OZEYA
1 Awa ndi mafala adalonga Yahova kuna Ozeya* mwana wa Bheeri mu ntsiku za Uziya,+ Yotamu,+ Ahazi+ na Ezekiya+ akuti akhali amambo a ku Yuda+ na mu ntsiku za Yerobhoamu+ mwana wa Yowasi,+ mambo wa Izraeli. 2 Yahova pidatoma iye kuphatisira Ozeya toera kulonga mphangwa zace kuna mbumba, Yahova apanga Ozeya: “Ndoko kasembe nkazi wakuti anadzacita ulukwali,* pontho iwe unadzakhala na ana thangwi yaulukwali* wace, pontho anthu a dziko ineyi anadzasiya kutowezera Yahova thangwi yaulukwali.”*+
3 Natenepa, iye aenda kasemba Gomeri mwana wa Dhibhlaimu. Gomeri akhala na mimba mbamʼbalira mwana wamamuna.
4 Penepo Yahova ampanga: “Mpase dzina yakuti Yezrieli,* thangwi mwakukhonda dembuka ine ndinadzatcunyusa ana a* Jeu+ thangwi ya kuphana kudaoneka ku Yezrieli, pontho ndinadzamalisa umambo wa Izraeli.+ 5 Pa ntsiku ineyi, ine ndinadzakhumula uta wa Izraeli nʼGowa ya Yezrieli.”
6 Gomeri akhala pontho na mimba mbabala mwana wankazi. Penepo Mulungu apanga Ozeya: “Mpase dzina yakuti Lo-Ruwama;* ine nee ndinadzabverabve ntsisi+ dzindza* ya Izraeli, thangwi mwakukhonda penula ine ndinadzaathamangisa.+ 7 Mbwenye ndinadzabvera ntsisi dzindza* ya Yuda,+ pontho ine Yahova Mulungu wawo+ ndinadzaapulumusa; toera kuapulumusa, ine nee ndinadzaphatisira uta, nee supada, nee nkhondo, nee makavalo peno anyamakavalo.”+
8 Lo-Ruwama pidasiya iye kuyamwa, Gomeri akhala pontho na mimba mbabala mwana wamamuna. 9 Penepo Mulungu alonga: “Mpase dzina yakuti Lo-Ami,* thangwi imwe nee ndimwe mbumba yanga, pontho ine nee ndinadzakhala Mulungu wanu.
10 “Pontho kunjipa kwa dzindza ya Izraeli kunadzakhala ninga matcetca a nʼkhundu mwa bara, akuti nkhabe kupimika peno kulengeseka.+ Pontho pa mbuto idapangwa iwo kuti: ‘Imwe nee ndimwe mbumba yanga,’+ iwo anadzapangwa: ‘Imwe ndimwe ana a Mulungu wa mʼmaso.’+ 11 Anthu a ku Yuda na anthu a ku Izraeli anadzagumanyikana mbakhala akubverana,+ pontho anadzasankhula mʼbodzi toera akhale ntsogoleri mbabuluka mu dziko ineyi, thangwi ntsiku ineyi inadzakhala yakufunika kakamwe kuna Yezrieli.+
2 “Pangani abale anu kuti: ‘Imwe ndimwe mbumba yanga!’*+
Pontho pangani anakazi anu kuti: ‘Imwe ndimwe akazi akubverwa ntsisi!’*+
2 Pambizirani mai wanu; mpambizireni,
Thangwi iye si nkazanga tayu,+ pontho ine sine mamunace tayu.
Iye asafunika kusiya ulukwali* unacita iye,
Pontho nee asafunikabve kucita upombo,
3 Angakhonda kucita pyenepi, ndinadzanʼdula nguwo mbandinsiya cipezipezi ninga ntsiku idabalwa iye,
Ndinadzancitisa kukhala thando,
Ndinadzancitisa kukhala mbuto yakusowa madzi,
Pontho ndinadzancitisa kuti afe na nyota.
4 Pontho nee ndinadzabvera ntsisi anace,
Thangwi iwo ndi ana aulukwali.*
Ule adaabala acita pinthu pyakupasa manyadzo,+ thangwi iye alonga:
6 Natenepa ndinadzafunga njira yace na mpanda wa minga;
Pontho ine ndinadzamanga mpanda wa miyala
Toera iye akhonde kuona njira yace.
7 Iye anadzathamangira amunace, mbwenye nee anadzaaphata;+
Iye anadzaasaka, mbwenye nee anadzaaona.
Buluka penepo iye analonga: ‘Ndinabwerera pyanga kuna mamunanga wakutoma,+
Thangwi ndzidzi uneule ine ndikhali mwadidi kupiringana cincino.’+
8 Iye nee adzindikira kuti ndine akhampasa tirigu,+ vinyu ipswa na mafuta,
Pontho ndine adampasa parata izinji,
Na ouro, ire idaphatisira iwo toera kulambira Bhaale.+
9 ‘Natenepa, ine ndinadzabwera mbandinkwatira tirigu yanga mu ndzidzi wakubvuna,+
Ndinadzampokosera vinyu yanga yakutapira mu ndzidzi wakucita vinyu,
Pontho ndinampokosera nguwo zanga zinabvala iye toera kubisa ucipezipezi wace.
10 Cincino ine ndinanʼdula nguwo toera amuna ananfuna amuone pezi,
Pontho nkhabe mamuna anafuna kumuombola mʼmanja mwanga.+
11 Ine ndinadzamalisa kutsandzaya kwace konsene,
Ndinadzamalisa maphwando ace,+ maphwando ace akubalwa kwa mwezi, maphwando ace akukumbuka Masabudu na maphwando ace anango onsene.
12 Ine ndinadzafudza miti yace ya mauva na miti yace ya misambvu, ire ikhalonga iye kuti:
“Iyi ndi miti idalipwa ine, idapaswa ine na amuna anandifuna”;
Mbwenye ine ndinadzacitisa miti ineyi kukhala nsitu ukulu,
Pontho iyo inadzafudzwa na pinyama pya ntsanga.
13 Ine ndinadzantcunyusa thangwi ya ntsiku zidapereka iye ntsembe kuna madzimunthu a Bhaale,+
Mu ndzidzi ukhabvala iye mphete zace na pyakubalikisa napyo mbatowera amuna akhanfuna,
Mbwenye ine akhadandiduwala,’+ alonga Yahova.
