LEVITIKO

1 Mu nsasa wa nsonkhano,*+ Yahova acemera Mose mbampanga: 2 “Panga Aizraeli kuti: ‘Mʼbodzi wanu angafuna kupereka cifuyo ninga ntsembe kuna Yahova, cifuyo ceneci cisafunika cikhale ngʼombe, bira peno mbuzi.+

3 “‘Angafuna kupereka ngʼombe ninga ntsembe yakupiswa, asafunika abwerese ngʼombe imuna yakusowa cilema.+ Iye asafunika kuipereka kuna Yahova mwakufuna kwace,+ cifupi na pansuwo wa nsasa wa nsonkhano.* 4 Iye asafunika kusandzika manja ace pa nsolo wa ngʼombe ineyi inafuna kupereka iye ninga ntsembe yakupiswa, natenepa iye anadzalekererwa madawo ace thangwi ya cinyama ceneci.

5 “‘Buluka penepo, mwanangʼombe asafunika kuphiwa pamaso pa Yahova, pontho ana a Aroni akuti ndi anyantsembe+ anadzapereka ciropa ca mwanangʼombe unoyu kuna Mulungu, mbaciwaza mʼmakhundu onsene a guwa ya ntsembe,+ yakuti iri cifupi na pansuwo wa nsasa wa nsonkhano.* 6 Cinyama cinafuna kuperekwa ninga ntsembe yakupiswa cisafunika kubuluswa* nthembe yace, mbicigwandwa mapindi-mapindi.+ 7 Ana a Aroni akuti ndi anyantsembe, asafunika kubweresa moto pa guwa ya ntsembe+ mbapaka nkhuni pa moto unoyu. 8 Ana a Aroni akuti ndi anyantsembe asafunika kupaka mapindi a ntsembe+ pa nkhuni ziri pa moto padzulu pa guwa, mapindi anewa a ntsembe asafunika aapake pabodzi na nsolo na mafuta.* 9 Mautumbo ace na miyendo yace pisafunika kutsukwa na madzi. Nyantsembe anadzapisa pyonsene pa guwa ninga ntsembe yakupiswa. Ineyi ndi ntsembe yakupiswa pa moto, yakuti ndi khwema yakununkhira pamaso pa* Yahova.+

10 “‘Khala cifuyo cinafuna kupereka iye ninga ntsembe yakupiswa ndi bira peno mbuzi,+ asafunika apereke bira imuna peno mbuzi imuna, yakusowa cilema.+ 11 Isafunika kuphiwa kukhundu yakunkwiriro* ya guwa pamaso pa Yahova, pontho ana a Aroni akuti ndi anyantsembe anadzawaza ciropa ca bira peno ca mbuzi mʼmakhundu onsene a guwa ya ntsembe.+ 12 Iye anadzaigwanda mapindi-mapindi, pontho nyantsembe anadzapaka mapindi anewa pabodzi na nsolo na mafuta,* padzulu pa nkhuni ziri pa moto pa guwa ya ntsembe. 13 Mautumbo na miyendo anadzapitsuka na madzi, pontho nyantsembe anadzapereka pyonsene kuna Mulungu mbapipisa pa guwa ya ntsembe. Ineyi ndi ntsembe yakupiswa pa moto, yakuti ndi khwema yakununkhira pamaso pa* Yahova.

14 “‘Mbwenye khala ntsembe yakupiswa inafuna kupereka iye kuna Yahova ndi mbalame, asafunika abwerese djiwa peno mwana nkhangaiwa.+ 15 Nyantsembe anadzaipereka kuna Mulungu pa guwa ya ntsembe. Iye anadzagwanda khosi ya mbalame ineyi na ngole mbaipisa pa guwa ya ntsembe, mbwenye ciropa cace anacisiya ciwewe pa guwa ya ntsembe. 16 Iye asafunika abuluse mapapo ace na manthenga ace mbapiponya kukhundu yakumabulukiro a dzuwa a guwa ya ntsembe, pa mbuto inaponywa dotha.*+ 17 Iye asafunika kuipandula paditi,* mbwenye nee asafunika kuigawa mapindi mawiri. Buluka penepo, nyantsembe anadzaipisa pa guwa ya ntsembe padzulu pa nkhuni ziri pa moto. Ineyi ndi ntsembe yakupiswa pa moto, yakuti ndi khwema yakununkhira pamaso pa* Yahova.

2 “‘Munthu angapereka ntsembe ya pyakudya+ kuna Yahova, ntsembe ineyi isafunika ikhale ya ufa wadidi kakamwe, pontho iye asafunika aitsanulire mafuta a azeti, mbaikhambo olibhano pa ntsembe ineyi.+ 2 Buluka penepo, iye anaenda nayo kuna ana a Aroni akuti ndi anyantsembe. Nyantsembe anakwata pangʼono* ufa unoyu wadidi kakamwe, mafuta a azeti na olibhano onsene, mbapipisa pa guwa ya ntsembe toera Mulungu akumbuke* ntsembe+ yonsene. Ineyi ndi ntsembe yakupiswa pa moto, yakuti ndi khwema yakununkhira pamaso pa* Yahova. 3 Cinthu consene cinafuna kusala pa ntsembe za pyakudya, cinadzakhala ca Aroni na anace+ ninga cinthu cakucena kakamwe+ pa ntsembe zakupiswa pa moto zinaperekwa kuna Yahova.

4 “‘Ungapereka ntsembe ya mikate yakuotcwa mu forno, isafunika ikhale ya ufa wadidi kakamwe, mikate yakusowa pyakutupisa, yakulandana na mphete, yakucitwa na mafuta a azeti, peno mikate yakuphaphatika yakusowa pyakutupisa, yakukhwazwa mafuta a azeti.+

5 “‘Khala ntsembe yako inafuna kupereka iwe ndi mikate yakuotcwa mu mbale,+ isafunika ikhale ya ufa wadidi kakamwe wakubvungazwa na mafuta a azeti, yakusowa pyakutupisa. 6 Isafunika kugwandwa mapindi-mapindi, pontho usafunika kuikha mafuta a azeti mʼmapindi anewa.+ Ineyi ndi ntsembe ya pyakudya.

7 “‘Khala ntsembe yako inafuna kupereka iwe ndi mikate yakuphikwa ncikalango,* isafunika kuphikwa na ufa wadidi kakamwe na mafuta a azeti. 8 Usafunika kukwata ntsembe yako ya pyakudya yakuphikwa na pinthu pyenepi mbuenda nayo pamaso pa Yahova, iyo inadzaperekwa kuna nyantsembe, wakuti anaenda nayo cifupi na guwa ya ntsembe. 9 Nyantsembe anadzakwata pangʼono ntsembe ineyi ya pyakudya, toera Mulungu akumbuke* ntsembe+ yonsene. Pontho nyantsembe anadzaipisa pa guwa ninga ntsembe yakupiswa pa moto, yakuti ndi khwema yakununkhira pamaso pa* Yahova.+ 10 Cinthu cinafuna kusala pa ntsembe za pyakudya, cinadzakhala ca Aroni na anace ninga cinthu cakucena kakamwe pa ntsembe zakupiswa pa moto+ zinaperekwa kuna Yahova.

11 “‘Nee ntsembe ibodzi ya pyakudya inafuna imwe kupereka kuna Yahova isafunika kuikhwa pinthu pyakutupisa napyo mikate,+ thangwi nee musafunika kupisa pinthu pyakutupisa napyo mikate peno uci ninga ntsembe yakupiswa pa moto toera kuipereka kuna Yahova.

12 “‘Munakwanisa kupipereka kuna Yahova ninga ntsembe za mbeu zakutoma kutokota,+ mbwenye nee musafunika kuenda napyo pa guwa ya ntsembe ninga khwema yakununkhira.*

13 “‘Ntsembe zonsene za pyakudya zinafuna kupereka iwe zisafunika kuikhwa munyu; mu ntsembe zako za pyakudya leka kuduwala kuikha munyu, wakuti unakukumbusa cibverano ca Mulungu wako. Ntsembe zako zonsene unadzazipereka pabodzi na munyu.+

14 “‘Ungapereka kuna Yahova ntsembe za pyakudya pakati pa mbeu zakutoma kutokota, usafunika kupereka mbeu zipswa zakukazingwa pa moto, mbeu zipswa zakupeyiwa, ninga ntsembe za pyakudya pakati pa mbeu zako zakutoma kutokota.+ 15 Pa mbeu zenezi usafunika kuikha mafuta a azeti na olibhano. Ineyi ndi ntsembe ya pyakudya. 16 Nyantsembe anadzakwata pangʼono mbeu zenezi zidapeyiwa, anazibvungaza na mafuta a azeti, anaikha olibhano onsene, mbazipisa pa moto toera Mulungu akumbuke* ntsembe+ yonsene. Ineyi ndi ntsembe yakupiswa pa moto toera kuipereka kuna Yahova.

3 “‘Munthu angafuna kupereka ntsembe toera kupereka takhuta,+ khala asafuna kupereka ngʼombe imuna peno ikazi, isafunika ikhale yakusowa cilema pamaso pa Yahova. 2 Iye asafunika kusandzika manja ace pa nsolo wa ngʼombe yace inafuna kupereka iye ninga ntsembe, pontho ngʼombe ineyi isafunika kuphiwa cifupi na pansuwo wa nsasa wa nsonkhano.* Ana a Aroni, akuti ndi anyantsembe anadzawaza ciropa ca ngʼombe ineyi mʼmakhundu onsene a guwa ya ntsembe. 3 Pa ntsembe toera kupereka takhuta, iye asafunika kupereka makhundu awa ninga ntsembe yakupiswa pa moto inaperekwa kuna Yahova:+ Mafuta+ adaphimbira mautumbo, mafuta onsene a pa mautumbo, 4 mpswiyo ziwiri na mafuta ali nʼkhundu mwa mpswiyo zenezi. Iye anadzabulusambo mafuta a pa mafafa pabodzi na mpswiyo.+ 5 Ana a Aroni anadzapisa pinthu pyenepi pa guwa, padzulu pa ntsembe yakupiswa pa moto, idaikhwa pa nkhuni ziri pa moto.+ Ineyi ndi ntsembe yakupiswa pa moto, yakuti ndi khwema yakununkhira pamaso pa* Yahova.+

6 “‘Khala ntsembe toera kupereka takhuta inafuna kupereka iye kuna Yahova ndi bira, anadzapereka bira+ yakusowa cilema, imuna peno ikazi. 7 Angabweresa mwanabira ninga ntsembe, iye asafunika kumpereka pamaso pa Yahova. 8 Iye asafunika kusandzika manja ace pa nsolo wa bira ineyi, pontho isafunika kuphiwa cifupi na pansuwo wa nsasa wa nsonkhano.* Ana a Aroni anadzawaza ciropa ca bira ineyi mʼmakhundu onsene a guwa ya ntsembe. 9 Pa ntsembe toera kupereka takhuta, iye anadzakwata mafuta mbaapereka kuna Yahova+ ninga ntsembe yakupiswa pa moto. Anadzabulusa mafuta onsene ali pa ncira cifupi na kholokolo,* mafuta adaphimbira mautumbo, mafuta onsene a pa mautumbo, 10 mpswiyo ziwiri na mafuta ali nʼkhundu mwa mpswiyo zenezi. Iye anadzabulusambo mafuta a pa mafafa pabodzi na mpswiyo.+ 11 Nyantsembe anadzapisa pinthu pyenepi pa guwa ninga ntsembe ya pyakudya,* ineyi ndi ntsembe yakupiswa pa moto toera kuipereka kuna Yahova.+

12 “‘Khala ntsembe yace ndi mbuzi, iye asafunika kuipereka pamaso pa Yahova. 13 Iye asafunika kusandzika manja ace pa nsolo wa mbuzi ineyi, pontho isafunika kuphiwa cifupi na pansuwo wa nsasa wa nsonkhano.* Ana a Aroni anadzawaza ciropa ca mbuzi ineyi mʼmakhundu onsene a guwa ya ntsembe. 14 Khundu inafuna kupereka iye kuna Yahova ninga ntsembe yakupiswa pa moto ndi mafuta adaphimbira mautumbo, mafuta onsene a pa mautumbo,+ 15 mpswiyo ziwiri na mafuta ali nʼkhundu mwa mpswiyo zenezi. Iye anadzabulusambo mafuta a pa mafafa pabodzi na mpswiyo. 16 Nyantsembe anadzapisa pinthu pyenepi pa guwa ninga ntsembe ya pyakudya,* ineyi ndi ntsembe yakupiswa pa moto, ya khwema yakununkhira.* Mafuta onsene ndi a Yahova.+

17 “‘Lekani kudya mafuta peno ciropa.+ Unoyu ndi ntemo wakwenda na kwenda wakuti usafunika kubverwa ndzidzi onsene mʼmadzindza mwanu, mu mbuto zonsene zinakhala imwe.’”

4 Yahova apitiriza kulonga na Mose: 2 “Panga Aizraeli kuti: ‘Munthu angacita madawo mwakukhonda funa,*+ thangwi yakucita cinthu cakuti Yahova asacikhondesa, ipi ndipyo pinafunika iye kucita:

3 “‘Khala nyantsembe wakudzodzwa+ acita madawo+ mbabweresa mulando kuna mbumba, iye anadzapereka kuna Yahova mwanangʼombe wakusowa cilema ninga ntsembe thangwi ya madawo adacita iye.+ 4 Iye anadzaenda na mwanangʼombe pamaso pa Yahova cifupi na pansuwo wa nsasa wa nsonkhano,*+ anadzaikha manja ace pa nsolo pa mwanangʼombe unoyu, mbamupha pamaso pa Yahova.+ 5 Buluka penepo, nyantsembe wakudzodzwa+ anakwata pangʼono ciropa ca mwanangʼombe mbaenda naco mu nsasa wa nsonkhano;* 6 nyantsembe wakudzodzwa anadzabvika cala cace mu ciropa+ ceneci, cinango anaciwaza pantsi kanomwe+ pamaso pa Yahova, kutsogolo kwa nguwo ikulu ya mbuto yakucena. 7 Nyantsembe anadzaikhambo ciropa cinango pa nyanga za guwa yakupisira insenso yakununkhira,+ yakuti iri pamaso pa Yahova mu nsasa wa nsonkhano;* pontho ciropa consene cidasala ca mwanangʼombe iye anadzacitsanulira pantsi pa guwa ya ntsembe zakupiswa,+ yakuti iri dhuzi na pansuwo wa nsasa wa nsonkhano.*

8 “‘Iye anadzabulusa mafuta onsene a ngʼombe adaperekwa ninga ntsembe yakulekererwa madawo, kuphatanizambo mafuta adaphimbira mautumbo, mafuta onsene a pa mautumbo, 9 mpswiyo ziwiri na mafuta ali nʼkhundu mwa mpswiyo zenezi. Iye anadzabulusambo mafuta a pa mafafa pabodzi na mpswiyo.+ 10 Iye anadzabulusa pinthu pyenepi ninga pinacita iye na ngʼombe inaperekwa ninga ntsembe toera kupereka takhuta.+ Nyantsembe anadzapisa pinthu pyenepi pa guwa ya ntsembe zakupiswa.

11 “‘Mbwenye nthembe ya mwanangʼombe, nyama yace yonsene, nsolo wace, miyendo yace, mautumbo ace na matubzwi+ ace, 12 pyonsene pidasala pa mwanangʼombe, iye anadzapiendesa kunja kwa nsasa, pa mbuto yakucena, yakuti ndi mbuto inatairwa dotha, iye anadzapipisa pa moto,+ padzulu pa nkhuni. Pisafunika kupiswa pa mbuto inatairwa dotha.

13 “‘Mbumba yonsene ya* Izraeli ingakhala na mulando thangwi yakucita madawo mwakukhonda funa,*+ mbwenye iwo nee akhapidziwa kuti acita cinthu cakuti Yahova asacikhondesa,+ 14 madawo anewa angadziwika, mbumba isafunika* kupereka mwanangʼombe ninga ntsembe yakulekererwa madawo, mbaenda nayo kutsogolo kwa nsasa wa nsonkhano.* 15 Akulu a mbumba anadzaikha manja awo pa nsolo wa mwanangʼombe pamaso pa Yahova, mwanangʼombe unoyu asafunika kuphiwa pamaso pa Yahova.

16 “‘Penepo nyantsembe wakudzodzwa anadzakwata pangʼono ciropa ca mwanangʼombe mbaenda naco mu nsasa wa nsonkhano.* 17 Nyantsembe anadzabvika cala cace mu ciropa ceneci, cinango anaciwaza pantsi kanomwe pamaso pa Yahova, kutsogolo kwa nguwo ikulu.+ 18 Buluka penepo, iye anadzaikha ciropa cinango pa nyanga za guwa ya ntsembe,+ yakuti iri pamaso pa Yahova mu nsasa wa nsonkhano;* pontho ciropa consene cidasala iye anadzacitsanulira pantsi pa guwa ya ntsembe zakupiswa, yakuti iri dhuzi na pansuwo wa nsasa wa nsonkhano.*+ 19 Iye anadzabulusa mafuta onsene mbaapisa pa guwa ya ntsembe.+ 20 Iye asafunika kucita pyenepi na mwanangʼombe unoyu ninga pidacita iye na mwanangʼombe adaperekwa ninga ntsembe yakulekererwa madawo. Nyantsembe asafunika kucita pyenepi toera kucenesa* madawo a mbumba,+ natenepa iwo anadzalekererwa madawo awo. 21 Mwanangʼombe unoyu, iye anadzamuendesa kunja kwa nsasa, mbampisa pa moto, ninga mudapisa iye mwanangʼombe wakutoma.+ Ineyi ndi ntsembe toera mbumba+ ilekererwe* madawo awo.

22 “‘Mʼbodzi mwa atsogoleri+ a mbumba angacita madawo mwakukhonda funa,* mbakhala na mulando thangwi yakucita cinthu cakuti Yahova Mulungu wace asacikhondesa, 23 peno angadzindikira kuti iye acita madawo thangwi yakukhonda kubvera mwambo, penepo iye asafunika kupereka ntsembe ya mwanambuzi wamamuna wakusowa cilema. 24 Iye anadzasandzika manja ace pa nsolo wa mbuzi ineyi, mbaipha pa mbuto inapherwa pinyama pinaperekwa ninga ntsembe yakupiswa pamaso pa Yahova.+ Ineyi ndi ntsembe toera kulekererwa madawo. 25 Nyantsembe anadzabvika pangʼono cala cace mu ciropa ca ntsembe yakulekererwa madawo mbaciikha pa nyanga+ za guwa yakupisira ntsembe, pontho ciropa consene cidasala iye anadzacitsanulira pantsi pa guwa ya ntsembe zakupiswa.+ 26 Iye asafunika kupisa mafuta onsene pa guwa ya ntsembe ninga pinacitwa na mafuta a ntsembe toera kupereka takhuta.+ Nyantsembe anadzapereka ntsembe yakucenesa* madawo a ntsogoleri wa mbumba, penepo madawo ace anadzalekererwa.

27 “‘Munthu onsene pakati pa mbumba angacita madawo mwakukhonda funa,* mbakhala na mulando thangwi yakucita cinthu cakuti Yahova asacikhondesa,+ 28 peno angadzindikira madawo ace, penepo iye asafunika kupereka ntsembe ya mwanambuzi wankazi wakusowa cilema ninga ntsembe thangwi ya madawo adacita iye. 29 Iye anadzasandzika manja ace pa nsolo wa mbuzi ya ntsembe yakulekererwa madawo, mbaipha pa mbuto inapherwa cinyama cinaperekwa ninga ntsembe yakupiswa.+ 30 Nyantsembe anadzabvika pangʼono cala cace mu ciropa ca mbuzi ineyi, mbaciikha pa nyanga za guwa yakupisira ntsembe, pontho ciropa consene cidasala iye anadzacitsanulira pantsi pa guwa ya ntsembe.+ 31 Iye anadzabulusa mafuta+ onsene ninga munabuluswa mafuta a ntsembe toera kupereka takhuta,+ nyantsembe anadzaapisa pa guwa ya ntsembe ninga khwema yakununkhira pamaso pa* Yahova. Nyantsembe anadzapereka ntsembe yakucenesa* madawo a munthu unoyu; natenepa, iye anadzalekererwa madawo ace.

32 “‘Mbwenye iye angafuna kupereka mwanabira ninga ntsembe yakulekererwa madawo, asafunika abwerese mwanabira wakusowa cilema. 33 Iye anadzasandzika manja ace pa nsolo wa mwanabira wa ntsembe yakulekererwa madawo, mbamupha pa mbuto inapherwa+ cinyama cinaperekwa ninga ntsembe yakupiswa. 34 Nyantsembe anadzabvika pangʼono cala cace mu ciropa ca ntsembe yakulekererwa madawo mbaciikha pa nyanga za guwa yakupisira ntsembe,+ pontho ciropa consene cidasala iye anadzacitsanulira pantsi pa guwa ya ntsembe. 35 Iye anadzabulusa mafuta onsene ninga munabuluswa mafuta a mwanabira wa ntsembe toera kupereka takhuta, nyantsembe anadzaapisa pa guwa ya ntsembe, padzulu pa ntsembe yakupiswa pa moto+ pamaso pa Yahova. Nyantsembe anadzapereka ntsembe ineyi toera kucenesa* madawo a munthu unoyu, natenepa madawo ace anadzalekererwa.+

5 “‘Munthu angaona munthu ndzace mbakacita madawo, peno abva kuti ndzace acita madawo, iye ali na umboni. Angabva cidziwiso* toera aende kalonge pinadziwa iye,+ angakhonda kuenda kalonga, iye acita madawo. Natenepa, iye anadzatawirira mulando wa madawo ace.

2 “‘Munthu angakhuya cinthu cakukhonda cena, mwakukhonda tsalakana khala ndi cinyama cakufa cantsanga peno cifuyo,* peno pinyama pyonsene pingʼono-pingʼono,+ iye anadzakhala wakukhonda cena, mbakhala na mulando, maseze iye nee asapidziwa. 3 Peno mwakukhonda funa,* angakhuya munthu wakukhonda cena,+ peno cinthu cakukhonda cena mbacincitisa kukhala wakukhonda cena, iye angadzindikira pyenepi, anadzakhala na mulando.

4 “‘Khala munthu adumbira toera kucita cinthu cadidi peno cakuipa, mbwenye nee atoma kunyerezera, mwakukhonda tsalakana cinthu cidapikira iye toera kucita, angadzindikira kuti adumbira mwakukhonda nyerezera, anadzakhala na mulando.*+

5 “‘Munthu angakhala na mulando thangwi ya cibodzi mwa pinthu pyenepi, iye asafunika kubweka*+ madawo ace. 6 Kusiyapo pyenepi, thangwi ya madawo adacita iye,+ anadzapereka kuna Yahova ntsembe yakulekererwa madawo. Iye anadzabweresa mwanabira wankazi peno mwanambuzi wankazi ninga ntsembe yakulekererwa madawo. Penepo nyantsembe anadzapereka ntsembe ineyi toera iye alekererwe* madawo ace.

