NSOLO WA REVISTA | KODI YEZU ASAPULUMUSA​—MU NJIRA IPI?

Kufa na Kulamuswa kwa Yezu Pisabvekanji Kwa Imwe

‘Khulupira Mbuya Yezu, tenepa unadzapulumuswa.’​—Machitiro 16:31.

Mafala anewa akukhonda duwalika alongwa na mpostolo Paulu na Sila nkaidi ku Masedonya nzinda wa Filipi. Kodi mafala anewa asabvekanji? Toera kubvesesa kuti kukhulupira Yezu kusabverana tani na kupulumuswa mu kufa, cakutoma tisafunika kudziwa kuti thangwi yanji tisafa. Dingani pinapfundzisa Bhibhlya.

Anthu nee acitwa toera kufa

‘Yahova Mulungu akwata munthu, mbamuikha m’munda wa Edeni, toera aulime mbauonera. Pontho Yahova Mulungu apereka mwambo kuli munthu unoyu kuti: ‘Misapo yonsene ya m’munda muno udye. Mbwenye, leka kudya nsapo wa muti wakudziwisa pyadidi na pyakuipa, thangwi ntsiku inadzaudya iwe, unadzafa.’’​—Genesi 2:15-17.

Mulungu aikha mamuna wakutoma, Adhamu, m’munda wa Edeni, mu paradizu pa dziko yapantsi yakudzala na pinyama na maluwa akubalika. Mukhalimbo na miti yakubala misapo yakuti Adhamu mbadakhala wakusudzuka toera kudya. Mbwenye Yahova Mulungu alongeratu pakweca pya muti ubodzi wakuti Adhamu nee akhafunika kuudya, mbancenjeza kuti angaudya anadzafa.

Kodi Adhamu abvera ntemo unoyu? Iye akhadziwa kuti kufa kulipo, pontho akhaona pinyama mbipikafa. Khala Adhamu acitwa toera kufa, Mulungu nee mbadapereka cenjezo ineyi. Natenepa, Adhamu akhadziwa kuti mbadabvera Mulungu na kukhonda kudya muti udakhondeswa iye, nee mbadafa, mbwenye mbadakhala na umaso wa kwenda na kwenda.

Anango asalonga kuti muti unoyu ukhaimirira kupita m’mabonde, mbwenye unoyu si undimomwene tayu. Mwa pyonsene, Yahova akhafuna kuti Adhamu na nkazace, Eva, ‘abale ana mbanjipa’ toera ‘kudzadza dziko yapantsi mbaitonga.’ (Genesi 1:28) Mwambo unoyu ukhalonga pya muti wandimomwene. Yahova aucemera ‘muti wakudziwisa pyadidi na pyakuipa’ thangwi ukhaimirira matongero ace ku pinthu pyadidi na pyakuipa kwa anthu. Pontho, mukukhonda kudya nsapo wa muti unoyu, Adhamu nee mbadapangiza kubvera kwace basi, mbwenye mbadapangizambo kupereka takhuta kuna M’bodzi ule adancita na adampasa nkhombo zizinji.

Adhamu afa thangwi yakukhonda bvera Mulungu

‘Kuna Adhamu Mulungu alonga: ‘Thangwi . . . yakudya nsapo wa muti ule udakukhondesa ine, . . . unadzadya phoso na kudjodja kaluma pa nkhope pako, mpaka kubwerera pontho ku mataka kudabuluka iwe, thangwi iwe ndiwe pfumbi, kupfumbi unadzabwerera pontho.’​—Genesi 3:17, 19.

Adhamu adya muti udakhondeswa iye. Ncitiro unoyu wakukhonda bvera nee ukhali cinthu cadzenda. Ukhali upanduki na kukhonda lemedza pinthu pyonsene pyadidi pikhadacita Yahova kwa iye. Mu kudya nsapo unoyu, Adhamu akhonda Yahova, mbafuna kutongeka ekha, kwakuti mbukudabweresa nyatwa zizinji.

Ninga mukhadalonga Yahova, mukupita kwa ndzidzi Adhamu afa. Mulungu acita Adhamu ‘na pfumbi ya mataka’ mbampanga kuti ‘mbadabwerera pontho kupfumbi.’ Adhamu nee akhala maso mu njira inango peno kumbuto inango. Pakufa, iye adzakhala cinthu cakusowa umaso ninga pfumbi ya mataka idacitwa na iye.​—Genesi 2:7; Koelete 9:5, 10.

Ife tisafa thangwi tabuluka kwa Adhamu

‘Thangwi ya munthu m’bodzi basi, kwapitambo kufa thangwi ya madawo, tenepa kufa kwapita mwa anthu onsene thangwi anthu onsene acitambo madawo.’​—Aroma 5:12.

Kukhonda bvera kwa Adhamu peno kudawa kwabweresa nyatwa zizinji. Thangwi ya kudawa, Adhamu aluza tayu basi umaso wa ndzidzi uno wa pyaka 70 peno 80, mbwenye umaso wa kwenda na kwenda. Kusiyapo pyenepi, mudadawa Adhamu, aluza makhaliro aungwiro mbabweresa makhaliro akusowa ungwiro kwa anace onsene.

Tonsene ndife mbeu ya Adhamu. Kubulukira mwa iye, ife nee tikhali na pakuthawira kusiyapo kutambira manungo akusowa ungwiro akuti asadawa na kufa. Paulu alonga pya nyatwa zathu. Iye alemba: ‘Ine pano ndine munthu mbandiguliswa m’madawo. Munthu wakunentseka ine! Mbani anadzandipulumusa mwa manungo awa a kundiphesa?’ Buluka penepo Paulu atawira mbvundzo wace: ‘Ndi Mulungu mwa Yezu Kristu Mbuyathu!’​—Aroma 7:14, 24, 25.