14 ‘Natenepa ine ndinadzantundusa,
Mbandimuendesa kuthando,
Pontho ndinadzalonga mafala akuti anadzakhuya ntima wace.
15 Buluka penepo, ine ndinadzamʼbwezera miti yace ya mauva,+
Pontho Gowa ya Akori+ inadzakhala ninga nsuwo ukulu wa cidikhiro kuna iye;
Iye anadzanditawira ninga pikhacita iye mu ndzidzi ukhali iye ntsikana,
Ninga ntsiku idabuluka iye mu dziko ya Ejitu.’+
16 Yahova alonga: ‘Pa ntsiku ineyi,
Iwe unadzandicemera Mamunanga, pontho nee unadzandicemerabve Mbuyanga.’*
17 ‘Ine ndinadzabulusa pamulomo pace madzina a madzimunthu a Bhaale,+
Pontho madzina awo nee anadzakumbukirwabve.+
18 Pa ntsiku ineyi ndinadzacita cibverano na pinyama pya ntsanga thangwi ya iwo,+
Pontho ndinadzacita cibverano na mbalame zakudzulu na pinyama pyakufamba na mimba;+
Ine ndinadzamalisa mauta, masupada na nkhondo mu dziko ineyi,+
Pontho ine ndinadzacitisa mbumba yanga kukhala yakutsidzikizika.+
19 Ine ndinadzakukwata toera ukhale mankhadzi wanga kwenda na kwenda;
Pontho ine ndinadzakukwata toera ukhale mankhadzi wanga mwakubverana na udidi na ulungami wanga,
Na ufuni wanga wakukhonda mala, pontho mwakubverana na ntsisi zanga.+
20 Ine ndinadzakukwata ninga mankhadzi wanga mwakukhulupirika,
Ine ndine Yahova, pontho mwandimomwene iwe unadzandidziwa.’+
21 ‘Pa ntsiku ineyi,’ alonga Yahova,
‘Ine ndinadzacita pidaphemba kudzulu,
Pontho kudzulu kunadzacita pidaphemba dziko yapantsi;+
22 Dziko yapantsi inadzacita pinaphemba mbeu, pinaphemba vinyu yakutapira na pinaphemba mafuta;
23 Ine ndinadzabzwala Yezrieli pa dziko yapantsi ninga mbeu zanga,+
Ine ndinadzabvera ntsisi Yezrieli wakuti nee akhabverwa ntsisi;*
Ine ndinadzapanga ale akuti nee ndi a mbumba yanga* kuti: “Imwe ndimwe mbumba yanga,”+
Pontho iwo anadzalonga: “Imwe ndimwe Mulungu wathu.”’”+
3 Buluka penepo Yahova andipanga: “Funa pontho nkazi ule wakuti asafuniwa na amuna anango, pontho wakuti asacita upombo,+ ninga pinafuna Yahova mbumba ya Izraeli+ yakuti isatumikira alungu anango,+ mbifuna mikate ya mauva akuuma.”*
2 Natenepa ndakwata kobiri 15 za parata na Omeri ibodzi* na hafu ya sevadha, mbandigula nkazi unoyu. 3 Buluka penepo ine ndampanga: “Iwe unadzakhala na ine mu ntsiku zizinji. Nee usafunika kucita ulukwali,* pontho nee usafunika kupita mʼmabonde na mamuna unango, pontho ine nee ndinadzapitambo mʼmabonde na iwe.”
4 Thangwi mu ndzidzi uzinji* mbumba ya Izraeli nee inadzakhala na mambo,+ nee ntsogoleri, nee kupereka ntsembe, nee mizati yakulambirwa, nee efodhi,+ nee madzimunthu a aterafi.*+ 5 Buluka penepo, kunkhomo kwa ntsiku zakumalisa mbumba ya Izraeli inadzabwera pontho mbisaka Yahova Mulungu wawo+ na Dhavidhi mambo wawo,+ pontho iwo anaenda kuna Yahova thangwi yakunʼgopa mbaphemba udidi wace.+
4 Bveserani mafala a Yahova imwe mbumba ya Izraeli,
Yahova anadzatonga mbumba inakhala mu dziko ineyi+
Thangwi mu dziko ineyi nkhabemo undimomwene, nee ufuni wakukhonda mala, nee udziwisi wa Mulungu.+
2 Mu dziko ineyi kudumbira papezi, kulonga uthambi,+ kuphana,+
Kuba na kucita upombo+ pyamwazika,
Pontho ndzidzi onsene anthu asacucisa ciropa ca anango.+
3 Na thangwi ineyi, dziko ineyi inadzakhala paciliro,+
Pontho anthu onsene a mu dziko ineyi anadzakhala akusowa mphambvu;
Pinyama pya ntsanga, mbalame zakudzulu,
Ngakhale nyama za mʼbara pinadzamala.
4 “Natenepa, mbaleke kuoneka munthu anafuna kupokanya peno kusandika,+
Thangwi mbumba yako ndi ninga ale anapokanya nyantsembe.+
5 Imwe munadzagwegweduka namasikati dzuwa mbikagaka,
Pontho mprofeta anadzagwegweduka pabodzi na imwe, ninga ndi masiku.
Pontho ine ndinadzafudza mai wanu.
6 Mbumba yanga inadzaphiwa thangwi iyo nkhabe kundidziwa.
Nakuti imwe mwakhonda kupfundza pya ine,+
Inembo ndinakukhondani toera mutumikire ninga anyantsembe anga;
Pontho, nakuti imwe mwaduwala mwambo wanga,* ine Mulungu wanu,+
Ine ndinadzaduwalambo ananu.
7 Mu ndzidzi ukhathimizirika iwo, ndi mu ndzidzi ukhathimiza iwo kundidawira,+
Ine ndinadzacinja kundilemedza kwawo mbakukhala manyadzo.*
8 Iwo asadya thangwi ya madawo a mbumba yanga,
Pontho iwo asafuna kuti mbumba ipitirize kudawa.
9 Pinafuna kudzacitikira mbumba pinadzakhala sawasawa na pinafuna kudzacitikirambo anyantsembe;
Ine ndinadzaatonga thangwi ya makhaliro awo,
Pontho ndinadzaatcunyusa mwakubverana na pinacita iwo.+
10 Iwo anadzadya, mbwenye nee anadzakhuta.+
Iwo anadzacita kakamwe pyaulukwali,* mbwenye nee anadzakhala na ana,+
Thangwi iwo asiya kubvera Yahova.
