Novembro

Khala ndimwe nyakubala, phedzani mwananu toera kukhunganya ntawiro mwakubverana na thunga yace. Midzidzi inango, misolo inango isalonga pya nyatwa zinathimbana na anyakumanga banja peno kufunika kwa makhaliro adidi, mbwenye misolo ineyi panango inakhala na ndima zakucepa zakuti mwana anakwanisa kutawira. Kusiyapo pyenepi, phedzani ananu toera adziwe kuti thangwi yanji nee anathonywa ndzidzi onsene unalamusa iwo manja toera kutawira. Kucita pyenepi kunaaphedza toera akhonde kutsukwala angakhonda kuthonywa toera kutawira. (1 Tim. 6:18) Tonsene tinakwanisa kukhunganya mitawiro yakuti inasimba Yahova na kuwangisa abale na alongo athu. (Mis. 25:11) Panango midzidzi inango tinalonga mwacigwagwa pinthu pidaticitikira, mbwenye tisafunika kucalira kulonga kakamwe pinthu pyenepi. (Mis. 27:2; 2 Akor. 10:18) M’mbuto mwace, mitawiro yathu isafunika kusimba Yahova, kulonga pya Mafalace na atumiki ace.—Apok. 4:11. w23.04 tsa. 24-25 ¶17-18

Ufuni ndi wakufunika toera tipitirize kukhala m’maso na manyerezero adidi. (Mat. 22:37-39) Kufuna Mulungu kunatiphedza toera kupitiriza kumwaza mphangwa mwakukhonda tsalakana pinentso pinafuna kuthimbana na ife. (2 Tim. 1:7, 8) Nakuti tisafunambo anthu akuti nee asatumikira Yahova, ife tisapitiriza kumwaza mphangwa ngakhale mukuphatisira ntokodzi na matsamba. Ife nee tisaluza cidikhiro cakuti na ntsiku yace anthu anacinja mbatoma kucita pinthu pyadidi. (Ezek. 18:27, 28) Ife tisafunambo abale na alongo athu. Tinapangiza ufuni unoyu ‘tingabalangazana na kuwangisana unango na ndzace.’ (1 Ates. 5:11) Ninga anyankhondo akuti asamenya nkhondo pabodzi, ife tisawangisana unango na ndzace. Ife nee tisafunika kuphekesa abale na alongo athu peno kubwezera cakuipa na cakuipa. (1 Ates. 5:13, 15) Ife tinapangizambo ufuni wathu tingalemedza abale anatsogolera mu mpingo.—1 Ates. 5:12. w23.06 tsa. 10 ¶6; tsa. 11 ¶10-11

Cinthu cibodzi cinafuna kutiphedza toera kuwangisa cikhulupiro cathu ndi kunyerezera ciomboli. Ciomboli cisatipasa cinyindiro cakuti mapikiro a Mulungu anakwanirisika. Tinganyerezera mwadidi kuti thangwi yanji Mulungu apereka mwanace, tinawangisa cikhulupiro cathu cakuti pikiro ya Mulungu yakukhala na umaso wakukhonda mala n’dziko yadidi kakamwe inadzakwanirisika. Thangwi yanji tisalonga tenepo? Yahova acitanji toera kupereka ciomboli? Iye atuma Mwanace wautombo, pontho wakufunika kakamwe toera abalwe pa dziko yapantsi ninga munthu waungwiro. Pikhali iye pa dziko yapantsi, Yezu apirira nyatwa zizinji kakamwe. Buluka penepo athabuswa mbaphiwa. Mukucita pyenepi, Yahova alipa ntengo ukulu kakamwe. Mulungu wathu waufuni nee mbadatawirisa kuti Mwanace athabuke basi ene toera tikhali na umaso wadidi mu ndzidzi wakucepa. (Juw. 3:16; 1 Ped. 1:18, 19) Thangwi yakulipa ntengo ukulu kakamwe, Yahova atipasa cinyindiro cakuti tinadzakhala na umaso wa kwenda na kwenda n’dziko ipswa. w23.04 tsa. 27 ¶8-9

Kodi Yahova ali na cifuno cakulamusa anthu muli akufa? Inde, ali naco. Iye atsogolera anyakulemba Bhibhlya toera kulemba pikiro yace yakulamusa anthu muli akufa ntsogolo. (Iza. 26:19; Apok. 20:11-13) Pontho Yahova angapikira cinthu, ndzidzi onsene iye asacikwanirisa. (Yos. 23:14) Yahova asafuna kakamwe kulamusa anthu muli akufa. Nyerezerani mafala adalonga Yobe. Iye akhali na cinyindiro cakuti ngakhale afe, Yahova mbadafuna kumulamusa muli akufa. (Yobe 14:14, 15) Yahova ali na cifuno cibodzi cene kuna alambiri ace onsene adafa. Iye asafuna kakamwe kualamusa muli akufa na ungumi wadidi mbakhala akutsandzaya. Mphapo ndiye tani kuna anthu onsene adafa mbadzati kupfundza undimomwene thangwi ya Yahova? Mulungu wathu wa ufuni asafunambo kualamusa. (Mabasa 24:15) Iye asafuna kuti iwo adzakhale na mwai wakukhala axamwali ace mbakhala m’maso kwenda na kwenda pa dziko ino yapantsi.—Juw. 3:16. w23.04 tsa. 9 ¶5-6

