Maio

Akristu a mu ndzidzi wa apostolo athabuka kakamwe pidaoneka njala ikulu kakamwe “pa dziko yonsene yapantsi.” Mwakukhonda penula, misolo ya mabanja ikhadzudzumika kuti inagumana tani cakudya toera kudyesa mabanjawo. Aphale na atsikana akuti akhali na cifuno cakuthimizira utumiki wawo, panango akhadzudzumika kuti anacita tani pyenepi. Panango iwo anyerezera kuti akhafunika kucita pyenepi njala ingamala. Mwakukhonda tsalakana pinentso pyenepi, Akristu anewa apitiriza kumwaza mphangwa mwakubverana na makhaliro awo, pontho akhatsandzaya kupasa abale na alongo awo a ku Yudeya pinthu pikhali na iwo. (Mabasa 11:29, 30) Ndi nkhombo zipi zidakhala na Akristu a mu ndzidzi wa apostolo pikhathimbana na iwo na njala ikulu? Ale adatambira ciphedzo akwanisa kuona kuti Yahova akhaatsalakana. (Mat. 6:31-33) Ufuni wawo kuna abale na alongo adaaphedza wathimizirika. Pontho ale adacita pyakupereka na ale adaphedzera basa yakupereka cakudya akhala akutsandzaya kakamwe thangwi yakucita pyenepi.—Mabasa 20:35. w23.04 tsa. 16 ¶12-13

Midzidzi inango, Yahova asatawira maphembero a atumiki ace mukukulumiza anthu akuti nee asantumikira toera kuaphedza. Mwacitsandzo, iye akulumiza Mambo Artaxerxe toera kutawira phembo ya Neemiya kuti abwerere ku Yerusalemu toera akamange pontho nzinda. (Nee. 2:3-6) Lero, Yahova anakwanisambo kukulumiza ale akuti nee asantumikira toera kutiphedza tingafuna ciphedzo. Kazinji kene maphembero athu nee asatawirwa munjira yakudzumatirisa. Mbwenye iwo asatawirwa munjira yakufunika kuna ife toera tipitirize kukhala akukhulupirika kuna Babathu wakudzulu. Natenepa onani mwadidi njira inatawira Yahova maphembero anu. Midzidzi inango imwe musafunika kunyerezera kuti Yahova asatawira tani maphembero anu. (Mas. 66:19, 20) Ife tisapangiza kuti tiri na cikhulupiro, tayu basi ene tingacita phembero kuna Yahova, mbwenye tingatawira njira inaphatisira iye toera kutawira maphembero athu.—Aheb. 11:6. w23.05 tsa. 11 ¶13; tsa. 12 ¶15-16

Tingaperekeka kuna Yahova, tisapikira kumulambira na kucita cifuno cace. Natenepa, tisafunika kupitiriza kucita pidapikira ife. Kucita pinthu mwakubverana na pidapikira ife nee ndi pyakunentsa kakamwe. Thangwi Yahova aticita toera kucita cifuno cace. (Apok. 4:11) Iye aticita na cifuno cakundziwa, kumulambira, pontho aticita mwakulandana na iye. Na thangwi ineyi, ife tinakwanisa kukhala na uxamwali wakuwanga na iye mbatikomerwa na kucita pinafuna iye. Kusiyapo pyenepi, tingacita cifuno ca Mulungu mbatitowezera Mwanace, ‘tinadzagumana ciwangiso.’ (Mat. 11:28-30) Natenepa pitirizani kufuna kakamwe Yahova mukunyerezera pinthu pyadidi pidakucitirani iye na nkhombo zinafuna kukupasani iye ntsogolo. Mungafuna kakamwe Mulungu pinakhala pyakukhonda nentsa kuna imwe toera kumbvera. (1 Juw. 5:3) Yezu akwanisa kucita cifuno ca Mulungu thangwi akhaphemba ciphedzo ca Yahova, pontho akhaikha manyerezero ace ku muoni ukhafuna iye kutambira. (Aheb. 5:7; 12:2) Ninga Yezu, phembani Yahova toera akupaseni mphambvu, pontho pitirizani kunyerezera cidikhiro cakukhala na umaso wakukhonda mala. w23.08 tsa. 27-28 ¶4-5

Ife tonsene tisakomerwa na anthu akupirira. Thangwi yanji? Thangwi tisalemedza ale anadikhira cinthu mbakhonda kuipirwa. Ife tisakomerwa kakamwe anango angapirira madodo athu. Pontho tisapereka takhuta kuna munthu adatipfundzisa Bhibhlya thangwi ya kupirira kwace mu ndzidzi ukhawangisira ife toera kupfundza, kutawira na kuphatisira pipfundziso pya Bhibhlya. Kusiyapo pyenepi, ife tisapereka takhuta kuna Yahova Mulungu wathu thangwi iye asapirira madodo athu! Ndimomwene kuti tisakomerwa anango angakhala akupirira, mbwenye panango pinakhala pyakunentsa kuna ife toera kupangiza n’khaliro unoyu. Mwacitsandzo, panango pinakhala pyakunentsa kuna ife toera kupirira khala tiri pa bhixa yakulapha kakamwe, makamaka khala tadembuka. Panango tinaipirwa kakamwe anango angatitsukwalisa. Pontho midzidzi inango pinakhala pyakunentsa kuna ife toera kupitiriza kudikhira dziko ipswa idapikira Yahova. Mbwenye, mwakukhonda tsalakana pyonsene, ife tisafunika kukhala akupirira kakamwe. w23.08 tsa. 20 ¶1-2

