Kodi Mboni za Yahova Zisakhulupiranji?

“Tisanyerezera kuti mphyadidi kubva kubulukira kwa imwe kuti mbapi manyerezero anu, thangwi ndimomwene kuti, nsoka uyu, pisadziwika na ife kuti konsene kwene asalonga mwakuupambizira.” (Machitiro 28:22) Atsogoleri anewa a kumidzi ya Roma wa piaka pya dzana yakutoma apereka citsanzo cadidi kakamwe. Iwo akhafuna kubva kubulukira kwa anaciro, m’mbuto mwa kubva basi kubulukira kwa anthu akunja akuxola.

Sawasawa, Mboni za Yahova kazinji kene lero zisalongerwa pyakuipa, natenepa, mbapidakhala kudodoma kudikhira kuti mudziwe undimomwene wa iwo kubulukira kwa anthu a tsankhulo. Natenepa, tiri akukomerwa kukufokotozerani pinango pya pipfunziso pyathu pikulupikulu.

Bibilya, Yezu Kristu na Mulungu

Tisakhulupira Kuti “Malemba onsene mbakupepeserwa na Mulungu pina mbakuphindulisa”. (2 Timoti 3:16) Natenepa, ngakhale anthu anango asalonga kuti mwandimomwene ife sife akristu, pyenepi si ndimomwene tayu. Tisatawira mwakumalisiratu umboni wa mpostolo Pedru wakulonga za Yezu Kristu wakuti: “Nkhabepo dzina inango pantsi pa thambo ya kudzulu, idaperekwa kwa anthu, yakuti tipulumuswe nayo.”​—Machitiro 4:12.

Mwapyenepi, nakuti Yezu alonga kuti iye ndi “Mwana wa Mulungu” pina kuti ‘Baba andituma’, Mboni za Yahova zisakhulupira kuti Mulungu ndi wankulu kupiringana Yezu. (Jwau 10:36; 6:57) Yezu ene adzindikira kuti: “Baba ndi wankulu kupiringana ine.” (Jwau 14:28; 8:28) Natenepa, ife nkhabe khulupira tayu kuti Yezu ndi sawasawa na Baba, ninga munalongera cipfunziso ca Utatu. M’buto mwace, tisakhulupira kuti iye asasanywa na Mulungu nakuti ali wakungonjera kwa Iye.​—Akolose 1:15; 1 Akorinto 11:3.

M’cilongero ca cisena, dzina ya Mulungu ndi Yahova. Bibilya isati: “Iwe, wekha dzina yako ndi YAHOVA, ndiwe Wapadzuludzulu pa dziko yonsene yapantsi.” (Masalmo 83:18, Almeida, edição revista e corrigida) Mwakubverana na cidziwiso ceneci, Yezu agomezera pikulu pene dzina ya Mulungu, mbapfunzisa anyakutowera ace kuphembera kuti: “Baba wathu wakudzulu, dzina yanu mbiceneswe.” Phontho iye ene aphembera kwa Mulungu kuti: “Ndaidziwikisa dzina yanu kwa anthu adandipasemwe.”​—Mateo 6:9; Jwau 17:6.

Mboni za Yahova zisakhulupira kuti asafunika kutowezera Yezu m’kudziwikisa dzina na pifuno pya Mulungu kwa anango. Natenepa, takwata dzina yakuti Mboni za Yahova thangwi yakuti tisatowezera Yezu, “Mboni Yakukhulupirika”. (Apokalipse 1:5; 3:14) Mwakubverana na pyenepi, Yesaya 43:10 asalonga kwa anthu anaimirira Mulungu kuti: “‘Imwe ndimwe mboni zanga’, alonga Yahova, ‘inde, nzakazi wanga adasankhulene’.”

Umambo wa Mulungu

Yezu apfunzisa anyakutowera ace kuphembera kuti: “Umambo wanu udze”, pontho iye acita Umambo unoyu kukhala ntsolo ukulu wa nkhani ya cipfunziso cace. (Mateo 6:10; Luka 4:43) Mboni za Yahova zisakhulupira kuti Umambo ndi utongi wa ndimomwene wakudzulu, unafuna dzatonga dziko yapantsi, nakuti Yezu Kristu ndi Mambo wakuikhwa wakukhonda kuoneka. “Mphambvu ya utongi inadzakhala m’maphewa mwace”, isalonga Bibilya. “Kuthimizirika kwa mphambvu ya utongi na ntendere nkhabe dzamala tayu.”​—Izaiya 9:6, 7, Al.

Mwapyenepi, Yezu Kristu hanadzakhala ekhene basi ninga mambo wa utongi wa Mulungu tayu. Iye anadzakhala na anyakutonga anzace akuinjipa kudzulu. “Tingapirira”, alemba mpostolo Paulo, “tinadzatongambo pabodzi pene”. (2 Timoti 2:12) Bibilya isapangiza kuti cilengesero ca anthu anafuna dzalamuswa muli akufa towera kutonga pabodzi na Kristu kudzulu cadromera pa “pikwi dzana na makumanai na anai adagulwa pa dziko yapantsi”.​—Apokalipse 14:1, 3.

Ndimomwene, utongi onsene usafunika kukhala na anthu, natenepa, Mboni za Yahova zisakhulupira kuti, kusiyapo pa anyakutonga anewa akudzulu, pikwi na pikwi pya anthu anango anadzatambira umaso wakukhonda mala. Pakumalisira pace, dziko yapantsi, yakusanduzwa kukhala paradizu wakubalika, anadzakhala wakudzadzwa na anthu anewa akuthema Umambo wa Mulungu, onsene mbangonjera ku umambo wa Kristu na anyakutonga anzace. Natenepa, Mboni za Yahova zisatawira mwamphambvu kuti dziko yapantsi cipo na cipo nkhabe dzafudzwa tayu, nakuti pikiro ya Bibilya yakuti: “Anthu akulungama anadzatambira dziko yapantsi, na kudzakhalamo kwenda na kwenda”, inadzakwaniriswa.​—Masalmo 37:29; 104:5.

