Gulu Yakucita Cifuno Ca Yahova,

tsamba 102-108

NSOLO 9

NJIRA ZA KUMWAZA MPHANGWA ZADIDI

CISA

Cifuniro ca Yahova ndi cakuti mphangwa za Umambo zimwazwe pa dziko yonsene yapantsi mu nzinda na m’pisa pya kutali na nzinda mu njira yakulinganira. Towera kukwanirisa pyenepi, mipingo tenepa ninga anthu anapereka umboni m’mbuto zakutali asapaswa cisa kubulukira ku citsogolero ca ofesi ya filiali inatsogolera basa m’madziko awo. (1 Akor. 14:​40, Chiverano Chachinchino) Pyenepi pisabverana na masasanyiro adatsogolerwa na Mulungu mu piaka dzana yakutoma. (2 Akor. 10:​13; Agal. 2:⁠9) Na kuthimizirika kwakucimbiza kwa basa ya Umambo mu ntsiku zino zakumalisa, kukhala na pisa pyakupambwa mwadidi kusaphedza kucalira kuti cisa cibodzi cene ciphatwe basa na anthu akupiringana m’bodzi peno nsoka mu nzidzi ubodzi ene. Pyenepi pisapasa mwai anthu azinji kubva mphangwa zadidi.

Masasanyiro a kuphata basa mu cisa consene ca mpingo asatsogolerwa na muyang’niri wa m’munda. Ntumiki wakutumikira angakwanise kugawa cisa na kulemba papswa pyakulembwa pyace. Khala cisa ndi cakucepa, munyang’niri wa Pfunziro ya Bukhu ya Mpingo kazinji kene asakhala na cisa cakuti amwazi mphangwa a mu nsoka asaenda kacita utumiki wa m’munda.

Mbwenye, khala muli m’mpingo wakuti uli na cisa cikulu, mungafune kukhala na cisa canu cene, panango cifupi na kunakhala imwe. Kukhala na cisa canu cene pa mbuto yakuthema kunakucitisani kuphatisira mwadidi nzidzi udapambula imwe towera kucita utumiki wa m’munda. Pontho, mungakwanise kuphemba m’mwazi mphangwa unango towera kuphata basa pabodzi na imwe mu cisa canu cene.

Khala pa mpingo wanu piripo pisa pyakuti munthu angakwanise kukhala na cace, mungakwanise kuphemba ntumiki anayang’anira pisa kuti akupaseni cibodzi cakuti cidzati kupaswa munthu unango. Musafunika kudziwisa ntumiki anayang’anira pisa munamala imwe kuphata basa cisa ceneci. Mungaphata basa mu cisa canu mwekha, munadzadziwana na anthu azinji, na kupirira kwanu, imwe munadzakhala wakukomerwa mu kuphedza anango mwa iwo kupereka takhuta ku masasanyiro a Mulungu a upulumusi.

Mwandimomwene, khala imwe muli na cisa canu cene, kunadzakhala kupitawirira kwanu kupita n’cibverano na anthu azinji mu cisa ceneci ninga munapikwanisira imwe. Pyenepi pinadzaphemba imwe kucita ulendo wakubwerezera ku zinyumba zidakhonda gumanika anthu na kupasa ciphedzo cauzimu kwa ale anapangiza kufuna mphangwa zadidi za Umambo. M’midzidzi inango, Utumiki Wathu Wa Umambo usabweresa maonero akuthonyeka akuti cisa cinakwanisa tani kuphatwa basa mwakukwana mu kuphatisira Mabiblya, mabukhu, marevista, mabruxura, matsamba, micemerero, na masasanyiro anango a “mbandazi wakukhulupirika na wanzeru.” Panango anthu anango mu cisa canu, ninga ale anakhala zinyumba zakuzungulirwa na malinga peno nyumba za n’dzulu zakuonerwa mwadidi, mungakwanise kulonga nawo mu kuphatisira tsamba, ntokodzi peno mu njira zinango, ninga umboni wa mu nseu. Muyang’aniri wa m’munda na muyang’aniri wa Pfunziro ya Bukhu ya Mpingo anakwanisa kupereka maonero akuthema mwakubverana na makhaliro a cisa pabodzi na makhaliro a munthu pa ekha.

