Kugawira Kwakupambulika Kunafuna Kudzatoma Pa 16 Ya Nthanda Ya Malandalupya Mpaka 12 Ya Nthanda Ya Bingu!

¹ “Kumala Kwa Uphemberi Waunthawatawa Kuli Cifupi!” Unoyu ndi nsolo wa Mphangwa Za Umambo N.° 37, zinafuna kudzagawirwa pa dziko yonsene yapantsi kutomera pa nthanda inafuna kudza. Nkati mwa masumana mawiri akutoma a nthanda ya Malandalupya, tinadzagawira marevista A Sentinela na Despertai! Kutomera Nciposi, ntsiku 16 ya nthanda ya Malandalupya, mpaka Ndimingu, ntsiku 12 ya nthanda ya Bingu, tinadzakhala akudzudzumika kakamwe m’kugawira Mphangwa Za Umambo N.° 37. Kumala kwa sumana nkati mwa kugawira, tinadzagawira Mphangwa Za Umambo pabodzi na marevista a nthanda ineyi.

² Mbani Anafunika Kucita Khundu: Onsene ale akuti ndi amwazi mphangwa anadzafuna kucita khundu mwakukwana. Anango angakwanise kukhala apainiya akuphedza. Kodi muli na anapiana peno anyakupfunza a Biblya akuti ali kuenda kutsogolo mwauzimu? Aphedzeni kuti alonge na akulu a mpingo towera kuona khala athema kukhala amwazi mphangwa okhonda batizwa. Akulu a mpingo asafunika kutoma kulonga na amwazi mphangwa adalimira m’kumwaza mphangwa towera kuawangisa kucita khundu, panango m’kuphata basa pabodzi na amwazi mphangwa aluso.

³ Ntsama ya Mphangwa Za Umambo N.° 37 iri kutumizwa ku mipingo yonsene towera amwazi mphangwa na apainiya akwanise kutambira matsamba akukwana 50. Anthu akufuna akuti si amwazi mphangwa tayu angakwanise kutambira matsamba maxanu towera kugawira piwalo pya banja na axamwali. Amwazi mphangwa na apainiya asafunika kulemba matsamba adagawira iwo kuntsi kwa lipoti yawo ya basa ya mmunda kunkhomo kwa nthanda ya Malandalupya na ya Bingu. Mulembi anadzagumanyiza cilengeso consene ca matsamba adagawirwa na mpingo mbacitumiza ku filiali kunkhomo kwa nthanda ibodzi na ibodzi. Tsamba yonsene ya Mphangwa Za Umambo yakusala kunkhomo kwa kugawira kwakupambulika ingakwanise kuphatisirwa m’ntundu onsene wa utumiki.

⁴ Pinafunika Kulongwa: Citani uperekero umboni wanu ukhale wa cigwagwa, pyenepi pinadzakucitisani kugawira mphangwa zenezi kwa anthu azinji. Mungakwanise kulonga kuti: “Ninga mmwazi mphangwa ndiri kucita basa ya kugawira mphangwa zakufunika inacitwa pa dziko yonsene yapantsi towera kuphedza anthu onsene. Iyi ndi tsamba yanu yapezi. Ndaphata mwendo ilerini.” Panango kunakhala kwakuphedza kusiya pasta munaenda ife nyumba na nyumba. Citani pyonsene towera kulemba madzina a anthu onsene adagumana imwe adapangiza kufuna.

⁵ Munakwanisa Tani Kugawira Cisa Canu Consene: Mbuto mwa kugawira Mphangwa Za Umambo m’basa ya nseu, pingakwanisika wangisirani makamaka m’basa ya nyumba na nyumba na m’cisa ca malonda. Lembani nyumba zokhonda gumanika anthu, na yeserani kubwerera pa nzidzi unango peno pa ntsiku inango ya sumana. Kutomera Nciposi, ntsiku 6 ya nthanda ya Bingu, panango tingatome kusiya tsamba pa nyumba zokhonda gumanika anthu. Mbwenye, khala mpingo uli na cisa cikulu cakuti nkhabe kwanisika kugawirwa nkati mwa nzidzi udaikhwa, akulu ampingo angakwanise kutonga kuti tsamba ya Mphangwa Za Umambo isiyiwe pa nyumba zokhonda gumanika anthu nkati mwa kugawira konsene.

⁶ Kufudzwa kwa “Babilonya Wankulu” kuli cifupi kakamwe. Anthu asafunika kubuluka mwenemo iye mbasati kufudzwaretu. (Apok. 14:8; 18:8) Khunganyikani cincino towera kucita khundu mwakukwana m’kugawira uku kwa dziko yonsene yapantsi towera kudziwisa anthu onsene kuti kumala kwa uphemberi waunthawatawa kuli cifupi!