Niwizigire Ijambo rya Yehova

“Nizigira ijambo ryawe”.​—ZABURI 119:42.

1. Wovuga iki ku vyerekeye akaranga be n’agatima vy’umwanditsi wa Zaburi ya 119?

UWATUNGANIJE Zaburi ya 119 yarakunda cane ijambo rya Yehova. Ashobora kuba yari Umuganwa Hezekiya w’Ubuyuda. Inyiyumvo ziri muri iyo ndirimbo yahumetswe n’Imana zirahuye n’agatima Hezekiya yari afise, “[uw]ifatanije n’Uhoraho akaramata” igihe yari umwami w’Ubuyuda (2 Abami 18:3-7). Ico tutokeka coco ni iki: Uwatunganije iyo zaburi yari azi yuko akeneye ivy’impwemu.​—Matayo 5:3.

2. Iciyumviro nyamukuru kiri muri Zaburi ya 119 ni ikihe, kandi iyo ndirimbo yatunganijwe gute?

² Iciyumviro nyamukuru kiri muri Zaburi ya 119, ni agaciro k’ijambo ry’Imana, canke agaciro k’ubutumwa bwayoa. Kumbure kugira ngo bimufashe kwibuka, uwo mwanditsi yatunganije urwo ruririmbo yisunze ukuntu indome zikurikirana. Imirongo 176 igize iyo ndirimbo, ishingiye ku ndome zikurikirana zo mu rutonde rw’indome z’igiheburayo. Mu giheburayo co mu ntango, kamwekamwe kose mu duhimba 22 tw’iyo Zaburi kagizwe n’imirongo 8 iguma itangurwa n’urudome rumwe. Iyo zaburi iravuga ivyerekeye ijambo ry’Imana, ivyagezwe vyayo, ivyo yihanikirije ari vyo vyibutswa vyayo, inzira zayo, amateka yayo, ivyo yashinze, amabwirizwa yayo, imanza zayo be n’amategeko yayo. Muri iki kiganiro no mu gikurikira, tuza guca irya n’ino Zaburi ya 119. Kuzirikana ku bintu vyashikiye abasavyi b’Imana ba kera n’ibishikira abo muri iki gihe, bikwiye gutuma turushiriza gutahura iyo ndirimbo yahumetswe n’Imana bikongera bigatuma turushiriza gukenguruka Ijambo ry’Imana ryanditswe ari ryo Bibiliya.

Nugamburuke ijambo ry’Imana ubone guhimbarwa

3. Sigura ico bisobanura kuba uwutunganye wongere ubitangire akarorero.

³ Ubuhirwe nyakuri tubukesha kugendera mu vyagezwe vy’Imana (Zaburi 119:1-8). Nitwabigenderamwo, Yehova azodufata nk’abantu “batunganye” canke batagira amahinyu (Zaburi 119:1). Kuba abantu batunganye ntibisobanura yuko tutagira agasembwa, mugabo vyerekana yuko twihatira gukora ivyo Yehova Imana agomba. Nowa yari umuntu “[at]agira [“amahinyu”, NW] mu gihe c’urunganwe rwiwe” kubera “yagendana n’Imana”. Uwo sekuruza w’imiryango be n’umuryango wiwe bararokotse Umwuzure kubera ko yakurikiranye ingendo y’ubuzima yashinzwe na Yehova (Itanguriro 6:9; 1 Petero 3:20). Muri ubwo buryo nyene, kugira ngo turokoke umuhero w’iyi si, dutegerezwa ‘kwitondera amateka y’Imana tubigiranye umwete’, gutyo tugakora ivyo igomba.​—Zaburi 119:4.

4. Kugira ngo turonke ubuhirwe twongere turoranirwe dutegerezwa gukora iki?

⁴ Yehova ntazokwigera aduheba ‘nitwamushimagirisha umutima utunganye kandi tugashishikara kwitondera ivyo yashinze’ (Zaburi 119:7, 8). Imana ntiyahevye ya ndongozi y’Umwisirayeli Yosuwa, uwashize mu ngiro impanuro yo ‘gusoma ivyari mu gitabu c’ivyagezwe ku murango no mw’ijoro kugira ngo abone kwitondera ivyanditswemwo vyose’. Ivyo vyatumye aroranirwa vyongera bituma ashobora kuba inkerebutsi (Yosuwa 1:8). Yosuwa ari hafi yo gupfa, yari agishimagiza Imana ari co gituma yibukije Abisirayeli ati: “Mu mitima yanyu no mu vyiyumviro vyanyu murazi neza mwese yukw ata kintu na kimwe mu vyiza vyose Uhoraho Imana yanyu yabasezeraniye kitāshitse” (Yosuwa 23:14). Cokimwe na Yosuwa be n’umwanditsi wa Zaburi ya 119, turashobora kuronka ubuhirwe n’ukuroranirwa, mu gushemeza Yehova kandi tukizigira ijambo ryiwe.