Onsene m’mpingo angacita pinthu mwakubverana, cisa cingakwanise kuphatwa basa mwakulinganira na mu njira yadidi. Tinakwanisambo kucalira kuti Mboni ziwiri peno zizinji ziphate basa mu nzidzi ubodzi ene mu cisa cibodzi cene, pyakuti pingakwanise kudzudzumisa peno kupindisa anaciro nyumba m’midzidzi inango. Natenepa tisapangiza citsalakano kwa abale athu pabodzi na anthu a mu cisa.

Kucita Umboni Kwa Anthu a Pilongero Pyonsene

Anthu onsene asafuna kupfunza pya Yahova Mulungu, Mwana wace, na Umambo. (Apok. 14:​6, 7) Tiri akufunisisa kuphedza anthu a mu cisa cathu analonga cilongero cinango towera kucemera dzina ya Yahova kuti apulumuswe na kukhala na makhaliro Acikristu. (Arom. 10:​12, 13; Akol. 3:​10, 11) Kodi tinakwanisa tani kuthimbana na makhaliro akusiyana-siyana pabodzi na pinenso pinabwera munalonga ife mphangwa zadidi kwa anthu anewa mu njira yakufuna na yadidi?

Akristu asafunika kucitira anango pinthu pyakuti iwo anapifunambo kupicitirwa. (Mat. 7:​12) Kutambira mwadidi anthu a dziko inango peno a cilongero cinango kusapangiza citsalakano candimomwene ca munthu pa ekha. (Arom. 15:⁠7) Manyerezero anewa ndi adidi munamwaza ife mphangwa zadidi mu pisa pya anthu akudza, pontho pisaphedza kuona anthu ninga munaaonera Mulungu.​​—⁠Mach. 10:​34, 35; 17:⁠26.

Mungagumana munthu mu cisa wakuti asalonga cilongero cakuti imwe nkhabe kucibva, wangisirani kudziwa cilongero cinaleri iye. Mpangiseni mphangwa zinagumanika mu kabukhu kakuti: Boas Novas para Pessoas de Todas as Nações. Khala mpingo peno nsoka wa cilongero ceneci uli cifupi, panango mungakwanise kumphedza kupita n’cibverano na abale anewa. Panango m’mwazi mphangwa wa pa cisa canu anadziwa cilongero ceneci angakwanise kupitiriza kusakulira cifuno ca munthu unoyu. Pyenepi pingakhonda kwanisika, pangani mwanaciro nyumba kuti munayesera kusaka bukhu ibodzi mwa mabukhu athu mu cilongero ceneci. Buluka penepo bvunzani ntumiki anaonera mabukhu towera mudziwe kuti ndi mabukhu api anagumanika mu cilongero ceneci cakupambulika.

Amwazi mphangwa anango apfunza pang’ono cilongero towera kupereka umboni wakukhonda nensa. Anango atawira cinenso ca kupfunza na munthu, mukuphatisira ibodzi ya mabukhu akudindwa mu cilongero cace. Tingaphatisira pithunzithunzi na kumphemba kuti aleri Malemba akusowa mafala mu ndima, iye anadzabvesesa pipfunziso pyakutoma pya Biblya. Panango ciwalo ca banja yace cisadziwa mwadidi cilongero cace na cilongero ca pacisa towera kutumikira ninga n’thumburuzi.

