Mareferensya a Umaso Wathu Wacikristu na Utumiki
© 2025 Watch Tower Bible and Tract Society of Pennsylvania
SUMANA 5-11 YA MAIO
MPFUMA ZA MAFALA A MULUNGU MISANGANI 12
Kuphata Basa Mwaphinga Kusaphedza
Ncenjezi 06.16 tsa. 31 ndima 1
N’khaliro wa Mulungu Wakuti Ndi Wakufunika Kakamwe Kupiringana Diamante
Kwa atumiki anango a Yahova, pisanentsa kakamwe kuwina kobiri yakukwana toera kutsalakana umaso wa ntsiku na ntsiku. M’mbuto mwakusaka kobiri munjira zakukhonda nentsa zinaphataniza kukhonda kuona ntima, iwo asaphata basa mwakuwanga na mwaphinga. Natenepa, iwo asapangiza kuti makhaliro adidi kakamwe a Mulungu, ninga kuona ntima, ndi a ntengo ukulu kakamwe kupiringana pinthu pyampfuma.—Mis. 12:24; Aef. 4:28.
Ncenjezi 1/2/15 tsa. 5 ndima 4-6
Munatsandzaya Tani Na Basa Yakuwanga
Mbvundzo unoyu wakumalisira ndi wakufunika kuunyerezera, thangwi basa isatsandzayisa kakamwe tingaona kuti isaphindulisa tani anthu anango. Yezu alonga: “Kupasa kunakomeresa kupita kutambira.” (Machitiro 20:35) Kusiyapo ale anaphindula na mabasa athu ninga ale anagula malonda athu na mapatrau, anango asaphindulambo na basa yathu yakuwanga. Anewa asaphataniza piwalo pya banja yathu na ale akutcerenga.
Piwalo pya banja yathu. Nsolo wa banja ungaphata basa yakuwanga toera kutsalakana piwalo pya banjace, usacitisa kuti iphindule munjira ziwiri. Yakutoma, iye asawangisira toera kugumana pyakufunika pyakumanungo pya banja ninga cakudya, cakubvala na nyumba. Tenepa asakwanirisa basa idapaswa iye na Mulungu ‘yakutsalakana anthu ace.’ (1 Timoti 5:8) Yaciwiri, munthu anawangisira kutsalakana banjace asapereka citsandzo cakufunika ca basa yakuwanga. Shane adalongwa mu nsolo udamala alonga: “Babanga ndi citsandzo cadidi ca munthu anacita basa yadidi yakunyindirika. Iye ndi mamuna wakuona ntima wakuti aphata mabasa akuwanga mu umaso wace onsene, ikulu mwa iwo ndi yakusema matabwa. Kubulukira mu citsandzo cace, ndapfundza kufunika kwa kuphata basa yakuwanga, kucita pinthu pyakuti pinaphindulisa anthu anango.”
Ale akutcerenga. Mpostolo Paulu acenjeza Akristu toera ‘aphate basa yakuwanga . . . towera akwanisembo kupasa pinthu anyakutcerenga.’ (Aefesi 4:28) Inde, tingaphata basa mwakuwanga toera kutsalakana umaso wathu na wa banja yathu, tinakwanisa kuphedzambo ale ali na pinthu pyakucepa. (Misangani 3:27) Natenepa, basa yakuwanga inaticitisa kukhala akutsandzaya kakamwe thangwi yakupasa.
Mpfuma Zauzimu
Ncenjezi 09.24 tsa. 28 ndima 10
Kupasa Kunakuphedzani Toera Kukhala Akutsandzaya
3 Lekani duwala kuti pinthu pinalonga imwe pinakwanisa kuwangisa anango. Mwacitsandzo, munakwanisa kunyerezera munthu wakuti anawangiswa mungampanga kuti musakomerwa na pinthu pinacita iye? Alipo anadziwa imwe wakuti asafuna kubalangazwa? Khala alipo, citani pinthu toera adziwe kuti imwe musantsalakana. Imwe munakwanisa kuenda kamuona, kum’menyera ntokodzi, kumulembera tsamba peno kuntumizira mphangwa. Imwe nee musafunika kudzudzumika na pinthu pinafuna imwe kulonga. Mafala akucepa na aufuni anakwanisa kuphedza m’bale peno mulongo toera apitirize kukhala wakukhulupirika mbakhala na maonero adidi thangwi ya nyatwa zinathimbana na iye.—Mis. 12:25; Aef. 4:29.
SUMANA 12-18 YA MAIO
MPFUMA ZA MAFALA A MULUNGU MISANGANI 13
Lekani Kunyengezwa na “Nyale ya Anyakuipa”
Sentinela 15/9/03 tsa. 24 ndima 5-6
Cipfundziso ca Munthu Waudziwisi Cisapasa Umaso
Ife tisafunika kukhala na nyale toera kutsogolera njira yathu mu umaso. ‘Mafala a Mulungu ndi nyale inamwanikira manyalo athu na ceza cinamwanikira njira zathu.’ (Mas. 119:105) M’Bhibhlya musagumanika udziwisi wakukhonda mala wa Mulungu. Tingadziwa pinakomerwa na Mulungu na cifuniro cace, ceza cinatimwanikira cinathimizirika. Pyenepi pisatitsandzayisa kakamwe. Na thangwi ineyi, nee tisafunika kuluza ndzidzi wathu na udziwisi wa dziko peno “manyerezero apezi akuti mwauthambi anthu asaacemera ‘cidziwiso.’”—1 Tim. 6:20; 1 Akor. 1:20; Akol. 2:8.
Mbwenye anthu akuipa, mwakukhonda tsalakana khala nyale yawo isaoneka ninga yakugaka kakamwe peno pisaoneka ninga pinthu piri kuafambira mwadidi kakamwe, nyale yawo inadzathimiswa. Iwo anakhala ncidima mbagwegweduka. Kusiyapo pyenepi, iwo “nkhabe cidikhiro.”—Mis. 24:20.
Pitirizani Kufuna Mulungu tsa. 123-124 ndima 13-14
“Thawani Pyaulukwali!”