Ijambo rya Yehova rituma tuguma tudahumanye

5. (a) Erekana ingene umuntu ashobora kuguma adahumanye mu vy’impwemu. (b) Ni imfashanyo iyihe iriho ku wukiri muto yoba yakoze icaha gikomeye?

⁵ Turashobora kuba abantu badahumanye mu buryo bw’impwemu mu gihe twitondera ijambo ry’Imana (Zaburi 119:9-16). Ivyo ni ukwo biri n’igihe nyene abavyeyi bacu baba bataduhaye akarorero keza. Naho se wa Hezekiya yasenga ibigirwamana, Hezekiya ‘yarejeje inzira yiwe’, bikaba bishoboka ko yayikuyemwo utwosho twa gipagani. Vyogenda gute nka hamwe uwukiri muto akorera Imana muri iki gihe yokora icaha gikomeye? Ukwigaya, isengesho, ugufashwa n’abavyeyi be n’ugusahirizwa n’abakurambere bakirisu mu rukundo, birashobora kumufasha kuba nka Hezekiya, ‘akezesha inzira yiwe kuyitondera’.​—Yakobo 5:13-15.

6. Ni abagore abahe ‘bejeje inzira yabo bakongera bakitondera ivyo ijambo ry’Imana rivuga’?

⁶ Naho Rahabu na Rusi babayeho kera cane imbere y’uko Zaburi ya 119 itunganywa, ‘barejeje inzira yabo’. Rahabu yari imaraya y’Umunyakananikazi, mugabo yahavuye amenyekanira ku kwizera kwiwe bwa musavyi wa Yehova (Abaheburayo 11:30, 31). Rusi wa Munyamowabukazi yarahevye imana ziwe yasenga, akorera Yehova, yongera abaho yisunga Ivyagezwe Yehova yahaye Isirayeli (Rusi 1:14-17; 4:9-13). Abo bagore bompi batari Abisirayelikazi ‘baritondeye ivyo ijambo ry’Imana rivuga’ hanyuma baraterwa agateka k’akaroruhore ko gucika ba inakuruza ba Yezu Kirisitu.​—Matayo 1:1, 4-6.

7. Daniyeli hamwe n’abandi basore batatu b’Abaheburayo batanze gute akarorero keza mu vyo kuguma badahumanye mu vy’impwemu?

⁷ Naho “imitima y’abantu yamogoreye gukora ibibi uhereye mu bgana bgabo”, abakiri bato barashobora gukurikira inzira idahumanye, mbere no muri iyi si yononekaye iganzwa na Shetani (Itanguriro 8:21; 1 Yohana 5:19). Igihe Daniyeli hamwe na ba basore batatu b’Abaheburayo bari mu bunyagano i Babiloni, ‘baritondeye ivyo ijambo ry’Imana rivuga’. Nk’akarorero, baranse kwihumanisha “ivyo kurya vy’umwami” (Daniyeli 1:6-10). Abanyababiloni wasanga barya ibikoko bihumanye, vyari bibujijwe n’Ivyagezwe vya Musa (Abalewi 11:1-31; 20:24-26). Ntibari bafise akamenyero ko gukura amaraso mu bikoko vyaba vyishwe, kandi kuba bararya inyama zitakuwemwo amaraso vyari biteye kubiri n’ibwirizwa ry’Imana ryerekeye amaraso (Itanguriro 9:3, 4). Ntibitangaje kubona abo Baheburayo bane batariye ku vyo kurya vy’umwami! Urwo rwaruka rwashimwa n’Imana rwagumye rudahumanye mu vy’impwemu, gutyo ruratanga akarorero keza.

