Ninji Pidacita Mulungu?

Mungafuna kudziwa mwadidi munthu, pakutoma musafunika kudziwa pidacita iye na nyatwa zidakunda iye. Munjira ibodzi ene, imwe mungafuna kudziwa mwadidi Mulungu, musafunika kudziwa pidacita iye. Mungacita pyenepi, panango munadzindikira kuti pidacita iye kale pisatiphedza tani cincino na pinatiphedza tani toera kukhala na tsogolo yadidi.

MULUNGU ACITA PYONSENE TOERA KUTIPHEDZA

Yahova Mulungu ndi Nciti Wankulu Kakamwe, pontho ‘makhaliro ace akukhonda kuoneka, asapangizika kubulukira mu pinthu pidacita iye.’ (Aroma 1:20) Pontho ndiye ‘adacita dziko yapantsi na mphambvu zace, ndiyembo adacita pyonsene na udziwisi wace na kulikhisa kudzulu na ndzeru zace.’ (Yeremiya 10:12) Kusiyapo pyenepi, pinthu pyakudzumisa pidacita iye pisapangizambo kuti iye asatsalakana m’bodzi na m’bodzi wa ife.

Mwacitsandzo, ife tiri na umaso wadidi thangwi Yahova aticita ‘mwakulandana na iye.’ (Genesi 1:27) Pyenepi pisabveka kuti iye aticita na luso yakutowezera makhaliro ace adidi kakamwe. Pontho iye atipasa luso yakudzindikira pyadidi na pyakuipa. Munawangisira ife toera kutowezera pitsogolero pyace, umaso wathu usakhala na cifuniro, pontho tisakhala akutsandzaya. Kusiyapo pyenepi, iye atipasa mwai wakucita naye uxamwali.

Tingayang’ana dziko yapantsi na pyonsene piri mwenemu, tisaona kuti Mulungu asatifuna kakamwe. Mpostolo Paulu alonga kuti Mulungu “nee asiya kupereka umboni wakuti iye alipo, thangwi apangiza udidi wace kuna imwe mu kubvumbisa madzi akudzulu na kukupasani midzidzi yakubvuna pinthu pizinji, iye akupasani pyakudya mbatsandzayisa kakamwe mitima yanu.” (Mabasa 14:17) Mulungu atipasa pizinji kakamwe kupiringana pire pinafuna ife toera tikhale maso. Iye acita pinthu pyakusiyana-siyana toera tikhale akutsandzaya. Pyenepi pyonsene pisapangiza kuti iye asafuna kuti tikhale na umaso wadidi kakamwe.

Yahova acita dziko yapantsi toera anthu akhale mwenemu kwenda na kwenda. Bhibhlya isalonga: ‘Dziko yapantsi aipasa anthu,’ pontho nee ‘aicita ninga mbuto yapezi, mbwenye aicita toera anthu akhalemo.’ (Masalmo 115:16; Izaiya 45:18) Kodi mbani akhafuna kukhala mu dziko ineyi, pontho ndzidzi ungasi? Bhibhlya isalonga: ‘Anyakulungama anatambira dziko, mbakhala mwenemu kwenda na kwenda.’—Masalmo 37:29.

Mwakubvera na cifuniro cace, Yahova acita mamuna na nkazi wakutoma Adhamu na Eva mbaaikha mparaizu pa dziko yapantsi ‘toera alime na kuitsalakana.’ (Genesi 2:8, 15) Mulungu aapanga: ‘Balanani mbamuinjipa, dzadzani dziko yapantsi mbamuitonga.’ (Genesi 1:28) Natenepa, Adhamu na Eva akhali na cidikhiro cakukhala maso kwenda na kwenda pa dziko yapantsi. Mbwenye mwakutsukwalisa, iwo asankhula kukhonda kubvera Mulungu, na thangwi ineyi, iwo aluza mwai wakukhala pakati pa ‘anyakulungama’ akuti “anatambira dziko.” Thimize pano, tinaona kuti pidacita iwo, nee pyacinja cifuniro ca Yahova thangwi ya dziko yapantsi, mbwenye pakutoma, tendeni tione pinthu pinango pidaticitira Mulungu.

MULUNGU ATIPASA MAFALACE, BHIBHLYA

Bhibhlya isadziwikambo ninga Mafala a Mulungu. Thangwi yanji Yahova atipasa Bhibhlya? Iye atipasa Bhibhlya makamaka toera tindziwe. (Misangani 2:1-5) Ndimomwene kuti Bhibhlya nkhabe tawira mibvundzo yathu yonsene thangwi ya Mulungu, pontho nkhabe bukhu inacita pyenepi. (Koelete 3:11) Ngakhale tenepo, pyonsene pinalonga Bhibhlya pisatiphedza toera kudziwa Mulungu. Iyo isatiphedza kudziwa kuti Mulungu asatsalakana tani anthu, pontho isatipanga ntundu wa anthu anakomerwa na Mulungu na anakhonda komerwa na iye. (Masalmo 15:1-5) Bhibhlya isatipanga maonero a Mulungu thangwi ya ulambiri, makhaliro adidi na akuipa na mpfuma. Kusiyapo pyenepi, Bhibhlya isapangiza makhaliro a Yahova, kubulukira m’mafala na pidacita Mwanace, Yezu Kristu.—Juwau 14:9.

Thangwi inango idacitisa Yahova kutipasa Mafalace, Bhibhlya, ndi toera umaso wathu ukhale na cifuniro, pontho tikhale akutsandzaya. M’Bhibhlya, Yahova asatipanga pinafunika ife kucita toera banja yathu ikhale yatsandzaya, tikomerwe na pinthu piri na ife na tinacitanji toera tikhonde kudzudzumika kakamwe na pinthu pinacitika. Pontho mu revista ino, tinadzaona kuti Bhibhlya isatawira tani mibvundzo yakufunika kakamwe ninga iyi: Thangwi yanji anthu asathabuka kakamwe? Ninji pinafuna kucitika ntsogolo? Pontho iyo isalonga pidacita Mulungu toera kukwanirisa cifuniro cace.

