Mareferensya a Umaso Wathu Wacikristu na Utumiki — BHIBHLIYOTEKA MU INTERNETI ya Torre de Vigia

Mareferensya a Umaso Wathu Wacikristu na Utumiki

SUMANA 3-9 YA MARÇO

MPFUMA ZA MAFALA A MULUNGU MISANGANI 3

Pangizani Kuti Musanyindira Yahova

Textos Bíblicos Explicados nsolo 14 ndima 4-5

Misangani 3:5, 6—“Leka Kunyindira Ndzeru Zako”

“Nyindira Yahova na ntima wako onsene.” Ife tisapangiza kuti tisanyindira Mulungu tingacita pinthu munjira inafuna iye. Tisafunika kunyindira Mulungu na ntima wathu onsene. M’Bhibhlya, fala yakuti ntima kazinji kene isabveka makhaliro athu ankati, akuti asaphataniza mabvero na manyerezero. Natenepa, kunyindira Mulungu na ntima onsene kusaphataniza pizinji kupiringana basi ene mabvero athu. Ife tisasankhula kucita pyenepi thangwi tisadziwa kuti Nciti wathu asadziwa pinthu pyadidi kuna ife.—Aroma 12:1.

“Leka kunyindira ndzeru zako.” Tisafunika kunyindira Mulungu, thangwi njira yathu yakunyerezera ndi yakusowa ungwiro. Tinganyindira basi ene ndzeru zathu mbaticita pinthu mwakubverana na mabvero athu, tinacita pisankhulo pyakuti pakutoma pinaoneka ninga ndi pyadidi, mbwenye mukupita kwa ndzidzi pinatibweresera nyatwa. (Misangani 14:12; Yeremiya 17:9) Udziwisi wa Mulungu ndi ukulu kakamwe kupiringana wathu. (Izaiya 55:8, 9) Tingatawira kutsogolerwa na Mulungu, pinthu pinatifambira mwadidi mu umaso wathu.—Masalmo 1:1-3; Misangani 2:6-9; 16:20.

Textos Bíblicos Explicados nsolo 14 ndima 6-7

Misangani 3:5, 6—“Leka Kunyindira Ndzeru Zako”

“Usafunika kunkumbukira munjira zako zonsene.” Tisafunika kunyerezera maonero a Mulungu mu pinthu pyonsene na pisankhulo pyakufunika pinacita ife mu umaso wathu. Ife tinacita pyenepi tingacita phembero toera Yahova atitsogolere na kubvera pinalonga iye m’Mafalace, Bhibhlya.—Masalmo 25:4; 2 Timoti 3:16, 17.

“Iye anadzalungamisa njira zako.” Mulungu asalungamisa njira zathu mukutiphedza toera kukhala m’maso mwakubverana na mitemo yace. (Misangani 11:5) Tingacita pyenepi, tinacalira nyatwa mbatikhala na umaso wakutsandzaya kakamwe.—Masalmo 19:7, 8; Izaiya 48:17, 18.

Beneficie-se tsa. 76 ndima 4

Pitirizani Kuthambaruka

Tingacitikirwa na pinthu pizinji mu umaso, panango tinanyerezera: ‘Pinthu pyenepi pyandicitikira kale. Ndisadziwa pinafunika ine kucita.’ Ndi pyandzeru kunyerezera tenepo? Lemba ya Misangani 3:7 isaticenjeza: “Leka kuoneka wekhene ninga munthu waudziwisi.” Mwandimomwene, pinthu pidaticitikira pinatiphedza toera kudziwa pinafunika ife kucita tingathimbana na nyatwa. Mbwenye khala tiri kuthambaruka mwauzimu, pinthu pidaticitikira pisafunika kuticitisa kukumbuka kuti tisafunika kuphedzwa na Yahova toera pinthu pitifambire mwadidi. Natenepa toera kupangiza kuti tiri kuthambaruka, ife nee tisafunika kucita pinthu mwakudzinyindira, mbwenye tisafunika kusaka citsogolero ca Yahova. Ife tinapangizambo kuthambaruka kweneku tinganyindira kuti nkhabe cinthu cinafuna kucitika Yahova angakhonda tawirisa, pontho tingawangisa uxamwali wathu na Babathu wakudzulu.

Mpfuma Zauzimu

Ncenjezi 11.21 tsa. 8 ndima 1-2

Pitirizani Kupangiza Ufuni Wakukhonda Mala Kuna Unango na Ndzace

IFE tiri na mathangwi adidi toera kupangiza ufuni wakukhonda mala kuna unango na ndzace. Ndi api anango mwa mathangwi anewa? Mavesi mangasi a m’bukhu ya Misangani anatiphedza kutawira mbvundzo unoyu. Iwo asalonga: ‘Leka kusiya kupangiza ufuni wakukhonda mala na kukhulupirika. Natenepa unakhala wakutawirika na waudziwisi pamaso pa Mulungu na pa anthu.’ ‘Munthu anapangiza ufuni wakukhonda mala asaphedzeka ekhene.’ ‘Ule anawangisira kucita pinthu pyadidi na kupangiza ufuni anagumana umaso.’—Mis. 3:3, 4; 11:17; 21:21.

² Mavesi anewa asalonga mathangwi matatu anaticitisa kupangiza ufuni wakukhonda mala. Yakutoma, tingapangiza ufuni wakukhonda mala tisakhala anthu akufunika kakamwe kuna Mulungu. Yaciwiri, tingapangiza ufuni wakukhonda mala, tisakhala na maphindu mazinji cincino. Mwacitsandzo, ife tisabverana kakamwe na andzathu. Yacitatu, tingapangiza ufuni wakukhonda mala tinadzatambira nkhombo zizinji ntsogolo, kuphatanizambo umaso wakukhonda mala. Natenepa, ife tiri na mathangwi adidi toera kubvera mafala awa a Yahova: ‘Tsalakananani unango na ndzace mwaufuni na mwantsisi.’—Zak. 7:9.

SUMANA 10-16 YA MARÇO

MPFUMA ZA MAFALA A MULUNGU MISANGANI 4

“Tsidzikiza Ntima Wako”

Ncenjezi 01.19 tsa. 15 ndima 4

Munatsidzikiza Tani Ntimanu?

⁴ Pa Misangani 4:23, fala yakuti “ntima” yaphatisirwa toera kulonga pya ‘uunthu wankati’ peno ‘makhaliro athu a nkati.’ (Lerini Masalmo 51:6, Tradução do Novo Mundo da Bíblia Sagrada na cidzindikiro capantsi.) Munjira inango, fala yakuti “ntima” isalonga pya manyerezero athu, mabvero na pifuno pyathu. Fala ineyi isapangiza makhaliro athu ankati, tayu akunja anaona anthu.

Ncenjezi 01.19 tsa. 17 ndima 10-11

Munatsidzikiza Tani Ntimanu?

