Dezembro

Kodi Yahova alimbo na mphambvu yakulamusa anthu muli akufa? Inde! Iye ndi “Wamphambvu zonsene.” (Apok. 1:8) Natenepa iye ali na mphambvu toera kufudza anyamalwa onsene kuphatanizambo kufa. (1 Akor. 15:26) Thangwi inango inatipasa cinyindiro cakuti Mulungu anakwanisa kulamusa anthu muli akufa ndi yakuti iye asakwanisa kukumbuka pinthu pyonsene. Iye asacemera nyenyezi ibodzi na ibodzi na dzina yace. (Iza. 40:26) Natenepa, iye asakumbukambo anthu onsene adafa. (Yobe 14:13; Luka 20:37, 38) Iye asakumbuka pinthu pyonsene thangwi ya anthu anafuna kulamusa iye muli akufa, kuphatanizambo makhaliro awo, pinthu pidaacitikira na manyerezero awo. Mwandimomwene ife tisakhulupira pikiro ya Yahova yakulamusa anthu muli akufa thangwi tisadziwa kuti iye asafuna, pontho ali na mphambvu toera kucita pyenepi. Thangwi inango inaticitisa kukhulupira pikiro ineyi ndi yakuti Yahova alamusa kale anthu muli akufa. Mu ndzidzi wakale, iye apasa mphambvu atumiki ace angasi akukhulupirika kuphatanizambo Yezu toera kulamusa anthu muli akufa. w23.04 tsa. 9-10 ¶7-9

Tingalonga mwacilemedzo na mwakukhurudzika, panango anthu anakhala na cifuno cakutibvesera mbatipitiriza kucedza. Mbwenye munthu angafuna kuketesana na ife peno kupwaza pinakhulupira ife, nee tisafunika kupitiriza kucedza naye. (Mis. 26:4) Ngakhale tenepo, anango panango nee anafuna kuketesana mbwenye anafuna kutibvesera. Mwakukhonda penula, ife tinaphedzeka kakamwe tingawangisira toera kukhala akukhurudzika. Phembani Yahova toera akupaseni mphambvu kuti mukhale wakukhurudzika mu ndzidzi unatawira imwe mibvundzo inacita anthu mwakuipirwa peno mwakupwaza. Kumbukani kuti kukhala wakukhurudzika kunakuphedzani toera mukhonde kuketesana na anthu. Pontho mungatawira anthu mwakukhurudzika na mwacilemedzo, panango anacinja maonero awo thangwi ya ife na undimomwene wa Bhibhlya. Khalani ‘akukhunganyika ndzidzi onsene toera kutawira mwakukhurudzika na mwacilemedzo kakamwe munthu anasaka kudziwa pya cikhulupiro canu.’ (1 Ped. 3:15) Natenepa khalani akukhurudzika na amphambvu! w23.09 tsa. 19 ¶18-19

Onani njira zinai zakuti tinakwanisa kupangiza kupirira. Yakutoma, munthu wakupirira nee asaipirwa mwakucimbiza. Iye asawangisira toera kukhala wakukhurudzika mbakhonda kubwezera pyakuipa angasoswa peno angatsukwala. (Eks. 34:6) Yaciwiri, munthu wakupirira asadikhira mwakukhurudzika. Cinthu cinafuna iye cingakhonda kucitika pa ndzidzi ukhadikhira iye, asawangisira toera akhonde kuipirwa. (Mat. 18:26, 27) Yacitatu, munthu wakupirira nee asacita pinthu mbadzati kunyerezera mwadidi. Mbwenye munthu wakupirira angafuna kucita cinthu cakufunika kakamwe, asawangisira toera kunyerezera mwadidi mbadzati kucicita. Pontho asacita pyonsene pinakwanisa iye toera akhale na ndzidzi wakukwana toera kusankhula pinafuna iye kucita. Buluka penepo asakhala na ndzidzi toera kucita mwadidi basa yace. Cacinai, munthu wakupirira asawangisira toera kupirira nyatwa mwakukhonda dungunya. Iye asawangisira toera kupitiriza kukhala na maonero adidi. (Akol. 1:11) Ninga Akristu, ife tisafunika kupirira munjira zenezi zonsene. w23.08 tsa. 20-21 ¶3-6

Thangwi ikulu inaticitisa kutsidzikiza ntima wathu wakuphiphirisa ndi yakuti Yahova asaona piri muntima mwathu. Pyenepi pisabveka kuti iye asaona pizinji kupiringana pinaona anthu, pontho asadziwa mwadidi makhaliro athu. Iye anatifuna tingapitiriza kunyerezera uphungu wace wakuti unatiphedza toera kukhala m’maso kwenda na kwenda. (Juw. 4:14) Pontho ife nee tinakhuiwa na makhaliro aulukwali, uthambi wa Sathani na anthu akuipa a dziko ino. (1 Juw. 5:18, 19) Tingakhala na uxamwali wakuwanga na Yahova, ufuni wathu na cilemedzo cathu kuna iye pinathimizirika. Nakuti nee tisafuna kutsukwalisa Babathu, ife tinacalirambo manyerezero akucita madawo. Mulongo Marta wa ku Croácia wakuti ayeserwa toera kucita ulukwali alemba: “Pyakhala pyakunentsa kakamwe kuna ine toera kupirira cifuno cakucita madawo anewa. Mbwenye kugopa Yahova kwanditsidzikiza.” Kodi kugopa Mulungu kwantsidzikiza tani? Marta anyerezera pinthu pyakuipa pyakuti mbapidacitika khala iye acita ulukwali. Ife tinakwanisambo kucita pibodzi pyene. w23.06 tsa. 20-21 ¶3-4

