Eksodho
15 Pa ndzidzi unoyu, Mose na Aizraeli aimbira Yahova nyimbo iyi:+
“Ndinaimbira Yahova, thangwi iye akuzwa kakamwe.+
Iye abiza mʼbara+ makavalo na anyamakavalo.
2 Yahova* ndi kuwanga kwanga na mphambvu yanga, thangwi iye ndi mpulumusi+ wanga.*
Iye ndi Mulungu wanga, ine ndinansimba;+ iye ndi Mulungu wa pai wanga,+ ine ndinampasa mbiri.*+
3 Yahova ndi nyankhondo wamphambvu.+ Dzina yace ndi Yahova.+
4 Iye abiza mʼbara ngolo za Farau na anyankhondo ace,+
Anyankhondo ace aluso kakamwe alobzweka mʼBara Yakufuira.+
5 Iwo abizwa na mabimbi a mʼbara; iwo alirima ninga mwala+ mpaka pantsi.
6 Yahova, djanja yanu yamadyo ndi yamphambvu kakamwe;+
Yahova, djanja yanu yamadyo inakwanisa kunyedza nyamalwa.
7 Na mphambvu zanu zikulu, imwe munakwanisa kugwisa ale anayesera kuthimbana na imwe;+
Ukali wanu uli kugaka, pontho usaapisa ninga maudzu.
8 Thangwi ya muya udabuluka mʼmphuno mwanu, madzi aphatana;
Madzi akuwewa alimira ninga mpanda;
Madzi amphambvu auma pakati pa bara.
9 Nyamalwa alonga: ‘Ndinaatowerera, mbandiaphata!
Ndinatapata pinthu pyawo mbandipigawa mpaka ndingakwana* napyo!
Ndinabulusa supada yanga! Djanja yanga inadzaafudza!’+
10 Imwe mwapepesa mphepo yanu, bara mbiabiza;+
Iwo abira ninga ntobve mʼmadzi amphambvu.
11 Yahova, ndi mulungu upi unango adalandana na imwe?+
Mbani unango wakucena kakamwe+ ninga imwe?
Imwe, wakuti mwathema kuimbirwa nyimbo toera kulemedzwa na kusimbwa, imwe wakuti musacita pinthu pyakudzumisa.*+
12 Imwe mwalamusa djanja yanu, iwo mbamezwa+ na mataka.
13 Thangwi ya ufuni wanu wakukhonda mala, mwatsogolera mbumba idaombola imwe;+
Na mphambvu zanu munaitsogolera ku mbuto yanu yakucena inakhala imwe.
14 Mbumba zinadzabva+ pyenepi, mbazitetemera;
Anthu a ku Filistiya anadzaphatwa na kugopa.
15 Pa ndzidzi unoyu, atsogoleri a dzindza ya Edhomi anadzagopa kakamwe,
Atongi amphambvu a ku Moabhe anadzatetemera.+
Anthu onsene a ku Kanani anadzafewa manungo.+
16 Iwo anadzaphatwa na kugopa, mbatetemera.+
Thangwi ya mphambvu za nkono wanu, iwo anadzakhala ninga mwala, nee kutekenyeka
Mpaka mbumba yanu ingapita, imwe Yahova,
17 Imwe munaakwata mbamuaikha* paphiri yanu,+
Yakuti ndi mbuto yanu Yahova, idakhunganya imwe toera kukhala,
Mbuto yakucena, idakhazikisa imwe na manja anu, imwe Yahova.
18 Yahova anadzatonga ninga mambo kwenda na kwenda.+
19 Makavalo a Farau, ngolo zace za nkhondo na anyamakavalo ace pidapita iwo mʼbara,+
Yahova aphataniza madzi, iwo mbabizwa,+
Mbwenye mbumba ya Izraeli yafamba pa mataka akuuma pakati pa bara.”+
20 Penepo Miriya mprofeta wankazi, wakuti akhali mʼbale wace Aroni, akwata pandero* mʼmanja mwace, iye na akazi onsene atoma kuimba pabodzi pene, mbabvina. 21 Miriya apitiriza kutawira nyimbo ya amuna, mbaimba:
“Imbirani Yahova, thangwi iye akuzwa kakamwe.+
Iye abiza mʼbara makavalo na anyamakavalo.”+
22 Mukupita kwa ndzidzi, Mose atsogolera Aizraeli mbabuluka pa Bara Yakufuira; iwo aenda kuthando ya Suri, afamba nʼthando ineyi mu ntsiku zitatu, mbwenye nee agumana madzi. 23 Iwo afika kucisa cinacemerwa Mara,*+ mbwenye nee akwanisa kumwa madzi a ku Mara, thangwi akhawawa. Na thangwi ineyi, mbuto ineyi iye aithula Mara. 24 Natenepa, mbumba yatoma kudungunyira Mose,+ mbilonga: “Tinamwanji?” 25 Mose aphemba ciphedzo kuna Yahova,+ penepo Yahova ampangiza muti. Pidauponya iye mʼmadzi, madzi adzakhala adidi toera kumwa.
Kweneko Mulungu akhazikisa ntemo kuna iwo na pitsogolero toera kuphatisirwa pakutonga, pontho ndi kweneko kudaayesera iye.+ 26 Iye aapanga: “Mungabvera na ntima onsene fala ya Yahova Mulungu wanu, mbamucita pinthu pyadidi pamaso panga, pontho mungabvesesa mwadidi matongero anga, mbamubvera mitemo yanga,+ ine nee ndinadzakutcunyusani na mautenda adatcunyusa na ine Aejitu,+ thangwi ine Yahova, ndine anakuwangisani.”+
27 Buluka penepo iwo afika ku Elimu, kweneko kukhali micera 12 ya madzi na miti 70 ya micindu. Kweneko iwo amanga misasa yawo cifupi na madzi.