Munakwanisa Kudzwala Mbeu Za Undimomwene Wa Bhibhlya Kuna Acibale Anu?​—Mphangwa izi zabuluswa mu Anuário das Testemunhas de Jeová de 2015

República Dominicana

“Na Ntsiku Yace Tinadzaagumana”

Tsamba 90 ndima 1-3

Pablo Gonzalez wa nzinda wa Cibao, atoma kuleri Bhibhlya mu caka 1935. Iye asonkhana pang’ono na nsoka wa Protestante, mbwenye adzasiya kusonkhana nawo mudaona iye kuti makhaliro awo nee akhabverana na pikhaleri iye m’Malemba. Na thangwi ineyi, iye apitiriza kupfundza ekhene Mafala a Mulungu mbapangambo anango pikhapfundza iye​—pakutoma apanga banjace na anyakuendekanace buluka penepo apanga akhali a n’cisa cace. Iye agulisa munda na ng’ombe zace toera kuphedzera maulendo ace akumwaza mphangwa.

Mpaka mu 1942, Pablo akhacedzera mabanja 200 a pisa pyakuendekana mbacita misonkhano mwakukhonda phonya, maseze nee akhadapita n’cibverano na Mboni za Yahova. Iye akhakulumiza anthu kupfundza Bhibhlya na kucita pinthu mwakubverana na pikhapfundza iwo. Azinji aphatisira pikhalonga iye mbasiya kufumali na kupalakanya.

M’bodzi mwa anthu adabva mphangwa za Bhibhlya zikhamwaza Pablo ndi Celeste Rosario. Iye asakumbuka: “Mukhali ine na pyaka 17 pyakubalwa, ndzukulu wa mai wanga, Negro Jimenez, akhasonkhana na ubodzi mwa misoka ikhatsogolerwa na Pablo Gonzalez. Iye acedzera banja yathu na aleri malemba anango a Bhibhlya, pyenepi pyanditundusa toera kusiya Gereja ya Katolika. Mu gereja akhatileriri n’Cilatini, cakuti nee tikhacibva. Mwakukhonda dembuka, Pablo Gonzalez aticedzera mbatiwangisa. Iye alonga: ‘Ife nkhabe kucita khundu ya mauphemberi mazinji anadziwa ife, mbwenye tiri na abale pa dziko yonsene yapantsi. Tidzati kuadziwa peno kuti asacemerwa tani, mbwenye na ntsiku yace tinadzaagumana.’”