Samweli Waciwiri

3 Nkhondo pakati pa ale akhaphedzera banja ya Sauli na ale akhaphedzera Dhavidhi yapitiriza mu ndzidzi uzinji; Dhavidhi akhapitiriza kukhala wamphambvu,+ mbwenye ale akhaphedzera banja ya Sauli akhapitiriza kufewa.+

2 Mu ndzidzi unoyu, Dhavidhi akhadabala ana amuna ku Ebhroni.+ Mwanace wakutoma* akhali Aminoni+ adabala iye na Ainowamu+ wa ku Yezrieli. 3 Mwanace waciwiri akhali Kiliabhe adabala iye na Abhigaili+ wa ku Karmelo wakuti akhali nkazi wa Nabhale; mwanace wacitatu akhali Abhisaloni+ adabala iye na Maaka, mwana wankazi wa Talimai+ mambo wa ku Jesuri. 4 Mwanace wacinai akhali Adhoniya+ adabala iye na Ajiti, pontho mwanace wacixanu akhali Sefatiya adabala iye na Abhitali. 5 Wacitanthatu akhali Itereamu adabalwa na Egla nkazi wa Dhavidhi. Anewa ndi ana adabala Dhavidhi ku Ebhroni.

6 Mu ndzidzi ukhapitiriza nkhondo pakati pa ale akhaphedzera banja ya Sauli na ale akhaphedzera Dhavidhi, Abhineri+ akhapitiriza kukhala wamphambvu kakamwe m’banja ya Sauli. 7 Sauli akhali na nkazi unango akhacemerwa Rizipa+ mwana wa Aia. Mukupita kwa ndzidzi Isi-Bhoseti+ abvundza Abhineri: “Thangwi yanji wapita m’mabonde na nkazi wa babanga?”+ 8 Abhineri aipirwa kakamwe na mafala a Isi-Bhoseti mbalonga: “Kodi ine ndine mwanambwa mu dziko ya Yuda? Mpaka lero ine ndisapangiza ufuni wakukhonda mala kuna banja ya babako Sauli, kuna abale ace na kuna axamwali ace, pontho ine nee ndakupereka m’manja mwa Dhavidhi; ngakhale tenepo iwe usandipambizira kuti ndacita pinthu pyakuipa na nkazi. 9 Mulungu mbanditcunyuse kakamwe ndingakhonda kucita kuna Dhavidhi mwakubverana na pidadumbira Yahova kuna iye.+ 10 Iye adumbira kuna Dhavidhi kuti anabulusa umambo m’banja ya Sauli, mbakhazikisa mpando waumambo wa Dhavidhi ku Izraeli na ku Yuda, kutomera ku Dhani mpaka ku Bhersebha.”+ 11 Isi-Bhoseti nee akwanisabve kutawira Abhineri, thangwi akhan’gopa.+

12 Mwakukhonda dembuka Abhineri atuma anthu toera akapange Dhavidhi: “Mbani mwanaciro dziko?” Iye athimiza kulonga: “Cita cibverano na ine, ndinacita pyonsene pinakwanisa ine* toera Izraeli onsene akhale kukhundu yako.”+ 13 Dhavidhi atawira: “Mphyadidi! Ine ndinacita cibverano na iwe. Mbwenye ine ndisakuphemba kuti leka bwera kudzaonana na ine ungakhonda kubweresa Mikale+ mwana wankazi wa Sauli.” 14 Dhavidhi atuma anthu kuna Isi-Bhoseti+ mwana wa Sauli toera ampange: “Ndipase nkazanga Mikale, thangwi ndapereka makanda 100 a ntsonga zakumaso kwa Afilisti+ toera ndinsembe.” 15 Natenepa Isi-Bhoseti atuma anthu toera akakwate Mikale kuna mamunace Palitiyeli+ mwana wa Laisi. 16 Mbwenye mamunace apitiriza kuntowera uku mbakalira mpaka ku Bhaurimu.+ Buluka penepo Abhineri ampanga: “Bwerera!” Natenepa iye abwerera.

17 Mu ndzidzi unoyu, Abhineri atumiza mphangwa izi kuna akulu a Izraeli: “Kutomera kale imwe musafuna kuti Dhavidhi akhale mambo wanu. 18 Cincino citani pyenepi, thangwi Yahova apanga Dhavidhi: ‘Na djanja ya ntumiki wanga Dhavidhi+ ine ndinadzapulumusa mbumba yanga ya Izraeli m’manja mwa Afilisti na m’manja mwa anyamalwa awo onsene.’” 19 Buluka penepo Abhineri alonga na mbumba ya Bhenjamini.+ Kusiyapo pyenepi Abhineri aenda ku Ebhroni kalonga na Dhavidhi paekha toera kumpanga pidabverana Izraeli na dzindza ya Bhenjamini.