Tendeni tione mathangwi anango anacitisa Bhibhlya kukhala bukhu yakupambulika. Bhibhlya yalembwa na amuna 40 nkati mwa pyaka cifupi 1.600, ngakhale tenepo, ntsonga inagomezerwa ndi ibodzi ene. Pyenepi pisapangiza kuti Mwanaciro Bhibhlya ndi Mulungu. (2 Timoti 3:16) Mwakusiyana na mabukhu anango akale, mphangwa zinagumanika m’Bhibhlya nee zacinja, pontho matsamba mazinji akale asapangiza pyenepi. Kusiyapo pyenepi, azinji ayesera kupingiza toera Bhibhlya ikhonde kuthumburuzwa, kugawizwa na kulerwi. Ngakhale tenepo, iyo ndi bukhu yakuti isathumburuzwa na kugawizwa kakamwe mu ntsiku zathu zino. Pyenepi pisapangiza kuti ‘mafala a Mulungu anakhala kwenda na kwenda.’—Izaiya 40:8.

MULUNGU ASATIPASA CINYINDIRO CAKUTI CIFUNIRO CACE CINAKWANIRISIKA

Cinthu cinango cidacita Mulungu ndi kutipasa cinyindiro cakuti cifuniro cace cinakwanirisika. Mwakubverana na pidapfundza ife, Mulungu akhafuna kuti anthu akhale pa dziko yapantsi kwenda na kwenda. Mbwenye Adhamu pidakhonda iye kubvera Mulungu mbadawa, iye pabodzi na anace onsene aluza mwai wakukhala maso kwenda na kwenda. Bhibhlya isalonga: “Ninga mudapita madawo pantsi pano thangwi ya munthu m’bodzi basi, mbakupitambo kufa thangwi ya madawo, natenepa kufa kwamwazika kwa anthu onsene thangwi anthu onsene adawa.” (Aroma 5:12) Kukhonda kubvera kwa Adhamu mbukudacitisa kuti cifuniro ca Mulungu kuna anthu na dziko yapantsi cikhonde kukwanirisika. Kodi Yahova acitanji?

Yahova acita pinthu mwakubverana na makhaliro ace. Iye apasa mulando Adhamu na Eva thangwi ya madawo adacita iwo. Mbwenye mwaufuni iye acita masasanyiro toera kuphedza ana onsene a Adhamu na Eva. Natenepa Yahova aphatisira udziwisi wace toera kuona kuti anamalisa tani nkandzo unoyu, buluka penepo mbalonga pikhanyerezera iye kucita. (Genesi 3:15) Mulungu mbadaphatisira Mwanace Yezu Kristu toera kuombola anthu ku madawo na kufa. Kodi iye mbadacita tani pyenepi?

Toera kuombola anthu ku madawo a Adhamu, Yahova atuma Yezu toera kudzapfundzisa anthu pa dziko yapantsi pikhafunika iwo kucita kuti akhale maso kwenda na kwenda, na “kupereka umaso wace ninga ciomboli toera kuombola anthu azinji.”a (Mateu 20:28; Juwau 14:6) Yezu apereka umaso wace ninga ciomboli thangwi iye akhali munthu waungwiro ninga Adhamu. Mbwenye mwakusiyana na Adhamu, Yezu akhabvera pyonsene pikhafuna Mulungu mpaka kufa kwace. Nakuti Yezu nee akhadathema kufa, Yahova amulamusa toera abwerere pontho kudzulu. Natenepa Yezu atipasa cinthu cakuti Adhamu nee atipasa—cidikhiro cakukhala na umaso wakwenda na kwenda. Bhibhlya isalonga: “Ninga kukhonda bvera kwa munthu m’bodzi basi anthu azinji adzakhala anyakudawa, tenepambo thangwi yakubvera kwa munthu m’bodzi basi, anthu azinji anadzakhala akulungama.” (Aroma 5:19) Kubulukira mu ntsembe yaciomboli ya Yezu, Mulungu anadzakwanirisa cifuniro cace cakuti anthu akhale maso kwenda na kwenda pa dziko yapantsi.

Ife tinapfundza pizinji thangwi ya Yahova tingaona pidacita iye mu ndzidzi udakhonda bvera Adhamu. Ninga tapfundza, nkhabe cinthu cinafuna kucimwanisa Yahova kukwanirisa cifuniro cace, pontho ndzidzi onsene mafalace ‘onsene’ asakwanirisika. (Izaiya 55:11) Pontho tapfundza kuti Yahova asatifuna kakamwe. Bhibhlya isalonga: “Mulungu apangiza ufuni wace kuna ife munjira iyi: Mulungu atuma Mwanace m’bodzi ekha pa dziko yapantsi, toera kubulukira mwa iye, ife tikwanise kuwina umaso. Munjira ineyi, ufuni usabveka kuti: Sife tayu adafuna Mulungu, mbwenye ndiye adatifuna, mbatumiza Mwanace ninga ntsembe yakuphimbira madawo athu.”—1 Juwau 4:9, 10.

Mulungu “nee akhondesa Mwanace kuthabuka, mbwenye ampereka thangwi ya ife tonsene,” natenepa tinakwanisa kukhala na cinyindiro cakuti Mulungu anatipasambo “pinthu pinango pyonsene” pidapikira iye. (Aroma 8:32) Kodi Mulungu apikira kuticitiranji? Onani ntawiro wa mbvundzo unoyu mu nsolo unatowera.