Mu kunyerezera kuti cifuniro cathu ndi kucita anyakupfunza, wangisani munthu adapangiza kufuna kuti agumanike pa misonkhano ya mpingo wa pacisa khala nkhabepo nsonkhano unacitwa mu cilongero cinabva iye. Kugumanyikana basi kwa Akristu kungakwanise kuwangisa na kunadzaphedza iye kuenda kutsogolo mwauzimu.

Khala cisa ca mpingo cisaphataniza cisa cikulu ca anthu akudza ku dziko inango, akulu a mpingo asafunika kucita masasanyiro a basa ya kumwaza mphangwa towera kupereka ciphedzo cauzimu. Panango anthu acilongero cinango asagumanika m’pisa pya mipingo miwiri peno mizinji yapaduzi. Khala ndi tenepo, muyang’aniri peno ayang’aniri a pisa anadzaphedza akulu a mpingo kutowezera pitsogolero pidaperekwa na ofesi ya filiali, pyenepi pinadzacitisa kuti mipingo ibverane m’basa ya kumwaza mphangwa. M’midzidzi inango, nkhani yapakweca peno Pfunziro ya A Sentinela ingakwanise kucitwa towera kuona cilengeso ca anthu anafuna gumanika pa misonkhano ya cilongero cinango.

Nsoka wa cilongero cinango ungakwanise kukhazikiswa khala usakwanirisa pinthu ipi: (1) Pana amwazi mphangwa peno anthu adapangiza kufuna akuti asabvesesa mphangwa zadidi mu cilongero ceneci, (2) pasagumanika nkulu wa mpingo peno ntumiki wakutumikira wakuthema towera kutsogolera na kucitisa nsonkhano wa mpingo ubodzi peno mingasi pa masumana onsene, na (3) nsoka wa akulu a mpingo wakuti uli wakufunisisa kuphedza nsoka unoyu. Pinthu pyenepi pyakufunika pingakwaniriswa, akulu a mpingo asafunika kudziwisa ofesi ya filiali towera nsoka ukwanise kudzindikirwa na kutambira pipfunziso pyakuthimizirika.

Kazinji kene, ubodzi mwa misonkhano yakutoma kucitwa na nsoka pa sumana ibodzi na ibodzi ndi Pfunziro ya Bukhu ya Mpingo. Mukupita kwa nzidzi, akulu a mpingo anadzatawirisa towera kucita misonkhano inango, ninga Nkhani Yapakweca na Pfunziro ya A Sentinela. Nkhani za anyakupfunza Xikola Ya Utumiki Wa Mulungu zinadzacitwa mu sala inango khala nkulu wa mpingo peno ntumiki wakutumikira anadziwa mwadidi cilongero anakwanisa kutumikira ninga phungu. Misonkhano ya nsoka ya kukhunganyikira basa ya m’munda ingakwanisembo kucitwa. Citsogolero caumulungu cibodzibodzi cisaphatisirwambo ku pilongero pyonsene.

Anthu onsene mu nsoka asaphata basa pantsi pa citsogolero ca nsoka wa akulu a mpingo unaphedza kuyang’anira nsoka unoyu. Akulu a mpingo anadzapasa citsogolero cakulinganira na kupangiza kufuna mu kutsalakana pyakufuna pya nsoka. Munaphata muyang’aniri wa cisa basa na nsoka nkati mwa sumana yakucedzesa kwace mpingo unaphedza kuyang’anira nsoka unoyu, iye anadzatumiza lipoti yacigwagwa ku ofesi ya filiali ya uthambaruki na pyakufuna pyakuthonyeka. Khala onsene anaphata basa mu cisa ca cilongero cinango asaphatisira citsogolero ca Malemba na ca gulu, dzina ya Yahova inadzalemedzwa.​​—⁠1 Akor. 1:​10; 3:⁠5, 6.