Yezu akhadziwa kuti cifuniro ca Yahova ndi kucenesa dzina Yace na kupangiza kuti pidalonga Sathani thangwi ya iye ndi pyauthambi. Na thangwi ineyi, iye apfundzisa atowereri ace toera kuphembera tenepa: “Babathu muli kudzulu, dzina yanu mbiceneswe.” (Mat. 6:9) Yezu akhadziwa kuti kuceneswa kwa dzina ya Yahova ndi kwakufunika kakamwe kuna pinthu pyonsene pidacita Yahova. Nkhabe munthu unango adacita pinthu pizinji kakamwe toera kucenesa dzina ya Yahova kupiringana Yezu. Kodi pidamangwa Yezu, ndi madawo api adampambizira anyamalwa ace? Iwo alonga kuti iye atikana Mulungu! Mwandimomwene Yezu akhadziwa kuti kuphatisira mwakuipa peno kulonga mwakuipa dzina yakucena ya Pai wace ndi madawo makulu kakamwe. Kupambizirwa na kuphiwa thangwi ya madawo anewa kwantsukwalisa kakamwe. Panango ndi thangwi ineyi idacitisa Yezu ‘kutsukwala kakamwe’ mbadzati kumangwa.—Luka 22:41-44. w24.02 tsa. 11 ¶11

M’mapika anacita ife toera kuwina umaso, tisafunika kufuna kakamwe Yahova na Yezu kupiringana acibale athu. (Mat. 10:37) Mbwenye pyenepi nee pisabveka kuti tisafunika kupwaza basa iri na ife m’banja. M’mbuto mwace, toera tikomerese Mulungu na Kristu, tisafunika kucita mwadidi basa yathu m’banja. (1 Tim. 5:4, 8) Tingacita pyenepi, ife tinakhala akutsandzaya. Thangwi Yahova asadziwa kuti mabanja anakhala akutsandzaya mamuna na nkazi angatsalakanana mwaufuni na mwacilemedzo, anyakubala angafuna anawo na kuapfundzisa, pontho ana angabvera anyakubalawo. (Aef. 5:33; 6:1, 4) Mwakukhonda tsalakana basa iri na imwe m’banja, phatisirani uphungu wa Bhibhlya m’mbuto mwakutsogolerwa na mabvero anu, misambo ya pacisa peno pinthu pinalonga anyakudziwisa. Phatisirani mwadidi mabukhu athu. Mwenemu musagumanika mphangwa zinapangiza kuti munaphatisira tani midida ya Bhibhlya. w23.08 tsa. 28 ¶6-7

Nkazi Wacikristu asafunika kuwangisira toera akhale na maluso akusiyana-siyana. Maluso anango anapfundza mwana wankazi mbaciri wang’ono asam’phedza mu umaso wace onsene. Mwacitsandzo pfundzani kuleri na kulemba mwadidi. M’mbuto zinango anthu asanyerezera kuti akazi nee asafunika kupfundza kuleri na kulemba. Mbwenye maluso anewa ndi akufunika kuna Akristu onsene. (1 Tim. 4:13) Natenepa lekani kutawirisa pinthu pinango pikucimwaniseni kupfundza kuleri na kulemba mwadidi. Maluso anewa anakuphedzani tani? Kukhala na maluso anewa panango pinakuphedzani kugumana basa. Pontho pinakhala pyakukhonda nentsa kupfundza Bhibhlya mbamupfundzisambo anango. Kusiyapo pyenepi, imwe munakhala na uxamwali wakuwanga na Yahova mungaleri Mafala ace na kunyerezera mwadidi pinaleri imwe.—1 Tim. 4:15. w23.12 tsa. 20 ¶10-11

Phembani Yahova toera mukwanise kupirira mayesero. Ninga anthu akusowa ungwiro, ndzidzi onsene tisathimbana na mayesero toera kucita pinthu pyakuipa. Mbwenye Sathani asacita pyonsene pinakwanisa iye toera ticimwane kupirira pinentso pyenepi. Njira ibodzi inaphatisira iye toera kutiyesera ndi masendzekero aulukwali. Masendzekero anewa asaticitisa kukhala na manyerezero akuipa, pontho manyerezero anewa anakwanisa kutsogolera munthu toera kucita madawo makulu. (Marko 7:21-23; Tiya. 1:14, 15) Khala tisafuna kukunda mayesero akucita pinthu pyakuipa, tisafunika ciphedzo ca Yahova. Yezu aphataniza pyenepi mu phembero yace ya citsandzo: “Lekani kutisiya mbatigwa m’mayesero, mbwenye tipulumuseni m’manja mwa Nyakuipa.” (Mat. 6:13) Yahova asafuna kutiphedza, mbwenye ife tisafunika kuphemba ciphedzo cace. Pontho tisafunika kucita pinthu mwakubverana na maphembero athu. w23.05 tsa. 6-7 ¶15-17