13 Axamwali athu anakwanisa kutikulumiza toera kucita pinthu pyadidi peno pyakuipa. Tingasankhula axamwali anabvera Mulungu, iwo anatiphedza kucitambo pibodzi pyene. (Misangani 13:20; lerini 1 Akorinto 15:33.) Pidacitikira Dhina mwana wa Yakobe, pisatipangiza kuti mphyakufunika kusankhula mwadidi axamwali. Iye akuzwa pabanja yakuti ikhalambira Yahova. Dhina nee akhali na makhaliro akuipa, mbwenye iye acita uxamwali na atsikana a ku Kanani akuti nee akhalambira Yahova. Anthu a ku Kanani akhali na maonero akusiyana thangwi yakupita m’mabonde, pontho mbumba ya Mulungu ikhadziwa kuti iwo akhali anthu aulukwali. (Levitiko 18:6-25) Thangwi ya axamwali ace, Dhina adziwana na Sikemu m’phale wa ku Kanani, iye aona kuti Dhina akhali wakubalika kakamwe. Sikemu akhali m’phale ‘wakulemedzwa kakamwe’ panyumba pawo. Mbwenye iye nee akhalambira Yahova.—Genesi 34:18, 19.
14 Sikemu acita pire pikhaona iye kukhala pyakutawirika. Iye akakamiza Dhina, ‘am’phata, mbapita naye m’mabonde mwakukakamiza.’ (Lerini Genesi 34:1-4.) Pyenepi nee pyabweresa nyatwa basi ene kuna Dhina, mbwenye kuna acibale ace onsene.—Genesi 34:7, 25-31; Agalata 6:7, 8.
Sentinela 15/7/04 tsa. 31 ndima 6
“Munthu Waudziwisi Asacita Pinthu Mwandzeru”
Munthu wakulungama anacita pinthu mwandzeru anapaswa nkhombo. Salomoni alonga: “Munthu wakulungama asadya mbakhuta, mbwenye mimba za anyakuipa zisakhala na njala.” (Misangani 13:25) Yahova asadziwa pinthu pyakuti pinatiphedza m’banja mwathu, mu utumiki wathu, mu uxamwali wathu na anango peno tingasandikwa. Pontho tingaphatisira mwadidi uphungu unagumanika m’Bhibhlya, mwakukhonda penula tinakhala na umaso wadidi.
Mpfuma Zauzimu
Ncenjezi 02.21 tsa. 5 ndima 13
“Nsolo wa Mamuna Onsene Ndi Kristu”
13 Tisapfundzanji? Pyonsene pinacita nsolo wa banja pisafunika kukulumizwa na ufuni. Thangwi yanji pyenepi ndi pyakufunika kakamwe? Mpostolo Juwau alonga: “Ule anakhonda kufuna m’bale wace [peno banja yace], anacimwana kufuna Mulungu, wakuti iye nkhabe kumuona.” (1 Juwau 4:11, 20) Mamuna anafuna banja yace, pontho wakuti asafuna kutowezera citsandzo ca Yahova na Yezu asaphedza banja yace toera kukhala na uxamwali wakuwanga na Yahova, asatsalakana mabvero a banja yace na asatsalakana pyakufuna pyakumanungo pya banja yace. (1 Tim. 5:8) Iye asapfundzisa anace na kuasandika. Kusiyapo pyenepi, iye asacita pisankhulo pyakuti pinapasa mbiri Yahova, pontho pyakuti pinaphedza banja yace. Cincino tendeni tione kuti nsolo wa banja unatowezera tani Yahova na Yezu pakutsalakana banja yace.
SUMANA 19-25 YA MAIO
MPFUMA ZA MAFALA A MULUNGU MISANGANI 14
Nyerezerani Mwadidi Pinafuna Imwe Kucita Pangaoneka Cidengwa
Ncenjezi 02.23 tsa. 22-23 ndima 10-12
Tinalemedza Tani Umaso Udatipasa Mulungu?
10 Midzidzi inango, ife nee tinakwanisa kupingiza pinthu pyakugopswa toera pikhonde kucitika, ninga pidengwa pyacibaliro, utenda unathaphulisa anthu azinji na nkhondo. Ngakhale tenepo, pinthu pyenepi pingacitika ife tinakwanisa kuwangisira toera tikhale akutsidzikizika tingabvera mu ndzidzi unapangwa ife toera tibuluke na kubvera pitsogolero pinango pinapereka mautongi. (Aroma 13:1, 5-7) Pidengwa pinango pisadziwiswa mbapidzati kucitika, natenepa tisafunika kubvera pitsogolero pya mautongi toera kutiphedza kukhunganyika. Mwacitsandzo, panango tinaona kuti ndi pyadidi kukoya madzi, pyakudya pyakuti nee pinabvunda mwakucimbiza na mitombwe.
11 Mphapo ndiye tani khala mucisa cinakhala ife mwaoneka utenda wakuthaphulisana? Ife tisafunika kubvera pitsogolero pinapereka mautongi, ninga kusamba manja, kuthaukirana, kubvala maskra na kukhala kutali na anthu anango mu ntsiku zingasi tingaphatwa na utenda unoyu. Tingacita pyenepi, tinapangiza kuti tisalemedza umaso udatipasa Mulungu.
12 Panango tinabva mphangwa na axamwali athu peno mavizinyu athu zakuti nee ndi zandimomwene. M’mbuto mwa kukhulupira “mafala onsene” anabva ife, tisafunika kubvera mphangwa zakunyindirika za mautongi na madotoro. (Lerini Misangani 14:15.) Mathubo Akutonga na maofesi a filiali asacita pyonsene pinakwanisa iwo toera kudziwa mphangwa zakunyindirika mbadzati kupereka pitsogolero thangwi ya misonkhano ya mpingo na basa yakumwaza mphangwa. (Aheb. 13:17) Tingabvera pitsogolero pyenepi, ife tisatsidzikiza umaso wathu na umaso wa anango. Pontho pyenepi pisaphedzambo anthu anango toera kuona kuti Mboni za Yahova ndi anthu akubvera.—1 Ped. 2:12.
Ncenjezi 07.24 tsa. 5 ndima 11
Khalani Wacipapo Ninga Zadhoke
11 Khala abale na alongo mu mpingo agwerwa na nyatwa, pontho asafuna ciphedzo, tinatowezera tani citsandzo ca Zadhoke mbatikhala acipapo? (1) Bverani pitsogolero. Midzidzi ya nyatwa ndi pyakufunika kakamwe kukhala akuphatana, pontho ndi pyakufunika kubvera pitsogolero pinabuluka ku Bheteli. (Aheb. 13:17) Akulu a mpingo asafunika kukumbuka ndzidzi onsene pitsogolero pinapaswa iwo na gulu yathu pinalonga thangwi yakufunika kwa kukhala akukhunganyika pidengwa pyacibaliro mbapidzati kucitika. (1 Akor. 14:33, 40) (2) Khalani acipapo, mbwenye citani mphole-mphole. (Mis. 22:3) Nyerezerani mwadidi mbamudzati kucita cinthu. Lekani kuikha umaso wanu pangozwi khala nee ndi pyakufunika. (3) Nyindirani Yahova. Kumbukani kuti Yahova asafuna kakamwe udidi wanu pabodzi na abale na alongo anu. Yahova anakwanisa kukuphedzani toera mukwanisembo kuphedza abale na alongo mwakutsidzikizika.
