Nushemeze Yehova “hagati y’ishengero”

AMAKORANIRO ya gikirisu ni intunganyo Yehova yashizeho kugira ngo atume abasavyi biwe baguma bakomeye mu buryo bw’impwemu. Mu gihe twitaba amakoraniro tudahorereza, tuba twerekanye yuko dukenguruka intunganyo Yehova yashizeho. Vyongeye, biradushoboza ‘kwoherereza abavukanyi bacu ku gukundana no ku bikorwa vyiza’, ubwo bukaba ari uburyo buhambaye bwo kugaragarizanya urukundo (Abaheburayo 10:24; Yohana 13:35). Ariko none, dushobora gute kwoherereza abavukanyi bacu ku makoraniro?

Niwature ku mugaragaro

Wa Mwami Dawidi yanditse ibimwerekeye ati: “Nzobarira bene Data izina ryawe, nzogutazirira hagati y’ishengero. Ishimwe ngushimisha mw ikoraniro ryinshi riva kuri wewe”. “Nanje nzogushimira mw ishengero rinini, nzoguhimbaza mu bantu benshi”. “Namamaje ubutumwa bgiza bg’ukugororoka mw ishengero ryinshi: sinzobuza iminwa yanje”.​—Zaburi 22:22, 25; 35:18; 40:9.

Mu misi y’intumwa Paulo, igihe abakirisu baba bakoraniye hamwe ku bw’ugusenga, na bo nyene baravuga amajambo aserura ukwizera bafise muri Yehova be n’ayaserura ubuninahazwa bwiwe. Muri ubwo buryo, bararemeshanya bakongera bakohererezanya ku gukundana no ku bikorwa vyiza. Muri iki gihe cacu, ubu hakaba haciye ibinjana vyinshi Dawidi na Paulo babayeho, mu vy’ukuri ‘turabona yuko umusi wa Yehova uriko wegereza’ (Abaheburayo 10:24, 25). Urunkwekwe rw’ibintu rwa Shetani rugenda rugana kw’isangangurwa, ingorane na zo zikarushiriza kwongerekana. ‘Turakeneye kwihangana’ kuruta uko twigeze kubigira (Abaheburayo 10:36). Ni nde wundi yoturemesha kwihangana atari abavukanyi bacu?

Muri iki gihe, cokimwe no mu bihe vya kera, haragirwa intunganyo zituma abantu bizera bavuga amajambo aserura ukwizera kwabo “hagati y’ishengero”. Akaryo kamwe kaboneka kuri bose ni ako gutanga insasanuro mu kwishura ibibazo bibazwa abumviriza ku makoraniro y’ishengero. Ntukigere ufatira mu rwara ivyiza bishobora kuvamwo. Nk’akarorero, insasanuro zerekana ukuntu twotsinda canke twokwirinda ingorane, zirakomeza umwiyemezo w’abavukanyi bacu wo gukurikiza ingingo ngenderwako za Bibiliya. Insasanuro zisigura ivyanditswe vya Bibiliya vyatanzwe mugabo bitasubiwemwo mu majambo canke zishiramwo ivyiyumviro umuntu yakuye mu bushakashatsi yigiriye, zoshobora kuremesha abandi gutsimbataza utumenyero twiza two kwiga.

Kuba tuzi yuko twebwe be n’abandi tuzohungukira mu gihe dutanze insasanuro ku makoraniro, bikwiye kuvyurira Ivyabona vya Yehova bose umutima wo gutsinda udusonisoni. Birahambaye canecane yuko abakurambere n’abakozi b’ishengero batanga insasanuro ku makoraniro, kubera yuko vyitezwe ko baja imbere mu kugira uruhara mu makoraniro no mu kuyitaba. Mugabo none, umuntu yoryohora gute mu gihe abona yuko afise ingorane muri uwo muce?

Inama zotuma turyohora

Niwibuke yuko ari umuce wo gusenga Yehova. Umukirisukazi umwe aba mu Budagi arasigura ingene abona insasanuro atanga. Avuga ati: “Ni bwo buryo mfise bwo gutsinda utwigoro Shetani agira two gutuma abasavyi b’Imana badaserura ukwizera kwabo”. Umuvukanyi aheruka kubatizwa ari mw’ishengero rimwe n’uwo muvukanyikazi, avuga ati: “Ku bijanye no gutanga insasanuro, ndasenga cane”.

Nutegure neza. Mu gihe utize amayagwa imbere y’igihe uzosanga bitoroshe gutanga insasanuro kandi insasanuro zawe ntizizoba izubaka cane. Inama z’uburyo bwo gutanga insasanuro ku makoraniro y’ishengero ziratangwa mu gitabu Niwungukire ku Nyigisho yo mw’Ishure ry’Ubusuku bwa Gitewokarasi, urupapuro rwa 70a.