¹⁰ Tingafuna kutsidzikiza ntimathu, pakutoma tisafunika kudzindikira ngozwi na kucita pinthu mwakucimbiza. Fala idathumburuzwa pa Misangani 4:23 kuti ‘kubvunulira’ peno kutsidzikiza, isatikumbusa pya basa inacitwa na nyakuonera. Mwacitsandzo, mu ntsiku za Mambo Salomoni, anyakuonera nzinda akhakwira m’mipanda toera aone mwadidi, natenepa angaona kuti anyamalwa akubwera iwo akhadziwisa anango. Pikhacita anyakuonera anewa pisapangiza pinafunika ife kucita toera Sathani akhonde kuticitisa kunyerezera ninga iye.

¹¹ Kusiyapo anyakuonera akhakwira m’mipanda, anyakuonera anango akhaonera misuwo ya nzinda. (2 Sam. 18:24-26) Anyakuonera angaona kuti anyamalwa akubwera, iwo akhafunika kukhala na cinyindiro cakuti misuwo yafungwa mwadidi peno nkhabe. (Neh. 7:1-3) Ife tinakwanisa kulandanisa cikumbuntima cathu cakupfundziswa na Bhibhlya ninga nyakuonera. Cikumbuntima cisaticenjeza Sathani angafuna kupita muntima mwathu, munjira inango, angafuna kucitisa kuti manyerezero athu, mabvero na pifuno pyathu pikhale ninga iye. Natenepa, cikumbuntima cathu cingatipanga kuti si pyadidi tayu kucita ici, mwakucimbiza tisafunika kufunga misuwo ya mitima yathu.

Ncenjezi 01.19 tsa. 18 ndima 14

Munatsidzikiza Tani Ntimanu?

¹⁴ Toera kutsidzikiza mitima yathu, ife nee tisafunika basi ene kukhonda manyengerero akuipa, mbwenye tisafunikambo kudzadza manyerezero athu na pinthu pyadidi. Nyerezerani pontho citsandzo ca anyakuonera nzinda. Anyakuonera misuwo ya nzinda angaona kuti anyamalwa akubwera, iwo akhafunga mwadidi misuwo, mbwenye angaona kuti ndi anthu anabweresa cakudya peno pinthu pinango, iwo akhafungula misuwo toera apite na pinabweresa iwo kuti anthu mu nzinda akhonde kufa na njala. Munjira ibodzi ene, ife tisafunika kufungula mitima yathu toera itsogolerwe na manyerezero a Mulungu.

Sentinela 1/5/12 tsa. 32 ndima 2

“Tsidzikiza Ntima Wako”

Thangwi yanji tisafunika kutsidzikiza ntimathu? Mulungu atsogolera Mambo Salomoni toera kulemba: “Kupiringana pinthu pyonsene pinatsidzikiza iwe, tsidzikiza ntima wako, thangwi umaso wako usanyindira ntima wako.” (Misangani 4:23) Toera kukhala na umaso wadidi cincino na ntsogolo, pisanyindira makhaliro athu a muntima. Thangwi yanji? Thangwi Mulungu asaona piri muntima mwathu. (1 Samweli 16:7) Mulungu asationa mwakubverana na “uunthu wakubisika wa muntima.”—1 Pedhru 3:4.

Mpfuma Zauzimu

Ncenjezi 08.21 tsa. 8 ndima 4

Kodi Imwe Munapitiriza Kudikhira Yahova?

⁴ Lemba ya Misangani 4:18 isalonga kuti: ‘Njira ya anyakulungama ndi ninga kuyetimira kwa ceza ca dzuwa namacibese cakuti cisapitiriza kuthimizirika mpaka namasikati.’ Vesi ineyi isapangiza pakweca kuti Yahova asaphedza atumiki ace toera kubvesesa cifuniro cace. Vesi ineyi inakwanisambo kutiphedza toera kubvesesa kuti Nkristu anacita tani macinjo mu umaso wace toera akhale na uxamwali wakuwanga na Yahova. Mbwenye pisakwata ndzidzi toera munthu akhale na uxamwali wakuwanga na Yahova. Tingapfundza mwacidikhodikho Mafala a Mulungu na kuphatisira pinapfundza ife na uphungu unatambira ife mu gulu yace, mwapang’ono-pang’ono tinakwanisa kukulisa makhaliro a Kristu. Pontho pyenepi pinatiphedza toera kudziwa mwadidi Mulungu. Tendeni tione nsangani udaphatisira Yezu toera kupangiza pyenepi.

SUMANA 17-23 YA MARÇO

MPFUMA ZA MAFALA A MULUNGU MISANGANI 5

Calirani Ulukwali

Sentinela 15/7/00 tsa. 29 ndima 1

Imwe Munakwanisa Kukhala na Makhaliro Adidi mu Dziko Ino Yakuti Anthu Azinji Asacita Ulukwali

Pa lemba ineyi, nkazi wakuipa asalongwa ninga “nkazi waulukwali.” Mafala anaphatisira iye toera kupeusa anthu ndi akutapira kakamwe ninga khana ya uci wakufewa kakamwe kupiringana mafuta. Anthu azinji anacita ulukwali asatoma na mafala ninga anewa. Mwacitsandzo, onani pidacitikira Amy, nkazi wa pyaka 27 anaphata basa ninga mulembi. Iye alonga: “Pana mamuna m’bodzi anaphata na ine basa wakuti asanditsalakana mwadidi, pontho asandisimba ndzidzi onsene. Ndi pyadidi kutsalakanwa munjira ineyi. Mbwenye ndisaona kuti cifuno cace ndi cakupita m’mabonde na ine.” Mafala akusimba a munthu wakupeusa, kazinji kene asatikomeresa tingakhonda dzindikira cifuniro ca munthu unoyu. Na thangwi ineyi, tisafunika kuphatisira luso yakunyerezera.

Ncenjezi 06.23 tsa. 22-23 ndima 9-10

Ndi Nkhombo Zipi Zinafuna Kukhala na Ife Tingagopa Mulungu?

⁹ Yezu akhadziwa kuti Ayuda azinji akhaona kuti ndi akufunika kakamwe kupiringana anango, natenepa anyakupfundzace akhafunika kuwangisira kakamwe toera kukunda makhaliro anewa. Yezu aapanga: “Ule ananyerezera kuti ndi nkulu kakamwe, asafunika kukhala ninga mwanang’ono, ulembo anatsogolera, asafunika kukhala ninga ntumiki wanu.” (Luka 22:26) Ife tinakwanisa kukhala ninga “mwanang’ono” tingaona anango ninga ‘akulu kakamwe kupiringana ife.’ (Afil. 2:3) Tingawangisira kucita pyenepi, tinacalira kugwegwedusa anango.