Mpfuma Zauzimu
Tsandzayani na Umaso Kwenda na Kwenda nsolo 35 khundu 2
Tinacita Tani Pisankhulo Pyadidi
Bhibhlya isalonga: “Munthu wandzeru asanyerezera mwadidi mbadzati kucita cinthu.” (Misangani 14:15) Pyenepi pisabveka kuti mbatidzati kucita cisankhulo tisafunika kunyerezera pinthu pyonsene pinaphataniza cisankhulo cinafuna ife kucita. Buluka penepo bvundzikani: ‘Ndi midida ipi ya m’Bhibhlya yakuti ndinakwanisa kuiphatisira? Kodi cisankhulo ceneci cinandiphedza toera kukhala na ntendere wa m’manyerezero? Cisankhulo canga cinakhuya tani anthu anango? Kusiyapo pyenepi, kodi cisankhulo ceneci cinatsandzayisa Yahova?’—Dheuteronomyo 32:29.
Yahova ndiye adathema toera kutipanga pinthu pyadidi na pyakuipa. Tingadziwa mwadidi mitemo na midida ya Mulungu mbatiibvera, tinakhala na cikumbuntima cakupfundziswa mwadidi. Cikumbuntima ndi luso yakuti isatiphedza kudziwa cadidi na cakuipa. (Aroma 2:14, 15) Cikumbuntima cakupfundziswa mwadidi cinatiphedza toera kucita pisankhulo pyadidi.
SUMANA 26 YA MAIO–1 YA JUNHO
MPFUMA ZA MAFALA A MULUNGU MISANGANI 15
Phedzani Anango Toera Akhale Akutsandzaya
Ncenjezi 03.18 tsa. 19 ndima 17
Kutambira Alendo Ndi Kwakufunika Kakamwe!
17 Mulongo m’bodzi wakuti asatumikira ninga mpainiya, kazinji kene akhatambira anyakupfundza maxikola a utumiki wa Mulungu kunyumba kwace. Iye alonga: “Pakutoma ndikhadzudzumika thangwi nyumba yanga ikhali ing’ono, pontho ndikhaphatisira meza na makadera akale adapaswa ine. Nkazi wa mpfundzisi m’bodzi andiphedza toera kukhala wakusudzuka. Iye alonga kuti mu ndzidzi ukhatumikira iye na mamunace ninga muyang’aniri wa cisa, akhatsandzaya kakamwe kukhala pabodzi na anthu akukola mwauzimu akuti nee akhafuna pinthu pizinji, mbwenye akhaikha manyerezero awo m’basa yakutumikira Yahova na kukhala na umaso wakukhonda funa pizinji. Pyenepi pisandikumbusa pidalonga mama pikhali ife ana: ‘Mphyadidi kudya na masamba panyumba pali na ufuni.’” (Misangani 15:17) Natenepa nkhabe funika kudzudzumika, thangwi pyakufunika kakamwe ndi kupangiza ufuni kuna alendo athu.
Ncenjezi 04.18 tsa. 25-26 ndima 16-18
Pitirizani Kuwangisana Unango na Ndzace
16 Munacitanji khala nee musakwanisa kupanga anango mabvero anu thangwi ya iwo? Mwandimomwene, nee ndi pyakunentsa kakamwe kuwangisa anango. Yeserani kumwetulira munthu anafuna kumwanyika imwe. Angakhonda kukumwetuliranimbo, pinapangiza pakweca kuti nee ali wakutsandzaya na asafunika kuwangiswa. Imwe panango munakwanisa kum’balangaza mukubvesera pinafuna kulonga iye.—Tyago 1:19.
17 M’bale unango wamphale anacemerwa Henri atsukwala kakamwe pidasiya acibale ace kutumikira Yahova. M’bodzi wa iwo akhali pai wace, wakuti akhadatumikira ninga nkulu wa mpingo. Muyang’aniri wa cisa adzindikira kuti Henri akhali wakutsukwala mbamphemba toera kucedza naye. Iye abvesera mwacidikhodikho mu ndzidzi ukhalonga Henri mabvero ace. Henri adzindikira kuti njira ibodzi toera kuphedza acibale ace toera kubwerera mu undimomwene, iye akhafunika kukhala wakukhulupirika. Iye abalangazwambo mukuleri Masalmo 46, Sofoniya 3:17 na Marko 10:29, 30.
18 Tisapfundzanji kubulukira mu citsandzo ca Marthe na Henri? Tonsene tinakwanisa kubalangaza na kuwangisa m’bale peno mulongo wakutsukwala. Mambo Salomoni alemba: ‘Mafala analongwa pa ndzidzi wakuthema ndi adidi kakamwe! Kuyang’ana mwakukomerwa kusatsandzayisa ntima; mphangwa zadidi zisawangisa magogodo.’ (Misangani 15:23, 30) Kodi alipo anadziwa imwe wakuti ali wakutsukwala? Ndiye tani kumphedza munjira yakukhonda nentsa ninga kuleri naye pabodzi Ncenjezi peno mukuphatisira website yathu? Pontho, Paulu alonga kuti kuimba pabodzi nyimbo za Umambo kunakwanisa kutiphedza. Iye alemba: ‘Pitirizani kupfundzisana na kuwangisana unango na ndzace mukuphatisira masalmo, kusimba Mulungu, mbamuimba nyimbo zauzimu mwakupereka takhuta. Pitirizani kuimbira Yahova m’mitima yanu.’—Akolose 3:16; Machitiro 16:25.
Mpfuma Zauzimu
Perguntas Bíblicas Respondidas nsolo 39 ndima 3
Ndi Pyakutawirika Kuti Akristu Asake Ukondzi?
2. Ndisafunika kusaka maonero a anthu anango thangwi ya ukondzi? “mapungu mazinji” anakwanisa kutiphedza, makamaka khala utenda wathu ndi wakunentsa.—Misangani 15:22.
