Kronika Waciwiri
8 Kunkhomo kwa pyaka 20, mu ndzidzi udamanga Salomoni nyumba ya Yahova na nyumba yace,+ 2 Salomoni amanga pontho mizinda ikhadapaswa iye na Iramu,+ mbaikha Aizraeli toera akhale mwenemu. 3 Kusiyapo pyenepi, Salomoni aenda kamenya nkhondo na anthu a ku Amati-Zobha mbakunda nzinda unoyu. 4 Buluka penepo, iye amanga pontho nzinda wa Tadhimori ukhali n’thando, kuphatanizambo mizinda+ yonsene yakukoyera pinthu ikhadamanga iye ku Amati.+ 5 Iye amangambo Bheti-Oroni+ wa ku Nthunda na Bheti-Oroni+ wa ku Gowa, yakuti ndi mizinda idazungulirwa na mipanda, misuwo na mipiringanyo, 6 pontho amanga Bhalati+ na mizinda yonsene ikhakoyerwa pinthu pya Salomoni, mizinda yonsene ya ngolo za nkhondo,+ mizinda ya anyamakavalo, na pyonsene pikhafuna kumanga Salomoni mu Yerusalemu, ku Libhano na mu dziko yonsene ikhatonga iye.
7 Mbwenye anthu onsene adasala a madzindza a Aeti, Aamori, Aperesi, Aeveu na Ayebusi,+ akuti nee akhali Aizraeli,+ 8 anawo adasala mu dziko ineyi, akuti Aizraeli nee aafudza,+ Salomoni aakwata mbaaphatisa basa yakuwanga ninga mabitcu mpaka lero.+ 9 Mbwenye Salomoni nee aphatisa basa Aizraeli ninga mabitcu m’mabasace,+ thangwi iwo akhali anyankhondo ace, atsogoleri na akulu a anyakufambisa ngolo zace za nkhondo na anyamakavalo ace.+ 10 Akhalipo akulu-akulu 250 a atsogoleri akuti akhayang’anira basa ya Mambo Salomoni, iwo akhaonera anthu anaphata basa.+
11 Salomoni akwata mwana wankazi wa Farau+ buluka ku Nzinda wa Dhavidhi toera aende kakhala kunyumba idam’mangira iye,+ thangwi iye alonga: “Maseze iye ndi nkazanga, nee asafunika kukhala n’nyumba ya Dhavidhi Mambo wa Izraeli, thangwi mbuto zidakhala Bokosi ya Yahova ndi zakucena.”+
12 Buluka penepo, Salomoni apereka kuna Yahova ntsembe zakupiswa+ pa guwa+ ya Yahova idamanga iye kutsogolo kwa khonde.+ 13 Iye akhatoweza pikhafunika kucitwa pa ntsiku mwakubverana na matongero adapereka Mose thangwi ya ntsiku za Masabudu,+ ntsiku zakubalwa kwa mwezi+ na maphwando matatu anacitwa pa caka:+ Phwando ya Mikate Yakusowa Pyakutupisa,+ Phwando ya Masumana,+ na Phwando ya Misasa.*+ 14 Kusiyapo pyenepi, Salomoni akhazikisa misoka ya anyantsembe+ toera aphate mabasa awo mwakubverana na pitsogolero pya Dhavidhi pai wace, akhazikisa Alevi mu mbuto zawo toera asimbe+ Mulungu na kutumikira patsogolo pa anyantsembe mwakubverana na pikhafunika kucitwa pa ntsiku. Akhazikisa anyakuonera misuwo m’misoka yawo toera aonere misuwo+ yakusiyana-siyana, thangwi unoyu ukhali ntemo udakhazikisa Dhavidhi ntumiki wa Mulungu wandimomwene. 15 Pontho, mu pinthu pyonsene iwo nee asiya kubvera ntemo udapereka mambo kuna anyantsembe na Alevi, kuphatanizambo unalonga pya nyumba zakukoyera pinthu. 16 Basa yonsene ya Salomoni yacitwa munjira yadidi kakamwe, kutomera pa ntsiku idaikhwa miyala pantsi toera kumanga nyumba ya Yahova+ mpaka kumala kwayo. Natenepa nyumba ya Yahova yamala kumangwa.+
17 Pa ndzidzi unoyu Salomoni aenda ku Ezioni-Jebheri+ na ku Elati+ pagombe ya Bara, mu dziko ya Edhomi.+ 18 Iramu+ atuma anyabasa ace toera aende kuna Salomoni kapereka mabote na amuna akuti akhali na maluso akufambisa mabote. Iwo aenda pabodzi na atumiki a Salomoni ku Ofire+ kakwata matalento* 450 a ouro+ mbaenda nawo kuna Mambo Salomoni.+