Mbwenye, kodi Umambo wa Mulungu unadzabwera tani? Kodi m’kungonjera kwakufuna kwa anthu onsene ku utongi wa Mulungu? Mwakusiyana, Bibilya isapangiza mwandimomwene kuti kubwera kwa Umambo kunadzafuna kupitira kwa Mulungu m’pinthu pya pa dziko yapantsi: “Mulungu wakudzulu anadzakhalisa umambo wakuti na cipo unadzafudzwa tayu. Nakuti umambo unoyu . . . unadzanyedza mbudzamalisa maumambo awa onsene, natenepa, iwo ene unadzakhala kwa nzidzi wakwenda na kwenda.”​—Danyele 2:44.

Kodi Umambo wa Mulungu unadzabwera lini? Mwakubverana na maprofesiya a Bibilya anakwaniriswa lero, Mboni za Yahova zisakhulupira kuti unadzabwera mwakucimbiza kakamwe. Tisakuphembani kudinga maprofesiya anango analonga maonekero a “ntsiku zakumalisa” za makhaliro ano akuipa a pinthu. Alembwa m’Mateo 24:3-14, Luka 21:7-13, 25-31 na 2 Timoti 3:1-5.

Na thangwi yakuti ‘tisamfuna Yahova, Mulungu wathu, na ntima athu onsene na moyo wathu onsene, nzeru na mphambvu, pontho na anzathu ninga ife ene’, hatiri akugawika mwa udziko, mwa udzinza na mwa makhaliro a anthu tayu. (Marko 12:30, 31) Tisadziwika pikulu pene na thangwi ya kufunana kunapangizwa pakati pa abale athu acikristu, anagumanika m’madziko onsene. (Jwau 13:35; 1 Jwau 3:10-12) Natenepa, tiri na makhaliro apakatinakati ku pinthu pya ndale za madziko anewa. Tisalesera kukhala sawasawa na anyakupfunza akutoma a Yezu, kwa anewa iye alonga kuti: “Nkhabe kucita khundu ya dziko, ningambo ine nkhabe kucita khundu ya dziko.” (Jwau 17:16) Tisakhulupira kuti kukhala akupambulwa m’dziko pisabveka kucalira makhaliro aunyambi akubalalika pikulu pene lero, kuphataniza unthawatawa, kuba, ulukwale, upombo, kugonana kwa amuna okha okha, kuphatisira basa ciropa mwakuipa, kulambira mafanikizo na pinthu pinango ninga pyenepi, pyakukhondeswa m’Bibilya.​—1 Akorinto 6:9-11; Aefesi 5:3-5; Machitiro 15:28, 29.

Cidikhiro ca Ntsogolo

Mboni za Yahova zisakhulupira kuti umaso wathu wacincino m’dziko ino si okhene ulipo basi tayu. Tisakhulupira kuti Yahova atuma Kristu kubwera pa dziko yapantsi towera kuthirira ciropa cace cakupasa umaso ninga ciomboli, mwa njira yakuti anthu akwanise kukhala na makhaliro akulungama pamaso pa Mulungu na kutambira umaso okhonda mala m’nkhaliro upswa wa pinthu. Ninga apilonga mpostolo mbodzi wa Yezu: “Cincino talungamiswa na ciropa cace.” (Aroma 5:9; Mateo 20:28) Mboni za Yahova zisapereka takhuta pikulu pene kwa Mulungu na kwa Mwanace thangwi ya tsalakano ineyi ya ciomboli inacitisa kukwanisika kwa umaso wa ntsogolo.

Mboni za Yahova zina cinyindiro cakukwana ca umaso wa ntsogolo, wakunyindira mwa kulamuswa kwa akufa, m’Umambo wa Mulungu. Tisakhulupira, ninga Bibilya isapfunzisa, kuti munthu angafa, kukhalapo kwace maso kusadroma, kuti “ntsiku ineyo ene manyerezero ace asataika”. (Masalmo 146:3, 4; Ezekyele 18:4; Koelete 9:5) Inde, umaso wa ntsogolo wa akufa usanyindira Mulungu kukumbukira kuwalamusa muli akufa.​—Jwau 5:28, 29.

Mwapyenepi, Mboni za Yahova zisakhulupira mwamphambvu kuti anthu azinji ali maso cincino anadzapulumuka pakufudzwa kwa mautongi onsene alipo awa na Umambo wa Mulungu natenepa, ninga Nowa na banja ace apulumuka pa Cigumula, iwo anadzapitiriza na kutsanzaya na umaso wa kwenda na kwenda m’dziko yapantsi yakuceneswa. (Mateo 24:36-39; 2 Pedro 3:5-7, 13) Mbwenye, tisakhulupira kuti kupulumuka kusanyindira munthu kukwanirisa pifuno pya Yahova, ninga Bibilya isalonga kuti: “Dziko irikumala . . . , mbwenye ule anacita cifuno ca Mulungu anakhala kwenda na kwenda.”​—1 Jwau 2:17; Masalmo 37:11; Apokalipse 7:9, 13-15; 21:1-5.

Ndimomwene, si pyakukwanisika kuti pano tifokotoze pikhulupiro pyonsene pya Mboni za Yahova, mbwenye tiri kukuphembani kuti mutambire cidziwiso cakuthimidzirika.

Kusiyapo ngakhala pana cidzindikiro cinango, malemba a Bibilya mbakubulukira m’Tradução do Novo Mundo das Escrituras Sagradas​—Com Referências.