Samweli Waciwiri

2 Buluka penepo Dhavidhi abvundza Yahova:+ “Ndisafunika kuenda mu nzinda ubodzi wa Yuda?” Yahova antawira: “Ndoko.” Dhavidhi abvundza pontho: “Ndiende nzinda upi?” Iye atawira: “Ku Ebhroni.”+ 2 Natenepa Dhavidhi aenda ku Ebhroni pabodzi na akazace awiri, Ainowamu+ wa ku Yezrieli na Abhigaili+ wa ku Karmelo wakuti akhali nkazi wa Nabhale. 3 Dhavidhi aendambo na amuna akhali na iye,+ pabodzi na mabanja awo, pontho iwo akhala m’mizinda yakuti ikhali dhuzi na Ebhroni. 4 Buluka penepo amuna a ku Yuda afika kweneko, mbadzodza Dhavidhi ninga mambo wa dzindza ya Yuda.+

Dhavidhi apangwa: “Amuna a ku Yabhesi-Jiliyadhi ndiwo adaikha Sauli.” 5 Natenepa Dhavidhi atuma anthu toera akapange amuna a ku Yabhesi-Jiliyadhi kuti: “Yahova mbakupaseni nkhombo thangwi ya ufuni wakukhonda mala udapangiza imwe kuna mbuyanu Sauli, thangwi yakumuikha munthumbi.+ 6 Pontho Yahova mbapangize ufuni wakukhonda mala na kunyindirika kwace kuna imwe. Ine ndinadzapangizambo kukoma ntima kuna imwe thangwi yakucita kwanu pyenepi.+ 7 Cincino khalani amphambvu na acipapo, thangwi mbuyanu Sauli afa, pontho dzindza ya Yuda yandidzodza toera ndikhale mambo wawo.”

8 Mbwenye Abhineri+ nkulu wa anyankhondo a Sauli, wakuti ndi mwana wa Neri, akwata Isi-Bhoseti+ mwana wa Sauli, mbaenda naye ku Manaimu,+ 9 pontho an’khazikisa ninga mambo toera atonge Jiliyadhi,+ Aasere, Yezrieli,+ Efraimu,+ Bhenjamini na Izraeli onsene. 10 Isi-Bhoseti mwana wa Sauli akhali na pyaka 40 pyakubalwa pidakhazikiswa iye ninga mambo wa Izraeli, pontho iye atonga mu pyaka piwiri. Mbwenye dzindza ya Yuda ikhali kukhundu ya Dhavidhi.+ 11 Ndzidzi udakhala* Dhavidhi ninga mambo wa dzindza ya Yuda ku Ebhroni, ukhali pyaka pinomwe na miyezi mitanthatu.+

12 Mukupita kwa ndzidzi, Abhineri mwana wa Neri na anyankhondo a Isi-Bhoseti mwana wa Sauli, abuluka ku Manaimu+ mbaenda ku Jibheyoni.+ 13 Yoabhe+ mwana wa Zeruya+ na anyankhondo a Dhavidhi aendambo mbagumanikana nawo pa ncera wa Jibheyoni; nsoka ubodzi ukhali kukhundu ibodzi ya ncera, mbwenye nsoka unango ukhali kukhundu inango ya thawala. 14 Buluka penepo Abhineri apanga Yoabhe: “Tende tipange aphale athu akhunganyike toera amenyane* ife mbatikaona.” Yoabhe atawira: “Mbakhunganyike.” 15 Natenepa iwo alamuka. Misoka ineyi miwiri yalengesa amuna angasi toera aende kamenyana. Mu nsoka wa Isi-Bhoseti mwana wa Sauli, asankhulwa anyankhondo 12 a Bhenjamini; mu nsoka wa Dhavidhi asankhulwambo anyankhondo 12. 16 Iwo aphatana misolo mbapfekana masupada unango na ndzace, onsene agwa pantsi mbafa. Natenepa mbuto ineyi yakuti iri ku Jibheyoni yacemerwa Elkati-Azurimi.

17 Buluka penepo paoneka nkhondo ikulu kakamwe pa ntsiku ineyi. Pakumalisa, Abhineri na anyankhondo a Izraeli akundwa na anyankhondo a Dhavidhi. 18 Ana atatu a Zeruya+ akuti ndi Yoabhe,+ Abhisai+ na Azaeli+ akhali penepo; Azaeli akhadziwa kakamwe kuthamanga ninga mbawala ntsanga. 19 Azaeli atoma kuthamangisa Abhineri, pontho pikhan’thamangisa iye, nee apeuka kukhundu yamadyo peno yabzwere. 20 Abhineri pidayang’ana iye nduli abvundza: “Ndiwe Azaeli?” Iye atawira: “Inde, ndine.” 21 Penepo Abhineri ampanga: “Peuka kukhundu yamadyo peno yabzwere, phata m’bodzi mwa aphale mbunkwatira pinthu pyace.” Mbwenye Azaeli apitiriza kun’thamangisa. 22 Natenepa Abhineri apanga pontho Azaeli: “Leka kundithamangisa, gopa ndinakupha. Ine ndingakupha, ndinakwanisa tani kuyang’ana nkhope ya m’bale wako Yoabhe?” 23 Mbwenye iye apitiriza kun’thamangisa, natenepa Abhineri amulasa na dipa yace,+ dipa mbibulukira kunsana kwace; iye agwa pantsi mbaferatu penepo. Anthu onsene akhapita na pa mbuto idagwa Azaeli mbafa, akhalimira.

24 Buluka penepo Yoabhe na Abhisai aenda kasaka Abhineri. Pikhadoka dzuwa, iwo afika paphiri ya Ama, yakuti iri dhuzi na Jiya, njira inaenda kuthando ya Jibheyoni. 25 Amuna a dzindza ya Bhenjamini abvungazikana na Abhineri mbakhala nsoka ubodzi, mbalimira padzulu paphiri. 26 Penepo Abhineri akhuwira Yoabhe: “Kodi tinapitiriza basi kuphana unango na ndzace? Nee usadziwa kuti pyenepi pinatibweresera nyatwa? Unapanga lini amuna ali na iwe toera asiye kutowerera abale awo?” 27 Natenepa Yoabhe atawira: “Ndiri kudumbira mu dzina ya Mulungu wa m’maso kuti iwe mbudakhonda kulonga, amuna mbadapitiriza kutowerera abale awo mpaka mangwana namacibese.” 28 Buluka penepo Yoabhe aliza nyanga, amuna akhali na iye asiya kuthamangisa Aizraeli, nkhondo mbimala.

29 Abhineri na amuna akhali na iye afamba ku Arabha+ masiku anewa onsene, awambuka Yordani, apita na ku gowa yonsene,* pakumalisa afika ku Manaimu.+ 30 Yoabhe pidabwerera iye buluka kathamangisa Abhineri, acemeresa anthu onsene. Anyankhondo 19 a Dhavidhi akhadasowekapo, kuphatanizambo Azaeli. 31 Mbwenye anyankhondo a Dhavidhi akunda amuna a dzindza ya Bhenjamini na amuna akhali na Abhineri, pontho anyankhondo awo 360 aphiwa. 32 Iwo akwata manungo a Azaeli+ mbaaikha m’masiye a babace ku Bhetelehemu.+ Buluka penepo Yoabhe na amuna akhali na iye afamba masiku amumphu, mbafika ku Ebhroni+ mukhaca kunja.