Yezu apereka umaso wace toera tikhale maso kwenda na kwenda

‘Baba atuma Mwanace toera akhale mpulumusi wathu wa pantsi pano.’​—1 Jwau 4:14.

Yahova acita masasanyiro toera kukunda madawo na kutisudzula mu nkandzo wa kufa kwa kwenda na kwenda. Mu njira ipi? Iye atuma Mwanace wakufunika buluka kudzulu toera kudzabalwa pantsi pano ninga munthu waungwiro wakulandana na Adhamu. Mbwenye mwakusiyana na Adhamu, Yezu ‘nee acita madawo.’ (1 Pedro 2:22) Nakuti akhali waungwiro, iye nee akhali na nkandzo wa kufa, pontho mbadakwanisa kukhala maso kwenda na kwenda ninga munthu waungwiro.

Ngakhale tenepo, Yahova atawirisa Yezu kuphiwa na anyamalwa ace. Pakupita ntsiku zitatu, Yahova amulamusa muli akufa ninga nzimu wakuti mukupita kwa ndzidzi mbadabwerera kudzulu. Kweneku, Yezu apereka kuna Mulungu ntengo wa umaso wace waungwiro mukuombola ule udaluza Adhamu pabodzi na mbeu yace. Yahova atambira ntsembe ineyi, mbicitisa kuti ale anakhulupira Yezu atambire umaso wa kwenda na kwenda.​—Aroma 3:23, 24; 1 Jwau 2:2.

Natenepa, Yezu abwezera pontho pire pidaluza Adhamu. Iye athabuka mpaka kutifera toera tikwanise kukhala maso kwenda na kwenda. Bhibhlya isalonga: ‘Yezu . . . athabuka mpaka kufa, natenepa Mulungu na nkhombo zace afuna kuti iye apirire kufa thangwi ya anthu onsene.’​—Ahebere 2:9.

Masasanyiro anewa asapangiza pinthu pizinji pya Yahova. Ulungami wace ukulu wacitisa kuti anthu akusowa ungwiro acimwane kuomboleka okha. Mbwenye ufuni wace na ntsisi zace pyancitisa kukwanirisa pifuno pyace​—mukupereka Mwanace m’bodzi toera kuombola anthu.​—Aroma 5:6-8.

Yezu alamuswa muli akufa na anango anadzalamuswambo

‘Kristu alamukadi muli akufa, mbakhala wakutoma mwa onsene anagona ncitulo ca kufa. Thangwi ya munthu m’bodzi kufa kwabwera pantsi pano, thangwimbo ya munthu m’bodzi kulamuka muli akufa kwadzambo. Sawasawa ninga anthu onsene asafa thangwi ya munthu m’bodzi, anthu anadzapaswambo umaso thangwi ya Kristu.’​—1 Akorinto 15:20-22.

Si pyakupenula tayu kuti Yezu akhala maso mbafa, mphapo ndi umboni upi ulipo wakuti iye alamuswa muli akufa? Umboni ukulu unapangiza kulamuswa kwa Yezu ndi mudaonekera iye kuna anthu azinji m’mbuto zakusiyana na midzidzi yakusiyana. Ubodzi mwa iwo ndi mudaonekera iye kuna anthu akupiringana 500. Mpostolo Paulu alemba pyenepi mu tsamba yace kwa Akorinto, mukulonga anango mwa anthu anewa akhali maso, mbagomezera kuti asacitira umboni pidaona iwo na pidabva iwo.​—1 Akorinto 15:3-8.

Pisaonekeratu kuti mukhalemba Paulu kuti Kristu akhali ‘wakutoma’ mwa ale adalamuswa, iye akhapangiza kuti mukupita kwa ndzidzi anango anadzalamuswambo. Yezu alonga kuti unadzafika ndzidzi wakuti ‘anthu onsene anagona mu nthumbi anadzalamuswa.’​—Jwau 5:28, 29.

Toera kukhala maso kwenda na kwenda, tisafunika kukhulupira Yezu

‘Mulungu afuna anthu a pantsi pano pikulu pyene, mphapo apereka Mwanace m’bodzi ekha toera munthu anankhulupira, aleke kutayika, mbwenye aone moyo wakukhaliratu.’​—Jwau 3:16.

Matsamba akutoma a Bhibhlya asalonga pya ndzidzi udatoma kufa na Paradizu idaluzika. Matsamba akumalisa asalonga pya ndzidzi wakuti Mulungu anadzafudza kufa mbabwezera pontho Paradizu pa dziko yapantsi. Buluka penepo, anthu anadzatsandzaya na umaso wakuphindulisa kwenda na kwenda. Apokalipse 21:4 isalonga: “Kufa hakunadzakhalapo pontho tayu.” Toera kupasa cinyindiro pikiro ineyi, vesi 5 isalonga: ‘Mafala awa ndi akukhulupirika na andimomwene.’ Yahova angapikira cinthu, asacikwanirisa.

Kodi musakhulupira kuti ‘mafala awa ndi akukhulupirika na andimomwene’? Natenepa, pfundzani pizinji thangwi ya Yezu Kristu na kunkhulupira. Mungacita pyenepi, munadzakhala wakutawirika kwa Yahova. Nee munadzatsandzaya basi na nkhombo zace cincino, mbwenye munadzakhalambo na cidikhiro ca umaso wa kwenda na kwenda mu Paradizu pa dziko yapantsi, dziko yakuti “kufa hakunadzakhalapo pontho tayu, nee kutsukwala, nee kulira, nee nyatwa.”