¹⁰ Ife tisafunika kudziwa kuti abale na alongo athu ndi akulu kupiringana ife mu pinthu pinango. Ife tinakwanisa kubvesesa pyenepi tingayang’ana makhaliro awo adidi. Natenepa ife tisafunika kubvera uphungu udapereka mpostolo Paulu kuna Akorinto: “Mbani adakucitisa kukhala wakusiyana na anango? Mwandimomwene, ninji ciri na iwe cakuti nee wacita kucipaswa? Mphapo khala wacita kucipaswa, thangwi yanji usagaya ninga nee wacita kucipaswa?” (1 Akor. 4:7) Na thangwi ineyi ife tisafunika kucalira kuona kuti ndife akufunika kakamwe kupiringana anango. Mwacitsandzo, abale akuti asacita mwadidi kakamwe nkhani zawo peno alongo akuti asatomesa mapfundziro a Bhibhlya mazinji asafunika kupasa mbiri Yahova thangwi ya pinthu pyenepi pinacita iwo.

Ncenjezi 15/6/15 tsa. 15-16 ndima 8-10

Tinakwanisa Kupitiriza Kukhala Akucena

⁸ Pa Misangani 5:8 Bhibhlya isalonga: ‘Khala kutali na nkazi wakunja peno waulukwali, mbukhonda kufendedzera nsuwo wa panyumba yace.’ Ngozwi yakukhonda kubvera uphungu unoyu isapangizwa pa Misangani kapitulu 7. Penepa tisaleri kuti mphale unango wakuti asapita cifupi na nyumba ya nkazi waulukwali. Dzuwa ikubira. Pa gurai ya nseu iye afendedzerwa na nkazi adabvala munjira yaulukwali. Nkazi aphata mphale mbapswompswona. Mafalace akutundusa acitisa mphale kukhala na cifuno cakuti acimwana kucikunda. Mphale acita ulukwali na iye. Pisaoneka kuti mphale nee akhasaka kucita pyaulukwali. Basi ene iye nee akhali na cidziwiso cakukwana, pontho nee akwanisa kudzitonga. Ngakhale tenepo, iye akhafunika kupirira nyatwa zakutsukwalisa za macitiro ace. Mbapidakhala pyadidi kakamwe kwa iye kucalira nkazi unoyu!—Mis. 7:6-27.

⁹ Ninga mphale unoyu, midzidzi inango tinapangiza makhaliro mabodzi ene akusowa cidziwiso cakukwana, panango kucita cinthu cakuti cinalamusa pifuno pyakuipa. Mwacitsandzo, camasiku maprogramu anango a Televizau asapangiza pinthu pyaulukwali. Mphapo, ndiye tani khala tisacinja-cinja maprogramu a Televizau? Panango, mwakukhonda funa tinafufudza mphangwa zinapangizwa mu Interneti peno kucedza na anthu mu Interneti na kupita m’mbuto zinango zinapereka micemerero toera kuona pinthu pya ucipezipezi peno pinthu pinango pyaulukwali. M’makhaliro anewa, pinthu pinaona ife pinakwanisa kulamusa pifuno pyaulukwali mbaticimwana kupitiriza na makhaliro akucena.

¹⁰ Njira inango inatambira ife ciphedzo ca Bhibhlya ndi uphungu wakuti amuna na akazi anatsalakanana tani. (Lerini 1 Timoti 5:2.) Uphungu unoyu usakhondesa pakweca kupangiza citsalakano cakukhonda thema kuna munthu wakuti nee si ndzathu wa m’banja. Anango asaona kuti kupfinyira munthu diso na njira zinango zakupangiza ufuni si zakuipa tayu thangwi nkhabe kuphataniza kugwentsana manungo. Mbwenye kupangiza pyenepi peno kupitawira, pinakwanisa kulamusa manyerezero akuti anatitsogolera ku macitiro aulukwali. Pyenepi pyacitika kale nduli, mbwenye pinakwanisa kucitika pontho.

Mpfuma Zauzimu

Tsandzayani na Umaso Kwenda na Kwenda! nsolo 41 khundu 1

Bhibhlya Isalonganji Thangwi Yakupita m’Mabonde?

Kupita m’mabonde ndi muoni wadidi udapereka Yahova kuna anthu. Muoni unoyu usafunika kuphatisirwa basi ene na mamuna na nkazi adamanga banja. Muoni unoyu usaphedza mamuna na nkazi adamanga banja toera abale ana, pontho usaaphedzambo toera kupangiza citsalakano na ufuni kuna unango na ndzace munjira yadidi na yakutsandzayisa. Ndi thangwi yace Bhibhlya isalonga: “Komerwa na nkazi wa uphale wako.” (Misangani 5:18, 19) Yahova asafuna kuti mamuna na nkazi adamanga banja, akhale akukhulupirika kuna unango na ndzace. Natenepa, Nkristu nkhabe funika kucita upombo.—Lerini Ahebheri 13:4.

SUMANA 24-30 YA MARÇO

MPFUMA ZA MAFALA A MULUNGU MISANGANI 6

Tisapfundzanji na Nyerere?

Perspicaz vol.1 tsa. 999 ndima 1-2

Nyerere

Zacitwa na Udziwisi. Udziwisi wa nyerere nee ndi thangwi izo ziri na ndzeru, mbwenye ndi thangwi zacitwa munjira ineyi na Yahova. Bhibhlya isalonga kuti nyerere “zisakhunganya cakudya m’malimwe, pontho zisagumanya cakudya mu ndzidzi unabvuna anthu.” (Mis. 6:8) Ubodzi mwa ntundu wa nyerere wakudziwika kakamwe usacemerwa formiga colhedeira peno ceifeira (Messor semirufus). Ntundu unoyu wa nyerere usakoya cakudya m’malimwe mbaciphatisira mu ndzidzi wakuti ndi pyakunentsa kugumana cakudya. Nyerere zenezi zisagumanika dhuzi na mbuwa peno panabubudirwa cakudya. Madzi angabvumba, cakudya cawo mbacitota, nyerere zenezi zisabulusa cakudya cawo mbaciikha pa dzuwa toera ciume. Izo zisabulusambo mphuno za cakudya cawo peno mbeu toera zikhonde kumera. Nkumbi wa nyerere zinacemerwa colhedeiras usagumanika n’njira na m’makoko a mbeu anagumanika kunja kwa mpalo wawo.