12 Mbumba yanga isasaka ciphedzo kuna madzimunthu akucitwa na miti,
Iwo asacita pinapangwa iwo na ndodo* yawo;
Cifuno cawo cakucita ulukwali* caacitisa kupeuka,
Pontho thangwi ya ulukwali* wawo asakhonda kubvera Mulungu wawo.
13 Iwo asapereka ntsembe zawo padzulu pa mapiri,+
Pontho asapisa ntsembe zawo pa nthunda,
Pantsi pa miti mikulu ya masamba akubithimira, pa miti ya estoraki na pantsi pa miti yonsene mikulu,+
Thangwi mithundzi ya miti ineyi ndi yadidi.
Na thangwi ineyi, anace akazi asacita ulukwali,*
Pontho akwenyace asacita upombo.
14 Ine nee ndinadzatcunyusa ananu akazi thangwi ya ulukwali* wawo,
Pontho nee ndinadzatcunyusa akwenyanu thangwi ya upombo wawo.
Amuna asabuluka na maputa,
Pontho asaenda kapereka ntsembe na maputa mu templo;
Mbumba ineyi yakukhonda kubvesesa pinthu+ inadzafudzwa.
Lekani kuenda ku Jiligale+ nee ku Bheti-Aveni,+
Lekani kudumbira mbamulonga: ‘Tiri kudumbira mu dzina ya Yahova Mulungu wa mʼmaso!’+
16 Izraeli akhala wakukhonda bvera ninga ngʼombe ya upoka.+
Kodi cincino Yahova anadzaakumbiza ninga bira ingʼono pa mbuto inadyeserwa pifuyo?*
17 Efraimu ali kulambira madzimunthu.+
Nsiyeni ekhene!
Atongi awo asakomerwa kakamwe kucita pinthu pyakupasa manyadzo.+
19 Iye akwekwetwa na maphapido a mphepo,
Pontho iwo anadzapasika manyadzo thangwi ya ntsembe zawo.”
5 “Bveserani ipi, imwe anyantsembe,+
Bveserani, imwe dzindza ya Izraeli,
Bveserani, imwe anthu a panyumba ya mambo,
Thangwi anafuna kutongwa ndimwe;
Thangwi imwe mwakhala ninga nsampha ku Mispa
Pontho mwakhala ninga ukonde udatandwa ku Tabhori.+
3 Efraimu ndisandziwa,
Izraeli nee anakwanisa kundibisalira.
4 Pinacita iwo nee pisaatawirisa kubwerera kuna Mulungu wawo,
Thangwi iwo asafuna kakamwe kucita ulukwali,*+
Pontho iwo nkhabe dzindikira kuti ine Yahova, ndine Mulungu wawo.
5 Kugaya kwa Izraeli kusapereka umboni wakuipa thangwi ya iye;+
Izraeli na Efraimu agwegweduka thangwi ya madawo awo,
Pontho Yuda agwegweduka pabodzi na iwo.+
6 Iwo akwata mabira awo na ngʼombe zawo mbaenda kasaka Yahova,
Mbwenye nee anʼgumana.
Thangwi iye akhali kutali na iwo.+
Nkati mwa mwezi ubodzi, iwo anadzafudzwa na pyonsene piri na iwo.*
8 Lizani nyanga+ ku Jibheya, tuluka ku Rama!+
Khuwani ku Bheti-Aveni+ ninga ale anaenda kunkhondo, ife tikubwera nduli mwako iwe Bhenjamini!
9 Iwe Efraimu, anthu anadzagopa angaona pinthu pinafuna kukucitikira pa ntsiku inafuna iwe kutcunyuswa.+
Ine ndapanga madzindza a Izraeli pinthu pinafuna kuacitikira.
10 Atsogoleri a ku Yuda, akhala ninga ale anacinja madire.+
Ine ndinadzaakhutulira ukali wanga ninga madzi.
11 Efraimu apondererwa kakamwe, pontho iye athema kuthabuswa munjira ineyi,
Thangwi iye akhali dzololo toera kutowerera anyamalwa ace.+
12 Natenepa ndakhala ninga ucenje kuna Efraimu,
Pontho kuna Yuda, ndakhala ninga cinthu cakubvundisa.
13 Efraimu pidaona iye utenda wace, pontho Yuda pidaona iye cironda cace,
Efraimu aenda kuna Asirya+ mbatumizira mphangwa mambo wankulu.
Mbwenye iye nee akwanisa kukuwangisani,
Pontho iye nee akwanisa kuwangisa cironda canu.
14 Ine ndinadzakhala ninga nkhalamu ingʼono kuna Efraimu,
Pontho ninga nkhalamu yamphambvu kuna dzindza ya Yuda.
Ine ndinadzaakhwedzula-khwedzula mbandienda pyanga;+
Ine ndinadzaakwata, pontho nkhabepo anafuna kudzaaombola.+
15 Ine ndinadzabwerera pa mbuto yanga mpaka iwo athabuke thangwi ya madawo awo,
Buluka penepo, iwo anadzasaka ciphedzo canga.+
Iwo angakhala pa nyatwa, anadzandisaka.”+
6 “Bwerani, tendeni tibwerere kuna Yahova,
Thangwi iye atikhwedzula-khwedzula,+ mbwenye anatiwangisa.
Iye atiphekesa, mbwenye anapyangirira pironda pyathu.
2 Pakupita ntsiku ziwiri, iye anaticitisa pontho kukhala mʼmaso.
Pa ntsiku yacitatu, iye anadzatilamusa,
Mbatikhala na umaso pamaso pace.
3 Ife tinadzadziwa Yahova, tinadzawangisira toera kundziwa mwadidi.
Kubwera kwace ndi kwakunyindirika ninga pinacita dzuwa namacibese;
Iye anadzabwera kuna ife ninga madzi akubvumba,
Ninga madzi a caka akuti asabvumba mbatotesa kakamwe mataka.”
4 “Ndinacitanji na iwe Efraimu?
Ndinacitanji na iwe Yuda?
Thangwi ufuni wako ndi ninga nkhungwi namacibese,
Ninga bume yakuti mwakukhonda dembuka isamala.