SUMANA 2-8 YA JUNHO
MPFUMA ZA MAFALA A MULUNGU MISANGANI 16
Mibvundzo Mitatu Yakuti Inatiphedza Toera Kucita Pisankhulo Pyadidi
Ncenjezi 1/1/14 tsa. 19-20 ndima 11-12
Citani Pisankhulo Mwandzeru Mu Uphale Peno Utsikana Wanu
11 Kutsandzaya kwathu kukulu kusabwera thangwi yakutumikira Yahova. (Mis. 16:20) Baruki, mulembi wa Yeremiya aduwala pyenepi. Mu ndzidzi unango, iye nee akhatsandzayabve na basa ya Yahova. Yahova ampanga: ‘Iwe uli kusaka pya utumbe peno pinthu pizinji? Leka kusaka, thangwi ine ndinadzatcerengesa anthu onsene, mbwenye iwe unadzawandzirwa mbukhala maso.’ (Yer. 45:3, 5) Musanyerezeranji? Ninji mbipidacitisa Baruki toera kutsandzaya, kusaka pinthu pizinji peno kupulumuka ninga ntumiki wakukhulupirika wa Mulungu pakufudzwa kwa Yerusalemu?—Tgo. 1:12.
12 M’bale m’bodzi adakhala wakutsandzaya mu kutumikira anango ndi Ramiro. Iye alonga: “Ndabalwa m’banja yakutcerenga inakhala mu nzinda padzulu pa Mapiri a Andes. Mbwenye, mudalonga m’bale wanga wankulu kuti analipa kobiri toera ndiende ku universidade, ukhali mwai ukulu kakamwe. Mbwenye ndikhadabatizwa kwene ninga m’bodzi wa Mboni za Yahova, pontho ndikhadatambira mwai unango, mpainiya andiphemba toera kamwaza mphangwa pabodzi na iye mu nzinda ung’ono. Ndaenda ku nzinda unoyu mbandipfundza kucinga ntsisi, pontho ndakhala na mbuto yanga yakucingira tsisi toera kugumana kobiri. Mukhaperekeka ife toera kupfundzisa anthu Bhibhlya, azinji akhatawira mwadidi. Mu kupita kwa ndzidzi, ndikhagumanyikana na mpingo udakhazikiswa kwene mu cilongero ca pacisa. Cincino ndiri na pyaka khumi m’basa ya ndzidzi onsene. Nkhabepo basa inango yakuti mbidandipasa kutsandzaya kunakhala na ine mu kuphedza anthu kupfundza mphangwa zadidi mu cilongero cawo.”
Ncenjezi 1/9/13 tsa. 17 ndima 1-3
Kodi Imwe Mwacinjwa?
TONSENE tisakhuyiwa na makuziro athu, pontho na makhaliro athu akunja. Tisabvala mu njira zakusiyana; tisafuna mitundu inango ya cakudya; tiri na makhaliro akusiyana. Thangwi yanji? Mu njira ibodzi ndi thangwi yakukhuyiwa na makhaliro a anthu anatizungulira, pontho na makhaliro athu mu umaso.
2 Natenepa, pana pinthu pyakuti ndi pyakufunika kakamwe kupiringana kusankhula cakudya peno mabvaliro. Mwacitsandzo, tapfundziswa toera kudzindikira pinthu pyadidi na pyakutawirika mbwenye toera kukhonda pinthu pyakuipa peno pyakukhonda tawirika. Pinthu pyenepi pizinji ndi pya munthu paekha na mphyakusiyana kwa munthu m’bodzi na m’bodzi. Pisankhulo pyathu panango pinapangiza pinalonga cikumbuntima cathu. Bhibhlya isadziwisa pyenepi kazinji kene kuti anthu “anasowa mwambo, angachita okhene pinatongwa na mwambo, maseze anausowa ali nawo m’mitima mwawo.” (Arom. 2:14) Kodi pyenepi pisabveka kuti nkhabepo mwambo wapakweca wakubuluka kwa Mulungu? Tisafunika kutowerera njira na midida idapfundziswa ife peno yakuti ndi yakudziwika kakamwe mu cisa cathu?
3 Pana mathangwi mawiri akufunika anapangiza kuti pyenepi nee pisacitika basi ene kwa Akristu. Thangwi yakutoma, Bhibhlya isaticenjeza: “Ziripo njira zinaoneka kuti ntsadidi mbwenye zinadzesa kufa.” (Mis. 16:25) Na thangwi yakusowa kwathu ungwiro, ife tonsene nee tiri na maluso akukwana toera kusankhula kuti ninji cinafuna kutiphedza toera kutitsogolera mu njira zakulungama. (Mis. 28:26; Yer. 10:23) Thangwi yaciwiri, Bhibhlya isapangiza pipendamiro na midida ya dziko yakuti isaphatisirwa na Sathani, “mulungu wakuipa wa pantsi pano.” (2 Akor. 4:4; 1 Jwau 5:19) Natenepa, khala tisafuna nkhombo za Yahova na kutawirwa na iye, tisafunika kubvera cenjezo inagumanika pa Aroma 12:2.—Lerini.
Mpfuma Zauzimu
Ncenjezi 09.21 tsa. 2 ndima 1-2
Lemedzani Kakamwe Abale na Alongo Akukalamba
1 MU PARKI ya ku Arkansas, ku Estados Unidos musagumanika miyala inacemerwa diamante. Mbwenye miyala ineyi nee yakhunganywa toera kusasanya pinthu pyakusiyana-siyana. Na thangwi ineyi, anthu azinji nee asaiona ninga yakufunika kakamwe, pontho nee asadzumatirwa nayo.
3 Munjira ibodzi ene, abale na alongo athu akukalamba ndi ninga miyala ineyi ya diamante; iwo ndi akufunika kakamwe. Pontho Bhibhlya isalandanisa imbvi zawo na nthimba. (Lerini Misangani 16:31; 20:29) Mbwenye panango pinakhala pyakukhonda nentsa kupwaza abale na alongo anewa akukalamba. Aphale na atsikana angadzindikira kuti abale na alongo akukalamba ndi akufunika kakamwe, iwo anaphindula kakamwe. Mu nsolo uno, ife tinatawira mibvundzo mitatu: Thangwi yanji Yahova asaona abale na alongo akukalamba kukhala akufunika kakamwe? Thangwi yanji iwo ndi akufunika kakamwe mu gulu ya Yahova? Tisafunika kucitanji toera tiphindule mwakukwana na citsandzo cawo?
SUMANA 9-15 YA JUNHO
MPFUMA ZA MAFALA A MULUNGU MISANGANI 17
Khalani na Ntendere m’Banja
Despertai 9/14 tsa. 11 ndima 2
Munacitanji Toera Mukhonde Kupitiriza Kuipirwa?