7 “‘Mbwenye khala iye nee anakwanisa kupereka bira, anadzapereka kuna Yahova madjiwa mawiri peno ana nkhangaiwa+ awiri ninga ntsembe ya mulando thangwi ya madawo adacita iye, mbalame ibodzi inadzakhala ntsembe yakulekererwa madawo, inango inadzakhala ntsembe yakupiswa.+ 8 Asafunika aende kapipereke kuna nyantsembe, wakuti pakutoma anapereka mbalame ibodzi ninga ntsembe yakulekererwa madawo. Nyantsembe anadzaceka khosi ya mbalame na ngole yace kukhundu yakutsogolo ya khosi, mbwenye nee asafunika kuigwanda khosi. 9 Iye anadzawaza pangʼono ciropa ca ntsembe yakulekererwa madawo kukhundu ya guwa ya ntsembe, mbwenye ciropa cidasala anacisiya kuti ciwewe pantsi pa guwa ya ntsembe.+ Ineyi ndi ntsembe toera kulekererwa madawo. 10 Mbalame inango anadzaipereka ninga ntsembe yakupiswa, mwakubverana na pitsogolero+ pya ntsembe zakupiswa. Munjira ineyi, nyantsembe anadzacenesa* madawo a munthu unoyu, natenepa iye anadzalekererwa.+

11 “‘Khala nee anakwanisa kupereka madjiwa mawiri peno ana nkhangaiwa awiri, anadzabweresa khundu yacikhumi ya efa+ ya ufa* wadidi kakamwe ninga ntsembe yakulekererwa madawo ace. Ufa unoyu nee asafunika kuubvungaza na mafuta a azeti peno olibhano, thangwi ineyi ndi ntsembe toera kulekererwa madawo. 12 Iye anadzaenda nawo kuna nyantsembe, penepo nyantsembe anadzakwata pangʼono ufa unoyu mbaupisa pa guwa ya ntsembe, ninga ntsembe zakupiswa pa moto zinaperekwa kuna Yahova, toera Mulungu akumbuke* ntsembe yonsene. Ineyi ndi ntsembe toera kulekererwa madawo. 13 Munjira ineyi, nyantsembe anadzacenesa* madawo a munthu unoyu. Iye anadzacenesa madawo onsene adacita iye pakati pa madawo anewa, natenepa iye anadzalekererwa.+ Pinafuna kusala pa ntsembe ineyi, pinadzakhala pya nyantsembe,+ ninga pinacitwa na ntsembe za pyakudya.’”+

14 Yahova apitiriza kupanga Mose: 15 “Munthu angacita cinthu mwakukhonda kukhulupirika, mbadawa thangwi yakukhonda kubvera mwambo wa Yahova+ wa pinthu pyakucena, iye asafunika kupereka kuna Yahova bira imuna yakusowa cilema ninga ntsembe toera kulekererwa madawo.+ Ntengo wa bira ineyi usafunika ukhale wa masiklo* a parata, mwakubverana na nʼdida wa masiklo anaphatisirwa pa mbuto yakucena.+ 16 Pontho pa madawo adacita iye thangwi yakukhonda kulemedza mbuto yakucena, anadzalipa ntengo+ unoyu, mbauthimizira kaxanu. Iye anadzapereka pinthu pyenepi kuna nyantsembe toera nyantsembe akwanise kucenesa*+ madawo ace angapereka bira ya ntsembe yakulekererwa madawo, natenepa iye anadzalekererwa+ madawo ace.

17 “Munthu angadawa thangwi yakucita cinthu cakuti Yahova asacikhondesa, maseze nee adzindikira pidacita iye, iye ali na mulando, pontho anadzatcunyuswa thangwi ya* madawo+ ace. 18 Iye asafunika aende kapereke kuna nyantsembe mwanabira wakusowa cilema thangwi ya mulando+ wace, mwakubverana na ntengo udakhazikiswa. Penepo nyantsembe anadzacenesa* madawo a munthu unoyu adacita madawo mwakukhonda funa peno mwakukhonda dziwa, natenepa madawo ace anadzalekererwa. 19 Ineyi ndi ntsembe toera kulekererwa madawo. Mwandimomwene, iye ali na mulando thangwi yakudawira Yahova.”

6 Yahova apitiriza kulonga na Mose: 2 “Munthu angadawa mbacita cinthu mwakukhonda kukhulupirika kuna Yahova+ thangwi yakunyengeza ndzace pa cinthu cidapaswa iye toera kucikoya, peno cidapaswa iye toera kucionera,+ peno khala aciba, peno anyengeza ndzace mbamʼbera, 3 peno angalokota cinthu cidatayika mbalonga uthambi,* pontho iye angadumbira papezi thangwi ya madawo anewa adacita iye,+ ipi ndipyo pinafunika iye kucita: 4 Khala iye acita madawo anewa mbakhala na mulando, asafunika kubweza pinthu pidaba iye, cinthu cidakwata iye thangwi yakunyengeza ndzace, cinthu cidapaswa iye toera kukoya na cinthu cakutaika cidalokota iye, 5 peno cinthu ca ndzace cidakwata iye mbadumbira papezi, iye asafunika kubweza ntengo onsene wa cinthu ceneci+ mbathimizira khundu yacixanu ya ntengo unoyu. Anadzaupereka kuna mwanaciro pa ntsiku inafuna kuoneka iye kuti ali na mulando. 6 Iye anadzapereka kuna nyantsembe bira yakusowa cilema ninga ntsembe ya mulando uli na iye kuna Yahova, mwakubverana na ntengo udaphembwa iye; toera iperekwe ninga ntsembe ya mulando wace.+ 7 Nyantsembe anadzacenesa* madawo ace pamaso pa Yahova, pontho iye anadzalekererwa cinthu consene cidacita iye mbacimpasa mulando.”+

8 Yahova apitiriza kulonga na Mose: 9 “Panga Aroni na anace: ‘Uyu ndi mwambo wa ntsembe zakupiswa:+ Ntsembe zakupiswa zinapitiriza pa moto wa pa guwa ya ntsembe mbiphuphudza penepo mpaka kuca kunja, pontho moto unapitiriza kugaka pa guwa ya ntsembe. 10 Nyantsembe anadzabvala nguwo zace za unyantsembe+ mbabvalambo kabudula wa nguwo yadidi.+ Buluka penepo, iye anadzabulusa madotha+ a ntsembe idamala kupiswa na moto pa guwa ya ntsembe mbaaikha pakhundu pa guwa ya ntsembe. 11 Angamala anadula nguwo+ zenezi mbabvala nguwo zinango, anadzakwata madotha mbaenda nawo ku mbuto yakucena, kutali na misasa.+ 12 Moto usafunika ugake ndzidzi onsene pa guwa ya ntsembe. Nee usafunika kuthimiswa. Nyantsembe asafunika aikhe nkhuni+ pa moto unoyu ntsiku zonsene namacibese, anadzaikha penepo ntsembe zakupiswa, mbapisa pa moto unoyu+ mafuta a ntsembe zakukhazikisa nazo ntendere. 13 Moto usafunika upitirize kugaka ndzidzi onsene pa guwa ya ntsembe. Nee usafunika kuthimiswa.

14 “‘Uyu ndi mwambo wa ntsembe za pyakudya:+ Imwe ana a Aroni musafunika kuzipereka pa guwa ya ntsembe, pamaso pa Yahova. 15 Pa ntsembe ineyi ya pyakudya, mʼbodzi wa iwo anadzakwata pangʼono ufa wadidi kakamwe na mafuta a azeti na olibhano onsene uli pa ntsembe za pyakudya. Iye anadzaipisa pa guwa ya ntsembe ninga khwema yakununkhira pamaso pa* Yahova,+ toera Mulungu akumbuke* ntsembe yonsene. 16 Aroni na anace anadzadya pinafuna kusala pa ntsembe ineyi.+ Pidasala anadzacita napyo mikate yakusowa pyakutupisa mbaidya pa mbuto yakucena. Iwo anadzaidya pa thando* ya tabhernakulo.*+ 17 Mikate ineyi nkhabe funika kukhunganywa na pyakutupisa+ napyo mikate. Ineyi ndi khundu idaapasa ine pa pinthu pinasala pa ntsembe zakupiswa+ zinaperekwa kuna ine. Ndi ntsembe yakucena kakamwe,+ ninga ntsembe yakulekererwa madawo na ntsembe ya mulando. 18 Ana amuna onsene a dzindza ya Aroni anadzadya mikate ineyi.+ Ineyi ndi khundu idatawiriswa iwo mʼmadzindza mwawo, pa ntsembe zakupiswa+ zinaperekwa kuna Yahova. Cinthu consene cinafuna kukhuya ntsembe ineyi cinadzakhala cakucena.’”

19 Yahova apanga pontho Mose: 20 “Iyi ndi ntsembe inafuna kupereka Aroni na anace kuna Yahova pa ntsiku inafuna kudzodzwa+ iye: Khundu yacikhumi ya efa*+ ya ufa wadidi kakamwe ninga ntsembe ya pyakudya+ inaperekwa mwakukhonda phonya, hafu ibodzi anadzaipereka namacibese, hafu inango namaulo. 21 Isafunika kucitwa na mafuta a azeti mbiotcwa mu mbale.+ Usafunika kuibvungaza mwadidi na mafuta a azeti, uibwerese mbuipereka phindi-phindi ninga ntsembe ya pyakudya, ninga khwema yakununkhira pamaso pa* Yahova. 22 Nyantsembe adadzodzwa pakati pa ana+ a Aroni toera kupita pa mbuto pace anadzaperekambo ntsembe ineyi. Uyu ndi ntemo wakwenda na kwenda: Ntsembe yonsene inadzapiswa pamaso pa Yahova. 23 Ntsembe yonsene ya pyakudya inafuna kuperekwa thangwi ya nyantsembe isafunika kuperekwa yonsene. Nkhabe funika kudyiwa.”

24 Yahova alonga pontho na Mose: 25 “Panga Aroni na anace: ‘Uyu ndi mwambo wa ntsembe yakulekererwa madawo:+ Pa mbuto inapherwa+ cinyama cinaperekwa ninga ntsembe yakupiswa, ndipo panafunikambo kupherwa cinyama cinafuna kuperekwa ninga ntsembe yakulekererwa madawo pamaso pa Yahova. Ceneci ndi cinthu cakucena kakamwe. 26 Nyantsembe anafuna kupereka ntsembe toera kulekererwa madawo anadzaidya.+ Isafunika kudyiwa pa mbuto yakucena, pa thando* ya nsasa wa nsonkhano.*+

27 “‘Pinthu pyonsene pinafuna kukhuya nyama ineyi ya ntsembe pinadzakhala pyakucena, nguwo ya munthu ingathotherwa na ciropa ca nyama ineyi, usafunika kufula nguwo ineyi pa mbuto yakucena. 28 Cikalango cidaphikirwa* nyama ineyi cisafunika kuswiwa. Mbwenye khala nyama ineyi yaphikirwa mu combo ca nkuwa, combo ceneci cisafunika kukwecwa mbacitsukwa na madzi.

29 “‘Amuna onsene anatumikira ninga anyantsembe anadzaidya.+ Ntsembe ineyi ndi yakucena kakamwe.+ 30 Mbwenye nkhabe funika kudya ntsembe inaperekwa toera kulekererwa madawo khala ciropa cace caendeswa mu nsasa wa nsonkhano toera kucenesa* madawo pa mbuto yakucena.+ Isafunika kupiswa pa moto.

7 “‘Uyu ndi mwambo wa ntsembe ya mulando:+ Ntsembe ineyi ndi yakucena kakamwe. 2 Cinyama cinafuna kuperekwa ninga ntsembe ya mulando, iwo anadzacipha pa mbuto inaphera iwo pinyama pinaperekwa ninga ntsembe zakupiswa, ciropa+ cace cisafunika kuwazwa mʼmakhundu onsene a guwa ya ntsembe.+ 3 Nyantsembe anadzaperekambo mafuta+ onsene, kuphatanizambo mafuta a pa ncira, mafuta a pa mautumbo, 4 mpswiyo ziwiri na mafuta ali nʼkhundu mwa mpswiyo zenezi. Iye anadzabulusambo mafuta a pa mafafa pabodzi na mpswiyo.+ 5 Nyantsembe anadzapipisa pa guwa ninga ntsembe zakupiswa pa moto zinaperekwa kuna Yahova.+ Ineyi ndi ntsembe toera kulekererwa mulando. 6 Amuna onsene anatumikira ninga anyantsembe anadzadya nyama ineyi,+ pontho isafunika kudyerwa pa mbuto yakucena. Ntsembe ineyi ndi yakucena kakamwe.+ 7 Mwambo wa ntsembe yakulekererwa madawo ndi ubodzi ene na mwambo wa ntsembe ya mulando; nyama ya ntsembe yakucenesa* madawo inadzakhala ya nyantsembe adapereka ntsembe ineyi.+

8 “‘Nyantsembe angaperekera munthu ntsembe yakupiswa, cinyama cidaperekwa ninga ntsembe yakupiswa, nthembe+ yace inadzakhala ya nyantsembe.

9 “‘Mikate yonsene ya ntsembe zakuotcwa mu forno, yakuphikwa ncikalango peno mu mbale,+ inadzakhala ya nyantsembe anafuna kupereka ntsembe zenezi. Inadzakhala yace.+ 10 Mbwenye ntsembe zonsene za pyakudya zakubvungazwa na mafuta a azeti,+ peno zakuumiswa,+ zinadzakhala za ana a Aroni. Onsene anadzagawana sawasawa.

11 “‘Uyu ndi mwambo wa ntsembe toera kupereka takhuta,+ yakuti munthu anakwanisa kuipereka kuna Yahova: 12 Munthu angapereka ntsembe toera kupangiza kupereka kwace takhuta,+ ntsembe yakupereka takhuta anadzaipereka pabodzi na mikate yakulandana na mphete, yakubvungazwa na mafuta a azeti, yakukhonda kuikhwa pinthu pyakutupisa; mikate yakuphaphatika yakukhonda kuikhwa pinthu pyakutupisa, yakubvungazwa na mafuta a azeti; pabodzi na mikate yakulandana na mphete, yakucitwa na ufa wadidi kakamwe wakubvungazwa na mafuta mbukanywa mwadidi. 13 Kusiyapo ntsembe ineyi, iye asafunikambo kupereka mikate yakulandana na mphete, yakuikhwa pinthu pyakutupisa pabodzi na ntsembe toera kupereka takhuta toera kupangiza kupereka kwace takhuta. 14 Pa ntundu ubodzi na ubodzi wa mikate ya ntsembe ineyi, iye anadzabulusa ubodzi toera kuupereka kuna Yahova ninga khundu yakucena. Iyo inadzakhala ya nyantsembe adawaza pa guwa ciropa ca ntsembe toera kupereka takhuta.+ 15 Nyama ya ntsembe toera kupereka takhuta idaperekwa toera kusimba Mulungu, isafunika kudyiwa pa ntsiku inafuna kuipereka iye. Nee asafunika kukoya khundu ibodzi ya nyama ineyi mpaka mangwana mwace.+

16 “‘Khala ntsembe inafuna kupereka iye ndi toera kucita pidapikira+ iye peno akupereka ntsembe mwakufuna kwace,+ isafunika kudyiwa pa ntsiku inapereka iye ntsembe yace, pinafuna kusala pa ntsembe ineyi, pinakwanisambo kudyiwa mangwana mwace. 17 Mbwenye pa nyama ya ntsembe ineyi, pinafuna kusala pa ntsiku yacitatu pisafunika kupiswa pa moto.+ 18 Mbwenye nyama ya ntsembe toera kupereka takhuta ingadyiwa pa ntsiku yacitatu, Mulungu nee anadzakomerwa na ule adaipereka. Ntsembe ineyi inadzakhala yakusowa basa; ndi cinthu cakunyanyasa, pontho ule adaidya anadzatcunyuswa thangwi ya mulando+ wace. 19 Nkhabe funika kudya nyama idakhuya cinthu cakukhonda cena. Isafunika kupiswa pa moto. Munthu wakuti ali wakucena anakwanisa kudya nyama idaceneswa.

20 “‘Mbwenye munthu wakukhonda cena angadya nyama ya ntsembe toera kupereka takhuta, yakuti ndi ya Yahova, munthu unoyu asafunika kuphiwa pakati pa mbumba+ yace. 21 Munthu angakhuya munthu+ wakukhonda cena, cinyama+ cakukhonda cena peno cinthu+ cakukhonda cena na cakunyanyasa, buluka penepo mbadya ntsembe toera kupereka takhuta, yakuti ndi ya Yahova, munthu unoyu asafunika kuphiwa pakati pa mbumba yace.’”

22 Yahova apitiriza kulonga na Mose: 23 “Panga Aizraeli kuti: ‘Lekani kudya mafuta+ a ngʼombe, a mwanabira peno a mbuzi. 24 Mafuta a cinyama cakufa cokha na mafuta a cinyama cidalumwa na cikala munakwanisa kucita nawo pinthu pinango, mbwenye lekani kuadya.+ 25 Munthu angadya mafuta a cinyama cinafuna kupereka iye kuna Yahova ninga ntsembe yakupiswa, asafunika kuphiwa pakati pa mbumba yace.

26 “‘Mu mbuto zonsene zinakhala imwe, lekani kudya ciropa,+ mwakukhonda tsalakana khala ndi ciropa ca mbalame peno ca pinyama pinango. 27 Munthu angadya ciropa, asafunika kuphiwa+ pakati pa mbumba yace.’”

28 Yahova apitiriza kulonga na Mose: 29 “Panga Aizraeli kuti: ‘Munthu angabweresa kuna Yahova ntsembe yace toera kupereka takhuta, anadzapereka kuna Yahova+ khundu ibodzi ya ntsembe ineyi. 30 Iye anadzabweresa ekhene mafuta+ pabodzi na diti toera kupipereka kuna Yahova ninga ntsembe yakupiswa pa moto; iye asafunika kupiyendesa kutsogolo mbapibweza nduli ninga ntsembe+ pamaso pa Yahova. 31 Nyantsembe anadzapisa mafuta pa guwa ya ntsembe,+ mbwenye diti inadzakhala ya Aroni na anace.+

32 “‘Mwendo wamadyo wanduli wa cinyama cinapereka imwe ninga ntsembe toera kupereka takhuta,*+ munadzaupasa nyantsembe ninga khundu yakucena. 33 Mwana wa Aroni anafuna kupereka kuna Mulungu ciropa ca ntsembe toera kupereka takhuta, pabodzi na mafuta, anadzatambira mwendo wamadyo wanduli ninga khundu+ yace. 34 Thangwi pa ntsembe toera kupereka takhuta zinapereka Aizraeli, diti inaendeswa kutsogolo na nduli pabodzi na mwendo unaperekwa ninga khundu yakucena, ine ndiri kupipereka kuna nyantsembe Aroni na anace. Unoyu ndi ntemo wakwenda na kwenda kuna Aizraeli.+

35 “‘Ineyi ndi khundu inafuna kupaswa anyantsembe pa ntsembe zakupiswa pa moto zinaperekwa kuna Yahova, inadzakhala ya Aroni na anace kutomera pa ntsiku idasankhulwa iwo toera kutumikira ninga anyantsembe a Yahova.+ 36 Pa ntsiku idadzodzwa iwo,+ Yahova apanga Aizraeli toera aapase makhundu anewa. Unoyu ndi ntemo wakwenda na kwenda mʼmadzindza mwawo.’”

37 Unoyu ndi mwambo wa ntsembe zakupiswa,+ ntsembe za pyakudya,+ ntsembe za madawo,+ ntsembe za mulando,+ ntsembe+ zidaperekwa pa ntsiku idakhazikiswa Aroni na anace ninga anyantsembe, na ntsembe toera kupereka takhuta,+ 38 mwakubverana na pidalonga Yahova kuna Mose Paphiri ya Sinai,+ pa ntsiku idapanga iye Aizraeli kuti asafunika apereke ntsembe zawo kuna Yahova nʼthando ya Sinai.+

8 Yahova apitiriza kulonga na Mose: 2 “Bweresa Aroni na anace,+ nguwo+ za unyantsembe, mafuta akudzodza+ nawo, ngʼombe ya ntsembe yakulekererwa madawo, mabira mawiri na sestu ya mikate+ yakusowa pyakutupisa, 3 pontho gumanyiza mbumba yonsene kutsogolo kwa nsuwo wa nsasa wa nsonkhano.”*

4 Natenepa Mose acita ninga mudampanga Yahova, pontho mbumba yonsene yagumanyikana kutsogolo kwa nsuwo wa nsasa wa nsonkhano.* 5 Mose apanga mbumba: “Ipi ndi pidalonga Yahova toera ife tipicite.” 6 Penepo Mose abweresa Aroni na anace mbaapanga toera asambe.+ 7 Buluka penepo, abvazika Aroni tunika,+ amanga nʼthambo+ ncunu mwace, ambvazikambo tunika+ yakusowa mikono, ambvazika efodhi+ padzulu pa tunika ineyi, mbaimanga mwakuwanga na sintu+ yakulukwa ya pa efodhi. 8 Pidamala iye, ambvazika nguwo ya paditi,+ mbaikha Urimi na Tumimi+ pa nguwo ya paditi. 9 Buluka penepo ambvazika nguwo+ yakuphimbira nsolo, kutsogolo kwa nguwo ineyi aikha lezi yakuyetimira ya ouro, yakuti ndi cidzindikiro cakucena cakuperekeka+ kuna Mulungu, mwakubverana na pidalonga Yahova kuna Mose.

10 Mose akwata mafuta akudzodza nawo, adzodza tabhernakulo na pyonsene pikhali mwenemu,+ mbapicenesa. 11 Pidamala iye, akwata mafuta pangʼono mbaawaza kanomwe pa guwa ya ntsembe, adzodza guwa ya ntsembe na pyombo pyace pyonsene, basiya na cakuikhira basiya ineyi toera apicenese. 12 Pakumalisa, iye atsanulira pangʼono munsolo mwa Aroni mafuta akudzodza nawo, andzodza toera kuncenesa.+

13 Buluka penepo, Mose abweresa cifupi ana a Aroni, aabvazika matunika na mithambo, aabvazika nguwo+ yakuphimbira nsolo, mwakubverana na pidalonga Yahova kuna Mose.

14 Iye abweresa ngʼombe ya ntsembe yakulekererwa madawo, Aroni na anace aikha manja awo pa nsolo wa ngʼombe ya ntsembe yakulekererwa madawo.+ 15 Mose apha ngʼombe ineyi, abvika cala cace mu ciropa,+ mbaciikha pa nyanga zonsene za guwa ya ntsembe mbacenesa madawo a guwa ya ntsembe. Mbwenye ciropa consene cidasala iye acitsanulira pantsi pa guwa ya ntsembe, toera kuicenesa kuti iphatisirwe toera kuperekapo ntsembe zakucenesa* madawo. 16 Buluka penepo, Mose akwata mafuta a pa mautumbo, mafuta a pa mafafa, mpswiyo ziwiri na mafuta a pa mpswiyo zenezi; mbapipisa pa guwa ya ntsembe.+ 17 Buluka penepo, nyama ya ngʼombe idasala, nthembe yace na matubzwi ace pyapiswa kunja kwa misasa,+ mwakubverana na pidalonga Yahova kuna Mose.

18 Pidamala iye, abweresa bira ya ntsembe yakupiswa, pontho Aroni na anace aikha manja awo pa nsolo wa bira+ ineyi. 19 Penepo Mose aipha, mbawaza ciropa ca bira ineyi mʼmakhundu onsene a guwa ya ntsembe. 20 Mose aigwanda mapindi-mapindi, mbapisa nsolo, mapindi na mafuta.* 21 Mautumbo na miyendo ya bira, iye apitsuka na madzi, pontho Mose apisa bira yonsene pa guwa ya ntsembe. Ineyi ikhali ntsembe yakupiswa, ya khwema yakununkhira.* Ikhali ntsembe yakupiswa pa moto idaperekwa kuna Yahova, mwakubverana na pidalonga Yahova kuna Mose.

22 Iye abweresa bira yaciwiri, yakuti ndi bira yakukhazikiswa+ kwa anyantsembe, pontho Aroni na anace aikha manja awo pa nsolo wa bira+ ineyi. 23 Mose aipha, akwata pangʼono ciropa ca bira ineyi mbaciika pankhomo ya khutu yamadyo ya Aroni, pa cala cikulu ca djanja yace yamadyo na pa cala cikulu ca mwendo wace wamadyo. 24 Buluka penepo, Mose abweresa cifupi ana a Aroni, aikha pangʼono ciropa pankhomo ya khutu yamadyo ya mʼbodzi na mʼbodzi, pa cala cikulu ca djanja yamadyo na pa cala cikulu ca mwendo wamadyo; mbwenye ciropa cidasala, Mose aciwaza mʼmakhundu onsene a guwa ya ntsembe.+

25 Buluka penepo akwata mafuta a bira, mafuta a pa ncira, mafuta a pa mautumbo, mafuta a pa mafafa, mpswiyo ziwiri na mafuta a pa mpswiyo zenezi na mwendo+ wamadyo. 26 Mu sestu ya mikate yakusowa pyakutupisa ikhali pamaso pa Yahova, iye abulusamo nkate+ wakulandana na mphete, wakusowa pyakutupisa; abulusambo nkate wakulandana na mphete wakucitwa na mafuta a azeti na nkate+ wakuphaphatika. Buluka penepo, mikate ineyi aiikha padzulu pa mapindi a mafuta na mwendo wamadyo. 27 Pidamala iye, aikha pinthu pyenepi mʼmanja mwa Aroni na mʼmanja mwa anace, atoma kupiendesa kutsogolo mbapibweza nduli ninga ntsembe pamaso pa Yahova. 28 Penepo Mose apibulusa mʼmanja mwawo, apisa pinthu pyenepi pa guwa ya ntsembe, padzulu pa bira yakutoma, yakuti ikhali ntsembe yakupiswa. Ineyi ikhali ntsembe yakukhazikiswa kwa anyantsembe, ya khwema yakununkhira,* ntsembe yakupiswa pa moto idaperekwa kuna Yahova.

