Junho

Yahova apasa nkhombo Akristu a mu ndzidzi wa apostolo thangwi yakucita pinthu mwakubverana na makhaliro awo. Iwo kazinji kene akhatcingwa, pontho midzidzi inango iwo akhatcingwa mwakukhonda dikhira. Onani pinthu pidacitikira Bharnabhe na mpostolo Paulu mu ndzidzi ukhamwaza iwo mphangwa ku Listra. Pakutoma, iwo atambirwa mwadidi na anthu akhamwazira iwo mphangwa. Mbwenye mukupita kwa ndzidzi, anyakutcinga “anyengerera mwinji wa anthu,” pontho anango mwa anthu anewa amenya Paulu na miyala mbansiya dhuzi na kufa. (Mabasa 14:19) Mbwenye Bharnabhe na Paulu apitiriza kumwaza mphangwa m’mbuto zinango. Ndi nkhombo zipi zidakhala na iwo? Iwo aphedza anthu azinji “toera kukhala anyakupfundza,” pontho pinthu pidalonga iwo na citsandzo cawo pyawangisa Akristu andzawo. (Mabasa 14:21, 22) Anthu azinji aphedzeka na mabasa adacita Paulu na Bharnabhe mwakukhonda tsalakana kutcingwa kwawo. Munjira ibodzi ene, Yahova anadzatipasa nkhombo tingapitiriza kucita basa idatipasa iye. w23.04 tsa. 16-17 ¶13-14

Mambo Dhavidhi akhali na anyamalwa akugopswa kakamwe mu umaso wace, pontho kazinji kene akhaphemba ciphedzo ca Yahova kubulukira m’phembero. Dhavidhi akhali na cinyindiro cakuti Yahova akhabvesera na kutawira maphembero ace. Imwe munakwanisambo kukhala na cinyindiro cibodzi cene. Bhibhlya isatipasa cinyindiro cakuti Yahova anakwanisa kutipasa udziwisi na mphambvu toera kupirira. Yahova panango anaphatisira abale na alongo athu peno anthu akuti nee asantumikira toera kutiphedza. Maseze midzidzi inango Yahova nee anatawira maphembero athu munjira inadikhira ife, mbwenye tisadziwa kuti iye anaatawira. Iye anatipasa pinthu pinafuna ife, pontho anatipasa pinthu pyenepi mu ndzidzi unafuna ife. Natenepa pitirizani kucita maphembero na cikhulupiro cakuti Yahova anakutsalakanani cincino, pontho mu dziko ipswa iye ‘anadzakwanirisa cifuno ca pinthu pyonsene piri na umaso.’—Mas. 145:16. w23.05 tsa. 8-9 ¶4; tsa. 13 ¶17-18

Mphyadidi kakamwe kunyerezera nkhombo zinafuna kukhala na ife tingakwanirisa cifuno. Ndi nkhombo zipi zakuti munakwanisa kuzinyerezera? Khala cifuno canu ndi cakuleri Bhibhlya peno kucita phembero, nyerezerani kuti pyenepi pinawangisa tani uxamwali wanu na Yahova. (Mas. 145:18, 19) Khala cifuno canu ndi ca kukulisa makhaliro Acikristu, nyerezerani kuti pyenepi pinakuphedzani tani toera kubverana mwadidi na anango. (Akol. 3:14) Panango pinakhala mwadidi kulemba mathangwi anakucitisani kufuna kukwanirisa pifuno pyanu. Buluka penepo, onani mathangwi anewa mwakubwereza-bwereza. Cedzanimbo na anthu akuti anakuphedzani toera kukwanirisa pifuno pyanu. (Mis. 13:20) Ntsiku zinango nee tisakhala na cifuno cakuwanga toera kukwanirisa pifuno pyathu. Kodi pyenepi pisabveka kuti nee tinakwanisa kukwanirisa pifuno pyathu? Nkhabe. Ife tinakwanisa kukwanirisa cifuno cathu maseze ntsiku zinango nee tisakhala na cifuno cakuwanga. Ndimomwene kuti pyenepi pinakhala pyakunentsa, mbwenye tinatsandzaya kakamwe tingakwanirisa pifuno pyathu. w23.05 tsa. 27-28 ¶5-8

Kudziwa kuti tinathimbana na nyatwa thangwi ya pisankhulo pyathu pyakuipa, kunatikulumiza toera kulonga madawo athu, kusasanyira madodo athu na kucalira kucita pontho madodo mabodzi ene. Kucita pyenepi, kunatiphedza toera tipitirize m’mapika akuthamanga toera kuwina umaso. Khala mwacita cisankhulo cakuipa, musafunika kucitanji? Lekani kubvunga ndzidzi wanu na mphambvu zanu toera kuyesera kupangiza kuti nee mwacita cinthu cakuipa peno toera kupasa mulando anango. M’mbuto mwace, dzindikirani madodo anu, pontho wangisirani toera kucita pinthu pyadidi. Khala muli kupasika mulando thangwi ya pinthu pyakuipa pidacita imwe, mwakucepeseka citani phembero kuna Yahova, longani madawo anu, pontho mphembeni toera akulekerereni. (Mas. 25:11; 51:3, 4) Phembani kulekererwa kuna ale adadawira imwe, pontho khala ndi pyakufunika phembani ciphedzo ca akulu a mpingo. (Tiya. 5:14, 15) Pfundzani na madodo anu, pontho wangisirani toera mukhonde kuacita pontho. Mu ndzidzi unacita imwe pyenepi, khalani na cinyindiro cakuti Yahova anakubverani ntsisi, pontho anakuphedzani.—Mas. 103:8-13. w23.08 tsa. 28-29 ¶8-9