5 Natenepa, ndinadzaphatisira aprofeta toera kuamalisa;+
Ine ndinadzaapha na mafala a pamulomo panga.+
Pontho kutongwa kwanu kunadzayetimira ninga ceza.+
6 Thangwi ine ndisakomerwa na ufuni wakukhonda mala,* tayu ntsembe,
Pontho ndisakomerwa na udziwisi wa Mulungu, tayu na ntsembe zonsene zakupiswa.+
7 Mbwenye iwo ninga anthu akudawa, nee atowezera cibverano.+
Iwo andisandukira pa mbuto ineyi.
9 Nsoka wa anyantsembe wakhala ninga nsoka wa mapanga anadikhira anthu panjira.
Iwo asapha anthu panjira inaenda ku Sikemu,+
Thangwi makhaliro awo ndi akupasa manyadzo.
10 Ine ndaona pinthu pyakuipa kakamwe pinacita dzindza ya Izraeli.
11 Imwe mbumba ya Yuda, wakhazikiswa ndzidzi ninga ndzidzi wakubvuna toera imwe mugumanywe,
Anthu a mbumba yanga adaendeswa ku ubitcu ine ndinadzaagumanya toera abwerere ku dziko yawo.”+
7 “Mu ndzidzi unawangisa ine Izraeli,
Madodo a Efraimu asapangizika pakweca,+
Kuphatanizambo uipi wa Samariya.+
Thangwi iwo asacita pinthu pyakuipa;+
Mambava asapita mʼmanyumba, pontho misoka ya mapanga isatapata pinthu kunja.+
2 Mbwenye iwo nkhabe dziwa kuti ine ndinakumbuka uipi onsene unacita iwo.+
Cincino pinthu pinacita iwo pyaazungulira;
Pinthu pinacita iwo nee pyabisika pamaso panga.
3 Iwo asatsandzayisa mambo na macitiro awo akuipa,
Pontho asatsandzayisa ana a mambo na uthambi wawo.
4 Onsene ndi anyakucita upombo,
Iwo ndi ninga forno idagaswa moto na nyakucita mikate,
Wakuti mu ndzidzi unamunya iye ufa mpaka mu ndzidzi unatupa iwo nee asafunikabve kusesera moto.
5 Pa ntsiku ya phwando ya mambo wathu, ana a mambo abva kupha
Iwo aipirwa thangwi ya vinyu.+
Mambo acita uxamwali na anyakusingirira.
6 Mitima yawo isagaka ninga forno.*
Masiku amumphu nyakuphika mikate akugona pyace;
Namacibese, forno isapisa ninga moto wakugaka.
7 Iwo onsene ndi akupisa ninga forno,
Pontho iwo asafudza atongi* awo.
8 Efraimu abvungazikana na anthu a madzindza anango.+
Efraimu ndi ninga nkate wakubulungika wakuti watokota khundu ibodzi basi.
9 Alendo amalisa mphambvu zace,+ mbwenye iye nee adzindikira pyenepi.
Pontho tsisi yace yonsene yacinja kudza imbvi, mbwenye iye nee adzindikira pyenepi.
10 Kugaya kwa Izraeli kusapereka umboni wakuipa thangwi ya iye,+
Mbwenye iwo nee abwerera kuna Yahova Mulungu wawo,+
Maseze iwo acita pinthu pyenepi, nee ansaka.
11 Efraimu ndi ninga nkhangaiwa yakukupwa, yakusowa ndzeru.+
Iwo aenda kasaka ciphedzo ku Ejitu,+ pontho aenda kasaka ciphedzo ku Asirya.+
12 Mbuto yonsene inapita na iwo, ndinadzaateyera ukonde wanga.
Ndinadzaaphata ninga mbalame zakudzulu.
Ndinadzaalanga mwakubverana na cenjezo idatambira iwo.*+
13 Dzedze kuna iwo, thangwi andithawa!
Iwo mbafudzwe thangwi nee abvera mitemo yanga!
Ndikhali dzololo toera kuaombola, mbwenye iwo alonga uthambi thangwi ya ine.+
14 Iwo nee aphemba ciphedzo canga na ntima wawo onsene,+
Maseze iwo akhadungunya mʼmatalimba mwawo.
Iwo acekeka-cekeka toera kuphemba cakudya na vinyu yakutapira;
Iwo andisandukira.
15 Maseze ndaasandika mbandiapasa mphambvu,
Iwo andisandukira mbanyerezera kundicita pyakuipa.
16 Iwo acinja, mbwenye tayu toera kupita mu ulambiri wandimomwene;
Iwo nee akhali akunyindirika, akhali ninga uta wakudhamba.+
Atsogoleri awo anadzaphiwa na supada, thangwi yakuphatisira mwakuipa malirimi awo.
Na thangwi ineyi, anthu anakhala ku Ejitu anadzaasingirira.”+
8 “Liza nyanga!+
Nyamalwa wakulandana na capungu akubwera kudzamenyana na mbumba* ya Yahova,+
Thangwi iwo nee atowezera cibverano canga,+ pontho nee abvera mwambo wanga.+
2 Iwo asandilirira mbalonga: ‘Mulungu wathu, ife Aizraeli tisakudziwani!’+
3 Aizraeli akhonda pinthu pyadidi.+
Anyamalwa mbaatowerere.
4 Iwo akhazikisa amambo, mbwenye tayu mwakubverana na ine.
Iwo akhazikisa atsogoleri, mbwenye nee ndaatawirisa.
Iwo aphatisira parata yawo na ouro yawo toera kucita madzimunthu,+
Pontho pyenepi pinaacitisa toera afudzwe.+
5 Iwe Samariya, ine ndakhonda dzimunthu yako ya mwanangʼombe.+
Ine ndaipirwa kakamwe na anthu ako.+
Mpaka lini iwo anacimwana kuceneseka ku madawo awo?
6 Dzimunthu ineyi yabulukira ku Izraeli.
Yacitwa na mesiri, pontho iyo nee ndi Mulungu wandimomwene;
Dzimunthu ya mwanangʼombe ya ku Samariya inadzanyedzwa-nyedzwa.
7 Thangwi pinacita iwo nkhubzwala mphepo,
Natenepa iwo anadzabvuna condzi.+
Tirigu iri mʼminda mwawo nee isabala,+
Pontho ire idabala nee isakhala na ufa.