Kucita pyenepi kunaphedza tani banja yawo? Anyakumanga banja angalemedza uxamwali wawo na Yahova, iwo anafuna kuphatisira uphungu wace, pontho pyenepi pinaaphedza toera kucalira na kukunda pinentso pyakuti panango pinafewesa ufuni wawo. Anthu akukola mwauzimu asawangisirambo toera kutowezera Yahova na kupangiza makhaliro ace ninga kukoma ntima, kupirira na kulekerera. (Aef. 4:32–5:1) Anyakumanga banja angapangiza makhaliro anewa, pinakhala pyakukhonda nentsa toera kuwangisa ufuni wawo. Mulongo anacemerwa Lena, wakuti ali pa banja mu pyaka pyakupiringana 25 alonga: “Ndi pyakukhonda nentsa kufuna na kulemedza munthu wakukola mwauzimu.” Onani citsandzo cibodzi ca m’Bhibhlya. Pikhafuna Yahova kusankhula mamuna na nkazi toera akhale anyakubala a Mesiya, Iye asankhula Zuze na Mariya m’mbuto mwakusankhula anthu anango a dzindza ya Dhavidhi. Thangwi yanji? Thangwi Zuze na Mariya akhali na uxamwali wakuwanga na Yahova, pontho Yahova akhadziwa kuti iwo mbadamuikha pa mbuto yakutoma m’banja mwawo. w23.05 tsa. 20-21 ¶3-4

Maseze Ntsogoleri wathu Yezu ndi waungwiro, ale anaphatisira iye toera kutitsogolera nee ndi aungwiro. Panango ife tinanentseka toera kuabvera makamaka angatiphemba toera kucita cinthu cakuti nee tisafuna kucicita. Mpostolo Pedhru apaswa pitsogolero pyakuti iye nee akafuna kupibvera pakutoma. Pidapangwa iye na anju toera adye pinyama pyakukhonda cena mwakubverana na Mwambo wa Mose, Pedhru akhonda katatu. (Mabasa 10:9-16) Thangwi yanji? Thangwi pitsogolero pyenepi pipswa nee pikhali pyakubveka mwadidi kuna iye. Iye akhadadzolowera kucita pinthu munjira yakusiyana. Khala Pedhru anentseka toera kubvera pitsogolero pidaperekwa na anju waungwiro, nee ndi pyakudzumisa kuona kuti lero midzidzi inango ife tisanentseka toera kubvera pitsogolero pinaperekwa na anthu akusowa ungwiro. Munjira inango, mpostolo Paulu abvera Akulu a mpingo a mu Yerusalemu pidampanga iwo toera akwate amuna anai aende nawo mu templo kuti aceneseke toera apangize kuti asabvera Mwambo. Paulu akhadziwa kuti Akristu nee akhafunikabve kubvera Mwambo. Pontho iye nee akhadacita cinthu cakuipa. Ngakhale tenepo, Paulu akwata amuna anewa mbaenda kaceneseka na iwo mwakubverana na Mwambo.” (Mabasa 21:23, 24, 26) Kubvera kwa Paulu kwaphedza Akristu toera akhale akuphatana.—Aroma 14:19, 21. w23.10 tsa. 10 ¶15-16

Panango imwe nee munanyerezera kuti kugopa ndi n’khaliro wakufunika kakamwe toera kukhala na uxamwali wadidi. Mbwenye, ale anafuna kukhala na uxamwali wakuwanga na Yahova asafunika ‘kun’gopa.’ Mwakukhonda tsalakana khala tisatumikira Yahova mu pyaka pizinji peno nkhabe, tonsene tisafunika kun’gopa. Mphapo pisabvekanji kugopa Mulungu? Munthu anagopa Mulungu munjira yadidi asanfuna, pontho nee asafuna kucita cinthu cakuti cinafudza uxamwali wace na iye. Yezu ‘akhagopa Mulungu’ munjira ineyi. (Aheb. 5:7) Iye nee akhagopa kuti Yahova mbadancita pinthu pyakuipa. (Iza. 11:2, 3) Mbwenye iye akhafuna kakamwe Yahova, pontho akhafuna kumbvera. (Juw. 14:21, 31) Ninga Yezu, ife tisalemedza kakamwe Yahova, pontho tisan’gopa thangwi Iye ndi waufuni, waudziwisi, waulungami na wamphambvu kakamwe. Ife tisadziwambo kuti Yahova asatifuna , pontho asaona njira inatawira ife pitsogolero pyace. Tingakhonda kubvera Yahova, iye anatsukwala, mbwenye tingambvera iye anatsandzaya.—Mas. 78:41; Mis. 27:11. w23.06 tsa. 14 ¶1-2; tsa. 15 ¶5