20 Abhineri na amuna 20 pidafika iwo kuna Dhavidhi ku Ebhroni, Dhavidhi acitira phwando Abhineri pabodzi na amuna akhali na iye. 21 Natenepa Abhineri apanga Dhavidhi: “Nditawiriseni ndiende kagumanya Izraeli onsene toera akhale kukhundu yanu mbuyanga mambo, pontho imwe munadzakhala mambo wa anthu onsene.” Dhavidhi atawirisa Abhineri kuenda, penepo iye aenda muntendere.

22 Buluka penepo Yoabhe na atumiki a Dhavidhi afika buluka kunkhondo, iwo abwera na pinthu pizinji pidatapata iwo. Abhineri nee akhalibve na Dhavidhi ku Ebhroni thangwi iye akhadantawirisa kuti aende muntendere. 23 Pidafika Yoabhe+ na anyankhondo onsene akhali na iye, Yoabhe apangwa: “Abhineri+ mwana wa Neri+ abwera kuna mambo, pontho iye antawirisa toera aende, mbaenda pyace muntendere.” 24 Natenepa Yoabhe aenda kuna mambo mbambvundza: “Ninji pidacita imwe? Abhineri abwera kuna imwe. Mphapo thangwi yanji mwantawirisa kuenda pyace muntendere? 25 Imwe musandziwa Abhineri mwana wa Neri! Iye abwera pano kudzakunyengezani toera adziwe njira zanu zonsene na pyonsene pinacita imwe.”

26 Natenepa Yoabhe abuluka pana Dhavidhi, iye atuma anthu toera atowere Abhineri, iwo an’gumana pa ncera wa Sira mbabwerera naye; mbwenye Dhavidhi nee akhadziwa cinthu. 27 Abhineri pidabwerera iye ku Ebhroni,+ Yoabhe ankwata mbaenda naye pakhundu pansuwo ukulu wa nzinda toera acedze paokha. Penepo Yoabhe antukumiza supada m’mimba, mbafa;+ acita pyenepi thangwi iye akhadapha* m’bale wace Azaeli.+ 28 Mukupita kwa ndzidzi, Dhavidhi pidabva iye pyenepi, alonga: “Ine na umambo wanga nee tiri na mulando pamaso pa Yahova kwenda na kwenda thangwi ya kuphiwa+ kwa Abhineri mwana wa Neri. 29 Mulando wa ciropa mbugwere Yoabhe+ na anthu onsene a panyumba ya babace. Panyumba pa Yoabhe ndzidzi onsene mbapaoneke munthu wakuti ali na utenda wa kumaso,+ peno nyamatanya,+ peno nyakulamala,* peno munthu anafuna kuphiwa na supada peno munthu wakusowa cakudya!”+ 30 Natenepa Yoabhe na m’bale wace Abhisai+ apha Abhineri+ thangwi iye akhadapha m’bale wawo Azaeli kunkhondo+ ku Jibheyoni.

31 Dhavidhi apanga Yoabhe na amuna onsene akhali na iye: “Pandulani nguwo zanu, pontho bvalani masakha mbamutsukwala thangwi ya Abhineri.” Mambo Dhavidhi akhaenda nduli mwa baulu.* 32 Iwo aikha Abhineri ku Ebhroni; pontho mambo alira mwakugaluza pa nthumbi ya Abhineri, anthu onsene mbatomambo kulira. 33 Mambo aimba nyimbo iyi yaciliro thangwi ya Abhineri:

“Abhineri akhafunika afe ninga munthu wakusowa ndzeru?

Iwe wafa ninga munthu adaphiwa na mapanga.”*+

Natenepa anthu onsene atoma pontho kulira Abhineri.

35 Pidapita ndzidzi ungasi, amuna onsene abwera kudzabalangaza Dhavidhi na cakudya dzuwa mbidzati kudoka, mbwenye Dhavidhi adumbira: “Mulungu mbanditcunyuse kakamwe ndingadya nkate peno cinthu cinango dzuwa mbidzati kudoka!”+ 36 Anthu onsene aona pyenepi mbakomerwa. Iwo aona pikhacitika mbakomerwa na pikhacita mambo. 37 Natenepa anthu onsene na Izraeli onsene adziwa kuti si mambo tayu adapha+ Abhineri mwana wa Neri. 38 Buluka penepo mambo apanga atumiki ace: “Dziwani kuti mu Izraeli+ lero mwafa ntsogoleri, pontho munthu wakufunika. 39 Maseze ndadzodzwa ninga mambo,+ lero ndiri wakusowa mphambvu, pontho amuna awa ana a Zeruya+ ndi akuipa kakamwe.+ Yahova mbabwezere munthu wakuipa mwakubverana na pyakuipa pidacita iye.”+