Yeoyadha aphedza Mambo Yeowasi toera kukhala munthu wadidi. Natenepa pikhali mambo Yeowasi m’phale, iye akhafuna kukomeresa Yahova. Mbwenye pidafa Yeoyadha, Yeowasi atoma kubvesera atsogoleri akupanduka. (2 Kro. 24:4, 17, 18) Maseze Yahova aipirwa kakamwe na pyenepi, iye “akhatumiza aprofeta kuna iwo toera abwerere kuna Yahova . . . , mbwenye iwo akakhonda kuabvera.” Iwo nee abverambo Zakariya mwana wa Yeoyadha, wakuti nee akhali basi ene mprofeta wa Yahova na nyantsembe, mbwenye akhalimbo wacibale wa Yeowasi. Kusiyapo pyenepi, Mambo Yeowasi apha Zakariya. (2 Kro. 22:11; 24:19-22) Yeowasi nee apitiriza kugopa Yahova. Yahova akhadalonga kuti: “Ale anakhonda kundilemedza, nee anadzalemedzwa.” (1 Sam. 2:30) Mukupita kwa ndzidzi, anyankhondo akucepa a Asirya akunda “nsoka ukulu wa anyankhondo” a Yeowasi, pontho ‘ansiya mbakabva kupha kakamwe.’ (2 Kro. 24:24, 25) Pidabuluka Asirya, Yeowasi aphiwa na atumiki ace thangwi yakupha Zakariya. w23.06 tsa. 18-19 ¶16-17

Mpostolo Paulu akhala pabodzi na abale ku Efeso mbamwaza mphangwa zadidi na kupfundzisa anthu. (Mabasa 19:1, 8-10; 20:20, 21) Iye akhafuna kakamwe abale na alongo anewa, pontho akhafuna kuaphedza toera apitirize kukhala akukhulupirika kuna Yahova. Abale na alongo a ku Efeso adalembera Paulu akhakhulupira kakamwe pinthu pyakuphonyeka na pyamizimu. Anthu a mu nzinda wa Efeso akhakomerwa kakamwe na makhaliro aulukwali, pontho iwo nee akhali na manyadzo thangwi yakucita pyenepi. Anthu kazinji kene akhacedza makani aulukwali m’mbuto za masendzekero na m’mbuto za uphemberi. (Aef. 5:3) Anthu azinji ku Efeso ‘nee akhakwanisabve kusiyanisa cadidi na cakuipa.’ Mafala anewa asabveka kuti “iwo akhadasiya kubva kupha” muntima angacita pinthu pyakuipa. (Aef. 4:17-19) Thangwi mbadzati kudziwa Yahova na kupfundza kusiyanisa cadidi na cakuipa, pikhali ninga iwo nee akhabva kupha, peno cikumbuntima cawo nee cikhaakhondesa kucita pinthu pyakuipa. Na thangwi ineyi, Paulu alonga kuti iwo ‘akhali ncidima, pontho akhali kutali na umaso unapereka Mulungu.’ Mbwenye Aefesi anango abuluka ncidima. w24.03 tsa. 20 ¶2, 4; tsa. 21 ¶5-6

Jidhiyoni akhafunika kuphata basa mwakuwanga toera kutumikira ninga ntongi. Pidakundwa Amidhiyani pa nkhondo namasiku mbathawa, Jidhiyoni aathamangira kutomera ku Gowa ya Yezrieli mpaka ku Nkulo wa Yordani. (Aton. 7:22) Kodi Jidhiyoni abwerera pidafika iye ku Yordani? Nkhabe. Maseze akhadaneta, iye na anyankhondo ace 300 awambuka nkulo mbapitiriza kuathamangira. Buluka penepo, iye athamangira Amidhiyani mbaaphata. (Aton. 8:4-12) Jidhiyoni anyindira kuti Yahova mbadampasa mphambvu, pontho Yahova acita pyenepi. (Aton. 6:14, 34) Paulendo unango, Jidhiyoni na anyankhondo ace athamangira amambo a Midhiyani na miyendo mu ndzidzi wakuti iwo akhathamanga na makamelo. (Aton. 8:12, 21) Ngakhale tenepo, Mulungu aphedza Aizraeli toera aphate Amidhiyani mbawina nkhondo. Akulu a mpingo anakwanisambo kunyindira Yahova, wakuti “nkhabe neta, nee kukhala wakusowa mphambvu.” Natenepa ndzidzi onsene iye anakupasani mphambvu.—Iza. 40:28, 29. w23.06 tsa. 6 ¶14, 16