Munakhala tani na cidikhiro cakuwanga? Khala imwe muli na cidikhiro cakukhala pa dziko yapantsi kwenda na kwenda, lerini pinalonga Bhibhlya thangwi ya Paraizu, pontho nyerezerani pinthu pyenepi. (Iza. 25:8; 32:16-18) Nyerezerani kuti umaso unakhala tani mu dziko ipswa. Nyerezeranimbo kuti muli mwenemo. Tingapitiriza kunyerezera cidikhiro ca kukhala mu dziko ipswa, nyatwa zathu zinadzakhala “za ndzidzi wakucepa na zakululupa.” (2 Akor. 4:17) Cidikhiro cidakupasani Yahova cinakuphedzani toera mukhale na mphambvu. Iye asatipasa pinthu pinafuna ife toera tikhale na mphambvu. Natenepa mungafuna ciphedzo toera kucita basa idapaswa imwe, kupirira nyatwa peno kupitiriza kukhala akutsandzaya, citani phembero kuna Yahova, pontho citani pfundziro ya munthu paekha toera kugumana citsogolero cace. Tawirani ciphedzo ca abale na alongo. Pitirizani kukhala na cidikhiro cakuwanga. Mungacita pyenepi, ‘munawangiswa na mphambvu zonsene, mwakubverana na mphambvu za mbiri yace, toera mukwanise kupirira mwadidi, mwakukhurudzika na mwakukomerwa.’—Akol. 1:11. w23.10 tsa. 17 ¶19-20

Ife tiri na mathangwi mazinji toera kupereka takhuta kuna Yahova pakucita phembero. Nakuti miyoni yonsene yadidi isabuluka kuna Yahova, ife tinakwanisa kupereka takhuta kuna iye thangwi ya pinthu pyonsene pyadidi piri na ife. (Tiya. 1:17) Mwacitsandzo, ife tinakwanisa kupereka takhuta thangwi ya kubalika kwa dziko yapantsi na pinthu pinango pidacita Yahova. Ife tinakwanisambo kupereka takhuta thangwi ya umaso wathu, banja yathu, axamwali athu na cidikhiro cathu. Pontho tinakwanisa kupereka takhuta kuna Yahova thangwi ya kutitawirisa kukhala axamwali ace. Panango tinafunika kuwangisira toera kunyerezera mathangwi anaticitisa kupereka takhuta kuna Yahova. Thangwi anthu azinji lero nee asapereka takhuta. Iwo basi ene asanyerezera kuti anakwanisa tani pinthu pinafuna iwo, m’mbuto mwakupereka takhuta thangwi ya pinthu piri na iwo. Tingakhala na manyerezero ninga ali na anthu anewa, m’maphembero athu basi ene tinaphemba pinthu. Toera pyenepi pikhonde kucitika, tisafunika kupitiriza kukulisa n’khaliro wakupereka takhuta thangwi ya pinthu pyonsene pinaticitira Yahova.—Luka 6:45. w23.05 tsa. 4 ¶8-9

Ninga Babathu waufuni, Yahova nee asakomerwa angationa mbatithabuka. (Iza. 63:9) Ngakhale tenepo, iye nee asacitisa kuti tikhonde kuthabuka na nyatwa zonsene zakuti zisalandaniswa na mikulo peno malirimi a moto. (Iza. 43:2) Mbwenye iye apikira kutiphedza tingathimbana na nyatwa zenezi. Pontho nee anatawirisa kuti nyatwa zenezi zifudze uxamwali wathu na iye. Kusiyapo pyenepi, Yahova asatipasambo nzimu wace wakucena toera kutiphedza kupirira nyatwa zenezi. (Luka 11:13; Afil. 4:13) Na thangwi ineyi, ife tiri na cinyindiro cakuti ndzidzi onsene Yahova anatiphedza toera kupirira nyatwa na kupitiriza kukhala akukhulupirika kuna iye. Yahova asafuna kuti tin’nyindire. (Aheb. 11:6) Midzidzi inango nyatwa zathu zinaoneka ninga ndi zakunentsa kakamwe toera kuzipirira. Panango tinatoma kupenula khala Yahova anatiphedza peno nkhabe. Mbwenye Bhibhlya isatipasa cinyindiro cakuti na mphambvu za Mulungu, ife tinakwanisa “kukwira mpanda.” (Mas. 18:29) Natenepa, m’mbuto mwakupenula khala Yahova anatiphedza peno nkhabe, ife tisafunika kucita phembero na cikhulupiro, mbatinyindira kuti Yahova anatawira maphembero athu.—Tiya. 1:6, 7. w23.11 tsa. 22 ¶8-9

