Mareferensya a Umaso Wathu Wacikristu na Utumiki — BHIBHLIYOTEKA MU INTERNETI ya Torre de Vigia

Mareferensya a Umaso Wathu Wacikristu na Utumiki

SUMANA 1-7 YA SETEMBRO

MPFUMA ZA MAFALA A MULUNGU MISANGANI 29

Calirani Misambo Yakuti Nee Isabverana na Pinalonga Bhibhlya

Kutsandzaya—Ndi n’Khaliro Wakubuluka Kwa Mulungu

Cinthu cinango cinafuna kutiphedza toera kutsandzaya kakamwe ndi kukhala akuphatika na pinthu pinakomeresa Yahova. (Masalmo 35:27; 112:1) Thangwi yanji? Bhibhlya isalonga kuti ife tacitwa toera ‘kugopa Mulungu wandimomwene na kubvera matongero ace, thangwi munthu onsene asatongwa kucita pyenepi.’ (Koelete 12:13) Ife tacitwa toera kucita cifuno ca Mulungu. Natenepa tingatumikira Yahova, tinakhala akutsandzaya kakamwe.—Onani cidzindikiro capantsi.

Ncenjezi 04.19 tsa. 17 ndima 13

Tsidzikizani Undimomwene Unalonga Thangwi Ya Anyakufa

Khala iripo misambo inango yakuti nee muli na cinyindiro cakuti isakomeresa Yahova, citani phembero kuna Yahova toera akupaseni udziwisi. (Lerini Tiyago 1:5.) Buluka penepo fufudzani toera muone kuti mabukhu athu asalonganji thangwi ya pyenepi. Pingakhala pyakufunika, bvundzani akulu a mpingo. Iwo nee anakupangani pinafunika imwe kucita, mbwenye anakuphedzani kukumbuka uphungu wa m’Bhibhlya ninga udapfundza ife nduli. Mungacita pyenepi munapfundzisa ‘luso yanu yakudzindikira,’ pontho munakwanisa “kusiyanisa cinthu cadidi na cakuipa.”—Aheb. 5:14.

Ncenjezi 11.18 tsa. 13 ndima 12

‘Ndinafamba mu Undimomwene Wanu’

Misambo na macitiro akuti nee asakomeresa Mulungu. Acibale athu, andzathu akubasa na akuxikola, panango anayesera kutikulumiza toera ticite nawo pabodzi maphwando awo. Ninji pinafuna kutiphedza toera tikhonde kucita misambo na mafiriyadu akuti nee asakomeresa Yahova? Tisafunika kupitiriza kukumbuka kuti thangwi yanji Yahova nee asakomerwa na mafiriyadu anewa. Tinakwanisa kusaka mphangwa m’mabukhu athu toera kubvesesa kuti mafiriyadu anewa atoma tani. Tinganyerezera mwacidikhodikho mathangwi a Bhibhlya anaticitisa kukhonda kucita khundu m’mafiriyadu anewa, tinakhala na cinyindiro cakuti tikufamba munjira ‘inakomerwa na Mbuya.’ (Aefesi 5:10) Tinganyindira Yahova na Mafalace, nee tinagopa pinanyerezera anthu anango.—Misangani 29:25.

Mpfuma Zauzimu

Ncenjezi 10.17 tsa. 6 ndima 11

‘Pangizani Ufuni Wandimomwene Kubulukira M’macitiro Anu’

Simbani anango na ntima onsene. Sakani mwai toera kusimba anango. Tonsene tisadziwa kuti kusimba ndi kwadidi toera kuwangisana unango na ndzace. (Aefesi 4:29) Mbwenye tisafunika kukhala na cinyindiro cakuti pinalonga ife pisabulukira muntima, tayu kunyengeza anango. Ife nee tisafunika kusimba munthu mwaciphamaso basi ene toera kucalira kumpasa uphungu. (Misangani 29:5) Ife tinakhala ampfakafaka tingasimba anango buluka penepo mbatitoma kualonga mwakuipa. Ufuni wa mpostolo Paulu ukhali wandimomwene. Pidalembera iye Akristu a ku Korinto, aasimba thangwi ya pinthu pyadidi pidacita iwo. (1 Akorinto 11:2) Mbwenye mu ndzidzi ukhafuna iwo uphungu, iye afokotoza mathangwi ace mwakukoma ntima na mwakubveka mwadidi.—1 Akorinto 11:20-22.

SUMANA 8-14 YA SETEMBRO

MPFUMA ZA MAFALA A MULUNGU MISANGANI 30

“Lekani Kundipasa Utcerengi Nee Mpfuma”

Ncenjezi 01.18 tsa. 24-25 ndima 10-12

Ndi Ntundu Upi wa Ufuni Usabweresa Kutsandzaya Kwandimomwene?

