Dukwiye Kubona Gute Ibigeragezo?

IBIGERAGEZO! Uwo ari we wese ategerezwa guhangana na vyo. Bishobora kuva ku kudahuza kamere, ku ngorane zo mu vy’ubutunzi, ku magara mabi, ku nyosha mbi, ku kosho k’urunganwe kadukaza ngo dukore ikibi, ku ruhamo, ku batemera impagararo yacu y’ukutagira aho duhengamiye canke yo kwanka gusenga ibigirwamana, no ku bindi bintu vyinshi. Ibigeragezo ukwo vyoza bimeze kwose, akenshi birateza umwitwarariko mwinshi. Dushobora gute guhangana na vyo tukererwa? Hoba hari ukuntu bitwungura?

Turashigikirwa Neza Bihebuje

Umwami Dawidi wo mu bihe vya kera yagize ubuzima bwuzuyemwo ibigeragezo, mugabo yapfuye ari umwizerwa. Yashoboye gute kwihangana? Yarerekanye aho inkomezi ziwe zava igihe yavuga ati: “Uhoraho ni we mwungere wanje, sinzokena.” Hanyuma yabandanije avuga ati: “Mbere naho noca mu mwonga w’igitūtu c’urupfu sinzogira ikibi ntinya; kuk’uri kumwe nanje: Inyobozo yawe n’ubuhiri bgawe ni vyo bimpumuriza.” (Zaburi 23:1, 4) Vyemere, Yehova ni isoko ry’ugushigikirwa kutagira aho kugarukira. Yarayoboye Dawidi mu bihe vy’umwiza w’umuzitanya, kandi ariteguriye kutugirira nk’ukwo nyene natwe igihe bikenewe.

Dushobora gute kwironsa ugushigikirwa na Yehova? Bibiliya irerekana ubwo buryo igihe ivuga iti: “Ni mwumvirizeko, mumenye yuk’Uhoraho aryoshe.” (Zaburi 34:8) Ubwo ni ubutumire buranga igishika, mugabo busigura iki? Ni indemesho yo gukorera Yehova no guhuza ubuzima bwacu n’ivyo agomba mu buryo bwuzuye. Ingendo nk’iyo isaba guheba umwidegemvyo kanaka twahorana, tukitanga. Mu bihe bimwebimwe, ishobora mbere kudushikana ku bigeragezo, ni ukuvuga uruhamo n’ugucumukura. Yamara, abemera n’umutima wabo wose ubutumire Yehova atanga ntibakeneye kwigera bicuza kubona babigize gutyo. Yehova azoba aryoshe cane kuri bo. Azobarongora kandi abitwararike mu buryo bw’impwemu. Azobashigikira mu bigeragezo biciye kw’Ijambo ryiwe, ku mpwemu yera yiwe be no kw’ishengero rya gikirisu. Amaherezo azobaha impera y’ubuzima budahera.​—Zaburi 23:6; 25:9; Yesaya 30:21; Abaroma 15:5.

Abantu bafata ingingo yo kugira ivyo bahinduye mu buzima bwabo kugira ngo basukurire Yehova kandi bumire kuri iyo ngingo barabona ko Yehova arangura imihango yiwe yose. Ivyo ni vyo Abisirayeli bakurikiye Yosuwa muri ca Gihugu c’Isezerano biboneye. Bamaze kujabuka Yorodani, hariho ibigeragezo bategerezwa kwihanganira, intambara bategerezwa kurwana, be n’ivyigwa bikomeye bategerezwa kuhigira . Ariko iryo yaruka ryaragaragaje ko ari abizerwa kurusha ba se bavuye muri Egiputa maze bagapfira mu bugaragwa. Kubera ico, Yehova yarashigikiye ababaye abizerwa, kandi ku bijanye n’ukuntu bari bamerewe ku mpera y’ubuzima bwa Yosuwa, inkuru yanditse muri Bibiliya ivuga iti: “Uhoraho abaha impore impande zose, nk’uko yarahiye ba sekuruza muri vyose; . . . Nta kintu na kimwe mu vyiza vyose Uhoraho yasezeraniye ab’inzu ya Isirayeli kitāshitse: ariko vyose vyarasohoye.” (Yosuwa 21:44, 45) Ivyo na twebwe birashobora kudushikira niba twiheka kuri Yehova tugaherezako igihe turi mu kigeragezo be no mu bindi bihe vyose.