Mambo Uziya pidakhala iye wamphambvu, iye aduwala kuti ndi Yahova akhampasa mphambvu zenezi. Pyenepi pisatipfundzisanji? Ife tisafunika kukumbuka kuti ndi Yahova anatipasa nkhombo na miyai yonsene iri na ife. M’mbuto mwakudzikuza thangwi ya pinthu pinakwanisa ife kucita, ife tisafunika kupereka takhuta kuna Yahova thangwi ya pinthu pyenepi. (1 Akor. 4:7) Ife tisafunikambo kudzindikira mwakucepeseka kuti ndife akusowa ungwiro, pontho tisafunika kusandikwa. M’bale unango wakuti ali cifupi na pyaka 60 alonga: “Ine ndapfundza kuti nee ndisafunika kuipirwa peno kubwerera nduli anango angandisandika. Ndingasandikwa thangwi ya madodo anacita ine midzidzi inango, ndisawangisira toera ndipitirize kutumikira Yahova munjira yadidi.” Tingabvera Yahova mbatikhala akucepeseka, tinakhala akutsandzaya kakamwe.—Mis. 22:4. w23.09 tsa. 10 ¶10-11

Akristu a mu ndzidzi wa apostolo akhafunika kupirira. Kusiyapo nyatwa zikhathimbana na athu onsene, iwo akhathimbana na nyatwa zinango. Azinji a iwo akhatcingwa, tayu basi ene na atsogoleri Aciyuda na atongi Aciroma, mbwenye akhatcingwambo na acibale awo. (Mat. 10:21) Kusiyapo pyenepi, mu mpingo midzidzi inango iwo akhathimbana na pipfundziso pya anyakupanduka. (Mabasa 20:29, 30) Ngakhale tenepo, Akristu anewa akwanisa kupirira. (Apok. 2:3) Ninji pidaaphedza? Iwo akhanyerezera pitsandzo pya anthu analongwa m’Bhibhlya akuti apirira pinentso, ninga Yobe. (Tiya. 5:10, 11) Iwo akhacita phembero toera akhale na mphambvu. (Mabasa 4:29-31) Pontho ndzidzi onsene akhakumbuka kuti Yahova anaapasa nkhombo angapirira. (Mabasa 5:41) Ife tinakwanisa kupirira tingapfundza m’Bhibhlya na m’mabukhu athu, pitsandzo pya ale adapirira mbatinyerezera mwadidi pitsandzo pyenepi. w23.07 tsa. 3 ¶5-6

Yahova na Yezu nee anatisiya. Pidamala mpostolo Pedhru kukhonda Yezu, iye akhafunika kucita cisankhulo cakufunika kakamwe. Kodi iye mbadasiya kukhala nyakupfundza wa Yezu peno mbadapitiriza? Yezu akhadacita phembero kuna Yahova toera cikhulupiro ca Pedhru cikhonde kufewa. Yezu apanga Pedhru thangwi ya phembero ineyi, pontho ampasa cinyindiro cakuti mukupita kwa ndzidzi iye mbadakwanisa kuwangisa abale ace. (Luka 22:31, 32) Kukumbuka mafala adalonga Yezu kwawangisa kakamwe Pedhru. Tingafuna kucita cisankhulo cakufunika kakamwe, panango Yahova anaphatisira akulu a mpingo toera kutiphedza kuti tikwanise kupitiriza kukhala akukhulupirika. (Aef. 4:8, 11) Ninga pidacita Yahova kuna Pedhru na apostolo anango, Iye anatitsalakanambo tingaikha pa mbuto yakutoma Umambo wa Mulungu. w23.09 tsa. 24-25 ¶14-15

Yahova asaona ngakhale pinthu pyakucepa pinacitira ife anango. Iye asaona pyenepi ninga ntsembe yadidi kakamwe, pontho ninga mangawa akuti iye anadzaalipa khala mukhatumikira ninga ntumiki wakutumikira peno nkulu wa mpingo mbwenye cincino nee musatumikirabve, Yahova asakumbuka basa idacita imwe na ufuni udakukulumizani toera kucita basa ineyi. (1 Akor. 15:58) Iye asaonambo ufuni unapitiriza imwe kupangiza. Yahova asafuna kuti tonsene tipitirize kufuna iye na anango. Ife tinakwanisa kupitiriza kufuna Yahova tingaleri Mafalace na kunyerezera mwadidi pinaleri ife, pontho tingalonga na iye m’phembero kazinji kene. Ife tinakwanisambo kupitiriza kufuna abale na alongo athu tingaaphedza. Ufuni wathu ungathimizirika, tinakhala na uxamwali wakuwanga na Yahova pabodzi na abale na alongo athu. Pontho tinadzakhala na axamwali anewa kwenda na kwenda! w23.07 tsa. 10 ¶11; tsa. 11 ¶13; tsa. 13 ¶18

Nkristu onsene asafunika kusankhula ekha njira inafuna iye kutsalakana ungumi wace. Akristu angasankhula ukondzi, iwo asafunika kubvera mitemo ya Bhibhlya inakhondesa kubuluswa na kuikhwa ciropa na pyamizimu. (Mabasa 15:20; Agal. 5:19, 20) Mbwenye ntundu unango wa ukondzi, munthu ali na ufulu wakusankhula unafuna iye. Mwakukhonda tsalakana khala tisafuna kakamwe ntundu unango wa ukondzi, tisafunika kulemedza pisankhulo pinacita abale na alongo athu thangwi ya ukondzi wawo. Toera kucita pyenepi, ife tisafunika kukumbuka pinthu pinai: (1) Basi ene ndi Umambo wa Mulungu unafuna kudzamalisa mautenda onsene. (Iza. 33:24) (2) Nkristu onsene asafunika kukhala na “cinyindiro” cakuti ndi pinthu pipi pyadidi kuna iye. (Aroma 14:5) (3) Nee tisafunika kutonga anango peno kucita pinthu pyakuti pinaagwegwedusa. (Aroma 14:13) (4) Akristu asafunika kupangiza ufuni na kubvesesa kuti kuphatana kwa abale na alongo mu mpingo ndi kwakufunika kakamwe kupiringana maonero awo.—Aroma 14:15, 19, 20. w23.07 tsa. 24 ¶15