29 Buluka penepo, Mose akwata diti ya bira, aiendesa kutsogolo mbaibweza nduli ninga ntsembe pamaso pa Yahova.+ Diti ya ntsembe yakukhazikiswa kwa anyantsembe ikhali ya Mose, mwakubverana na pidalonga Yahova kuna Mose.+

30 Mose akwata pangʼono mafuta akudzodza+ nawo, akwatambo pangʼono ciropa cikhali pa guwa ya ntsembe, mbapiwazira Aroni na nguwo zace, anace na nguwo zawo. Natenepa iye acenesa Aroni na nguwo zace, anace+ na nguwo+ zawo.

31 Buluka penepo, Mose apanga Aroni na anace: “Phikani+ nyama ineyi cifupi na nsuwo wa nsasa wa nsonkhano,* mungamala muidye pabodzi na mikate iri mu sestu idaphatisirwa pa kukhazikiswa kwa anyantsembe, mwakubverana na pidapangwa ine kuti: ‘Aroni na anace anadzaidya.’+ 32 Pinafuna kusala pa nyama na nkate, musafunika kupipisa pa moto.+ 33 Lekani kubuluka cifupi na nsuwo wa nsasa wa nsonkhano* mpaka ntsiku zinomwe, mpaka kumala kwa ntsiku zakukhazikiswa kwanu ninga anyantsembe, thangwi pasafunika ntsiku zinomwe toera mukhazikiswe ninga anyantsembe.+ 34 Pidacita ife lero ndipyo pidatipanga Yahova toera tipicite, toera kupereka ntsembe yakucenesa* madawo anu.+ 35 Munadzakhala cifupi na nsuwo wa nsasa wa nsonkhano* masiku namasikati mu ntsiku zinomwe,+ mbamubvera pidakupangani Yahova,+ toera mukhonde kufa, thangwi ndi pyenepi pidapangwa ine.”

36 Aroni na anace acita pinthu pyonsene pidalonga Yahova kuna Mose.

9 Pa ntsiku yacisere,+ Mose acemera Aroni na anace pabodzi na akulu a mbumba ya Izraeli. 2 Iye apanga Aroni: “Kwata mwanangʼombe ninga ntsembe+ yakulekererwa madawo na mwanabira ninga ntsembe yakupiswa, pinyama pyenepi pisafunika pikhale pyakusowa cilema, buluka penepo usafunika kupipereka pamaso pa Yahova. 3 Mbwenye usafunika kupanga Aizraeli: ‘Kwatani bokho ninga ntsembe yakulekererwa madawo. Kwatanimbo mwanangʼombe na mwanabira, piwiri pyene pisafunika pikhale pya caka cibodzi na pyakusowa cilema toera kupipereka ninga ntsembe yakupiswa, 4 pontho kwatani ngʼombe na bira ninga ntsembe toera kupereka takhuta,+ toera kupipereka ninga ntsembe pamaso pa Yahova; na ntsembe ya pyakudya+ yakubvungazwa na mafuta a azeti, thangwi lero Yahova anadzaonekera kuna imwe.’”+

5 Natenepa iwo akwata pidalonga Mose mbaenda napyo mu nsasa wa nsonkhano.* Mbumba yonsene yafendedza cifupi mbilimira pamaso pa Yahova. 6 Mose aapanga: “Yahova alonga kuti musafunika kucita ipi, toera mbiri ya Yahova ionekere kuna imwe.”+ 7 Buluka penepo Mose apanga Aroni: “Ndoko pa guwa ya ntsembe, pereka ntsembe+ yako yakulekererwa madawo na ntsembe yakupiswa, toera kucenesa* madawo ako+ na madawo a dzindza yako.* Buluka penepo pereka ntsembe ya mbumba,+ mbucenesa* madawo awo,+ mwakubverana na pidalonga Yahova.”

8 Mwakucimbiza Aroni aenda pa guwa ya ntsembe, apha ngʼombe ya ntsembe yakulekererwa madawo ace.+ 9 Penepo anace amʼbweresera ciropa,+ Aroni abvika cala cace mu ciropa ceneci mbaciikha pa nyanga za guwa ya ntsembe, pontho ciropa cidasala acitsanulira pantsi pa guwa ya ntsembe.+ 10 Iye akwata mafuta, mpswiyo na mafuta a pa mafafa a cinyama cidaperekwa ninga ntsembe yakulekererwa madawo, mbapipisa pa guwa ya ntsembe, mwakubverana na pidalonga Yahova kuna Mose.+ 11 Nyama ya ngʼombe na nthembe yace apipisa kutali na misasa.+

12 Buluka penepo, Aroni apha cinyama ca ntsembe yakupiswa, pontho anace amʼbweresera ciropa, iye mbaciwaza mʼmakhundu onsene a guwa ya ntsembe.+ 13 Iwo ampasa mapindi na nsolo wa cinyama ca ntsembe yakupiswa, iye mbapipisa pa guwa ya ntsembe. 14 Kusiyapo pyenepi, iye atsuka mautumbo na miyendo* ya ngʼombe ineyi mbapipisa pa guwa ya ntsembe, padzulu pa ntsembe yakupiswa.

15 Pidamala iye, Aroni apereka ntsembe ya mbumba: Akwata bokho ya ntsembe yakulekererwa madawo a mbumba, aipha mbaipereka ninga ntsembe yakulekererwa madawo ninga pidacita iye na cinyama cakutoma. 16 Pontho iye apereka ntsembe yakupiswa mwakubverana na pitsogolero+ pya ntsembe zakupiswa.

17 Buluka penepo, iye apereka ntsembe za pyakudya.+ Adzadza djanja yace na ntsembe ineyi mbaipisa pa guwa ya ntsembe, kusiyapo ntsembe yakupiswa idaperekwa namacibese.+

18 Pidamala iye, apha ngʼombe na bira ya ntsembe toera kupereka takhuta, yakuti ikhali ya mbumba. Penepo ana a Aroni amʼbweresera ciropa, iye mbaciwaza mʼmakhundu onsene a guwa ya ntsembe.+ 19 Mbwenye mapindi a mafuta a ngʼombe,+ mafuta a pa ncira wa bira, mafuta a pa mautumbo, mpswiyo na mafuta a pa mafafa,+ 20 iwo aaikha paditi ya ngʼombe na paditi ya bira; buluka penepo, iye apisa mapindi anewa pa guwa ya ntsembe.+ 21 Mbwenye maditi na miyendo ya madyo ya ngʼombe na bira, Aroni apiendesa kutsogolo mbapibweza nduli ninga ntsembe pamaso pa Yahova, mwakubverana na pidalonga+ Mose.

22 Buluka penepo, Aroni alamusa manja ace kuna mbumba, aapasa+ nkhombo, mbatcita pidamala iye kupereka ntsembe yakulekererwa madawo, ntsembe yakupiswa na ntsembe toera kupereka takhuta.* 23 Pakumalisa, Mose na Aroni apita mu nsasa wa nsonkhano;* iwo abuluka mbapasa nkhombo mbumba.+

Penepo mbiri ya Yahova yaonekera pana mbumba+ yonsene, 24 moto wabuluka kuna Yahova+ mbupisa ntsembe yakupiswa na mapindi a mafuta akhali pa guwa ya ntsembe. Mbumba yonsene pidaona iyo pyenepi, yatoma kukhuwa mwakusekera, iwo agodama mbakotamisa misolo yawo mpaka pantsi.+

10 Mukupita kwa ndzidzi, Nadhabhe na Abhiyu+ akuti ndi ana a Aroni akwata cakuikhira insenso mbaikhamo moto na insenso.+ Iwo atoma kupisa insenso yakukhonda tawirika*+ pamaso pa Yahova, yakuti iye nee aatawirisa. 2 Na thangwi ineyi, moto wabuluka kuna Yahova mbuapisa,+ natenepa iwo afa pamaso pa Yahova.+ 3 Penepo Mose apanga Aroni: “Ipi ndi pidalonga Yahova: ‘Ale ali cifupi na ine+ asafunika kukumbuka kuti ine ndine wakucena, pontho mbumba yonsene inadzandipasa mbiri.’” Mbwenye Aroni apitiriza nee kulonga cinthu.

4 Mose acemera Mizaeli na Elizafani ana a Uzieli+ mʼbale wangʼono wa pai wace Aroni, mbaapanga: “Bwerani kuno mubuluse abale anu pa mbuto yakucena, muende kaasiye kunja kwa misasa.” 5 Penepo iwo aenda mbakwata manungo a amuna anewa akuti akhadabvala nguwo zawo za unyantsembe mbaenda nawo kunja kwa misasa, mwakubverana na pidalonga Mose.

6 Buluka penepo, Mose apanga Aroni na anace anango, akuti ndi Eleazare na Itamari: “Lekani kukhonda tsalakana tsisi yanu, pontho lekani kupandula nguwo+ zanu thangwi yakutsukwala toera mukhonde kufa, pontho toera Mulungu akhonde kuipirwa na mbumba yonsene. Abale anu, mbumba yonsene ya Izraeli ndiwo anafuna kulira ale adaphiwa na moto udabuluka kuna Yahova. 7 Lekani kubuluka cifupi na nsuwo wa nsasa wa nsonkhano* gopa munafa, thangwi Yahova akudzodzani+ na mafuta.” Natenepa iwo acita pidaapanga Mose.

8 Penepo Yahova apanga Aroni: 9 “Mungafuna kupita mu nsasa wa nsonkhano,*+ iwe na anako, lekani kumwa vinyu peno pyakumwa pinango pyakuledzeresa, toera mukhonde kufa. Unoyu ndi ntemo wakwenda na kwenda mʼmadzindza mwanu. 10 Pyenepi ndi toera kusiyanisa cinthu cidaperekwa kuna Mulungu na cinthu cakuipa, cinthu cakukhonda cena na cinthu cakucena,+ 11 pontho toera kupfundzisa Aizraeli matongero onsene adaapasa Yahova kubulukira kuna Mose.”+

12 Mose apanga Aroni, Eleazare na Itamari, ana adasala a Aroni: “Pa ntsembe zakupiswa pa moto zidaperekwa kuna Yahova, kwatani pidasala pa ntsembe za pyakudya, citani mikate yakusowa pyakutupisa mbamuidya cifupi na guwa ya ntsembe,+ thangwi ndi cinthu cakucena kakamwe.+ 13 Musafunika kuidyera pa mbuto yakucena,+ thangwi ineyi ndi khundu yanu na ya ananu idapaswa imwe pakati pa ntsembe za Yahova zakupiswa pa moto, thangwi ndi pyenepi pidapangwa ine. 14 Pontho, pa mbuto yakuti ndi yakucena,* imwe pabodzi na ananu amuna na akazi+ munadzadya diti inaendeswa kutsogolo mbibwezwa nduli ninga ntsembe na mwendo unaperekwa ninga khundu yakucena,+ thangwi pinthu pyenepi mwapipaswa ninga khundu yanu na ya ananu pakati pa ntsembe zinabulusa Aizraeli toera kupereka takhuta. 15 Iwo anadzabweresa mwendo unaperekwa ninga khundu yakucena na diti inaendeswa kutsogolo mbibwezwa nduli ninga ntsembe, pabodzi na ntsembe za mafuta anapiswa pa moto. Iwo anapiendesa kutsogolo mbapibweza nduli ninga ntsembe pamaso pa Yahova, diti na mwendo pinadzakhala khundu yanu na ya ananu+ kwenda na kwenda, mwakubverana na pidalonga Yahova.”

16 Mose asaka kudziwa kuti nyama idasala ya bokho ya ntsembe+ yakulekererwa madawo iri kupi, mbwenye adzindikira kuti ikhadapiswa. Natenepa iye aipirwa na Eleazare na Itamari, ana a Aroni adasala, mbalonga: 17 “Thangwi yanji nee mwadya ntsembe yakulekererwa madawo pa mbuto yakucena?+ Ntsembe ineyi ndi yakucena kakamwe, pontho yaperekwa kuna imwe toera mutawirire madawo a mbumba, mbamucenesa* madawo awo pamaso pa Yahova. 18 Onani, ciropa cace nee cabwereswa pa mbuto yakucena.+ Imwe mukhafunika kuidya pa mbuto yakucena, mwakubverana na pidapangwa ine.” 19 Penepo Aroni apanga Mose: “Lero, iwo apereka pamaso pa Yahova+ ntsembe yawo yakulekererwa madawo na ntsembe yakupiswa, ngakhale tenepo imwe musadziwa pinthu pyakuipa pidandicitikira lero. Mbidadya lero ntsembe yakulekererwa madawo, kodi Yahova mbadakomerwa napyo?” 20 Pidabva iye pyenepi, Mose akomerwa.*

11 Buluka penepo Yahova apanga Mose na Aroni: 2 “Pangani Aizraeli kuti: ‘Pinyama pyonsene piri pa dziko yapantsi, ipi ndi pinafunika imwe kudya:+ 3 Munakwanisa kudya pinyama pyonsene piri na nyondo zakugawika, pyakuti pingadya pisalukula.

4 “‘Mbwenye lekani kudya pinyama ipi pyakuti pisalukula peno piri na nyondo zakugawika: Kamelo yakuti isalukula mbwenye nkhabe nyondo zakugawika. Ndi yakukhonda cena kuna imwe.+ 5 Pontho lekani kudya sulo+ anakhala mʼmiyala* thangwi asalukula, mbwenye nkhabe nyondo zakugawika. Ndi wakukhonda cena kuna imwe. 6 Lekanimbo kudya sulo, thangwi asalukula, mbwenye nkhabe nyondo zakugawika. Ndi wakukhonda cena kuna imwe. 7 Lekani kudya nkhumba,+ thangwi iri na nyondo zakugawika, mbwenye nkhabe kulukula. Ndi yakukhonda cena kuna imwe. 8 Lekani kudya nyama ya pinyama pyenepi, pontho lekani kupikhuya pingafa. Ndi pyakukhonda cena kuna imwe.+

9 “‘Ipi ndi pinyama pya mʼmadzi pyakuti munakwanisa kupidya: Pyonsene piri mʼmadzi pyakuti piri na makoko na pyakusambirira napyo,* mwakukhonda tsalakana khala ndi pinyama pya mʼbara peno mʼmikulo, imwe munakwanisa kupidya.+ 10 Mbwenye pinyama pyonsene pya mʼbara na mʼmikulo pyakuti nee piri na makoko na pyakusambirira napyo, pakati pa pinyama pyonsene pingʼono pya mʼmadzi pyakuti nkhabe makoko nee pyakusambirira napyo, ndi pyakunyanyasa kuna imwe. 11 Nakuti ndi pyakukhonda cena kuna imwe, lekani kudya nyama+ ya pinyama pyenepi; pingafa, musafunika kunyanyasirwa napyo. 12 Pinyama pyonsene pya mʼmadzi pyakuti nkhabe pyakusambirira napyo nee makoko, ndi pyakunyanyasa kuna imwe.

13 “‘Pakati pa pinyama pyakumburuka, ipi ndipyo pisafunika imwe kunyanyasirwa napyo; pontho nee pisafunika kudyiwa, thangwi ndi pyakunyanyasa: Capungu,+ nkhwazi, malezi+ akupswipa, 14 kasosera,* na mitundu yonsene ya tangwe,* 15 mitundu yonsene ya makhungubwe, 16 avestruji,* dzidzi, makurea* na ntundu onsene wa madzumbira, 17 khutukutu,* khungubwe wa mʼmadzi, surumunyu, 18 tsekwe, dokowe, malezi, 19 soliri, mitundu yonsene ya nyaswa-nkhadzi, mphuputa na anyakalemalema. 20 Kusiyapo pyenepi, pinyama pingʼono pyonsene pyakumburuka pinafamba na miyendo minai, ndi pyakunyanyasa kuna imwe.

21 “‘Pa pinyama pingʼono pyonsene pyakumburuka pinafamba na miyendo minai, basi ene munakwanisa kudya pire piri na miyendo miwiri yakuti isafunyika, yakulapha kupiringana inango toera kunumpha nayo pantsi. 22 Mwa ipyo munakwanisa kudya ipi: Mitundu yakusiyana-siyana ya anyadzombe, mitundu inango ya nthete+ zakuti zisadyiwa, nkhululu na nthete zinango. 23 Pinyama pinango pyonsene pingʼono-pingʼono pyakumburuka pyakuti piri na miyendo minai, ndi pyakunyanyasa kuna imwe. 24 Pinyama pyenepi pinakucitisani kukhala akukhonda cena. Pinyama pyenepi pingafa, munthu angapikhuya, anakhala wakukhonda cena mpaka dzuwa ingadoka.+ 25 Pinyama pyenepi pingafa, munthu angapithukula, asafunika kufula nguwo+ zace; mbakhala wakukhonda cena mpaka dzuwa ingadoka.

26 “‘Pinyama pyonsene pyakuti piri na nyondo, mbwenye nee ndi zakugawika, pontho nkhabe kulukula, ndi pyakukhonda cena kuna imwe. Munthu angapikhuya, anadzakhala wakukhonda cena.+ 27 Pinyama pyonsene pya miyendo minai pyakuti piri na manyalo, ndi pyakukhonda cena kuna imwe. Pingafa, munthu anafuna kupikhuya, anadzakhala wakukhonda cena mpaka dzuwa ingadoka. 28 Pinyama pyenepi pingafa, munthu angapithukula, asafunika kufula nguwo+ zace; mbakhala wakukhonda cena mpaka dzuwa ingadoka.+ Ipyo ndi pyakukhonda cena kuna imwe.

29 “‘Ipi ndi pinyama pya pa dziko yapantsi pyakuti ndi pyakukhonda cena kuna imwe: Nyanfuwe,* mbewa,+ mitundu yonsene ya mphandapanda, 30 anyankalibunyu,* godwa, khwawa, dzimbirikonyo* na nyakatendewa. 31 Pinyama pyenepi ndi pyakukhonda cena kuna imwe.+ Pingafa, munthu anafuna kupikhuya, anadzakhala wakukhonda cena mpaka dzuwa ingadoka.+

32 “‘Pinyama pyenepi pingafa mbapigwera mu combo, combo ceneci cinadzakhala cakukhonda cena, mwakukhonda tsalakana khala ndi combo ca matabwa, nguwo, nthembe peno sakha. Combo consene, mwakukhonda tsalakana khala cisaphatisirwa toera kucitanji, cisafunika kubvikwa mʼmadzi, mbacikhala cakukhonda cena mpaka dzuwa ingadoka, buluka penepo cinadzakhala pontho cakucena. 33 Pinyama pyenepi pingagwera mu combo ca dongo, combo ceneci musafunika kuciswa, pinthu pyonsene pikhali mwenemu pinadzakhala pyakukhonda cena.+ 34 Ntundu onsene wa cakudya cinafuna kutoteswa na madzi akhali mu combo ceneci, cinadzakhala cakukhonda cena, pontho pinthu pyonsene pyakuti pikhali mu combo ceneci pyakuti pinakwanisa kumwiwa, pinadzakhala pyakukhonda cena. 35 Khala cinyama ninga ceneci cafa, mbacigwera cinthu, ico cinadzakhala cakukhonda cena, mwakukhonda tsalakana khala ndi pa forno peno fugau, isafunika kuswiwa. Ipyo ndi pyakukhonda cena, pontho pinapitiriza kukhala pyakukhonda cena kuna imwe. 36 Khala cagwera mu ncera peno mu mbuto inakoyerwa madzi, ncera na mbuto inakoyerwa madzi pinapitiriza kukhala pyakucena, mbwenye ule anafuna kuphata cinyama ceneci cakufa, anadzakhala wakukhonda cena. 37 Khala cinyama ninga ceneci cafa mbacigwera pa mbeu zinafuna kubzwalwa, mbeu zenezi zinapitiriza kukhala zakucena. 38 Mbwenye mbeu zingatoteswa na madzi, khundu ibodzi ya manungo a cinyama cidafa ingakhuya mbeu, mbeu zenezi zinadzakhala zakukhonda cena kuna imwe.

39 “‘Cinyama cinatawiriswa imwe kudya cingafa, ule anacikhuya, anadzakhala wakukhonda cena mpaka dzuwa ingadoka.+ 40 Munthu angadya nyama ya cinyama ceneci cidafa, asafunika afule nguwo zace, pontho anadzakhala wakukhonda cena mpaka dzuwa ingadoka.+ Ule anafuna kuthukula cinyama ceneci cidafa, asafunika afule nguwo zace, mbakhala wakukhonda cena mpaka dzuwa ingadoka. 41 Pinyama pingʼono pyonsene piri pa dziko yapantsi ndi pyakunyanyasa.+ Nee pisafunika kudyiwa. 42 Lekani kudya pinyama pinafamba na mimba, pinyama pinafamba na miyendo minai, peno pinyama pingʼono pyonsene pyakuti piri na miyendo mizinji, thangwi pinyama pyenepi ndi pyakunyanyasa.+ 43 Lekani kupswipisika thangwi yakudya pinyama pingʼono pyenepi, lekani kupswipisika mbamukhala akukhonda cena thangwi ya ipyo.+ 44 Thangwi ine ndine Yahova Mulungu+ wanu, cenesekani, pontho khalani akucena,+ thangwi ine ndine wakucena.+ Natenepa, lekani kupswipisika thangwi yakudya pinyama pingʼono pyenepi piri pa dziko yapantsi. 45 Thangwi ine ndine Yahova adakubulusani mu dziko ya Ejitu toera ndikhale Mulungu wanu.+ Khalani akucena,+ thangwi ine ndine wakucena.+

46 “‘Unoyu ndi mwambo thangwi ya pinyama piri pa dziko, pinyama pyakumburuka, pinyama pya mʼmadzi, na pinyama pyonsene piri pa dziko yapantsi, 47 toera kusiyanisa cinthu cakukhonda cena na cakucena, pontho toera kusiyanisa pinyama pyakuti pinakwanisa kudyiwa na pire pyakuti nkhabe funika kudyiwa.’”+

12 Yahova apitiriza kulonga na Mose: 2 “Panga Aizraeli kuti: ‘Nkazi angakhala na mimba mbabala mwana wamamuna, anadzakhala wakukhonda cena mu ntsiku zinomwe, ninga munakhala iye wakukhonda cena mu ndzidzi unakhala iye kumwezi.+ 3 Pa ntsiku yacisere, mwana unoyu asafunika kusidzwa.+ 4 Buluka penepo, iye anapitiriza kuceneseka mu ntsiku 33 thangwi ya ciropa cidaluza iye. Iye nkhabe funika kuphata cinthu cakucena, nee kupita pa mbuto yakucena, mpaka zingamala ntsiku za kuceneseka kwace.

5 “‘Angabala mwana wankazi, iye anadzakhala wakukhonda cena mu ntsiku 14, ninga munakhala iye wakukhonda cena mu ndzidzi unakhala iye kumwezi. Buluka penepo, iye anapitiriza kuceneseka mu ntsiku 66 thangwi ya ciropa cidaluza iye. 6 Zingamala ntsiku zakuceneseka kwace thangwi yakubala mwana wamamuna peno wankazi, iye anadzabweresa mwanabira wa caka cibodzi toera kumpereka ninga ntsembe yakupiswa,+ anabweresambo mwana nkhangaiwa peno djiwa mbaipereka kuna nyantsembe pansuwo wa nsasa wa nsonkhano* toera ikhale ntsembe yakulekererwa madawo. 7 Nyantsembe anadzaipereka pamaso pa Yahova, mbacenesa* madawo ace thangwi ya ciropa cidaluza iye, natenepa iye anadzakhala wakucena. Unoyu ndi mwambo unafunika kuphatisirwa khala nkazi abala mwana wamamuna peno wankazi. 8 Mbwenye khala iye nee anakwanisa kupereka bira, asafunika apereke madjiwa mawiri peno ana nkhangaiwa+ awiri, ibodzi ninga ntsembe yakupiswa, inango ninga ntsembe toera kulekererwa madawo, nyantsembe anadzacenesa* madawo ace, natenepa iye anadzakhala wakucena.’”

13 Yahova apitiriza kupanga Mose na Aroni: 2 “Khala pa khanda ya munthu pabzwimba, pabuluka cironda peno pana madamba* akuti panango ndi cidzindikiro cakuti iye ali na matanya,*+ asafunika aendeswe kuna nyantsembe Aroni peno kuna mʼbodzi wa anace, akuti ndi anyantsembe.+ 3 Nyantsembe anadzayangʼana mwadidi pidabuluka pa khanda ya munthu unoyu. Khala dzoya yace yacena, pontho utenda wakhuya nkati mwa khanda yace, iye ali na matanya. Nyantsembe anadzamuyangʼana mwadidi mbalonga pakweca kuti iye ndi wakukhonda cena. 4 Khala madamba* ali pa khanda yace ndi akucena, mbwenye nee asiyana maningi na khanda yace, pontho dzoya yace nee yacena, nyantsembe anampanga kuti asafunika akhale kutali na anthu mu ntsiku zinomwe.+ 5 Nyantsembe anadzayangʼana mwadidi khanda yace pa ntsiku yacinomwe. Angaona kuti madamba* amala, mbakhonda kumwazika mʼmanungo mwace, nyantsembe anampanga toera akhale pontho kutali na anthu mu ntsiku zinomwe.

