Ndi Ipi Dzina Ya Mulungu?

Khala musafuna kudziwa munthu, cakutoma musacita mbvundzo, “Dzina yanu ndimwe ani?” Mbamudacita mbvundzo unoyu kuna Mulungu, mbadatawira tani?

‘Ine ndine Yahova. Ineyi ndi dzina yanga.’—Izaiya 42:8.

Kodi mukhadaibva kale dzina ineyi? Panango nkhabe, thangwi athumburuzi azinji a Bhibhlya abulusa dzina ya Mulungu peno aiphatisira m’maulendo akucepa. Kazinji kene iwo acinja dzina ineyi mbaphatisira cidzo “MBUYA.” Mbwenye dzina ya Mulungu isagumanika maulendo akupiringana 7.000 mu cilongero cakutoma ca Bhibhlya. Mu Cihebheri dzina ya Mulungu iri na maletra manai, YHWH peno JHVH. Kazinji kene mu Cisena dzina ineyi isathumburuzwa “Yahova.”

Dzina ya Mulungu mu Cihebheri mu Mipukutu ya Bara Yakufa — Mpukutu wa Masalmo wa Bara Yakufa Mu pyaka 30 na 50 pakumala kubalwa kwa Kristu, CIHEBHERI

Dzina ya Mulungu m’Bhibhlya ya Cispanyola ya Reina-Valera — Bhibhlya ya Tyndale 1530, CINGEREZI

Dzina ya Mulungu m’Bhibhlya ya Cixina ya Union Version — Bhibhlya ya Reina-Valera 1602, CISPANYOLA

Dzina ya Mulungu isagumanika m’malemba Acihebheri na m’Mabhibhlya mazinji

THANGWI YANJI DZINA YA MULUNGU NDI YAKUFUNIKA

Dzina ya Mulungu ndi yakufunika kwa iye. Nkhabepo munthu adapasa dzina Mulungu. Ndi Yahova ekhene adasankhula dzina yace. Iye alonga: ‘Ineyi ndi dzina yanga kwenda na kwenda, pontho ineyi ndi dzina inadzakumbukirwa na ine madzindza na madzindza.’ (Eksodo 3:15) M’Bhibhlya dzina ya Mulungu isagumanika m’maulendo mazinji kupiringana pidzo pizinji pinacemerwa na iye ninga Wamphambvu Zonsene, Baba, Mbuya, Mulungu, pontho isagumanika kazinji kene kupiringana madzina anango ninga awa Abhrahamu, Mose, Dhavidhi na Yezu. Kusiyapo pyenepi, Yahova asafuna kuti dzina yace idziwike. Bhibhlya isalonga: ‘Toera anthu akudziweni kuti imwe, dzina yanu ndi Yahova, imwe mwekha ndimwe Wankulu kakamwe pa dziko yonsene.’—Masalmo 83:18, Tradução do Novo Mundo.

Dzina ya Mulungu ndi yakufunika kuna Yezu. Pidalonga iye m’phembero kuti “Babathu” Yezu apanga atowereri ace toera kuphemba Mulungu kuti: “Dzina yanu mbiceneswe.” (Mateu 6:9) Yezu aphemberambo kuna Mulungu: “Baba, pasani mbiri dzina yanu.” (Juwau 12:28) Kucenesa dzina Yahova kukhali cinthu cakufunika kakamwe kuna Yezu, iye aphembera: “Ine ndaadziwisa dzina yanu, pontho ndinapitiriza kuidziwisa.”—Juwau 17:26.

Dzina ya Mulungu ndi yakufunika kwa onsene anamulambira. Alambiri a Mulungu a mu ndzidzi wakale akhadziwa kuti dzina ya Mulungu ikhali yakufunika kakamwe toera kutsidzikizwa na kupulumuswa. ‘Dzina ya Yahova ndi nzati wa malinga: munthu wakulungama asathawira mwemo, pontho asatsidzikizwa.’ (Misangani 18:10) ‘Munthu onsene anacemera dzina na Yahova anadzapulumuswa.’ (Yoele 2:32) Bhibhlya isapangiza kuti dzina ya Mulungu inacitisa anthu kudzindikira atumiki ace. ‘Anthu onsene analambira alungu awo, mbwenye ife tinalambira Yahova Mulungu wathu kwenda na kwenda.’—Mikeya 4:5; Mabasa 15:14.