Ijambo ry’Imana riradufasha kuba intahemuka

8. Ni inyifato iyihe be n’ubumenyi ubuhe dukeneye nimba dushaka gutahura amabwirizwa y’Imana no kuyashira mu ngiro?

⁸ Ugukunda ijambo ry’Imana ni umuce uhambaye udufasha kuguma turi intahemuka kuri Yehova (Zaburi 119:17-24). Nimba tumeze nka wa mwanditsi wa Zaburi yahumekewe, tuzocambirwa gutahura “ibitangaza” vyo mu vyagezwe vy’Imana. Tuzokwama ‘duhahamira imanza za Yehova ziroranye’, twongere twerekane ko ‘duhimbarwa n’ivyo yihanikirije’ ari vyo vyibutswa vyiwe (Zaburi 119:18, 20, 24). Nimba tumaze igihe gito gusa twiyeguriye Yehova, twoba ‘twararemaremye ugucambirwa amata adafunguye ya rya jambo’ (1 Petero 2:1, 2, NW)? Turakeneye gutegera inyigisho za Bibiliya z’ishimikiro kugira ngo dushobore gutahura amabwirizwa y’Imana no kuyashira mu ngiro.

9. Dukwiye kuvyifatamwo gute igihe abantu badusavye gukora ibintu biteye kubiri n’amabwirizwa y’Imana?

⁹ Ego ni ko twoshobora gukunda ivyibutswa vy’Imana, mugabo vyogenda gute nka hamwe “abahambaye” botuvuga nabi babitumwe n’imvo kanaka (Zaburi 119:23, 24)? Muri iki gihe, abantu bafise ubukuru akenshi baragerageza kuduhata ngo amategeko y’abantu tuyarutishe ay’Imana. None abantu nibadusaba ibintu biteye kubiri n’ivyo Imana igomba tuzokora iki? Urukundo rwa cane dukunda ijambo ry’Imana ruzodufasha kuguma turi intahemuka kuri Yehova. Tuzovuga nka za ntumwa za Yezu Kirisitu zahamwa, duti: “Igikwiye n’ukwumvira Imana kuyirutisha abantu”.​—Ivyakozwe 5:29.

10, 11. Tanga akarorero kerekana ingene dushobora kuguma turi intadohoka kuri Yehova mu bintu bigoye kuruta ibindi vyose.

¹⁰ Turashobora kuguma turi intahemuka kuri Yehova no mu gihe ibintu vyoba bigoye gute (Zaburi 119:25-32). Nimba dushaka kuguma turi intadohoka ku Mana, dutegerezwa kuba abantu boroshe kwigisha tukongera tugasenga n’ubwira ngo itwigishe. Dutegerezwa kandi guhitamwo “inzira yo kuba umwizigirwa”.​—Zaburi 119:26, 30.

¹¹ Hezekiya, uwushobora kuba ari we yanditse Zaburi ya 119, yahisemwo “inzira yo kuba umwizigirwa”. Ivyo yarabigize naho nyene yari akikijwe n’abasenga imana z’ikinyoma, agashobora kandi kuba yaratwengerwa mw’ijigo n’abo ku kirimba c’i bwami. Bishoboka rwose ko ‘umutima wiwe washongeshwa n’umubabaro’ kubera ivyo bintu (Zaburi 119:28). Mugabo Hezekiya yarizigiye Imana bituma aba umwami mwiza, yongera akora “ivyo Uhoraho abona kw ari vyiza” (2 Abami 18:1-5). Twihetse ku Mana, na twebwe nyene turashobora kwihanganira ibigeragezo tukaguma turi intadohoka.​—Yakobo 1:5-8.

Ijambo rya Yehova riraturonsa umutima rugabo

12. Ni gute twoshira mu ngiro umwumwe ukwiwe ibivugwa muri Zaburi 119:36, 37?

¹² Gukurikira uburongozi bw’ijambo ry’Imana biratuma tugira umutima rugabo ukenewe kugira twihanganire ibigeragezo vyo mu buzima (Zaburi 119:33-40). Turarondera kwigishwa na Yehova twicishije bugufi kugira ngo dushobore gukurikiza amabwirizwa yiwe “n’umutima wose” (Zaburi 119:33, 34). Cokimwe n’uwo mwanditsi wa Zaburi, dusaba Imana duti: “Uhindurire umutima wanje ku vyo wihanikirije, ariko si ku nyungu mbi” (Zaburi 119:36). Cokimwe n’intumwa Paulo, “[t]ugira ingeso nziza muri vyose” (Abaheburayo 13:18). Mu gihe umukoresha wacu ashatse ko dukora ikintu c’ubugunge, turagira umutima rugabo tukumira ku buyobozi butangwa n’Imana, kandi Yehova yama ahezagira mwene iyo ngendo. Mu bisanzwe, aradufasha kuganza impengamiro zose mbi. Nimuze rero dusenge dusaba duti: “Ukebukishe amaso yanje, noye kurāba ibitagira ikimazi” (Zaburi 119:37). Ikintu cose ata co kimaze kandi cankwa n’Imana, ntitwokwigera na rimwe twipfuza kukibona ko ari ico kwipfuzwa (Zaburi 97:10). Mu bintu iryo sengesho ryodufasha kwirinda, harimwo n’ivyerekana ubushegabo n’ibijanye n’ubupfumu.​—1 Ab’i Korinto 6:9, 10; Ivyahishuriwe 21:8.