Mafala anewa asalonga pya ufuni wandimomwene munjira yadidi kakamwe, pontho asapangiza kuti anyakumanga banja anakwanisa kupangiza ufuni unoyu kuna unango na ndzace. Pisaphemba kuwangisira toera mamuna na nkazi wakumanga banja apitirize kufunana mu umaso wawo onsene. Mwacitsandzo, toera moto upitirize kugaka ife tisafunika kupitiriza kuikha nkhuni. Tingakhonda cita pyenepi, mukupita kwa ndzidzi moto unoyu unathima. Munjira ibodzi ene, ufuni wa anyakumanga banja unapitiriza kukhala wakuwanga khala iwo asawangisira kufunana. Midzidzi inango, ufuni wawo unakwanisa kuthowa makamaka khala iwo asathimbana na nyatwa yakusowa kobiri, nyatwa za ungumi peno pinentso pakukuza ana. Toera kupitiriza kugasa “lirimi ya moto wa Yah” anyakumanga banja asafunika kuwangisira kakamwe toera kuwangisa uxamwali wawo na Yahova. w23.05 tsa. 20-21 ¶1-3

Tisafunika kucitanji toera tikhale acipapo? Panango anyakubalathu anatipanga toera tikhale acipapo, mbwenye ife nee tinakhala na cipapo basi ene thangwi iwo ali na cipapo. Kukhala na cipapo ndi sawasawa na kupfundza kucita cinthu. Munthu anakwanisa kudziwa kucita mwadidi cinthu angayang’ana mwadidi ule anampfundzisa, buluka penepo mbatowezera citsandzo cace. Munjira ibodzi ene, ife tinakwanisambo kukhala acipapo tingayang’ana mwadidi kuti anango asapangiza tani n’khaliro unoyu, buluka penepo mbatitowezera citsandzo cawo. Ninga Dhanyeli, tisafunika kudziwa mwadidi Mafala a Mulungu. Ife tisafunika kucita phembero ndzidzi onsene toera tikhale na uxamwali wakuwanga na Yahova. Pontho tisafunika kunyindira Yahova, mbatikhala na cinyindiro cakuti ndzidzi onsene iye anatiphedza. Tingacita pyenepi, cikhulupiro cathu cingayeserwa, tinakwanisa kukhala acipapo. Anthu acipapo kazinji kene asalemedzwa na anango. Kusiyapo pyenepi, iwo asacitisambo kuti anthu a mitima yadidi afune kupfundza pya Yahova. Mwandimomwene, ife tiri na mathangwi adidi toera kukhala acipapo. w23.08 tsa. 2 ¶2; tsa. 4 ¶8-9

Fala Yacigerego yakuti ‘kudinga’ ikhaphatisirwa toera kulonga pya njira ikhadinga anthu pinthu ninga ouro na parata toera kukhala na cinyindiro cakuti pinthu pyenepi ndi pyandimomwene. Natenepa, tisafunika kudinga pinthu pinabva ife na pinaleri ife toera tikhale na cinyindiro cakuti pinthu pyenepi ndi pyandimomwene. Pyenepi ndi pyakufunikambo kakamwe kuna ife mu ndzidzi unafendedzera ife nyatwa ikulu. M’mbuto mwa kukhulupira pinthu pyonsene pinalonga anthu, tisafunika kuphatisira luso yathu yakunyerezera toera tikwanise kulandanisa pinthu pinaleri ife, pinabva ife na pire pinalonga Bhibhlya na gulu ya Yahova. Tingacita pyenepi, nee tinapeuswa na mphangwa zauthambi za madimonyo. (Mis. 14:15; 1 Tim. 4:1) Ife tisadziwa kuti atumiki a Yahova anadzapulumuka pa nyatwa ikulu. Mbwenye m’bodzi na m’bodzi wa ife nee asadziwa pinafuna kuncitikira mangwana. (Tiya. 4:14) Ngakhale tenepo, mwakukhonda tsalakana khala nyatwa ikulu inatigumana tiri m’maso peno tinafa mbidzati kufika, ife tinadzatambira umaso wakukhonda mala tingapitiriza kukhala akukhulupirika. Mbatipitirizeni kunyerezera cidikhiro cathu cakutsandzayisa mbatikhala akukhunganyika ntsiku ya Yahova mbidzati kufika! w23.06 tsa. 13 ¶15-16

Ife nee tisadziwa kuti maprofesiya anango a Bhibhlya anakwanirisika tani. (Dhan. 12:8, 9) Maseze nee tisadziwa mwadidi kuti maprofesiya anango a Bhibhlya anakwanirisika tani, pyenepi nee pisabveka kuti iwo nee anakwanirisika. Mbwenye ife tinakwanisa kukhala na cinyindiro cakuti Yahova anatiphedza toera kubvesesa pinafunika ife kudziwa pa ndzidzi wakuthema, ninga pidacita iye mu ndzidzi wakale. Mwakukhonda dembuka, anthu anadzalonga mafala akuti “ntendere na citsidzikizo!” (1 Ates. 5:3) Buluka penepo atongi a dziko anadzapomokera uphemberi wauthambi mbaufudza. (Apok. 17:16, 17) Angamala, iwo anapomokera atumiki a Mulungu. (Ezek. 38:18, 19) Kupomokerwa kwa atumiki a Mulungu kunadzatomesa nkhondo ya Armajedhoni. (Apok. 16:14, 16) Ife tiri na cinyindiro cakuti pinthu pyenepi pinacitika mwakukhonda dembuka. Ndzidzi unoyu mbudzati kufika, tendeni tipitirize kupereka takhuta kuna Babathu wakudzulu mukuonesesa mwadidi kukwanirisika kwa maprofesiya a Bhibhlya na kuphedza anango toera acitembo pibodzi pyene. w23.08 tsa. 13 ¶19-20