Kodi imwe musalemedza uxamwali wanu na Yahova? Mwakukhonda penula imwe musacita pyenepi. Kutomera mu ndzidzi wakale, anthu azinji akhalemedzambo uxamwali wawo na Yahova. (Mas. 104:33, 34) Azinji akhawangisira toera kulambira Yahova. Ndi pyenepi pikhacita Anazireu mu Izraeli wakale peno “munthu adaikhwa pakhundu.” Anazireu akhali Aizraeli aphinga akuti akhawangisira toera kutumikira Yahova munjira yakupambulika. Mwambo wa Mose ukhatawirisa kuti mamuna peno nkazi acite dumbiro yakupambulika kuna Yahova mbasankhula kukhala Nazireu mu ndzidzi ungasi. (Num. 6:1, 2) Mbwenye Muizraeli angacita dumbiro ineyi, iye akhafunika kubvera pitsogolero pyakuti Aizraeli anango nee akhafunika kupibvera. Mphapo thangwi yanji iye akhacita dumbiro ineyi? Panango ndi thangwi yakufuna kwace Yahova na kupereka kwace takhuta thangwi ya nkhombo Zace.—Dheu. 6:5; 16:17. w24.02 tsa. 14 ¶1-2

Kazinji kene Bhibhlya isalonga pya “kukhulupirika” peno “ufuni wakukhonda mala” unapangiza Mulungu kuna atumiki ace. Fala ibodzi ene isaphatisirwambo toera kulonga pya ufuni unapangiza atumiki a Mulungu kuna unango na ndzace. (2 Sam. 9:6, 7) Kukhulupirika kwathu kunakwanisa kukhala kwakuwanga mukupita kwa ndzidzi. Tendeni tione kuti kukhulupirika kwa Dhanyeli kwadzakhala tani kwakuwanga. Kukhulupirika kwa Dhanyeli kuna Yahova kwayeserwa munjira zizinji. Mbwenye kuyeserwa kukulu kakamwe kwacitika mu ndzidzi ukhali iye na pyaka pyakupiringana 90. Atongi na aimiriri a mambo nee akhakomerwa na Dhanyeli, pontho nee akhalemedza Mulungu wace. Na thangwi ineyi, iwo acita masasanyiro toera kuphesa Dhanyeli. Iwo apanga mambo toera akhazikise ntemo wakuti mbudayesera kukhulupirika kwa Dhanyeli. Dhanyeli akhafunika kusiya kucita phembero kuna Yahova mu ntsiku 30 toera kupangiza kuti ndi wakukhulupirika kuna mambo. Dhanyeli akhonda kucita pyenepi.—Dhan. 6:12-15, 20-22. w23.08 tsa. 5 ¶10-12

Yahova asafuna kuti tipitirize kufuna abale na alongo athu. M’bale peno mulongo angatitsalakana mwakuipa, nee tisafunika kunyerezera kuti iye acita pyenepi mwakufuna. Tisafunika kukumbuka kuti iye ali kuwangisira toera kucita pinthu ninga munafuna Yahova. (Mis. 12:18) Yahova asafuna atumiki ace akukhulupirika mwakukhonda tsalakana madodo anacita iwo. Iye asapitiriza kukhala xamwali wathu, pontho nee asakoya pinthu pyakuipa muntima. (Mas. 103:9) Ife tisapereka takhuta kakamwe thangwi Yahova asatilekerera, pontho tisafunikambo kutowezera citsandzo cace mbatilekerera anango. (Aef. 4:32–5:1) Ife tiri dhuzi kakamwe na kumala kwa dziko ino, na thangwi ineyi tisafunika kukhala na uxamwali wakuwanga na abale na alongo athu. Ife tisadziwa kuti kutcingwa kunathimizirika, pontho panango tinaikhwa nkaidi thangwi ya cikhulupiro cathu. Pyenepi pingacitika tinafuna kakamwe ciphedzo ca abale na alongo athu.—Mis. 17:17. w24.03 tsa. 15-16 ¶6-7

M’Bhibhlya muli na pitsandzo pya aphale akuti akhali na uxamwali wakuwanga na Yahova, akhali akutawirika kuna iye, pontho akhali na umaso wakutsandzaya. Dhavidhi akhali m’bodzi wa iwo. Pikhali iye m’phale, asankhula kulambira Yahova, pontho mukupita kwa ndzidzi adzakhala mambo wakukhulupirika. (1 Ama. 3:6; 9:4, 5; 14:8) Mungapfundza thangwi ya Dhavidhi, citsandzo cace cinakukulumizani toera kutumikira Yahova mwakukhulupirika. Imwe munakwanisambo kupfundza pizinji na citsandzo ca Marko na Timoti. Iwo atoma kutumikira Yahova pikhali iwo ana kakamwe, pontho apitiriza kuntumikira mwakukhulupirika. Yahova atsandzaya kakamwe na cisankhulo cidacita iwo. Njira inaphatisira imwe umaso wanu cincino inakhuyambo umaso wanu ntsogolo. Munganyindira Yahova mbuto mwakunyindira ndzeru zanu, iye anakuphedzani toera mucite pisankhulo pyandzeru. Imwe munakwanisa kukhala na umaso wakutsandzaya. Kumbukani kuti Yahova asakomerwa kakamwe na pinacita imwe kuna iye. Nkhabepo njira yadidi kakamwe yakuphatisira umaso wanu kupiringana kutumikira Babathu wakudzulu, Yahova. w23.09 tsa. 13 ¶18-19