DZINA YA MULUNGU ISABVEKANJI

Dzina ya Mulungu isapangiza ninji pinakwanisa iye kucita. Anyakupfundza azinji adzindikira kuti dzina ya Yahova isabveka “Iye Asacitisa Pinthu Kukhalapo.” Yahova Mulungu atiphedza kubvesesa mabvekero a dzina yace pidalonga iye na Mose: ‘Ndinadzapangiza Kukhala Cinafuna ine Kudzapangiza Kukhala.’ (Eksodo 3:14, NM) Natenepa, dzina ya Mulungu isatipfundzisa kuti kusiyapo kukhala Nciti wa pinthu pyonsene, iye anakwanisa kukhala, peno kucitisa cinthu consene cinafuna iye toera kukwanirisa cifuniro cace. Pidzo pya Mulungu pisapangiza kuti nkhabepo munthu wamphambvu kakamwe kupiringana iye. Mbwenye dzina ya Yahova, isapangiza kuti iye mbani, pontho anakwanisa kucitisa cinthu consene cinafuna iye.

Dzina ya Mulungu isapangiza kuti iye asatitsalakana. Mabvekero a dzina ya Mulungu asapangiza kuti iye asatsalakana pinthu pidacita iye, kuphatanizambo ife. Mulungu asatipangiza dzina yace toera ife tiidziwe. Kusiyapo pyenepi, Yahova nee adikhira toera tim’bvundzise toera atipange dzina yace. Pyenepi pisapangiza kuti Mulungu nee asafuna kuoniwa ninga munthu wakuti ali kutali kakamwe, mbwenye asafuna kuoniwa ninga xamwali wathu.—Masalmo 73:28.

Tingaphatisira dzina ya Mulungu tisapangiza kuti tisafuna kukhala xamwali wace. Mwacitsandzo, nyerezerani kuti munthu asafuna kukhala xamwali wanu. Pakutoma, imwe mwapanga dzina yanu. Mbamudapibva tani khala munthu unoyu nee asafuna kukucemerani na dzina yanu? Panango imwe munapenula khala munthu unoyu asafunadi kukhala xamwali wanu. Ndi sawasawambo na Mulungu. Mulungu asatipanga dzina yace, pontho asatikulumiza toera kuiphatisira. Tingaphatisira dzina ineyi, tisapangiza kuna Yahova kuti tisafuna kukhala xamwali wace. Ngakhale munthu ‘anganyerezera basi ene pya dzina Yahova, iye asadziwa pyenepi!—Malakiya 3:16.

Kudziwa dzina ya Mulungu ndi thanyo yakutoma toera kundziwa. Nee tisafunika kudziwa pyenepi basi. Mbwenye, tisafunika kudziwa makhaliro ace.

NDI IPI DZINA YA MULUNGU? Dzina ya Mulungu ndi Yahova. Dzina ineyi ndi yakupambulika, pontho isabveka kuti Mulungu asakwanirisa pifuniro pyace

MBANI ADACITA MULUNGU?

Anthu azinji asacita mbvundzo unoyu. Panango imwe mwacitambo mbvundzo unoyu. Pinafuna ife kudziwa ndi ipi: Khala pinthu pyonsene pyacitwa na Mulungu, mphapo mbani adacita Mulungu?

Asiyentista asatawira kuti pinthu pyonsene piri na matomero ace. Mwakubverana na pyenepi, vesi yakutoma ya Bhibhlya isalonga: “Pakutoma, Mulungu acita kudzulu na dziko yapantsi.”—Genesi 1:1.

Mphyakucimwanika kulonga kuti pinthu pinaona ife pyacitika pyokhene. Nkhabepo cinthu cinacitika cokhene. Toera dziko ikhalepo, pakhafunika cinthu peno munthu wakuti akhalipo kale toera kuicita. Ngakhale kuti mphyakunentsa kwa ife kubvesesa pyenepi, mbwenye ntsonga ndi yakuti alipo munthu wakuti akhalapo kutomera kale mbacita dziko. Munthu unoyu ndi Yahova Mulungu, wamphambvu kakamwe na waudziwisi.—Juwau 4:24.

Bhibhlya isalonga: ‘Mbamudzati kucita mapiri, pinthu pyonsene mbamudzati kupicita, ndimwe Mulungu wakwenda na kwenda.’ (Masalmo 90:2) Natenepa, ndzidzi onsene Mulungu akhalipo kale. Pyenepi pisapangiza kuti “pakutoma” Mulungu acita pinthu piri n’dziko ino.—Apokalipse 4:11.