Niwishingire umugambi wo gutanga n’imiburiburi insasanuro imwe kw’ikoraniro rimwerimwe ryose. Ivyo bisobanura gutegura inyishu nyinshi, kubera yuko uko urushiriza kumanika ukuboko, ari ko hazorushiriza kuboneka akaryo k’uko umuvukanyi arongoye ikoraniro akubaza. Woshobora mbere gushima kumubwira imbere y’igihe ibibazo witeguriye kwishura. Ivyo birafasha canecane igihe uri mushasha. Kubera ko ushobora kugonanwa kumanika ukuboko “mw’ikoraniro ryinshi”, igihe uzi yuko iyo ari ingingo witeguriye kwishura kandi yuko uwurongoye ikoraniro azoba ariko araraba ko umanika ukuboko, bizokuremesha gutanga insasanuro.

Nutange insasanuro hakiri kare. Igikorwa kigoye ntigica coroha ngo ni uko ucungururije kure. Gutanga insasanuro hakiri kare mw’ikoraniro birashobora gufasha. Uzotangazwa n’ukuntu vyoroshe gutanga insasanuro ubugira kabiri canke gatatu umaze gutsinda intambamyi yo gutanga insasanuro ubwa mbere.

Nuhitemwo ikibanza kibereye. Bamwebamwe basanga birushiriza kuborohera gutanga insasanuro igihe bicaye amaja imbere mu Ngoro y’Ubwami. Usanga hari ibisamaza bike, kandi ni gake umurongozi atabona amaboko bamanitse. Ivyo niwabigerageza, uribuka kuvuga n’ijwi ryumvikana kugira ngo bose bumve, canecane igihe ishengero ridakoresha za mikoro bahanahana.

Niwumvirize witonze. Ivyo bizogufasha kwirinda gusubiramwo ivyo uwundi muntu ahejeje kuvuga. Vyongeye, insasanuro abandi batanze zoshobora kukwibutsa icanditswe canke iciyumviro gishobora kuba gishingiye ku bihejeje kuvugwa. Rimwe na rimwe, icabonywe kigufi coshobora gushira ahabona iciyumviro kiba kiriko kirihwezwa. Insasanuro nk’izo zirafasha cane.

Niwige kwishura mu majambo yawe bwite. Kwishura usoma mu mayagwa yo kwiga bishobora kwerekana yuko watoye inyishu y’ukuri, vyongeye kandi vyoshobora kuba bwo buryo bwiza bwo gucira inzira insasanuro. Mugabo gushishikara wishura mu majambo yawe bwite birerekana yuko utahura iciyumviro. Si ngombwa ko dusubiramwo neza na neza amajambo ari mu bisohokayandikiro vyacu. Ivyabona vya Yehova ntibasubiramwo gusa ivyo ibisohokayandikiro vyabo bivuga.

Guma kuri ico kiganiro. Insasanuro zitajanye n’ikiganiro canke zica ku ruhande ivyiyumviro nyamukuru biba biriko birihwezwa ntizibereye. Ivyo bisigura yuko insasanuro utanga zikwiye kuba zihuye n’ikiganiro kiba kiriko kirihwezwa. Ico gihe zizogira ico ziterereye ku kiganiro cubaka mu buryo bw’impwemu cerekeye umutwe-shimikiro uriko urarimburwa.

Nugire intumbero yo kuremesha. Kubera yuko imvo nyamukuru ituma dutanga insasanuro ari iyo kuremesha abandi, dutegerezwa kugerageza kwirinda kuvuga ibintu vyohava bibavuna umutima. Vyongeye, ntutange insasanuro ku bintu vyose biri mu ngingo gushika n’aho abandi bataronka ico bavuga. Inyishu ndende canke zihinguye zirakunda gutuma insobanuro itumvikana. Inyishu ngufi zigizwe n’amajambo make gusa zirashobora kuba kirumara, kandi zizoremesha abashasha gutanga inyishu zabo ngufi.

Uruhara rw’abarongora amakoraniro

Ku bijanye no kuremesha, uwurongora ikoraniro arafise ibanga riremereye. Arerekana ko yitwararika vy’ukuri insasanuro yose itangwa mu kwumviriza yitonze no mu kuraba abigiranye urupfasoni uwuriko aratanga insasanuro aho gusamazwa n’ikindi kintu. Ese ukuntu vyoba bitabereye mu gihe yoba atumvirije yitonze maze ivyo bigatuma asubiramwo bidakenewe ibihejeje kuvugwa canke akabaza ikibazo camaze kwishurwa!