Ni ibiki bishobora gutuma ukwizigira Yehova kwacu kugoyagoya? Yezu yaradomye urutoki ku kintu kimwe igihe yavuga ati: “Nta wusaba abami babiri: . . . Ntimushobora gusaba Imana n’Itunga.” (Matayo 6:24) Niba twizigira Yehova, ntituzoronderera umutekano aho abantu benshi bo mw’isi bawuronderera, ni ukuvuga mu bintu vy’umubiri. Yezu yahanuye abayoboke biwe ati: “Ariko mubanze mwitwararike ubgami bg’Imana n’ukugororoka kwayo, ni ho ivyo vyose [ibintu vy’umubiri bikenewe] muzovyongerwa.” (Matayo 6:33) Umukirisu aguma abona ibintu vy’umubiri mu buryo burimbanye kandi agashira Ubwami bw’Imana mu kibanza ca mbere mu buzima bwiwe, aba agize ihitamwo ryiza. (Umusiguzi 7:12) Birumvikana ko bishobora kugira ico bimutwaye. Ashobora kugira utwigoro mu buryo bw’umubiri. Mugabo, azokwimbura impera nyinshi. Kandi Yehova azomushigikira.​—Yesaya 48:17, 18.

Ico Twigira ku Bigeragezo

Birumvikana ko guhitamwo ‘kwumvirizako, kugira umenye yuko Uhoraho aryoshe’ bidaca bikingira umuntu ibintu bimushikira mu buzima atari avyiteze; eka mbere ntibidukingira buhere ibitero vya Shetani n’abamuserukira. (Umusiguzi 9:11) Ico bivamwo ni uko ukuba inzirabugunge be n’umwiyemezo vya gikirisu umuntu agira bishobora kugeragezwa. Kubera iki Yehova areka abasavyi biwe bagashikirwa n’ibigeragezo nk’ivyo? Intumwa Petero yaratanze imvo imwe ibituma igihe yandika ati: “Nah’ubu ar’igihe gito mubabazwa n’ibibagerageza vyinshi, kuko bitobura kuza: kugira ngo kuramura kw’ukwizera kwanyu (kand’ukwo kwizera kurusha igiciro izahabu ishira, nah’ivugutirwa mu muriro ikaramura) kuze kuboneke kuri n’ishimwe n’ubgiza n’icubahiro mu guhishurwa kwa Yesu Kristo.” (1 Petero 1:6, 7) Vyemere, ibigeragezo bituma tugaragaza agaciro k’ukwizera kwacu be n’urukundo dukunda Yehova. Kandi birafasha gutanga inyishu ku bitutsi n’ibirego vya Shetani wa Mucokoranyi.​—Imigani 27:11; Ivyahishuriwe 12:10.

Ibigeragezo biradufasha kandi gutsimbataza izindi kamere za gikirisu. Rimbura nk’akarorero amajambo y’umwanditsi wa Zaburi agira ati: “[Yehova] ashira umutima ku [“wicisha bugufi,” NW], arikw abībone abamenyera kure.” (Zaburi 138:6) Abenshi muri twebwe ntitwavutse turi abicisha bugufi, ariko ibigeragezo birashobora kudufasha gutsimbataza iyo kamere ya nkenerwa. Niwibuke igihe kimwe mu misi ya Musa aho abantu bamwebamwe muri Isirayeli basanga kurya manu ku ndwi ku ndwi, ku kwezi ku kwezi, bitera ubuyega. Biragaragara ko ico cari ikigeragezo kuri bo naho manu yatangwa ku gitangaro. Ico kigeragezo cari gifise intumbero iyihe? Musa yababwiye ati: “[Yehova] [a]kabagaburira manu mur’ubgo bugaragwa, . . . kugira ngw abacishe bugufi, abagerageze.”​—Gusubira mu Vyagezwe 8:16.

