‘Nee Adzudzumika Tayu’
KUPWAZA macenjezo kungakwanise kubweresa cidengwa.
Darwin, nzinda wa Australia, ukhali pakati pa kukhunganya maphwando a firiyadu m’1974 mukacenjeza pingalingali kufika kwa conzi. Mbwenye m’piaka 30 nzinda wa Darwin nee ukhadafudzwa na conzi. Thangwi yanji unafudzwa cincino? Akukhalamo azinji aona ngobzi ineyi ninga cinthu cadzenda mpaka kufika mphepo yakugopswa mbitoma kuwarura ntsoi na kufudza mapfufu a nyumba zikhadabisala anthu. Mangwana mwace namacibese nzinda ukhali madembe.
M’Colombia, pa nthanda ya Bingu ya 1985, phiri yatumbuka. Kunyunguluka kwa neve na gelo kwacitisa matope kufikira anthu akupiringana 20.000 akakhala m’nzinda wa Armero. Kodi iwo akhadacenjezwa tayu? Phiri ikhadzadzamira kwa miyezi. Mbwenye thangwi yakudzoloera kukhala nkhundunkhundu mwa phiri, anthu azinji m’Armero nee adzudzumika tayu. Ayang’aniri acenjezwa kuti cidengwa cikadasala pang’ono kucitika, mbwenye iwo hadacenjeza anthu tayu. Mbwenye mwakucimbiza Nyumba ya mphepo yaphatisirwa towera kudziwisa anthu. Kwaphatisirwambo mitcini yakumwaza mafala ya mbuto zakuphembera towera kusembedzera anthu kuti aphate ntima. M’nzidzi wakumaulo pakhala kutumbuka kuwiri kwakuti bwerani mudzaone. Kodi imwe mbumudasiya pinthu pyanu mbumuthawa? Anthu akucepa basi ndiwo adawangisira kuthawa mbukusati kukhala dembulembu.
Kazinji kene anyakupfunza pya mataka asalongadi mbuto zinafuna kudzacitika piteketeke. Mbwenye kazinji kene iwo nkhabe kwanisa kulonga ntsiku inafuna citika pyenepi. M’caka ca 1999, piteketeke pyapha anthu akukwana 20.000 m’dziko yonsene yapantsi. Azinji ale adafa akhanyerezera kuti pyenepi cipo mbipidacitika kwa iwo.
Kodi Imwe Musatawira Tani Macenjezo Akubuluka Kwa Mulungu?
Bibilya yadziwisa kale pyakucitika pinadzindikirisa ntsiku zakumalisa. Mwakubverana na pyenepi, isatisembedzera kudinga “ntsiku za Nowa.” “Ntsiku zenezire zidatsogolera ndzalo ukulu,” anthu akhatsalakana mabasa awo a umaso, maseze akhanenseka na kukhalapo kwa uphanga. Mbwenye pya cenjezo idaapasa Mulungu kubulukira kwa nzakazi wace Nowa, ‘iwo nee adzudzumika tayu mpaka madzi kutoma kudzala mbaaendesa onsene.’ (Mateyu 24:37-39) Kodi imwe mbumudabvera cenjezo ineyi? Kodi musacita tenepa cincino?
Khala kuti imwe mukakhala m’dziko ya Sodoma, duzi na Bara Yakufa, m’ntsiku za Loti, ndzukulu wa Abrahamu, kodi mbumudacitanji? Dziko ikhali ninga paradizu. Nzinda ukhali na mpfuma zizinji. Mbumba nee ikhanenseka tayu. M’ntsiku za Loti, “anthu akhadya, akhamwa, akhagula, akhagulisa, akhatcheka, akhamanga nyumba.” Makhaliro a anthu m’dziko akhadadzala na ulukwali. Kodi imwe mbumudabvera cenjezo mudalonga Loti pya mabasa akuipa? Mbumudabvesera mudalonga iye kuti Mulungu atonga kufudza nzinda wa Sodoma? Peno mbumudapiona ninga pyadzenda, sawasawa na akhafuna kudzakhala akamwene a Loti? Panango mbumudatoma kuthawa buluka penepo mbumuzungunuka nduli, ninga pidacita nkazi wa Loti? Maseze anango aona cenjezo ineyi ninga cinthu cadzenda, m’ntsiku idabuluka Loti m’Sodoma, “penepo pene kudzulu kwabvumba moto na sulifuli, mbafudziwa anthu onsene.”—Luka 17:28, 29.
Azinji m’ntsiku zathu nkhabe kudzudzumika. Mbwenye pitsanzo ipi pyakoiwa m’Mafala a Mulungu towera kuticenjeza, towera kutiwangisa KUKHALA AKULINDIRA!
[Bokosi/Foto pa tsamba 22]
Kodi Pakhalidi Ndzalo Wa Dziko Yonsene?
Anyakupokanya azinji asalonga kuti Nkhabe. Mbwenye Bibilya isalonga kuti Inde.
Yezu Kristu alonga pya ndzalo, na akakhala maso mudacitika iwo, mbauona kubulukira kudzulu.
[Bokosi/Foto pa tsamba 23]
Kodi Sodoma Na Gomora Afudzwadi?
Anyakukumba asatawira pyenepi.
Pyakucitika pya dziko pisalonga thangwi ya kufudzwa kweneku.
Yezu Kristu aona kufudzwa kweneku, na pidacitika pisalongwa m’mabukhu 14 a Bibilya.