Samweli Waciwiri
17 Natenepa Aitofeli apanga Abhisaloni: “Ndaphata miyendo, ndisiye ndisankhule amuna 12.000 toera ndiende kasaka Dhavidhi masiku ano. 2 Ine ndinafika kuna iye mu ndzidzi unafuna iye kukhala wakuneta na wakusowa mphambvu,+ iye anadzagopa; pontho anthu onsene ali na iye anadzan’thawa, penepo ine ndinadzapha mambo basi.+ 3 Buluka penepo ine ndinacitisa kuti anthu onsene abwerere kuna iwe, mbwenye kubwerera kwa anthu anewa onsene kusanyindira pinafuna kucitikira munthu anasaka iwe. Penepo anthu onsene anadzakhala muntendere.” 4 Maonero anewa akhali adidi kakamwe kuna Abhisaloni na kuna akulu onsene a Izraeli.
5 Mbwenye Abhisaloni alonga: “Ndaphata miyendo, cemeranimbo Uzai+ wakuti ndi Muareki toera tibve pinafuna iye kulonga.” 6 Natenepa Uzai abwera kuna Abhisaloni. Penepo Abhisaloni ampanga: “Uphungu udapereka Aitofeli ndi unoyu. Kodi ife tisafunika kuubvera? Khala nkhabe, tipange pinafunika ife kucita.” 7 Buluka penepo Uzai apanga Abhisaloni: “Uphungu udapereka Aitofeli ulendo uno si wadidi tayu!”+
8 Uzai apitiriza: “Iwe usadziwa mwadidi kuti babako na amuna ali na iye ndi amphambvu,+ pontho ali akusowa cidikhiro* ninga ursu* idakwatirwa anace ntsanga.+ Kusiyapo pyenepi, babako ndi nyankhondo,+ natenepa masiku ano iye nee anagona pabodzi na mbumba. 9 Pa ndzidzi uno, iye abisala m’mphako* peno mbuto inango;+ angatoma ndiye kumenyana nawo, ale anafuna kubva pyenepi analonga: ‘Anthu anaphedzera Abhisaloni akundwa!’ 10 Ngakhale mamuna wacipapo wakuti ali na ntima ninga wa nkhalamu+ anadzagopa kakamwe, thangwi Izraeli onsene asadziwa kuti babako ndi nyankhondo wamphambvu,+ pontho kuti amuna ali na iye ndi acipapo. 11 Uphungu wanga ndi uyu: Cemeresa Aizraeli onsene kutomera ku Dhani mpaka ku Bhersebha,+ iwo asafunika kukhala azinji kakamwe ninga tcetca ya n’khundu mwa bara,+ pontho iwe usafunika kuatsogolera kunkhondo. 12 Ife tinaenda kamenyana naye m’mbuto zonsene zinafuna ife kun’gumana, pontho tinaenda kuna iye ninga bume inagwa pantsi; iye pabodzi na amuna ali na iye nkhabe anafuna kudzapulumuka. 13 Iye angathawira mu nzinda, Aizraeli onsene anakwata nkhambala mbaenda mu nzinda unoyu, pontho ife tinakwekweta mpanda wa nzinda unoyu mpaka ku gowa, penepo nee panasala mwala.”