Pinthu pyakuti tinakwanisa kupitowezera. Kunyerezera pinthu pinacita nyerere kusatiwangisa toera kubvera uphungu uyu: “Iwe nyakupolola, ndoko kaone nyerere mbupfundza; ona pinacita izo mbukhala waudziwisi.” (Mis. 6:6) Nyerere nee zisadziwika basi ene thangwi yakukoya kwazo cakudya toera kuciphatisira ntsogolo, mbwenye zisadziwikambo thangwi yakupirira kwazo na phinga iri na izo. Kazinji kene zisathukula pinthu pyakulemera kakamwe kupiringana manungo azo, pontho zisacita pyonsene toera kukwanirisa basa inacita izo mbazikhonda bwerera nduli maseze zigwe, ziphuruzike peno zibulumunde. Kusiyapo pyenepi, izo zisaphata basa pabodzi, zisacenesa mbuto inakhala izo mbazitsalakanana, pontho zisaphedza nyerere zinango zidaphekeka peno zidaneta toera kubwerera mu mpalo.

Sentinela 15/09/00 tsa. 26 ndima 3-4

Tsidzikizani Dzina Yanu

Nee tisafunikambo kuphata basa mwaphinga ninga nyerere? Kuphata basa mwaphinga na kuwangisira toera kucita mwadidi basa yathu mphyadidi kuna ife, mwakukhonda tsalakana khala tiri kuonerwa peno nkhabe. Natenepa, kuxikola, pabasa, pontho pakucita mabasa auzimu, tisafunika kucita pyonsene pinakwanisa ife. Ninga nyerere zisaphedzeka thangwi yakuphata basa mwakuwanga, Mulungu asafuna kuti ‘titsandzaye thangwi ya basa yathu yakuwanga.’ (Ekleziaste 3:13, 22; 5:18) Tingaphata basa mwakuwanga, ife tisakhala na cikumbuntima cakucena, pontho tisatsandzaya.—Ekleziaste 5:12.

Salomoni aphatisira mibvundzo miwiri toera kucenjeza anthu akupolola. Iye abvundza: “Iwe nyakupolola, unapitiriza kugona penepo mpaka lini? Unalamuka lini ncitulo?” Mukutowezera fala ya nyakupolola, iye athimiza: “Kugona pang’ono, kuodzira pang’ono, kufunya mikono pang’ono toera kupuma, kutcerenga kwako kunafika ninga mbava, pontho kusowa kwako kunafika ninga munthu wakuti ali na cida.” (Misangani 6:9-11) Mu ndzidzi unagona nyakupolola, utcerengi usafika mwakucimbiza ninga mbava, pontho kusowa kusafika ninga munthu wakuti ali na cida. Munda wa munthu wakupolola usadzala na tsanga. (Misangani 24:30, 31) Malonda ace asagwa mwakukhonda nentsa. Patrau wa munthu wakupolola anam’bulusa basa. Pontho khala iye ndi nyakupfundza nee anaenda patsogolo.

Mpfuma Zauzimu

Sentinela 15/9/00 tsa. 27 ndima 3

Tsidzikizani Dzina Yanu

Madawo manomwe analongwa m’bukhu ya Misangani kapitulu 6 ndi madawo makulu, pontho asaphataniza ntundu onsene wa uipi. “Maso akudzikuza na “ntima unanyerezera kucitira anango pyakuipa” ndi madawo anacitwa m’manyerezero. “Lirimi yakulonga uthambi” na “mboni wauthambi wakuti asalonga uthambi ndzidzi onsene” ndi mafala akuipa. “Manja anapha anthu akusowa mulando” na “miyendo inathamanga toera kucita pyakuipa” ndi mabasa akuipa. Pontho Yahova asaida kakamwe ale anasosesa nthonga pakati pa anthu akuti ali muntendere. Kuthimizirika kwa numero ya madawo anewa mbakhala manomwe m’mbuto mwa matanthatu nee kusapangiza kuti madawo anewa ndi onsene anacita anthu, thangwi anthu asapitiriza kuthimizira pinthu pyakuipa pinacita iwo.

SUMANA 31 YA MARÇO–6 YA ABRIL

MPFUMA ZA MAFALA A MULUNGU

Calirani Mayesero

Sentinela 15/11/11 tsa. 9 ndima 16

“Koya Matongero Anga Toera Ukhale na Umaso”

Janela idaphatisira Salomoni toera kuona kunja ikhali na matabwa, pontho panango akhadasemwa mwadidi. Pikhadoka dzuwa, njira nee zikhaoneka thangwi ya cidima. Pikhayang’ana iye na pajanela, iye akhaona makamaka m’phale wakuti akhali pangozwi. Nakuti nee akhanyerezera mwadidi, m’phale unoyu acita pinthu mwakusowa ndzeru. Panango akhadziwa pinthu pinacitwa pa mbuto ikhaenda iye na pinthu pikhafuna kuncitikira penepo. Iye apita na nseu dhuzi na “mphambano yakuenda kuna nkazi.” Nkazi unoyu akhali ani, pontho akhafunanji?

Ncenjezi 15/6/15 tsa. 15 ndima 8

Tinakwanisa Kupitiriza Kukhala Akucena

Ncenjezi 06.23 tsa. 23 ndima 10

Ndi Nkhombo Zipi Zinafuna Kukhala na Ife Tingagopa Mulungu?

¹⁰ Kucita ulukwali kusacitisa anthu kukhala na manyadzo, kupibva kuti ndi akusowa basa, kukhala na mimba mwakukhonda funa, pontho kusafudza mabanja. Mwakukhonda penula, ndi pyandzeru kukhonda kuenda kunyumba kwa nkazi wakusowa ndzeru na kudya pabodzi na iye. Kusiyapo kuluza uxamwali na Yahova, anthu azinji anacita ulukwali asaphatwa na mautenda akuti mukupita kwa ndzidzi asafa nawo. (Mis. 7:23, 26) Vesi 18 ya kapitulu 9 isalonga kuti “alendo ace ali pantsi pa Nthumbi.” Mphapo thangwi yanji anthu azinji asatawira ncemerero unoyu wakuti usaabweresera nyatwa?—Mis. 9:13-18.

Mpfuma Zauzimu

Sentinela 15/11/00 tsa. 29 ndima 1

“Koya Matongero Anga Toera Ukhale Na Umaso”

Mangira matongero anga m’pyala pyako; alembe muntima mwako.’ (Misangani 7:3) Ife tisaona pyala pyathu ndzidzi onsene, pontho tisapiphatisira toera kucita pinthu. Munjira ibodzi ene, pinthu pinapfundza ife m’Bhibhlya peno cidziwiso ca m’Bhibhlya pisafunika kutikumbusa na kutitsogolera ndzidzi onsene. Tisafunika kuikha muntima mwathu pinthu pinapfundza ife m’Bhibhlya na kutawirisa kuti picite khundu ya umaso wathu.