Pidalonga mpostolo Paulu pya cikhulupiro, cidikhiro na ufuni, iye amalisa na mafala akuti: ‘Cikulu kakamwe m’makhaliro anewa ndi ufuni.’ (1 Akor. 13:13) Thangwi yanji Paulu alonga pyenepi? Ntsogolo, ife nee tinadzafunikabve kukhulupira mapikiro a Mulungu a dziko ipswa peno kudikhira mapikiro anewa toera akwanirisike, thangwi mu ndzidzi unoyu iwo anadzakwanirisika. Mbwenye ndzidzi onsene tinadzafunika kufuna Yahova na anthu. Mwandimomwene, ufuni wathu unapitiriza kuthimizirika kwenda na kwenda. Pontho, ufuni usapangiza kuti ndife Akristu andimomwene. Yezu apanga apostolo ace kuti: “Mungafunana unango na ndzace, anthu onsene anadzindikira kuti ndimwe anyakupfundza anga.” (Juw. 13:35) Kusiyapo pyenepi, kufunana unango na ndzace kusaticitisa kukhala akuphatana. Paulu alonga kuti ufuni “usaphedza anthu toera kukhala akuphatana kakamwe.” (Akol. 3:14) Mpostolo Juwau alemba: “Ule anafuna Mulungu, asafunikambo kufuna m’bale wace.” (1 Juw. 4:21) Tingafunana unango na ndzace, tinapangiza kuti tisafuna Mulungu. w23.11 tsa. 8 ¶1, 3

Bhibhlya isalandanisa umaso wa Akristu na mapika akuthamanga. Anyakuthamanga anawina mapika anadzatambira umaso wakukhonda mala. (2 Tim. 4:7, 8) Ife tisafunika kuwangisira toera tipitirize kuthamanga, thangwi tiri dhuzi na kunkhomo kwa mapika anewa. Mpostolo Paulu, alonga pinthu pyakuti pinatiphedza toera kuwinambo. Iye alonga: ‘Mbatisiyeni pinthu pyonsene pyakulemera, pontho tithamange mwakupirira pa mapika adaikhwa patsogolo pathu.’ Kodi Paulu akhafuna kulonga kuti Akristu nee asafunika kukwata pinthu? Nkhabe. Iye akhafuna kulonga kuti tisafunika kusiya pinthu pyonsene pyakukhonda funika. Pinthu pyenepi pinaticimwanisa kuthamanga mwadidi mbatineta. Toera tipirire, tisafunika kudzindikira mwakucimbiza pinthu pyakukhonda funika pinakwata ife, mbatipisiya. Mbwenye nee tisafunika kusiya pinthu pyakufunika, thangwi tingacita pyenepi nee tinapitiriza m’mapika akuthamanga.—2 Tim. 2:5 w23.08 tsa. 26 ¶1-2

Maonero akulinganira anatiphedza toera kulemedza maonero a anango. Mwacitsandzo, alongo anango asakomerwa na kuikha makiaje, mbwenye anango nkhabe. Akristu anango asakomerwa na kumwa pyakumwa pyakuledzeresa mwakukhonda piringana midida, mbwenye anango asakhonda kumwa. Akristu onsene asafuna kukhala na ungumi wadidi, mbwenye iwo asasankhula njira zakusiyana toera kutsalakana ungumi wawo. Natenepa ndzidzi onsene tinganyerezera kuti maonero athu ndi adidi mbatiyesera kucitisa abale na alongo toera kucita pinthu ninga pinafuna ife, tinagwegwedusa anango mbaticitisa mpingo kukhala wakugawana (1 Akor. 8:9; 10:23, 24) Mwacitsandzo m’mbuto mwa kukhazikisa mitemo thangwi ya njira inafunika ife kubvala, Yahova atipasa midida toera titowezere. Ife tisafunika kubvala mwadidi toera kusimba Mulungu, kupangiza kuti tiri na maonero akulinganira, ndife akucepeseka na a “ndzeru zadidi.” (1 Tim. 2:9, 10) Natenepa, nee tisafunika kubvala munjira yakuti anthu onsene ayang’ane ife basi. Midida ya Bhibhlya inaphedzambo akulu a mpingo toera acalire kukhazikisa mitemo yawo thangwi ya mabvaliro na macingiro a tsisi. w23.07 tsa. 23-24 ¶13-14

Yahova apangiza pinthu pinafunika ife kucita kuti tikhale na umaso wadidi ntsogolo. Ale anatawira ncemerero wa “nkazi wakusowa ndzeru” asatsandzaya na makhaliro aulukwali. Pinthu pinacita iwo pinaatsogolera toera kufudzwa. (Mis. 9:13, 17, 18) Ale anatawira ncemerero wa nkazi anaimirira “udziwisi wandimomwene” anacitikirwa na pinthu pyakusiyana kakamwe ntsogolo. (Mis. 9:1) Ife tisafuna pinthu pinafuna Yahova, pontho tisaida pinthu pinaida iye. (Mas. 97:10) Kusiyapo pyenepi, tisakomerwa kucemera anango toera aphedzekembo na “udziwisi wandimomwene.” Ife ndife ninga atumiki akuti ‘asacemera kubulukira n’nthunda za mu nzinda: Anthu onsene akusowa udziwisi, mbabwere kuno.’ Ife na ale anacemera ife nee tinaphedzeka basi ene cincino. Iwo pabodzi na ife ‘tinadzakhala’ kwenda na kwenda tingapitiriza “kufamba munjira yakubvesesa pinthu.”—Mis. 9:3, 4, 6. w23.06 tsa. 24 ¶17-18