Dziwani mwadidi makhaliro anu. Bhibhlya isapangiza kuti anthu anango ‘asaipirwa mwakucimbiza.’ (Misangani 29:22) Kodi imwembo ndimwe tenepo? Bvundzikani: ‘Ndisapitiriza kuipirwa na cinthu? Ndisaipirwa mwakucimbiza? Ndiri na nsambo wakusaka kuipirwa na pinthu ping’ono?’ Bhibhlya isalonga kuti “ule anapitiriza kulonga cinthu asamwaza axamwali adidi.” (Misangani 17:9; Ekleziaste 7:9) Pyenepi pisacitikambo m’banja. Natenepa, khala muli na nsambo wakupitiriza kuipirwa, bvundzikani: ‘Kodi ine ndisafunika kupirira madodo a mamunanga peno nkazanga?’—1 Pedhru 4:8.
Sentinela 1/5/08 tsa. 10 ndima 6–tsa. 11 ndima 1
Kumalisa Nkandzo
1. Khazikisani ndzidzi toera kucedza thangwi ya pinthu pyakutsukwalisa pidacitika. Bhibhlya isalonga: “Pinthu pyonsene piri na ndzidzi wace, . . . Pali na ndzidzi wakumatama na ndzidzi wakulonga.” (Ekleziaste 3:1, 7) Ninga pidaona ife, nyatwa zinango panango zinaticitisa kukhala na mabvero akuipa. Pyenepi pingacitika, khalani wakukhurudzika mbamupanga ndzanu wa m’banja kuti ndi pyadidi ‘mukhale akumatama’ pang’ono pinthu mbapidzati kutekera. Imwe munakwanisa kucalira nyatwa zizinji m’banja mwanu mungabvera uphungu uyu: “Kutoma nthonga ndi ninga kufungula nsuwo udafungira madzi. Buluka pyako nthonga mbidzati kutoma.”—Misangani 17:14.
Ngakhale tenepo, ulipo “ndzidzi wakulonga.” Ninga tsanga, nyatwa zinathimizirika zingakhonda kumaliswa mwakucimbiza. Natenepa, lekani kucalira kumalisa nyatwa mbamudikhira kuti inamala yokhene. Khala imwe mwaphemba toera mukhonde kulonga thangwi ya nyatwa, pangizani cilemedzo kuna ndzanu wa m’banja mbamukhazikisa ndzidzi unango toera mulonge thangwi ya nyatwa ineyi. Pyenepi pinakuphedzani toera kuphatisira uphungu wa m’Bhibhlya unalonga kuti: “Lekani kupitiriza kukhala akuipirwa mpaka kudoka kwa dzuwa.” (Aef. 4:26) Kusiyapo pyenepi, musafunika kucita pidalonga imwe.
Mpfuma Zauzimu
Ncenjezi 06.23 tsa. 20-21 ndima 3
Ndi Nkhombo Zipi Zinafuna Kukhala na Ife Tingagopa Mulungu?
3 Thangwi ikulu inaticitisa kutsidzikiza ntima wathu wakuphiphirisa ndi yakuti Yahova asaona piri muntima mwathu. Pyenepi pisabveka kuti iye asaona pizinji kupiringana pinaona anthu, pontho asadziwa mwadidi makhaliro athu. (Lerini Misangani 17:3.) Iye anatifuna tingapitiriza kunyerezera uphungu wace wakuti unatiphedza toera kukhala m’maso kwenda na kwenda. (Juw. 4:14) Pontho ife nee tinakhuiwa na makhaliro aulukwali, uthambi wa Sathani na anthu akuipa a dziko ino. (1 Juw. 5:18, 19) Tingakhala na uxamwali wakuwanga na Yahova, ufuni wathu na cilemedzo cathu kuna iye pinathimizirika. Nakuti nee tisafuna kutsukwalisa Babathu, ife tinacalirambo manyerezero akucita madawo. Tingayeserwa toera kucita madawo, tisafunika kunyerezera: ‘Ine nee ndisafunika kucita pinthu pyakuti pinatsukwalisa munthu anandifuna kakamwe.’—1 Juw. 4:9, 10.
SUMANA 16-22 YA JUNHO
MPFUMA ZA MAFALA A MULUNGU MISANGANI 18
Longani Munjira Yakuti Inabalangaza Ale Anathabuka na Nyatwa ya Ungumi
Ncenjezi 10.22 tsa. 22 ndima 17
Udziwisi Wandimomwene Uli Kukhuwa
17 Nyerezerani mbamudzati kulonga. Tingakhonda kucita mphole-mphole tinakwanisa kubweresa nyatwa ikulu na mafala athu. Bhibhlya isalonga: ‘Mafala analongwa mwakukhonda kunyerezera asalasa ninga supada, mbwenye lirimi ya munthu wandzeru isakondza.’ (Mis. 12:18) Ife tisaphedzera toera tikhale na ntendere tingacalira kulonga psweda thangwi ya madodo a anango. (Mis. 20:19) Tingafuna kuti mafala athu abalangaze anango mbakhonda kudzidzida, tisafunika kuleri Mafala a Mulungu ntsiku zonsene na kunyerezera thangwi ya pinaleri ife. (Luka 6:45) Tinganyerezera mwadidi pinalonga Bhibhlya, mafala athu anakwanisa kukhala ninga ‘ncera waudziwisi’ wakuti usabalangaza anango.—Mis. 18:4
Mais Assuntos nsolo 19, bokosi
Munacitanji Mungadzindikira Kuti Muli na Utenda
Bveserani mwadidi. Ibodzi mwa njira zadidi kakamwe toera kuphedza xamwali wanu ndi kukhala dzololo toera kumbvesera angafuna kulonga. Lekani nyerezera kuti musafunika kuntawira ndzidzi onsene unalonga iye pinthu. Kazinji kene basi ene musafunika kubvesera. Bveserani mwadidi, pontho lekani kuntonga. Lekani nyerezera kuti musadziwa mwadidi mabvero a xamwali wanu, makamaka khala asaoneka ninga nee ali kubva kupha.—Misangani 11:2.
Longani munjira yadidi. Panango nee munadziwa pinafuna imwe kulonga. Mbwenye kulonga mafala akucepa anapangiza kuti musabvesesa nyatwa za xamwali wanu, pinamuwangisa kakamwe, kusiyapo kukhonda kulonga cinthu. Khala nee muli na mafala toera kulonga, longani mafala akucepa, mbwenye akubulukira muntima ninga awa: “Nee ndiri na pizinji toera kulonga, mbwenye dziwani kuti ndisakufunani.” Mbwenye calirani kulonga mafala ninga awa: “Pali na anthu anango akuti ali kunentseka kakamwe kupiringana imwe” peno “Mbwenye imwe thangwi nee muli kuduwala utenda wa . . . ”
Njira inango yakupangiza ufuni kuna iye ndi kusaka kudziwa pizinji thangwi ya utenda wace. Mwakukhonda penula iye anakomerwa kakamwe na kuwangisira kwanu toera kubvesesa nyatwa zace, pontho pyenepi pinakuphedzani toera kulonga mafala akuwangisa. (Misangani 18:13) Mbwenye calirani kupereka uphungu thangwi ya utenda wace khala iye nee akuphembani.