Khala pana tirigu idabala, anthu a dziko inango asaikhudyula.+
8 Dzindza ya Izraeli inadzakhudyulwa.+
Iwo anadzakhala pakati pa anthu a madzindza anango,+
Ninga combo cakukhonda funika.
9 Iwo akwira mpaka ku Asirya,+ ninga buru ya ntsanga inafamba yokhene.
Efraimu alipa akazi aulukwali toera kupita nawo mʼmabonde.+
10 Maseze akazi anewa aulukwali ndi a madzindza anango,
Cincino ine ndinadzaagumanyiza;
Iwo anatoma kuthabuka+ thangwi ya ntolo unafuna kuathukisa mambo na atsogoleri.
11 Efraimu athimizira maguwa mbancitisa kudawa.+
Iwo asaphatisira maguwa awo toera kucita madawo.+
12 Ine ndamulembera mitemo mizinji,
Mbwenye iwo akhaiona ninga yacilendo.+
13 Iwo apereka ntsembe ninga miyoni kuna ine, pontho iwo akhadya nyama,
Mbwenye ine Yahova nee ndakomerwa na ntsembe zenezi.+
Cincino iye anakumbuka madodo awo, mbaatcunyusa thangwi ya madawo awo.+
14 Aizraeli aduwala ule Adaacita,+ mbamanga matemplo,+
Pontho Yuda athimizira kumanga mizinda ya mipanda yakuwanga.+
Mbwenye ine ndinadzatumiza moto ku mizinda yace,
Pontho iwo unadzapisa nyumba za ndzulu za mizinda ineyi.”+
9 “Iwe Izraeli, leka tsandzaya,+
Leka kucita pinthu mwakutsandzaya ninga anthu a madzindza.
Iwe wathaukirana na Mulungu wako thangwi yaulukwali* unacita iwe.+
Iwe usakomerwa na pinapaswa iwe na nkazi waupombo mʼmbuto zonsene zakububudira pinthu.+
2 Mbwenye mbuto zakububudira pinthu na mbuto zakukamulira mauva nee zisakupasa cakudya,
Pontho vinyu yakutapira inadzakuphatisa mwala.+
3 Iwe nee unapitiriza kukhala mu dziko ya Yahova;+
Mbwenye Efraimu anadzabwerera ku Ejitu,
Pontho iwo anadzadya pinthu pyakukhonda cena ku Asirya.+
Izo zakhala ninga cakudya ca paciliro;
Ale anafuna kucidya, anakhala akukhonda cena.
Thangwi cakudya ceneci ndi cawo basi;
Ico nee cinapitiswa nʼnyumba ya Yahova.
5 Kodi imwe munadzacitanji pa ntsiku yakugumanyikana
Toera kucita phwando ya Yahova?
6 Onani! Iwo anadzathawa toera akhonde kufudzwa na anyamalwa.+
Anthu a ku Ejitu anadzaagumanyiza,+ pontho a ku Mefi anadzaaikha munthumbi.+
Uliri unadzamera pa pinthu pyawo pyakufunika pya parata,
Pontho mathendere a minga anadzakula mʼmisasa yawo.
7 Zinadzafika ntsiku zakukutcunyusa,+
Zinadzafika ntsiku zakubwezera pyakuipa,
Pontho Izraeli anadziwa pyenepi.
Mprofeta wawo anadzakhala dzemwa, pontho munthu ananyerezera iwo kuti asalonga na Mulungu anadzakhala nyansala;
Kutcunyuswa kwako kunadzakhala kukulu thangwi yakunjipa kwa madodo ako.”
8 Nyakuonera+ wa Efraimu akhali na Mulungu wanga.+
Mbwenye cincino, njira zonsene za aprofeta ace+ zakhala ninga nsampha wa anyakusaka mbalame;
Nʼnyumba mwa Mulungu wace, muli na kuidana kukulu.
9 Iwo asacita kakamwe pinthu pyakuti pinaabweresera kufudzwa, ninga pikhadacita anthu a ku Jibheya.+
Iye anadzakumbuka madodo awo, mbaatcunyusa thangwi ya madawo awo.+
10 “Izraeli ndanʼgumana ninga mauva a nʼthando.+
Pidaona ine ambuyanu, pikhali ninga ndikuona masambvu akutoma kutokota mʼmuti wa nsambvu.
Mbwenye iwo aenda kuna Bhaale wa ku Peori;+
Iwo aperekeka toera kucita cinthu ceneci cakupasa manyadzo,*+
Pontho iwo adzakhala akunyanyasa kakamwe ninga mulungu analambira iwo.
11 Mbiri ya Efraimu isamburuka mbienda kutali ninga mbalame;
Iwo nkhabe kukhala na mimba, peno kubala ana.+
12 Maseze iwo akuze ana,
Ine ndinadzaapha onsene;+
Inde, dzedze kwa iwo ine ndingabuluka pakati pawo!+
13 Ine ndaona Efraimu ninga Tiro adabzwalwa pa mbuto inadyera pinyama;+
Mbwenye cincino Efraimu asafunika kupereka anace toera aphiwe.”
14 Imwe Yahova, apaseni pinafuna imwe kuapasa;
Citisani kuti ataye mimba, pontho mabere awo akhonde buluka nkaka.
15 “Uipi wace onsene ukhali ku Jiligale,+ ndi kweneko kudatoma ine kuaida.
Ine ndinadzaathamangisa panyumba panga thangwi ya pyakuipa pinacita iwo.+
Ine cipo ndinadzaafuna pontho;+
Atsogoleri awo onsene ndi akukhonda kubva.
16 Efraimu anadzaphekeswa.+
Mitcitci yace inadzauma, pontho iye nee anadzabalabve misapo.
Maseze iye abale ana, ine ndinadzaapha.”
17 Mulungu wanga anadzaakhonda,
Thangwi iwo nee ambvera,+
Pontho iwo anadzakhala ninga anthu akuthawa pakati pa madzindza anango.+
10 “Izraeli akhala ninga muti wakubvunda wa mauva wakuti usabala misapo yace.+
Mu ndzidzi unabala iye misapo mizinji, iye asathimizirambo maguwa ace;+
Mu ndzidzi unathambaruka dziko yace, iye asabalikisambo mizati yace yakulambira.+
2 Mitima yawo ndi ya umpfakafaka;
Mbwenye cincino iwo anadzatcunyuswa.