Musapibva tani ndzanu wakubasa peno wakuxikola angakubvundzani thangwi ya pinthu pinakhulupira imwe? Kodi imwe musagopa? Azinji a ife asagopa. Mbwenye mbvundzo unoyu panango unatiphedza toera kubvesesa pinanyerezera munthu peno pinakhulupira iye, pontho unatiphedza toera kumwaza mphangwa zadidi. Mbwenye midzidzi inango, panango munthu anacita mbvundzo thangwi nee asaphedzera maonero athu peno thangwi asafuna kuketesana na ife. Kazinji kene pyenepi pisacitika iwo angabva mphangwa zakuphonyeka thangwi ya pinthu pinakhulupira ife. (Mabasa 28:22) Kusiyapo pyenepi, ife tiri kukhala “mu ntsiku zakumalisa,” mu ndzidzi wakuti anthu azinji ‘nkhabe funa cita cibverano’ pontho ndi “ausumankha.” (2 Tim. 3:1, 3) Panango munabvundzika: ‘Ndinakwanisa tani kutawira mwadidi munthu angafuna kuketesana na ine thangwi ya pinthu pinakhulupira ine?’ Ninji pinafuna kukuphedzani? Kukhurudzika kunakuphedzani. Munthu wakukhurudzika nee asaipirwa mwakucimbiza angasoswa peno angakhonda kudziwa kuti anacitanji. w23.09 tsa. 14 ¶1-2

Midzidzi inango tisatambira uphungu mu gulu ya Yahova wakuti usatitsidzikiza. Mwacitsandzo, ife tisakumbuswa thangwi ya ngozwi yakufuna kukhala na pinthu pizinji na kucita pinthu pyakuti pinaticitisa kukhonda kubvera mitemo ya Mulungu. Tingabvera uphungu unoyu, tisakwanisa kuona kuti ndi pyadidi kubvera pitsogolero pya Yahova. (Iza. 48:17, 18; 1 Tim. 6:9, 10) Mwakukhonda penula, Yahova anapitiriza kuphatisira anthu toera kutipasa pitsogolero mu ndzidzi wa nyatwa ikulu na mu ndzidzi wa Utongi wa Pyaka Cikwi. Kodi ife tinabvera pitsogolero pyenepi? Pinakhala pyakukhonda nentsa kubvera pitsogolero pya Yahova khala cincino tisabvera pitsogolero pyace. Natenepa ndzidzi onsene tisafunika kubvera pitsogolero pya Yahova. Pyenepi pisaphataniza uphungu unatipasa iye mukuphatisira anthu adasankhula iye toera kutitsogolera. (Iza. 32:1, 2; Aheb. 13:17) Tingabvera Ntsogoleri wathu waungwiro, Yahova, tinakwanisa kukhala na cinyindiro cakuti iye anatitsidzikiza ku ngozwi, pontho tinapitiriza kukhala axamwali ace mu umaso wathu onsene mu dziko ipswa. w24.02 tsa. 25 ¶17-18

Mpostolo Paulu akhatumikira Yahova mwakutsandzaya, mbwenye iye akhathimbana na pinentso pizinji. Kazinji kene iye akhacita maulendo a nsindzo wakulapha, pontho mu ntsiku zenezi pikhali pyakunentsa toera kucita maulendo. M’maulendo anewa, Paulu midzidzi inango akhali “pangozwi m’mikulo” pontho akhali “pangozwi ya mambava.” Kusiyapo pyenepi, midzidzi inango akhatsalakanwa mwakuipa na anyakutcinga. (2 Akor. 11:23-27) Pontho abale na alongo midzidzi inango nee akhapereka takhuta thangwi yakuwangisira kukhacita Paulu toera kuaphedza. (2 Akor. 10:10; Afil. 4:15) Ninji pidaphedza Paulu toera kupitiriza kutumikira Yahova? Iye apfundza pinthu pizinji m’Malemba thangwi ya makhaliro a Yahova, pontho apfundzambo na pinthu pidancitikira. Paulu akhali na cinyindiro cakuti Yahova Mulungu akhanfuna. (Aroma 8:38, 39; Aef. 2:4, 5) Natenepa ufuni wace kuna Yahova wathimizirika kakamwe. Paulu apangiza ufuni unoyu kuna Yahova ‘mukutumikira anthu akucena na kupitiriza kuatumikira.’—Aheb. 6:10. w23.07 tsa. 9 ¶5-6

