba a va nala wa lwa nga mupfukeli. (Eza 63:10) Lwe a hlunamisaka moya wa ku xwenga swi nga ha yentxeka a wu sandzra, ku nga xidoho lexi Yesu Kriste a hlayiki leswaku a xi nge na ku dzrivaleliwa swoswi ne nkameni lowu taka.—Mt 12:31, 32; Mr 3:28-30; vona ESPÍRITO.
Perspicaz vol-2 p. 179 § 4
Makwanga
Ma tikomba hi swiyentxo. Makwanga ma tikomba hi swiyentxo leswi kombisaka ku navela ka ku biha ka mhunu. Yakobe mutsrali wa Bibele a hi byela leswaku ku navela loku ka ku biha, loko ku teke nyimba ku beleka xihono. (Yk 1:14, 15) Munhu wa makwanga a nga ha voneka hi swiyentxo swakwe. Mupostola Pawulo a tlhamuxela leswaku ku va ni makwaga swi hlaya ku gandzrela swithombe. (Ef 5:5) Munhu wa makwanga, a teka mintxhumu leyi a yi navelaka swanga xikwembu xakwe, a yi zrangisa ku tlula ku gandzrela Mutumbuluxi.—Ro 1:24, 25.
24-30 KA JUNYU
WUKOSI BYI NGA BIBELENI | BA-LE-FILIPI 1-4
‘N’wi Nga Hlatiyeleleni Ntxhumu’
Sentinela 08/2017 p. 10 § 10
‘A Ku Zrula Ka Xikwembu Nkulukumba . . . Ku Tlula Ku Yanakanya Hinkwaku’
I yini leswi nga hi pfunaka kuva hi nga hlatiyeli ha ntxumu kutani hi va ni ‘ku zrula ka Xikwembu Nkulukumba’? Mazritu ya Pawulo ku va le Filipi ma kombisa leswaku a muzri wa ku hlatiyela i xikhongoto. Kutani loko hi hlatiyela, hi fanela ku khongota. (Dondzra 1 Petros 5:6, 7.) Khongota ka Yehovha hi lipfumelo ledzri tiyiki, u tiva leswaku awa zron’weka ha wene. Khongota ka yene hi ku tlangela, u dzrimuka matovoko yaku. Loko hi swi beka miyanakan’wini yezru leswaku Yehovha hi ‘lweyi a kotaka ku tizra a va tlula ni hinkwaswu leswi hi swi kombelaka ni leswi hi swi yanakanyaka’, a dumbo dzrezru ha yene dzri ta ya dzri tiya.—Ef 3:20.
Sentinela 08/2017 p. 10 § 7
‘A Ku Zrula Ka Xikwembu Nkulukumba . . . Ku Tlula Ku Yanakanya Hinkwaku’
A ku na ku ganaganeka ka leswaku loko vamakwezru va le Filipi va dondzra papela ledzri va zrumeliwiki hi Pawulo va dzrimuke leswi mu yentxekeliki ni ndlela leyi Yehovha a mu pfuniki ha yone nava nga swi zrindzrelanga. Hi yini ndondzro leyi Pawulo a a va dondzrisa yone? Hi leyi nge: U nga hlatiyeli. Khongota kutani u ta yamukela ku zrula ka Xikwembu Nkulukumba. Nambitanu, xiya leswaku a ‘ku zrula ka Xikwembu Nkulukumba ku tlula ku yanakanya hinkwaku.’ Swi tlhamuxela yini leswo? Vandzruluteli vambeni va swi beka hi ndlela leyi: ‘Ku tlula ku xuva kwezru’ kumbe ‘Ku tlula makungu hinkwawu ya vhanu’. Nakunene Pawulo afa a hlaya leswaku ‘Ku zrula ka Xikwembu Nkulukumba’ ku tlakuke swinene ku tlula leswi hi nga swi pimisaka. Kutani nambi leswi hi vonela dzra ximhunu hi nga vonaka ku nge na ndlela ya ku hlula swikaratu swezru, Yehovha yene a nga hluleki, a nga yentxa leswi hi nga swi yimelangakiki.—Dondzra 2 Petros 2:9.