Mpostolo Paulu akhadziwa kuti abale na alongo ace akhali akusowa ungwiro. Mwacitsandzo, anango mu mpingo wa ku Yerusalemu nee akhatawira kuti iye ndi nyakupfundza pidamuona iwo. (Mabasa 9:26) Mukupita kwa ndzidzi, anango alonga pinthu pyakuipa thangwi ya iye toera akhonde kunyindirwa. (2 Akor. 10:10) Paulu aona nkulu wa mpingo mbacita cisankhulo cakuipa cakuti panango cagwegwedusa anango. (Agal. 2:11, 12) Pontho Marko wakuti akhali xamwali wace wa ponda ndipondembo antsukwalisa kakamwe. (Mabasa 15:37, 38) Thangwi ya pyenepi, Paulu panango mbadasiya kucedza na abale na alongo anewa. Mbwenye iye apitiriza kukhala na maonero adidi thangwi ya abale na alongo ace mbapitiriza kutumikira Yahova mwakukhulupirika. Ninji pidaphedza Paulu toera kupirira? Paulu akhafuna abale na alongo ace. Pontho kufuna anango kwam’phedza toera akhonde kuikha manyerezero ace ku pinthu pyakuipa pikhacita iwo, mbwenye aone makhaliro awo adidi. Ufuni waphedzambo Paulu toera kucita pidalonga iye pa lemba ya ntsiku ya lero. w24.03 tsa. 15 ¶4-5

M’Bhibhlya muli na pitsandzo pizinji pya anthu adapangiza n’khaliro wakukhurudzika. Onani citsandzo ca Izaki. Mu ndzidzi ukhali iye mu cisa ca Afilisti ku Jerari, anthu a bibvu afikira micera idakumba anyabasa a pai wace. M’mbuto mwa kulongezana nawo toera akhale pontho na micera yace, Izaki afuluka mbaenda kakhala kutali na iwo, mbakumba micera inango kweneko. (Gen. 26:12-18) Mbwenye Afilisti alonga kuti cisa ceneci cikhali cawo pontho. Mwakukhonda tsalakana pinthu pyenepi, Izaki acita pinthu mwakukhurudzika. (Gen. 26:19-25) Ninji pidam’phedza toera akhale wakukhurudzika maseze anthu anango akhansosa? Mwakukhonda penula, iye aona citsandzo ca anyakubalace mbapfundza na makhaliro a Abhrahamu na “kupfulika na kukhurudzika” kwa Sara.—1 Ped. 3:4-6; Gen. 21:22-34. w23.09 tsa. 15 ¶4

Pa ndzidzi udakhazikisa iye, mwaufuni Yahova atuma Mwanace wakutoma pa dziko yapantsi toera kupfundzisa anthu thangwi ya Umambo na kupereka umaso wace toera kutiombola m’madawo na kufa. Buluka penepo, Yezu alamuswa muli kufa toera kukhala Mambo wa Umambo wa Mulungu kudzulu. Mphangwa zakufunika kakamwe za m’Bhibhlya ndi zakuti dzina ya Yahova inadzaceneswa mu ndzidzi unakwanirisa iye cifuniro cace pa dziko yapantsi. Toera kucita pyenepi, iye anaphatisira Umambo wace unatsogolerwa na Kristu. Nkhabepo munthu anakwanisa kucinja pinafuna Yahova. Iye atipasa cinyindiro cakuti anadzacita pyonsene pinafuna iye. (Iza. 46:10, 11; Aheb. 6:17, 18) Dziko yapantsi inadzacinjwa mbikhala paraizu. Pontho anthu akulungama anadzakhala “na umaso kwenda na kwenda.” (Mas. 22:26) Mbwenye nee ndi pyenepi basi pinafuna kudzacita Yahova. Cifuniro ca Yahova ndi cakuti atumiki ace onsene a kudzulu na a pa dziko yapantsi akhale akuphatana. Buluka penepo, anthu onsene anadzabvera Yahova mwakukhulupirika ninga ntongi wawo. (Aef. 1:8-11) Kodi imwe nee musadzumatirwa na njira yakutsandzayisa inafuna kukwanirisa Yahova cifuniro cace? w23.10 tsa. 20 ¶7-8