6 “Nyantsembe anadzamuyangʼana pontho mwadidi pa ntsiku yacinomwe. Khala madamba* ali kumala, mbakhonda kumwazika mʼmanungo mwace, nyantsembe analonga pakweca kuti iye ndi wakucena;*+ basi ene akhadabzwimba pa khanda yace. Iye anadzafula nguwo zace mbakhala wakucena. 7 Mbwenye pakumala kuenda kuna nyantsembe toera aoniwe kuti ndi wakucena, madamba angamwazika* mʼmanungo mwace, iye anadzaenda pontho kuna nyantsembe. 8 Nyantsembe anadzayangʼana mwadidi madamba anewa, angaona kuti amwazika pa khanda yace, nyantsembe anadzalonga pakweca kuti iye ndi wakukhonda cena. Anewa ndi matanya.+

9 “Munthu angaoniwa kuti ali na matanya, asafunika aendeswe kuna nyantsembe, 10 penepo nyantsembe anadzamuyangʼana mwadidi.+ Khala khundu idabzwimba yacena, dzoya yace yacenambo, pontho pabuluka cironda,+ 11 anewa ndi matanya akukhonda wanga adabuluka mʼmanungo mwace; nyantsembe anadzalonga pakweca kuti iye ndi wakukhonda cena. Iye nee asafunika kumpanga kuti akhale kutali na anthu+ toera ayangʼanwe pontho mwadidi, thangwi iye ndi wakukhonda cena. 12 Khala matanya amwazika mʼmanungo mwace monsene, nyantsembe mbaona kuti amwazika kutomera munsolo mpaka kumanyalo kwace, 13 pontho nyantsembe ayangʼana mwadidi mbaona kuti matanya amwazika mʼmanungo mwace monsene, penepo anadzalonga pakweca kuti iye ndi wakucena.* Khanda yace yonsene yadzakhala yakucena; natenepa munthu unoyu ndi wakucena. 14 Mbwenye pa ntsiku inafuna kubuluka cironda mʼmanungo mwace, iye anadzakhala wakukhonda cena. 15 Nyantsembe angaona cironda ceneci, anadzalonga pakweca kuti iye ndi wakukhonda cena.+ Cironda ceneci ndi cakukhonda cena. Anewa ndi matanya.+ 16 Mbwenye cironda cingawanga, khanda mbikhala pontho yakucena, iye asafunika aende kuna nyantsembe. 17 Nyantsembe anadzamuyangʼana mwadidi.+ Angaona kuti cironda cawanga, khanda mbikhala yakucena, anadzalonga pakweca kuti munthu unoyu ndi wakucena. Iye ndi wakucena.

18 “Munthu angakhala na phute, buluka penepo mbiwanga, 19 pale padabuluka phute pangabzwimba peno pangakhala na madamba* akucena na akufuirira, iye asafunika aende kapangiza nyantsembe. 20 Nyantsembe anapayangʼana mwadidi;+ khala pasiyana kakamwe na khanda yace, dzoya mbikhala yakucena, nyantsembe anadzalonga pakweca kuti iye ndi wakukhonda cena. Unoyu ndi utenda wa matanya udabuluka pa phute. 21 Mbwenye nyantsembe angapayangʼana mwadidi, mbaona kuti nee pali na dzoya yakucena, pontho nee pasiyana kakamwe na khanda yace, pontho pali kutoma kuwanga, penepo nyantsembe anampanga toera akhale kutali na anthu mu ntsiku zinomwe.+ 22 Khala utenda wamwazika mʼmanungo mwace, nyantsembe anadzalonga pakweca kuti iye ndi wakukhonda cena. Unoyu ndi utenda. 23 Mbwenye madamba* angakhonda kuthimizirika, mbakhonda kumwazika mʼmanungo mwace, pisapangiza kuti basi ene ndi kubzwimba kwa phute. Nyantsembe anadzalonga pakweca kuti iye ndi wakucena.+

24 “Munthu angapya na moto, cironda mbicikhala cakufuirira peno cakucena, 25 nyantsembe anadzapayangʼana mwadidi. Khala dzoya ya pa cironda yadzakhala yakucena, pontho cironda cisaoneka kuti casiyana na khanda; anewa ndi matanya adabuluka pa mbuto idapya iye. Nyantsembe anadzalonga pakweca kuti iye ndi wakukhonda cena. Anewa ndi matanya. 26 Mbwenye nyantsembe angayangʼana mwadidi madamba, mbaona kuti nkhabepo dzoya yakucena, nee pasiyana kakamwe na khanda yace, pontho madamba ali kumala; nyantsembe anampanga toera akhale kutali na anthu mu ntsiku zinomwe.+ 27 Nyantsembe anadzamuyangʼana mwadidi pa ntsiku yacinomwe. Khala madamba* amwazika mʼmanungo mwace, nyantsembe anadzalonga pakweca kuti iye ndi wakukhonda cena. Anewa ndi matanya. 28 Mbwenye khala madamba nee athimizirika, mbakhonda kumwazika, pontho ali kumala, pisapangiza kuti basi ene pabzwimba thangwi yakupya na moto. Nyantsembe anadzalonga pakweca kuti iye ndi wakucena, basi ene pabzwimba thangwi yakupya na moto.

29 “Mamuna peno nkazi angakhala na cironda munsolo peno pa cidebvu, 30 nyantsembe anadzapayangʼana mwadidi.+ Pangasiyana kakamwe na khanda yace, mbapakhala na dzoya ya safarau, pontho nee ndi yakunjipa, nyantsembe anadzalonga pakweca kuti iye ndi wakukhonda cena; ceneci ndi cironda cidabuluka pa khanda yakuti iri na tsisi peno pa cidebvu. 31 Mbwenye nyantsembe angaona kuti pa cironda nee pasiyana kakamwe na khanda yace, pontho nkhabepo tsisi yakupswipa, iye asafunika ampange toera akhale kutali na anthu mu ntsiku zinomwe.+ 32 Nyantsembe anadzayangʼana mwadidi cironda ceneci pa ntsiku yacinomwe; khala nee cathimizirika, pontho nee pabuluka tsisi ya safarau, mbicikhonda kusiyana kakamwe na khanda, 33 penepo iye asafunika acinge tsisi yace peno ndebvu zace, mbwenye nee asafunika kucinga pa cironda. Nyantsembe anampanga toera akhale pontho kutali na anthu mu ntsiku zinomwe.

34 “Nyantsembe anadzayangʼana pontho mwadidi cironda ceneci pa ntsiku yacinomwe, khala cironda cidabuluka pa khanda ya munsolo peno pa cidebvu nee cathimizirika, pontho nee casiyana kakamwe na khanda yace, nyantsembe anadzalonga pakweca kuti iye ndi wakucena; buluka penepo iye anadzafula nguwo zace mbakhala wakucena. 35 Mbwenye khala cironda cace cathimizirika pidamala iye kulongwa pakweca kuti ndi wakucena, 36 nyantsembe anadzamuyangʼana; khala cironda cathimizirika, nyantsembe nee asafunikabve kusaka tsisi ya safarau; munthu unoyu ndi wakukhonda cena. 37 Mbwenye nyantsembe angamuyangʼana mwadidi mbaona kuti cironda nee cathimizirika, pontho kuti pabuluka tsisi yakupswipa, cironda cawanga. Iye ndi wakucena, pontho nyantsembe anadzalonga pakweca kuti iye ndi wakucena.+

38 “Khala mamuna peno nkazi abulukirwa na madamba* pa khanda yace, pontho madamba anewa ndi akucena, 39 nyantsembe anadzayangʼana mwadidi+ madamba anewa. Khala madamba ndi akucenerera, unoyu nee ndi utenda wakugopswa.

40 “Khala tsisi ya munthu iri kukwedzeka munsolo mbakhala na mphandza, iye ndi wakucena. 41 Khala munsolo mwace tsisi iri kukwedzeka kutsogolo mbakhala na mphandza, iye ndi wakucena. 42 Mbwenye khala pa mphandza ya kunkhodolo peno ya pa nthomera pabuluka cironda cakucena mbacifuirira, anewa ndi matanya adabuluka pa khanda ya munsolo peno pa nthomera. 43 Nyantsembe anadzayangʼana mwadidi; angaona kuti pironda piri pa mphandza ya kunkhodolo peno ya pa nthomera ndi pyakucena na pyakufuirira, pyakulandana na matanya, 44 iye ali na matanya. Iye ndi wakukhonda cena, pontho nyantsembe asafunika kulonga pakweca kuti iye ndi wakukhonda cena thangwi ya utenda uli na iye munsolo. 45 Munthu unoyu wakuti ali na utenda wa matanya, nguwo zace zisafunika kupandulwa, tsisi yace nee isafunika kusapulwa,* pontho asafunika kuphimbira mulomo wace* mbakhuwa: ‘Ndine wakukhonda cena, ndine wakukhonda cena!’ 46 Iye anadzakhala wakukhonda cena mu ntsiku zonsene zinafuna khala iye na utenda unoyu. Nakuti iye ndi wakukhonda cena, asafunika akhale kutali na anthu, kunja kwa misasa.+

47 “Khala matanya abuluka pa nguwo, mwakukhonda tsalakana khala ndi nguwo yakucitwa na maweya a bira peno usalu, 48 peno nguwo yakulukwa na usalu* peno maweya a bira, pa nthembe peno pa cinthu ca nthembe, 49 pontho khala madamba* a masamba a ndimu, a safarau peno akufuirira abuluka pa nguwo, pa nthembe, pa nguwo yakulukwa na usalu peno pa cinthu ca nthembe, anewa ndi matanya pontho asafunika kupangizwa kuna nyantsembe. 50 Nyantsembe anadzayangʼana mwadidi madamba* anewa, mbampanga toera akhale kutali na anthu mu ntsiku zinomwe.+ 51 Pa ntsiku yacinomwe, nyantsembe anadzayangʼana mwadidi madamba anewa. Angaona kuti amwazika pa nguwo, peno pa nguwo yakulukwa na usalu, pa nthembe (mwakukhonda tsalakana kuti nthembe ineyi isaphatisirwa toera kucitanji), madamba anewa ndi matanya akugopswa, pontho cinthu ceneci ndi cakukhonda cena.+ 52 Iye asafunika kupisa nguwo ineyi, nguwo yakulukwa na usalu (mwakukhonda tsalakana khala ndi nguwo ya maweya a bira peno ya usalu), peno cinthu cinango ca nthembe cidabulukirwa na madamba, thangwi ndi matanya akugopswa. Cisafunika kupiswa pa moto.

53 “Mbwenye khala nyantsembe aiyangʼana mwadidi, mbaona kuti madamba amwazika pa nguwo, pa nguwo yakulukwa na usalu peno pa cinthu cinango ca nthembe, 54 nyantsembe anadzaapanga toera afule pinthu pyenepi pidaphatwa na madamba, buluka penepo anadzapiikha pontho kutali na anthu mu ntsiku zinomwe. 55 Cingamala kutsukwa mwadidi, nyantsembe anadzayangʼana pontho mwadidi cinthu ceneci cidaphatwa na madamba. Khala madamba asapitiriza kuoneka, maseze nee amwazika, cinthu ceneci ndi cakukhonda cena. Usafunika kucipisa pa moto, thangwi cathaphuliswa,* mwakukhonda tsalakana khala ndi nkati peno kunja.

56 “Mbwenye pakumala kutsukwa mwadidi, nyantsembe angayangʼana mwadidi madamba anewa pa nguwo, pa nthembe peno pa nguwo yakulukwa na usalu, mbaona kuti atoma kumala, iye anadzabulusa khundu ineyi ikhali na madamba. 57 Madamba* angabuluka pa khundu inango ya nguwo ineyi peno pa nguwo yakulukwa na usalu peno pa cinthu ca nthembe, pisapangiza kuti madamba ali kumwazika, natenepa usafunika kupisa pa moto+ cinthu ciri na madamba anewa. 58 Mbwenye madamba angamala pa nguwo, pa nguwo yakulukwa na usalu peno pa cinthu cinango ca nthembe cidatsuka iwe, cisafunika citsukwe pontho, buluka penepo cinadzakhala cakucena.

59 “Unoyu ndi mwambo thangwi ya matanya angabuluka pa nguwo ya maweya a bira peno ya usalu, pa nguwo yakulukwa na usalu peno pa cinthu ca nthembe toera cidziwike kuti ndi cakucena peno cakukhonda cena.”

14 Yahova apangambo Mose: 2 “Uyu ndi mwambo unafunika kutowezerwa na nyamatanya pa ntsiku yakuceneswa kwace, angaendeswa kuna nyantsembe.+ 3 Nyantsembe anadzaenda kunja kwa misasa mbanʼdinga. Khala matanya a munthu unoyu awanga, 4 nyantsembe anadzampanga toera abwerese mbalame ziwiri zakucena,* phindi ya muti wa sedhro, usalu wakufuira kakamwe na nthawi za isopo toera iye aceneswe.+ 5 Nyantsembe anadzaphemba kuti mbalame ibodzi ipherwe mu combo ca dongo, cakuti ciri na madzi adidi adatungwa pa mbuto yakuwewa. 6 Buluka penepo, iye anakwata mbalame idasala, phindi ya muti wa sedhro, usalu wakufuira kakamwe na nthawi za isopo, mbapibvika mu ciropa ca mbalame idapherwa mu combo ca dongo cakuti ciri na madzi adidi adatungwa pa mbuto yakuwewa. 7 Natenepa, iye anadzawaza ciropa kanomwe kuna munthu wakuti ali kuceneseka matanya, mbampanga pakweca kuti iye ndi wakucena. Buluka penepo, anadzasiya mbalame idakhonda kuphiwa toera imburuke pyayo.+

8 “Munthu wakuti ali kuceneseka, asafunika afule nguwo zace, apale dzoya yonsene mʼmanungo mwace, buluka penepo asambe, natenepa iye anadzakhala wakucena. Angamala anakwanisa kupita mʼmisasa, mbwenye anadzakhala kunja kwa nsasa wace mu ntsiku zinomwe. 9 Pa ntsiku yacinomwe asafunika kucinga tsisi yonsene munsolo mwace, acinge ndebvu zace zonsene na ntsiye zace zonsene. Angamala kupala dzoya yonsene mʼmanungo mwace, anadzafula nguwo zace, mbasamba mʼmadzi, natenepa anadzakhala wakucena.

10 “Pa ntsiku yacisere, iye anadzabweresa anamabira awiri akusowa cilema, bira ikazi+ ya caka cibodzi, malitru matanthatu na hafu a ufa wadidi kakamwe wakubvungazwa na mafuta a azeti ninga ntsembe ya pyakudya,+ anadzabweresambo khomitco* ya mafuta a azeti.+ 11 Nyantsembe anafuna kulonga kuti munthu unoyu ndi wakucena, anadzapereka munthu unoyu pamaso pa Yahova cifupi na pansuwo wa nsasa wa nsonkhano, pabodzi na ntsembe zenezi. 12 Nyantsembe anadzakwata mwanabira mbampereka ninga ntsembe+ ya mulando pabodzi na khomitco ya mafuta a azeti, iye anapiendesa kutsogolo mbapibweza nduli ninga ntsembe pamaso pa Yahova.+ 13 Buluka penepo, nyantsembe anadzapha mwanabira unoyu pa mbuto yakucena, yakuti ndi mbuto inapherwa+ pinyama pinaperekwa ninga ntsembe za madawo na ntsembe zakupiswa, thangwi ninga ntsembe za madawo, ntsembe ya mulando ndi ya nyantsembe.+ Ineyi ndi ntsembe yakucena kakamwe.+

14 “Buluka penepo nyantsembe anadzakwata pangʼono ciropa ca ntsembe ya mulando mbaciikha pankhomo ya khutu yamadyo ya munthu anafuna kuceneseka, pa cala cikulu ca djanja yace yamadyo na pa cala cikulu ca mwendo wace wamadyo. 15 Pontho nyantsembe anadzakwata pangʼono mafuta a azeti+ ali nʼkhomitco mbaaikha mu djanja yace yabzwere. 16 Nyantsembe anadzabvika cala cace ca djanja yamadyo mʼmafuta a azeti ali mu djanja yace yabzwere; pontho na cala cace, anadzawaza kanomwe mafuta a azeti pamaso pa Yahova. 17 Mafuta anafuna kusala mu djanja yace, nyantsembe anadzaikha pangʼono pankhomo ya khutu yamadyo ya munthu anafuna kuceneseka, pontho anadzaaikhambo pa cala cikulu ca djanja yace yamadyo na pa cala cikulu ca mwendo wace wamadyo pa mbuto ibodzi ene idaikha iye ciropa ca ntsembe ya mulando. 18 Mafuta anafuna kusala mu djanja ya nyantsembe anadzaaikha munsolo mwa munthu anafuna kuceneseka. Natenepa, nyantsembe anadzacenesa* madawo a munthu unoyu pamaso pa Yahova.+

19 “Nyantsembe anadzapereka ntsembe+ yakulekererwa madawo mbacenesa* madawo a munthu anafuna kuceneseka, buluka penepo anadzapha cinyama cinafuna kuperekwa ninga ntsembe yakupiswa. 20 Nyantsembe anadzapereka ntsembe yakupiswa na ntsembe ya pyakudya+ pa guwa ya ntsembe. Munjira ineyi, nyantsembe anadzacenesa* madawo a munthu unoyu,+ natenepa iye anadzakhala wakucena.+

21 “Khala iye ndi ntcerengi, pontho nee anakwanisa kupereka pinthu pyenepi, anadzabweresa mwanabira ninga ntsembe ya mulando, pontho anamuendesa kutsogolo mbamʼbweza nduli toera kucenesa* madawo ace; anadzabweresambo khundu yacikhumi ya efa* wa ufa wadidi kakamwe wakubvungazwa na mafuta a azeti ninga ntsembe ya pyakudya, khomitco ibodzi ya mafuta a azeti, 22 abweresembo madjiwa mawiri peno ana nkhangaiwa awiri mwakubverana na pinakwanisa iye.* Mbalame ibodzi inadzakhala ntsembe yakulekererwa madawo, inango inadzakhala ntsembe yakupiswa.+ 23 Pa ntsiku yacisere+ anadzaenda na pinthu pyenepi kuna nyantsembe toera iye aceneswe pamaso pa Yahova,+ cifupi na nsuwo wa nsasa wa nsonkhano.*

24 “Nyantsembe anadzakwata mwanabira wa ntsembe+ ya mulando na mafuta a azeti ali nʼkhomitco, pontho iye anapiendesa kutsogolo mbapibweza nduli ninga ntsembe pamaso pa Yahova.+ 25 Buluka penepo, nyantsembe anadzapha mwanabira wa ntsembe ya mulando, iye anakwata pangʼono ciropa ca ntsembe ya mulando mbaciikha pankhomo ya khutu yamadyo ya munthu anafuna kuceneseka, anaciikhambo pa cala cikulu ca djanja yace yamadyo na pa cala cikulu ca mwendo+ wace wamadyo. 26 Nyantsembe anadzaikha pangʼono mafuta a azeti mu djanja+ yace yabzwere, 27 pontho na cala cace ca djanja yamadyo, nyantsembe anadzawaza kanomwe mafuta a azeti ali mu djanja yace yabzwere pamaso pa Yahova. 28 Nyantsembe anadzakwata pangʼono mafuta a azeti ali mu djanja yace, mbaaikha pankhomo ya khutu yamadyo ya munthu anafuna kuceneseka, pa cala cikulu ca djanja yace yamadyo na pa cala cikulu ca mwendo wace wamadyo pa mbuto ibodzi ene idaikha iye ciropa ca ntsembe ya mulando. 29 Mafuta adasala mʼmanja mwace, nyantsembe anadzaaikha munsolo mwa munthu anafuna kuceneseka, toera kucenesa* madawo ace pamaso pa Yahova.

30 “Munthu anafuna kuceneseka anadzapereka djiwa ibodzi peno mwana nkhangaiwa mʼbodzi, mwakubverana na pinakwanisa+ iye, 31 mwa pire pinafuna kukwanisa iye, mbalame ibodzi anadzaipereka ninga ntsembe toera kulekererwa madawo, inango anadzaipereka ninga ntsembe yakupiswa+ pabodzi na ntsembe ya pyakudya. Natenepa nyantsembe anadzaphimbira pamaso pa Yahova+ madawo a munthu anafuna kuceneseka.

32 “Unoyu ndi mwambo kuna munthu wakuti akhali na matanya, mbwenye iye nee anakwanisa kupereka pire pinafunika toera kuceneswa.”

33 Buluka penepo, Yahova apanga Mose na Aroni: 34 “Mungapita mu dziko ya Kanani,+ mu dziko inakupasani ine toera ikhale yanu,+ ine ndingatawirisa kuti nyumba iphatwe na utenda wa matanya,+ 35 mwanaciro nyumba asafunika aende kuna nyantsembe, ampange kuti: ‘Nyumba yanga yaphatwa na utenda wa matanya.’ 36 Nyantsembe mbadzati kuenda kadinga nyumba ineyi, anampanga kuti asafunika abuluse pinthu pyonsene piri nʼnyumba, toera nyantsembe akhonde kulonga kuti pinthu pyonsene piri nʼnyumba ndi pyakukhonda cena. Buluka penepo, nyantsembe anadzapita nʼnyumba toera kuidinga. 37 Iye anadzadinga mbuto iri na utenda. Mapfufu a nyumba angakhala na madamba a masamba a ndimo na a safarau peno akufuirira mbamuoneka kuti mwasiyana kakamwe na makhundu anango a mapfufu a nyumba ineyi, 38 nyantsembe anadzabuluka nʼnyumba ineyi, anafunga nsuwo toera mukhonde kupita munthu mpaka pa ntsiku yacinomwe.+

39 “Nyantsembe anabwera pontho pa ntsiku yacinomwe mbadinga nyumba ineyi. Khala utenda wamwazika mʼmapfufu onsene a nyumba, 40 nyantsembe anadzaphemba toera miyala idaphatwa na utenda ibuluswe mbiponywa ku mbuto yakukhonda cena, kunja kwa nzinda. 41 Buluka penepo, anadzalonga kuti mapfufu onsene a nkati mwa nyumba asafunika kupalwa, pontho mataka anafuna kubulusa iwo asafunika kutayiwa ku mbuto yakukhonda cena, kunja kwa nzinda. 42 Buluka penepo, anadzaikha miyala inango pa mbuto ikhali miyala idabuluswa, anadzakwata matope anango mbathitha nawo mapfufu a nyumba.

43 “Mbwenye nyumba ineyi ingaphatwa pontho na utenda unoyu, maseze yamala kubuluswa miyala, kupalwa na kuthithwa pontho, 44 nyantsembe anadzapita nʼnyumba ineyi mbaidinga. Khala utenda unoyu wamwazika nʼnyumba yonsene, anewa ndi matanya+ akugopswa adamwazika nʼnyumba. Nyumba ineyi ndi yakukhonda cena. 45 Iye anadzatonga kuti nyumba ineyi ifudzwe, pontho iwo asafunika akwate miyala, matabwa na mataka onsene adathitha na iwo nyumba ineyi toera aende kaataya ku mbuto+ yakukhonda cena, kunja kwa nzinda. 46 Mbwenye munthu angapita nʼnyumba ineyi mu ntsiku zidalonga nyantsembe kuti nkhabe anafunika kupitamo,+ anadzakhala wakukhonda cena mpaka dzuwa ingadoka;+ 47 munthu angagona nʼnyumba ineyi, asafunika afule nguwo zace, pontho munthu angadya nʼnyumba ineyi asafunika afule nguwo zace.

48 “Mbwenye nyantsembe angaenda kunyumba ineyi mbaona kuti utenda nee wamwazika pidamala iyo kuthithwa, iye anadzalonga kuti nyumba ineyi ndi yakucena, thangwi utenda wamala. 49 Toera kucenesa madawo a nyumba ineyi, iye anadzakwata mbalame ziwiri, phindi ya muti wa sedhro, usalu wakufuira kakamwe na nthawi za isopo.+ 50 Iye anadzapha mbalame ibodzi mu combo ca dongo cakuti ciri na madzi adidi adatungwa pa mbuto yakuwewa. 51 Buluka penepo, iye anadzakwata phindi ya muti wa sedhro, nthawi za isopo, usalu wakufuira kakamwe, mbalame yakuti iri mʼmaso, mbapibvika mu ciropa ca mbalame idapherwa pa madzi adidi adatungwa pa mbuto yakuwewa, mbawaza ciropa ceneci kanomwe+ kukhundu ya nyumba ineyi. 52 Iye anadzacenesa* nyumba ineyi na ciropa ca mbalame, madzi adidi adatungwa pa mbuto yakuwewa, mbalame ya mʼmaso, phindi ya muti wa sedhro, nthawi za isopo na usalu wakufuira kakamwe. 53 Buluka penepo, anadzasiya mbalame ineyi imburukire pyayo kunja kwa nzinda, mbacenesa* madawo a nyumba ineyi, natenepa iyo inadzakhala yakucena.

