Munakwanisa Kudzwala Mbeu Za Undimomwene Wa Bhibhlya Kuna Acibale Anu?​—Mphangwa izi zabuluswa mu Anuário das Testemunhas de Jeová de 2015

República Dominicana

Kutoma Kwa Basa Yakumwaza Mphangwa

Tsamba 87 ndima 1-2

Lennart na Virginia Johnson adamalisa xikola ya Gileade afika ku Ciudad Trujillo (cincino Santo Domingo), nzinda ukulu wa dziko ya República Dominicana n’dimingu, ntsiku 1 ya Bwinja ya 1945. Ninga Mboni zakutoma mu dziko ineyi, iwo akhapita n’dziko yakuti ikhali ya nkhondo na yakunentsa. Anuário ya caka 1946 (ya cingerezi) yalonga, “Mwandimomwene ceneci ndi cisa cakuti cikhafunika amisionaryo, pontho anyakumalisa Gileade anewa akhafunika kutomera pankhomo.” Nyerezerani basi: Nee kukhali na ofesi ya filiali, nee Nyumba za Umambo, nee mipingo. Iwo nee akhadziwa munthu wa dziko ineyi, akhadziwa mwakucepa kakamwe cilongero ca Cixipanyola, pontho nee akhali na nyumba nee pyombo pya n’nyumba. Kodi iwo mbadacitanji?

Lennart alonga: “Taenda ku Oteli Victoria mbatigumana mbuto​—tikhalipa madolari 5 pa ntsiku, kuphatanizambo pyakudya. Maulo a ntsiku ineyi tatomesa pfundziro ya Bhibhlya yakutoma ya panyumba. Pyacitika tenepa: Akazi awiri a ku Dominicana akuti tikhadapfundza nawo Bhibhlya ku Brooklyn akhadatipasa madzina a acibale na a axamwali awo, m’bodzi wa iwo akhali Dr. Green. Pidaenda ife kacedza naye, tadziwana na Moses Rollins nyakuendekana wace. Pidadziwa iwo kuti tadziwa tani madzina awo na mbuto zinakhala iwo, abvesera mwacidikhodikho mphangwa za Umambo mbatawira pfundziro ya Bhibhlya. Mwakukhonda dembuka, Moses adzakhala m’mwazi mphangwa za Umambo wakutoma pacisa.”