Kumbukani kuti Yahova apanga Jidhiyoni toera apungule anyankhondo ace azinji kakamwe. Panango iye mbadabvundzika: ‘Macinjo anewa ndi akufunikadi? Kodi pyenepi pinaphedza?’ Ngakhale tenepo, Jidhiyoni abvera. Lero, akulu a mpingo asatowezera citsandzo ca Jidhiyoni angapangwa toera kucita macinjo na gulu ya Yahova. (Aheb. 13:17) Jidhiyoni akhabvera Yahova ngakhale kuti akhagopa mabasa akugopswa akhapaswa iye. (Aton. 9:17) Pidamala Yahova kupangiza kuti mbadaphedza Jidhiyoni, iye akhala na cinyindiro cakuti Yahova mbadam’phedza toera kutsidzikiza atumiki ace. Akulu a mpingo anakhala m’mbuto zakuti basa yathu isakhondeswa, asatowezera citsandzo ca Jidhiyoni. Mwacipapo, iwo asatsogolera misonkhano na basa yakumwaza mphangwa mwakukhonda tsalakana kuthuswa na mautongi, kucitwa mibvundzo, kuluza basa peno kutsalakanwa mwakuipa. Mu ndzidzi wa nyatwa ikulu, akulu a mpingo anadzafunika kukhala na cipapo toera kubvera pitsogolero pinafuna kutambira iwo maseze pikhale pyakugopswa. w23.06 tsa.5-6 ¶12-13

Yahova alembesa mbiri ya Nyantsembe Wankulu Yeoyadha m’Bhibhlya toera ife tikwanise kupfundza na citsandzo cace. (Aroma 15:4) Pontho pidafa Yeoyadha, iye alemedzwa kakamwe mukuikhwa “munthumbi mu Nzinda wa Dhavidhi pabodzi na amambo, thangwi iye akhadacita pinthu pyadidi mu Izraeli kuna Mulungu wandimomwene na nyumba Yace.” (2 Kro. 24:15, 16) Pinthu pidacitikira Yeoyadha pinakwanisa kuphedza ife tonsene toera kukulisa n’khaliro wakugopa Mulungu. Akulu a mpingo anakwanisa kutowezera citsandzo ca Yeoyadha ndzidzi onsene angatsalakana na kutsidzikiza mabira a Mulungu. (Mabasa 20:28) Abale na alongo akugwesera anakwanisa kupfundza na citsandzo ca Yeoyadha kuti angagopa Yahova mbakhala akukhulupirika kuna iye, Iye anakwanisa kuaphatisira toera kukwanirisa cifuniro Cace. Aphale na atsikana anakwanisa kupfundza na njira idatsalakana Yahova Yeoyadha na kutowezera citsandzo cace mukupangiza cilemedzo kuna abale na alongo akugwesera, makamaka ale anatumikira Yahova mu pyaka pizinji. (Mis. 16:31) Natenepa tendeni tiphedzere mwakukhulupirika “ale anatsogolera” na kuabvera.—Aheb. 13:17. w23.06 tsa. 17 ¶14-15

Pa misonkhano khalani na maonero akulinganira pakulamusa manja toera kutawira. Thangwi tingalamusa manja kazinji kene, m’bale anatsogolera anapibva ninga ali kukakamizwa toera atithonye mwakubwereza-bwereza, maseze anango adzati kukhala na mwai wakutawira. Pyenepi pinacitisa anango kukhonda khala na cifuno cakuthukula manja. (Ekle. 3:7) Amwazi mphangwa azinji angalamusa manja toera kutawira mu ndzidzi wa pfundziro, panango nee tinakwanisa kutawira kazinji kene ninga munafuna ife. Pontho midzidzi inango m’bale anacitisa khundu panango nee anakwanisa kutithonya toera titawire. Pyenepi panango pinakhala pyakutsukwalisa, mbwenye nee tisafunika kuipirwa tingakhonda kuthonywa. (Ekle. 7:9) Khala imwe nee musakwanisa kutawira kazinji kene ninga munafuna imwe, bveserani mwadidi mu ndzidzi unatawira anango, pontho asimbeni pakumala kwa misonkhano thangwi ya mitawiro yawo. Mafala anu akusimba anawangisa kakamwe abale na alongo anewa ninga pikhafuna imwe kuawangisa na mitawiro yanu. w23.04 tsa. 23-24 ¶14-16

Pfundzani Mafala a Mulungu na kunyerezera mwadidi pinapfundza imwe. Ninga muti wakuti usakhala wakuwanga khala mitcici yace yaenda pantsi kakamwe, ife tinakwanisambo kupitiriza kukhala akuwanga khala cikhulupiro cathu kuna Yahova ndi cakuwanga. Mu ndzidzi unakula muti unoyu mitcici yace isaenda pantsi kakamwe, pontho isathimizirika. Tingapfundza na kunyerezera pinapfundza ife m’Bhibhlya, tinawangisa cikhulupiro cathu, pontho tinakhala na cinyindiro cakuti mitemo ya Yahova ndzidzi onsene ndi yadidi. (Akol. 2:6, 7) Nyerezerani pipfundziso pya Yahova, citsogolero cace na citsidzikizo cidapereka iye kuna atumiki ace nduli. Mwacitsandzo, Ezekyeli akhayang’ana mwadidi mu ndzidzi udaona iye m’masomphenya anju mbakapima templo. Masomphenya anewa awangisa Ezekyeli, pontho asatipfundzisambo kuti tinabvera tani midida ya Yahova toera tipitirize mu ulambiri wakucena. (Ezek. 40:1-4; 43:10-12) Ife tinaphedzekambo tingakhala na ndzidzi wakupfundza na kunyerezera mwadidi pinthu pyakunentsa pinagumanika m’Mafala a Mulungu. Ife tinakwanisambo kukhala na ntima wakukhulupirika tinganyindira Yahova na ntima onsene.—Mas. 112:7. w23.07 tsa. 18 ¶15-16