Mwandimomwene, tonsene tisafuna kobiri. Iyo isatitsidzikiza. (Koelete 7:12) Kodi tinakwanisa kukhala wakutsandzaya tingakhonda kukhala na kobiri izinji? Inde! (Lerini Koelete 5:12, Tradução do Novo Mundo.) Aguri, mwana wa Yake alemba: ‘Lekani kundipasa upfumi nee utcerengi, ndipaseni basi ene cakudya cinafunika ine kudya.’ Ndi pyakukhonda nentsa kubvesesa kuti thangwi yanji Salomoni nee akhafuna kukhala ntcerengi kakamwe. Iye alonga kuti nee akhafuna kuyeserwa toera kuba, thangwi Mulungu asaida kuba. Mphapo thangwi yanji nee akhafuna kukhala na mpfuma? Iye alemba: ‘Gopa ndingakhuta ndinakukhondani mbandilonga: ‘Yahova mbani?’’ (Misangani 30:8, 9) Mwakutsukwalisa, anthu anango asanyindira mpfuma m’mbuto mwakunyindira Mulungu.

Munthu anafuna kakamwe kobiri nee anakwanisa kukomeresa Mulungu. Yezu alonga: ‘Nkhabepo munthu anakwanisa kuphatira basa ambuya awiri, thangwi anadzaida m’bodzi mbafuna unango, peno anadzabvera m’bodzi mbapwaza unango. Munacimwana kukhala atumiki a Mulungu na a Mpfuma.’ Mbadzati kulonga pyenepi, Yezu apereka uphungu uyu: ‘Lekani kukoya mpfuma zanu pa dziko yapantsi, thangwi zinadyiwa na maberethe na furuju, pontho zinabiwa na mambava. Koyani mpfuma zanu kudzulu, thangwi nee zinadyiwa na maberethe peno furuju, pontho nee zinabiwa na mambava.’—Mateo 6:19, 20, 24.

Atumiki azinji a Yahova asayesera kukhala na umaso wakukhonda funa pinthu pizinji. Iwo asadziwa kuti kuphatisira ndzidzi wawo uzinji toera kutumikira Yahova kusaatsandzayisa. Jack, anakhala ku Estados Unidos agulisa nyumba yace ikulu na malonda ace toera kutumikira ninga mpainiya pabodzi na nkazace. Jack alonga: “Pikhali pyakunentsa kugulisa nyumba yathu yakubalika kakamwe na kintalo ikulu. Pontho mu pyaka pizinji ine ndikhafika panyumba wakutsukwala thangwi ya nyatwa za kubasa. Mbwenye nkazanga, wakuti akhatumikira ninga mpainiya, ndzidzi onsene akhali wakutsandzaya. Iye alonga: ‘Ndiri na patrau wadidi kakamwe kupiringana onsene!’ Cincino ndisatumikirambo ninga mpainiya, uwiri wathu tisaphatira basa Munthu m’bodzi ene, Yahova.”

Ncenjezi 05.17 tsa. 25-26 ndima 15-17

Usandifuna Kakamwe Kupiringana Ntsomba Izi?

Anthu azinji lero asapibva kuti asafunika kukhala na nguwo zipswa, mitokodzi, mitcini ya ndzeru na pinthu pinango. Iwo asaona kuti kukhala na mpfuma, kobiri ndi pinthu pyakufunika kakamwe kupiringana pyonsene. Ninga Nkristu, ndi cinthu cipi cakufunika kakamwe kwa imwe? Bvundzikani: ‘Ndisamala ndzidzi uzinji mbindinyerezera kukhala na motokala upswa m’mbuto mwa kukhunganyika misonkhano ya mpingo? Kodi ndisaphatika na mabasa akudziko ntsiku yamumphu mbandisowa ndzidzi wakucita phembero na kuleri Bhibhlya?’ Tingakhonda kucita gaxugaxu, tinatoma kufuna kakamwe pinthu pyakumanungo kupiringana kufuna Kristu. Tisafunika kukumbuka mafala a Yezu: ‘Cenjerani mbamuleka kusirira upfumi.’ (Luka 12:15) Thangwi yanji iye alonga pyenepi?

Yezu alonga kuti ‘nkhabepo munthu anakwanisa kuphatira basa ambuya awiri.’ Iye athimiza: ‘Imwe nkhabe kwanisa kutumikira Mulungu na Mpfuma.’ Nkhabe kwanisika kutumikira Yahova na ntima onsene, mu ndzidzi ubodzi ene mbitifuna kakamwe pinthu pyakumanungo. Yezu afokotoza kuti ‘tinadzaida m’bodzi mbitifuna unango’ peno ‘tinadzabvera m’bodzi mbitipwaza unango.’ (Mateo 6:24) Nakuti ndife akusowa ungwiro, tisafunika kupitiriza kuthimbana na ‘pinasirira manungo athu,’ kuphatanizambo mpfuma.—Aefesi 2:3.