13. Abigishwa ba Yezu bariko barahamwa baronse gute umutima rugabo bari bakeneye kugira bashinge intahe bashize amanga?

¹³ Ubumenyi ntagakosa bw’ijambo ry’Imana buratuma umutima uja mu nda kugira ngo dushinge intahe n’umutima rugabo (Zaburi 119:41-48). Kandi turakeneye koko umutima rugabo kugira ngo ‘twishure uwudutse’ (Zaburi 119:42). Rimwe na rimwe, twoshobora kuba nka ba bigishwa ba Yezu bahamwa, abasenze bati: “Mwami, . . . uhe abasavyi bawe kuvuga ijambo ryawe bashize amanga rwose”. Havuyemwo iki? ‘Bose baciye buzuzwa impwemu yera, bavuga ijambo ry’Imana bashize amanga’. Uwo Mukama Segaba nyene araduha umutima rugabo kugira ngo tuvuge ijambo ryiwe dushize amanga.​—Ivyakozwe 4:24-31.

14. Nti ibiki bidufasha gushinga intahe n’umutima rugabo nk’uko Paulo yabigira?

¹⁴ Tuzogira umutima rugabo ukenewe wo gushinga intahe tudatinya na gato kumaramara, nitwakunda “ijambo ry’ukuri” tukongera ‘tukitondera ivyagezwe vy’Imana nantaryo’ (Zaburi 119:43, 44). Kwiga Ijambo ry’Imana ryanditswe tubigiranye umwete biraturonsa ivyangombwa bituma ‘tuvugira imbere y’abami ivyo yihanikirije’ ari vyo vyibutswa vyayo (Zaburi 119:46). Isengesho be n’impwemu ya Yehova na vyo nyene bizodufasha kuvuga ibintu vyo, kandi mu buryo bubereye (Matayo 10:16-20; Ab’i Kolosayi 4:6). Paulo abigiranye umutima rugabo yarabwiye abatware bo mu kinjana ca mbere ivyerekeye ivyibutswa vy’Imana. Nk’akarorero, yarashinze intahe imbere ya Buramatari w’Umuroma yitwa Feliki, uno akaba “[yarumvirije] ivyo avuga ku vy’ukwizera Kristo Yesu” (Ivyakozwe 24:24, 25). Paulo yarashinze intahe kandi imbere ya Buramatari Fesito n’Umwami Agiripa (Ivyakozwe 25:22–26:32). Dufashwe mu mugongo na Yehova, na twebwe nyene turashobora kuba Ivyabona b’umutima rugabo, ‘ubutumwa bwiza ntibwigere budutera isoni’.​—Abaroma 1:16.

Ijambo ry’Imana riraturonsa impumurizo

15. Ijambo ry’Imana rishobora kuturonsa impumurizo gute igihe abandi badutwengeye mw’ijigo?

¹⁵ Ijambo rya Yehova riratanga impumurizo itananirwa (Zaburi 119:49-56). Hari ibihe usanga dukeneye guhumurizwa bimwe bidasanzwe. Naho nyene tuvugana umutima rugabo bwa Vyabona vya Yehova, “abibone”, ni ukuvuga abagira ivy’ubwibone ku Mana, birashika ‘bakadutwengera cane mw’ijigo’ (Zaburi 119:51). Ariko rero, igihe turiko turasenga twoshobora kwibuka ibintu biremesha bivugwa mw’Ijambo ry’Imana, gutyo tugashobora ‘kurema’ canke guhumurizwa (Zaburi 119:52). Mu gihe turiko turatakamba, twoshobora kwibuka itegeko canke ingingo ngenderwako yo mu Vyanditswe iduha impumurizo be n’uburindutsi tuba dukeneye igihe turi mu bintu bitesha umutwe.