Towezerani anthu a makhaliro adidi. Bhibhlya iri na pitsandzo pizinji pyakuti aphale anakwanisa kupitowezera. Anthu anewa a mu ndzidzi wakale akhafuna Mulungu, pontho akhaphata mabasa akusiyana-siyana toera kutsalakana atumiki ace. Imwe munakwanisambo kugumana pitsandzo pyadidi pakati pa Akristu akukola anagumanika m’banja mwanu na mu mpingo. (Aheb. 13:7) Pontho munakwanisambo kutowezera citsandzo cadidi kakamwe ca Yezu Kristu. (1 Ped. 2:21) Mu ndzidzi unapfundza imwe mwadidi pitsandzo pyawo, onesesani makhaliro awo akuti asakukomerani. (Aheb. 12:1, 2) Buluka penepo onani kuti munatowezera tani citsandzo ca amuna anewa. Munthu wakuti ali na luso yakunyerezera nkhabe kucita pinthu mwakucimbiza, mbwenye asanyerezera mwadidi mbadzati kucita cinthu. Toera munthu akhale na luso ineyi mbapitiriza nayo pisaphemba kuwangisira kakamwe. Pakutoma, pfundzani Bhibhlya toera mudziwe manyerezero na mabvero a Yahova. Buluka penepo, onani kuti thangwi yanji mphyadidi kucita pinalonga iye. Mungamala phatisirani pinthu pidapfundza imwe toera kucita pisankhulo pyakuti pinakomeresa Yahova. (Mas. 119:9) Imwe mungakulisa n’khaliro unoyu wakufunika kakamwe pinadzakuphedzani toera mukhale Nkristu wakukola mwauzimu.—Mis. 2:11, 12; Aheb. 5:14. w23.12 tsa. 24-25 ¶4-5

Anyakubala anakwanisa kupfundzisa anawo kuti anatawira tani mwakukhurudzika angacitwa mibvundzo thangwi yacikhulupiro cawo. (Tiya. 3:13) Anyakubala anango asapfundza kuti anacita tani pyenepi mu ndzidzi wakulambira kwa banja. Iwo asacedza pinthu pyakuti panango anawo anabvundzwa kuxikola, asapangiza kuti anatawira tani, pontho asaapfundzisa toera atawire mwakukhurudzika. Kukhunganyika kunaphedza Akristu toera akhale na cinyindiro ca pinthu pinakhulupira iwo na kupifokotoza mwacinyindiro. Khundu yakuti “Os Jovens Perguntam” mu jw.org isaphataniza misolo yakuti atividades para adolescentes. Misolo ineyi yacitwa toera kuphedza aphale na atsikana toera akhale na cinyindiro thangwi ya pinthu pinakhulupira iwo na kuaphedza toera akwanise kutawira mukuphatisira mafala awo ene mibvundzo inaacita anthu. Tingapfundza misolo inagumanika pa khundu ineyi pabodzi na banja yathu, tonsene tinadziwa kuti tinatsidzikiza tani cikhulupiro cathu munjira yadidi na mwakukhurudzika. w23.09 tsa. 17 ¶10; tsa. 18 ¶15-16

Kodi imwe mwakhazikisa kale cifuno cauzimu mbamunentseka toera kucikwanirisa? Khala ndi tenepo, nee muli mwekhene. Mwacitsandzo, Philip akhafuna kucita mwadidi maphembero ace, pontho akhafuna kuacita kazinji kene, mbwenye akhanentseka toera kugumana ndzidzi wakucita phembero. Erika akhali na cifuno cakugumanika pa misonkhano ya basa ya m’munda nakweru, mbwenye iye akhapitiriza kudembuka. Khala imwe muli na cifuno cakuti mudzati kucikwanirisa, lekani tsukwala. Toera kukwanirisa cifuno, maseze cikhale cing’ono pisaphemba ndzidzi na kuwangisira. Nakuti musafuna kukwanirisa cifuno canu, pyenepi pisapangiza kuti uxamwali wanu na Yahova ndi wakufunika kuna imwe, pontho musafuna kumpasa pinthu pyadidi kakamwe. Yahova asaona kuwangisira kunacita imwe, pontho iye nee asadikhira kuti mucite pinthu pyakuti nee munapikwanisa. (Mas. 103:14; Mik. 6:8) Natenepa, cifuno canu cisafunika kukhala cakulinganira, mwakubverana na pinakwanisa imwe. w23.05 tsa. 26 ¶1-2