Sentinela 08/2017 p. 12 § 16
‘A Ku Zrula Ka Xikwembu Nkulukumba . . . Ku Tlula Ku Yanakanya Hinkwaku’
Hi pfunekisa kuyini loko hi yamukela ‘ku zrula ka Xikwembu Nkulukumba loku tlulaka ku yanakanya hinkwaku’? Matsralwa ma li ‘ku ta bekisa timbilu tezru ni miyanakanyu yezru ku Kriste Yesu’. (Flp 4:7) Zritu ‘bekisa’ afa dzri tizrisiwa wusotxhweni. A dzri kongometa ka khandzra dzra yimpi ledzri afaka dzri sizrelela doropa minkameni leyi khalutiki. Swi ve xitasu hi doropa dzra le Filipi. Vahanyi va le Filipi a va yetlela ku zruleni, na va tiva leswaku a masotxha ma zrindzra minyangwa ya doropa. Hi lani ku fanaka, loko hi li ni ‘ku zrula ka Xikwembu Nkulukumba’, timbilu tezru ni miyanakanyu yezru swi ta va ni ku zrula. Ha swi tiva leswaku Yehovha awa zron’weka ha hine nakone a djula swi hi fambela ha hombe. (1Pe 5:10) Ku tiva leswo, swi hi pfuna kuva hi nga txhavi, hi nga hlatiyeli kumbe ku hela ntamu.
Djulisisa Tindzralama Ta Moya
Perspicaz vol-3 p. 123 § 6
Timhamba
Timhamba ta ku txhululiwa kumbe swakunwa. Timhamba ta swakunwa a ti nyikeliwa xikan’we ni timhamba timbeni, ngopfu-ngopfu ntsrhaku ka loko va ha ku tlhasa tikweni dzra xidumbiso. (Tin 15:2, 5, 8-10) Mhamba leyi a ku li wuvhinya (“lebyi popswanaka”) nakone a dzri txheliwa henhla ka alitari. (Tin 28:7, 14; pimanisa Eks 30:9; Tin 15:10.) Pawulo a tsraleli va le Filipi a ku: ‘Loko ndzri nyiketiwa mhambeni ni le ku tizreleni ka ku pfumela kwenu, ndzra tsrhava.’ A tizrise mhamba ya ku txhululiwa swanga xifananiso na a djula ku kombisa ku tinyiketela kwakwe hi vakristi-kulobye. (Flp 2:17) Mahlweninyana ka lifu dzrakwe, a tsralele Timoteo a ku: ‘Hikuva mine ndzri ta nyiketiwa mhambeni, swoswi; a nkama wa ku suka kwanga wu tlhasiki kutani.’—2Tm 4:6.
Sentinela 01/01/2007 p. 26 § 5
‘Ku Pfuka Ka Ku Sungula’—Ku Kazri Ku Yentxeka
Swizro leswi totiwiki swa ‘Israyele wa Xikwembu Nkulukumba’ swi ta ya va na Yesu a ku phatimeni ka matilu, lani swi taka ‘va ni Hosi kolaho hi minkama hinkwayu’. (Ba-le-Galatia 6:16; 1 Ba-le-Thesalonika 4:17) Xiyentxo lexo xi vitaniwa ‘ku pfuka ka vafi’ kumbe ‘ku pfuka ka ku sungula’. (Ba-le-Filipi 3:10, 11; Apfuletelo 20:6) Loko ku pfuxiwa koloko ku hela, ku ta tlhasa nkama wa ku pfuxiwa ka mawaka-waka ya vhanu lava taka pfuxeliwa ku hanya hi lani ku nga helikiki a paradeyisini. A swi na mhaka kumbe hi ni dumbo dzra ku hanya matilweni kumbe la misaveni, hi hlunyela ‘ku pfuxiwa ka ku sungula’. I ku pfuxiwa ka muxaka muni koloko? Ku ta yentxeka dzrini?