Ife tinakwanisa kukhala akuwanga mwakukhonda tsalakana mayesero anafuna kuthimbana na ife. Natenepa, nyindirani Yahova. Onani kuti Bharaki awina tani nkhondo thangwi ya kunyindira pitsogolero pya Yahova. Maseze mu Izraeli nee mukhalibve xango peno dipa, Yahova ampanga toera aende kamenyane na anyankhondo a ku Kanani akuti akhali na pida pizinji, pontho akhatsogolerwa na Sizera. (Aton. 5:8) Mprofeta wa nkazi Dhebhora apanga Bharaki toera abuluke pa phiri toera aende ku mbuto ya kuzwerera kamenyana na Sizera wakuti akhali na ngolo za anyankhondo 900. Maseze mbapidakhala pyakunentsa kuna Aizraeli toera kumenyana na anyankhondo akuti akhali na ngolo pa mbuto ineyi, Bharaki abvera. Mu ndzidzi ukhatcita anyankhondo pa Phiri ya Tabhori, Yahova acitisa kuti madzi abvumbe kakamwe. Ngolo za Sizera zatcerera m’matope, pontho Yahova aphedza Bharaki toera kuwina. (Aton. 4:1-7, 10, 13-16) Munjira ibodzi ene, Yahova anatiphedza toera kuwina tingan’nyindira na kubvera pitsogolero pinatipasa iye mukuphatisira gulu yace. w23.07 tsa. 19 ¶17-18

Ife tisafunika kukhala akupirira toera tidzapulumuswe. Ninga atumiki akukhulupirika a mu ndzidzi wakale, ife tisafunika kudikhira mwakupirira toera Mulungu akwanirise mapikiro ace. (Aheb. 6:11, 12) Bhibhlya isatilandanisa na nyakulima. (Tiya. 5:7, 8.) Nyakulima asaphata basa mwakuwanga toera kubzwala na kuthirira pinthu pidabzwala iye, mbwenye nee asadziwa ndzidzi unafuna ipyo kukula. Natenepa nyakulima asafunika kudikhira mwakupirira, mbanyindira kuti anadzabvuna pinthu pidabzwala iye. Munjira ibodzi ene, ife tisapitiriza kutumikira Yahova mwaphinga, maseze ‘nee tisadziwa ntsiku inafuna kubwera Mbuyathu.’ (Mat. 24:42) Ife tisadikhira mwakupirira mbatinyindira kuti pa ndzidzi wace wakuthema, Yahova anadzakwanirisa mapikiro ace onsene. Tingakhonda khala akupirira, panango tinaneta mbatisiya kutumikira Yahova mwapang’ono na pang’ono. Kusiyapo pyenepi, panango tinatoma kucita pinthu pinaona ife kuti pinatitsandzayisa cincino. Mbwenye tingakhala akupirira, tinapitiriza kutumikira Yahova mpaka kunkhomo mbatipulumuswa.—Mik. 7:7. w23.08 tsa. 22 ¶7

Tingalandanisa profesiya inagumanika pa Dhanyeli 2:41-43 na maprofesiya anango a m’bukhu ya Dhanyeli na Apokalipse tinakwanisa kubvesesa kuti miyendo ineyi isaimirira Estados Unidos na Bhritanya akuti asaphata basa pabodzi, pontho ndi amphambvu kakamwe lero. Thangwi ya utongi unoyu wamphambvu kakamwe Danyeli alonga kuti: “Khundu ibodzi ya umambo unoyu inadzakhala yakuwanga, khundu inango inadzakhala yakufewa.” Thangwi yanji khundu inango inadzakhala yakufewa? Thangwi anthu a umambo unoyu mbadacitisa kuti iwo ukhonde kukhala wamphambvu. Ife tisapfundza undimomwene uzinji wakufunika kakamwe kubulukira mu dzimunthu idafokotoza Dhanyeli. Cakutoma, utongi wa dziko yonsene wa Anglo-Amerikana usapangiza kuti ndi wamphambvu kakamwe. Mwacitsandzo, iwo ukhali pabodzi na madziko adawina Nkhondo Yakutoma Ya Dziko Yonsene Yapantsi na Nkhondo Yaciwiri Ya Dziko Yonsene Yapantsi. Mbwenye utongi unoyu wa pa dziko yonsene uli kufeweswa, pontho unapitiriza kufeweswa na uviyaviya unacitwa na anthu anatongwa na utongi unoyu. Caciwiri, utongi unoyu wa pa dziko yonsene unadzakhala wakumalisa mu ndzidzi unafuna kudzafudza Umambo wa Mulungu mautongi onsene a pa dziko yapantsi. w23.08 tsa. 10-11 ¶12-13

M’midzidzi inango, Dhavidhi akhali wakutsukwala kakamwe thangwi ya nyatwa zikhatamba iye. (Mas. 18:4, 5) Ngakhale tenepo, Yahova am’balangaza na citsalakano cace caufuni. Yahova atsogolera xamwali wace wakuti akhadaneta mbamuendesa “ku mbuto yakuti iri na thongwe yadidi.” Kusiyapo pyenepi, iye antsogolera toera “kuenda kapuma ku mbuto yakuti iri na madzi.” Pyenepi pyaphedza Dhavidhi toera akhale pontho na mphambvu mbapitiriza kutumikira Yahova mwakutsandzaya. (Mas. 18:28-32; 23:2) Munjira ibodzi ene lero, “thangwi ya ufuni ukulu wa Yahova, ife nee tafudzwa” mu ndzidzi ukhatamba ife mayesero peno nyatwa. (Ciliro 3:22; Akol. 1:11) Kazinji kene umaso wa Dhavidhi ukhali pangozwi, pontho anyamalwa ace akhali amphambvu kakamwe. Mbwenye ufuni wa Yahova ukham’phedza toera akhale wakutsidzikizika. Dhavidhi akhapibva kuti ndzidzi onsene Yahova akhali na iye, pontho pyenepi pikham’balangaza. Na thangwi ineyi, iye alonga: “[Yahova] andipulumusa ku pinthu pyonsene pikhagopa ine.” (Mas. 34:4) Maseze midzidzi inango Dhavidhi akhagopa kakamwe, iye akwanisa kukhala wacipapo thangwi akhadziwa kuti Yahova akhanfuna. w24.01 tsa. 30 ¶15-17