54 “Unoyu ndi mwambo thangwi ya matanya, utenda wa khanda ya munsolo peno pa cidebvu,+ 55 matanya adabuluka pa nguwo+ peno panyumba,+ 56 kubzwimba, pironda na madamba,+ 57 toera kudziwa khala cinthu ndi cakukhonda cena peno ndi cakucena.+ Unoyu ndi mwambo thangwi ya matanya.”+

15 Yahova apitiriza kulonga na Mose pabodzi na Aroni, mbaapanga: 2 “Pangani Aizraeli kuti: ‘Mamuna angakhala na utenda wakubuluka utosi kumaso kwace, utosi unoyu unancitisa kukhala wakukhonda cena.+ 3 Iye anadzakhala wakukhonda cena thangwi ya utenda wace, mwakukhonda tsalakana khala utosi usapitiriza kubuluka kumaso kwace, peno kwafungika na utosi unabuluka. Pyenepi pingacitika, iye anakhala wakukhonda cena.

4 “‘Talimba inafuna kugonera munthu anabuluka utosi inadzakhala yakukhonda cena, pontho pinthu pyonsene pinafuna kukhalira iye, pinadzakhala pyakukhonda cena. 5 Munthu angakhuya talimba yace, asafunika kufula nguwo zace, pontho asafunika asambe, mbakhala wakukhonda cena mpaka dzuwa ingadoka.+ 6 Munthu angakhalira cinthu cidakhalirwa na ule anabuluka utosi, asafunika afule nguwo zace, asambe, mbakhala wakukhonda cena mpaka dzuwa ingadoka. 7 Munthu angakhuya manungo a ule anabuluka utosi, asafunika afule nguwo zace, asambe, mbakhala wakukhonda cena mpaka dzuwa ingadoka. 8 Ule ali na utenda wakubuluka utosi angaphulira mata munthu wakuti ali wakucena, iye asafunika kufula nguwo zace, asambe, mbakhala wakukhonda cena mpaka dzuwa ingadoka. 9 Cinthu consene cinafuna kukhalira munthu unoyu pa nsana wa cinyama, cinadzakhala cakukhonda cena. 10 Ule anakhuya pinthu pidakhalirwa na munthu ali na utenda wakubuluka utosi, anadzakhala wakukhonda cena mpaka dzuwa ingadoka. Pontho munthu anafuna kuthukula pinthu pyenepi, asafunika kufula nguwo zace, asambe, mbakhala wakukhonda cena mpaka dzuwa ingadoka. 11 Ule ali na utenda wakubuluka utosi+ angaphata munthu mbadzati kusamba manja, ule adaphata iye asafunika afule nguwo zace, asambe, mbakhala wakukhonda cena mpaka dzuwa ingadoka. 12 Munthu wakuti ali na utenda wakubuluka utosi angaphata combo ca dongo, cisafunika kuswiwa, khala ndi combo ca matabwa, cisafunika kutsukwa na madzi.+

13 “‘Munthu wakuti ali na utenda wakubuluka utosi angawanga, anadzamala ntsiku zinomwe toera akhale wakucena. Iye asafunika afule nguwo zace, asambe madzi adatungwa pa mbuto yakuwewa, natenepa iye anadzakhala wakucena.+ 14 Pa ntsiku yacisere, iye asafunika akwate madjiwa mawiri peno ana nkhangaiwa+ awiri, aende nawo pamaso pa Yahova pansuwo wa nsasa wa nsonkhano,* mbaapereka kuna nyantsembe. 15 Nyantsembe anadzapereka mbalame zenezi kuna Mulungu, ibodzi ninga ntsembe toera kulekererwa madawo, inango ninga ntsembe yakupiswa. Natenepa nyantsembe anadzacenesa* madawo ace pamaso pa Yahova thangwi ya utenda wace wakubuluka utosi.

16 “‘Mamuna angabuluka umuna, asafunika asambe manungo ace onsene, mbakhala wakukhonda cena mpaka dzuwa ingadoka.+ 17 Iye asafunika afule nguwo zonsene peno pinthu pya nthembe pyakuti piri na umuna, pontho pinthu pyenepi pinadzakhala pyakukhonda cena mpaka dzuwa ingadoka.

18 “‘Mamuna angapita mʼmabonde na nkazi,* uwiri wawo asafunika asambe, mbakhala akukhonda cena mpaka dzuwa ingadoka.+

19 “‘Nkazi angabuluka ciropa thangwi yakukhala kumwezi, iye anapitiriza kukhala wakukhonda cena mu ntsiku zinomwe.+ Ule ananʼkhuya anadzakhala wakukhonda cena mpaka dzuwa ingadoka.+ 20 Pinthu pyonsene pinafuna kugonera iye mu ndzidzi unakhala iye kumwezi, pinadzakhala pyakukhonda cena, pontho pinthu pyonsene pinafuna kukhalira iye, pinadzakhala pyakukhonda cena.+ 21 Ule anakhuya talimba ya nkazi unoyu, asafunika afule nguwo zace, asambe, mbakhala wakukhonda cena mpaka dzuwa ingadoka. 22 Munthu angakhuya cinthu cidakhalira nkazi unoyu, asafunika afule nguwo zace, asambe, mbakhala wakukhonda cena mpaka dzuwa ingadoka. 23 Angakhalira talimba peno cinthu cinango, ule anafuna kukhuya pinthu pyenepi anadzakhala wakukhonda cena mpaka dzuwa ingadoka.+ 24 Mamuna angapita mʼmabonde na nkazi, penepo pene nkazi mbakhala kumwezi,+ mamuna unoyu anadzakhala wakukhonda cena mu ntsiku zinomwe, pontho talimba inafuna kugonera iye inadzakhala yakukhonda cena.

25 “‘Nkazi angabuluka ciropa mu ntsiku zizinji+ mbudzati kufika ndzidzi unakhala iye kumwezi,+ peno angapitiriza kubuluka ciropa kupiringana ntsiku zinakhala iye kumwezi, anadzakhala wakukhonda cena mu ntsiku zinabuluka iye ciropa, ninga mu ndzidzi unakhala iye kumwezi. 26 Talimba inafuna kugonera iye mu ntsiku zinabuluka iye ciropa, inadzakhala yakukhonda cena ninga talimba inagonera iye mu ndzidzi unakhala iye kumwezi.+ Cinthu cinakhalira iye cinadzakhala cakukhonda cena, ninga pinacitika mu ntsiku zinakhala iye kumwezi. 27 Munthu angakhuya pinthu pyenepi anadzakhala wakukhonda cena, pontho asafunika afule nguwo zace, asambe, mbakhala wakukhonda cena mpaka dzuwa ingadoka.+

28 “‘Nkazi unoyu angawanga, ciropa mbacikhonda kubuluka pontho; anadzamala ntsiku zinomwe, buluka penepo iye anadzakhala wakucena.+ 29 Pa ntsiku yacisere, iye asafunika akwate madjiwa mawiri peno ana nkhangaiwa+ awiri, aende nawo kuna nyantsembe, pansuwo wa nsasa wa nsonkhano.*+ 30 Nyantsembe anadzapereka mbalame ibodzi ninga ntsembe toera kulekererwa madawo, inango ninga ntsembe yakupiswa. Natenepa, nyantsembe anadzacenesa* madawo ace pamaso pa Yahova thangwi ya utenda wace wakubuluka ciropa.+

31 “‘Munjira ineyi, musafunika kuphedza Aizraeli toera akhale kutali na pinthu pyakuti pinaacitisa kukhala akukhonda cena, toera akhonde kufa thangwi ya kupswipisa tabhernakulo yanga, yakuti iri pakati+ pawo.

32 “‘Unoyu ndi mwambo thangwi ya mamuna wakuti ali na utenda wakubuluka utosi, peno mamuna angakhala wakukhonda cena thangwi yakubuluka umuna,+ 33 nkazi angakhala wakukhonda cena mu ntsiku zinakhala iye kumwezi,+ mamuna peno nkazi wakuti ali na utenda wakubuluka utosi kumaso,+ na mamuna anapita mʼmabonde na nkazi wakuti ali wakukhonda cena.’”

16 Yahova alonga na Mose pidamala kufa ana awiri a Aroni, akuti afa thangwi yakufendedzera Yahova+ mwakukhonda tawirika. 2 Yahova apanga Mose: “Panga mʼbale wako Aroni kuti iye nee asafunika kupita mu mbuto yakucena+ kuntsi kwa nguwo ikulu*+ pa ndzidzi onsene unafuna iye, patsogolo pa mphampha ya Bokosi, toera iye akhonde kufa,+ thangwi ine ndinadzaonekera mu khole+ padzulu pa mphampha+ ya Bokosi.

3 “Ipi ndi pinyama pinafuna kubweresa Aroni angapita mu mbuto yakucena: Mwanangʼombe toera akhale ntsembe yakulekererwa madawo+ na mwanabira ninga ntsembe yakupiswa.+ 4 Iye asafunika kubvala nguwo+ za unyantsembe na kabudula wa nguwo+ yadidi. Iye asafunika amange nʼthambo*+ wa nguwo yadidi ncunu mwace mbamanga nguwo+ ya munsolo. Zenezi ndi nguwo+ zakucena. Iye asafunika asambe,+ buluka penepo abvale nguwo zenezi.

5 “Mbumba ya Izraeli+ isafunika kupereka kuna iye mbuzi ziwiri toera zikhale ntsembe yakulekererwa madawo, na bira ibodzi ninga ntsembe yakupiswa.

6 “Buluka penepo Aroni anadzapereka ngʼombe imuna ya ntsembe yakulekererwa madawo ace, mbacenesa* madawo ace+ na a anthu a panyumba pace.

7 “Iye anadzakwata mabokho mawiri mbaaikha pamaso pa Yahova, pansuwo wa nsasa wa nsonkhano.* 8 Aroni anadzasaka cidzindikiro thangwi ya mabokho mawiri anewa, toera ibodzi ikhale ya Yahova, inango ikhale ya Azazeli.* 9 Bokho idasankhulwa+ toera ikhale ya Yahova, Aroni anadzaipereka ninga ntsembe yakulekererwa madawo. 10 Mbwenye bokho idasankhulwa toera ikhale ya Azazeli, isafunika ibwereswe ya mʼmaso pamaso pa Yahova toera kuphimbira nayo madawo, buluka penepo isafunika iendeswe kuthando+ ninga ya Azazeli.

11 “Aroni anadzapereka ngʼombe ninga ntsembe yakulekererwa madawo ace, mbacenesa* madawo ace na a anthu a panyumba pace. Buluka penepo iye anadzapha ngʼombe ya ntsembe yakulekererwa madawo ace.+

12 “Nyantsembe anadzakwata cakuikhira+ insenso cakudzala na makala a moto adabuluswa pa guwa ya ntsembe,+ yakuti iri pamaso pa Yahova, na madjanja mawiri a insenso,+ iye anadzapikwata mbaenda napyo kuntsi kwa nguwo ikulu.*+ 13 Iye anadzakwata insenso mbaikha padzulu pa makala a moto pamaso pa Yahova,+ penepo utci wa insenso unadzaphimbira mphampha+ ya Bokosi ya Umboni,+ toera iye akhonde kufa.

14 “Iye anadzakwata pangʼono ciropa+ ca ngʼombe mbaciwaza na cala cace kutsogolo kwa mphampha kukhundu yakumabulukiro a dzuwa. Na cala cace, iye anawaza kanomwe ciropa ceneci kutsogolo kwa mphampha.+

15 “Buluka penepo anadzapha bokho inafuna kuperekwa ninga ntsembe yakulekerera madawo a mbumba;+ anadzakwata ciropa mbaenda naco kuntsi kwa nguwo ikulu,+ mbacita pibodzi pyene ninga pidacita iye na ciropa+ ca ngʼombe; iye asafunika kuciwaza kutsogolo kwa mphampha.*

16 “Iye asafunika kupereka ntsembe yakucenesa* madawo a pa mbuto yakucena thangwi ya pinthu pyakukhonda cena pidacita Aizraeli, pontho thangwi ya madawo+ awo; ndi pyenepi pinafunika iye kucita na nsasa wa nsonkhano,* wakuti uli pakati pa anthu anewa anacita pinthu pyakukhonda cena.

17 “Nee munthu mʼbodzi asafunika kugumanika mu nsasa wa nsonkhano mu ndzidzi unapita iye toera kupereka ntsembe yakucenesa* madawo pa mbuto yakucena mpaka kubuluka kwace. Iye anadzacenesa madawo ace, madawo a anthu a panyumba+ pace na a mbumba yonsene ya Izraeli.+

18 “Buluka penepo, iye anadzabuluka mbaenda ku guwa ya ntsembe,+ yakuti iri pamaso pa Yahova, mbapereka ntsembe yakucenesa madawo a guwa ineyi. Anadzakwata pangʼono ciropa ca ngʼombe imuna na ca bokho mbaciikha pa nyanga za guwa ya ntsembe. 19 Na cala cace, iye anadzawaza kanomwe ciropa pa guwa ya ntsembe, munjira ineyi anacenesa guwa ya ntsembe thangwi ya pinthu pyakukhonda cena pinacita Aizraeli.

20 “Angamala kupereka ntsembe yakucenesa madawo+ a mbuto yakucena, a nsasa wa nsonkhano na a guwa ya ntsembe,+ anadzapereka kuna Mulungu bokho+ ya mʼmaso. 21 Aroni anadzaikha manja ace pa nsolo wa bokho ya mʼmaso mbabweka madodo onsene a Aizraeli, kukhonda bvera kwawo na madawo awo onsene; munjira ineyi pinakhala ninga ali kuikha madawo onsene pa nsolo wa bokho,+ buluka penepo anadzapanga munthu adasankhulwa toera aende kaisiye kuthando. 22 Iye anadzaendesa bokho ineyi kuthando,+ natenepa iyo inadzakwata madawo+ onsene a mbumba mbaenda nawo ku mbuto yakuti nkhabe khala anthu.+

23 “Buluka penepo Aroni anadzapita mu nsasa wa nsonkhano mbadula nguwo zadidi zidabvala iye toera kupita mu mbuto yakucena, angamala anazisiya mwenemu. 24 Iye asafunika kusamba+ pa mbuto yakucena mbabvala nguwo+ zace; buluka penepo anadzabuluka mwenemu mbapereka ntsembe yace yakupiswa+ na ntsembe yakupiswa+ ya mbumba, mbacenesa madawo ace na madawo a mbumba.+ 25 Buluka penepo, anadzapisa mafuta a ntsembe yakulekererwa madawo pa guwa ya ntsembe.

26 “Ule adaenda kuthando kasiya bokho ya Azazeli+ asafunika afule nguwo zace mbasamba; angamala iye anakwanisa kupita mʼmisasa.

27 “Ngʼombe idaperekwa ninga ntsembe yakulekererwa madawo na bokho idaperekwa ninga ntsembe yakulekererwa madawo, yakuti ciropa cace caendeswa mu mbuto yakucena toera kucenesa* madawo, anadzazikwata mbaenda nazo kunja kwa misasa. Nthembe, nyama na matubzwi a pinyama pyenepi pinadzapiswa pa moto.+ 28 Ule anafuna kupipisa asafunika afule nguwo zace mbasamba; angamala anakwanisa kupita mʼmisasa.

29 “Uyu unadzakhala ntemo wakwenda na kwenda kuna imwe: Pa ntsiku khumi ya mwezi wacinomwe, pangizani kuti muli akutsukwala* thangwi ya madawo anu, pontho nee mʼbodzi wa imwe asafunika kuphata basa,+ mwakukhonda tsalakana khala ndi Muizraeli peno munthu wakudza anakhala pakati panu. 30 Pa ntsiku ineyi, nyantsembe anadzacenesa*+ madawo anu toera mukhale akucena. Madawo anu onsene anadzalekererwa, mbamukhala akucena pamaso pa Yahova.+ 31 Ineyi ndi Sabudu toera imwe mupume, pontho musafunika kutsukwala thangwi ya madawo anu.+ Unoyu ndi ntemo wakwenda na kwenda.

32 “Nyantsembe adadzodzwa+ mbapita pa mbuto ya pai+ wace toera kutumikira ninga nyantsembe,+ anadzapereka ntsembe yakucenesa madawo, pontho anadzabvala nguwo+ zadidi, zakuti ndi nguwo+ za unyantsembe. 33 Iye anadzapereka ntsembe toera kucenesa madawo a mbuto yakucena kakamwe,+ madawo a nsasa wa nsonkhano*+ na a guwa ya ntsembe.+ Pontho iye anadzaphimbira madawo a anyantsembe na madawo a mbumba+ yonsene. 34 Unoyu ndi ntemo wakwenda na kwenda kuna imwe,+ toera kucenesa madawo a Aizraeli, toera kuacenesa mʼmadawo awo onsene kabodzi pa caka.”+

Aroni acita ninga pidalonga Yahova kuna Mose.

17 Yahova apitiriza kulonga na Mose: 2 “Panga Aroni na anace, pabodzi na Aizraeli onsene kuti ‘Ipi ndi pidalonga Yahova:

3 “‘“Pakati pa mbumba ya Izraeli nkhabe munthu anafunika kupha ngʼombe, bira peno mbuzi mʼmisasa peno kunja kwa misasa, 4 mbwenye asafunika aende nayo pansuwo wa nsasa wa nsonkhano toera aipereke ninga ntsembe kuna Yahova, kutsogolo kwa tabhernakulo ya Yahova. Munthu angapha cinyama ninga ceneci nkati peno kunja kwa misasa, munthu unoyu anadzakhala na mulando wa ciropa. Nakuti cinyama ceneci aciphera ku mbuto inango, munthu unoyu asafunika kuphiwa pakati pa mbumba yace. 5 Pyenepi ndi toera Aizraeli abwerese kuna Yahova pinyama pyawo pyakuti cincino asapiphera pa mbuto yapakweca, iwo asafunika apipereke kuna nyantsembe pansuwo wa nsasa wa nsonkhano.* Asafunika apipereke kuna Yahova+ ninga ntsembe toera kupereka takhuta.* 6 Nyantsembe anadzawaza ciropa pa guwa ya ntsembe ya Yahova pansuwo wa nsasa wa nsonkhano,* mbapisa mafuta ninga khwema yakununkhira pamaso pa* Yahova.+ 7 Natenepa iwo nee asafunikabve kupereka ntsembe zawo kuna madimonyo,*+ akuti iwo asacita nawo+ ulukwali thangwi ya kualambira. Unoyu unadzakhala ntemo wakwenda na kwenda mʼmadzindza mwanu.”’

8 “Usafunika kuapanga: ‘Munthu onsene wa dzindza ya Izraeli peno munthu wakudza wakuti asakhala pakati panu, angapereka ntsembe yakupiswa peno ntsembe inango, 9 mbakhonda kuenda nayo pansuwo wa nsasa wa nsonkhano* toera kuipereka kuna Yahova, asafunika kuphiwa pakati pa mbumba+ yace.

10 “‘Munthu onsene wa dzindza ya Izraeli peno munthu wakudza wakuti asakhala pakati panu angadya ciropa,+ mwakukhonda tsalakana kuti ndi ca ntundu wanji wa cinyama, ndinadzaipirwa na munthu unoyu adadya ciropa, mbandimupha pakati pa mbumba yace. 11 Thangwi umaso wa cinthu consene uli mu ciropa+ cace, pontho ine ndakupasani ciropa ceneci pa guwa ya ntsembe+ toera mucenese madawo anu. Thangwi ciropa ndico cinacenesa*+ madawo kubulukira mu umaso uli mu ciropa. 12 Na thangwi ineyi, ine ndapanga Aizraeli kuti: “Nee mʼbodzi wa imwe asafunika kudya ciropa, pontho nee munthu mʼbodzi wakudza anakhala pakati+ panu asafunika kudya ciropa.”+

13 “‘Khala Muizraeli peno munthu wakudza anakhala pakati panu aenda kasodza, mbapha cinyama cantsanga peno mbalame yakuti anakwanisa kuidya, ciropa+ cace asafunika kucifikira pantsi. 14 Thangwi umaso wa cinthu consene uli mu ciropa cace, umaso uli mu ciropa. Na thangwi ineyi, ine ndapanga Aizraeli: “Lekani kudya ciropa ca pinthu pyonsene, thangwi umaso wa pinthu pyonsene uli mu ciropa. Munthu anadya ciropa anadzaphiwa.”+ 15 Munthu angadya nyama idagumana iye kuti yafa peno yalumwa na cikala,+ mwakukhonda tsalakana khala ndi Muizraeli peno munthu wakudza, asafunika afule nguwo zace, asambe, mbakhala wakukhonda cena mpaka dzuwa ingadoka.+ Buluka penepo iye anadzakhala pontho wakucena. 16 Mbwenye angakhonda kufula nguwo zace, mbakhonda kusamba, iye anadzatcunyuswa thangwi ya* madawo+ ace.’”

18 Yahova alonga pontho na Mose: 2 “Panga Aizraeli kuti: ‘Ine ndine Yahova Mulungu+ wanu. 3 Lekani kutowezera macitiro a anthu a ku dziko ya Ejitu kukakhala imwe, pontho lekani kucita pinthu pinacita anthu a mu dziko ya Kanani kunakuendesani ine.+ Lekani kutowezera misambo yawo. 4 Musafunika kubvera matongero anga, mbamutsogolerwa na mitemo+ yanga. Ine ndine Yahova Mulungu wanu. 5 Musafunika kubvera matongero anga na mitemo yanga; ule anacita pyenepi anadzakhala na umaso thangwi yakucita pyenepi.+ Ine ndine Yahova.

6 “‘Nee mamuna mʼbodzi pakati panu asafunika kupita mʼmabonde+ na* mʼbale wace. Ine ndine Yahova. 7 Leka kupita mʼmabonde na pai wako, pontho leka kupita mʼmabonde na mai wako. Iye ndi mai wako, natenepa leka kupita naye mʼmabonde.

8 “‘Leka kupita mʼmabonde na nkazi+ wa pai wako, thangwi pyenepi pinapasa manyadzo pai wako.*

9 “‘Leka kupita mʼmabonde na mʼbale wako wankazi, mwakukhonda tsalakana khala iye ndi mwana wa pai wako peno wa mai wako, peno abalwa pabanja ibodzi ene na iwe peno nkhabe.+

10 “‘Leka kupita mʼmabonde na ndzukulu wako wankazi, mwakukhonda tsalakana khala ndi mwana wa mwanako wamamuna peno wankazi, thangwi pyenepi mphyakupasa manyadzo kuna iwe.*

11 “‘Leka kupita mʼmabonde na mwana wankazi wa nkazace pai wako, adabala iye na nkazi unango, thangwi iye ndi mʼbale wako.

12 “‘Leka kupita mʼmabonde na mwanankaziace* pai wako. Unoyu ndi mʼbale wace+ pai wako.*

13 “‘Leka kupita mʼmabonde na mʼbale wankazi wa mai wako, thangwi unoyu ndi mʼbale wa ciropa cibodzi cene na mai wako.

14 “‘Leka kupasa manyadzo mʼbale wace pai wako* thangwi yakupita mʼmabonde na nkazace. Thangwi unoyu ndi mai wako wangʼono.+

15 “‘Leka kupita mʼmabonde na nkwenyako,+ thangwi iye ndi nkazi wa mwanako. Natenepa leka kupita naye mʼmabonde.

16 “‘Leka kupita mʼmabonde na nkazi+ wa mʼbale wako, thangwi pyenepi pinapasa manyadzo mʼbale wako.*

17 “‘Ungasemba nkazi, leka kupita mʼmabonde na mwanace wankazi+ peno ndzukulu wace wankazi.* Pyenepi ndi pinthu pyakupasa manyadzo,* thangwi iwo ndi abale ace nkazako.

18 “‘Leka kukwata mʼbale wace nkazako toera akhale nʼkhazibace,*+ mbupita naye mʼmabonde mu ndzidzi wakuti nkazako adzati kufa.