Anthu azinji asafuna kakamwe pinasirira iwo na ubalangazi, pinthu pyakuti pisaapingiza toera kukhala na maonero akulinganira thangwi ya pyenepi. (Lerini 1 Akorinto 2:14.) Nakuti iwo nee asanyerezera mwadidi, pisakhala pyakunentsa kwa iwo kusiyanisa cadidi na cakuipa. (Ahebere 5:11-14) Kusirira kwawo pinthu pyakumanungo kusathimizirika kakamwe. Pontho angakwanisa pinafuna iwo, asafuna pinango. (Koelete 5:10) Mbwenye pana cinthu cakuti tinakwanisa kucicita toera kuthimbana na manyerezero anewa. Kuleri Mafala a Mulungu ntsiku zonsene kunadzatiphedza toera kukunda manyerezero akufuna mpfuma. (1 Pedro 2:2) Yezu akhanyerezera mwacidikhodikho udziwisi wa Yahova na pyenepi pyamphedza toera kukunda mayesero a Dyabo. (Mateo 4:8-10) Lero, khala tisafunambo kukunda manyerezero akufuna mpfuma, tisafunika kuphatisira udziwisi wa Yahova mu umaso wathu. Pyenepi pinadzapangiza kuti tisafuna kakamwe Yezu kupiringana pinthu pyakumanungo.

Sentinela 1/6/11 tsa. 10 ndima 3

Tinakwanisa Tani Kugula Pinthu Mwakubverana na Kobiri Iri na Ife?

Koyani kobiri pang’ono-pang’ono mbamudzati gula cinthu. Maseze pioneke ninga ndi pyakale kakamwe, kukoya kobiri pang’ono-pang’ono kunatiphedza kakamwe toera kucalira nyatwa yakusowa kobiri. Thangwi yakucita pyenepi, azinji asacalira mangawa anafunika kulipwa na juru akuti asacitisa kulipa kobiri izinji kupiringana kobiri ikhafuna iwo kuphatisira toera kugula pinthu pyenepi. Bhibhlya isalonga kuti nyerere ndi ‘zaudziwisi’ thangwi ‘zisagumanya cakudya mu ndzidzi unabvuna anthu’ toera kuciphatisira ntsogolo.—Misangani 6:6-8; 30:24, 25.

Ncenjezi 06.24 tsa. 13 ndima 18

Khalani Mulendo wa Yahova Kwenda na Kwenda!

Tisafunika kunyerezera maonero ali na ife thangwi ya kobiri. Natenepa, bvundzikani: ‘Kodi ndzidzi onsene ndisanyerezera kobiri na pinthu pyakuti ndinakwanisa kupigula? Ndingafiyari kobiri, kodi ndisadembuka kuibwezera mbandinyerezera kuti munthu adafiyari ine nee asaifuna cincino? Kodi ndisapibva kuti ndine wakufunika kakamwe kupiringana anango basi ene thangwi ndiri na kobiri izinji? Ndisanentseka toera kupasa anango mwakudzala manja? Ndisanyerezera kuti munthu asafuna kakamwe pinthu pyakumanungo basi ene thangwi iye ali na kobiri? Ndisacita uxamwali basi ene na anthu akupfuma mbandisiya kucita uxamwali na anthu akutcerenga?’ Tonsene tiri na mwai ukulu wakukhala alendo a Yahova. Mbwenye tingafuna kupitiriza kukhala alendo ace, tisafunika kucita mphole-mphole toera tikhonde kufuna kakamwe kobiri. Tingacita pyenepi, Yahova cipo anatisiya!—Lerini Ahebheri 13:5.

Mpfuma Zauzimu

Sentinela 15/4/09 tsa. 17 ndima 11-13

Pinthu Pidacita Yahova Pisapangiza Udziwisi Wace

Prokaviya ndi cinyama cinango cing’ono cakuti cisatipfundzisa pinthu pyakufunika kakamwe. (Lerini Misangani 30:26.) Cinyama ceneci calandana na sulo, mbwenye makutu ace ndi akubvira na akuzungulira, pontho miyendo yace ndi yakubvira. Cinyama ceneci cing’ono cisakhala m’mbuto za m’mphako. Maso ace asaona mwadidi kakamwe, pontho asam’phedza toera kuona anyamalwa mwakucimbiza. Prokaviya acitwa toera akhale m’mbuto zakuti muli na maprokaviya anango, pyakuti pisamphedza toera kupisirwa mu ndzidzi wakuthondola.