16. Ni igiki abasavyi b’Imana batagize naho bashikiwe n’uruhamo?

¹⁶ Abibone batwengera mw’ijigo umwanditsi wa Zaburi bari Abisirayeli, bano bakaba bari mw’ihanga ryiyeguriye Imana. Umve yemwe ako kamaramaza! Ariko rero, mu buryo butandukanye n’inyifato bagize, nimuze twiyemeze kutigera duta amabwirizwa y’Imana (Zaburi 119:51). Igihe abasavyi b’Imana ibihumbi bari mu ruhamo rutewe n’Abanazi no mu bindi bintu nk’ivyo vyabashikiye uko imyaka yagiye irarengana, baranse guta amabwirizwa be n’ingingo ngenderwako dusanga mw’Ijambo ry’Imana (Yohana 15:18-21). Vyongeye, kugamburukira Yehova si umuzigo kubera ko ivyo yashinze bimeze nk’uturirimbo dutanga impumurizo kuri twebwe.​—Zaburi 119:54; 1 Yohana 5:3.

Dukure ubwatsi ku bw’ijambo rya Yehova

17. Guha agaciro ijambo ry’Imana bituvyurira umutima wo kugira iki?

¹⁷ Turerekana yuko dukura ubwatsi ku bw’ijambo ry’Imana mu kubaho turyisunga (Zaburi 119:57-64). Umwanditsi wa Zaburi ‘yavuze yuko azokwitondera amajambo ya Yehova’, eka mbere no ‘mu gicugu yama avyuka kugira ngo ashimire Imana ku bw’imanza zayo zigororotse’. Iyo twikanguye mw’ijoro, ese ukuntu tuba turonse akaryo keza ko gukurira Imana ubwatsi mw’isengesho (Zaburi 119:57, 62)! Kuba duha agaciro ijambo ry’Imana biratuvyurira umutima wo kurondera inyigisho ziva ku Mana bikongera bigatuma tuba abantu bahimbawe ‘bagendana n’abubaha Yehova’, abo na bo bakaba ari abantu batinya Imana mu buryo bwerekana ko bayubaha (Zaburi 119:63, 64). Wumva none kw’isi hari abandi bagenzi boza baruta abo?

18. Yehova yishura gute amasengesho yacu igihe ‘imigozi y’abanyakibi itwizingiriyeko’?

¹⁸ Igihe dusenga n’umutima wacu wose tukongera tugasaba Yehova twicishije bugufi ngo atwigishe, tuba turiko ‘tumukomeshereza ibobo’ twiteze gutoneshwa na we. Turakeneye canecane gusenga igihe ‘imigozi y’abanyakibi yatwizingiriyeko’ (Zaburi 119:58, 61). Yehova arashobora gucagagura imigozi y’abansi ituzitira maze tugashobora kubandanya kurangura igikorwa co kwamamaza Ubwami no guhindura abantu abigishwa (Matayo 24:14; 28:19, 20). Ivyo vyaragaragaye akatari gake mu bihugu aho usanga igikorwa cacu kibujijwe.

Twizere ijambo ry’Imana

19, 20. Gushikirwa n’imibabaro bishobora gute kugirira umuntu ikimazi?

¹⁹ Kwizera Imana n’ijambo ryayo biradufasha kwihanganira imibabaro no gukora ivyo igomba (Zaburi 119:65-72). Naho abibone bari ‘bamuremeye ikinyoma’, umwanditsi wa Zaburi yaririmvye ati: “Kubabazwa kwangiriye ikimazi” (Zaburi 119:66, 69, 71). None gushikirwa n’imibabaro bishobora gute kugirira ikimazi uwo ari we wese mu basavyi ba Yehova?

²⁰ Igihe dushikiwe n’imibabaro, nta mazinda yuko dutakambira Yehova n’ubwira bwinshi, ivyo na vyo bigatuma turushiriza kumwiyegereza. Twoshobora kumara umwanya wiyongereye twiga Ijambo ry’Imana ryanditswe, tugashobora no kurushiriza kugira akigoro ko kurishira mu ngiro. Ivyo bituma tugira ubuzima burushirije kubamwo agahimbare. Mugabo tuvuge iki mu gihe dushikiwe n’imibabaro maze tukavyifatamwo mu buryo buhishura ko twoba dufise utugeso tubitubi, nk’ukutihangana be n’ubwishime? Dusenganye ubwira tukongera tugafashwa n’Ijambo ry’Imana be n’impwemu yayo, turashobora kurengera utwo tugeso maze ‘tukambara umuntu mushasha’ bimwe bishitse kuruta (Ab’i Kolosayi 3:9-14). Vyongeye, ukwizera kwacu kurakomezwa igihe twihanganiye ingorane (1 Petero 1:6, 7). Paulo yarungukiye ku marushwa yarimwo kubera ko yatumye arushiriza kwiheka kuri Yehova (2 Ab’i Korinto 1:8-10). Twoba tureka imibabaro ikaduhingura?