Anthu acipapo panango asagopa, mbwenye nee asatawirisa kuti kugopa kweneku kuapingize kucita pinthu pyadidi. Dhanyeli akhali m’phale wacipapo kakamwe. Iye akhapfundza mabukhu a aprofeta a Mulungu kuphatanizambo maprofesiya a Yeremiya. Thangwi yakupfundza kweneku, mukupita kwa ndzidzi, Dhanyeli adzindikira kuti ubitcu wa Ayuda ku Bhabhilonya ukhali cifupi toera kumala. (Dhan. 9:2) Kuona kukwanirisika kwa mafala a Yahova kwaphedza Dhanyeli toera kunyindira kakamwe Yahova, pontho ale ananyindira Mulungu na ntima onsene anakwanisa kukhala na cipapo kakamwe. (Onani Aroma 8:32, 37-39.) Cinthu cakufunika kakamwe ndi cakuti ndzidzi onsene Dhanyeli akhacita phembero kuna Babace wakudzulu. (Dhan. 6:10) Iye abweka madawo ace kuna Yahova, pontho ampanga mabvero ace. Kusiyapo pyenepi, Dhanyeli aphemba ciphedzo ca Yahova. (Dhan. 9:4, 5, 19) Iye akhali munthu ninga ife wakuti nee abalwa na cipapo. Mbwenye akwanisa kukhala na cipapo thangwi yakupfundza Mafala a Mulungu, kucita phembero na kunyindira Yahova. w23.08 tsa. 3 ¶4; tsa. 4 ¶7

Tingabvera mautongi tisaphedzeka, pontho tisaphedzambo anango. Munjira ipi? Ife nee tisatcunyuswa thangwi yakukhonda kubvera mautongi. (Aroma 13:1, 4) Kubvera kwathu kunacitisa mautongi kuona kuti Mboni za Yahova ndi anthu akubvera. Mwacitsandzo, pyaka pingasi nduli, ku Nigerya anyankhondo apita mu Nyumba ya Umambo mu ndzidzi wa misonkhano. Iwo akhasaka anthu anacita uviyaviya thangwi yakukhonda kulipa misonkho. Mbwenye nkulu wa anyankhondo apanga anyankhondo toera abuluke. Iye alonga: “Mboni za Yahova ndzidzi onsene zisalipa misonkho.” Ndzidzi onsene unabvera imwe mautongi, musaphedzera toera atumiki a Yahova aoniwe munjira yadidi, pontho pyenepi pinaphedza toera kutsidzikiza abale na alongo athu. w23.10 tsa. 9 ¶13

Atumiki anango a Yahova asadikhira kumala kwa dziko ino mu ndzidzi uzinji kakamwe. Kuna anthu, panango pinaoneka ninga mapikiro a Yahova ali kudembuka toera kukwanirisika. Mbwenye Yahova asadziwa mabvero anakhala na atumiki ace. Na thangwi ineyi, iye apanga Abhakuki kuti: “Pana ndzidzi udakhazikiswa toera masomphenya anewa akwanirisike, ndzidzi unoyu unadzafika mwakucimbiza, pontho masomphenya anewa nee anadzakhala authambi. Maseze aoneke ninga akudembuka, pitiriza na kuadikhira! Thangwi mwakukhonda penula, masomphenya anewa anadzakwanirisika. Iwo nee anadzadembuka!” (Abha. 2:3) Kodi Yahova alonga mafala anewa toera kupasa cinyindiro basi ene Abhakuki? Peno mafala anewa asatipasambo cinyindiro lero? Yahova atsogolera mpostolo Paulu toera alonge mafala mabodzi ene kuna Akristu akhadikhira dziko ipswa. (Aheb. 10:37) Natenepa tinakwanisa kukhala na cinyindiro cakuti maseze profesiya ineyi ioneke ninga iri kudembuka, ‘iyo inadzakwanirisika. Iyo nee inadzadembuka.’ w23.04 tsa. 30 ¶16

Aizraeli akhapwaza pinthu pikhapangiza kuti Yahova akhalonga na iwo mukuphatisira Mose. (Num. 14:10, 11) Mwakubwereza-bwereza, iwo nee akhatawira kuti Yahova akhaphatisira Mose. Na thangwi ineyi, Yahova nee atawirisa kuti Aizraeli anango apite mu Dziko Yakupikirwa. (Num. 14:30) Mbwenye Aizraeli anango abvera pitsogolero pya Yahova. Mwacitsandzo, Yahova alonga: ‘Kalebe apitiriza kundibvera na ntima onsene.’ (Num. 14:24) Yahova apasa nkhombo Kalebe, pontho ampasa mbuto idasankhula iye mu dziko yakupikirwa. (Yos. 14:12-14) Aizraeli adabalwa mukupita kwa ndzidzi apitirizambo kubvera pitsogolero pya Yahova. Pidafa Mose, Yoswa mbakhala ntsogoleri wa Izraeli, iwo “akhamulemedza kakamwe mu umaso wace onsene.” (Yos. 4:14) Na thangwi ineyi, Yahova apasa nkhombo Aizraeli mbaatsogolera mpaka mu dziko idapikira iye.—Yos. 21:43, 44. w24.02 tsa. 21 ¶6-7