Kuphata Basa M’pisa Pya Pilongero Pizinji

M’mizinda mikulu mizinji, amwazi mphangwa a mpingo ubodzi na ubodzi asafunika kuwangisira kulonga na anthu analonga cilongero cawo basi thangwi kugawiwa kwa cisa m’mbuto za pilongero pizinji kusacitwa mwakubverana na cilongero. M’mipingo inaphata basa mu cisa ca pilongero pizinji, ayang’aniri a m’munda a mipingo ineyi angakwanise kucita masasanyiro akubverana towera kuphata basa cisa consene na kutsogolera anthu adapangiza kufuna ku mpingo unalonga cilongero cawo. Pyenepi ndi pyakufunika, nakuti amwazi mphangwa a mipingo ya pilongero pyakusiyana panango akuphata basa mu cisa cibodzi cene mu nzidzi ubodzi ene namacibese peno namasikati, pontho ife nkhabe funa kupereka thangwi yonsene yakucitisa anthu kukhonda kutambira “mphangwa zadidi za Kristu.”​​—⁠1 Akor. 9:​12.

Mukucita khundu mu utumiki wa mu nseu na wantsusukano, amwazi mphangwa angakwanise kukwata mabukhu a pilongero pyakusiyana-siyana. Mbwenye pa kucita basa ya nyumba na nyumba, iwo angakwanise kugawira mabukhu a cilongero ca mpingo wawo. Kumbukani kuti pisa piri m’mbuto zenezi pyagawiwa mwakubverana na cilongero ca cisa ceneci towera kuti amwazi mphangwa anagawira mabukhu akwanisembo kutsogolera anthu anapangiza kufuna ku misonkhano ya mpingo inacitwa mu cilongero cinabva iwo mwadidi peno cinafuna iwo. (1 Akor. 14:⁠9) Mu kuwangisira kucita utumiki wathu kwa anthu ale anabva peno anafuna cilongero ca mpingo unasonkhana ife, tingakwanise kuphedza anthu azinji kuwina upulumusi.

Akristu akuperekeka ali na kupitawirira towera kugawana na anango mphangwa zadidi. Pana njira zizinji za kucita pyenepi, mbwenye azinji a ife asakomerwa kuenda kacita basa ya m’munda na anango. (Luka 10:⁠1) Na thangwi ineyi, mipingo isagumanyikana towera kucita basa ya m’munda pa kumala kwa sumana na nkati mwa sumana. Pontho mafiriyadu asapasambo mwai wadidi wa kupereka umboni ninga nsoka, nakuti abale azinji nkhabe phata basa. Ndandanda wa misonkhano ya basa ya m’munda usacitwa mwakubverana na ntsiku na nzidzi wakuthema wa amwazi mphangwa. Misonkhano ineyi ingakwanise kucitwa pa Nyumba ya Umambo, pa zinyumba zinacitirwa Pfunziro ya Bukhu ya Mpingo, peno pa mbuto zinango zakuthema na zadidi.

Pa misonkhano ya basa ya m’munda, masasanyiro angakwanise kucitwa towera kuphedza anthu apswa peno anthu akukhala na luso yakucepa. Pontho, m’mbuto zinango panango pinakhala pyanzeru amwazi mphangwa awiri peno azinji kuphata basa pabodzi pingakhala pyakufunika. Ale anaphata basa pabodzi angakwanise nzidzi onsene kuphedzana na kuwangisana unango na nzace. Khala mukucita masasanyiro akuphata basa mwekhene mu cisa, kugumanyikana pabodzi na nsoka kungakwanise kuwangisa onsene anagumanika penepo. Kudziwa basi kuti anango ali m’basa ya m’munda mu cisa cibodzi cene pingakwanise kukupasani cinyindiro.

Tendeni tonsene titowezere citsanzo cidakhazikiswa na Yezu pabodzi na apostolo! Tinakwanisa kukhala na cinyindiro consene cakuti Yahova anadzapasa nkhombo kuwangisira kwathu towera kucita khundu mwakukwana m’basa yadidi ya kumwaza mphangwa zadidi za Umambo.​​—⁠Luka 9:​57-​62.