Alipo anafuna kugomola maguwa awo mbafudza mizati yawo yakulambira.
3 Penepo iwo analonga: ‘Ife nkhabe mambo+ thangwi nee tagopa Yahova.
Maseze mbatidakhala naye mambo, kodi iye mbadacitanji kuna ife?’
4 Iwo asalonga mafala akusowa basa, asadumbira mwauthambi,+ pontho asacita cibverano;
Natenepa kusowa ulungami kwamwazika ninga pinacita nyakasongole mʼmunda wakumala kulimwa.+
5 Anthu anakhala ku Samariya anadzagopa dzimunthu ya mwanangʼombe ya ku Bheti-Aveni.+
Mbumba inadzalira dzimunthu ineyi,
Kuphatanizambo anyantsembe a mulungu wauthambi akuti akhatsandzaya na dzimunthu ineyi na mbiri ikhapaswa iyo
Thangwi dzimunthu ineyi inadzaendeswa ku ubitcu, kutali kakamwe na iwo.
6 Dzimunthu ineyi inadzaendeswa ku Asirya ninga muoni kuna mambo wankulu.+
Efraimu anadzapaswa manyadzo,
Pontho Izraeli anadzapasika manyadzo thangwi ya uphungu udatowezera iye.+
7 Mwakukhonda penula, Samariya na mambo wace anadzazambazika,*+
Ninga phindi ya nthawi padzulu pa madzi.
8 Mbuto zaulambiri za ku Bheti-Aveni+ zakuti zisacitisa Izraeli+ kudawa zinadzagomolwa.+
Mʼmaguwa mwawo munakula minga na pswepswe.+
Anthu anadzapanga mapiri makulu: ‘Tiphimbireni!’
Pontho anadzapanga mapiri mangʼono: ‘Tigwereni pyathu!’+
9 Kudawa kwa Izraeli kwatoma mu ntsiku za Jibheya.+
Kweneko iwo apitiriza kudawa.
Nkhondo ya ku Jibheya yakumenyana na anthu akukhonda kulungama nee inadzafudza onsene.
10 Ine ndingafuna ndinadzaatcunyusa.
Anthu a madzindza anango anadzagumanyikana toera kumenyana na iwo,
Mu ndzidzi unafuna iwo kumangirwa pa madawo awo mawiri.*
11 Efraimu akhali ninga ngʼombe ikazi yakupfundziswa mwadidi yakuti ikhakomerwa na basa yakububuda,
Na thangwi ineyi, nee ndaikha goli nʼkhosi mwace.
Cincino ndinacitisa munthu akwire pa nsana pa Efraimu.+
Yuda analima; Yakobe anamʼphedza toera kuzereza mataka.
12 Bzwalani mbeu mwaulungami, pontho bvunani ufuni.
Limani minda yakuti idzati kulimwa,+
Mbuciripo ndzidzi toera kusaka Yahova,+
Mpaka iye abwere mbakupfundzisani mwakubverana na ulungami.+
13 Mbwenye imwe mwalima pinthu pyakuipa,
Mwakolola pinthu pyakusowa ulungami,+
Imwe mukuthabuka thangwi yakukhonda kukhulupirika kwanu;
Imwe mwatowezera njira zanu,
Pontho mwanyindira kunjipa kwa anyankhondo anu.
14 Mbumba yanu inadzacitirwa uviyaviya,
Pontho mizinda yanu yacitsidzikizo cakuwanga inadzafudzwa yonsene,+
Ninga kufudza kudacita Salimani ku Arbheli,
Pa ntsiku ya nkhondo, mu ndzidzi udagwandwa-gwandwa akazi pabodzi na anawo.
15 Pyenepi ndipyo pinafuna kucitikira imwe anthu a ku Bheteli,+ thangwi yakunjipa kwa uipi wanu.
Dzuwa ingabuluka, mwakukhonda penula mambo wa Izraeli anadzazambazika.”*+
Iwo apitiriza kupereka ntsembe kuna madzimunthu a Bhaale,+
Pontho akhapitiriza kupereka ntsembe zakupiswa kuna madzimunthu akusemwa.+
3 Mbwenye ndine adapfundzisa Efraimu kufamba+ mbandinkwata mʼmanja mwanga;+
Mbwenye iwo nee adzindikira kuti ine ndikhadaawangisa.
4 Ine ndaphatisira ufuni na udidi ninga nkhambala* toera kuatsogolera kuti iwo abwere kuna ine;+
Ine ndikhali munthu wakuti akhabulusa goli mʼmapewa mwawo,
Pontho mwaufuni, ine ndikhapasa cakudya mʼbodzi na mʼbodzi wa iwo.
5 Nakuti iwo akhonda kubwerera kuna ine, iwo nee anabwererabve ku dziko ya Ejitu,+
Mbwenye Asirya anadzakhala mambo wawo.+
6 Supada inadzazungulira mʼmizinda yawo,+
Inadzafudza mipiringanyo yawo mbipha anthu a mwenemo thangwi ya pinthu pyakuipa pinanyerezera iwo.+
7 Mbumba yanga yatonga toera ikhale yakukhonda kukhulupirika kuna ine.+
Maseze iwo aacemera toera aende kuna wapadzulu,* nee mʼbodzi alamuka.
8 Thangwi yanji ine ndinakusiya iwe Efraimu?+
Thangwi yanji ine ndinakupereka kuna anyamalwa ako iwe Izraeli?
Thangwi yanji ine ndinakutsalakana ninga Adhima?
Thangwi yanji ndinakucitira ninga pidacita ine kuna Zebhoimu?+
Ine ndacinja pikhanyerezera ine kucita kuna imwe;
Mu ndzidzi ubodzi ene, ine ndisakubverani ntsisi kakamwe.+
9 Nee ndinadzakhutula ukali wanga,
Nee ndinafudza pontho Efraimu,+
Thangwi ine ndine Mulungu, tayu munthu,
Ndine Wakucena pakati panu;
Pontho nee ndinabwera kuna imwe mwakuipirwa.