Tisapfundzanji na cinyama ceneci? Cakutoma, cinyama ceneci cisakhala cakunentsa toera kuphatwa na pinyama pinango. Ico cisaona anyamalwa ace na kutali, pontho cisakhala dhuzi na djenje peno mphako. Pyenepi pisamphedza toera kupulumuka. Ifembo tisafunika kukhala akuwanga mwauzimu toera tikwanise kuona misampha ya dziko ino ya Sathani. Mpostolo Pedhru apanga Akristu: “Khalani andzeru, pontho khalani akuyangʼanira! Nyamalwa wanu Dyabo asafamba-famba ninga nkhalamu yakulira, inasaka munthu toera kumudya.” (1 Ped. 5:8) Pikhali Yezu pa dziko yapantsi, ndzidzi onsene akhali m’maso toera akhonde kugwa m’misampha ya Sathani mbasiya kukhala wakukhulupirika kuna Yahova. (Mat. 4:1-11) Ife tisafunika kutowezera pidacita iye.

Toera tikhonde kugwa m’misampha ya Sathani tisafunika kutawira citsidzikizo cinatipasa Yahova. Ife nee tisafunika kusiya kupfundza Mafala a Mulungu na kugumanika pa misonkhano Yacikristu. (Luka 4:4; Aheb. 10:24, 25) Kusiyapo pyenepi, ninga prokaviya asakula mwadidi angakhala pabodzi na maprokaviya anango, ifembo tisafunikambo kukhala na uxamwali wakuwanga na abale na alongo athu toera “tiwangisane.” (Aroma 1:12) Tingatawira kutsidzikidzwa na Yahova, tiri kucita pidalonga Nyamasalmo Dhavidhi kuti “Yahova ndi mwala wanga, citsidzikizo canga na mpulumusi wanga. Mulungu ndi mwala wanga, kule kunathawira ine.”—Mas. 18:2.

SUMANA 15-21 YA SETEMBRO

MPFUMA ZA MAFALA A MULUNGU MISANGANI 31

Tisapfundzanji na Uphungu Udapereka Mama Kuna Mwanace?

Sentinela 1/2/11 tsa. 19 ndima 7-8

Pfundzisani Ananu Makhaliro Adidi

Pfundzisani ananu undimomwene onsene unalonga pyakupita m’mabonde. Ndi pyakufunika kakamwe kuacenjeza. (1 Akorinto 6:18; Tiyago 1:14, 15) Mbwenye Bhibhlya isalonga kuti kupita m’mabonde ndi muoni wa Mulungu, tayu nsampha wa Sathani. (Misangani 5:18, 19; Nyimbo ya Salomoni 1:2) Kupanga ana basi ene ngozwi zakupita m’mabonde kunaacitisa kukhala na maonero akuphonyeka thangwi ya pyenepi. Ntsikana unango anacemerwa Corrina, wa ku França alonga: “Anyakubalanga akhalonga kakamwe pya ulukwali, pontho pyenepi pyandicitisa kukhala na maonero akuphonyeka thangwi yakupita m’mabonde.”

Onesesani mwadidi khala mwananu asadziwa undimomwene onsene unalonga pyakupita m’mabonde. Nkazi unango anacemerwa Nadia anakhala ku Mexiko alonga: “Ndzidzi onsene ndisawangisira kupanga ananga kuti kupita m’mabonde ndi cinthu cadidi cidapasa Yahova anthu toera akhale akutsandzaya. Mbwenye basi ene anyakumanga banja ndiwo asafunika kupita m’mabonde. Ndaapangambo kuti iwo anatsandzaya angabvera pitsogolero pya Yahova, peno anathimbana na nyatwa angakhonda kubvera.

Ajuda Para a Família nsolo 4 ndima 11-13

Kulonga na Ana Thangwi Ya Pyakumwa Pyakuledzeresa

Cedzani na ananu thangwi ya pyakumwa pyakuledzeresa. Mark wa ku Grã-Bretanha alonga: “Aphale na atsikana nee asabvesesa mwadidi pya kuphatisira pyakumwa pyakuledzeresa.” Ndabvundzisa mwananga wa pyaka 8 khala kumwa ndi kwakuipa peno nkhabe. Ine ndalonga pyenepi munjira yadidi na mwauxamwali, pontho pyenepi pyamphedza toera kulonga mabvero ace mwakusudzuka.

Imwe munakhuya mitima ya ananu mungacedza m’midzidzi yakusiyana-siyana thangwi yakumwa. Mwakubverana na thunga ya mwananu, cedzani thangwi ya pyakumwa pyakuledzeresa kuphatanizambo pinthu pinango pyakuti pinamphedza, ninga kunumpha miseu na pya kupita m’mabonde.

