Yoswa

8 Buluka penepo, Yahova apanga Yoswa: “Leka kugopa peno kutetemera.+ Kwata anyankhondo onsene mbuenda kamenyana na Ai. Ona, ine ndapereka mʼmanja mwako mambo wa ku Ai, mbumba yace, nzinda wace na dziko yace.+ 2 Cita kuna Ai na kuna mambo wace ninga pidacita iwe kuna Yeriko na kuna mambo wace,+ mbwenye kwatani pinthu na pifuyo pya nzinda unoyu. Sankhula amuna anango toera abisale kuntsi kwa nzinda.”

3 Natenepa, Yoswa na anyankhondo onsene aenda kamenyana na Ai. Yoswa asankhula anyankhondo amphambvu akukwana 30.000 mbaatuma namasiku. 4 Iye aapanga tenepa: “Bisalani kuntsi kwa nzinda. Lekani kukhala kutali kakamwe na nzinda, pontho khalani akukhunganyika. 5 Ine pabodzi na mbumba iri na ine tinafendedzera nzinda, natenepa, iwo angabwera kuna ife ninga pidacita iwo pakutoma,+ ife tinathawa. 6 Penepo iwo anatithamangisa, mbanyerezera kuti tiri kuthawa ninga pidacita ife pakutoma.+ Mbwenye ife tinaathawa mpaka iwo abuluke kunja kwa nzinda. 7 Natenepa, imwe musafunika kubuluka mbuto zidabisala imwe mbamukwata nzinda; Yahova Mulungu wanu anadzaupereka kuna imwe. 8 Mungamala kwene kukwata nzinda, upiseni na moto.+ Musafunika kucita mwakubverana na mafala a Yahova. Unoyu ndi ntemo udakupasani ine.”

9 Buluka penepo Yoswa aatuma, iwo aenda pa mbuto ikhafunika iwo kubisala, mbabisala pakati pa Bheteli na Ai, kumadokero a dzuwa a Ai. Mbwenye masiku a ntsiku ineyi Yoswa agona pabodzi na anyankhondo* anango.

10 Pidalamuka Yoswa namacibese kakamwe mbagumanyiza* anyankhondo, iye pabodzi na akulu a mu Izraeli aatsogolera ku Ai. 11 Anyankhondo onsene+ akhali na iye aenda mpaka kutsogolo kwa nzinda. Iwo amanga misasa yawo kunkwiriro kwa Ai, pontho pakati pa iwo na Ai pakhali gowa. 12 Mu ndzidzi ubodzi ene, iye akhadasankhula anyankhondo cifupi na 5.000 mbaapanga toera abisale+ pakati pa Bheteli+ na Ai, kumadokero a dzuwa a nzinda. 13 Natenepa, anyankhondo azinji akhali kunkwiriro kwa nzinda,+ mbwenye anyankhondo anango akhali kumadokero a dzuwa a nzinda,+ pontho namasiku anewa Yoswa aenda mpaka pakati pa gowa.

14 Mambo wa ku Ai pidaona iye pyenepi, iye pabodzi na amuna a mu nzinda akhunganyika mwakucimbiza mbabuluka namacibese kakamwe toera kamenyana na Izraeli kuthando. Mbwenye mambo nee akhadziwa kuti akhadabisalirwa kuntsi kwa nzinda. 15 Amuna a ku Ai pidatoma iwo kumenyana nawo, Yoswa pabodzi na Aizraeli onsene athawira kukhundu ya kuthando.+ 16 Natenepa, anthu onsene akhali mu nzinda acemerwa toera athamangise Aizraeli; mu ndzidzi ukhathamangisa iwo Yoswa, iwo akhaendeswa kutali na nzinda. 17 Nee mamuna mʼbodzi akhadasala mu Ai na mu Bheteli. Thangwi onsene akhadaenda kathamangisa Aizraeli mbasiya bwandzu misuwo ya nzinda.