Anthu azinji asadziwa kuti ife tisafuna ciphedzo ca mautongi, pontho tisafunika kubvera mitemo inango ya “mautongi.” Mbwenye panango anthu anewa ananentseka toera kubvera mitemo inaoneka ninga yakusowa ulungami peno yakuti nee asakomerwa nayo. Bhibhlya isapangiza kuti mautongi a anthu asabweresa nyatwa, asatsogolerwa na Sathani, pontho anadzafudzwa mwakukhonda dembuka. (Mas. 110:5, 6; Ekle. 8:9; Luka 4:5, 6) Mbwenye iyo isalongambo kuti “munthu anakhonda kubvera utongi ali kuthimbana na masasanyiro a Mulungu.” Kubvera mautongi ndi masasanyiro a ndzidzi wakucepa a Yahova toera pinthu pifambe mwadidi. Natenepa, ife tisafunika ‘kuapasa pinthu pyawo pyonsene,’ kuphatanizambo misonkho, cilemedzo na kuabvera. (Aroma 13:1-7) Panango tinaona kuti mitemo yawo nee ndi yadidi, ndi yakusowa ulungami, pontho ndi yakunentsa kuibvera. Mbwenye ife tisabvera mautongi anewa thangwi Yahova asatipanga kuti tisafunika kuabvera khala pinatiphemba iwo toera kucita nee pisakhondeswa m’Bhibhlya.—Mabasa 5:29. w23.10 tsa. 8 ¶9-10

Mu ndzidzi udabalwa Samisoni, Afilisti akhatonga mbumba ya Izraeli na kuithabusa. (Aton. 13:1) Aizraeli akhathabuka thangwi Afilisti akhali akuipa kakamwe. Yahova asankhula Samisoni toera ‘kupulumusa Aizraeli m’manja mwa Afilisti.’ (Aton. 13:5) Natenepa toera kucita basa ineyi, Samisoni akhafunika kunyindira Yahova. Ntsiku inango, anyankhondo Afilisti aenda kamanga Samisoni ku Lei, kwakuti panango kukhali ku Yuda. Amuna a ku Yuda agopa kakamwe, natenepa iwo aona kuti pikhali pyadidi kupereka Samisoni kuna Afilisti. Iwo amanga Samisoni na nkhambala ziwiri zipswa mbampereka kuna Afilisti. (Aton. 15:9-13) Mbwenye “nzimu wa Yahova wampasa mphambvu” mbathumula nkhambala zikhadamangwa na iye. Buluka penepo, iye “aona ntsaya za buru imuna,” azikwata mbapha nazo Afilisti 1.000.—Aton. 15:14-16. w23.09 tsa. 2 ¶3-4

Yahova ndzidzi onsene asakwanisa kukwanirisa cifuniro cace thangwi “asaphatisira pinthu pyonsene toera pinafuna iye picitike.” (Mis. 16:4) Pontho pinacita iye pinapitiriza kwenda na kwenda. Mphapo ndi cipi cifuniro ca Yahova, pontho ndi macinjo api adacita iye toera kucita pinafuna iye? Mulungu apanga Adhamu na Eva cifuniro cace kuna iwo. Iwo akhafunika ‘kubalana, toera anjipe mbatsalakana pinyama pyonsene piri na umaso pa dziko yapantsi.’ (Gen. 1:28) Adhamu na Eva pidadawa iwo abweresa madawo kuna anthu, mbwenye pyenepi nee pyapingiza cifuniro ca Mulungu kuna anthu. Iye acinja njira toera kukwanirisa cifuniro cace. Mwakucimbiza, iye akhazikisa Umambo kudzulu toera kukwanirisa cifuniro cakutoma cikhali na iye kuna anthu na dziko yapantsi.—Mat. 25:34. w23.10 tsa. 20 ¶6-7

Yahova anatiphedza toera tipitirize kuntumikira mwakupirira. Panango pinakhala pyakunentsa kucita pyenepi, makamaka khala tisanentseka mu ndzidzi uzinji toera kusiya kucita pinthu pinango pyakuipa. Midzidzi inango, panango pinentso pinathimbana na ife pinaoneka ninga ndi pyakunentsa kakamwe kupiringana pidathimbana na mpostolo Pedhru. Mbwenye Yahova anatipasa mphambvu toera tikwanise kupirira. (Mas. 94:18-19) Mwacitsandzo, m’bale unango akhali na nsambo wakupita m’mabonde mamuna na mamuna mu pyaka pizinji mbadzati kupfundza undimomwene. Mbwenye iye asiya nsambo unoyu mbacita pinthu mwakubverana na pinalonga Bhibhlya. Ngakhale tenepo, midzidzi inango iye akakhala na pifuno pyakuipa. Ninji pidamphedza toera kupirira? Iye alonga: “Yahova asandipasa mphambvu.” Iye athimiza: “Na ciphedzo ca nzimu wa Yahova . . . Ine ndaona kuti ndi pyakukwanisika kupitiriza kufamba mu undimomwene . . . Yahova asandiphatisira, pontho mwakukhonda tsalakana madodo anga, iye asapitiriza kundipasa mphambvu.” w23.09 tsa. 23 ¶12