Nakuti dotoro angaphata nkono wathu asakwanisa kudziwa khala ntima wathu uli mwadidi peno nkhabe, munjira ibodzi ene, ife tinakwanisa kuona khala tisafuna kakamwe Mulungu peno nkhabe tingadinga ufuni wathu kuna anango. Tingadzindikira kuti ufuni wathu kuna abale na alongo uli kuthowa, ndi cipangizo cakuti ufuni wathu kuna Mulungu uli kuthowambo. Mbwenye tingafuna abale na alongo athu ndzidzi onsene, tinadziwa kuti tisafuna kakamwe Mulungu. Ife tisafunika kudzudzumika tingaona kuti ufuni wathu kuna abale na alongo athu uli kuthowa. Thangwi yanji? Thangwi pyenepi pisapangiza kuti uxamwali wathu na Yahova uli kufewa. Mpostolo Juwau apangiza pyenepi mu ndzidzi udalonga iye kuti: “Ule anakhonda kufuna m’bale wace anaona iye, anacimwana kufuna Mulungu, wakuti iye nkhabe kumuona.” (1 Juw. 4:20) Mafala anewa asatipfundzisanji? Yahova anakomerwa na ife basi ene khala ‘tisafunana unango na ndzace.’— 1 Juw. 4:7-9, 11. w23.11 tsa. 8 ¶3; tsa. 9 ¶5-6

Pikhali iye mwana, Mambo Yeowasi acita pisankhulo pyandzeru. Maseze nee akhali na baba, iye atowezera citsogolero ca Nyantsembe Wankulu, Yeoyadha. Nyantsembe Yeoyadha apfundzisa Yeowasi ninga mwanace. Na thangwi ineyi, Yeowasi asankhula kutumikira Yahova na kuphedza anthu toera acitembo pibodzi pyene. Kusiyapo pyenepi, Yeowasi acita masasanyiro toera templo ya Yahova isasanyirwe. (2 Kro. 24:1, 2, 4, 13, 14) Khala anyakubalanu peno munthu unango asakupfundzisani toera kufuna Yahova na kubvera midida yace, imwe muli na mwai ukulu kakamwe. (Mis. 2:1, 10-12) Anyakubalanu anakwanisa kukupfundzisani munjira zizinji. Anyakubalanu anatsandzaya kakamwe mungabvera uphungu unakupasani iwo kubulukira m’Bhibhlya. Kusiyapo pyenepi, imwe munatsandzayisa Yahova mbamukhala na uxamwali wakuwanga na iye. (Mis. 22:6; 23:15, 24) Anewa ndi mathangwi adidi toera kutowezera citsandzo ca Yeowasi mu ndzidzi ukhali iye mwana. w23.09 tsa. 8-9 ¶3-5

Yahova apikira kuti anabvesera maphembero athu. Mulungu wathu asafuna kakamwe atumiki ace akukhulupirika, natenepa iye nee anasiya kubvesera maphembero awo. (Mas. 10:17; 37:28) Mbwenye pyenepi nee pisabveka kuti iye anatipasa pinthu pyonsene pinaphemba ife. Panango tinafunika kudikhira mpaka mu dziko ipswa toera tipaswe pinthu pinango pinaphemba ife. Yahova asanyerezera cifuniro cace mu ndzidzi unabvesera iye maphembero athu. (Iza. 55:8, 9) Cibodzi mwa cifuniro cace ndi cakuti dziko yapantsi idzale na anthu akuti asambvera mwakutsandzaya ninga ntongi wawo. Mbwenye Sathani alonga kuti anthu mbadakhala akutsandzaya angatongana okhene. (Gen. 3:1-5) Toera kupangiza kuti pidalonga Sathani ndi uthambi, Yahova atawirisa anthu kuti atongane okhene. Mbwenye utongi wa anthu usabweresa nyatwa zizinji kakamwe lero. (Ekle. 8:9) Ife tisadziwa kuti Yahova nee anamalisa nyatwa zenezi zonsene cincino. w23.11 tsa. 21 ¶4-5

Yahova apikira kuti kubulukira mwa Abhrahamu, “madzindza mazinji” mbadapaswa nkhombo. Mwandimomwene Abhrahamu akhadikhira pinthu pyadidi kakamwe. Mbwenye pikhali Abhrahamu na pyaka 100 pyakubalwa, pontho Sara akhali na pyaka 90 pikiro ineyi ikhadzati kukwanirisika. M’maonero a anthu pikhaoneka ninga Abhrahamu na Sara nee mbadakwanisa kubala mwana. Ceneci cikhali ciyeso cikulu kuna Abhrahamu. “Mbwenye thangwi ya cidikhiro, iye akhulupira kuti mbadakhala baba wa madzindza mazinji.” (Aroma 4:18, 19) Natenepa mukupita kwa ndzidzi pikhadikhira Abhrahamu pyadzacitika. Iye adzabala Izaki, mwana wakuti akhan’dikhira mu ndzidzi uzinji. (Aroma 4:20-22) Ife tinakwanisa kukhala akutawirika kuna Mulungu mbatikhala axamwali ace ninga pidacita iye kuna Abhrahamu. Mwandimomwene, ndi pyenepi pidagomezera mpostolo Paulu pidalemba iye kuti: “Mafala akuti ‘pyenepi pyancitisa’ nee alembwa thangwi ya [Abhrahamu] basi, mbwenye alembwambo thangwi ya ife, akuti tinadzaoniwa ninga akulungama thangwi tisakhulupira Ule adalamusa Mbuyathu Yezu muli akufa.” (Aroma 4:23, 24) Ninga Abhrahamu, ife tisafunikambo kukhulupira Yahova, kucita mabasa adidi na kudikhira mwacinyindiro kuti mapikiro ace anadzakwanirisika. w23.12 tsa. 7 ¶16-17