14 Natenepa Abhisaloni na amuna onsene a Izraeli alonga: “Uphungu wa Uzai wakuti ndi Muareki ndi wadidi kakamwe+ kupiringana uphungu wa Aitofeli!” Yahova akhadacitisa* kuti anthu akhonde kuphatisira uphungu wadidi wa Aitofeli.+ Yahova acita pyenepi toera kubweresera nyatwa Abhisaloni.+
15 Mukupita kwa ndzidzi, Uzai apanga nyantsembe Zadhoke na nyantsembe Abhiyatari+ uphungu udapereka Aitofeli kuna Abhisaloni na kuna akulu a Izraeli, iye aapangambo uphungu udapereka iye kuna Abhisaloni. 16 Pontho iye alonga: “Cincino tumizani mphangwa mwakucimbiza kuna Dhavidhi mbamuncenjeza: ‘Masiku ano lekani kukhala m’mbuto zinawambuka na anthu* nkulo wa Yordani dhuzi na thando, mbwenye musafunika kuwambuka nkulo, mungakhonda kucita pyenepi, mambo pabodzi na onsene ali na iye anaphiwa.’”*+
17 Yonatani+ na Akimazi+ akhadikhira ku Eni-Rojeli;+ ntumiki m’bodzi wankazi aenda kaapanga mphangwa, iwo mbaendambo kapanga Mambo Dhavidhi, pontho iwo nee akhafuna kuoniwa mbakapita mu nzinda. 18 Mbwenye m’phale m’bodzi aaona mbapanga Abhisaloni. Natenepa iwo abuluka mwakucimbiza mbafika ku Bhaurimu+ panyumba ya mamuna m’bodzi wakuti akhali na ncera panyumba pace. Iwo agwera mu ncera unoyu, 19 pontho nkazi wa mamuna unoyu afunga ncera na nguwo mbathasika tirigu yakusindzwa padzulu pa nguwo ineyi; nee m’bodzi akhadziwa pyenepi. 20 Atumiki a Abhisaloni afika panyumba ya nkazi unoyu mbambvundza: “Ali kupi Akimazi na Yonatani?” Nkazi atawira: “Iwo apita na pano mbaenda kukhundu ya ku nkulo.”+ Penepo iwo aasaka mbwenye nee aagumana, buluka penepo abwerera ku Yerusalemu.
21 Amuna anewa pidaenda iwo, Akimazi na Yonatani abuluka mu ncera mbaenda kapanga Mambo Dhavidhi. Iwo ampanga uphungu udalonga Aitofeli mbalonga:+ “Lamukani, pontho wambukani mwakucimbiza nkulo.” 22 Mwakukhonda dembuka, Dhavidhi na mbumba yonsene ikhali na iye alamuka mbawambuka Yordani. Pikhaca kunja, anthu onsene akhadamala kuwambuka Yordani.
23 Aitofeli pidaona iye kuti uphungu wace nee waphatisirwa, akwira buru mbaenda kunyumba kwace, mu nzinda wace.+ Pidamala iye kupereka pitsogolero kuna anthu a panyumba pace,+ amangika.*+ Natenepa iye afa mbaikhwa m’masiye a ambuyace.
24 Mu ndzidzi unoyu Dhavidhi aenda ku Manaimu,+ mbwenye Abhisaloni na amuna onsene a Izraeli awambuka Yordani. 25 Abhisaloni akhazikisa Amasa+ ninga ntsogoleri wa anyankhondo ace pa mbuto ya Yoabhe;+ Amasa akhali mwana wa mamuna m’bodzi wa dzindza ya Izraeli anacemerwa Itira, wakuti akhadapita m’mabonde na Abhigaili+ mwana wankazi wa Naasi, mwanankaziace Zeruya, mai wace Yoabhe. 26 Abhisaloni na amuna a Izraeli amanga misasa yawo mu dziko ya Jiliyadhi.+
27 Dhavidhi pidafika iye kwene ku Manaimu, Sobhi mwana wa Naasi wa ku Rabha+ nzinda wa Aamoni, Makiri+ mwana wa Amiyeli wa ku Lo-Dhebhari na Bharzilai+ wa ku Jiliyadhi adabuluka ku Rojelimu, 28 abweresa matalimba, mabasiya, pikalango, tirigu, sevadha, ufa, tirigu yakukazinga, cimbamba, nyemba, tirigu yakuumiswa, 29 uci, mantega, mabira na kejo.* Iwo abweresa pinthu pyenepi pyonsene toera Dhavidhi na anthu akhali na iye adye,+ thangwi iwo alonga: “Mbumba iri na njala, yaneta, pontho iri na nyota n’thando.”+