Vyoba bica intege kandi mu gihe umurongozi aza arasubiramwo mu bundi buryo insasanuro iba ihejeje gutangwa, nk’aho umenga ashaka kwerekana yuko hari ukuntu iyo nsasanuro itari ibereye. Ku rundi ruhande, ese ukuntu biremesha igihe insasanuro zituma hatangwa ibindi vyiyumviro ku ciyumviro kanaka gihambaye. Ibibazo nk’ibi ngo ‘Ivyo twobishira mu ngiro gute mw’ishengero ryacu?’ canke ngo ‘Ni icanditswe ikihe co mu ngingo gishigikira ivyo bihejeje kuvugwa?’, usanga ari ibibazo biremesha gutanga insasanuro zubaka, zikaba ziterera ikintu c’ingirakamaro.

Birumvikana yuko abashasha canke abantu b’udusonisoni bakwiye canecane gukezwa igihe batanze insasanuro. Ivyo vyogirwa umurongozi ari kumwe na nya muntu gusa inyuma y’ico cigwa kugira ngo yirinde guhava atuma abura iyo akwirwa kandi bimuhe akaryo ko kumugira inama igihe bibereye.

Mu kiyago gisanzwe, umuntu yihariza ijambo atuma hataba uguhana ivyiyumviro. Abamwumviriza bumva bidakenewe ko bagira ico bavuze. Baca batangura kwumviriza batabishizeko umutima, nimba naho nyene bamwumviriza. Ikintu nk’ico coshobora gushika igihe umurongozi yihariza ijambo mu kuza aragira ivyo avuze kenshi. Ariko rero, uwurongora ikoraniro yoshobora rimwe na rimwe kuvoma ivyiyumviro vy’abumviriza no gukabura ico biyumvira kuri ico kiganiro mu kuza arabaza utundi tubazo. Utubazo nk’utwo ntidukwiye kuba twinshi.

Umurongozi si ngombwa ngo abaze umuntu wa mbere amanitse ukuboko. Ivyo vyoshobora guca intege abantu bakeneye akanya ko gushira hamwe ivyiyumviro. Mu kurindira akanya gatoyi, azoha akaryo ko kwishura umuntu atari bwakaronke. Azogaragaza kandi ubukerebutsi mu kudasaba abana batoyi ngo bishure ku bibazo bishingiye ku bintu birengeye ugutahura kwabo.

Vyogenda gute mu gihe hatanzwe inyishu itari yo? Umurongozi akwiye kwirinda kumaramaza umuntu yatanze iyo nyishu. Insasanuro naho yoba itari yo, kenshi iba irimwo ibintu vy’ukuri. Mu gutoramwo ubigiranye ubugenge ikintu gishobora kuba ari ic’ukuri, mu kubaza ikibazo mu bundi buryo, canke mu kubaza akandi kabazo, umurongozi arashobora kugorora ibintu atarinze kugira uwo amaramaza bidakenewe.

Kugira ngo aremeshe ivyo gutanga insasanuro, umurongozi w’ikoraniro akwiye kwirinda ibibazo vyo muri rusangi, nka ‘Hoba hari uwundi afise ico avuga?’. Ikibazo nk’iki ngo ‘Ni nde ataratanga insasanuro? Aka ni ko karyo kawe ka nyuma!’ bishobora kuba bigiranywe intumbero nziza, mugabo ntibizoremesha na gato umuntu kugira ico avuze ata kimutangira. Umurongozi ntakwiye gutuma abavukanyi bumva biyagirije kubera batatanze insasanuro hakiri kare muri ico cigwa. Ahubwo, bakwiye kuremeshwa gusangira n’abandi ivyo bazi kubera yuko ubwo ari uburyo bwo guserura urukundo. Ikigeretseko, umurongozi amaze gusaba umuntu gutanga insasanuro, vyoba vyiza atavuze ngo: “Inyuma yiwe turaza gutega ugutwi insasanuro y’umuvukanyi naka hanyuma iy’umuvukanyikazi naka”. Umurongozi akwiye kubanza kwumviriza insasanuro maze akaraba nimba hari iyindi ikenewe.

Gutanga insasanuro ni agateka

Kwitaba amakoraniro ya gikirisu ni ikintu ca nkenerwa mu vy’impwemu; gutanga insasanuro kuri ayo makoraniro ni agateka. Uko turushiriza kugira uruhara muri ubwo buryo budasanzwe bwo gushemeza Yehova “hagati y’ishengero”, ni ko turushiriza gukurikiza akarorero ka Dawidi no gufatana uburemere impanuro ya Paulo. Tugize uruhara mu makoraniro, birerekana yuko dukunda abavukanyi bacu kandi ko turi mu bagize ishengero rinini rya Yehova. None ni hehe handi woshima kuba uri uko ‘ubona wa musi wegereza’?​—Abaheburayo 10:25.

[Akajambo k’epfo]

[Amafoto ku rup. 20]

Kwumviriza no gutanga insasanuro ku makoraniro ya gikirisu birahambaye

[Ifoto ku rup. 21]

Umurongozi arerekana ko yitwararika vy’ukuri insasanuro yose itangwa