Cifuno Cadidi Kakamwe Towera Kucikwanirisa Mu Caka Cipswa Ca Basa
1 Ife tisafunika kukhala na pifuno khala tisafuna kuthambaruka mwauzimu. Kodi ndi pifuno pipi pidasankhula imwe towera kupikwanirisa mu caka cipswa ca basa cinafuna kudza? Cifuno cibodzi cadidi kakamwe ndi kukhala mpainiya wakuphedza mu nthanda ibodzi peno zizinji. Nakuti basa ineyi yakukomeresa kazinji kene isafunika kukhunganywa mwanyapantsi, uno ndi nzidzi wadidi towera kutoma kuinyerezera. Thangwi yanji tisafunika kuona basa ya upainiya wakuphedza ninga cifuno?
2 Nyerezerani Towera Kukhala Mpainiya: Upainiya wakuphedza usaticitisa ‘kukomeresa’ kakamwe Babathu wakudzulu mu kubvunga nzidzi uzinji mu utumiki. (1 Ates. 4:1) Munanyerezera ife pyonsene pidaticitira Yahova, mitima yathu isatikulumiza kulonga pya iye kwa anango. (Sal. 34:1, 2) Yahova asaona na asakomerwa na kuwangisira kunacita ife towera kucita pizinji mu utumiki. (Aheb. 6:10) Kudziwa kuti tikukomeresa Yahova na basa yathu yaphinga kusaticitisa kukhala akutsanzaya kakamwe.—1 Pya dziko. 29:9.
3 Kazinji kene, munacita imwe cinthu cinango mu maulendo mazinji, ico cisadzakhala cakukhonda nensa kucicita pontho cakukomeresa kakamwe. Kubvunga nzidzi uzinji mu utumiki kunadzakucitisani kukhala wa cibaso pa kumwaza mphangwa ku nyumba na nyumba. Imwe munadzakhala waluso kakamwe pakutomesa makani na pakuphatisira Biblya. Munalonga imwe pya cikhulupiro canu m’maulendo mazinji, ico cisadzakhala cakuwanga kakamwe. Azinji akuti nee akhacitisa pfunziro ya Biblya akwanisa kutomesa ibodzi mu nzidzi udaphata iwo basa ninga apainiya akuphedza.
4 Upainiya wakuphedza ungakwanisembo kukhala ciphedzo cakufunika towera tikhonde thaukira mabasa auzimu. M’bale unango wakuti akhali mpainiya wa nzidzi onsene adzadzindikira kuti akhabvunga nzidzi uzinji ku basa yace yadziko, natenepa atonga kukhala mpainiya wakuphedza mu nthanda ibodzi. Iye alonga: “Ine nkhabe kutawira kuti nthanda ibodzi basi yakwanisa tani kundiwangisa mwauzimu! Ndacita masasanyiro towera ndikhale mpainiya wakuphedza kuenda na kuenda, wakuti wandicitisa kukhala pontho mpainiya wa nzidzi onsene.”
5 Kukunda Mipingizo: Anango asanyinyirika kukhala apainiya akuphedza thangwi asanyerezera kuti nkhabe luso ya kumwaza mphangwa. Khala ineyi ndi thangwi inakucitisani kunyinyirika, Yahova angakwanise kukuphedzani ninga mudacitira iye Yeremiya. (Yer. 1:6-10) Maseze Mose akhali wa “mulomo na lirimi yakumangika” Yahova amphatisira towera kukwanirisa cifuno Cace. (Eks. 4:10-12) Khala imwe musapibva kukhala wakukhonda thema, phembani Yahova towera akupaseni cipapo.
6 Kodi imwe musanyinyirika kukhala mpainiya thangwi ya nyatwa za ungumi peno kuinjipa kwa mabasa? Khala muli na utenda, kucita pyenepi mu njira inakwanisira imwe kungakwanise kucitisa basa ya upainiya kukwanisika. Khala imwe muli na mabasa mazinji, panango mungakwanise kusiya mabasa anango akukhonda funika maka towera muacite mu nthanda inango. Anango akuti ali na basa yadziko ya nzidzi onsene akwanisa kugula nzidzi towera kukhala apainiya akuphedza mu kubulusa ntsiku ibodzi peno ziwiri za ferya.—Akol. 4:5.
7 Munakwanisa Tani Kucita Pyenepi: Phemberani pya cifuno canu cakukhala mpainiya wakuphedza. Phembani Yahova kuti apase nkhombo kuwangisira kwanu towera kuthimizira utumiki wanu. (Arom. 12:11, 12) Iye angakwanise kukuphedzani kucita pyakusankhula pyanzeru pyakuti munakwanisa tani kucinja ndandanda wanu. (Tgo. 1:5) Khala imwe nee muli na cifuno ceneci, phembani Yahova kuti akuphedzeni kugumana citsanzayo m’basa ya kumwaza mphangwa.—Luka 10:1, 17.