Ukwicisha bugufi kwacu kwoshobora kugeragezwa nk’ukwo nyene. Uti gute? Nk’akarorero, twakira gute amahinduka agirwa mu vy’ukwungunganya ibintu? (Yesaya 60:17) Twoba dushigikira n’umutima wose igikorwa co kwamamaza no kwigisha? (Matayo 24:14; 28:19, 20) Twoba twemera n’umutima ukunze insobanuro zerekeye ukuri kwo muri Bibiliya uko zitangwa na “wa mushumba w’umwizerwa kandi w’incabwenge”? (Matayo 24:45-47, NW; Imigani 4:18) Twoba tunanira umukazo wo kuronka icuma kigezweko, umuderi ugezweko, canke ubwoko bw’umuduga bugezweko? Umuntu yicisha bugufi azoshobora kwishura egome ku bibazo nk’ivyo.​—1 Petero 1:14-16; 2 Petero 3:11.

Mugabo, ibigeragezo birashobora kudufasha gutsimbataza muri twebwe iyindi kamere ihambaye ari yo y’ukwihangana. Umwigishwa Yakobo yavuze ati: “Mwiyumvire kw ar’ivyo kunezererwa rwose, bene Data, ni mwagwa mu bibagerageza bitari bimwe, mumenye yukw ibigeza ukwizera kwanyu bitera ukwihangana.” (Yakobo 1:2, 3) Kwihanganira tukererwa ibigeragezo bikurakuranwa mu kwiheka kuri Yehova tugaherezako biratsimbataza ugushikama, ukudahemuka be n’ukutadohoka. Biradukomeza kugira tuzonanire ibitero vyo mu gihe kiri imbere Shetani, ya mana irakaye y’ino si yogira.​—1 Petero 5:8-10; 1 Yohana 5:19; Ivyahishuriwe 12:12.

Nugume Ubona Ibigeragezo mu Buryo Bubereye

Umwana w’Imana atunganye ari we Yezu Kirisitu yarahanganye n’ibigeragezo vyinshi igihe yari kw’isi kandi kuvyihanganira vyavuyemwo inyungu nyinshi. Paulo yanditse yuko Yezu “yigishwa kwumvira Imana n’ivyo yababajwe.” (Abaheburayo 5:8) Ukudahemuka kwiwe gushika gupfa kwatumye izina rya Yehova rishemezwa, kandi gutuma bishoboka ko Yezu atanga agaciro k’ubuzima bwiwe bw’umuntu butunganye kw’incungu y’umuryango w’abantu. Ivyo vyaruguruye inzira yo kugira icizigiro c’ubuzima budahera ku bantu bagaragaza ko bizeye Yezu. (Yohana 3:16) Kubera ko Yezu yagumye ari umwizerwa mu bigeragezo, ubu ni Umuherezi wacu Mukuru akaba n’Umwami wacu yimitswe.​—Abaheburayo 7:26-28; 12:2.

Bite hoho kuri twebwe? Ukudahemuka kwacu igihe duhanganye n’ibigeragezo na kwo nyene kurazana imihezagiro myinshi. Ku bafise icizigiro c’ijuru, Bibiliya ivuga iti: “Hahirwa umuntu yihanganira ibimugerageza, kuko ni yamara kurama azohabga igitsibo c’ubu[zima], ico Imana yasezeraniye abayikunda.” (Yakobo 1:12) Abafise icizigiro c’isi barazi badakekeranya yuko baramutse bihanganye babigiranye ubwizerwe, bazoragwa ubuzima budahera mw’isi y’iparadizo. (Ivyahishuriwe 21:3-6) Kandi igihambaye kuruta, ni uko ukwihangana kwabo kugiranywe ubwizerwe gutuma izina rya Yehova rishemezwa.

Uko tugera ikirenge mu ca Yezu, turashobora kwizigira yuko ibigeragezo vyose duhangana muri runo runkwekwe rw’ibintu dushobora kubirengana ata co bitugize. (1 Ab’i Korinto 10:13; 1 Petero 2:21) Gute? Mu kwiheka kuri Yehova, we aha “ubushobozi buhebuje” abamwihekako. (2 Ab’i Korinto 4:7) Ese ukujijuka kwacu kwomera nka kumwe kwa Yobu, we naho yihanganiye ibigeragezo bikaze yemeje afise ukwizigira ati: “Ni yamara kumvugutira nzovamwo mmeze nk’izahabu.”​—Yobu 23:10.

[Ifoto ku rup. 31]

Ukudahemuka kwa Yezu ari mu kigeragezo kwatumye izina rya Yehova rishemezwa. N’ukwacu kurashobora gutuma rishemezwa