Pidabuluka Ayuda ku Bhabhilonya mbaenda ku Yerusalemu, akhanentseka toera kutsalakana mabanja awo. Iwo akhathimbanambo na uviyaviya mu utongi wa Persya, pontho akhatcingwa na anthu a madziko a cifupi. Na thangwi ineyi, pikhali pyakunentsa kuna anango toera amange papswa templo ya Yahova. Natenepa Yahova atuma mprofeta Ajeu na Zakariya toera kuphedza mbumba kuti ipitirize kucita basa ineyi mwaphinga, mbapangiza kuti akhali akuwanga. (Ajeu 1:1; Zak. 1:1) Ngakhale tenepo, pidapita pyaka 50, Ayuda akhafuna pontho ciwangiso. Buluka penepo, Esdhra, mulembi wakuti akhadziwa mwadidi Mwambo, aenda ku Yerusalemu buluka ku Bhabhilonya toera aphedze atumiki a Mulungu kuti apitirize kuikha ulambiri wa Yahova pa mbuto yakutoma. (Esd. 7:1, 6) Maprofesiya adalonga Ajeu na Zakariya aphedza atumiki a Mulungu nduli toera apitirize kunyindira Yahova mu ndzidzi ukhatcingwa iwo. Maprofesiya anewa anatiphedzambo toera tipitirize kunyindira ciphedzo ca Yahova maseze tithimbane na nyatwa.—Mis. 22:19. w23.11 tsa. 14-15 ¶2-3

Mphapo tinapangiza tani kuti tisafuna abale na alongo athu? Njira ibodzi yakucita pyenepi ndi kuabalangaza. Ife tinakwanisa ‘kupitiriza kubalangazana unango na ndzace’ tingabvera ntsisi anango. (1 Ates. 4:18) Mphapo tinapitiriza tani kufunana kakamwe unango na ndzace? Tingalekerera abale na alongo athu maseze pikhale pyakunentsa kucita pyenepi. Thangwi yanji ndi pyakufunika kakamwe kufunana unango na ndzace lero? Pedhru alonga: ‘Kumala kwa pinthu pyonsene kuli cifupi. Natenepa, funanani kakamwe unango na ndzace.’ (1 Ped. 4:7, 8) Ninji pinadikhira ife mu ndzidzi wakuti kumala kwa dziko ino kuli cifupi? Yezu alonga tenepa kuna anyakupfundzace: “Imwe munadzaidiwa na anthu a mitundu yonsene thangwi ya dzina yanga.” (Mat. 24:9) Toera kupirira kuidiwa kweneku tisafunika kukhala akuphatana. Tingafuna abale na alongo athu, Sathani nee anakwanisa kufudza kuphatana kwathu, thangwi ufuni “usaphedza anthu toera kukhala akuphatana kakamwe.”—Afil. 2:1, 2. w23.11 tsa. 13 ¶18-19

Undimomwene wa Mafala a Mulungu uli na mphambvu kakamwe. Tingapfundzisa anthu thangwi ya Yahova na makhaliro ace, ife tisaona udidi unaacitikira. Anthu anewa asafunguka maso mbatoma kuona makhaliro adidi a Babathu. Iwo asadzumatirwa na mphambvu zikulu za Yahova. (Iza. 40:26) Iwo asatoma kun’nyindira thangwi ya ulungami wace. (Dheu. 32:4) Iwo asapfundza pizinji na udziwisi wace ukulu. (Iza. 55:9; Aroma 11:33) Iwo asabalangazwa kakamwe angapfundza kuti Yahova ndi ufuni. (1 Juw. 4:8) Mu ndzidzi unakhala iwo na uxamwali wakuwanga kakamwe na Yahova, cidikhiro cawo cakukhala kwenda na kwenda cisakhalambo candimomwene. Ndi mwai ukulu kakamwe kuphedza anthu toera akhale na uxamwali wakuwanga na Babathu. Tingacita pyenepi, Yahova asationa kuti “tisaphata basa pabodzi na iye.”—1 Akor. 3:5. w24.02 tsa. 12 ¶15

Khala imwe muli kupfundza Bhibhlya peno anyakubalanu ndi Mboni za Yahova, kodi mwanyerezera kale pya kubatizwa? Ceneci ndi cifuno cadidi! Mbwenye mbamudzati kubatizwa, musafunika kuperekeka kuna Yahova. Munaperekeka tani kuna Yahova? Imwe munampanga m’phembero kuti munalambira iye basi, pontho munaikha cifuno cace pa mbuto yakutoma mu umaso wanu. Mungacita pyenepi, munapikira kuna Yahova kuti munapitiriza kunfuna “na ntima wanu onsene, na umaso wanu onsene, na ndzeru zanu zonsene na mphambvu zanu zonsene.” (Marko 12:30) Anafuna dziwa kuperekeka kweneku basi ene ndimwe na Yahova. Mbwenye ubatizo usacitwa pakweca toera kupangiza kuna anthu kuti imwe mwaperekeka. Kuperekeka kwanu ndi pikiro yakufunika kakamwe, pontho Yahova asadikhira kuti mucite pidapikira imwe.—Ekle. 5:4. w24.03 tsa. 2 ¶2; tsa. 3 ¶5