10 Iwo anadzalambira pontho Yahova, pontho iye anadzalira ninga nkhalamu;+
Iye angalira, anace anabwera mbakatetemera kubulukira kumadokero a dzuwa.+
11 Pakubuluka ku Ejitu, iwo anabwera mbakatetemera ninga mbalame,
Ninga nkhangaiwa pakubuluka ku dziko ya Asirya;+
Pontho ndinadzaacitisa kuti akhale mʼmanyumba mwawo,” alonga Yahova.+
12 “Efraimu basi ene asalonga uthambi kuna ine,
Pontho dzindza ya Izraeli isandinyengeza.+
Mbwenye Yuda asapitiriza kufamba na Mulungu,
Pontho iye ndi wakukhulupirika kuna Wakucena Kakamwe.”+
12 “Efraimu akudya mphepo.
Ntsiku zonsene iye asathamangira mphepo yakumabulukiro a dzuwa.
Iye asathimizira uthambi na uphanga.
Iwo acita cibverano na Asirya,+ pontho akwata mafuta mbaenda nawo ku Ejitu.+
2 Yahova anadzatonga Yuda;+
Iye anadzatcunyusa Yakobe mwakubverana na njira zace,
Pontho anadzamʼbwezera mwakubverana na pinthu pidacita iye.+
3 Pikhali iye mʼmimba, iye aphata citende ca mʼbale wace,+
Pontho na mphambvu zace iye amenyana na Mulungu.+
4 Iye amenyana na anju mbankunda.
Iye alira mbadembetera toera iye ambvere ntsisi.”+
Mulungu anʼgumana ku Bheteli, pontho Iye alonga na ife,+
5 Yahova ndi Mulungu wa anyankhondo,+
Yahova ndi dzina yace toera kukumbukirwa nayo.+
6 “Natenepa bwererani kuna Mulungu wanu,+
Pangizani ufuni wakukhonda mala na ulungami,+
Pontho ndzidzi onsene dikhirani Mulungu wanu.
7 Mbwenye mʼmanja mwa nyamalonda muna mabhalansa akunyengeza;
Iye asakomerwa na kubera anthu.+
Pontho mu pyonsene pinacita ine nee munadzagumana madodo peno madawo.’
9 Mbwenye ine ndine Yahova Mulungu wako, kutomera ku dziko ya Ejitu.+
Ndinadzakucitisa toera ukhale pontho mʼmisasa
Ninga mu ntsiku za maphwando.
10 Ine ndalonga na aprofeta,+
Ndathimizira masomphenya awo,
Pontho ine ndaphatisira aprofeta toera kulonga misangani.
11 Ku Jiliyadhi kuna uthambi+ na kunyengezana.
Ku Jiligale anthu asapereka ntsembe za ngʼombe,+
Pontho maguwa awo ndi ninga mikuku ya miyala mʼminda yakulimwa.+
12 Yakobe athawira mu dziko* ya Aramu;*+
Izraeli+ aphata basa kweneko toera apaswe nkazi,+
Pontho iye atsalakana mabira toera apaswe nkazi.+
13 Yahova aphatisira mprofeta toera kubulusa Izraeli ku Ejitu,+
Pontho aphatisira mprofeta toera kuntsalakana.+
14 Efraimu atsukwalisa kakamwe Mulungu,+
Iye anapitiriza na mulando wace wa ciropa;
Mbuyace anadzantcunyusa thangwi ancitisa kuti apwazwe.”+
13 “Mu ndzidzi ukhalonga Efraimu, anthu agopa;
Iye akhali wakufunika kakamwe mu Izraeli.+
Mbwenye iye akhala na mulando thangwi yakulambira Bhaale,+ mbafa.
2 Cincino iwo asathimizira madawo awo,
Pontho na parata yawo,+ iwo asacita madzimunthu a utale;*
Madzimunthu awo akuti asacitwa na amesiri, asaacita mwaluso.
Iwo asapanga madzimunthu: ‘Ale anabwera toera kudzapereka ntsembe mbampswompswone madzimunthu a mwanangʼombe.’+
3 Natenepa iwo anadzakhala ninga nkhungwi namacibese,
Ninga bume yakuti mwakukhonda dembuka isamala,
Ninga mapwepwa anamburuswa pa mbuto inabubudirwa pinthu,
Pontho ninga utci unabuluka na pa benga ya padzulu panyumba.
4 Mbwenye ine ndine Yahova Mulungu wako kutomera mu dziko ya Ejitu;+
Nkhabepo Mulungu unango anadziwa iwe kusiyapo ine,
Pontho nkhabepo mpulumusi unango kusiyapo ine.+
5 Ine ndakudziwira nʼthando+ mu dziko yakusowa madzi.
6 Iwo akhakomerwa kakamwe na mbuto zawo zakudyesera pifuyo,+
Iwo akhakomerwa, pontho mitima yawo ikakhala yakudzikuza.
Na thangwi ineyi, iwo andiduwala.+
7 Ine ndinadzakhala ninga nkhalamu ingʼono kuna iwo,+
Ninga nyalugwe adabisala nʼkhundu-nʼkhundu mwa njira.
8 Ndinadzaapomokera ninga pinacita ursu* ingatayikirwa na anace,
Pontho ndinadzapandula maditi awo.
Ine ndinadzaadya kweneko ninga pinacita nkhalamu;
Cinyama ca ntsanga cinadzaakhwedzula-khwedzula.
9 Nakuti wandisandukira, ine mʼphedzi wako,
Pyenepi pinakucitisa toera ufudzwe iwe Izraeli.
10 Mphapo ali kupi mambo wako toera akupulumuse mʼmizinda yako yonsene,+
Pontho ali kupi atongi ako adapanga iwe kuti:
‘Ndipaseni mambo na atsogoleri’?+
11 Ine ndakupasa mambo mu ndzidzi ukhadaipirwa ine,+
Pontho mu ndzidzi wa ukali wanga, ine ndinadzamʼbulusa.+
12 Madodo a Efraimu nee anadzaduwaliwa;
Pontho madawo ace akoyiwa.
13 Iye anadzabva kupha ninga kunakhala na nkazi angafuna kubala.
Iye ndi mwana wakusowa ndzeru,
Thangwi ndzidzi wakufuna kubalwa ungakwana, iye asakhonda kubuluka.
14 Ine ndinadzaapulumusa ku mphambvu ya Nthumbi;*
Ine ndinadzaombola mbumba yanga toera ikhonde kuphiwa.+
Iwe Kufa, iri kupi mphambvu yako inabweresa nyatwa?+
Iwe Nthumbi, iri kupi mphambvu yako yakufudza?+
Ine nee ndinadzakubvera ntsisi.