18 Yahova apanga Yoswa: “Lamusa dipa iri mʼmanja mwako mbuthonyeza kukhundu ya Ai,+ thangwi nzinda unoyu ndinadzaupereka mʼmanja mwako.”+ Natenepa Yoswa alamusa dipa ikhali mʼmanja mwace mbathonyeza kukhundu ya nzinda. 19 Mu ndzidzi udalamusa iye nkono wace, anyankhondo akhadabisala abuluka mwakucimbiza mʼmbuto zidabisala iwo, athamanga, apita mu nzinda mbaukunda. Mwakukhonda dembuka, iwo apisa nzinda na moto.+

20 Amuna a ku Ai pidayangʼana iwo nduli, aona utci mbukakwira kudzulu bulukira mu nzinda, penepo iwo nee akhalabve na mphambvu toera kuthawa. Natenepa anyankhondo a Aizraeli akuti akhathawira kuthando azungunukira amuna a ku Ai. 21 Yoswa na Aizraeli onsene pidaona iwo kuti amuna akhadabisala akunda nzinda, pontho utci ukukwira kudzulu bulukira mu nzinda, iwo azungunuka mbatoma kupha amuna a ku Ai. 22 Anyankhondo adakunda nzinda, abuluka mu nzinda mbaenda kamenyana na amuna a ku Ai. Natenepa amuna a ku Ai akhali pakati pa Aizraeli, anango akhali kukhundu ibodzi, anangombo akhali kukhundu inango. Penepo Aizraeli apha amuna onsene a ku Ai, nee mʼbodzi adathawa peno kupulumuka.+ 23 Iwo nee apha mambo wa ku Ai,+ mbwenye amʼphata mbaenda naye kuna Yoswa.

24 Aizraeli apitiriza kupha anthu onsene a ku Ai. Aaphera kuthando kukhathamangiswa Aizraeli na amuna a ku Ai. Iwo apha onsene na supada. Buluka penepo, Aizraeli abwerera ku Ai mbapha na supada onsene adasalikira. 25 Anthu onsene adaphiwa pa ntsiku ineyi, amuna na akazi ene akhali akukwana 12.000, anthu onsene a ku Ai. 26 Yoswa nee agwisa nkono wace ukhali na dipa+ mpaka pidamala kuphiwa anthu onsene a ku Ai.+ 27 Mbwenye Aizraeli akwata pifuyo na pinthu pya mu nzinda, mwakubverana na pikhadalonga Yahova kuna Yoswa.+

28 Natenepa, Yoswa apisa nzinda wa Ai mbusala nkuku wa madembe+ mpaka lero. 29 Iye amanika pamuti mambo wa ku Ai mbakhala penepo mpaka maulo, mbwenye dzuwa pikhali iyo dhuzi toera kubira, Yoswa apanga anthu toera abuluse manungo ace akufa pamuti.+ Iwo aponya manungo ace pansuwo ukulu wa nzinda mbaikha nkuku ukulu wa miyala padzulu pace, wakuti uli penepo mpaka lero.

30 Pa ndzidzi unoyu, Yoswa amangira guwa Yahova Mulungu wa Izraeli, Paphiri ya Ebhali,+ 31 mwakubverana na pidalonga Mose, ntumiki wa Yahova kuna Aizraeli, pontho ninga mudalemberwa ipyo mʼbukhu ya Mwambo+ wa Mose kuti: “Manga guwa ya miyala yakuti nee yasemwa na cinthu cakucitwa na utale.”+ Pa guwa ineyi, iwo apereka ntsembe zakupiswa kuna Yahova kuphatanizambo ntsembe toera kupereka takhuta.+

32 Buluka penepo, iye alemba pa miyala Mwambo+ ukhadalemba Mose pamaso pa Aizraeli.+ 33 Aizraeli onsene, akulu awo, atsogoleri awo pabodzi na anyakutonga miseru akhadalimira mʼmakhundu mawiri ene a Bokosi, kutsogolo kwa anyantsembe akuti akhali Alevi akhathukula bokosi ya cibverano ca Yahova. Anthu a madziko anango pabodzi na Aizraeli+ akhali penepo. Hafu ya anthu anewa akhadalimira dhuzi na Phiri ya Jerizimu, hafu inango ya anthu akhadalimira dhuzi na Phiri ya Ebhali+ (mwakubverana na pikhadalonga kale Mose, ntumiki wa Yahova),+ toera kupasa nkhombo mbumba ya Izraeli. 34 Buluka penepo, iye aleri mwakugaluza mafala onsene a Mwambo,+ nkhombo+ na madzedze,+ mwakubverana na pyonsene pidalembwa mʼbukhu ya Mwambo. 35 Mafala onsene adalonga Mose, nkhabepo fala idakhonda kuleri Yoswa mwakugaluza pamaso pa mpingo onsene wa Izraeli,+ kuphatanizambo akazi, ana pabodzi na anthu a madziko ­anango+ akakhala* pakati pawo.+