Khalani citsandzo cadidi kuna ananu. Ana asatowezera pyonsene pinaona iwo, pontho anyakufufudza alongambo kuti ana asatowezera kakamwe pinacita anyakubala awo. Pyenepi pisabveka kuti khala imwe musamwa pyakumwa pyakuledzeresa toera kumalisa kutsukwala, mwananu anaona kuti pyakumwa pyakuledzeresa pinamphedza toera kumalisa kutsukwala. Natenepa, khalani citsandzo cadidi kuna ananu, pontho phatisirani mwadidi pyakumwa pyakuledzeresa.

Despertai! 06.17 tsa. 9 ndima 5

Pfundzisani Mwananu Toera Akhale Wakucepeseka

Phedzani mwananu toera akhale wakupasa mwakudzala manja. Pangizani mwananu kuti “kupasa kusatsandzayisa kakamwe kupiringana kutambira.” (Mabasa 20:35) Munacita tani pyenepi? Lembani pabodzi na mwananu madzina a anthu anafuna ciphedzo. Panango anthu anango anadziwa imwe anafuna ciphedzo toera kugula pinthu, kusasanyira pinthu peno aende mbuto zinango. Ndokoni pabodzi na mwananu pa kuenda kaphedza anthu anewa. Pangizani mwananu kutsandzaya kunakhala na imwe mungaphedza munthu. Mungacita pyenepi munaphedza mwananu toera akhale wakucepeseka.

Mpfuma Zauzimu

Ncenjezi 01.25 tsa. 13 ndima 16

Amuna Anapangiza Tani Kuti Asafuna Akazawo na Kualemedza?

Pangani nkazanu kuti ndi wakufunika kakamwe kuna imwe. Mamuna analemedza nkazace asalonga pinthu pyakuwangisa kuna nkazace. Mwacitsanzo, iye asapereka takhuta kuna nkazace thangwi ya pyonsene pinacita iye toera kumphedzera. (Akol. 3:15) Mamuna angasimba nkazace, mbampanga kuti thangwi yanji asanfuna, nkazi asapibva kuti ali wakutsidzikizika, asafuniwa, pontho asalemedzwa.—Mis. 31:28.

SUMANA 22-28 YA SETEMBRO

MPFUMA ZA MAFALA A MULUNGU EKLEZIASTE 1-2

Pitirizani Kupfundzisa Ubalwi Unafuna Kudza

Ncenjezi 01.17 tsa. 27-28 ndima 3-4

“Pinthu Pyenepi Upipfundzise Amuna Akukhulupirika”

Ife tisafuna kutumikira Yahova na kulemedza mabasa athu. Azinji a ife tisakomerwa kakamwe na basa, natenepa tisafuna kupitiriza na basa ineyi. Mbwenye mwakutsukwalisa, anthu angagwesera nee asakwanisabve kucita pikhacita iwo mbali aphale peno atsikana. (Koelete 1:4) Pyenepi pisapingiza kakamwe atumiki a Yahova. Lero, basa yakumwaza mphangwa ikuthambaruka kakamwe, pontho gulu ya Yahova isaphatisira njira zipswa toera mphangwa zadidi zifike kwa anthu azinji. Mbwenye midzidzi inango pisakhala pyakunentsa kakamwe kwa akugwesera kupfundza njira zenezi. (Luka 5:39) Pontho, mphyacibaliro kwa anthu kusowa mphambvu mu ndzidzi wakugwesera. (Misangani 20:29) Natenepa, ndi ufuni pontho mphyakuphedza abale akugwesera angapfundzisa aphale toera kutsalakana mabasa mazinji mu gulu ya Yahova.—Lerini Masalmo 71:18.

Kazinji kene pisakhala pyakunentsa kwa abale apidzo kupasa aphale mabasa anacita iwo. Panango ndi thangwi yakuti iwo nee asafuna kusiya basa yakuti asaifuna kakamwe. Anango asanyerezera kuti mabasa anewa nee anacitwa mwadidi ninga munafunira iwo. Anangombo asaona kuti nkhabe ndzidzi toera kupfundzisa anango. Munjira inango, aphale asafunika kupirira angakhonda kupaswa mabasa mazinji.

Mpfuma Zauzimu

Ncenjezi 12.18 tsa. 18 ndima 14

Aphale na Atsikana, Yahova Asafuna Kuti Mukhale Akutsandzaya

Salomoni akhali wamphambvu na wakupfuma kakamwe kupiringana anthu a mu ndzidzi wace. Iye alonga: ‘Ndinayesera pinthu pyakutsandzayisa toera ndione kuti ndinawinanji napyo.’ (Koelete 2:1-10) Buluka penepo Salomoni amanga nyumba zakubalika kakamwe, acita minda ya maluwa yakubalika na acita pyonsene pikhafuna iye. Kodi iye akhala wakutsandzaya? Nkhabe. Mafala adalonga iye pakumala kucita pyonsene asapangiza pyenepi. Iye alonga: “Pyonsene mphyapezi.” Buluka penepo iye athimiza: ‘Pyonsene pikhali pyakusowa basa.’ (Koelete 2:11) Tapfundzanji thangwi ya pidacitikira Salomoni?