Mungathimbana na nyatwa zakuti zisakucitisani kugopa, kumbukani kuti Yahova nee asaona basi ene nyatwa zanu, mbwenye asabvesesa kuti zisakukhuyani tani. Mwacitsandzo, Yahova nee aona basi ene kutsalakanwa mwakuipa kwa Aizraeli ku Ejitu, mbwenye aonambo ‘nyatwa idatamba iwo.’ (Eks. 3:7) Khala muli kuthimbana na nyatwa, panango nee munaona njira inakuphedzani Yahova. Mphapo musafunika kucitanji? Mphembeni toera akuphedzeni kuti muone ciphedzo cace. (2 Ama. 6:15-17) Buluka penepo bvundzikani: Kodi nkhani peno ntawiro udaperekwa pa misonkhano ya mpingo pyandiwangisa? Kodi pali na bukhu, vidhyu, peno ibodzi mwa nyimbo yakuti yandiwangisa? Kodi pali na munthu adandipanga mphangwa za m’Bhibhlya zakuti zandiwangisa? Panango tinaduwala kuti abale na alongo athu asatifuna kakamwe, mbatiduwalambo ciphedzo cinatipasa Yahova kubulukira m’Mafalace. Mwandimomwene, ineyi ndi miyoni mikulu inatipasa Yahova. (Iza. 65:13; Marko 10:29, 30) Miyoni ineyi isapangiza kuti Yahova asakutsalakanani. (Iza. 49:14-16) Pontho isapangiza kuti iye athema kunyindirwa na imwe. w24.01 tsa. 4-5 ¶9-10

Mbadzati kubwerera kudzulu, Yezu akumbusa anyakupfundzace thangwi ya basa ikhali na iwo yakupereka umboni “mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.” (Mabasa 1:8; Luka 24: 46-48) Pidapita ndzidzi ungasi, atsogoleri Aciyuda amanga mpostolo Pedhru na Juwau mbaaendesa ku Thando Ikulu Yakutongera Miseru ya Ayuda, pontho aathusa mbaapanga toera asiye kumwaza mphangwa. (Mabasa 4:18, 21) Pedhru na Juwau alonga: “Longani ndimwe khala mphyakuthema pamaso pa Mulungu kubvera imwe mbatikhonda kubvera Mulungu. Mbwenye ife nee tinasiya kulonga pinthu pidaona ife na pidabva ife.” (Mabasa 4:19, 20) Pidasudzulwa Pedhru na Juwau, anyakupfundza acita phembero kuna Yahova toera apitirize kucita cifuno cace. Yahova atawira phembero ineyi.—Mabasa 4:29, 31. w23.05 tsa. 5 ¶11-12

Yahova na Mwanace akhala pabodzi mu pyaka pizinji kakamwe, pontho pyenepi pyaacitisa kukhala na uxamwali wa ponda ndipondembo. Nkhabe munthu akhali na uxamwali ninga unoyu. Yahova mbadakwanisa basi ene kulonga: ‘Uyu ndi ule anakomerwa na ine.’ Mbwenye nakuti iye akhafuna kuti ife tidziwe kuti iye akhafuna kakamwe Yezu, iye alonga: “Uyu ndi Mwananga wakufunika,” ninga pinalonga lemba ya ntsiku ya lero. Yahova akhakomerwa na pikhacita Yezu na pire pikhafuna iye kudzacita. (Aef. 1:7) Pontho Yezu nee akhapenula khala Babace akhanfuna peno nkhabe. Iye akhali na cinyindiro consene cakuti Babace akhanfuna. Kazinji kene iye alonga na cinyindiro kuti Baba asandifuna.—Juw. 3:35; 10:17; 17:24. w24.01 tsa. 28 ¶8

Nyerezerani tenepa: Munthu wakuti imwe musanfuna kakamwe asalonga pinthu pyakuipa thangwi ya imwe. Imwe musadziwa kuti pinalonga iye ndi uthambi, mbwenye anthu anango asam’phedzera. Kusiyapo pyenepi, iwo asatoma kumwaza uthambi unoyu, pontho anthu azinji asaaphedzerambo. Kodi imwe mbamudapibva tani? Panango mbamudatsukwala kakamwe. Citsandzo ceneci cisatiphedza toera kubvesesa kuti Yahova apibva tani pidalongwa iye mwakuipa. M’bodzi wa anace auzimu alonga uthambi thangwi ya iye kuna nkazi wakutoma, Eva, pontho iye akhulupira uthambi unoyu. Thangwi ya uthambi unoyu, anyakubalathu akutoma asiya kubvera Yahova, pontho pyenepi pyabweresa madawo na kufa kuna anthu onsene. (Gen. 3:1-6; Aroma 5:12) Nyatwa zonsene zinaona ife lero pa dziko ninga kufa, nkhondo na nyatwa zinango ndi thangwi ya uthambi udalonga Sathani. Mphapo Yahova asapibva tani angaona nyatwa zenezi thangwi ya uthambi udalonga Sathani? Mwakukhonda penula, pyenepi pisatsukwalisa kakamwe Yahova, mbwenye iye nee asapitiriza kukhala wakuipirwa, thangwi ndi “Mulungu wakutsandzaya.”—1 Tim. 1:11. w24.02 tsa. 8 ¶1-2