Aphale, imwe musafunika kuwangisira toera mukhale Akristu akukola mwauzimu. Musafunika kusankhula anthu a pitsandzo pyadidi toera kuatowezera, kukulisa luso yakunyerezera, kukhala akunyindirika, kukhala na maluso akucita pinthu na kukhunganyika toera kuphata mabasa a ntsogolo. Munganyerezera pyonsene pinafunika imwe kucita ntsogolo, panango munadzudzumika mbamufewa manungo. Imwe munakwanisa kupicita. Kumbukani kuti Yahova asafuna kakamwe kukuphedzani. (Iza. 41:10, 13) Pontho abale na alongo mu mpingo anakuphedzani. Mungakhala Nkristu wakukola mwauzimu, umaso wanu unakhala wakutsandzayisa na wakudzala na nkhombo. Imwe aphale Acikristu, ife tisakufunani kakamwe! Yahova mbakupaseni nkhombo kakamwe mu ndzidzi unawangisira imwe toera kukhala Nkristu wakukola mwauzimu. w23.12 tsa. 29 ¶19-20

Nyerezerani kuti imwe muli pa nsoka wa abale na alongo, pontho pakufuna kupangana imwe musabulusa mafoto anango mawiri toera mukhale na anewa yakutoma ingakhonda kubuluka mwadidi. Natenepa imwe musakhala na mafoto matatu. Mbwenye pa ibodzi mwa mafoto anewa, m’bale m’bodzi nee ali kumwetulira. Natenepa imwe munaifudza mbamusala na mafoto anango mawiri thangwi anthu onsene ali penepo abuluka mwadidi, pontho ali kumwetulira. Kazinji kene ife tisakoya m’manyerezero mwathu m’midzidzi yadidi idakhala ife pabodzi na abale na alongo athu. Mphapo nyerezerani kuti ubodzi mwa midzidzi ineyi, m’bale peno mulongo alonga peno acita pinthu pyakuipa? Tinacitanji? Ife tinawangisira toera kuduwala pinthu pyenepi, ninga pinafudza ife foto yakuti nee yabuluka mwadidi. (Aef. 4:32) Ife tinakwanisa kuduwala, thangwi tisakumbuka midzidzi mizinji yadidi idakhala ife pabodzi na iye. Pyenepi ndi pinthu pinafunika ife kukoya m’manyerezero. w23.11 tsa. 12-13 ¶16-17

Mafala Acigerego adaphatisirwa pa mavesi anewa asapangiza kuti akazi asafunika kubvala munjira yadidi na kupangiza kuti asabvera maonero na mabvero a anthu anango. Ife tisapereka takhuta kuna alongo athu anawangisira kuphatisira uphungu unoyu mbabvala munjira yadidi. Luso yakudzindikira ndi nkhaliro unango wakufunika kakamwe wakuti alongo onsene akukola mwauzimu Acikristu asafunika kukhala nawo. Kodi luso yakudzindikira ninji? Ndi luso yakudziwa kusiyanisa cinthu cadidi na cakuipa buluka penepo mbatisankhula kucita cinthu cadidi. Onani citsandzo ca Abhigaili. Mamunace acita cisankhulo cakuipa cakuti caikha pangozwi umaso wa anthu onsene a panyumba pace. Abhigaili acita pinthu mwakucimbiza. Cisankhulo cace cadidi capulumusa umaso wa anthu azinji. (1 Sam. 25:14-23, 32-35) Luso yakudzindikira isatiphedzambo toera kudziwa ndzidzi wakulonga na ndzidzi wakumatama. Isatiphedzambo toera kupangiza citsalakano kuna anango mbatikhonda kupitira pinthu pyawo.—1 Ates. 4:11. w23.12 tsa. 20 ¶8-9

Mpostolo Paulu alembera mafala anewa Akristu a ku Roma. Abale na alongo a kweneko akhadapfundza kale thangwi ya Yahova, Yezu Kristu, akhali na cikhulupiro, pontho akhadamala kale kukhala Akristu. Mulungu ‘aaona kuti ndi akulungama thangwi ya cikhulupiro,’ pontho aadzodza na nzimu wakucena. (Aroma 5:1) Natenepa iwo akhali na cidikhiro cadidi kakamwe. Buluka penepo Paulu alembera Akristu akudzodzwa a ku Efeso thangwi ya cidikhiro cidaapasa Mulungu. Cidikhiro ceneci cisaphatanizambo ‘pinthu pinakoyera iye anthu akucena ninga unthaka wawo.’ (Aef. 1:18) Pidalembera iye Akristu a ku Kolose, Paulu afokotozambo mbuto ikhafuna iwo kutambira pinthu pikhadikhira iwo. Iye alonga kuti iwo akhali na ‘cidikhiro cidakoyerwa iwo kudzulu.’ (Akol. 1:4, 5) Natenepa Akristu akudzodzwa, ali na cidikhiro cakulamuswa muli akufa mbakhala na umaso wakukhonda mala kudzulu kunafuna kudzatonga iwo pabodzi na Kristu.—1 Ates. 4:13-17; Apok. 20:6. w23.12 tsa. 9 ¶4-5