Twame twizigira Yehova

21. Bigenda gute igihe Imana imaramaje abibone?

²¹ Ijambo ry’Imana riraduha ishingiro rikomeye ryo kwizigira Yehova (Zaburi 119:73-80). Twizigiye vy’ukuri Umuremyi wacu, nta kizotuma tumaramara. Ariko rero kubera ivyo abandi bagira, turakenera guhumurizwa, kandi twoshobora kwumva dushaka gusenga duti: “Abibone nibamāramāre” (Zaburi 119:76-78). Igihe Yehova amaramaje mwene abo bantu, bituma inzira zabo mbi zija ku kabarore, izina ryiwe ryeranda na ryo rikezwa. Turashobora kwemera tudakeka yuko abahama abasavyi b’Imana ata kintu vy’ukuri bashikako. Nk’akarorero, ntibigeze baherengeteza Ivyabona vya Yehova bizigiza Imana umutima wabo wose, kandi ntibazokwigera babaherengeteza.​—Imigani 3:5, 6.

22. Ni mu buryo ubuhe umwanditsi wa Zaburi yari ameze “nk’umukuza w’urusato umanitswe ku mwotsi”?

²² Ijambo ry’Imana rituma turushiriza kuyizigira igihe turiko turahamwa (Zaburi 119:81-88). Kubera yuko abibone bariko barahama umwanditsi wa Zaburi, yumvise ameze “nk’umukuza w’urusato umanitswe ku mwotsi” (Zaburi 119:83, 86). Mu bihe vya Bibiliya, imikuza ikozwe mu nshato z’igikoko yakoreshwa mu kubika amazi, umuvinyu be n’ibindi bintu biseseka. Igihe iyo mikuza itaba iriko irakoreshwa, yarashobora gukaba mu gihe imanitse hampande y’umuriro mu cumba kitagira ahantu umwotsi ushobora gusohokana. Ingorane canke uruhamo vyoba birigera bituma wumva umeze “nk’umukuza w’urusato umanitswe ku mwotsi”? Nimba bimaze kugushikira, niwizigire Yehova wongere usenge uti: “Ungire muzima, nk’ukw imbabazi zawe ziri, kugira ngo nitondere ivyo akanwa kawe kihanikirije”.​—Zaburi 119:88.

23. Twarimbuye iki mu kwihweza Zaburi 119:1-88, kandi dushobora kwibaza iki umwanya turindiranye umushasharo kwiga Zaburi 119:89-176?

²³ Ivyo twarimbuye mu gihimba ca mbere ca Zaburi ya 119 birerekana yuko Yehova agirira ubuntu-mvarukundo abasavyi biwe kubera bizigira ijambo ryiwe bakaba kandi bakunda cane ivyo yashinze, ivyibutswa vyiwe, amabwirizwa yiwe be n’ivyagezwe vyiwe (Zaburi 119:16, 47, 64, 70, 77, 88). Arahimbarwa n’uko abamwihebeye bitondera ijambo ryiwe (Zaburi 119:9, 17, 41, 42). Uko urindirana umushasharo kwiga igihimba gisigaye c’iyo zaburi y’akaroruhore, woshobora kwibaza uti: ‘Noba vy’ukuri ndeka ijambo rya Yehova rikamurikira inzira yanje?’.

[Akajambo k’epfo]

Wokwishura gute?

• Agahimbare nyakuri gahagaze ku ki?

• Ni mu buryo ubuhe ijambo rya Yehova rituma tuguma tudahumanye mu buryo bw’impwemu?

• Ni mu buryo butandukanye ubuhe ijambo ry’Imana rituronsa umutima rugabo be n’impumurizo?

• Ni kubera iki dukwiye kwizera Yehova n’ijambo ryiwe?

[Ifoto ku rup. 11]

Rusi, Rahabu na ba basore b’Abaheburayo bajanywe inyagano i Babiloni ‘baritondeye ivyo ijambo ry’Imana rivuga’

[Ifoto ku rup. 12]

Paulo ‘yaravugiye imbere y’abami ivyibutswa vy’Imana’ n’umutima rugabo