Kronika Waciwiri

9 Mambo wankazi wa ku Sabha+ abva mphangwa za kubvekera kwa Salomoni, natenepa iye aenda ku Yerusalemu kayesera Salomoni na mibvundzo yakunentsa. Iye aperekerwa na nsoka ukulu kakamwe wa anyabasa ace, akhali na makamelo adathukula mafuta a bhalsamu, ouro izinji kakamwe+ na miyala ya ntengo ukulu. Iye aenda kuna Salomoni mbambvundza pinthu pyonsene pikhafuna iye kudziwa.*+ 2 Penepo Salomoni antawira mibvundzo yace yonsene. Nkhabepo mbvundzo wakuti ukhali wakunentsa* kakamwe kuna Salomoni, mbacimwana kuutawira.

3 Mambo wankazi wa ku Sabha pidaona iye udziwisi wa Salomoni,+ nyumba idamanga iye,+ 4 cakudya cikhali pameza pace,+ njira ikakhala atumiki ace pameza, basa ikhaphata anyakupereka cakudya pameza na nguwo zikhadabvala iwo, anyakupereka pyakumwa na nguwo zikhabvala iwo, ntsembe zakupiswa zikhapereka iye panyumba ya Yahova,+ iye adzumatirwa kakamwe na pyenepi.* 5 Natenepa iye apanga mambo: “Mphangwa zidabva ine pikhali ine ku dziko yanga thangwi ya pinthu pinacita imwe,* na udziwisi wanu ndi zandimomwene. 6 Mbwenye ine nee ndakhulupira mphangwa zidapangwa ine mpaka pidabwera ine, mbandipiona na maso anga.+ Mwandimomwene, pidapangwa ine thangwi ya udziwisi wanu ukulu+ ndi pang’ono basi! Pidaona ine pisapiringana pyonsene pidabva ine thangwi ya imwe.+ 7 Anyakutsandzaya ndi anthu anu, pontho anyakutsandzaya ndi atumiki anu anakhala na imwe ntsiku zonsene, mbakabvesera udziwisi wanu! 8 Mbasimbwe Yahova Mulungu wanu, ule adakomerwa na imwe mbakuikhani pa mpando wace waumambo ninga mambo adasankhulwa na Yahova Mulungu wanu. Nakuti Mulungu wanu asafuna Aizraeli,+ pontho asafuna kuti iwo apitirize kukhala kwenda na kwenda, iye akukhazikisani ninga mambo wa Aizraeli toera kutonga mwadidi na mwakulungama.”

9 Buluka penepo, iye apasa mambo matalento* 120 a ouro,+ mafuta mazinji kakamwe a bhalsamu na miyala ya ntengo ukulu. Cipo abwereswa pontho mafuta mazinji kakamwe a bhalsamu ninga adapereka mambo wankazi wa ku Sabha kuna Mambo Salomoni.+

10 Kusiyapo pyenepi, atumiki a Iramu na atumiki a Salomoni adabweresa ouro ya ku Ofire,+ abweresambo matabwa a nsantha na miyala ya ntengo ukulu.+ 11 Mambo akwata matabwa a nsantha toera kucita masikada a nyumba ya Yahova+ na a nyumba ya mambo,+ acitambo nawo maarpa na pyakuimba napyo pya nkhambala toera piphatisirwe na anyakuimba.+ Matabwa ninga anewa cipo aoneka kale mu dziko ya Yuda.

12 Mambo Salomoni apasa mambo wankazi wa ku Sabha pinthu pyonsene pikhafuna iye na pidaphemba iye, ampasa pizinji kupiringana pidabweresa iye kuna mambo. Buluka penepo iye abwerera ku dziko yace pabodzi na atumiki ace.+

13 Ouro ikhabwereserwa Salomoni pa caka ikhalemera matalento* 666 a ouro,+ 14 kusiyapo ouro ikhabwereswa na anyamalonda a Salomoni na anyamalonda akufamba-famba, na pinthu pikhabwereswa na amambo onsene a ku Arabhya na atsogoleri a dziko ineyi, akuti akhabweresa ouro na parata kuna Salomoni.+

