Mulungu Mbani?

Anthu azinji asalonga kuti asakhulupira Mulungu. Mbwenye ungaabvundza kuti Mulungu mbani, iwo asapereka matawiro akusiyana. Kuna anango Mulungu ndi ntongi wakuipa wakuti asathabusa anthu thangwi ya madawo awo. Anango asaona kuti ndzidzi onsene Mulungu ndi waufuni, pontho asalekerera pinthu pyonsene pinacita iwo. Anango asanyerezera kuti Mulungu ali kutali kakamwe, pontho nkhabe tsalakana anthu. Manyerezero anewa akusiyana asacitisa anthu azinji kuona kuti mphyakunentsa kudziwa Mulungu.

Mphyakufunika kudziwa Mulungu? Inde. Kudziwa Mulungu kunaticitisa kukhala na cifuniro mu umaso. (Mabasa 17:26-28) Tingakhala na uxamwali wakuwanga na Mulungu, iye anatifuna kakamwe, pontho anatiphedza. (Tiyago 4:8) Kusiyapo pyenepi, kudziwa mwadidi Mulungu kunaticitisa kukhala na umaso wa kwenda na kwenda.—Juwau 17:3.

Munakwanisa tani kudziwa Mulungu? Nyerezerani munthu wakuti musandziwa mwadidi, panango xamwali wanu wapantima. Kodi uxamwali wanu watoma tani? Panango mwasaka kudziwa dzinace, makhaliro ace, pinakomerwa na iye na pinakhonda komerwa na iye, pidacita iye mu umaso wace, pinafuna kucita iye ntsogolo na pinango. Pyenepi pyakuphedzani toera kudziwa mwadidi munthu unoyu mbamukhala xamwali wace.

Munjira ibodzi ene, ife tinakwanisa kudziwa Mulungu tingadziwa matawiro a mibvundzo iyi:

• NDI IPI DZINA YA MULUNGU?

• NDI API MAKHALIRO A MULUNGU?

• NINJI PIDACITA MULUNGU?

• NINJI PINAFUNA KUDZACITA MULUNGU?

• THANGWI YANJI KUDZIWA MULUNGU NDI CINTHU CADIDI KWA IMWE?

Revista ino inadzapereka matawiro a m’Bhibhlya a mibvundzo ineyi. Misolo ya revista ino, inakuphedzani tayu basi kudziwa Mulungu, mbwenye kubvesesa kuti kukhala xamwali wa Mulungu ndi cinthu cadidi kakamwe.