SUMANA 29 YA SETEMBRO–5 YA OUTUBRO

MPFUMA ZA MAFALA A MULUNGU EKLEZIASTE 3-4

Anyakumanga Banja, Wangisani Uxamwali Wanu na Ndzanu wa m’Banja, Pontho na Yahova

Banja Yakutsandzaya khundu 2 khundu 1

Khalani Wakukhulupirika kwa Unango na Ndzace

BHIBHLYA ISALONGANJI: ‘Sakani kudzindikira pinthu pyakufunika kakamwe.’ (Afilipi 1:10) Banja yanu ndi ibodzi mwa pyakufunika kakamwe mu umaso wanu. Iyo ndi yakuthema kuikhwa pa mbuto yakutoma

Yahova asafuna kuti muikhe manyerezero kwa ndzanu wa m’banja na ‘kutsandzaya na umaso’ pabodzi. (Koelete 9:9) Iye asabvekesa pyenepi pakweca kuti nee musafunika kupwaza ndzanu wa m’banja, mbwenye asafuna kuti uwiri wanu musake njira zakutsandzayisana unango na ndzace. (1 Akorinto 10:24) Citisani ndzanu wa m’banja kupibva kuti ndi wakufunika, pontho musampasa ntengo.

Dziwani kuti kukhala kwanu pabodzi mu ndzidzi uzinji, musaikha manyerezero kwa ndzanu wa m’banja

Phatisirani mafala akuti “ife” mbuto mwa “ine”

Ncenjezi 05.23 tsa. 23-24 ndima 12-14

Pitirizani Kugasa “Lirimi ya Moto wa Yah”

Anyakumanga banja anatowezera tani citsandzo ca Akila na Prisila? Nyerezerani pinthu pizinji pyakuti imwe na ndzanu wa m’banja musafunika kupicita. Kodi imwe munakwanisa kucita pinthu pyenepi pabodzi m’mbuto mwakucita mwekha? Mwacitsandzo, Akila na Prisila akhamwaza mphangwa pabodzi. Kodi imwe musacita masasanyiro toera kucitambo pyenepi kazinji kene? Akila na Prisila akhaphatambo basa pabodzi. Panango imwe na ndzanu wa m’banja nee musaphata basa ibodzi ene, mbwenye munakwanisa kucita pabodzi mabasa a panyumba. (Ekle. 4:9) Mungaphedzana, imwe munapibva kuti mukuphata basa pabodzi, pontho munakhala na mwai wakucedza. Robert na Linda ali pabodzi ninga banja mu pyaka pyakupiringana 50. Robert alonga: “Mwandimomwene, ife nee tiri na ndzidzi uzinji toera kucita ubalangazi pabodzi. Mbwenye ndingatsuka maparato pabodzi na nkazanga, peno ndingatsalakana jardim, nkazanga mbabwera kudzandiphedza ndisakhala wakutsandzaya. Kucita pinthu pabodzi kusatiphedza toera kukhala akuphatana, pontho ufuni wathu usakhala wakuwanga.”

Kumbukani kuti basi ene kukhala pabodzi nee kunacitisa anyakumanga banja kukhala akuphatana. Mulongo wakumanga banja anakhala ku Brazil alonga: “Lero, nakuti pana pinthu pizinji pyakucita panango tinanyerezera kuti tisakhala pabodzi basi ene thangwi tisakhala n’nyumba ibodzi ene. Ine ndaona kuti ndisafunika kucita pizinji kupiringana basi ene kukhala pabodzi. Ndisafunikambo kubvesera mwadidi mamunanga angalonga.” Onani kuti Bruno na nkazace Tays asacitanji toera kubveserana mwadidi angalonga. Bruno alonga: “Mu ndzidzi unacedza ife, tisasiya mitokodzi yathu kutali mbaticedza mwakutsandzaya.”

Mphapo ndiye tani khala imwe na ndzanu wa m’banja nee musakomerwa kukhala pabodzi toera kucedza? Panango imwe musakomerwa na pinthu pyakusiyana peno musaipirwa na ndzanu wa m’banja. Mphapo munacitanji? Nyerezerani citsandzo ca moto cidalonga ife pakutoma. Moto nee usagaka kakamwe mu ndzidzi ubodzi ene unaphatiswa iwo. Iwo usafunika kuikhwa nkhuni zing’ono pakutoma, buluka penepo nkhuni zikulu. Munjira ibodzi ene, imwe munakwanisambo kutoma kukhala na ndzidzi wakucepa toera kucedza ntsiku zonsene. Pontho citani pinthu pyakuti uwiri wanu musakomerwa napyo, tayu pinthu pyakuti pinacitisa m’bodzi wa imwe kuipirwa. (Tiya. 3:18) Mungacita pyenepi, panango munatoma pontho kufunana kakamwe unango na ndzace.