SUMANA 7-13 YA ABRIL

Bveserani Udziwisi wa Yezu

Bwera Dzanditowera tsa. 131 ndima 7

“Ine Ndisafuna Baba”

⁷ M’vesi 22, udziwisi usalonga: “Mbuya atoma kundichita ine pano kalene maningi, mbadzati kulenga pinthu pinango.” Mphyakukwanisika kuti cinthu cinango kusiyapo udziwisi caphatanizwamo, thangwi cipo udziwisi ‘wachitwa.’ Cipo iwo wakhala na matomero, thangwi m’nzidzi onsene Yahova akhalapo na nzidzi onsene iye ndi wanzeru. (Masalmo 90:2) Mbwenye Mwana wa Mulungu akhali “[wakubalwa] wakutoma, mbachidzati kuchitwa chinthu chibodzi.” Iye abalwa, peno acitwa; iye ndi wakale kakamwe wa pyakucitwa pyonsene pya Yahova. (Akolose 1:15) Ninga pidafokotozwa pa Misangani, Mwana abalwa dziko yapantsi na kudzulu mbipisati kucitwa. Ninga Fala, Nyakulonga ene wa Mulungu, iye akhali cipangizo caungwiro ca udziwisi wa Yahova.—Jwau 1:1.

Bwera Dzanditowera tsa. 131-132 ndima 8-9

“Ine Ndisafuna Baba”

⁸ Kodi Mwana akhacitanji m’nzidzi unoyu onsene mbasati kubwera pa dziko yapantsi? Vesi 30 isatipanga kuti iye akhali pa khundu ya Mulungu ninga ‘mphedzi [‘mesire wa basa,’ NM].’ Kodi pyenepi pisabvekanji? Akolose 1:16 asafokotoza: “Mwa iye pyachitwa pya kudzulu na pya pantsi . . . Pyonsene pyachitwa [mwa] iye, mbapichitirwa thangwi ya iye.” Natenepa Yahova, Nciti, aphatisira Mwanace, Mesire wa Basa, towera kucita pyakucitwa pinango pyonsene—kutomera pyakucitwa pyauzimu m’mbuto yakudzulu mpaka thambo yonsene yakudzulu, kutomera dziko yapantsi na pyakudzumisa pyayo pyakusiyana-siyana pya miti na pinyama mpaka pyakucitwa pya ntundu wapadzulu pya pa dziko yapantsi: anthu. Natenepa, tingakwanise kulandanisa kubverana kwa Baba na Mwana na kwa nyakulemba matandiro a nyumba na nyakumanga, peno anyabasa, anadziwa kumanga mwadidi ninga mudatandirwa iyo. Munadzumatirwa ife na ntundu onsene wa pyakucitwa, mwandimomwene tikusimba Nyakutanda Wankulu. (Masalmo 19:1) Mbwenye, tisafunikambo kukumbuka kubverana kwakale na kwakutsanzayisa pakati pa Nciti na ‘mesiri wace wa basa.’

⁹ Panaphata basa anthu awiri akusowa ungwiro pabodzi mwakubverana, m’nzidzi unango pasaoneka pinenso. Mbwenye pikhali tenepo tayu pakati pa Yahova na Mwanace! Mwana aphata basa m’nzidzi uzinji pabodzi na Baba na “[akhasekera] ntsiku zonsene na kukhala pa maso pache.” (Misangani 8:30) Inde, iye akhakomerwa kukhala na Babace, na Baba akhakomerwambo kukhala na mwanace. Mwandimomwene, Mwana adzakhala wakulandana kakamwe na Babace, mbapfunza kusangizira makhaliro a Mulungu. Natenepa, si pyakudzumisa tayu kuti uxamwali wa Baba na Mwana wadzakhala wakuwanga kakamwe! Mwakuthema iwo ungakwanise kucemerwa uxamwali wakuwanga kakamwe udatoma m’nzidzi wakale wa kudzulu na pantsi.

Sentinela 15/4/09 tsa. 31 ndima 14

Perekani Takhuta Kuna Yezu Wakuti Ndi Wankulu Kupiringana Dhavidhi na Salomoni

¹⁴ Basi ene ndi munthu m’bodzi adakhala na udziwisi kakamwe kupiringana Salomoni pa dziko yapantsi. Munthu unoyu ndi Yezu Kristu wakuti alongeka ekhene ninga “wankulu kakamwe kupiringana Salomoni.” (Mat. 12:42) Yezu alonga “mafala anapasa umaso wakukhonda mala.” (Juw. 6:68) Mwacitsandzo, pa Nkhani ya Paphiri, iye athimizira mitemo inango mwa ire inagumanika m’misangani ya Salomoni mbalonga pinthu pizinji pinacitisa anthu analambira Yahova kukhala akutsandzaya. (Mis. 3:13; 8:32, 33; 14:21; 16:20) Yezu alonga kuti toera tikhale na kutsandzaya kwandimomwene tisafunika kulambira Yahova na kuona kukwanirisika kwa mapikiro ace. Iye alonga: “Anyakutsandzaya ndi ale anadzindikira kuti asafunika kudziwa Mulungu, thangwi Umambo wakudzulu ndi wawo.” (Mat. 5:3) Ale anabvera pinapfundzisa Yezu asakhala na uxamwali wakuwanga na Yahova, ule anapasa umaso.” (Mas. 36:9; Mis. 22:11; Mat. 5:8) Yezu asacemerwa “udziwisi wa Mulungu.” (1 Akor. 1:24, 30) Ninga Mambo Waumesiya, iye ndi wandzeru.—Iza. 11:2.

Mpfuma Zauzimu

Despertai! 5/14 tsa. 16

Kodi Imwe Musakwanisa Kubva ‘Udziwisi Wakuti Uli Kukhuwa’?

▪ Mwakubverana na bukhu yakuti The World Book Encyclopedia, Bhibhlya ndi “bukhu inalerwi kakamwe kupiringana mabukhu anango onsene kutomera kale,” pontho “yathumburuzwa kakamwe kupiringana mabukhu anango.” Cincino Bhibhlya isagumanika yonsene peno makhundu mu pilongero pyakupiringana cifupi na 2.600, pontho anthu akupiringana mapurusentu 90 anagumanika pa dziko anakwanisa kuleri Bhibhlya.

▪ Udziwisi “usapitiriza kukhuwa kakamwe” munjira inango. Lemba ya Mateu 24:14 isalonga: “Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala [kwa dziko ino] kunadzafika.”

SUMANA 14-20 YA ABRIL

MPFUMA ZA MAFALA A MULUNGU MISANGANI 9

Khalani Munthu Waudziwisi, Tayu Nyakusingirira

Ncenjezi 02.22 tsa. 9 ndima 4

‘Bveserani Mafala a Anthu Audziwisi’

⁴ Mwandimomwene, panango pinakhala pyakunentsa kubvera na kuphatisira uphungu unapaswa ife. Pontho pyenepi panango pinatitsukwalisa. Thangwi yanji? Thangwi ngakhale tisadziwa kuti ndife akusowa ungwiro, panango pinakhala pyakunentsa kutawira uphungu munthu angatipanga kuti tacita madodo. (Lerini Koelete 7:9.) Panango tinasaka mathangwi toera tikhonde kutawira uphungu. Peno tinasaka kudziwa mathangwi adancitisa kutipasa uphungu peno kutsukwala thangwi ya njira idatipasa iye. Panango tinayesera kusaka madodo a munthu adatipasa uphungu mbatilonga: ‘Iye nee akhafunika kundipasa uphungu. Iye asacitambo madodo.’ Pontho khala nee takomerwa na uphungu udapaswa ife panango tinaukhonda peno tinasaka munthu unango thangwi tisadikhira kuti anatipasa uphungu unafuna ife kubvesera.