Pfundzani na pisankhulo pyakuipa pidacita Yeowasi. Pidafa Nyantsembe Wankulu Yeoyadha, Yeowasi asankhula axamwali akuipa. (2 Kro. 24:17, 18) Iye abvera atsogoleri a ku Yuda akuti nee akhafuna Yahova. Panango munatawirambo kuti Yeowasi nee akhafunika kucita uxamwali na anthu anewa, thangwi iwo akhacita pinthu pyakuipa. Mbwenye iye abvera uphungu wawo wakuipa. Na thangwi ineyi, pidasandikwa iye na Zakariya, mwana wa nyantsembe Yeoyadha, Yeowasi am’phesa. (2 Kro. 24:20, 21; Mat. 23:35) Pyenepi pikhali pyakuipa na pyakusowa ndzeru! Umaso wa Yeowasi watoma mwadidi, mbwenye mwakutsukwalisa iye adzakhala nyakupanduka na phanga. Pakumalisa iye adzaphiwa na anyabasa ace. (2 Kro. 24:22-25) Umaso wa Yeowasi mbudakhala wakusiyana kakamwe mbadapitiriza kubvera Yahova na ale akhafuna Yahova. w23.09 tsa. 9 ¶6

Yezu akhadziwa kuti Pedhru akhagopa panango thangwi akhapibva kuti nee athema kukhala pabodzi na iye. Mbwenye Yezu akhadziwa kuti Pedhru mbadapitiriza kukhala wakukhulupirika. Natenepa, Yezu apanga Pedhru mwaufuni kuti “leka kugopa.” Mafala adalonga Yezu kuna Pedhru acinja umaso wace. Mukupita kwa ndzidzi, Pedhru na Andreya asiya makokota awo mbatowera Yezu, pontho Yahova aapasa nkhombo zizinji. (Marko 1:16-18) Pedhru akhali na nkhombo zizinji mu ndzidzi ukhatowera iye Kristu. Iye aona Yezu mbawangisa atenda, kubulusa madimonyo na kulamusa anthu muli akufa. (Mat. 8:14-17; Marko 5:37, 41, 42) Pedhru aonambo masomphenya akudzumatirisa kakamwe a mu ndzidzi ukhafuna kukhala Yezu Mambo wa Umambo wa Mulungu, pontho iye cipo aduwala pyenepi. (Marko 9:1-8; 2 Ped. 1:16-18) Mwandimomwene, Pedhru nee mbadakhala na mwai wakuona pyenepi mbadakhonda kutowera Yezu. Mwakukhonda penula, iye atsandzaya kakamwe thangwi yakukwanisa kukunda mabvero akuipa mbakhala na nkhombo zizinji! w23.09 tsa. 21 ¶4-5

Mu tsamba yace yakutoma, mpostolo Pedhru aphatisira mafala akuti “funanani kakamwe.” Ufuni unoyu usaphimbira tayu basi madawo akucepa, mbwenye “madawo mazinji kakamwe.” (1 Ped. 4:8) Panango Pedhru akumbuka pinthu pidapfundzisa Yezu pyaka pingasi nduli thangwi yakulekerera. Pa ndzidzi unoyu, pisaoneka kuti Pedhru akhanyerezera kuti mbadakhala munthu wadidi kakamwe angalekerera m’bale wace “kanomwe.” Mbwenye Yezu alonga kuti tisafunika kulekerera “mpaka 77.” Pyenepi pisabveka kuti tisafunika kulekerera mwakusowa madire. (Mat. 18:21) Khala musaona kuti ndi pyakunentsa kubvera uphungu unoyu, lekani kutsukwala! Atumiki onsene a Yahova akusowa ungwiro midzidzi inango asaona kuti ndi pyakunentsa toera kulekerera. Mbwenye pinafunika ife kucita ndi kuwangisira toera kulekerera m’bale peno mulongo mbatikhazikisa ntendere na iye. w23.09 tsa. 29 ¶12

Pikhali iye m’mimba mwa ntsomba, Yona atcunyuka, pontho akhali na cinyindiro cakuti Yahova mbadabvesera phembero yace na kum’phedza. Yahova apulumusa Yona, pontho mukupita kwa ndzidzi akhala dzololo toera kucita basa idapaswa iye na Yahova. (Yona 2:10–3:4) Mu ndzidzi wa nyatwa, kodi musanentseka toera kucita phembero mbamulonga pinakudzudzumisani? Peno musafewa manungo toera kupfundza Bhibhlya? Kumbukani kuti Yahova asabvesesa mwadidi pinakucitikirani. Natenepa, maseze mulonge pinthu pyakucepa m’phembero, khalani na cinyindiro cakuti Yahova anakupasani pyonsene pinafuna imwe. (Aef. 3:20) Khala ndi pyakunentsa kuna imwe kuleri na kupfundza Bhibhlya thangwi muli kubva kupha, mwaneta, peno muli wakudzudzumika, imwe munakwanisa kubvesera audhyu ya Bhibhlya peno audhyu ya mabukhu athu. Imwe munakwanisambo kubvesera nyimbo zathu peno kuona vidhyu mu jw.org. Yahova asafuna kukupasani mphambvu, pontho iye anacita pyenepi mungacita phembero kuna iye mbamusaka mitawiro ya maphembero anu m’Bhibhlya na pinthu pinango pinakupasani iye. w23.10 tsa. 13 ¶6; tsa. 14 ¶9

