Makhaliro Adidi Asafungula Njira Toera Kubzwala Mbeu za Undimomwene.—Mphangwa zino zabuluswa mu Anuário das Testemunhas de Jeová de 2015
Afrika
Nkulu wauphemberi akhala nyakubvesera
Tsamba 49, ndima 3 mpaka tsamba 51 ndima 3
Nkulu wa gereja yakubvekera ya Protestante ku Afrika wakubangwe alonga: “Cipo ndinadjomba pontho Cikumbuso.” Ndi ninji cidacitisa nkulu unoyu wauphemberi kugumanika pa Cikumbuso mu Bwinja ya 2014? Pyenepi pyatoma pidafika abale awiri a ntundu wakusiyana panyumba yace toera kumwaza mphangwa. Iwo akhadziwa kuti paulendo unango iye nee akhafuna kulonga na iwo. Adaine, m’bodzi wa abale anewa, asafokotoza pidacitika: “Mwakutsandzayisa, iye afungula nsuwo mbatipanga tipite. Tacedza ndzidzi wakulapha. Iye adzumatirwa na kuona nzungu mbakamwaza mphangwa kuna akafiri mbalonga naye mu cilongero cace. Nkulu wauphemberi atoma kupfundza Bhibhlya mwakukhonda phonya.”
Adaine athimiza kulonga: “Mamuna unoyu akhala misionaryo na nkulu wauphemberi pyaka pyakupiringana 40, mbwenye basi ene adzagumana matawiro a mibvundzo yace na pyaka 80. Iye asafuna kakamwe bukhu Imite a Sua Fé. Munapfundza ife, iye asakoya ntsonga zingasi mbaziphatisira pakucita nkhani mu gereja yace. Iye apangiza anthu a gereja yace bukhu Kodi Mwandimomwene Bhibhlya Isapfundzisanji? Iye aapanga, ‘Mboni za Yahova zingafika pa nyumba yanu na bukhu iyi, atambireni na bveserani pinafuna longa iwo thangwi bukhu iyi yadzala na mpfuma yauzimu.’”
Nkulu wauphemberi apanga Adaine kuti asandikwa mwakuwanga na atsogoleri a gereja yace mbacenjezwa kuti akhonde longa pya Mboni za Yahova pakucita nkhani mu gereja yace. Nee akhapidziwa pikhafuna iye kucita. Adaine akumbuka pya nkulu m’bodzi wauphemberi wa ku Mianmar, adalongwa mu Anuário das Testemunhas de Jeová de 2013. Mudaleri Adaine mbiri ineyi kuna nkulu wauphemberi, iye alonga: “Mbiri ineyi yalemberwa ine! Ndisafunika kucita cisankhulo cakufunika kakamwe, pontho nee ndinabwerera nduli.”
Nkulu unoyu wauphemberi agumanika pa Cikumbuso paulendo wakutoma ntsiku 14 ya Bwinja ya 2014, mbalonga kuti nee mbadadjombabve. Iye atonga kusiya pyonsene pyakuphatana na uphemberi wauthambi.