Ncenjezi 02.22 tsa. 12 ndima 12-14

‘Bveserani Mafala a Anthu Audziwisi’

¹² Ninji cinafuna kutiphedza toera kutawira uphungu? Tisafunika kukhala akucepeseka mbatikumbuka kuti thangwi yakusowa ungwiro midzidzi inango tinadodoma. Ninga pidaona ife pakutoma, Yobe akhali na maonero akuphonyeka, mbwenye mukupita kwa ndzidzi iye acinja manyerezero ace. Pontho Yahova ampasa nkhombo thangwi ya pyenepi. Thangwi yanji? Thangwi Yobe akhali wakucepeseka. Iye apangiza kuti akhali wakucepeseka pidatawira iye uphungu wa Eliyu, ngakhale kuti iye akhali nkulu kakamwe kupiringana Eliyu. (Yobe 32:6, 7) Kucepeseka kunatiphedzambo toera kuphatisira uphungu, ngakhale tisaona kuti nee tathema kupaswa uphungu unoyu peno anatipasa ndi mwana kakamwe. Nkulu wa mpingo m’bodzi wa ku Kanadha alonga: “Nakuti ife nkhabe kwanisa kuona makhaliro athu ninga munationera anango, mphapo tinakwanisa tani kuthambaruka tingakhonda kupaswa uphungu na anango?” Tonsene tisafunika kukulisa misapo ya nzimu wakucena, na kukhala amwazi mphangwa na apfundzisi adidi kakamwe a mphangwa zadidi.—Lerini Masalmo 141:5.

¹³ Onani uphungu ninga cipangizo ca ufuni wa Mulungu. Yahova asafuna udidi wathu. (Mis. 4:20-22) Tingapaswa uphungu kubulukira m’Bhibhlya, mabukhu akubuluswa m’Bhibhlya peno na abale akuti ali na uxamwali wakuwanga na Yahova, pyenepi pisapangiza kuti iye asatifuna. Ahebheri 12:9, 10 isalonga: “Iye asacita pyenepi toera atiphedze.”

¹⁴ Nyerezerani uphungu, tayu njira idapaswa imwe. M’midzidzi inango tinaona kuti uphungu udapaswa ife nee waperekwa munjira yadidi. Mwandimomwene, munthu anapereka uphungu asafunika kuupereka munjira yakuti inakhala yakukhonda nentsa kuutawira. (Agal. 6:1) Mbwenye khala ndife anapaswa uphungu tisafunika kunyerezera pinapangwa ife. Ngakhale kuti tisaona kuti munthu adatipasa uphungu akhafunika kutipasa munjira yadidi, tisafunika kubvundzika: ‘Ngakhale kuti nee ndakomerwa na njira idaperekwa uphungu, pana cinthu cakuti ndinakwanisa kucipfundza kubulukira mu uphungu unoyu? Ndinakwanisa kuduwala madodo a munthu adandipasa uphungu mbandipfundza na uphungu udandipasa iye?’ Tingabvera uphungu unapaswa ife toera tikwanise kuphedzeka nawo tisapangiza kuti ndife audziwisi.—Mis. 15:31.

Sentinela 15/5/01 tsa. 30 ndima 1-2

‘Thangwi ya Udziwisi, Tinakhala m’Maso mu Ntsiku Zizinji’

Pinthu pinacita munthu waudziwisi angapaswa uphungu ndi pyakusiyana na pire pinacita nyakusingirira. Mambo Salomoni alonga: “Sandika munthu waudziwisi, iye anadzakufuna. Pfundzisa munthu waudziwisi, iye anadzakhala waudziwisi kakamwe.” (Misangani 9:8b, 9a) Munthu waudziwisi asadziwa kuti “ife nee tisakomerwa mu ndzidzi unalangwa ife, mbwenye tisabva kupha; ngakhale tenepo, kuna ale anatawira kupfundziswa nako, mukupita kwa ndzidzi kulangwa kweneku kusabala nsapo wantendere mwakubverana na ulungami.” (Ahebheri 12:11) Maseze uphungu usapha, thangwi yanji nee tisafunika kuipirwa khala kutawira uphungu unoyu kunatiphedza?

Mambo Salomoni athimiza: “Pfundzisa munthu wakulungama, natenepa iye anadzathimiza cidziwiso cace.” (Misangani 9:9b) Nkhabepo munthu waudziwisi kakamwe peno wakukalamba kakamwe wakuti nee asafunikabve kupfundza. Ndi pyakutsandzayisa kakamwe kuona ankhalamba mbatawira undimomwene na kuperekeka kuna Yahova. Ifembo mbatiwangisireni toera tipitirize kukhala na cifuno cakupfundza.

Sentinela 15/5/01 tsa. 30 ndima 5

‘Thangwi ya Udziwisi, Tinakhala m’Maso mu Ntsiku Zizinji’

Ife tisafunika kuwangisira toera tikhale na udziwisi. Mambo Salomoni alonga tenepa thangwi ya pyenepi: “Ungakhala waudziwisi, anafuna kuphedzeka ndiwe, mbwenye ungakhala nyakusingirira, anafuna kuthabuka ndiwe.” (Misangani 9:12) Munthu waudziwisi asaphedzeka, mbwenye nyakusingirira ndiye ali na mulando thangwi ya nyatwa zace. Mwandimomwene, ife tisabvuna pinabzwala ife. Natenepa, tendeni ‘tibvesere mwadidi udziwisi.’—Misangani 2:2.

Mpfuma Zauzimu

Ncenjezi 06.23 tsa. 22 ndima 9

Ndi Nkhombo Zipi Zinafuna Kukhala na Ife Tingagopa Mulungu?