Tabhernakulo na matemplo akhamangwa mu Yerusalemu akhali na pinthu pyakulandana nkati. Nkati mukhali na mbuto ziwiri. Ibodzi ikhacemerwa “Mbuto Yakucena,” inango ikhacemerwa “Mbuto Yakucena Kakamwe,” pontho mbuto zenezi zikhagawiwa na nguwo ikulu. (Aheb. 9:2-5; Eks. 26:31-33) Nkati mwa Mbuto Yakucena mukhali na cakuikhira nyale ca ouro, guwa yakupisira insenso na meza ya mikate ya ntsembe. Mbwenye basi ene “anyantsembe adadzodzwa” ndiwo akhafuna kupita mu Mbuto Yakucena toera kucita basa yawo. (Num. 3:3, 7, 10) Mu Mbuto Yakucena Kakamwe mukhali na bokosi ya cibverano yakucitwa na ouro yakuti ikhapangiza kuti Yahova ali penepo. (Eks. 25:21, 22) Basi ene nyantsembe wankulu ndi akhatawiriswa kupita mu Mbuto Yakucena Kakamwe kabodzi pa caka, pa Ntsiku Yakucenesa Madawo. (Lev. 16:2, 17) Iye akhapita mwenemo na ciropa ca cinyama toera kulekererwa madawo ace na madawo a mbumba yonsene. Yahova apangiza mabvekero a pinthu pya mu tabhernakulo.—Aheb. 9:6, 7. w23.10 tsa. 27 ¶12

Mwakubwereza-bwereza Mafala a Mulungu asatikulumiza toera “kufunana unango na ndzace.” (Juw. 15:12; Aroma 13:8; 1 Ates. 4:9; 1 Ped. 1:22; 1 Juw. 4:11) Mbwenye Ufuni ndi n’khaliro wa muntima mwathu, pontho nkhabe munthu anakwanisa kuuona. Mphapo tinapangiza tani kuti tisafuna abale na alongo athu? Kubulukira m’mafala na m’macitiro athu. Pana njira zizinji zakupangiza kuti tisafuna abale na alongo athu. Onani pitsandzo pingasi: “Longani undimomwene kuna unango na ndzace.” (Zak. 8:16) “Pitirizani kukhala muntendere unango na ndzace.” (Marko 9:50) “Khalani akutoma pakupangiza cilemedzo kuna unango na ndzace.” (Aroma 12:10) “Tambiranani unango na ndzace.” (Aroma 15:7) ‘Pitirizani kulekererana unango na ndzace.’ (Akol. 3:13) “Pitirizani kuthukulirana mitolo ya unango na ndzace.” (Agal. 6:2) ‘Pitirizani kubalangazana unango na ndzace.’ (1 Ates. 4:18) ‘Pitirizani kuwangisana unango na ndzace.’ (1 Ates. 5:11) ‘Citiranani phembero unango na ndzace.’—Tiya. 5:16. w23.11 tsa. 9 ¶7-8

Ntsiku zonsene ife tisacita pisankhulo pyakuti pisaphemba cikhulupiro cakuwanga. Mwacitsandzo, ife tisacita pisankhulo thangwi ya uxamwali, ubalangazi, khala tisafunika kupfundza kakamwe peno kupfundza pang’ono, kumanga banja, kubala ana na basa. Natenepa tisafunika kubvundzika: ‘Pisankhulo pyanga pisapangiza kuti ndiri na cinyindiro cakuti mwakukhonda dembuka dziko ino inapitirwa mbuto na dziko ipswa ya Mulungu? Peno ndisacita pisankhulo ninga pinacita anthu anakhulupira kuti kufa ndi kumala kwa pyonsene?’ (Mat. 6:19, 20; Luka 12:16-21) Ife tinacita pisankhulo pyadidi tingawangisa cikhulupiro cathu cakuti dziko ipswa iri dhuzi kakamwe. Ife tisafunikambo kukhala na cikhulupiro cakuwanga thangwi tisathimbana na pinentso. Mwacitsandzo, panango tinatcingwa, kuthimbana na utenda wakukhonda wanga peno pinthu pinango pyakuti pinaticitisa kutsukwala. Pakutoma, panango tinaona kuti tinakwanisa kupirira pinentso pyenepi. Mbwenye pinentso pyenepi pingapitiriza mu ndzidzi uzinji, ife tinafunika kukhala na cikhulupiro cakuwanga toera tikwanise kupirira mbatipitiriza kutumikira Yahova mwakutsandzaya.—1 Ped. 1:6, 7. w23.04 tsa. 27 ¶4-5