19 “‘Leka kupita mʼmabonde na nkazi mu ntsiku zinakhala iye+ kumwezi, thangwi mu ndzidzi unoyu iye ndi wakukhonda cena.

20 “‘Leka kupita mʼmabonde na nkazi wa ndzako,* thangwi pyenepi pinakucitisa kukhala wakukhonda cena.+

21 “‘Leka kutawirisa kuti mwanako aperekwe* kuna mulungu Moloke.*+ Leka kupswipisa dzina ya Mulungu wako munjira+ ineyi. Ine ndine Yahova.

22 “‘Leka kupita mʼmabonde* na mamuna ndzako ninga munapita iwe mʼmabonde* na nkazi.+ Thangwi pyenepi ndi pinthu pyakunyanyasa.*

23 “‘Nkhabe funika kuti mamuna apite mʼmabonde na cinyama, mbakhala wakukhonda cena thangwi ya pyenepi; pontho nkazi nee asafunika aperekeke toera kupita mʼmabonde na cinyama.+ Thangwi pyenepi nee ndi pyaciunthu.*

24 “‘Lekani kupswipisika na pinthu pyenepi, thangwi madzindza onsene anafuna ine kuthamangisa patsogolo panu apswipisika+ na pinthu pyenepi pyonsene. 25 Na thangwi ineyi, dziko yawo ndi yakukhonda cena, ine ndinadzatcunyusa anthu ali mu dziko ineyi thangwi ya madawo awo, anthu anewa anadzaponywa kutali+ na dziko yawo.* 26 Mbwenye imwe musafunika kubvera matongero anga na mitemo+ yanga. Pontho anthu onsene pakati panu, mwakukhonda tsalakana khala ndi Aizraeli peno anthu akudza anakhala pakati panu,+ nee musafunika kucita pinthu pyenepi pyakunyanyasa. 27 Thangwi pinthu pyenepi pyakunyanyasa ndipyo pikhacitwa na anthu akhali mu dziko ineyi imwe+ mbamudzati kupitamo, cincino dziko ineyi ndi yakukhonda cena. 28 Natenepa, dziko ineyi nee inadzakuponyani kutali thangwi ya kuipswipisa, ninga mudaponya iyo kutali ale akhali mwenemu imwe mbamudzati kupitamo. 29 Angaoneka munthu anafuna kucita pinthu pyenepi pyakunyanyasa, onsene anafuna kupicita asafunika kuphiwa pakati pa mbumba. 30 Musafunika kubvera mitemo yanga toera mukhonde kucita cibodzi mwa pinthu pyenepi pyakunyanyasa pikhacitwa na anthu akhali mwenemu imwe+ mbamudzati kupitamo, natenepa nee munadzapswipisika na pinthu pyenepi. Ine ndine Yahova Mulungu wanu.’”

19 Yahova apitiriza kulonga na Mose: 2 “Panga mbumba yonsene ya Izraeli kuti: ‘Musafunika kukhala akucena, thangwi ine Yahova Mulungu wanu, ndine wakucena.+

3 “‘Mʼbodzi na mʼbodzi wa imwe asafunika alemedze pai+ wace na mai wace, pontho asafunika kulemedza masabudu+ anga. Ine ndine Yahova Mulungu wanu. 4 Lekani kulambira alungu+ akusowa basa,* pontho lekani kucita alungu a utale.+ Ine ndine Yahova Mulungu wanu.

5 “‘Mungapereka kuna Yahova+ ntsembe toera kupereka takhuta,* musafunika kuzipereka munjira yakutawirika toera iye akomerwe na imwe.*+ 6 Isafunika kudyiwa pa ntsiku inaipereka imwe, na mangwana mwace; pinafuna kusala mpaka pa ntsiku yacitatu pisafunika kupiswa pa moto.+ 7 Mbwenye pingadyiwa pa ntsiku yacitatu, ntsembe ineyi inadzakhala cinthu cakunyanyasa; natenepa Mulungu nee anadzatawira ntsembe ineyi. 8 Ule adaidya anadzatcunyuswa thangwi ya mulando wace, thangwi iye apswipisa pinthu pyakucena pya Yahova. Munthu unoyu asafunika kuphiwa pakati pa mbumba.

9 “‘Mungabvuna mʼmunda mwanu, lekani kubvuna pyonsene kunkhomo kwa munda, pontho nee musafunika kubvuna+ mphendzi za mʼmunda mwanu.* 10 Kusiyapo pyenepi, lekani kugumanya mauva adasala mʼmunda mwanu, pontho lekani kulokota mauva adadoda mʼmunda mwanu. Musafunika kuasiyira ntcerengi+ na munthu wakudza. Ine ndine Yahova Mulungu wanu.

11 “‘Lekani kuba,+ lekani kunyengeza,+ pontho lekani kulonga uthambi kuna unango na ndzace. 12 Lekani kudumbira papezi mu dzina+ yanga, thangwi pyenepi pinapswipisa dzina ya Mulungu wanu. Ine ndine Yahova. 13 Leka kuponderera ndzako,+ pontho leka kuba.+ Leka kukhala na kobiri ya nyabasa wako mbugona nayo mpaka mangwana mwace.+

14 “‘Leka kupasa dzedze munthu wakukhonda kubva,* pontho leka kuikha patsogolo pa boliboli+ cinthu cakuti cinanʼgwegwedusa; usafunika kugopa Mulungu+ wako. Ine ndine Yahova.

15 “‘Lekani kutonga mwakukhonda kulungama. Lekani kubvera ntsisi munthu wakutcerenga basi ene thangwi ndi nyakutcerenga, peno kubvera ntsisi munthu wakupfuma.+ Usafunika kutonga ndzako mwakulungama.

16 “‘Leka kuenda mbumwaza uthambi* toera kuipisa makhaliro a anango pakati pa mbumba+ yako. Leka kucita cinthu cakuti cinaikha pangozwi umaso wa ndzako.*+ Ine ndine Yahova.

17 “‘Leka kuida mʼbale wako muntima+ mwako. Mwakukhonda penula, usafunika kusandika ndzako+ toera ukhonde kukhalambo na mulando wa madawo pabodzi na iye.

18 “‘Leka kubwezera pyakuipa+ mbumba yako, pontho leka kukoya kuipirwa muntima thangwi ya iwo. Funa ndzako ninga iwe ene.+ Ine ndine Yahova.

19 “‘Musafunika kubvera matongero anga. Lekani kukwata cifuyo ca ntundu unango toera kubindulisa cifuyo cakusiyana na ceneci. Pa kubzwala mʼmunda mwanu, lekani kubvungaza mitundu miwiri ya mbeu+ zakusiyana, pontho lekani kubvala nguwo zakulukwa na mitundu miwiri+ ya usalu wakusiyana.

20 “‘Mamuna angapita mʼmabonde na nkazi, pontho khala nkazi unoyu ndi bitcu wakuti asadikhira kumanga banja na mamuna unango, mbwenye adzati kuombolwa peno kupaswa ufulu wakubuluka mu ubitcu wace, iwo asafunika kutcunyuswa. Ngakhale tenepo, iwo nee asafunika kuphiwa, thangwi nkazi unoyu adzati kupaswa ufulu wace. 21 Mamuna unoyu asafunika abwerese bira ninga ntsembe ya mulando+ wace kuna Yahova pansuwo wa nsasa wa nsonkhano.* 22 Nyantsembe anadzapereka bira ineyi kuna Yahova toera kucenesa* madawo a mamuna unoyu, natenepa iye anadzalekererwa madawo adacita iye.

23 “‘Mungapita mu dziko inakupasani ine, mungatceka miti yakubala misapo, musafunika kuona misapo ineyi ninga yakukhonda cena na yakukhondeswa. Mu pyaka pitatu pyakutoma, nee musafunika kudya misapo ineyi. 24 Mbwenye pa caka cacinai, misapo yace yonsene inadzakhala yakucena, mbukhala ndzidzi wakutsandzaya pamaso pa Yahova.+ 25 Pa caka cacixanu munakwanisa kudya misapo yace, mbamuthimizira misapo ineyi pa mbeu zinabvuna imwe. Ine ndine Yahova Mulungu wanu.

26 “‘Lekani kudya nyama yakuti iri na ciropa.+

“‘Lekani kusaka pyakulotera* peno kucita pinthu pyaungʼanga.*+

27 “‘Lekani kucinga tsisi ya nʼkhundu mwa misolo yanu mbisala yakubvira kakamwe* peno kupala ndebvu.+

28 “‘Lekani kucekeka-cekeka mʼmanungo mwanu thangwi ya munthu+ wakufa, pontho lekani kulembwa nembo.* Ine ndine Yahova.

29 “‘Leka kupwazisa mwanako wankazi thangwi yakuncitisa kukhala puta,+ toera dziko yako ikhonde kucita uputa mbidzala na makhaliro aulukwali.*+

30 “‘Musafunika kukoya masabudu+ anga, pontho musafunika kulemedza mbuto yanga yakucena. Ine ndine Yahova.

31 “‘Lekani kusaka ciphedzo kuna anthu analonga na mizimu+ peno anyakulotera,+ thangwi pyenepi pinakucitisani kukhala akukhonda cena. Ine ndine Yahova Mulungu wanu.

32 “‘Lamuka+ pamaso pa munthu ali na imbvi, pontho lemedza nkhalamba.+ Usafunika kugopa Mulungu+ wako. Ine ndine Yahova.

33 “‘Khala munthu wakudza asakhala pabodzi na imwe mu dziko yanu, lekani kuntsalakana mwakuipa.+ 34 Munthu wakudza anakhala pakati panu+ musafunika kuntsalakana ninga munthu wa mu dziko yanu; musafunika kunfuna ninga imwe ene, thangwi imwe mwakhalambo alendo mu dziko ya Ejitu.+ Ine ndine Yahova Mulungu wanu.

35 “‘Leka kuphatisira midida yakukhonda kulungama pa kupima kulapha kwa cinthu, kulemera kwa cinthu peno kunjipa kwa pinthu.+ 36 Musafunika kuphatisira pyakupima napyo pyakulungama, midida yakulungama; midida yakulungama toera kupima+ pinthu pyakuuma* na midida yakulungama toera kupima pinthu pya madzi-madzi. Ine ndine Yahova Mulungu wanu, adakubulusani mu dziko ya Ejitu. 37 Na thangwi ineyi, musafunika kukoya matongero anga onsene na mitemo yanga yonsene, mbamuitoweza.+ Ine ndine Yahova.’”

20 Yahova apanga Mose: 2 “Usafunika kupanga Aizraeli kuti: ‘Munthu wa dzindza ya Izraeli peno munthu wakudza anakhala pakati pa Aizraeli angapereka mwanace kuna Moloke asafunika kuphiwa.+ Mbumba isafunika kumponyera miyala mpaka kufa. 3 Ine ndinadzaipirwa na munthu unoyu mbandimupha pakati pa mbumba, thangwi iye apereka mwanace kuna Moloke; iye apswipisa mbuto+ yanga yakucena, pontho apswipisa dzina yanga yakucena. 4 Mbumba ya mu dziko ineyi ingaona munthu adapereka mwanace kuna Moloke, anthu anewa mbakhala pyawo nee kumupha,+ 5 ine ndinadzaipirwa na munthu unoyu pabodzi na anthu a panyumba pace.+ Ndinadzafudza munthu unoyu pakati pa mbumba pabodzi na onsene adamʼphedzera toera kucita ulukwali na Moloke.

6 “‘Munthu anasaka ciphedzo kuna anthu analonga na mizimu+ peno anyakulotera,+ mbacita ulukwali wauzimu na anthu anewa, mwakukhonda penula, ine ndinaipirwa na munthu unoyu, mbandinfudza pakati pa mbumba.+

7 “‘Musafunika kuceneseka* mbamukhala akucena,+ thangwi ine ndine Yahova Mulungu wanu. 8 Musafunika kukoya matongero anga mbamuabvera.+ Ine ndine Yahova, ule anakucenesani.+

9 “‘Munthu angapasa dzedze* pai wace peno mai wace, munthu unoyu asafunika kuphiwa.+ Nakuti iye apasa dzedze pai wace peno mai wace, mulando wa ciropa cace unakhala na iye.

10 “‘Mamuna angacita upombo na nkazi wa mwanaciro, ule adacita upombo na nkazi wa ndzace asafunika kuphiwa; mwakukhonda penula, mamuna na nkazi adacita upombo+ asafunika kuphiwa. 11 Mamuna angapita mʼmabonde na nkazi wa pai wace asapasa manyadzo+ pai wace.* Mwakukhonda penula, uwiri wawo asafunika kuphiwa. Mulando wa ciropa cawo unakhala na iwo. 12 Mamuna angapita mʼmabonde na nkwenyace, uwiri wawo asafunika kuphiwa. Thangwi pidacita iwo si pyaciunthu tayu.* Mulando wa ciropa cawo unakhala na iwo.+

13 “‘Mamuna angapita mʼmabonde na mamuna ndzace ninga munapita mamuna mʼmabonde na nkazi, uwiri wawo acita pinthu+ pyakunyanyasa. Mwakukhonda penula, iwo asafunika kuphiwa. Mulando wa ciropa cawo unakhala na iwo.

14 “‘Mamuna angasemba nkazi, buluka penepo mbapitambo mʼmabonde na mai wace nkazi unoyu, pyenepi ndi pinthu+ pyakunyanyasa kakamwe.* Iwo asafunika kupisa+ mamuna unoyu na akazi awiri ene, toera pinthu pyenepi pyaulukwali pikhonde kupitiriza kucitwa pakati panu.

15 “‘Mamuna angapita mʼmabonde na cinyama, mwakukhonda penula, iye asafunika kuphiwa, pontho musafunika kupha cinyama+ ceneci. 16 Nkazi angafendedzera cinyama toera kupita naco+ mʼmabonde, musafunika kupha nkazi unoyu na cinyama cene. Mwakukhonda penula, iwo asafunika kuphiwa. Mulando wa ciropa cawo unakhala na iwo.

17 “‘Mamuna angapita mʼmabonde na mʼbale wace wankazi wakuti ndi mwana wa pai wace peno wa mai wace, uwiri wawo mbaonana cipezipezi, pyenepi ndi pinthu pyakupasa manyadzo.+ Iwo asafunika kuphiwa pamaso pa mbumba yawo. Mamuna unoyu apasa manyadzo mʼbale wace wankazi.* Iye asafunika kutawirira mulando wace.

18 “‘Mamuna angapita mʼmabonde na nkazi wakuti ali kumwezi, uwiri wawo nee apangiza kuti ciropa+ ndi cakucena. Iwo asafunika kuphiwa pakati pa mbumba yawo.

19 “‘Leka kupita mʼmabonde na mʼbale wankazi wa mai wako peno mwanankaziace pai wako, thangwi pyenepi pinapasa manyadzo+ mʼbale wa mai wako peno wa pai wako. Iwo asafunika kutawirira mulando wawo. 20 Mamuna angapita mʼmabonde na nkazi wa mʼbale wa pai wace, iye akupasa manyadzo*+ mʼbale wa pai wace. Iwo asafunika kutawirira madawo awo. Iwo cipo asafunika kubala ana. Uwiri wawo asafunika kuphiwa. 21 Mamuna angakwata nkazi wa mʼbale wace,* iye acita cinthu cakunyanyasa kakamwe.+ Iye apasa manyadzo* mʼbale wace. Uwiri wawo asafunika kufa nee kubala ana.

22 “‘Musafunika kukoya matongero anga onsene na mitemo+ yanga yonsene, mbamubvera,+ toera mukhonde kuponywa kutali+ na dziko inakupasani ine toera mukhale. 23 Lekani kutowezera misambo ya anthu a madzindza anafuna kuthamangisa ine patsogolo panu,+ thangwi iwo acita pinthu pyenepi pyonsene; natenepa ine ndisanyanyasirwa nawo.+ 24 Na thangwi ineyi, ine ndakupangani kuti: “Imwe munadzatambira dziko yawo, ine ndinadzakupasani toera ikhale yanu, dziko ya nkaka na uci.+ Ine ndine Yahova Mulungu wanu, adakupambulani pakati pa mbumba+ zinango.” 25 Musafunika kusiyanisa pinyama pyakucena na pyakukhonda cena, mbalame zakucena+ na zakukhonda cena. Lekani kupswipisika thangwi ya pinyama, mbalame na pinyama pingʼono pinafamba pa dziko yapantsi, pyakuti ine ndapiikha pakhundu toera mupione ninga pyakukhonda cena.+ 26 Musafunika kukhala akucena, thangwi ine Yahova ndine wakucena;+ ine ndiri kukupambulani pakati pa madzindza anango toera mukhale mbumba yanga.+

27 “‘Mamuna peno nkazi angakhala ngʼanga peno nyakulotera, mwakukhonda penula,+ iwo asafunika kuphiwa. Mbumba isafunika kuaponyera miyala mpaka kufa. Mulando wa ciropa cawo unakhala na iwo.’”

21 Yahova alonga na Mose: “Panga anyantsembe, akuti ndi ana a Aroni: ‘Nyantsembe nee asafunika kupswipisika thangwi yakufendedzera munthu wakufa pakati pa mbumba+ yace. 2 Mbwenye iye anakwanisa kupswipisika khala munthu adafa ndi wa pakati pa abale ace, ninga mai wace, pai wace, mwanace wamamuna, wankazi, peno mʼbale wace. 3 Iye anakwanisambo kupswipisika thangwi ya mʼbale wace wankazi, khala mʼbale wace unoyu ndi mwali, akakhala cifupi na iye, pontho akhadzati kusembwa. 4 Iye nee asafunika kupswipisika mbakhala wakukhonda cena thangwi ya manungo akufa a nkazi wa munthu unango pakati pa mbumba yace. 5 Iwo nee asafunika kucingwa mpala+ nee kupala ndebvu za mʼmaputu mwawo peno kucekeka-cekeka mʼmanungo+ mwawo. 6 Iwo asafunika akhale akucena pamaso pa Mulungu+ wawo, pontho nee asafunika kupswipisa dzina ya Mulungu+ wawo, thangwi ndiwo anapereka kuna Yahova ntsembe zakupiswa pa moto, zakuti ndi nkate wa* Mulungu wawo; natenepa iwo asafunika akhale akucena.+ 7 Nyantsembe nee asafunika kusemba puta+ peno nkazi adaluza umwali wace.* Pontho nee asafunikambo kusemba nkazi adakhondwa na mamunace,+ thangwi nyantsembe ndi wakucena pamaso pa Mulungu. 8 Nyantsembe musafunika kumuona ninga wakucena,+ thangwi ndiye anapereka nkate wa Mulungu wanu. Iye asafunika akhale wakucena kuna imwe, thangwi ine Yahova anakucenesani, ndine wakucena.+

9 “‘Mwana wankazi wa nyantsembe angapswipisika thangwi yakucita uputa,* iye ali kupasa manyadzo pai wace. Mwana unoyu asafunika kupiswa pa moto.+

10 “‘Nyantsembe wankulu adadzodzwa+ pakati pa abale ace, mbasankhulwa* toera kubvala nguwo+ za unyantsembe, nee asafunika kukhonda tsalakana tsisi yace peno kupandula nguwo+ zace. 11 Iye nee asafunika kufendedzera munthu+ wakufa; nee asafunika kupswipisika, mwakukhonda tsalakana khala adafa ndi pai wace peno mai wace. 12 Nee asafunika kubuluka pa mbuto yakucena, nee kupswipisa mbuto yakucena ya Mulungu+ wace, thangwi pa nsolo pace pali na cidzindikiro cakuperekeka kwace, cakuti ndi mafuta akudzodza nawo a Mulungu+ wace. Ine ndine Yahova.

13 “‘Iye asafunika kusemba nkazi wakuti ndi mwali.+ 14 Nee asafunika kusemba nzice,* nkazi adakhondwa na mamunace, nkazi adaluza umwali wace,* peno puta; mbwenye asafunika kusemba nkazi wakuti ndi mwali pakati pa mbumba yace. 15 Iye nee asafunika kupswipisa anace pakati pa mbumba+ yace, thangwi ine ndine Yahova, ule anakucenesani.’”

16 Yahova apitiriza kulonga na Mose: 17 “Panga Aroni kuti: ‘Nee munthu mʼbodzi wa mu dzindza yako wakuti ali na cilema asafunika kufendedzera guwa ya ntsembe toera kupereka nkate kuna Mulungu wace. 18 Khala munthu ali na cilema nee asafunika kufendedzera guwa ya ntsembe: Boliboli, munthu wakulamala miyendo, wakulamala mphuno, peno wakuti nkono wace peno mwendo wace ubodzi ndi wakulapha kakamwe, 19 munthu wakulamala manyalo peno wakulamala manja, 20 munthu wa nthuku, munthu wakubvira maningi, ule ali na utenda wa diso, mphere, pironda pa khanda,* peno wakulamala kumaso.*+ 21 Khala munthu wa dzindza ya nyantsembe Aroni ndi wakulamala, nee asafunika kufendedzera guwa ya ntsembe toera kupereka kuna Yahova ntsembe zakupiswa pa moto. Thangwi iye ali na cilema, natenepa nee asafunika kufendedzera guwa ya ntsembe toera kupereka nkate wa Mulungu wace. 22 Iye anakwanisa kudya nkate wa Mulungu wace pakati pa pinthu+ pyakucena kakamwe, na pinthu+ pyakucena. 23 Mbwenye iye nee asafunika kufika cifupi na nguwo ikulu,*+ nee kufendedzera guwa ya ntsembe,+ thangwi iye ali na cilema. Iye nee asafunika kupswipisa mbuto yanga yakucena;+ ine ndine Yahova, ule anakucenesani.’”+

24 Natenepa, Mose apanga Aroni na anace pabodzi na Aizraeli onsene.

22 Yahova alonga pontho na Mose: 2 “Panga Aroni na anace kuti iwo asafunika kucita mphole-mphole pakutsalakana pinthu pyakucena pinapereka Aizraeli ninga ntsembe kuna ine,+ pontho akhonde kupswipisa dzina+ yanga yakucena. Ine ndine Yahova. 3 Apange kuti: ‘Ndzidzi onsene, munthu wa dzindza yanu angakhala wakukhonda cena, mbafendedzera pinthu pyakucena pinapereka Aizraeli ninga ntsembe kuna Yahova, anadzaphiwa pamaso panga.+ Ine ndine Yahova. 4 Munthu wa dzindza ya Aroni angakhala na utenda wa matanya+ peno wakubuluka utosi+ kumaso, nee asafunika kudya pinthu pyakucena mpaka angakhala wakucena,+ nee ule adakhuya munthu adakhala wakukhonda cena thangwi yakuphata munthu+ wakufa, nee mamuna adabuluka+ umuna, 5 nee munthu adakhuya pinyama+ pingʼono pyakukhonda cena piri pa dziko yapantsi, peno ule adakhuya munthu wakukhonda cena adakhuya cinthu cakukhonda cena.+ 6 Munthu angakhuya cinthu ninga ceneci, anadzakhala wakukhonda cena mpaka dzuwa ingadoka, pontho nee asafunika kudya cinthu cakucena, mbwenye asafunika kusamba.+ 7 Dzuwa ingadoka, iye anadzakhala wakucena, buluka penepo anakwanisa kudya pinthu pyakucena, thangwi ndi cakudya+ cace. 8 Kusiyapo pyenepi, iye nee asafunika kudya nyama ya cinyama cidagumaniwa cakufa peno cidalumwa na cikala, thangwi anakhala wakukhonda cena.+ Ine ndine Yahova.

9 “‘Iwo asafunika kubvera mitemo yanga, thangwi angakhonda kuibvera anadzakhala na madawo, mbafa thangwi yakupswipisa pinthu pyakucena. Ine ndine Yahova, ule anaacenesa.

10 “‘Munthu adakhonda kutawiriswa nee asafunika kudya pinthu pyakucena.+ Pontho, mulendo wa dziko inango adafikira panyumba ya nyantsembe, peno nyabasa wace nee asafunika kudya pinthu pyakucena. 11 Mbwenye khala nyantsembe ali na bitcu adagula iye na kobiri yace, bitcu unoyu anakwanisa kudya pinthu pyakucena. Mabitcu adabalwa panyumba ya nyantsembe anakwanisambo kudya cakudya+ ca nyantsembe. 12 Mwana wankazi wa nyantsembe angasembwa na mamuna wakuti nee ndi nyantsembe, mwana unoyu nee asafunika kudya pinthu pyakucena pinaperekwa. 13 Mbwenye mwana wa nyantsembe angaferwa na mamunace, peno angakhondwa, khala nee ali na mwana, angabwerera kunyumba kwa pai wace ninga pikhali iye ntsikana, anakwanisa kudya cakudya+ ca pai wace; mbwenye nee munthu mʼbodzi wakukhonda tawiriswa asafunika kucidya.