⁹ Pana mathangwi adidi anaticitisa kucalira makhaliro aulukwali. “Nkazi wakusowa ndzeru” analongwa m’bukhu ineyi asalonga kuti: “Madzi akuba asatapira.” Kodi “madzi akuba” anewa ninji? Bhibhlya isalandanisa kupita m’mabonde kwa anthu awiri akumanga banja na madzi akupha nyota. (Mis. 5:15-18) Mamuna na nkazi wakumanga manja ali na ufulu wakupita m’mabonde. Mphapo pyenepi pyasiyana tani na “madzi akuba?” Madzi akuba ndi kucita ulukwali. Thangwi anthu anacita ulukwali kazinji kene asabisa pyenepi kuna anango ninga pinacita mbava. “Madzi akuba” panango anakhala ninga akutapira khala anthu adacita ulukwali nee aphatiwa peno khala asaona kuti nkhabepo munthu anadziwa pidacita iwo. Pyenepi ndi pyakutsukwalisa kakamwe thangwi Yahova asaona pyonsene. Nkhabepo cinthu cakutsukwalisa kakamwe kupiringana kuluza uxamwali wathu na Yahova. Natenepa madzi anewa mwandimomwene nee ndi “akutapira.” (1 Akor. 6:9, 10) Mbwenye pana pinthu pinango pyakutsukwalisa.

SUMANA 21-27 YA ABRIL

MPFUMA ZA MAFALA A MULUNGU

Tinakhala Tani na Kutsandzaya Kwandimomwene?

Sentinela 15/7/01 tsa. 25 ndima 1-3

Anthu Akulungama Asapaswa Nkhombo

Munthu wakulungama asapaswa nkhombo munjira inango. “Manja akupolola asatcerengesa, mbwenye manja anaphata basa mwaphinga asapfumisa. Mwana anacita pinthu mwandzeru asabvuna m’malimwe, mbwenye mwana anacita pinthu mwakupasa manyadzo asagona mbakhonda kubva kunja mu ndzidzi wakubvuna.”—Misangani 10:4, 5.

Mafala adalonga Mambo Salomoni ndi akufunika kakamwe kuna anthu anaphata basa yakubvuna. Ndzidzi wakubvuna nee ndi ndzidzi wakugona, mbwenye ndi ndzidzi wakuphata basa mwaphinga. Mwandimomwene, ndi ndzidzi wakucita pinthu mwakucimbiza.

Tisafunika kukumbuka kuti kubvuna kweneku nee ndi kwa cakudya, mbwenye ndi kwa anthu. Yezu apanga anyakupfundzace: “Basa yakubvuna ndi ikulu, mbwenye anyabasa ndi akucepa. Natenepa, phembani Mwanaciro munda kuti atumize anyabasa toera kubvuna.” (Mateu 9:35-38) Mu caka ca 2000, anthu akupiringana mamiliyau 14 agumanika pa Cikumbuso cakufa kwa Yezu, kupiringana kawiri numero ya Mboni za Yahova zonsene. Nkhabe munthu anafuna kupenula kuti ‘ndzidzi wakubvuna wafika.’ (Juwau 4:35) Alambiri andimomwene asaphemba Mbuya toera abwerese anyabasa anango, pontho asaphata mwaphinga basa yakucita anyakupfundza, mwakubverana na maphembero awo. (Mateu 28:19, 20) Pontho Yahova asaapasa nkhombo thangwi yakuwangisira kwawo. Mu caka ca basa ca 2000, anthu akupiringana 280.000 abatizwa. Anthu anewa asawangisirambo toera akhale apfundzisi a Mafala a Mulungu. Mbatipitirizeni kutsandzaya mu ndzidzi uno wakubvuna mukucita khundu m’basa yakucita anyakupfundza.

Sentinela 15/9/01 tsa. 24 ndima 3-4

Fambani ‘Munjira Yaulungami’

Mambo Salomoni alonga tenepa thangwi yakufunika kwa ulungami: “Mpfuma za munthu wakupfuma ndi ninga nzinda wace wakutsidzikizika. Kufudzwa kwa nyakutcerenga ndi utcerengi wace. Mabasa a anthu akulungama asatsogolera ku umaso; mbwenye mabasa a anthu akuipa asatsogolera ku madawo.”—Misangani 10:15, 16.

Mpfuma inakwanisa kutitsidzikiza tingacitikirwa na pinthu pyakukhonda dikhira mu umaso, ninga nzinda wakutsidzikizika wakuti usatsidzikiza anthu anakhala mwenemo. Pontho kutcerenga kunakwanisa kutithabusa tingacitikirwa na pinthu pyakukhonda dikhira. (Ekleziaste 7:12) Mbwenye Mambo Salomoni panango akhalonga pya ngozwi inaoneka thangwi yakupfuma na kutcerenga. Nyakupfuma panango ananyindira kakamwe mpfuma yace mbanyerezera kuti mpfuma ineyi ndi “mpanda wacitsidzikizo.” (Misangani 18:11) Pontho nyakutcerenga panango ananyerezera kuti kutcerenga kwace kusancitisa kukhala wakusowa cidikhiro. Natenepa, uwiri wawo nee ali na dzina yadidi pamaso pa Mulungu.

Perspicaz vol.1 tsa. 314

Nkhombo

Yahova asapasa nkhombo anthu. “Nkhombo za Yahova zisapfumisa, pontho iye nkhabe kuthimizirapo nyatwa.” (Mis. 10:22) Yahova asapasa nkhombo anthu akutawirika kuna iye, asaatsidzikiza, asaapfumisa, asaatsogolera, asacitisa kuti pinthu piafambire mwadidi mbakhala na umaso wadidi.

Mpfuma Zauzimu

Sentinela 15/5/06 tsa. 30 ndima 18

Pinthu Pyakutsandzayisa Pinacitika Thangwi Yakufamba mu Undimomwene

¹⁸ Nkhombo za Yahova zisapfumisa mwauzimu atumiki ace. Pontho ife tiri na cinyindiro cakuti ‘iye nkhabe kuthimizira nyatwa.’ (Misangani 10:22) Mphapo thangwi yanji atumiki azinji akukhulupirika a Mulungu asathimbana na nyatwa? Ife tisathimbana na nyatwa makamaka thangwi ya pinthu pitatu. (1) Kusowa kwathu ungwiro. (Genesi 6:5; 8:21; Tiyago 1:14, 15) (2) Sathani na madimonyo ace. (Aefesi 6:11, 12) (3) Kukhala n’dziko ino yakuipa. (Juwau 15:19) Maseze Yahova asatawirisa kuti pinthu pyakuipa piticitikire, iye nee asacitisa pinthu pyenepi pyakuipa. Mwandimomwene, “Muoni onsene wadidi na wakulungama usabuluka kudzulu, kuna Baba wa ceza.” (Tiyago 1:17) Nkhombo za Yahova nkhabe kubweresa nyatwa.

SUMANA 28 YA ABRIL–4 YA MAIO

MPFUMA ZA MAFALA A MULUNGU MISANGANI 11

Lekani Kulonga Mafala Anewa!