Yahova asafuna kuti ticite pinthu mwakubverana na maphembero athu. Mwacitsandzo, m’bale panango anaphemba Yahova toera am’phedze kugumana ndzidzi kubasa kwace kuti akwanise kuenda ku nsonkhano wa gawo. Yahova anatawira tani phembero ineyi? Panango iye anapasa cipapo m’bale unoyu toera akwanise kuphemba patrau wace. Mbwenye m’bale asafunika kuenda kuna patrau wace mbalonga naye. Panango iye anafunika kucita phembo ineyi mwakubwereza-bwereza. Panango iye anaperekeka toera kuphata basa ntsiku zinango peno toera akhonde kulipwa ntsiku zenezi zinafuna iye kuenda ku nsonkhano. Yahova asafuna kuti ticite phembero mwakubwereza-bwereza thangwi ya pinthu pinatidzudzumisa. Yezu alonga kuti pinthu pinango pinaphemba ife nee tinapipaswa mu ndzidzi ubodzi ene. (Luka 11:9) Mbwenye lekani kusiya kucita phembero. Citani phembero na ntima onsene, pontho mwakubwereza-bwereza. (Luka 18:1-7) Tingacita pyenepi tinapangiza kuna Yahova kuti mwandimomwene tisafunadi pinthu pinaphemba ife. Kusiyapo pyenepi, tinapangiza kuti tisakhulupira kuti iye anakwanisa kutiphedza. w23.11 tsa. 22 ¶10-11

Yahova apikira kuna xamwali wace Abhrahamu kuti madzindza onsene pa dziko yapantsi anadzapaswa nkhombo kubulukira mwa iye. (Gen. 15:5; 22:18) Nakuti Abhrahamu akhakhulupira kakamwe Mulungu, iye akhali na cinyindiro cakuti pikiro ineyi ya Mulungu mbidakwanirisika. Ngakhale tenepo, mu ndzidzi ukhali Abhrahamu na pyaka 100 na nkazace pyaka 90, iwo nee akhali na mwana. (Gen. 21:1-7) Mbwenye Bhibhlya isalonga: ‘Thangwi ya cidikhiro, Abhrahamu akhulupira kuti mbadakhala baba wa madzindza mazinji mwakubverana na pidapangwa iye.’ (Aroma 4:18) Imwe musadziwa kuti pinthu pikhadikhira Abhrahamu pyadzacitika. Iye adzabala mwana wakuti akhan’dikhira mu ndzidzi uzinji. Dzina yace ikhali Izaki. Thangwi yanji Abhrahamu akhanyindira kuti Yahova mbadakwanirisa pikiro yace? Nakuti Abhrahamu akhadziwa mwadidi Mulungu, “iye akhanyindira na ntima onsene kuti Mulungu mbadacita pidapikira iye.” (Aroma 4:21) Yahova akomerwa na Abhrahamu mbamuona kuti ndi wakulungama thangwi yacikhulupiro cace.—Tiya. 2:23. w23.12 tsa. 8 ¶1-2

M’phale wakuti ndi wakunyindirika asaphata mwadidi mabasa ace onsene. Onani citsandzo cadidi kakamwe ca Yezu. Iye akhaphata mwadidi kakamwe mabasace. Iye akhaphata mwadidi mabasa adapaswa iye na Yahova ngakhale mu ndzidzi wakuti pikhali pyakunentsa kuphata mabasa anewa. Iye afuna anthu, makamaka anyakupfundza ace, pontho apereka umaso wace thangwi ya iwo. (Juw. 13:1) Wangisirani toera kuphata mabasa onsene anapaswa imwe toera kupangiza kuti musatowezera Yezu. Khala nee musadziwa kuti munaphata tani basa yanu, khalani wakucepeseka, pontho phembani ciphedzo kuna abale akukola. Lekani kunyerezera kuti kuphata basa pang’ono basi pyakwana. (Aroma 12:11) Mbwenye khala ‘mukuphatira Yahova, tayu anthu’ munawangisira toera kuphata mwadidi basa yanu mbamumalisa basa yonsene inapaswa imwe. (Akol. 3:23) Dziwani kuti nee ndimwe munthu wakulungama, natenepa khalani wakucepeseka, pontho tawirani madodo anacita imwe.—Mis. 11:2. w23.12 tsa. 26 ¶8

Ife tisakhala akutsandzaya kakamwe tingabatizwa mbaticita khundu ya atumiki a Yahova. Ndi mwai ukulu kakamwe kukhala na uxamwali wakuwanga na Yahova. Ife tisatawirambo pidalonga nyamasalmo Dhavidhi kuti: “Nyakutsandzaya ndi ule anasankhula imwe [Yahova] mbamum’bweresa dhuzi na imwe toera akhale panyumba panu.” (Mas. 65:4) Nee ndi anthu onsene anatawiriswa na Yahova toera acite khundu ya atumiki ace. Iye asasankhula ale anapangiza kuti asafuna kukhala na uxamwali na iye. (Tiya. 4:8) Mungasankhula kuperekeka kuna Yahova mbamubatizwa, khalani na cinyindiro cakuti mungamala kubatizwa, iye ‘anadzakutsanulirani nkhombo mbamukhonda kusowa cinthu.’ (Mal. 3:10; Yer. 17:8) Ubatizo ndi kutoma kwa umaso wanu toera kutumikira Yahova. Musafunika kuwangisira toera kucita pinthu mwakubverana na pidapikira imwe, maseze muthimbane na mayesero a cikhulupiro. (Ekle. 5:4, 5) Ninga nyakupfundza wa Yezu, imwe musatowezera citsandzo ca Yezu na kubvera mwadidi matongero ace.—Mat. 28:19, 20; 1 Ped. 2:21. w24.03 tsa. 8 ¶1-3