Ncenjezi 05.23 tsa. 21 ndima 3

Pitirizani Kugasa “Lirimi ya Moto wa Yah”

Toera kupitiriza kugasa “lirimi ya moto wa Yah” anyakumanga banja asafunika kuwangisira kakamwe toera kuwangisa uxamwali wawo na Yahova. Kucita pyenepi kunaphedza tani banja yawo? Anyakumanga banja angalemedza uxamwali wawo na Yahova, iwo anafuna kuphatisira uphungu wace, pontho pyenepi pinaaphedza toera kucalira na kukunda pinentso pyakuti panango pinafewesa ufuni wawo. (Lerini Ekleziaste 4:12.) Anthu akukola mwauzimu asawangisirambo toera kutowezera Yahova na kupangiza makhaliro ace ninga kukoma ntima, kupirira na kulekerera. (Aef. 4:32–5:1) Anyakumanga banja angapangiza makhaliro anewa, pinakhala pyakukhonda nentsa toera kuwangisa ufuni wawo. Mulongo anacemerwa Lena, wakuti ali pa banja mu pyaka pyakupiringana 25 alonga: “Ndi pyakukhonda nentsa kufuna na kulemedza munthu wakukola mwauzimu.”

Mpfuma Zauzimu

Ncenjezi 12.22 tsa. 4 ndima 7

Ife Tinakwanisa Kukhala M’maso Kwenda na Kwenda

Yahova aticitambo na cifuno cakukhala m’maso kwenda na kwenda. Bhibhlya isalonga kuti Mulungu ‘aikha muntima mwa anthu cifuno cakukhala kwenda na kwenda.’ (Koel. 3:11) Ineyi ndi thangwi ibodzi inaticitisa kuona kufa ninga nyamalwa wathu. (1 Akor. 15:26) Na thangwi ineyi tingabva kupha, ife nee tisakhala kwene mbatidikhira kufa. Kazinji kene tisaenda kunyumba ya ungumi, pontho midzidzi inango tisamwa mitombwe inapaswa ife kweneko toera tiwange. Ife tisacita pyonsene pinakwanisa ife toera tikhonde kufa. Kusiyapo pyenepi, munthu anafuna ife angafa, mwakukhonda tsalakana khala ndi mwana peno nkulu, pyenepi pisatitsukwalisa kakamwe. (Juwau 11:32, 33) Mwandimomwene, Nciti wathu nee mbadatipasa cifuno cakukhala m’maso kwenda na kwenda khala iye nee akhafuna kuti anthu akhale m’maso kwenda na kwenda. Mbwenye ife tiri na mathangwi anango anaticitisa kukhulupira kuti tinakwanisa kukhala m’maso kwenda na kwenda. Cincino tinaona pinthu pidacita Yahova nduli na pinthu pinacita iye cincino pinapangiza kuti iye nee acinja cifuniro cace cakutoma.

SUMANA 6-12 YA OUTUBRO

MPFUMA ZA MAFALA A MULUNGU EKLEZIASTE 5-6

Tinapangiza Tani Cilemedzo Kakamwe Kuna Mulungu?

Tsandzayani na Umaso Kwenda na Kwenda! nsolo 52 khundu 1

Thangwi Yanji Mphyadidi Kunyerezera Pya Nguwo Zinabvala Ife na Maonekero Athu?

Ife ndife atumiki a Yahova, ndi thangwi yace tisafunika tikhale na maonekero akucena, ‘tibvale nguwo zakuthema mbatibalikisa manungo athu mwakulinganira.’ Tingacita pyenepi, tinapangiza kuti ‘tisalemedza Mulungu.’ (1 Timoti 2:9, 10) Tendeni tione midida minai: (1) Nguwo zathu zisafunika kukhala ‘zakuthema.’ Panango imwe mwaona kuti pa misonkhano yathu ya mpingo, atumiki a Yahova asabvala nguwo zakusiyana, mbwenye nguwo zathu na tsisi yathu isapangiza kuti tisalemedza Mulungu wathu, Yahova. (2) Kubvala ‘nguwo zakuthema’ pisabveka kuti nee tisafunika kubvala nguwo zakuti zinacitisa anthu kukhala na cifuno cakupita m’mabonde peno zinapangiza kuti tisafuna pinakomerwa na ife basi. (3) Ife tisapangiza kuti ndife ‘akulinganira’ tingakhonda kutowezera mabvaliro a anthu a dziko. (4) Ndzidzi onsene maonekero athu asafunika kupangiza kuti tisalemedza Mulungu, pontho asafunika kupangiza pakweca kuti tisatumikira Mulungu wandimomwene.—1 Akorinto 10:31.

