Towezerani Citsanzo Cidapereka Yezu
1 Munacita ife nkhundu m’basa ya kucita anyakupfunza, tisafunika kukumbuka kuti citsanzo cathu cingakwanise kukhuya kakamwe ale anationa. Yezu apfunzisa m’mafala na m’pyakucita. Ale akhamuona mbadakwanisa kuona phinga yace, kufuna kwace anthu, cifuno cace ca kucenesa dzina ya Babace na kudzitonga kwace towera kukwanirisa cifuno ca Babace.—1 Ped. 2:21.
2 Mu Utumiki Wa Nyumba Na Nyumba: Ninga Yezu, citsanzo cathu cisakhuya ale anaphata basa na ife. Amwazi mphangwa apswa na aluso yakucepa akuti asaona phinga yathu mu utumiki anadzanyerezera pya kuthimizira kucita kwawo khundu m’basa ya kumwaza mphangwa. Iwo angaona citsanzayo na citsalakano cathu candimomwene kwa anango, anadzakumbuka kufunika kwa kupangiza makhaliro anewa mu utumiki wawo. Iwo angaona luso yathu yakuphatisira Malemba, yakucita maulendo akubwereza na yakucita mapfunziro a Biblya, anadzakulumizwa towera kucitambo pibodzibodzi.
3 Pakucitisa Mapfunziro A Biblya: Anyakupfunza athu a Biblya anadzaona makamaka makhaliro athu. Mwacitsanzo, maseze tingakwanise kuafokotozera kufunika kwa kukhunganya pfunziro, kudinga malemba na kulemba nthemba pa ntsonga zikulu, iwo anadzaona khala ife tiri akukhunganyika peno nkhabe. (Arom. 2:21) Khala tisafika pa ndzidzi udabverana ife towera kupfunza nawo, iwo nkhabe kudzasiya kuti mabasa anango adodomese pfunziro yawo ya Biblya. Pontho iwo anadzaonambo cifuno cathu ca kukhala wakuzimana thangwi ya utumiki na cikhulupiro cathu cakuwanga. Si pyakudzumisa tayu kuti anyakupfunza a ale anatowezera mwapaduzi citsanzo ca Yezu kazinji kene asadzakhala amwazi mphangwa aphinga na akubala misapo.
4 Pa Misonkhano Ya Mpingo: Onsene anacita khundu ya mpingo Wacikristu asafunika kucita khundu mu kupfunzisa na citsanzo pa misonkhano ya mpingo. Anthu anapangiza kufuna anatoma kwene kugumanika pa misonkhano asaphindula na citsanzo cadidi cinaona iwo m’mpingo. Iwo asaona ubale, ubodzi Wacikristu, mabvaliro na makhunganyikiro adidi. (Sal. 133:1) Citsanzo cathu ca kugumanika mwakukhonda phonya pa misonkhano ya mpingo na kubvekesa kwathu cikhulupiro cathu mwapakweca pinadzaonekambo. Mulendo unango adagumanika pa ubodzi wa misonkhano yathu aona kantsikana mbakakwanisa kugumana mwakucimbiza lemba m’Biblya yace na mbakatowezera mwacidikhodikho kulerwi kwa lemba ineyi. Citsanzo cace cacitisa mulendo unoyu kuphemba pfunziro ya Biblya.
5 Malemba asatidembetera kuti tisangizire citsanzo cadidi ca anango. (Afil. 3:17; Aheb. 13:7) Natenepa, ife tisafunika kukumbuka kuti khala tisatowezera mwapaduzi citsanzo cidapereka Yezu, anango anadzaona pyenepi na angakwanise kucitambo pyenepi mu njira yadidi. Mukudziwa pyenepi, tendeni tikoye mwadidi mafala anagumanika pa 1 Timoti 4:16: “Chita mphole na iwe wekhene na mapfundisiro ako.”
[Study Questions]
1. Kodi ndi citsanzo cipi cidapereka Yezu?
2. Kodi ndi mu njira ipi citsanzo cathu cingakwanise kukhuya ale anaphata na ife mu utumiki?
3. Kodi citsanzo cathu cinakwanisa tani kupfunzisa anyakupfunza Biblya, na anakwanisa kupfunziranji?
4. Pa misonkhano ya mpingo, kodi citsanzo cathu cisapfunzisanji?
5. Thangwi yanji nee tisafunika kupwaza kufunika kwa citsanzo cathu?