Mabanja onsene asathimbana na pinentso. Bhibhlya isalonga kuti ale anamanga banja “anadzaona nyatwa mu umaso wawo.” (1 Akor. 7:28) Thangwi anthu anamanga banja ndi akusowa ungwiro, ali na makhaliro akusiyana, pifuno pyakusiyana na maonero akusiyana. Kusiyapo pyenepi, panango mamuna peno nkazi anamanga banja na munthu adakuzwa munjira yakusiyana na ndzace. Na thangwi ineyi, mukupita kwa ndzidzi, mamuna peno nkazi anadzindikira pinthu pyakuti nee akhapiona mbadzati kumanga banja. Pinango mwa pinthu pyenepi panango pinatomesa nyatwa. M’mbuto mwakumalisa nyatwa zenezi pabodzi, mabanja anango asapasana mulando unango na ndzace maseze kazinji kene onsene ali na mulando. Na thangwi ineyi, anango asanyerezera kuti njira yakumalisa nyatwa zawo ndi kumwalana peno kukhondana. Kodi ineyi ndi njira yadidi yakumalisa nyatwa za m’banja? Nkhabe. Yahova asafuna kuti anyakumanga banja apitirize kukhala pabodzi maseze m’bodzi wa iwo acitise kuti banja ineyi ikhale yakunentsa. w24.03 tsa. 16 ¶8; tsa. 17 ¶11

Pakumala kuperekeka na kubatizwa, cidikhiro canu cakukhala m’maso kwenda na kwenda m’paraizu pa dziko yapantsi capitiriza kuthimizirika mu ndzidzi ukhapfundza imwe pinthu pinango pizinji, pontho mwakhala wakuwanga mwauzimu. (Aheb. 5:13–6:1) Panango imwe mwacitikirwa na pinthu pinalongwa pa Aroma 5:2-4. Imwe mwathimbana na nyatwa zizinji, mbwenye mwapirira, pontho Yahova akupangizani kuti imwe ndimwe wakutawirika kuna iye. Nakuti musadziwa kuti Yahova asakufunani, pontho asakomerwa na imwe, cincino muli na mathangwi mazinji toera kudikhira kutambira pinthu pidapikira iye. Cidikhiro canu cakhala cakuwanga kakamwe kupiringana cikhali na imwe pakutoma. Cincino imwe muna cinyindiro cakuti pinadikhira imwe pinadzacitikadi. Pontho musapereka takhuta kakamwe thangwi ya cidikhiro canu. Natenepa pyenepi pisakhuya njira inatsalakana imwe banja yanu, pakucita pisankhulo na njira inaphatisira imwe ndzidzi wanu. Mpostolo Paulu alonga cinthu cakufunika kakamwe thangwi ya cidikhiro cinakhala na imwe mungakhala wakutawirika kuna Mulungu. Iye akupasani cinyindiro cakuti pinthu pinadikhira imwe pinadzacitika.—Aroma 15:13. w23.12 tsa. 12-13 ¶16-19

Tingathimbana na nyatwa, panango nee tinakhala na mabvero mabodzi ene peno kunyerezera na kucita pinthu ninga mukhacitira ife kale. Ninga bote yakuti isakwatika na mabimbi, ifembo tinakwanisa kukhala akutsukwala tingathimbana na nyatwa. Kodi Yahova asatiphedza tani tingakhala akutsukwala kakamwe thangwi ya mabvero athu? Iye asatipasa cinyindiro cakuti anadzatiikha pa mbuto yakuwanga. Bote ingafamba m’bara mu ndzidzi wa condzi panango inakwatika mbienda konsene kwene kunenda mabimbi. Toera pyenepi pikhonde kucitika, mabote anango asakhala na pinthu pantsi n’khundu-n’khundu toera akhale akutsidzikizika. Pinthu pyenepi pisaphedza toera bote ikhonde kukwatika kakamwe na mabimbi, pontho anthu ali m’bote anakhala akutsidzikizika, kusiyapo pyenepi bote inafamba mwadidi. Ngakhale tenepo, pinthu pyenepi pinatsidzikiza kazinji kene pisaphata basa mwadidi khala bote iri kufamba. Munjira ibodzi ene, Yahova anadzatiikha pa mbuto yakuwanga tingapitiriza kuntumikira mwakukhulupirika m’midzidzi ya nyatwa. w24.01 tsa. 22 ¶7-8

Mungagopa, bvundzikani: ‘Ninji pidandicitira Yahova nduli?’ Nyerezerani pinthu pidacita iye. Mwacitsandzo, ‘tingayag’ana mwadidi’ njira inatsalakana Yahova mbalame na maluwa, pinthu pyakuti nee apicita mwakulandana na iye, pontho nee pisakwanisa kumulambira, pyenepi pinawangisa cinyindiro cathu cakuti iye anatitsalakanambo. (Mat. 6:25-32) Nyerezeranimbo pinthu pidacita Yahova kuna atumiki ace. Imwe munakwanisa kupfundza pya munthu analongwa m’Bhibhlya wakuti akhali na cikhulupiro cakuwanga, peno munakwanisa kuleri pya mbiri ya ntumiki wa Yahova wa ntsiku zathu. Kusiyapo pyenepi, nyerezerani njira idakutsalakanani Yahova nduli. Nyerezerani kuti iye akuphedzani tani toera kudziwa undimomwene. (Juw. 6:44) Kodi iye atawira tani maphembero anu? (1 Juw. 5:14) Musaphedzeka tani thangwi ya ntsembe yaciomboli ya Mwanace wakufunika?—Aef. 1:7; Aheb. 4:14-16. w24.01 tsa. 4 ¶6; tsa. 7 ¶17