Mphedzeni. M’mbuto mwakunyerezera mwekha pinafuna imwe kucita toera kumphedza, mbvundzeni pinafunika imwe kucita. Mbwenye kumbukani kuti panango iye nee anatawira ciphedzo canu, mbanyerezera kuti anakupasani ntolo. Pyenepi pingacitika, munakwanisa kumpanga pinthu pinafuna kucita imwe, ninga kuenda kan’gulira pinthu, kucenesa n’nyumba mwace na mabasa anango.—Agalata 6:2.
Lekani kubwerera nduli. Mu ndzidzi unaduwala xamwali wanu, panango nee anakwanisa kucita mabasa anango peno nee anafuna kulonga na imwe. Khalani wakupirira, pontho pitirizani kumphedza.—Misangani 18:24.
Sentinela N.º 1 2023 tsa. 14 ndima 3–15 ndima 1
Munaphedza Tani Munthu Ali na Utenda wa Manyerezero?
‘Balangazani ale akuti ali akutsukwala.’—1 ATESALONIKA 5:14.
Panango xamwali wanu ali wakudzudzumika, pontho asaoneka ninga wakusowa basa. Maseze nee musadziwa pinafuna imwe kulonga, imwe munakwanisa kumuwangisa na kum’balangaza mungacita pinthu pinapangiza kuti musanfuna.
“Xamwali wandimomwene asakufuna ndzidzi onsene.”—MISANGANI 17:17.
Mphedzeni. Mbwenye m’mbuto mwakunyerezera mwekha pinafuna imwe kucita toera kumphedza, mbvundzeni pinafunika imwe kucita. Khala ndi pyakunentsa kuna xamwali wanu kulonga ciphedzo cinafuna iye, yeserani kumpanga pinthu pyakuti munakwanisa kupicita pabodzi, ninga kupaseari pabodzi. Peno munakwanisa kumphedza mukuenda kan’gulira pinthu, kucenesa n’nyumba mwace na kucita mabasa anango.—Agalata 6:2.
“Khalani akupirira.”—1 ATESALONIKA 5:14.
Nee ndi ndzidzi onsene wakuti xamwali wanu anakhala wakusudzuka toera kucedza na imwe. Mpangeni kuti muli dzololo toera kumbvesera angakhala na pinthu toera kulonga. Thangwi ya utenda wace, xamwali wanu panango analonga peno kucita pinthu pyakuti pinakutsukwalisani. Panango nee anacita pidabverana imwe peno anaipirwa mwakucimbiza. Natenepa, khalani wakupirira mbamubvesesa mwadidi mu ndzidzi unamphedza imwe.—Misangani 18:24.
Mpfuma Zauzimu
Ncenjezi 01.24 tsa. 24 ndima 13
Yahova Anakuphedzani m’Midzidzi Yakunentsa
13 Tisafunika kucitanji? Wangisirani toera mucalire kukhala mwekhene. Tingakhala tekhene, tinatoma kunyerezera basi ene umaso wathu na nyatwa zathu. Manyerezero anewa panango anaticitisa kukhonda kucita pisankhulo pyadidi. (Mis. 18:1) Ndimomwene kuti midzidzi inango tisafunika kukhala tekhene, makamaka tingacitikirwa na pinthu pyakuipa. Mbwenye tingakhala tekhene mu ndzidzi uzinji, panango tinaluza ciphedzo ca anthu anaphatisira Yahova toera kutiphedza. Natenepa maseze pikhale pyakunentsa, tawirani ciphedzo ca acibale anu, axamwali anu na akulu a mpingo mungathimbana na nyatwa. Aoneni ninga njira inaphatisira Yahova toera kukuphedzani.—Mis. 17:17; Iza. 32:1, 2.
SUMANA 23-29 YA JUNHO
MPFUMA ZA MAFALA A MULUNGU
Khalani axamwali adidi kuna abale anu
Ncenjezi 11.23 tsa. 12-13 ndima 16-17
Tinapitiriza Tani Kufunana Kakamwe Unango na Ndzace?
16 Onani pinthu pyadidi pinacita abale na alongo anu, tayu madodo awo. Mwacitsandzo, nyerezerani kuti imwe muli pa nsoka wa abale na alongo, pontho pakufuna kupangana imwe musabulusa foto. Imwe musabulusa mafoto anango mawiri toera mukhale na anewa yakutoma ingakhonda kubuluka mwadidi. Natenepa imwe musakhala na mafoto matatu. Mbwenye pa ibodzi mwa mafoto anewa, m’bale m’bodzi nee ali kumwetulira. Munacitanji na foto ineyi? Imwe munaifudza mbamusala na mafoto anango mawiri thangwi anthu onsene ali penepo abuluka mwadidi, pontho ali kumwetulira.
17 Ife tinakwanisa kulandanisa mafoto anewa adakoya ife na pinthu pidakoya ife m’manyerezero mwathu. Kazinji kene ife tisakoya m’manyerezero mwathu m’midzidzi yadidi idakhala ife pabodzi na abale na alongo athu. Mphapo nyerezerani kuti ubodzi mwa midzidzi ineyi, m’bale peno mulongo alonga peno acita pinthu pyakuipa? Tinacitanji? Ife tinawangisira toera kuduwala pinthu pyenepi, ninga pinafudza ife foto yakuti nee yabuluka mwadidi. (Mis. 19:11; Aef. 4:32) Ife tinakwanisa kuduwala madodo akucepa adacita m’bale peno mulongo thangwi tisakumbuka midzidzi mizinji yadidi idakhala ife pabodzi na iye. Pyenepi ndi pinthu pinafunika ife kukoya m’manyerezero.
Ncenjezi 07.23. tsa. 9-10 ndima 10-11
Pitirizani Kufuna Yahova na Anango
10 Ife tisasakambo njira toera kuphedza abale na alongo athu. (Aheb. 13:16) Onani pidacitikira mulongo Anna adalongwa mu nsolo udamala. Pidamala kucitika condzi cikulu, iye na mamunace aenda kaona banja ibodzi yakuti ndi Mboni za Yahova, pontho agumana kuti ntsoi ya nyumba ya banja ineyi yafudzika. Na thangwi ineyi, banja ineyi nee ikhali na nguwo zakucena toera kubvala. Anna alonga: “Ife takwata nguwo zawo mbatizifula, pontho pidamala ife kuzipasari tazifunya mbatienda kaapasa. Kuna ife, pyenepi pikhali pinthu pyakucepa, mbwenye pyaticitisa kukhala na uxamwali wa ponda ndipondembo mpaka lero.” Ufuni wa Anna na mamunace kuna abale na alongo waacitisa toera kuphedza anango.—1 Juw. 3:17, 18.