8 Cezani ninga banja pya cifuno ca kukhala mpainiya wakuphedza. (Mis. 15:22) Panango ciwalo cibodzi pabanja cingakwanise kutumikira ninga mpainiya wakuphedza mu kuphedzwa na anango pabanja. Cezani na anango m’mpingo thangwi ya cifuno canu cakukhala mpainiya, makamaka na ale akuti ali na makhaliro akulandana na anu. Pyenepi pingakwanise kuthimizira cifuno ca kukhala mpainiya wakuphedza.
9 Munadinga imwe ndandanda wanu wa utumiki wa caka cipswa ca basa cinafuna kudza, kodi ndi nthanda ipi inanyerezera imwe kuti munakwanisa kukhala mpainiya wakuphedza? Khala imwe musaphata basa ya nzidzi onsene peno musaenda kuxikola, imwe mungakwanise kusankhula nthanda zakuti ziri na firiyadu peno zakuti ziri na Masabudu peno Madimingu maxanu. Mwacitsanzo, nthanda ya Nyenzi, Maindza, Murope na Malimwe ziri na Masabudu na Madimingu maxanu amumphu. Nthanda ya Gonkho iri na Masabudu maxanu, ya Khoni iri na Madimingu maxanu. Khala imwe muli na nyatwa za ungumi, sankhulani nthanda zakuti kazinji kene ziri na makhaliro akudambo adidi. Mungakwanise kusankhula kukhala mpainiya wakuphedza nkati mwa nthanda inafuna kucedzesa muyang’aniri wa cisa mpingo wanu. Nkati mwa kucedzesa kwace, imwe munadzakhala na mwai wakuthimizirika wa kugumanika pa khundu yakutoma ya nsonkhano unacita iye na apainiya a nzidzi onsene. Nakuti Cikumbuso cinadzacitika pa ntsiku 22 ya Murope ya caka cinafuna kudza, nthanda ya Murope, Bwinja na Gonkho ndi zadidi towera kukhala mpainiya wakuphedza. Mungamala kusankhula nthanda inafuna peno zinafuna imwe kukhala mpainiya wakuphedza, citani mwakukhonda dembuka ndandanda wakuti unadzakuphedzani kukwanirisa midzidzi inafunika.
10 Maseze munyerezere kuti imwe nkhabe kwanisa kukhala mpainiya wakuphedza nkati mwa caka ca basa cinabwera ici, imwe mungakwanise kupitiriza kukhala na nzimu wa upainiya. Pitirizani kucita pyonsene pinakwanisa imwe mu utumiki, mbumukhala na cinyindiro cakuti Yahova asakomerwa na kuwangisira kunacita imwe na ntima onsene towera kucita pinakwanisa imwe m’basa yace. (Agal. 6:4) Phedzani na pasani cipapo ale akuti anakwanisa kukhala apainiya akuphedza. Panango mungakwanise kucinja ndandanda wanu towera kucita khundu mu utumiki mu ntsiku inango yakuthimizirika ya sumana na apainiya.
11 Mbumba ya Yahova isadziwa kucimbiza kwa nzidzi. Pana basa yakuti isafunika kucitwa—kumwaza mphangwa zadidi. Umaso wa anthu uli pangozwi, na nzidzi udasala ndi wakucepa. (1 Akor. 7:29-31) Kufuna Yahova na anyakuendekana athu kunadzaticitisa kucita pyonsene pinakwanisa ife mu utumiki. Mu kuwangisira na kunyerezera mwadidi, ife tingakwanise kukhala mpainiya wakuphedza ngakhale mu nthanda ibodzi basi nkati mwa caka cipswa ca basa cinafuna kudza—ndi cifuno cadidi kakamwe!
[Study Questions]
1. Kodi tisafunika kunyerezera cifuno cipi mu caka cipswa ca basa cinafuna kudza?
2. Thangwi yanji tisafunika kuona basa ya upainiya wakuphedza ninga cifuno?
3, 4. Kodi tisaphindula tani mukukhala mpainiya wakuphedza?
5. Kodi tinakwanisa tani kukunda mabvero akukhala anthu akukhonda thema?
6. Kodi pisakwanisika tani kukhala mpainiya wakuphedza mwakukhonda tsalakana nyatwa za ungumi peno kuinjipa kwa mabasa?
7. Thangwi yanji ndi pyakuphindulisa kuphemberera pya cifuno cakukhala mpainiya wakuphedza?
8. Kodi kuphatisira Misangani 15:22 kunakwanisa tani kukuphedzani towera kukhala mpainiya wakuphedza?
9. Kodi ndi nthanda zipi zakuti mungakwanise kuzisankhula towera kukhala mpainiya wakuphedza?
10. Kodi mungakwanise kucitanji khala nee munakwanisa kukhala mpainiya wakuphedza?
11. Thangwi yanji tisafunika kudzindikira kucimbiza kwa nzidzi?