14 “‘Munthu angadodomeka mbadya pinthu pyakucena, iye asafunika abwerese ntsembe inango, mbathimiza khundu yacixanu ya ntsembe ineyi, mbapipereka kuna nyantsembe.+ 15 Natenepa, anyantsembe nee asafunika kupswipisa pinthu pyakucena pinapereka Aizraeli kuna Yahova,+ 16 mbacitisa kuti mbumba itcunyuswe thangwi yakukhala na mulando wa kudya pinthu pyakucena; ine ndine Yahova, ule anaacenesa.’”

17 Yahova apitiriza kulonga na Mose: 18 “Panga Aroni na anace pabodzi na Aizraeli onsene kuti: ‘Munthu wa dzindza ya Izraeli peno munthu wakudza anakhala mu dziko ya Izraeli angapereka kuna Yahova ntsembe yakupiswa+ toera kucita pidapikira iye* peno angapereka muoni,+ 19 iye asafunika apereke cifuyo cimuna+ cakusowa cilema: Ngʼombe, mwanabira, peno mbuzi, toera Mulungu akomerwe na iye. 20 Lekani kupereka pinyama pyakuti piri na cilema,+ thangwi nee pinakuphedzani toera Mulungu akomerwe na imwe.

21 “‘Munthu angapereka kuna Yahova ntsembe toera kupereka takhuta+ toera kucita pidapikira iye* peno kupereka muoni, isafunika ikhale ya cinyama cakusowa cilema: Ngʼombe, bira peno mbuzi, toera Mulungu akomerwe na iye. Cinyama ceneci nee cisafunika kukhala na cilema. 22 Lekani kupereka ninga ntsembe cinyama cakuti nkhabe kuona, cidakhumuka mwendo, ciri na cironda, ciri na mberewere, cakuti ciri na mphere peno cikulukuta. Lekani kupereka pinyama ninga pyenepi kuna Yahova, nee kupipereka pa guwa ninga ntsembe kuna Yahova. 23 Khala ngʼombe peno bira iri na mwendo ubodzi wakulapha kakamwe peno wakubvira maningi, unakwanisa kuipereka ninga muoni, mbwenye ungaipereka toera kucita pidapikira iwe, Mulungu nee anaitawira. 24 Lekani kupereka kuna Yahova cinyama cakuti macende ace alamala, aswiwa, akhwedzulwa peno agwandwa, pontho lekani kupereka pinyama pyenepi ninga ntsembe mu dziko yanu. 25 Pontho munthu wakudza angabweresa pinyama ninga pyenepi, lekani kupipereka ninga nkate wa Mulungu wanu, thangwi pinyama pyenepi ndi pyakulamala, pontho piri na cilema. Natenepa Mulungu nee anadzapitawira.’”

26 Yahova alonga pontho na Mose: 27 “Ngʼombe, bira peno mbuzi ingabala, mwanace anapitiriza kukhala na mai wace mu ntsiku zinomwe,+ mbwenye kutomera pa ntsiku yacisere, munakwanisa kumpereka ninga ntsembe yakutawirika, ninga ntsembe yakupiswa pa moto inaperekwa kuna Yahova. 28 Ngʼombe peno bira, lekani kuipha pa ntsiku ibodzi ene+ na mwanace.

29 “Mungapereka kuna Yahova+ ntsembe toera kupereka takhuta, musafunika kuipereka munjira yakutawirika toera iye akomerwe na imwe. 30 Isafunika kudyiwa pa ntsiku ibodzi ene. Nee isafunika kusala mpaka mangwana mwace.+ Ine ndine Yahova.

31 “Musafunika kukoya mitemo yanga mbamuibvera.+ Ine ndine Yahova. 32 Lekani kupswipisa dzina+ yanga yakucena, mbwenye musafunika kundicenesa pakati pa Aizraeli.+ Ine ndine Yahova, ule anakucenasani.+ 33 Ine ndine ule adakubulusani mu dziko ya Ejitu, toera ndipangize kuti ndine Mulungu wanu.+ Ine ndine Yahova.”

23 Yahova apitiriza kulonga na Mose: 2 “Panga Aizraeli kuti: ‘Maphwando+ anakupangani Yahova toera muacite,+ ndi ntsiku zakucena zakuti anthu onsene asafunika asonkhane pabodzi pene. Awa ndi maphwando anafunika imwe kucita:

3 “‘Munakwanisa kuphata basa mu ntsiku zitanthatu, mbwenye pa ntsiku yacinomwe ndi Sabudu toera kupuma,+ ineyi ndi ntsiku toera kulambira Mulungu. Nee musafunika kuphata basa pa ntsiku ineyi. Inadzakhala Sabudu ya Yahova mu mbuto zonsene zinakhala+ imwe.

4 “‘Awa ndi maphwando a Yahova, akuti ndi misonkhano inafunika imwe kudziwisa pa midzidzi idakhazikiswa toera kulambira Mulungu: 5 Pa ntsiku 14 ya mwezi+ wakutoma, mu ndzidzi unabira dzuwa* munadzacitira Yahova phwando ya Paskwa.+

6 “‘Pa ntsiku 15 ya mwezi unoyu, munadzacitira Yahova+ Phwando ya Mikate Yakusowa Pyakutupisa. Mu ntsiku zinomwe musafunika kudya mikate+ yakusowa pyakutupisa. 7 Pa ntsiku yakutoma munadzasonkhana+ toera kulambira Mulungu. Nee musafunika kuphata basa yakuwanga pa ntsiku ineyi. 8 Mbwenye mu ntsiku zinomwe musafunika kupereka kuna Yahova ntsembe zakupiswa pa moto. Pa ntsiku yacinomwe munadzacita nsonkhano toera kulambira Mulungu. Nee musafunika kuphata basa yakuwanga pa ntsiku ineyi.’”

9 Yahova apitiriza kulonga na Mose: 10 “Panga Aizraeli kuti: ‘Mungapita mu dziko inafuna kukupasani ine, mbamubvuna mbeu mu dziko ineyi, musafunika kubweresa pangʼono kuna nyantsembe+ mbeu zakutoma+ kutokota. 11 Mbeu zenezi nyantsembe anaziendesa kutsogolo mbazibweza nduli pamaso pa Yahova toera iye akomerwe na imwe. Nyantsembe asafunika kucita pyenepi ingapita ntsiku ya Sabudu. 12 Pa ntsiku inafuna imwe kupereka mbeu toera ziendeswe kutsogolo mbazibwezwa nduli, musafunika kupereka kuna Yahova mwanabira wakusowa cilema, wa caka cibodzi, ninga ntsembe yakupiswa. 13 Ntsembe ya pyakudya inafuna kuperekwa pabodzi pene na mwanabira inadzakhala ya malitru manai na hafu a ufa wadidi kakamwe wakubvungazwa na mafuta a azeti, ninga ntsembe yakupiswa pa moto inaperekwa kuna Yahova, yakuti ndi khwema yakununkhira.* Munadzaipereka pabodzi na ntsembe ya pyakumwa ya litru* ibodzi ya vinyu. 14 Mbamudzati kubweresa ntsembe ya Mulungu wanu, lekani kudya mbeu zipswa, nee kuzikazinga peno kucita mikate ya mbeu zenezi. Unoyu ndi ntemo wakwenda na kwenda mu mbuto zonsene zinafuna kukhala imwe.

15 “‘Musafunika kulengesa Masabudu manomwe ingapita Sabudu ya ntsiku idapereka+ imwe mbeu zidaendeswa kutsogolo mbazibwezwa nduli. Asafunika akhale masumana amumphu. 16 Musafunika kulengesa ntsiku 50+ mpaka pa ntsiku ya Sabudu yacinomwe, penepo munadzapereka pontho kuna Yahova+ ntsembe inango ya pyakudya. 17 Mungabuluka kunyumba kwanu, musafunika mubwerese mikate miwiri ninga ntsembe inafuna kuendeswa kutsogolo mbibwezwa nduli, inadzakhala ya malitru manai na hafu a ufa wadidi kakamwe. Mikate ineyi isafunika kuikhwa pyakutupisa;+ mbamuipereka kuna Yahova+ ninga ntsembe ya misapo yakutoma kutokota. 18 Pabodzi na mikate ineyi munadzapereka anamabira anomwe akusowa cilema, a caka cibodzi, kuphatanizambo mwanangʼombe na mabira+ mawiri. Pinadzakhala ntsembe zakupiswa zinaperekwa kuna Yahova pabodzi na ntsembe za pyakudya na ntsembe za pyakumwa, ninga ntsembe zakupiswa pa moto za khwema yakununkhira pamaso pa* Yahova. 19 Musafunika kupereka mwanambuzi ninga ntsembe+ toera kulekererwa madawo na anamabira awiri* a caka cibodzi ninga ntsembe+ toera kupereka takhuta.* 20 Nyantsembe anadzaendesa kutsogolo mbabweza nduli anamabira awiri pabodzi na mikate ya mbeu zakutoma kutokota ninga ntsembe pamaso pa Yahova. Pisafunika pikhale pinthu pyakucena pamaso pa Yahova, pontho pinadzakhala pya nyantsembe.+ 21 Pa ntsiku ineyi, munadzadziwisa+ nsonkhano ukulu toera mulambire Mulungu. Nee musafunika kuphata basa yakuwanga pa ntsiku ineyi. Unoyu ndi ntemo wakwenda na kwenda mʼmadzindza mwanu, mu mbuto zonsene zinakhala imwe.

22 “‘Mungabvuna mʼmunda mwanu, lekani kubvuna pyonsene kunkhomo kwa munda, pontho nee musafunika kubvuna+ mphendzi za mʼmunda mwanu. Musafunika kupisiyira ntcerengi+ na munthu wakudza+ anakhala pakati panu. Ine ndine Yahova Mulungu wanu.’”

23 Yahova alonga na Mose: 24 “Panga Aizraeli kuti: ‘Pa ntsiku yakutoma ya mwezi wacinomwe musafunika kupuma mbamukhonda kucita cinthu, ntsiku ineyi inadzadziwiswa na kulizwa+ kwa tuluka toera mukumbuke kuti ndi ntsiku yakusonkhana toera kulambira Mulungu. 25 Nee musafunika kuphata basa yakuwanga pa ntsiku ineyi, pontho munadzapereka kuna Yahova ntsembe yakupiswa pa moto.’”

26 Yahova alonga pontho na Mose: 27 “Mbwenye ntsiku yacikhumi ya mwezi unoyu wacinomwe inadzakhala Ntsiku Yakucenesa Madawo.*+ Musafunika kucita nsonkhano ukulu toera kulambira Mulungu; mbamupangiza kuti muli+ akutsukwala, pontho musafunika kupereka kuna Yahova ntsembe yakupiswa pa moto. 28 Nee musafunika kuphata basa pa ntsiku ineyi, thangwi ineyi ndi ntsiku yakucenesa madawo, toera nyantsembe aphembe kulekererwa kwa madawo+ anu pamaso pa Yahova Mulungu wanu. 29 Munthu angakhonda kupangiza kuti ali wakutsukwala pa ntsiku ineyi, anadzaphiwa pakati pa mbumba.+ 30 Pontho ine ndinadzapha pakati pa mbumba munthu onsene anafuna kuphata basa pa ntsiku ineyi. 31 Nee musafunika kuphata basa pa ntsiku ineyi. Unoyu ndi ntemo wakwenda na kwenda mʼmadzindza mwanu, mu mbuto zonsene zinakhala imwe. 32 Ineyi ndi Sabudu toera imwe mupume; pontho munadzapagiza kuti muli+ akutsukwala kutomera ncidodo ca ntsiku yacipfemba ya mwezi unoyu. Musafunika kukumbuka Sabudu yanu kutomera ncidodo ca ntsiku ineyi mpaka ncidodo ca mangwana mwace.”

33 Yahova apitiriza kulonga na Mose: 34 “Panga Aizraeli kuti: ‘Pa ntsiku 15 ya mwezi wacinomwe munadzacitira Yahova+ Phwando ya Misasa* mu ntsiku zinomwe. 35 Pa ntsiku yakutoma munadzasonkhana toera kulambira Mulungu, pontho nee musafunika kuphata basa yakuwanga pa ntsiku ineyi. 36 Mu ntsiku zinomwe musafunika kupereka kuna Yahova ntsembe zakupiswa pa moto. Pa ntsiku yacisere musafunika kusonkhana+ toera kulambira Mulungu; pontho musafunika kupereka kuna Yahova ntsembe zakupiswa pa moto. Unoyu unadzakhala nsonkhano ukulu.* Nee musafunika kuphata basa yakuwanga pa ntsiku ineyi.

37 “‘Awa ndi maphwando+ a Yahova, akuti ndi misonkhano+ inafunika imwe kudziwisa pa midzidzi idakhazikiswa toera kulambira Mulungu, mbamupereka kuna Yahova ntsembe yakupiswa pa moto: Ntsembe yakupiswa,+ ntsembe ya pyakudya+ inaperekwa pabodzi pene na ntsembe ya cinyama, ntsembe ya pyakumwa+ mwakubverana na pinafunika kuperekwa pa ntsiku. 38 Kusiyapo ntsembe zenezi, musafunika kupitiriza kupereka ntsembe za mʼMasabudu+ a Yahova, miyoni+ yanu, ntsembe+ za mapikiro anu na ntsembe+ zinapereka imwe mwakufuna kwanu. Ntsembe zenezi musafunika kuzipereka kuna Yahova. 39 Mbwenye pa ntsiku 15 ya mwezi wacinomwe, mungamala kubvuna, musafunika kucita phwando ya Yahova mu ntsiku zinomwe.+ Pa ntsiku yakutoma musafunika kupuma, pontho pa ntsiku yacisere munadzapuma.+ 40 Pa ntsiku yakutoma munadzakwata misapo yadidi kakamwe, masamba a micindu,+ nthawi za masamba mazinji na miti inakhala mʼmagombe, mbamutsandzaya+ mu ntsiku zinomwe+ pamaso pa Yahova Mulungu wanu. 41 Munadzacitira Yahova phwando ineyi mu ntsiku zinomwe pa caka.+ Musafunika kuicita pa mwezi wacinomwe. Unoyu ndi ntemo wakwenda na kwenda mʼmadzindza mwanu. 42 Musafunika kukhala mʼmisasa mu ntsiku zinomwe.+ Aizraeli onsene asafunika akhale mʼmisasa,* 43 toera ntsogolo, anthu a mʼmadzindza mwanu adziwe+ kuti Aizraeli ndaakhazika mʼmisasa* mu ndzidzi udaabulusa ine mu dziko ya Ejitu.+ Ine ndine Yahova Mulungu wanu.’”

44 Natenepa Mose apanga Aizraeli maphwando onsene anafunika kucitirwa Yahova mʼmidzidzi idakhazikiswa.

24 Yahova apitiriza kulonga na Mose: 2 “Panga Aizraeli toera abwerese mafuta adidi a azeti toera kugasa nawo nyale, toera zipitirize+ kugaka. 3 Ntsiku zonsene namasiku Aroni anadzagasa nyale kutsogolo kwa nguwo ikulu dhuzi na Bokosi ya Cibverano nkati mwa nsasa wa nsonkhano. Pontho asafunika kucita pyonsene toera nyale zipitirize kugaka pamaso pa Yahova mpaka kuca kunja. Unoyu ndi ntemo wakwenda na kwenda mʼmadzindza mwanu. 4 Iye asafunika kucita pyonsene toera ndzidzi onsene nyale ziri pa cakuikhira nyale+ ca ouro yadidi zikhale mwadidi pamaso pa Yahova.

5 “Unadzakwata ufa wadidi mbucita mikate 12 yakulandana na mphete. Nkate ubodzi na ubodzi usafunika ucitwe na ufa wadidi wakukwana malitru manai na hafu.* 6 Unadzaiikha pa mbuto ziwiri padzulu pameza ya ouro yadidi kakamwe pamaso pa Yahova.+ Unaiikha mwakusandzikirana,+ uku mitanthatu, uku mitanthatu. 7 Unadzaikha mafuta a olibhano adidi kakamwe pa mikate yakusandzikirana, mikate ineyi inadzaimirira ntsembe yonsene ya mikate, inadzakhala* ntsembe yakupiswa+ pamaso pa Yahova. 8 Ntsiku zonsene za Sabudu, iye asafunika kuikha mikate ineyi pamaso pa Yahova.+ Unoyu ndi ntemo wakwenda na kwenda kuna Aizraeli. 9 Mikate ineyi inadzakhala ya Aroni na anace,+ pontho asafunika kuidyera pa mbuto yakucena,+ thangwi ndi khundu yakucena kakamwe idapaswa iwo pakati pa ntsembe zakupiswa pa moto pamaso pa Yahova.”

10 Pakati pa Aizraeli akhalipo mamuna mʼbodzi wakuti mai wace akhali Muizraeli, mbwenye pai wace akhali Muejitu.+ Iye amenyana na Muizraeli pa misasa. 11 Mamuna unoyu atoma kutikana dzina ya Mulungu mbaipwaza.*+ Natenepa, iwo aenda naye kuna Mose.+ Mai wace mamuna unoyu akhacemerwa Selomiti, mwana wa Dhebhri, wa dzindza ya Dhani. 12 Iwo anfungira, mbadikhira+ kubva pikhafuna kulonga Yahova.

13 Penepo Yahova apanga Mose: 14 “Ule adapwaza dzina yanga, bulukani naye kunja kwa misasa, pontho onsene adamubva asafunika aikhe manja awo pa nsolo pace, buluka penepo mbumba yonsene isafunika kumponyera+ miyala. 15 Pontho usafunika kupanga Aizraeli kuti: ‘Munthu angapwaza Mulungu, anadzatawirira madawo ace. 16 Mwakukhonda penula, ule adatikana dzina ya Yahova asafunika kuphiwa.+ Mbumba yonsene isafunika kumponyera miyala. Khala ndi mulendo anakhala pakati panu peno ndi Muizraeli, asafunika kuphiwa thangwi yakutikana dzina ya Mulungu.

17 “‘Ule anapha munthu ndzace* asafunika aphiwembo.+ 18 Munthu angapha cifuyo ca ndzace, asafunika kubwezera cifuyo cinango, khala apha cifuyo asafunika kubwezera cifuyo.* 19 Munthu angaphekesa ndzace, iye asafunika kucitirwa pire pidacitira iye+ ndzace. 20 Khala iye anʼkhumula gogodo, asafunika akhumulwembo gogodo yace; khala amuswa diso, asafunika aswiwembo diso yace; khala anʼkhutca dzino, asafunika akhutcwembo dzino yace; pire pidacitira iye+ ndzace, asafunika acitirwembo pibodzi pyene. 21 Munthu angapha cifuyo ca ndzace asafunika acibwezere,+ mbwenye ule anapha munthu asafunika aphiwembo.+

22 “‘Ntemo ubodzi ene unadzaphatisirwa kuna imwe, mwakukhonda tsalakana khala ndi munthu wakudza anakhala pakati panu peno ndi Muizraeli,+ thangwi ine ndine Yahova Mulungu wanu.’”

23 Penepo Mose alonga na Aizraeli, pontho iwo akwata munthu adalonga mafala akutikana, aenda naye kunja mbamponyera+ miyala. Natenepa, Aizraeli acita pidalonga Yahova kuna Mose.

25 Yahova alonga pontho na Mose Paphiri ya Sinai: 2 “Panga Aizraeli kuti: ‘Mungapita mu dziko inafuna kukupasani+ ine, munadzakoya Sabudu ya caka ca Yahova+ mbamukhonda kubzwala mbeu mu dziko. 3 Mu pyaka pitanthatu musafunika kubzwala minda yanu, kusadzula nthawi za miti yanu ya mauva, mbamubvuna mbeu+ zanu. 4 Mbwenye pa caka cacinomwe dziko isafunika kupuma, cinadzakhala caka ca Sabudu kuna Yahova. Imwe nee musafunika kubzwala mbeu mʼminda yanu, nee kusadzula nthawi za miti yanu ya mauva. 5 Lekani kubvuna mbeu zidamera zokha pakati pa mbeu zidagwa pikhabvuna imwe caka cidamala, nee kutcoda mauva adabala mʼmiti ya mauva idakhonda imwe kusadzula. Mu caka ceneci dziko isafunika kupuma mʼmabasa onsene. 6 Mbwenye munakwanisa kudya pyakudya pinafuna kubala mu dziko ineyi pa caka ca Sabudu. Iwe, bitcu wako wamamuna na wankazi, nyabasa wako na anthu akudza anakhala pakati panu munakwanisa kudya misapo ineyi. 7 Pifuyo na pinyama pya ntsanga piri mu dziko yanu pinakwanisambo kudya misapo ineyi. Pinthu pyonsene pinafuna kubuluka mu dziko yanu munakwanisa kupidya.

8 “‘Munadzalengesa masabudu manomwe a pyaka, munadzalengesa kanomwe pyaka pinomwe, ntsiku zonsene za masabudu manomwe a pyaka zinadzakhala pyaka 49. 9 Buluka penepo, pa ntsiku yacikhumi ya mwezi wacinomwe munadzaliza tuluka mwakugaluza. Pa Ntsiku Yakuceneswa Madawo*+ musafunika kuliza tuluka mbibveka mu dziko yanu yonsene. 10 Caka 50 ndi caka cakucena pamaso pa Mulungu, pontho munadzadziwisa ufulu mu dziko yanu, kuna anthu+ onsene anakhala mu dziko yanu. Ceneci cinadzakhala Caka Caufulu kuna imwe, mʼbodzi na mʼbodzi wa imwe anadzabwerera ku mbuto idatambira iye ninga unthaka wace, mʼbodzi na mʼbodzi asafunika abwerere kuna abale ace.+ 11 Caka 50 cinadzakhala Caka Caufulu kuna imwe. Nee munadzabzwala, nee kubvuna mbeu zidamera zokha pakati pa mbeu zidagwa pikhabvuna imwe, pontho nee munadzabulusa mauva adabala mʼmiti ya mauva+ idakhonda imwe kusadzula. 12 Thangwi ceneci ndi Caka Caufulu. Cisafunika cikhale caka cakucena kuna imwe. Basi ene munadya pinafuna kubuluka pyokha+ mu dziko yanu.

13 “‘Mu Caka ceneci Caufulu, mʼbodzi na mʼbodzi asafunika abwerere ku mbuto idatambira iye ninga unthaka+ wace. 14 Ungagulisira ndzako cinthu peno ungagula cinthu kuna iye, lekani kupondererana unango na ndzace.+ 15 Cinthu cinafuna kugula iwe kuna ndzako cisafunika cibverane na pyaka pidapita pakumala kwa Caka Caufulu; pinafuna kukugulisira iye pisafunika pibverane na pyaka pidasala toera kupitiriza kubvuna mbeu.+ 16 Khala pasala pyaka pizinji anakwanisa kuthimizira ntengo wakugula nawo, mbwenye khala nee pyasala pyaka pizinji asafunika kubweza ntengo, thangwi iye ali kukugulisira pyakudya pinafuna kubvuna iwe mu pyaka pidasala. 17 Nee mʼbodzi pakati panu asafunika kuponderera ndzace,+ pontho musafunika kugopa Mulungu+ wanu, thangwi ine ndine Yahova Mulungu+ wanu. 18 Mungabvera mitemo yanga mbamukoya matongero anga munadzakhala akutsidzikizika mu dziko+ ineyi. 19 Dziko ineyi inadzabala misapo+ mizinji, imwe munadzadya mbamukhuta, pontho munadzakhala akutsidzikizika+ mwenemu.

20 “‘Panango munabvundzika kuti: “Tingakhonda kubzwala mbeu zathu mbatikhonda kubvuna,+ tinadzadyanji pa caka cacinomwe?” 21 Dziwani kuti ine ndinadzakupasani nkhombo pa caka cacitanthatu, mbamubvuna pinthu pizinji mu dziko yanu pyakuti pinakwana toera kupidya mu pyaka pitatu.+ 22 Pa caka cacisere imwe munabzwala mbeu zanu, mbwenye munadya pidabvuna imwe mu pyaka pyanduli mpaka mu caka cacipfemba. Munadya pidabvuna imwe kale mpaka kutokota kwa mbeu zipswa.

23 “‘Munda nee usafunika kugulisirwa munthu mbukhala wace kwenda na kwenda,+ thangwi dziko ndi yanga.+ Pontho thangwi kwa ine,+ imwe ndimwe alendo na anthu akudza. 24 Mu dziko yanu yonsene, ule anagulisa mbuto anadzakhala na ufulu wakuiombola.

