Republika Dominikana

Kuthimizirika Kumangwa Kwa Nyumba za Umambo

Tsamba 140 ndima 3, mpaka tsamba 141 ndima 3

Thangwi ya kuthimizirika mwakucimbiza kwa anyakupfundza apswa, pakhafunika kumangwa Nyumba za Umambo zizinji. Natenepa, mu nthanda ya Bingu ya 2000, abale ku Republika Dominikana atoma basa yakumanga Nyumba za Umambo mu kuphedzwa na programu ya ciphedzo ku madziko a mpfuma zakucepa. Na ciphedzo ceneci, mpingo usakwanisa kumanga Nyumba ya Umambo yadidi m’masumana masere basi. Mu Nyendzi ya 2011, misoka miwiri yamanga na kusasanyira papswa Nyumba za Umambo zakukwana 145.

Ndi umboni wamphambvu kakamwe unapereka Nyumba zenezi za Umambo na abale anaperekeka toera kuzimanga. Mwacitsandzo, mu nzinda ung’ono unagumanika kumadokero a dzuwa a dziko ineyi, abale agumana mbuto yadidi toera kumanga Nyumba ya Umambo ipswa. Mpainiya wakupambulika aphemba mwanaciro mbuto ineyi toera kuigula. Iye atawira: “Leka kubvunga ndzidzi wako, nee ndinakugulisira mbuto ineyi, makamaka khala usafuna kumangapo gereja.”

Mudamala iwo kucedza, mwanaciro mbuto aenda kaona m’bale wace wankulu ku Puerto Plata wakuti ndi m’bodzi wa Mboni za Yahova. Mudafika iye, adzindikira kuti m’bale wace akhabva kupha mbakwatwa na banja ya Mboni za Yahova toera kuntsalakana. Banja ineyi ikhaenda naye kwa dotoro, kumisonkhano na m’basa yakumwaza mphangwa. Mamuna unoyu abvundza m’bale wace kuti alipa kobiri zingasi thangwi ya citsalakano cidatambira iye pa banja ya Mboni za Yahova. Iye atawira: “Nee ndalipa cinthu. Iwo ndi abale anga.”

Mwanaciro mbuto akhuyiwa kakamwe na citsalakano ca Mboni za Yahova mbacemeresa mpainiya wakupambulika adacedza na iye pakutoma mbampanga kuti acinja manyerezero na anagulisa mbuto. Abale agula mbuto mbatoma kumanga Nyumba ya Umambo. Pakutoma, nkazi wa mwanaciro mbuto akhali na maonero akuphonyeka kakamwe thangwi ya Mboni za Yahova. Mbwenye, mudaona iye kubverana kwa abale pakumanga Nyumba ya Umambo, alonga: “Iyi ndi gulu ya anthu akubverana kakamwe yakuti cipo ndaiona.”