11 Tingapangiza kukoma ntima na ufuni kuna anango, iwo anakwanisa kuona kuti tisawangisira toera kutowezera Yahova. Pontho panango iwo anapereka takhuta kakamwe thangwi ya pinthu pinaacitira ife. Khanh adalongwa mu ndima 8 asakumbuka ciphedzo cidapaswa iye. Iye alonga: “Ine ndisapereka takhuta kakamwe kuna alongo onsene akhaenda pabodzi na ine m’basa ya m’munda. Iwo akhabwera kudzandikwata panyumba panga, akhandicemera toera kudya pabodzi na iwo, pontho akhandiphedza toera ndifike kunyumba mwakutsidzikizika. Cincino ndisaona kuti iwo akhawangisira kakamwe toera kucita pyenepi. Pontho iwo akhacita pyenepi mwaufuni.” Mwandimomwene, anthu anango nee anapereka takhuta thangwi ya pinthu pinaacitira ife. Khanh alonga tenepa thangwi ya ale adamphedza: “Ine ndisafuna kakamwe kucita pinthu pyadidi kuna ale onsene adandicitira pinthu pyadidi, mbwenye nee ndisadziwa kunakhala iwo onsene. Ngakhale tenepo Yahova asadziwa kunakhala iwo, pontho ndisacita phembero toera iye aapase nkhombo thangwi ya pinthu pyadidi pidandicitira iwo.” Pidalonga Khanh ndi pyandimomwene thangwi Yahova asaona ngakhale pinthu pyakucepa pinacitira ife anango. Iye asaona pyenepi ninga ntsembe yadidi kakamwe, pontho ninga mangawa akuti iye anadzaalipa.—Lerini Misangani 19:17.
Ncenjezi 11.21 tsa. 9 ndima 6-7
Pitirizani Kupangiza Ufuni Wakukhonda Mala Kuna Unango na Ndzace
6 Lero, ife tingaona munthu wakuti aphata basa pyaka pizinji mu empreza ibodzi ene, tinakwanisa kulonga kuti munthu unoyu ndi wakukhulupirika mu empreza ineyi. Maseze iye aphata basa mu pyaka pizinji mu empreza ineyi, panango iye cipo aonana na anaciro a empreza ineyi. Pontho panango iye ndzidzi onsene nee asakomerwa na mitemo inakhazikiswa mu empreza ineyi. Maseze iye nee asakomerwa na empreza ineyi, iye asapitiriza kuphata basa penepo thangwi asafuna kuwina kobiri. Iye anapitiriza kuphata basa ineyi mpaka ndzidzi unafuna kupaswa iye phanceni, kusiyapo khala iye agumana basa inango yadidi kumbuto inango.
7 Ninga pidaona ife mu ndima 6, kusiyana kwa ufuni wakukhonda mala na kukhulupirika ndi mathangwi anacitisa munthu kupangiza makhaliro anewa. Ninji pikhacitisa atumiki a Mulungu kupangiza ufuni wakukhonda mala mu ndzidzi wakale? Ale adapangiza ufuni wakukhonda mala apangiza n’khaliro unoyu, tayu thangwi yakukakamizwa, mbwenye acita pyenepi mwakufuna kwawo. Tendeni tione citsandzo ca Dhavidhi. Ntima wace wankulumiza toera kupangiza ufuni wakukhonda mala kuna xamwali wace Yonatani, maseze babace Yonatani akhafuna kupha Dhavidhi. Pidafa Yonatani, Dhavidhi apitiriza kupangiza ufuni wakukhonda mala kuna Mefibhoseti wakuti akhali mwana wa Yonatani.—1 Sam. 20:9, 14, 15; 2 Sam. 4:4; 8:15; 9:1, 6, 7.
Mpfuma Zauzimu
Sentinela 15/05/87 tsa. 29
Gopani Yahova Toera Mukhale Wakutsandzaya
Anthu akutcerenga ndi a Mulungu, pontho tingaacitira pinthu tinakhala ninga tiri kucitira Mulungu. (Misangani 14:31) Tingacitira pinthu pyadidi anyakutcerenga thangwi ya kuafuna mbatikhonda dikhira kupaswa cinthu, Yahova asaona ninga tiri kumbwerekesa, pontho anatipasa nkhombo.—Luka 14:12-14.
SUMANA 30 YA JUNHO–6 YA JULHO
MPFUMA ZA MAFALA A MULUNGU
Pinafunika Imwe Kucita Toera Kubanyirana Kwanu Kufambe Mwadidi
Ncenjezi 05.24 tsa. 26-27 ndima 3-4
Munabanyirana Tani Munjira Inapasa Mbiri Yahova?
3 Ndzidzi wa kubanyirana unakwanisa kukhala wakutsandzayisa kakamwe, pontho ndi thanyo yakufunika kakamwe toera kumanga banja. Pa ntsiku yakumanga banja, mamuna na nkazi asapikira pamaso pa Yahova kuti iwo anafunana na kulemedzana mu umaso wawo onsene. Mbatidzati kucita pikiro, tisafunika kunyerezera mwadidi. (Lerini Misangani 20:25.) Pyenepi pisaphatanizambo pikiro yakumanga banja. Cifuniro ca kubanyirana ndi toera mamuna na nkazi adziwane mwadidi mbacita cisankhulo cadidi. Kazinji kene cisankhulo cisakhala ca kumanga banja. Mbwenye midzidzi inango cisankhulo cisakhala ca kusiya kubanyirana. Khala m’bale na mulongo anabanyirana asankhula kusiya kubanyirana, pyenepi nee pisabveka kuti kubanyirana kwawo nee kwafamba mwadidi. Thangwi cifuniro ca kubanyirana ndi toera ale anabanyirana akwanise kucita cisankhulo cadidi.
