Lekani Kuluza Kufuna Kukhali Na Imwe Pakutoma

¹ Yezu wakupaswa mbiri apereka uphungu ku mpingo wa ku Aefesi m’piaka dzana yakutoma: “Ndinakusandika thangwi ya chinthu chibodzi: thangwi iwe wasiya kufuna kwako kwakutoma.” (Apok. 2:4) Mwandimomwene, anthu azinji akhadaluza kufuna kukhali na iwo pakutoma kwa Yahova. Mukhapfunza ife undimomwene, tikhakhala na kufuna kukulu kwa Mulungu na nyakuendekana, pyenepi pyatikulumiza kumwaza cidikhiro cathu cipswa mwaphinga. Kodi ndi ninji cinafuna kudzatitsidzikiza towera kukhonda kuluza kufuna kukhali na ife na kubwerera nduli m’utumiki?

² Pfunziro Ya Munthu Ekha Na Kugumanika Pa Misonkhano: Kodi ndi ninji cidaticitisa kukulisa kufuna Mulungu na nyakuyendekana wathu mudapfunza ife kwene undimomwene? Kodi si pyonsene pidapfunza ife pya Yahova kubulukira ku pfunziro yathu ya m’Malemba tayu? (1 Jwau 4:16, 19) Natenepa, towera kufuna kwathu “kukule ntsiku na ntsiku” tisafunika kupitiriza kukhala na cidziwiso cakulinganira, mbatikumba ‘pyakubisala pya Mulungu.’—Afil. 1:9-11, Mphangwa Zadidi; 1 Akor. 2:10.

³ Kupitiriza kukhala na ndandanda wadidi wa pfunziro ya munthu ekha pingakwanisedi kukhala pyakunensa m’ntsiku zino zakumalisa zakudzala na nyatwa na pidzudzumiso. (2 Tim. 3:1) Tisafunika kupamba nzidzi m’ndandanda wathu towera kudya cakudya cauzimu. Kugumanika pa misonkhano ya mpingo mokhonda phonya ndi pyakufunikambo, “makamaka na kuona kuti ntsiku inabwera mbuya, iri duzi.”—Aheb. 10:24, 25, MZ.

⁴ Utumiki: Kucita nkhundu m’utumiki mwaphinga kusatiphedza kukoya kufuna kwathu kwakutoma kwa Mulungu. Munamwaza ife mphangwa zadidi, tisakumbuka tekhene mapikiro akufuna a Yahova, na pyenepi pisatiphedza kukoya cidikhiro cathu cakuwanga na kufuna kwathu kusapitirira. Kupfunzisa undimomwene wa Biblya kusaphemba kusaka-saka towera kuubvesesa mwadidi tekhene, na pyenepi pisawangisa cikhulupiro cathu.—1 Tim. 4:15, 16.

⁵ Yahova ndi wakuthema pinthu pyonsene, kuphataniza kufuna kwathu. (Apok. 4:11) Lekani tawirisa kufuna kwanu kupunguke. Citani kuti kufuna kwanu kwakutoma kupitirire kukhala kwakuwanga m’kukhala na pfunziro ya Biblya ya munthu ekha yakukhonda phonya, kugumanika pa misonkhano mokhonda phonya, na kumwaza mphangwa mwaphinga kwa anango ndi cinthu cakufunika kakamwe m’ntima mwanu.—Arom. 10:10.