15 Mambo Salomoni asasanyisa maxango makulu 200 a ouro yakubvungazwa na ntundu unango wa utale+ (xango ibodzi na ibodzi yacitwa na masiklo* 600 a ouro),+ 16 pontho asasanyisa maxango mang’ono 300 a ouro yakubvungazwa na ntundu unango wa utale (xango ing’ono ibodzi na ibodzi ikhadacitwa na mina* zitatu za ouro). Buluka penepo, mambo apikwata mbapiikha n’Nyumba ikhacemerwa Nsitu wa Libhano.+

17 Mambo asasanya mpando ukulu waumambo, aucita na nyanga za ndzou mbaukhwaza ouro yadidi kakamwe.+ 18 Pakhali masikada matanthatu toera kufika pa mpando waumambo; pa mpando waumambo paikhwa cinthu ca ouro toera kupondera miyendo. Mpando unoyu ukhali na pyakutsamisa mikono m’makhundu mawiri ene, pontho n’khundu mwa pyakutsamisa mikono mukhali pinthu piwiri pyakulandana na nkhalamu.+ 19 M’masikada matanthatu mukhali na pinthu 12 pyakulandana na nkhalamu,+ cibodzi na cibodzi cikhadalimiriswa kunkhomo kwa sikada ibodzi na ibodzi. Nkhabepo umambo unango ukhali na mpando waumambo ninga unoyu. 20 Makhomitco onsene a Mambo Salomoni akhali a ouro, pontho pyombo pyonsene pya Nyumba ikhacemerwa Nsitu wa Libhano pikhali pya ouro yadidi kakamwe. Nee pakhali na cinthu ca parata, thangwi mu ntsiku za Salomoni+ parata ikhaoniwa ninga yakusowa basa. 21 Thangwi mabote a mambo akhaenda ku Tarsi+ na atumiki a Iramu.+ Pontho kabodzi mu pyaka pitatu, mabote a ku Tarsi akhabweresa ouro, parata, nyanga za ndzou,+ mabongwe na mbalame zinacemerwa pavau.

22 Natenepa, Mambo Salomoni akhali wakupfuma maningi na waudziwisi+ kakamwe kupiringana amambo anango onsene pa dziko yapantsi. 23 Amambo a pa dziko yonsene yapantsi akhafuna kuonana na* Salomoni toera kubva udziwisi udaikha Mulungu muntima mwace.+ 24 Pyaka pyonsene iwo akham’bweresera miyoni ya pinthu pya parata, pya ouro, nguwo,+ pida pya nkhondo, mafuta a bhalsamu, makavalo na maburu. 25 Mathanga a Salomoni akhadagawiwa mbakhala na mbuto 4.000 toera kuikha makavalo ace akhakwewa ngolo za nkhondo, pontho akhali na makavalo 12.000,+ iye akhaakoya m’mizinda ya ngolo za nkhondo na ku Yerusalemu+ cifupi na mambo. 26 Salomoni akhatonga amambo onsene kutomera ku Nkulo wa Eufrate ku dziko ya Afilisti mpaka ku madire na Ejitu.+ 27 Mambo acitisa kuti parata ikhale yakunjipa kakamwe ninga miyala mu Yerusalemu; pontho acitisa kuti matabwa a sedhro anjipe ninga miti ya misambvu* ya ku Sefela.+ 28 Iwo akhabweresa makavalo kuna Salomoni buluka ku Ejitu+ na m’madziko anango onsene.

29 Mphangwa zinango zinalonga pinthu pidacitika mu umaso wa Salomoni,+ kubulukira pakutoma, zalembwa m’bukhu ya mprofeta Natani,+ mu profesiya idalonga Aiya+ wa ku Silo, na m’masomphenya a mprofeta Idho+ thangwi ya Yerobhoamu+ mwana wa Nebhati. 30 Salomoni atonga dziko yonsene ya Izraeli mu pyaka 40 mu Yerusalemu. 31 Buluka penepo, Salomoni afa mbaikhwa munthumbi mu Nzinda wa Dhavidhi, wakuti ndi nzinda wa babace;+ mwanace akhacemerwa Robhoamu adzakhala mambo pa mbuto yace.+