4 Thangwi yanji ndi pyakufunika kudziwa mwadidi cifuniro ca kubanyirana? Munthu wakukhonda manga banja angakhala na maonero akulinganira, nee anatoma kubanyirana na munthu khala nee ali na cifuno cakumanga banja. Mbwenye nee ndi anthu akukhonda manga banja basi asafunika kukhala na maonero akulinganira. Tonsene tisafunika kukumbuka cifuniro ca kubanyirana. Mwacitsandzo, anango panango ananyerezera kuti khala m’bale na mulongo ali kubanyirana iwo asafunika kumanga banja. Kodi pyenepi pisakhuya tani abale na alongo akukhonda manga banja? Melissa, mulongo wakukhonda manga banja wa ku Estados Unidos, alonga: “M’bale na mulongo angabanyirana, abale na alongo anango asadikhira kuti iwo amange banja. Na thangwi ineyi, ale anabanyirana asacalira kumalisa kubanyirana maseze pinthu nee piri mwadidi. Natenepa abale na alongo anango akukhonda manga banja asacalira kubanyirana. Pyenepi pinakwanisa kutsukwalisa kakamwe.”
Ncenjezi 05.24 tsa. 22 ndima 8
Munagumana Tani Munthu Wadidi Toera Kumanga Naye Banja?
8 Mphapo munakwanisa tani kuona makhaliro a munthu, iye mbakhonda kudzindikira? Imwe munakwanisa kucita pyenepi pa misonkhano ya mpingo peno mungakhala pabodzi na axamwali anu. Mu ndzidzi unoyu, imwe munakhala na mwai wakuona makhaliro ace, uzimu wace na njira inacita iye pinthu. Bvundzikani: Ndi api axamwali ace? Ndi makani api anacedza iye? (Luka 6:45) Kodi pifuno pyathu ndi pibodzi pyene? Imwe munakwanisa kulonga thangwi ya munthu unoyu na akulu a mpingo a mu mpingo wace peno Nkristu unango wakukola mwauzimu wakuti asan’dziwa mwadidi. (Mis. 20:18) Imwe munakwanisambo kubvundza anthu anango kuti iye asadziwika tani, pontho ndi api makhaliro ace. (Rute 2:11) Mu ndzidzi unaona imwe makhaliro a munthu unoyu, citani mphole-mphole toera mukhonde kukhala dhuzi na iye ndzidzi onsene mbamuyesera kudziwa pinthu pyonsene thangwi ya iye. Lemedzani mabvero ace.
Ncenjezi 05.24 tsa. 28 ndima 7-8
Munabanyirana Tani Munjira Inapasa Mbiri Yahova?
7 Mphapo munadziwa tani mwadidi ndzanu anabanyirana na imwe? Munakwanisa kuncita mibvundzo na kumbvesera mwadidi mu ndzidzi unalonga iye. (Mis. 20:5; Tiya. 1:19) Toera kucita pyenepi, panango musafunika kucita pinthu pinango pabodzi toera mukhale na mwai wakucedza. Mwacitsandzo, midzidzi inango munakwanisa kudya pabodzi, kupaseari pabodzi m’mbuto zakuti munakwanisa kuoniwa na anthu anango, peno kubuluka pabodzi mu utumiki. Imwe munakwanisambo kudziwana mwadidi mungacedza pabodzi na axamwali anu na acibale anu. Yeserani kucita pinthu pinango pyakuti pinapasa mwai ule anabanyirana na imwe toera kupangiza makhaliro ace kuna anthu akusiyana-siyana. Onani pidacita m’bale Aschwin wa ku Países Baixos mu ndzidzi ukhabanyirana iye na mulongo Alicia. Iye alonga: “Ife tasankhula kucita mabasa anango pabodzi toera tikwanise kudziwana mwadidi. Midzidzi inango, pinthu pyenepi pikhali pyakucepa kakamwe ninga kuphika pabodzi na kucita mabasa anango a panyumba. Kucita pyenepi kwatiphedza toera kuona makhaliro adidi na madodo a unango na ndzace.”
8 Imwe munadziwanambo mwadidi mungapfundza Bhibhlya pabodzi. Thangwi mungamanga banja, munafunika kucita kulambira kwa banja, toera kupangiza kuti Mulungu ndi wakufunika kakamwe m’banja mwanu. (Ekle. 4:12) Na thangwi ineyi, ndi pyakufunika kakamwe kupfundza pabodzi Bhibhlya mu ndzidzi unabanyirana imwe. Ndimomwene kuti m’bale na mulongo anabanyirana nee ndi banja, pontho m’bale nee ndi nsolo wa mulongo anabanyirana na iye. Ngakhale tenepo, kupfundza pabodzi kunakuphedzani toera kudziwa pinanyerezera unango thangwi ya Yahova. Max na Laysa, banja ya ku Estados Unidos, yaona cinthu cinango cadidi cinacitika thangwi ya kupfundza pabodzi. Max alonga: “Kutomera mu ndzidzi udatoma ife kubanyirana, tikhapfundza mabukhu athu analonga pya kubanyirana, kumanga banja na umaso wa m’banja. Kupfundza mabukhu anewa kwatiphedza toera kucedza pinthu pyakufunika kakamwe pyakuti panango mbapidakhala pyakunentsa toera kupicedza.”
Mpfuma Zauzimu
Ncenjezi 03.16 tsa. 5 ndima 4-5
Aphale Na Atsikana—Muli Dzololo Toera Kubatizwa?
4 Bhibhlya nee isapangiza thunga isafunika kukhala na munthu anafuna kubatizwa. Lemba ya Misangani 20:11 isalonga: ‘Mwana wang’ono asapangiza na macitiro kuti makhaliro ace ndi akulungama na adidi.’ Mwana anakwanisa kudziwa kuti pisabvekanji kucita pinthu pyadidi na kuperekeka kwa Yahova. Natenepa, kubatizwa ndi thanyo yakufunika kakamwe kwa aphale na atsikana akuti ndi akukola, pontho aperekeka kwa Yahova.—Mis. 20:7.
5 Kodi kukola kusabvekanji? Kukola kusabveka pizinji kupiringana thunga ya munthu. Bhibhlya isalonga kuti anthu akukola asapfundzisa mphambvu za ‘ndzeru zawo toera kusiyanisa cadidi na cakuipa.’ (Aheb. 5:14) Natenepa, munthu wakukola asadziwa cinthu cinakomerwa na Yahova mbatonga muntima mwace toera kucita cinthu ceneci. Iye nkhabe kukwatika mwakucimbiza mbacita cinthu cakuipa. Pontho iye nkhabe dikhira kupangwa na munthu ndzidzi onsene toera kucita cinthu cadidi. Mphapo mphyakulinganira kudikhira kuti m’phale peno ntsikana wakubatizwa anadzacita pinthu pyadidi, maseze anyakubalace peno anthu anango akulu nee ali cifupi na iye.—Landanisani na Afilipi 2:12.