Sentinela 15/5/02 tsa. 26 ndima 4

Anthu Akulungama Asacita Pinthu Mwakukhulupirika

Kukhulupirika kwa anthu akulungama na uipi unacita anthu akuipa pisakhuyambo anthu anango. Mambo Salomoni alonga: “Na mulomo wace, nyakusandukira Mulungu asafudza ndzace, mbwenye anyakulungama asapulumuswa na cidziwiso.” (Misangani 11:9) Nkhabe munthu anafuna kupokanya kuti psweda, kulonga anango mwakuipa na kulonga mafala akudzidzida kusabweresera anango nyatwa. Mbwenye munthu wakulungama asasankhula mwadidi mafalace mbalonga pinthu pyadidi. Iye asaphedzeka na udziwisi wace, thangwi asapangiza kuti anthu anampambizira ali kulonga uthambi.

Sentinela 15/5/02 tsa. 27 ndima 2-3

Anthu Akulungama Asacita Pinthu Mwakukhulupirika

Anthu anakhala mu cisa peno nzinda angacita pinthu mwantendere asawangisana unango na ndzace mu cisa peno nzinda unoyu. Natenepa pinthu pisafamba mwadidi mu cisa ceneci. Mbwenye ale analonga uthambi thangwi ya anango mbacita pinthu pyakuipa, asacitisa kuti cisa cikhonde kukhala muntendere, anthu nee asakhala akuphatana, pontho asabweresa nyatwa. Pyenepi pisacitika makamaka khala anthu anacita pyenepi ali na pidzo. Mucisa ninga ceneci musaoneka uviyaviya, anthu azinji asacita pinthu pyakuipa, pontho panango musasoeka kobiri.

Lemba ya Misangani 11:11 inakwanisambo kuphatisirwa munjira ibodzi ene kuna atumiki a Yahova akuti asasonkhana pabodzi ninga anthu anakhala pabodzi mu nzinda. Mu mpingo mungakhala na anthu azinji akukola mwauzimu, akulungama na akukhulupirika, anthu a mu mpingo unoyu asakhala akutsandzaya, pontho asapasa mbiri Mulungu. Yahova asapasa nkhombo mpingo unoyu, pontho usathambaruka mwauzimu. Panango anango anaipirwa mbalonga mwakuipa njira inacitwa pinthu. Anthu anewa ndi ninga “ntcitci wakuipa” wakuti unamwazika mbukhuyambo anango. (Ahebheri 12:15) Kazinji kene iwo asafuna kukhala na cidzo. Asalonga uthambi kuti akulu a mpingo asacita pinthu mwakusowa ulungami na mwatsankhulo. Mafala awo anakwanisa kucitisa mpingo kukhala wakugawana. Nee tisafunika kubvesera makani awo, pontho tisafunika kuwangisira toera kukhala anthu akukola mwauzimu, akuti asaphedzera toera mpingo ukhale muntendere na wakuphatana.

Ncenjezi 03.20 tsa. 22 ndima 12-13

Ndi Ndzidzi Upi Wakuthema Toera Kulonga?

¹² Kodi munacitanji khala m’bale peno mulongo ali na mphangwa zakuti nee zisafunika kudziwika na anthu anango? Mwacitsandzo, khala imwe mwagumanikana na munthu wakuti asakhala n’dziko yakuti basa yathu isakhondeswa, kodi musayesera kumbvundzisa kuti basa yathu ikufamba tani n’dziko ineyi? Mwandimomwene, imwe nee munacita mbvundzo unoyu toera kuntsukwalisa. Ife tisafuna abale athu, pontho tisafuna kudziwa kuti ninji pinathimbana na iwo. Kusiyapo pyenepi, ife tisafuna kulonga pinathimbana na iwo pakucita phembero. Mbwenye tisafunika kucita mphole-mphole na mafala athu mu ndzidzi unabvundzisa ife munthu unoyu. Ife tingakakamiza munthu toera atipange mphangwa zacibisobiso, nee tisapangiza ufuni kuna iye na kuna abale na alongo anango. Mwandimomwene, nee m’bodzi wa ife asafunika kuthimizira nyatwa kuna abale na alongo athu anakhala n’dziko yakuti basa yathu isakhondeswa. Munjira ibodzi ene, nee m’bale peno mulongo anatumikira mu dziko ineyi asafunika kulonga mphangwa zonsene thangwi ya mabasa a Mboni za Yahova anacitwa n’dziko ineyi.

¹³ Ndi pyakufunika kakamwe kuna akulu a mpingo kuphatisira n’dida unagumanika pa Misangani 11:13. (Lerini.) Iwo anacita pyenepi angapitiriza kukoya mphangwa zacibisobiso. Mbwenye midzidzi inango ndi pyakunentsa, makamaka khala nkulu wa mpingo ndi wakumanga banja. Anyakumanga banja asawangisa uxamwali wawo angacedza kazinji kene thangwi ya cibisobiso cawo, mabvero awo na pinthu pinaadzudzumisa. Mbwenye nkulu wa mpingo asadziwa kuti nee asafunika kupanga nkazace ‘mphangwa zacibisobiso’ za abale na alongo mu mpingo. Angacita pyenepi, abale na alongo nee anan’nyindirabve, pontho anapswipisa makhaliro ace. Ale anatsogolera mpingo asafunika kukhala “akukhonda kunyengeza pakulonga.” (1 Tim. 3:8; cidzindikiro capantsi) Pyenepi pisabveka kuti iwo nee asafunika kupeusa anango peno kulonga psweda. Khala nkulu wa mpingo asafuna nkazace, iye nee anampanga mphangwa zacibisobiso za mpingo.

Mpfuma Zauzimu

Lamukani! N.° 1. 20 tsa. 11, bokosi

Munacitanji Toera Mukhonde Kudzudzumika Kakamwe?

“KUCITIRA ANANGO PINTHU PYADIDI KUSAPHEDZA TOERA TIKHONDE KUDZUDZUMIKA”

“Munthu wakukoma ntima asaphedzeka ekhene, mbwenye munthu wakuipa asathabusika ekhene.”—MISANGANI 11:17.

Bukhu inango inafokotoza thangwi ya kudzudzumika iri na nsolo ubodzi unalonga kuti “Kucitira Anango Pinthu Pyadidi Kusaphedza Toera Tikhonde Kudzudzumika.” (Overcoming Stress) Nyakulemba bukhu ineyi, Dr. Tim Cantopher alonga kuti kucitira anthu anango pinthu pyadidi kusatiphedza toera tikhale na ungumi wadidi, pontho tikhale akutsandzaya. Mbwenye munthu anakhonda kucitira ndzace pinthu pyadidi peno munthu waukali nee asakhala wakutsandzaya thangwi anango nee asafuna kukhale naye dhuzi.

Tinakwanisambo kupungula kudzudzumika tingacita pinthu pinatikomera. Mwacitsandzo nee ndi pyadidi kuthabusika, peno kunyerezera kuti nee ndife akufunika. Yezu alonga: “Funa ndzako ninga iwe ene.”—Marko 12:31.