Samweli Waciwiri
4 Isi-Bhoseti+ mwana wa Sauli pidabva iye kuti Abhineri afa ku Ebhroni,+ aluza cipapo, pontho Aizraeli onsene adzudzumika. 2 Pakhali na amuna awiri akuti akhatsogolera misoka ya anyakutapata ya mwana wa Sauli: M’bodzi dzina yace ikhali Bhana, unango akhali Rekabu. Iwo akhali ana a Rimoni wa ku Bheroti wa dzindza ya Bhenjamini. (Thangwi cisa ca Bheroti+ cikhaoniwa ninga khundu ya Bhenjamini. 3 Anthu a ku Bheroti athawira ku Jitaimu,+ pontho iwo asakhala kweneko ninga alendo mpaka lero.)
4 Yonatani+ mwana wa Sauli akhali na mwanace wamamuna wakuti akhali wakulamala miyendo.+ Iye akhali na pyaka pixanu pyakubalwa pidafika mphangwa za kuphiwa kwa Sauli na Yonatani buluka ku Yezrieli.+ Makayaya wace ankwata mbathawa naye, mbwenye thangwi yakugopa, mu ndzidzi ukhathawa iye mwana agwa mbalamala miyendo. Mwana unoyu dzina yace ikhali Mefibhoseti.+
5 Rekabu na Bhana ana amuna a Rimoni wa ku Bheroti, aenda kunyumba ya Isi-Bhoseti namasikati dzuwa mbikapisa kakamwe, mu ndzidzi ukhapuma iye. 6 Iwo apita n’nyumba ninga ali kuenda kakwata tirigu, mbam’phola m’mimba; buluka penepo Rekabu na m’bale wace Bhana+ athawa. 7 Pikhadapita iwo n’nyumba, Isi-Bhoseti akhagona patalimba nkwartu mwace. Iwo am’menya mbamupha, pidamala iwo an’gwanda nsolo. Buluka penepo, akwata nsolo wace mbafamba masiku amumphu mu nseu wa kuenda ku Arabha. 8 Iwo aenda na nsolo wa Isi-Bhoseti+ kuna mambo Dhavidhi ku Ebhroni mbampanga: “Uyu nsolo wa Isi-Bhoseti mwana wa nyamalwa wanu Sauli,+ ule akhafuna kukuphani.+ Lero Yahova abwezera pyakuipa Sauli na anace thangwi ya imwe mbuyanga mambo.”
9 Mbwenye Dhavidhi apanga Rekabu na m’bale wace Bhana, ana amuna a Rimoni wa ku Bheroti kuti: “Ndiri kudumbira mu dzina ya Yahova Mulungu wa m’maso, ule adandipulumusa mu nyatwa zanga,+ 10 pidabwera munthu m’bodzi kudzandipanga kuti ‘Sauli afa,’+ mbanyerezera kuti ali kundibweresera mphangwa zadidi, ine ndam’phata mbandimupha+ ku Zikilage. Pyenepi ndipyo pidatambirisa ine munthu adandibweresera mphangwa! 11 Ndiye tani amuna akuipa adaenda kapha munthu wakulungama patalimba, n’nyumba mwace? Kodi nee ndisafunika kukutcunyusani thangwi yakucucisa ciropa cace,+ mbandikufudzani pa dziko?” 12 Dhavidhi apanga aphale ace toera aaphe.+ Iwo agwanda manja awo na miyendo yawo mbamanika manungo awo+ dhuzi na thawala ku Ebhroni. Mbwenye akwata nsolo wa Isi-Bhoseti mbauikha munthumbi ya Abhineri ku Ebhroni.