Asatiphedza Tani Masasanyiro A Pfunziro Ya Bukhu Ya Mpingo
1 Ubodzi na ubodzi wa misonkhano yathu mixanu ya mpingo ya sumana na sumana usacitwa mu njira yakusiyana na iri na ntsonga zakusiyana-siyana. Ngakhale tenepa, misonkhano yonsene ndi yakufunika kakamwe mu kutiphedza kuti “[tionerane] mbatiphedzana, towera munthu munthu apangize ndzache kunfuna kwache mbachita mabasa adidi.” (Aheberi [Ahebere] 10:24, 25, Mphangwa Zadidi) Kodi ndi api makhundu anango akupambulika na akuphindulisa a masasanyiro a Pfunziro ya Bukhu ya Mpingo?
2 Asaphedza Towera Kuthambaruka Mwauzimu: Kazinji kene cilengeso ca anthu anagumanika pa pfunziro ya bukhu ndi cakucepa kupiringana cilengeso ca anagumanika pa misonkhano inango ya mpingo. Pyenepi pisacitisa kukhala pyakukhonda nensa kucita uxamwali wakuti ndi phata ya ciphedzo cauzimu. (Mis. 18:24) Kodi imwe musawangisira towera kudziwa anthu onsene a mu nsoka wanu wa pfunziro ya bukhu, panango kuphemba m’bodzi na m’bodzi wa iwo kuti muphate naye pabodzi mu utumiki? Masasanyiro a pfunziro ya bukhu asacitisambo muyang’aniri wa pfunziro ya bukhu kudziwa makhaliro a munthu m’bodzi na m’bodzi wa mu nsoka na kumpasa ciwangiso.—Mis. 27:23.
3 Kodi imwe musaphemba anyakupfunza anu Biblya kuti agumanike pa pfunziro ya bukhu? Anthu anapangiza kufuna akuti asanyinyirika kugumanika pa misonkhano yathu mikulu panango pingakhale pyakukhonda nensa kwa iwo kugumanika pa nsonkhano ung’ono, makamaka pa nyumba ya m’bale. Nkhaliro wauxamwali usacitisa kukhala kwakukhonda nensa kwa aphale na atsikana na anthu anatoma kwene kusonkhana kutawira mabvunzo. Pontho, nakuti nsoka ndi ung’ono, ife tiri na miyai mizinji yakutawira mabvunzo mbitisimba tenepa Yahova.—Sal. 111:1.
4 Kazinji kene mapfunziro a Bukhu asacitwa pa mbuto zakuthema nkati mwa cisa. Ngakhale si pyakukwanisika tayu kuti anthu onsene akhale paduzi kakamwe na mbuto yawo ya pfunziro, kugumanika pa mbuto yathu ya pfunziro ya bukhu kungafune nzidzi wakucepa basi kupiringana nzidzi unafamba ife kuenda ku misonkhano inango ya mpingo. Mbuto ya pfunziro ya bukhu ingakwanisembo kuphatisirwa ninga mbuto yakucitira misonkhano ya basa ya m’munda.
5 Asaphedza Mu Utumiki: Muyang’aniri wa pfunziro ya bukhu ali wakufunisisa kuphedza munthu m’bodzi na m’bodzi towera agumanike mwakukhonda phonya, akhale na maphindu, na aphate basa mwakutsanzaya mu utumiki. Natenepa, iye asawangisira towera aphate basa mu utumiki na m’bodzi na m’bodzi wa mu nsoka, mbampasa ciphedzo m’makhundu akusiyana-siyana a utumiki. Khala imwe musaona kukhala kwakunensa kucita makhundu anango a utumiki, ninga kucita maulendo akubwereza, dziwisani muyang’aniri wanu wa pfunziro ya bukhu. Panango iye anakwanisa kucita masasanyiro akuti muphate basa pabodzi na m’mwazi mphangwa wa luso mu nsoka. Luso yanu ya kupfunzisa m’mapfunziro a Biblya inadzathimizirika munaona imwe mwacidikhodikho njira zadidi zakupfunzisa zinaphatisira muyang’aniri wa pfunziro ya bukhu munacitisa iye pfunziro ya bukhu.—1 Akor. 4:17.
6 Ndi masasanyiro adidi tani Pfunziro ya Bukhu ya Mpingo! Masasanyiro anewa a ufuni akubuluka kwa Yahova asatiphedza kukhala akuwanga mwauzimu m’midzidzi ino yakunensa inakhala ife.—Sal. 26:12.
[Study Questions]
1. Kodi misonkhano yathu mixanu ya mpingo ya sumana na sumana isatiphedza tani?
2. Kodi ndi api maphindu anabwera thangwi ya kusonkhana na nsoka ung’ono pa pfunziro ya bukhu?
3. Kodi masasanyiro a pfunziro ya bukhu asaphedza tani anyakupfunza Biblya kugumanika na kutawira pa pfunziro?
4. Kodi masasanyiro a pfunziro ya bukhu angakwanise kukhala akuthema mu njira zipi?
5. Kodi tinakwanisa tani kutambira ciphedzo ca muyang’aniri wathu wa pfunziro ya bukhu?
6. Thangwi yanji tisafunika kuwangisira towera tiphindule kakamwe na masasanyiro a pfunziro ya bukhu?