Mphapo ndiye tani khala imwe na ndzanu wa m’banja nee musakomerwa kukhala pabodzi toera kucedza? Munacitanji? Nyerezerani citsandzo ca moto. Moto nee usagaka kakamwe mu ndzidzi ubodzi ene unaphatiswa iwo. Iwo usafunika kuikhwa nkhuni zing’ono pakutoma, buluka penepo nkhuni zikulu. Munjira ibodzi ene, imwe munakwanisambo kutoma kukhala na ndzidzi wakucepa toera kucedza ntsiku zonsene. Pontho citani pinthu pyakuti uwiri wanu musakomerwa napyo. (Tiya. 3:18) Mungacita pyenepi, panango munatoma pontho kufunana kakamwe unango na ndzace. Cilemedzo ndi cakufunika kakamwe m’banja. Cilemedzo ndi ninga muya wakuti usacitisa moto kupitiriza kugaka. Pangasoweka muya, moto unathima mwakucimbiza. Munjira ibodzi ene, pangasoweka cilemedzo kufunana kwa anthu awiri akumanga banja kunathowa mwakucimbiza. Munjira inango, anyakumanga banja anawangisira toera kulemedzana unango na ndzace asawangisirambo toera ufuni wawo upitirize kukhala wakuwanga. Ngakhale tenepo, kumbukani kuti nee musafunika basi ene kunyerezera kuti musalemedza ndzanu wa m’banja, mbwenye ndzanu wa m’banja asafunika kupibva kuti asalemedzwa. w23.05 tsa. 22 ¶9; tsa. 24 ¶14-15

Midzidzi inango panango tinagopa kakamwe. Mu ndzidzi wakale, atumiki akukhulupirika a Mulungu alonga pya midzidzi ikhali iwo akutsukwala na akugopa thangwi ya anyamalwa awo na pinthu pinango. (Mas. 18:4; 55:1, 5) Munjira ibodzi ene, panango tinatcingwa kuxikola, kubasa, na acibale athu peno na atongi. Panango tinagopa kufa thangwi ya utenda. Midzidzi ineyi panango tinapibva akusowa mphambvu ninga mwanang’ono. Mphapo Yahova asatiphedza tani m’midzidzi ninga ineyi? Iye asatibalangaza na kutiphedza toera tikhale akukhurudzika. Natenepa ndzidzi onsene citani phembero kuna Yahova, pontho lerini Mafalace. (Mas. 77:1, 12-14) Mungacita pyenepi, cinthu cakutoma cinafuna kucita imwe mungathimbana na nyatwa ndi kuphemba ciphedzo kuna Babanu wakudzulu. Pangani Yahova pinthu pinagopa imwe na pinthu pinakunentsani. Buluka penepo mbvesereni kubulukira m’Mafalace, pontho iye anakubalangazani.—Mas. 119:28. w24.01 tsa. 24-25 ¶14-16

Ndi pyakufunika kakamwe kukhala na cifuno cakuwanga toera kukwanirisa pifuno pyathu pyauzimu. Munthu angakhala na cifuno toera kukwanirisa cifuno cace, asawangisira toera kucita pyenepi. Pontho cifuno cathu cingakhala cakuwanga, tinakwanisa kukwanirisa pifuno pyathu. Mphapo munacitanji toera mukhale na cifuno cakuwanga? Phembani Yahova toera akuphedzeni kukhala na cifuno cakuwanga. Mukuphatisira nzimu wace, Yahova anakuphedzani toera kukwanirisa cifuno canu. Midzidzi inango ife tisakhazikisa pifuno thangwi tisafunika, pontho ndi pyadidi kucita pyenepi. Mbwenye panango nee tiri na cifuno cakuwanga toera kukwanirisa cifuno cathu. Nyerezerani pinthu pidakucitirani Yahova. (Mas. 143:5) Mpostolo Paulu akhanyerezera kukoma ntima kukulu kudapangiza Yahova kuna iye, pontho pyenepi pyam’phedza toera kukhala na cifuno cakutumikira Yahova mwaphinga. (1 Akor. 15:9, 10; 1 Tim. 1:12-14) Munjira ibodzi ene, munganyerezera pinthu pidakucitirani Yahova, pinakuphedzani toera kukwanirisa pifuno pyanu.—Mas. 116:12. w23.05 tsa. 27 ¶3-5

Babathu wakudzulu asatsandzaya kakamwe tingasimba dzina yace. (Mas. 119:108) Kodi pyenepi pisabveka kuti Mulungu wathu wamphambvu zonsene akhala ninga anthu akusowa ungwiro akuti asafuna kakamwe kusimbwa na kulongwa mwadidi? Nkhabe. Tingasimba Yahova tisaphedzerambo toera kupangiza kuti pidalonga Sathani thangwi ya ife ndi uthambi. Thangwi yanji? Thangwi iye alonga kuti anthu nee mbadakwanisa kukhala akukhulupirika kuna Yahova na kutsidzikiza dzina yace. Sathani alonga kuti nee m’bodzi mbadakwanisa kupitiriza kukhala wakukhulupirika kuna Mulungu angayeserwa. Kusiyapo pyenepi, Sathani alonga kuti tonsene mbatidasiya Yahova tingapaswa cinthu cadidi kakamwe. (Yobe 1:9-11; 2:4) Mbwenye Yobe apangiza kuti Sathani akhalonga uthambi. Mphapo ife tinakwanisambo tani kucita pyenepi? M’bodzi na m’bodzi wa ife ali na mwai wakupangiza kuti asaphedzera dzina ya Yahova mukuntumikira mwakukhulupirika. (Mis. 27:11) Unoyu ndi mwai ukulu kakamwe. w24.02 tsa. 8-9 ¶3-5