Munatowezera tani citsandzo ca Zuze? Imwe munakwanisa kusankhula cincino pinthu pinafuna imwe kucita mungayeserwa. Pfundzani kukhonda mwakucimbiza kucita pinthu pinaida Yahova, ngakhale kupinyerezera. (Mas. 97:10; 119:165) Mungacita pyenepi, imwe nee munadawa mungayeserwa. Panango imwe musadziwa kuti mwagumana undimomwene pontho musafuna kutumikira Yahova na ntimanu onsene, mbwenye musaona kuti nee muli wakukhunganyika toera kuperekeka na kubatizwa. Imwe munakwanisa kucita pinthu ninga pidacita Mambo Dhavidhi. Imwe munakwanisa kudembetera Yahova: “Mulungu, ndidingeni, pontho dziwani ntima wanga. Ndidingeni, pontho dziwani pinandidzudzumisa. Onani khala ndiri na manyerezero akuipa, pontho nditsogolereni munjira ya kwenda na kwenda.” (Mas. 139:23, 24) Yahova asapasa nkhombo ale “anansaka na ntima onsene.” Mungawangisira toera kuperekeka na kubatizwa munapangiza kuti mukunsaka na ntima onsene.—Aheb. 11:6. w24.03 tsa. 6 ¶13-15

Nyantsembe wankulu akhali na basa yakuimirira anthu pamaso pa Mulungu. Aroni, wakuti akhali nyantsembe wankulu wakutoma wa Izraeli, asankhulwa na Yahova pidamala kuzimulwa tabhernakulo. Mbwenye mpostolo Paulu afokotoza kuti pakhafunika anthu azinji toera apite pa mbuto ya nyantsembe, thangwi kufa kukhaapingiza toera apitirize kutumikira ninga anyantsembe.” (Aheb. 7:23-26) Ninga anthu akusowa ungwiro, anyantsembe anewa akhafunikambo kupereka ntsembe toera kulekererwa madawo awo. Pyenepi pisapangiza kuti anyantsembe anewa ndi akusiyana na Nyantsembe Wankulu kakamwe, Yezu Kristu. Ninga Nyantsembe wathu Wankulu, Yezu Kristu ndi “ntumiki wa . . . pa tabhernakulo yandimomwene idamangwa na Yahova, tayu na munthu.” (Aheb. 8:1, 2) Paulu alonga pyenepi thangwi “iye asapitiriza kukhala m’maso kwenda na kwenda, nkhabe munthu anafuna kupita pa mbuto yace ninga nyantsembe.” Kusiyapo pyenepi, Paulu alonga kuti Yezu ndi “wakusowa midonthi, wakusiyana na anyakudawa,” pontho mwakusiyana na anyantsembe a mu Izraeli, “iye nee asafunika kupereka ntsembe ntsiku zonsene” thangwi ya madawo ace. w23.10 tsa. 26 ¶8-9

“Kudzulu kwakale” ndi mautongi anatsogolerwa na Sathani na madimonyo ace. (Mat. 4:8, 9; 1 Juw. 5:19) M’Bhibhlya, fala yakuti “dziko” isaphatisirwa toera kulonga anthu anakhala pa dziko yapantsi. (Gen. 11:1; Mas. 96:1) Natenepa mafala akuti “dziko yapantsi yakale” ndi anthu anakhonda kutumikira Mulungu ntsiku zino. Yahova nee anasasanyira basi ene “kudzulu” na “dziko,” mbwenye anadzapifudza. Kudzulu kwakale na dziko yapantsi yakale pinadzapitirwa mbuto na “kudzulu kupswa na dziko yapantsi ipswa;” pyenepi pisabveka utongi upswa na anthu akulungama. Yahova anamalisa uipi pa dziko yapantsi mbacitisa anthu kukhala aungwiro. Pontho iye anadzacitisa dziko yapantsi kukhala yakubalika ninga munda wa Edheni. Kusiyapo pyenepi, iye anadzaticitisa kukhala na ungumi wadidi kakamwe. Anyakulamala, maboliboli, anyakukhonda kubva anadzawangiswa, pontho ale adafa anadzalamuswa muli akufa.—Iza. 25:8; 35:1-7. w23.11 tsa. 4 ¶9-10

“Nyatwa ikulu” inadzatoma mwakukhonda dikhira. (Mat. 24:21) Mbwenye mwakusiyana na pidengwa pinango, ife tisadziwa kuti nyatwa ikulu inadzatoma thimize pano. Cifupi na pyaka 2.000 nduli, Yezu acenjeza atowereri ace toera akhale akukhunganyika ntsiku ineyi mbidzati kufika. Tingakhala akukhunganyika, pinakhala pyakukhonda nentsa toera kupirira nyatwa ineyi na kuphedza anango toera acitembo pibodzi pyene. (Luka 21:36) Ife tinafunika kupirira toera kubvera Yahova, mbatinyindira kuti iye anatitsidzikiza. Mphapo tinacitanji abale na alongo athu anango angadzaluza pinthu pyawo pyonsene pyakumanungo? (Abh. 3:17, 18) Nakuti tisabvera ntsisi anango, ife tinadzaaphedza. Tinacitanji tingadzafunika kukhala pabodzi na abale na alongo athu thangwi ya kupomokerwa na nsoka wa mautongi? (Ezek. 38:10-12) Ife tinadzafunika kuafuna kakamwe toera tikwanise kupirira ndzidzi unoyu wakunentsa. w23.07 tsa. 2 ¶2-3