15 Maseze iye atumbuke* pakati pa mitete,
Inadzabwera mphepo yakumabulukiro a dzuwa, mphepo ya Yahova,
Mphepo ineyi inadzabulukira nʼthando, toera kuumisa micera na kupwesa mikulo yace.
Alipo anafuna kudzatapata pinthu pyace pyonsene pyakufunika kakamwe.+
16 Samariya anadzapaswa mulando,+ thangwi iye asandukira Mulungu wace.+
Iwo anadzaphiwa na supada,+
Anace anadzagwandwa-gwandwa,
Pontho mimba za akazi akuti ali na mimba zinadzapandulwa.”
14 “Iwe Izraeli, bwerera kuna Yahova Mulungu wako,+
Iwe wagwegweduka thangwi ya madodo ako.
2 Bwererani kuna Yahova, pontho mpangeni tenepa:
‘Tilekerereni madodo athu,+ pontho tambirani pinthu pyathu pyadidi,
Ife tinadzapereka ntsembe zakusimba na milomo yathu+ ninga ntsembe za anangʼombe.
3 Asirya nee anadzatipulumusa.+
Ife nee tinadzakwira makavalo,+
Pontho nee tinadzalongabve kuna mabasa a manja athu kuti: “Mulungu wathu!”
Thangwi imwe musabvera ntsisi ana aumphawi.’*+
4 Ine ndinadzaacitisa pontho toera akhale akukhulupirika.+
5 Ine ndinadzakhala ninga bume kuna Izraeli;
Iye anadzaphukira ninga maluwa,
Pontho mitcitci yace inadzakhala yakuzika kakamwe ninga miti ya ku Libhano.
6 Nthawi zace zinadzamwazika,
Kubalika kwace kunadzakhala ninga kwa muti wa mulivera,
Pontho khwema yace inadzakhala ninga miti ya ku Libhano.
7 Iwo anadzakhala pontho pa nʼthundzi wace.
Iwo anadzabzwala mbeu, pontho anadzabuluka maluwa ninga muti wa mauva.+
Kubvekera* kwace kunadzakhala ninga kwa vinyu ya ku Libhano.
8 Efraimu anadzabvundza: ‘Kodi madzimunthu ndiri nawo basa yanji?’+
Ine ndinadzantawira, pontho ndinadzantsalakana.+
Ine ndinadzakhala ninga muti wa junipero wa masamba akubithimira.
Misapo yanu inadzabuluka kuna ine.”
9 Mbani ali na udziwisi? Mbabvesese pinthu pyenepi.
Mbani wakucenjera? Mbadzindikire pinthu pyenepi.
Thangwi njira za Yahova ndi zakulungama,+
Pontho anthu akulungama anadzafamba munjira zenezi;
Mbwenye anyakudawa anadzagwegweduka munjira zenezi.
Dzina ineyi ndi cigwagwa ca dzina yakuti Ozaya, yakuti isabveka “Adapulumuswa na Yahova; Yahova Apulumusa.”
Peno: “uputa.”
Peno: “ya uputa.”
Peno: “ya uputa.”
Dzina ineyi isabveka “Mulungu Anadzabzwala Mbeu.”
Fala na Fala: “nyumba ya.”
Dzina ineyi isabveka “Nee Abverwa Ntsisi.”
Fala na Fala: “nyumba.”
Fala na Fala: “nyumba.”
Dzina ineyi isabveka “Iwo Nee Ndi Mbumba Yanga.”
Onani nota ya Ozeya 1:9.
Onani nota ya Ozeya 1:6.
Peno: “uputa.”
Peno: “auputa.”
Peno: “uputa.”
Peno: “Bhaale wanga.”
Dzina ineyi isabveka “Mulungu Anadzabzwala Mbeu.”
Onani nota ya Ozeya 1:6.
Onani nota ya Ozeya 1:9.
Ineyi ndi mikate inaphatisirwa pa ulambiri wauthambi.
Omeri ibodzi ndi malitru 220. Onani Apendise B14.
Peno: “uputa.”
Fala na Fala: “mu ntsiku zizinji.”
Peno: “madzimunthu a panyumba.”
Peno: “cipfundziso canga.”
Munjira inango: “Mʼmbuto mwakundipasa mbiri, iwo asandipwaza.”
Peno: “pyauputa.”
Peno: “Uputa.”
Peno: “ndodo yawo yakulotera nayo.”
Peno: “uputa.”
Peno: “uputa.”
Peno: “uputa.”
Peno: “uputa.”
Peno: “uputa.”
Fala na Fala: “pa mbuto ikulu?”
Peno: “Pyakumwa pyakuledzeresa pyakucitwa na tirigu.”
Peno: “uputa.”
Peno: “adandisandukira.”
Peno: “ndikhaasandika.”
Peno: “uputa.”
Peno: “uputa.”
Fala na Fala: “abala ana a madziko anango.”
Peno: “na minda yawo.”
Peno: “ntsisi.”
Munjira inango: “Mitima yawo isakhala ninga forno mu ndzidzi unabwera iwo kudzalonga miseru yawo.”
Fala na Fala: “anyakutonga miseru.”
Fala na Fala: “idatambira iwo pa nsonkhano wawo.”
Fala na Fala: “nyumba.”
Munjira inango: “Iwo anadzabwerera.”
Peno: “yauputa.”
Peno: “mulungu wakupasa manyadzo.”
Fala na Fala: “anadzamatamiswa.”
Mafala anewa asabveka, mu ndzidzi unafuna kutcunyuswa iwo ninga amangirwa pa goli.
Fala na Fala: “anadzamatamiswa.”
Anewa ndi aprofeta na anthu anango adatumwa toera kupfundzisa Izraeli.
Pisaoneka kuti ineyi ndi nkhambala ninga ikhaphatisira nyakubala toera kupfundzisa mwanace kufamba.
Pyenepi pisabveka ulambiri wapadzulu kakamwe.
Fala na Fala: “cisa.”
Peno: “Sirya.”
Peno: “madzimunthu akunyunguluswa.”
Peno: “ditiringwe.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “athambaruke.”
Peno: “ana adaferwa na pai.”
Fala na Fala: “Kukumbukirwa.”