25 “‘Mʼbale wako angatcerenga, mbagulisa khundu ya mbuto ya unthaka wace, nyakuombola wakuti ndi mʼbale wace, asafunika amʼphedze mbagula pontho cinthu cidagulisa+ mʼbale wace. 26 Khala munthu nkhabe nyakuombola, angadzakhala na kobiri yakukwana toera kuombola nayo mbuto yace, 27 iye asafunika alengese ntengo wa pyaka pidapita kubulukira pa caka cidagulisa iye mbuto ineyi, mbapereka kobiri ya pyaka pidasala kuna ule adagulisira iye. Natenepa iye anakwanisa kubwerera ku mbuto+ yace.

28 “‘Mbwenye angasowa kobiri yakuombola nayo, mbuto idagulisa iye inapitiriza na ule adaigula mpaka pa Caka+ Caufulu; iye anadzaibwezerwa pa Caka Caufulu, natenepa iye anadzabwerera ku mbuto+ yace.

29 “‘Munthu angagulisa nyumba yace mu nzinda wakuti uli na mpanda, kubulukira pa ntsiku idagulisa iye nyumba ineyi, anapitiriza kukhala na ufulu nkati mwa caka cibodzi toera kuiombola; iye anamala caka cibodzi mbali na ufulu wakuiombola.+ 30 Mbwenye ingakhonda kuombolwa nkati mwa caka cibodzi, nyumba yakuti iri mu nzinda udazungulirwa na mpanda inadzakhala ya ule adaigula, mbikhala yace na ya adzukulu ace kwenda na kwenda. Pa Caka Caufulu, nee isafunika kubwezwa kuna mwanaciro. 31 Mbwenye nyumba yakuti iri mu nzinda wakusowa mpanda isafunika kuoniwa ninga munda wa mu dziko yanu. Ufulu wakuombola nyumba ineyi usafunika kupitiriza, pontho pa Caka Caufulu isafunika kubwezwa kuna mwanaciro.

32 “‘Nyumba za Alevi zinagumanika mʼmizinda+ yawo, ndzidzi onsene Alevi anadzakhala na ufulu wakuombola nyumba zenezi. 33 Mulevi angakhonda kuombola nyumba idagulisa iye, nyumba idagulisa iye mu nzinda wawo inadzabwezwa pa Caka Caufulu,+ thangwi nyumba ziri mʼmizinda ya Alevi ndi unthaka wawo pakati pa Aizraeli.+ 34 Kusiyapo pyenepi, iwo nee asafunika kugulisa mbuto+ inadyesa iwo pifuyo, thangwi mbuto zenezi ndi zawo kwenda na kwenda.

35 “‘Khala mʼbale wanu anakhala pakati panu akutcerenga mbacimwana kutsalakana umaso wace, musafunika kumʼphedza+ ninga munaphedza imwe mulendo anakhala pakati panu peno munthu wakudza,+ toera apitirize kukhala na umaso pakati panu. 36 Lekani kumʼphemba juru peno kuwina pizinji kuna iye.+ Musafunika kugopa Mulungu+ wanu. Mʼbale wanu anapitiriza kukhala na umaso pakati panu. 37 Lekani kunfiyarisi kobiri mbamudikhira kubwezerwa na juru+ peno kumpasa cakudya toera kuwina pinthu kuna iye. 38 Ine ndine Yahova Mulungu wanu, ule adakubulusani mu dziko ya Ejitu+ toera kukupasani dziko ya Kanani, toera ndipangize kuti ndine Mulungu+ wanu.

39 “‘Khala mʼbale wako anakhala pakati panu akutcerenga mbagulisika kuna iwe,+ nee usafunika kunkakamiza toera kuphata basa+ ninga bitcu. 40 Iye asafunika atsalakanwe ninga nyabasa+ peno munthu wakudza. Asafunika akuphatire basa mpaka pa Caka Caufulu. 41 Angamala, iye asafunika abuluke pabodzi na anace mbabwerera kuna abale ace. Iye asafunika abwerere ku mbuto idatambira ambuyace+ ninga unthaka wawo. 42 Thangwi iwo ndi mabitcu anga adabulusa ine mu dziko ya Ejitu.+ Nee asafunika kuguliswa ninga munaguliswa bitcu. 43 Leka kumbvuya;*+ usafunika kugopa Mulungu+ wako. 44 Bitcu wako wamamuna peno wankazi usafunika kunsankhula pakati pa anthu a madzindza ali nʼkhundu mwanu. Pakati pa anthu anewa unakwanisa kugula bitcu wamamuna peno wankazi. 45 Kusiyapo pyenepi, imwe munakwanisa kugula mabitcu pakati pa ana a anthu akudza anakhala pakati panu,+ munakwanisa kuagula kuna iwo na anawo adabalwa mu dziko yanu, natenepa iwo anadzakhala anu. 46 Munakwanisa kuapereka kuna ananu ninga unthaka wawo, toera akhale awo kwenda na kwenda. Munakwanisa kuaphatisira ninga anyabasa, mbwenye lekani kubvuya*+ abale anu akuti ndi a dzindza ya Izraeli.

47 “‘Mbwenye mulendo peno munthu wakudza anakhala pakati panu angapfuma, mʼbale wako wakuti ndi mʼbodzi wa Aizraeli angakhala wakutcerenga mbagulisika kuna mulendo peno munthu wakudza anakhala pakati panu peno mʼbale wace mulendo anakhala pakati panu, 48 iye anapitiriza kukhala na ufulu wakuombolwa. Mʼbodzi wa abale ace anakwanisa kumuombola,+ 49 mʼbale wa pai wace, peno mwana wa mʼbale wa pai wace anakwanisa kumuombola, pontho khala iye ali na mʼbale unango peno munthu wa dzindza yace anakwanisa kumuombola.

“‘Peno, iye angapfuma anakwanisa kuomboleka+ ekhene. 50 Asafunika alengese pabodzi pene na munthu adanʼgula kutomera pa caka cidagulisika iye mpaka pa Caka+ Caufulu, pontho kobiri idagulwa na iye inadzabverana na kunjipa kwa pyaka.+ Ntengo wa ntsiku za basa yace mu ndzidzi unoyu, unadzalengeswa mwakubverana na ntengo unatambira nyabasa.+ 51 Khala pyasala pyaka pizinji, asafunika kupereka kobiri mwakubverana na pyaka pidasala. 52 Mbwenye khala nee pyasala pyaka pizinji toera kufika pa Caka Caufulu, iye asafunika alengese pyaka pidasala, mbapereka kobiri yakuomboleka nayo mwakubverana na pyaka pyenepi. 53 Pyaka pyonsene iye asafunika aphatire basa ule adanʼgula, pontho imwe nee musafunika kutawirisa kuti iye ambvuye.* + 54 Mbwenye angacimwana kuomboleka ekhene munjira ineyi, iye anadzakhala wakusudzuka toera kubuluka pa Caka Caufulu,+ iye pabodzi na anace.

55 “‘Thangwi Aizraeli ndi mabitcu anga. Iwo ndi mabitcu anga adabulusa ine mu dziko ya Ejitu.+ Ine ndine Yahova Mulungu wanu.

26 “‘Lekani kucita+ alungu akusowa basa,* pontho lekani kucita madzimunthu,+ peno maguwa aulambiri. Mu dziko yanu, lekani kuikha miyala yakusemwa+ toera kuilambira;+ thangwi ine ndine Yahova Mulungu wanu. 2 Musafunika kukoya masabudu anga, mbamulemedza* mbuto yanga yakucena. Ine ndine Yahova.

3 “‘Mungapitiriza kutoweza mitemo yanga, pontho mungapitiriza kukoya matongero anga mbamuabvera,+ 4 ndinadzakubvumbisirani madzi pa ndzidzi+ wakuthema. Mataka anadzakupasani pyakudya,+ miti mbibala misapo. 5 Ndzidzi wanu wakububuda mbeu unapitiriza mpaka mu ndzidzi unabulusa imwe mauva mʼmunda, mbamupitiriza kubulusa mauva mpaka mu ndzidzi wakubzwala; munadzadya mbamukhuta, pontho munadzakhala akutsidzikizika mu dziko+ yanu. 6 Ndinadzacitisa kuti dziko+ yanu ikhale muntendere, imwe munadzagona mbamukhonda kugopa+ cinthu; mu dziko yanu ndinadzathawisa pinyama pyakugopswa, pontho nkhabe anafuna kupita na supada mu dziko yanu toera kumenya nkhondo. 7 Imwe munadzatowerera anyamalwa anu, mbamuakunda na supada. 8 Axanu pakati panu anadzatowerera anthu 100, anthu 100 pakati panu anadzatowerera 10.000, pontho anyamalwa anu anadzagwa patsogolo panu na supada.+

9 “‘Ndinadzakupasani nkhombo,* munadzabala ana mbandikunjipisani,+ pontho ndinadzakoya cibverano canga na imwe.+ 10 Mu ndzidzi unapitiriza imwe kudya pyakudya pidabvuna imwe caka cidamala, munadzafunika kubulusa pyenepi ncikwa toera kuikha pidabvuna imwe caka cino. 11 Ine ndinadzaikha tabhernakulo yanga pakati+ panu, pontho ine nee ndinadzakukhondani.* 12 Ine ndinadzakhala pakati panu, mbandikhala Mulungu+ wanu, pontho imwe munadzakhala mbumba+ yanga. 13 Ine ndine Yahova Mulungu wanu, adakubulusani mu dziko ya Ejitu toera mukhonde kupitiriza kukhala mabitcu awo. Ine ndakhumula goli ya ubitcu wanu toera mufambe ninga anthu aufulu.

14 “‘Mbwenye mungakhonda kundibvera,* mbamukhonda kukoya mitemo+ ineyi yonsene, 15 mungakhonda miyambo+ yanga, pontho mungapwaza matongero anga mbamukhonda kubvera mitemo yanga, imwe mungaswa cibverano+ canga, 16 ine ndinadzacita ipi kuna imwe: Ndinadzakutcunyusani na utenda wa cokolo, kuferuka mwakupiringana midida, pyenepi pinacitisa maso anu kukhonda kuona mwadidi, mbamukhala akusowa mphambvu. Munabzwala papezi mbeu zanu, thangwi anyamalwa anu ndiwo anafuna kudya pidabzwala+ imwe. 17 Ine ndinadzakukhondani,* mbamukundwa na anyamalwa anu.+ Ale anakuidani anadzakuthabusani,+ pontho imwe munadzathawa, maseze nkhabepo munthu anakutowererani.+

18 “‘Mbwenye mungapitiriza kukhonda kundibvera,* ine ndinadzakutcunyusani kanomwe thangwi ya madawo anu. 19 Ine ndinadzamalisa kudzikuza kwanu, ndinadzaumisa thambo yanu mbikhala ninga utale,*+ mataka anu mbakhala ninga nkuwa.* 20 Munadzaphata basa papezi, thangwi mʼminda mwanu nee munabuluka pyakudya,+ pontho miti ya mu dziko yanu nee inadzabala misapo.

21 “‘Mbwenye mungapitiriza kucita pinthu pinakhonda funa ine, mbamukhonda kundibvera, ndinadzakutcunyusani pontho kanomwe mwakubverana na madawo anu. 22 Ndinadzatumiza pinyama pya ntsanga pakati panu,+ ipyo pinadzapha ananu,+ mbapimalisa pifuyo pyanu. Anadzasala anthu angasi basi pakati panu, pontho miseu yanu inadzakhala yakusowa anthu.+

23 “‘Mwakukhonda tsalakana pinthu pyenepi, mungakhonda tawira kusandikwa+ na ine, mbamupitiriza kucita pinthu pinakhonda funa ine, 24 penepo ine ndinadzacitambo pinakhonda funa imwe. Ine ndinadzakutcunyusani kanomwe mwakubverana na madawo anu. 25 Ndinacitisa kuti anyamalwa anu abwere na masupada toera kukutcunyusani thangwi yakuswa kwanu cibverano+ canga. Mungathawira mʼmizinda yanu, ndinadzatumiza mautenda pakati+ panu, pontho imwe munadzaperekwa mʼmanja mwa nyamalwa wanu.+ 26 Ndingamala kufudza mbuto inakoyera imwe pyakudya+ pyanu, akazi khumi anadzaotca nkate mu forno ibodzi ene, buluka penepo anadzacita kuupima+ toera kukugawirani khundu yanu; imwe munadzadya, mbwenye nee munakhuta.+

27 “‘Mbwenye mungakhonda kundibvera, mbamupitiriza kucita pinakhonda funa ine, 28 ndinadzathimiza ukali wanga kuna imwe,+ mbandikutcunyusani kanomwe thangwi ya madawo anu. 29 Natenepa, imwe munadzadya manungo a ananu amuna na akazi.+ 30 Ndinadzafudza mbuto+ zanu zaulambiri, mbandigwisa maguwa anu anaperekera imwe insenso; pontho ndinadzagumanya manungo anu akufa padzulu pa madzimunthu+ anu akunyanyasa* adamala kufudzwa, ine ndinadzaipirwa+ na imwe mbandikusiyani. 31 Ndinadzafudzisa mizinda yanu na supada,+ mbuto zanu zaulambiri mbazisala zakusowa anthu; pontho ine nee ndinadzabva khwema yakununkhira kwa ntsembe zanu. 32 Ine ndinadzafudza+ dziko yanu, pontho anyamalwa anu anakhala mwenemu anadzaona pyenepi+ mwakudzumatirwa. 33 Ndinadzakubalalisani pakati pa anthu a madzindza+ anango, pontho ndinadzacitisa kuti anyamalwa anu+ abwere kudzamenya nkhondo na imwe na supada. Dziko yanu inadzasala yakusowa anthu,+ pontho mizinda yanu inadzafudzwa.

34 “‘Pa ndzidzi unoyu, dziko inadzalipa masabudu ayo ingadzakhala yakusowa anthu, mu ndzidzi unafuna imwe kukhala ku dziko ya anyamalwa anu. Mu ndzidzi unoyu, dziko inadzapuma,* thangwi iyo isafunika kulipa Masabudu+ ayo. 35 Dziko inadzapuma mu ntsiku zonsene zinafuna iyo kukhala yakusowa anthu, thangwi iyo nee yapuma mʼmasabudu anu mu ndzidzi ukakhala imwe mwenemu.

36 “‘Mbwenye ale anafuna kupulumuka,+ ndinadzacitisa kuti mitima yawo ikhale yakusowa cidikhiro mu dziko ya anyamalwa awo. Iwo anadzathawa angabva kupheperuka kwa tsamba mu ndzidzi unapheperuswa iyo na mphepo, anadzathawa ninga akuthawa munthu anaatowerera na supada, maseze nkhabepo munthu anaatowerera.+ 37 Iwo anadzadhimana unango na ndzace ninga ale anathawa munthu ali na supada, maseze nkhabepo munthu anaatowerera. Imwe nee munakwanisa kuthimbana na anyamalwa anu.+ 38 Imwe munadzafera kuna anthu a madzindza+ anango, imwe munadzafudzwa mu dziko ya anyamalwa anu. 39 Ale anafuna kupulumuka pakati panu anadzasiyiwa okhene toera athabuke* mʼmadziko a anyamalwa anu+ thangwi ya madawo anu. Inde, iwo anadzathabuka* thangwi ya madawo a ababawo.+ 40 Penepo iwo anadzabweka madawo+ awo na kukhonda kukhulupirika kwa ambuyawo, mbatawira kuti iwo nee akhala akukhulupirika kuna ine thangwi yakucita pinthu pinakhonda funa ine,+ 41 inembo mbandicita pinthu pinakhonda funa iwo,+ pidaaendesa ine ku dziko ya anyamalwa awo.+

“‘Natenepa, panango mitima yawo yakuuma inadzacepeseka,+ mbathabuka thangwi ya madawo awo. 42 Ndinadzakumbuka cibverano cidacita ine na Yakobe,+ cibverano cidacita ine na Izaki+ na cibverano cidacita ine na Abhrahamu;+ pontho ndinadzakumbuka dziko idapikira ine toera kukupasani. 43 Pa ndzidzi unoyu unafuna iwo kudzasiya dziko yawo, dziko inadzalipa masabudu+ ayo, mbikhala yakusowa anthu iwo angakhonda kukhala mwenemu. Iwo anadzathabuka thangwi ya madawo awo, thangwi iwo akhonda matongero anga, mbapwaza mitemo+ yanga. 44 Mbwenye mwakukhonda tsalakana pyenepi, mu ndzidzi unafuna iwo kukhala mu dziko ya anyamalwa awo, ine cipo ndinadzaakhonda+ gomugomu, nee kuipirwa nawo mpaka kuafudza onsene, thangwi pyenepi mbapidaswa cibverano+ canga cidacita ine na iwo, thangwi ine ndine Yahova Mulungu wawo. 45 Toera kuaphedza, ine ndinadzakumbuka cibverano cidacita ine na ambuyawo+ adabulusa ine mu dziko ya Ejitu, mu ndzidzi wakuti anthu a madzindza+ anango akhaona pyenepi, toera ndipangize kuti ine ndine Mulungu wawo. Ine ndine Yahova.’”

46 Ineyi ndi mitemo, matongero na miyambo idapereka Yahova kuna Aizraeli Paphiri ya Sinai kubulukira kuna Mose.+

27 Yahova apitiriza kulonga na Mose: 2 “Panga Aizraeli kuti ‘munthu angacita pikiro+ toera kupereka munthu ndzace kuna Yahova mwakubverana na ntengo udakhazikiswa, 3 ntengo udakhazikiswa kuna mamuna wa pyaka 20 mpaka 60 ndi masiklo* 50 a parata, mwakubverana na nʼdida unaphatisirwa pa mbuto yakucena. 4 Mbwenye khala ndi nkazi, ntengo udakhazikiswa ndi masiklo 30. 5 Khala ndi munthu wa pyaka 5 mpaka 20, ntengo udakhazikiswa kuna mamuna ndi masiklo 20 nkazi masiklo 10. 6 Khala ndi mwana wa mwezi ubodzi mpaka pyaka pixanu pyakubalwa, ntengo udakhazikiswa kuna mamuna ndi masiklo maxanu a parata, kuna nkazi ndi masiklo matatu.

7 “‘Khala ndi munthu wakupiringana pyaka 60, ntengo udakhazikiswa kuna mamuna ndi masiklo 15 kuna nkazi ndi 10. 8 Mbwenye khala munthu adacita pikiro nee anakwanisa kupereka ntengo+ udakhazikiswa thangwi iye ndi wakutcerenga kakamwe, asafunika alimire pamaso pa nyantsembe, penepo nyantsembe anadzakhazikisa ntengo unafunika iye kupereka. Nyantsembe anadzakhazikisa ntengo mwakubverana na pinakwanisa iye kupereka.+

9 “‘Khala munthu apikira kupereka cinyama cakuthema toera kuperekwa ninga ntsembe kuna Yahova, cinyama cinafuna kuperekwa kuna Yahova cinadzakhala cinthu cakucena. 10 Nee asafunika kubweresa cinyama cakusiyana peno kucinja cinyama cadidi na cakuipa peno cakuipa na cadidi. Mbwenye khala iye asafuna kucinja cinyama ceneci na cinango, cinyama cakutoma na cinafuna kucinja iye pinadzakhala pyakucena. 11 Khala ndi cinyama+ cakukhonda cena cakuti nee cathema toera kuperekwa ninga ntsembe kuna Yahova, asafunika kucilimirisa pamaso pa nyantsembe. 12 Buluka penepo nyantsembe anadzakhazikisa ntengo wa cinyama ceneci, mwakubverana na makhaliro aco.* Ntengo wa cinyama ceneci unadzakhala ule unafuna kulonga nyantsembe. 13 Mbwenye khala iye asafuna kuciombola, asafunika apereke ntengo udakhazikiswa, mbathimizira khundu yacixanu ya ntengo+ unoyu.

14 “‘Munthu angapereka nyumba yace kuna Yahova ninga cinthu cakucena, nyantsembe anadzakhazikisa ntengo wa nyumba ineyi mwakubverana na makhaliro ayo.* Ntengo+ wa nyumba ineyi unadzakhala ule unafuna kulonga nyantsembe. 15 Mbwenye khala munthu adapereka nyumba yace asafuna aiombole, asafunika apereke ntengo udakhazikiswa, mbathimizira khundu yacixanu ya ntengo unoyu, natenepa nyumba ineyi inapitiriza kukhala yace.

16 “‘Munthu angapereka kuna Yahova khundu ibodzi ya munda wace, ntengo wace unadzakhazikiswa mwakubverana na kunjipa kwa mbeu inafunika toera kubzwala munda unoyu: Khala ndi mbeu ya sevadha yakuti inakwana mu combo ca malitru 220,* ntengo wace unadzakhala masiklo 50 a parata. 17 Angapereka munda wace pa Caka Caufulu,+ ntengo udakhazikiswa nee usafunika kucinjwa. 18 Angapereka munda wace pakumala kwa Caka Caufulu, nyantsembe anadzakhazikisa ntengo+ wakucepa mwakubverana na pyaka pidasala toera kufika pa Caka cinango Caufulu. 19 Mbwenye khala munthu adapereka munda unoyu asafuna auombole, asafunika apereke ntengo udakhazikiswa, mbathimizira khundu yacixanu ya ntengo unoyu, natenepa munda unoyu unapitiriza kukhala wace. 20 Iye angakhonda kuombola munda wace, ungagulisirwa munthu unango, nee asafunikabve kuuombola. 21 Munda unoyu ungabwezwa pa Caka Caufulu, unadzakhala cinthu cakucena kuna Yahova, ninga munda udaperekwa kuna Iye. Munda unoyu unadzakhala wa anyantsembe.+

22 “‘Munthu angapereka kuna Yahova munda udagula iye wakuti nee ndi mbuto idatambira iye ninga unthaka+ wace, 23 nyantsembe anadzakhazikisa ntengo wace mwakubverana na pyaka pidasala toera kufika Caka Caufulu, iye anadzapereka pa ntsiku+ ineyi ntengo udalonga nyantsembe. Kobiri ineyi ndi yakucena pamaso pa Yahova. 24 Pa Caka Caufulu munda unoyu unadzabwezwa kuna ule adanʼgulisira, wakuti ndi mwanaciro+ munda unoyu.

25 “‘Mitengo yonsene isafunika ikhazikiswe mwakubverana na nʼdida unaphatisirwa pa mbuto yakucena. Siklo ibodzi isafunika ikhale midida 20 mingʼono.*

26 “‘Mbwenye nee mʼbodzi asafunika kupikira toera kupereka cinyama cakutoma kubalwa, thangwi cinyama cakutoma kubalwa ndi ca Yahova.+ Mwakukhonda tsalakana khala ndi ngʼombe peno bira, cinyama ceneci ndi ca Yahova.+ 27 Munthu anakwanisa kuombola mwana wakutoma wa cinyama cakukhonda cena. Khala iye asafuna kuciombola, asafunika apereke ntengo udakhazikiswa mbathimizira khundu yacixanu ya ntengo unoyu.+ Mbwenye angakhonda kuciombola, cinadzaguliswa mwakubverana na ntengo udakhazikiswa.

28 “‘Munthu angapereka cinthu toera cikhale ca Yahova kwenda na kwenda, nee cisafunika kuguliswa peno kuombolwa, mwakukhonda tsalakana khala apereka munthu ndzace, cinyama peno munda wace. Pinthu pyonsene pinaperekwa ndi pyakucena kakamwe kuna Yahova.+ 29 Kusiyapo pyenepi, munthu adatongwa kuphiwa nee asafunika kuombolwa.+ Mwakukhonda penula,+ iye asafunika kuphiwa.

30 “‘Khundu+ yacikhumi ya pinthu pyonsene pinabuluka mu dziko ineyi ndi pya Yahova, mwakukhonda tsalakana khala ndi pinthu pinabvunwa mʼmunda peno misapo ya miti. Ndi cinthu cakucena kuna Yahova. 31 Khala munthu asafuna kuombola khundu yacikhumi ya cinthu cace, asafunika apereke ntengo wa cinthu ceneci mbathimizira khundu yacixanu ya ntengo unoyu. 32 Ngʼombe peno bira yacikhumi isafunika kuperekwa kuna Yahova. Nkumbizi angalengesa pinyama pinapita na pantsi pa mpswimbo yace, cinyama cacikhumi cisafunika kuperekwa kuna Mulungu. 33 Iye nee asafunika kucidinga khala ndi cadidi peno cakuipa, pontho nee asafunika kucicinja. Mbwenye khala iye acicinja, cinyama cakutoma na cire cidacinjana na iye pinadzakhala pyakucena.+ Nee pisafunika kuombolwa.’”

34 Ineyi ndi mitemo idapereka Yahova kuna Mose Paphiri ya Sinai+ toera aipereke kuna Aizraeli.