Anyakumanga banja anakwanisa kupfundza na citsandzo ca Akila na Prisila, banja yakuti ikhafuniwa na Akristu azinji a mu ndzidzi wa apostolo. (Aroma 16:3, 4) Iwo aphata basa, amwaza mphangwa na kuphedza anango pabodzi. (Mabasa 18:2, 3, 24-26) Mwandimomwene, Bhibhlya ingalonga Akila na Prisila ndzidzi onsene iwo asalongwa pabodzi. Anyakumanga banja anatowezera tani citsandzo cawo? Nyerezerani pinthu pizinji pyakuti imwe na ndzanu wa m’banja musafunika kupicita. Kodi imwe munakwanisa kucita pinthu pyenepi pabodzi m’mbuto mwakucita mwekha? Mwacitsandzo, Akila na Prisila akhamwaza mphangwa pabodzi. Kodi imwe musacita masasanyiro toera kucitambo pyenepi kazinji kene? Akila na Prisila akhaphatambo basa pabodzi. Panango imwe na ndzanu wa m’banja nee musaphata basa ibodzi ene, mbwenye munakwanisa kucita pabodzi mabasa a panyumba. (Ekle. 4:9) Mungaphedzana, imwe munapibva kuti mukuphata basa pabodzi, pontho munakhala na mwai wakucedza. w23.05 tsa. 22-23 ¶10-12

Tonsene tisagopa m’midzidzi inango. Midzidzi inango Dhavidhi akhagopambo. Mwacitsandzo, pikhasakwa iye na Mambo Sauli toera kumupha, Dhavidhi athawira ku Gati wakuti ukhali nzinda wa Afilisti. Akisi Mambo wa ku Gati adzindikira kuti Dhavidhi akhali nyankhondo wamphambvu adapha Afilisti “10.000.” Pidadziwa iye pyenepi, Dhavidhi ‘agopa kakamwe.’ (1 Sam. 21:10-12) Dhavidhi agopa thangwi akhanyerezera pikhafuna kuncita Akisi. Ninji pidaphedza Dhavidhi toera kukunda kugopa kwace? Pa Masalmo 56, Dhavidhi alonga mabvero ace pikhali iye ku Gati. M’bukhu ineyi ya Masalmo, Dhavidhi alonga kuti thangwi yanji akhagopa, pontho alongambo pinthu pidamphedza toera akhonde kugopa. Pikhagopa iye, Dhavidhi anyindira Yahova. (Mas. 56:1-3, 11) Dhavidhi akhali na mathangwi adidi toera kunyindira Yahova. Na ciphedzo ca Yahova, Dhavidhi acita pinthu pyakukhonda dzolowereka. Iye asangazira kuti ndi nyansala, pontho pyenepi pyamphedza. M’mbuto mwakufuna kupha Dhavidhi, Akisi akhafuna kuti Dhavidhi abuluke pakhali iye, natenepa Dhavidhi akwanisa kuthawa.—1 Sam. 21:13–22:1. w24.01 tsa. 2 ¶1-3

Mbani anthu anewa analongwa pa lemba ya ntsiku ya lero? Ndi Akristu akudzodzwa analamuswa muli akufa. Natenepa, Akristu onsene akudzodzwa angamala kuenda kudzulu, dhuzi na kunkhomo kwa nyatwa ikulu, ibodzi mwa mabasa akutoma anafuna iwo kucita ndi kumenya nkhondo. Angamala kuenda kudzulu, iwo anakhala pabodzi na Yezu na aanju, pontho anamenya nkhondo yakumalisa na anyamalwa a Mulungu. Nyerezerani basi! Lero, Akristu anango akudzodzwa akalamba, pontho nee ali na mphambvu. Mbwenye angalamuswa muli akufa mbaenda kudzulu, iwo anakhala na manungo auzimu, akukhonda kufa na amphambvu. Kusiyapo pyenepi, anadzamenya nkhondo pabodzi na Mambo wakuti ndi Nyankhondo, Yezu Kristu. Nkhondo ya Armajedhoni ingamala, iwo anaphata basa pabodzi na Yezu toera kuphedza anthu kukhala aungwiro. Mwakukhonda penula, angadzakhala kudzulu, iwo anadzacita pinthu pizinji toera kuphedza abale na alongo awo pa dziko yapantsi, kupiringana pikhacita iwo mu ndzidzi ukhali iwo pa dziko yapantsi ninga anthu akusowa ungwiro. w24.02 tsa. 6-7 ¶15-16

Anango akuti ali akukhunganyika toera kuperekeka na kubatizwa asapitiriza kunyinyirika. Thangwi yanji? Thangwi iwo asagopa kuti angamala kubatizwa anacita madawo makulu mbabuluswa mu mpingo. Khala imwe musagopa pyenepi, nyindirani kuti Yahova anakupasani mphambvu “toera mufambe mwakuthema ninga munafunira” iye. (Akol. 1:10) Iye anakupasanimbo mphambvu toera kucita pinthu pyadidi. Iye aphedza kale anthu azinji toera kucita pinthu pyadidi. (1 Akor. 10:13) Na thangwi ineyi, ndi anthu akucepa kakamwe anabuluswa mu mpingo. Yahova asaphedza atumiki ace toera apitirize kukhala akukhulupirika. Anthu onsene asayeserwa toera kucita pinthu pyakuipa. (Tiya. 1:14) Mbwenye imwe munakwanisa kusankhula pinafuna imwe kucita mungayeserwa. Undimomwene ndi wakuti ndimwe anafunika kusankhula pinafuna imwe kucita na umaso wanu. Maseze anthu anango asalonga kuti nee tinakwanisa kutonga mabvero athu na pinthu pinacita ife, unoyu ndi uthambi. Imwe munakwanisa kutonga mabvero anu mbamucalira kucita pinthu pyakuipa. w24.03 tsa. 5 ¶11-12