Pidafa Mose na Yoswa, Yahova asankhula atongi toera kutsogolera atumiki ace. Buluka penepo, mu ndzidzi wa amambo Yahova asankhula aprofeta toera kutsogolera atumiki ace. Amambo akukhulupirika kuna Yahova mbadakwanisa kuphemba uphungu kuna aprofeta anewa. Mwacitsandzo, Mambo Dhavidhi atawira mwakucepeseka kusandikwa na mprofeta Natani. (2 Sam. 12:7, 13; 1 Kro. 17:3, 4) Mambo Yosafati abvera mprofeta Yazieli toera kudziwa pikhafuna iye kucita na atumiki a Mulungu, pontho toera kuaphedza kuti ‘akhulupire aprofeta a Mulungu.’ (2 Kro. 20:14, 15) Mambo Ezekiya asaka ciphedzo ca mprofeta Izaiya mu ndzidzi ukhali iye n’nyatwa. (Iza. 37:1-6) Ndzidzi onsene ukhabvera amambo pitsogolero pya Yahova, iwo akhapaswa nkhombo, pontho mbumba ikhali yakutsidzikizika. (2 Kro. 20:29, 30; 32:22) Pikhaoneka pakweca kuti Yahova akhaphatisira aprofeta toera kutsogolera atumiki ace. w24.02 tsa. 21 ¶8

Sathani asafuna ticite uxamwali na anthu akuti nee anatiphedza toera kucita pinafuna Yahova. Lero, ife tisafunikambo kucita mphole-mphole kakamwe kupiringana Akristu a ku Efeso, thangwi nee tisacedza basi ene na anthu nkhope na nkhope, mbwenye tisacedzambo nawo mukuphatisira maredhi sociais. Nee tisafunika kunyengezwa na manyerezero a anthu a dziko akuti pinthu pyaulukwali nee ndi pyakuipa. Ife tisadziwa kuti manyerezero anewa ndi authambi. (Aef. 4:19, 20) Na thangwi ineyi, musafunika kubvundzika: ‘Kodi ndisacita mphole-mphole toera ndikhonde kucita uxamwali na andzanga akubasa, akuxikola peno anthu anango akuti nee asalemedza midida ya Yahova? Kodi ndiri na cipapo toera kutsidzikiza midida ya Yahova, maseze anthu anango akhonde kuphedzera pyenepi peno anyerezere kuti ndine wakunentsa?’ Pontho tisafunika kucita mphole-mphole pakusankhula axamwali mu mpingo. (2 Tim. 2:20-22) Tisafunikambo kukumbuka kuti anthu anango mu mpingo panango nee anatiphedza toera tipitirize kukhala akukhulupirika kuna Yahova. w24.03 tsa. 22-23 ¶11-12

Kodi imwe mwanyerezera kale kuti Yahova akhala tani? Maseze ife nkhabe kwanisa kuona Yahova, mbwenye Bhibhlya isalonga makhaliro ace akusiyana-siyana. Yahova asalandaniswa na “dzuwa, xango” na “malirimi a moto.” (Mas. 84:11; Aheb. 12:29) M’masomphenya, Ezekiyeli alonga kuti Yahova ndi ninga mwala wa safira, utale wakuyetimira na ceza ca utawaleza. (Ezek. 1:26-28) Nakuti ife nkhabe kwanisa kuona Yahova, panango pinakhala pyakunentsa kukhulupira kuti iye asatifuna. Anango asanyerezera kuti Yahova cipo asatifuna thangwi ya pinthu pidaacitikira mu umaso wawo. Yahova asabvesesa, pontho asadziwa kuti mabvero anewa asatikhuya tani. Toera kutiphedza, iye asalonga makhaliro ace adidi kubulukira m’Bhibhlya. Fala ibodzi inafokotoza mwadidi Yahova ndi ufuni. Bhibhlya isalonga kuti “Mulungu ndi ufuni.” (1 Juw. 4:8) Pyonsene pinacita iye ndi thangwi ya ufuni. Ufuni wa Yahova ndi ukulu kakamwe, pontho iye asaupangiza kuna anthu onsene, ale anantumikira na anakhonda kuntumikira.—Mat. 5:44, 45. w24.01 tsa. 26 ¶1-3

Yahova asankhula Mose toera atsogolere Aizraeli kuti abuluke mu Ejitu, apangiza Aizraeli kuti iye akham’phatisira. Iye aphatisira khole na masikati na khole ya moto namasiku. (Eks. 13:21) Mose akhatowera khole ineyi mbatsogolera Aizraeli mpaka ku bara yakufira. Aizraeli agopa pidaona iwo kuti kutsogolo kwawo kukhali na bara, pontho nduli mwawo mukhali na anyankhondo Aejitu. Mbwenye nee ndi Mose adaatsogolera mpaka kufika ku Bara Yakufira, ndi Yahova adaphatisira Mose toera kucita pyenepi. (Eks. 14:2) Pontho pyenepi pyapasa mwai Yahova toera kupangiza mphambvu zace munjira yakudzumatirisa. (Eks. 14:26-28) Mu pyaka 40, Mose anyindira pitsogolero pya Yahova toera kutsogolera Aizraeli n’thando. (Eks. 33:7, 9, 10) Yahova akhalonga na Mose kubulukira mu khole ineyi, pontho Mose akhapereka pitsogolero kuna Aizraeli. Natenepa Aizraeli mbadakwanisa kuona kuti Mose akhaphatisirwa na Yahova toera kuatsogolera. w24.02 tsa. 21 ¶4-5