Fala yakuti ‘kutsidzikiza’ ikhaphatisirwa toera kulonga pya anyankhondo akuti akhatsidzikiza nzinda toera ukhonde kufudzwa. Anthu akakhala mu nzinda unoyu akhapibva kuti akhali akutsidzikizika, thangwi akhadziwa kuti anyankhondo ali kuaonera. Munjira ibodzi ene, ntendere wa Mulungu ungatsidzikiza mitima yathu na manyerezero athu, tisakhala akukhurudzika thangwi tisadziwa kuti tiri akutsidzikizika. (Mas. 4:8) Ninga Yana, ngakhale kuti nyatwa zathu nee zinamala mwakucimbiza, ife tinakwanisa kupitiriza kukhala akukhurudzika. (1 Sam. 1:16-18) Pontho tingakhala akukhurudzika, kazinji kene pisakhala pyakukhonda nentsa kunyerezera mwadidi na kucita pisankhulo pyadidi. Mphapo tinacitanji? Ninga anthu akakhala mu nzinda akuti akhakwanisa kucemera anyankhondo toera kuatsidzikiza, ifembo tinakwanisa kuphemba Yahova toera atitsidzikize. Munjira ipi? Citani phembero mpaka mukhale na ntendere wa Mulungu. (Luka 11:9; 1 Ates. 5:17) Mungathimbana na nyatwa, pitirizani kucita phembero. Mungacita pyenepi, munakhala na ntendere wa Yahova wakuti unatsidzikiza ntima wanu na manyerezero anu.—Aroma 12:12. w24.01 tsa. 21 ¶5-6

Toera kucenesa dzina ya Pai wace, Yezu athabuswa, atikanwa na kupambizirwa pinthu pyakuipa. Iye akhadziwa kuti abvera Pai wace mu pinthu pyonsene, pontho nee akhali na mathangwi toera kukhala na manyadzo. (Aheb. 12:2) Yezu akhadziwambo kuti ndi Sathani akhamuyesera m’midzidzi ineyi yakunentsa. (Luka 22:2-4; 23:33, 34) Sathani akhafuna kucita pyonsene toera Yezu asiye kukhala wakukhulupirika, mbwenye iye nee akwanisa. Yezu apangiza kuti Sathani ndi nyauthambi, pontho kuti Yahova ali na atumiki akukhulupirika akuti asapitiriza kukhala akukhulupirika kuna iye maseze athimbane na nyatwa zakunentsa kakamwe! Kodi imwe musafuna kutsandzayisa Mambo wanu Yezu? Pitirizani kusimba dzina ya Yahova mukuphedza anango toera adziwe makhaliro adidi kakamwe a Mulungu wathu. Mungacita pyenepi muli kutowezera manyalo a Yezu. (1 Ped. 2:21) Ninga Yezu, imwe muli kutsandzayisa Yahova, pontho muli kupangiza kuti nyamalwa Wace, Sathani ndi nyauthambi kakamwe! w24.02 tsa. 11-12 ¶11-13

Mu pyaka pixanu pidapita, anthu azinji kakamwe abatizwa mbakhala Mboni za Yahova. Mungaperekeka kuna Yahova, kucita cifuno ca Mulungu kusakhala kwakufunika kakamwe mu umaso wanu. Imwe musasankhulambo kukhala nyakupfundza wa Yezu Kristu. Yezu alonga: “Munthu anafuna kunditowera, asafunika akhondeke ekhene.” (Mat. 16:24) Ninga ntumiki wakupereka kuna Yahova, musafunika kukhonda pinthu pyonsene pyakuti nee pisabverana na cifuno cace. (2 Akor. 5:14, 15) Pyenepi pisabveka kukhonda “mabasa aunyama” ninga ulukwali. (Agal. 5:19-21; 1 Akor. 6:18) Kodi kubvera mitemo ineyi kunacitisa kuti umaso wanu ukhale wakunentsa? Imwe nee munakhala na maonero anewa khala musafuna Yahova, pontho muli na cinyindiro cakuti kubvera mitemo yace kunakuphedzani.—Mas. 119:97; Iza. 48:17, 18. w24.03 tsa. 2 ¶1; tsa. 3 ¶4

Yahova asapasa nzimu wace wakucena ale akuti ndi akutawirika kuna iye. (Mat. 12:18) Natenepa bvundzikani: ‘Kodi ine ndisakwanisa kupangiza misapo ya nzimu wakucena mu umaso wanga? Kodi ndine wakupirira kakamwe cincino kupiringana mu ndzidzi udatoma ine kutumikira Yahova?’ Mungakulisa kakamwe misapo ya nzimu wakucena wa Mulungu, munakhalambo na cinyindiro cakuti Yahova asakomerwa na imwe. Yahova apereka ciomboli toera kuphedza ale akuti ndi akutawirika kuna iye. (1 Tim. 2:5, 6) Mphapo ndiye tani khala nee muli na cinyindiro cakuti ndimwe wakutawirika kuna Yahova maseze musakhulupira ciomboli, pontho mwabatizwa? Kumbukani kuti ife nee tinakwanisa kunyindira mabvero athu ndzidzi onsene, mbwenye tinakwanisa kunyindira Yahova. Kuna Yahova, onsene anakhulupira ciomboli asaoniwa ninga akulungama, pontho iye apikira kuti anadzaapasa nkhombo.—Mas. 5:12; Aroma 3:26. w24.03 tsa. 30 ¶15; tsa. 31 ¶17