Ncenjezi 07.22 tsa. 24-25 ndima 18

Perekani Takhuta Thangwi ya Mwai Wakucita Phembero

M’bale panango anaphembwa toera kucita phembero pa nsonkhano wa basa ya m’munda peno pa nsonkhano wa mpingo. Ale ali na mwai unoyu wakucita phembero asafunika kukumbuka cifuniro ca nsonkhano. Phembero nee isafunika kuphatisirwa toera kupereka uphungu kuna abale na alongo mu mpingo peno toera kucita pidziwiso. Kazinji kene pa misonkhano ya mpingo, mphindi zixanu zakhazikiswa toera kuimba nyimbo na kucita phembero, natenepa m’bale anafuna kucita phembero nee asafunika kulonga pinthu pizinji, makamaka khala akucita phembero yakutoma.—Mat. 6:7.

Ncenjezi 04.17 tsa. 7 ndima 12

Kwanirisani Mapikiro Anu

Pidabatizwa imwe, mwapikira kuna Yahova kuti munaphatisira umaso wanu toera kuntumikira na kucita pyonsene pinakwanisa imwe toera kutowezera midida yace. Mbwenye ubatizo ndi kutoma basi. Mukupita kwa ndzidzi, ife tonsene tisafunika kudingika. Tinakwanisa kubvundzika: ‘Kodi kutomera ntsiku idabatizwa ine, uxamwali wanga na Yahova ndi wakuwanga mpaka papi? Kodi ndikupitiriza kuntumikira na ntima onsene? (Akolose 3:23) Ndisacita phembero mwakukhonda phonya? Ndisaleri Bhibhlya ntsiku zonsene? Ndisagumanika pa misonkhano mwakukhonda phonya? Ndisaenda m’basa yakumwaza mphangwa mwakukhonda phonya pingakwanisika? Peno ndatoma kubwerera nduli m’mabasa anewa?’ Mpostolo Pedhru aticenjeza thangwi ya ngozwi yakusiya kutumikira Yahova. Tinakwanisa kucalira pyenepi tingawangisira toera kukulisa cikhulupiro cathu, udziwisi, kupirira na phinga yathu m’basa ya Mulungu.—Lerini 2 Pedro 1:5-8.

Mpfuma Zauzimu

Ncenjezi 09.20 tsa. 31 ndima 3-5

Mibvundzo Inacitwa na Anyakuleri

Lemba ya Koelete 5:8 isalonga pya ntongi wakuti asaponderera anyakutcerenga mbakhonda kupangiza ulungami kuna iwo. Ntongi unoyu asafunika kudziwa kuti pana munthu anamuona wakuti ndi wapadzulu kakamwe kupiringana iye. Pontho iwo asafunika kudziwa kuti pana anango akuti ndi apadzulu kakamwe kupiringana iwo. Mbwenye mwakutsukwalisa mautongi anewa onsene ndi aumbirimi, pontho anthu asathabuka thangwi iwo asatonga mwakusowa ulungami.

Mwakukhonda tsalakana nyatwa zinathimbana na ife thangwi ya mautongi anewa, ife tisabalangazwa mu kudziwa kuti Yahova asadziwa pyonsene pinacita mautongi anewa. Kusiyapo pyenepi, ife tinakwanisa kuphemba Yahova mbatintulira nyatwa zathu zonsene. (Masal. 55:22; Afil. 4:6, 7) Pontho tisadziwa kuti ‘maso a Yahova asayang’ana pa dziko yonsene yapantsi toera kupangiza mphambvu zace kuna anthu akukhulupirika kuna iye.’—2 Pya dziko. 16:9.

Lemba ya Koelete 5:8 isatiphedza kudziwa kuti pa mautongi onsene a anthu alipo ntongi wa padzulu kakamwe kupiringana iwo. Pontho cinthu cakufunika kakamwe ndi cakuti lemba ineyi isatiphedza kudziwa kuti Yahova ndi wa padzulu kakamwe kupiringana pyonsene. Cincino Yahova ali kutonga mukuphatisira mwanace Yezu Kristu, wakuti ndi Mambo wa Umambo wa Mulungu. Yahova wamphambvu zonsene, wakuti asaona pinthu pyonsene ndi wakulungama pontho mwanace ndi wakulungamambo.

SUMANA 13-19 YA OUTUBRO

MPFUMA ZA MAFALA A MULUNGU EKLEZIASTE 7-8

‘Ndokoni Kunyumba Yakuti Iri na Ciliro’

Ncenjezi 01.22 tsa. 16 ndima 9

Tinapfundzanji Thangwi ya Kulira Kwa Yezu?

Imwe munakwanisa kuphedza anthu adaferwa. Kusiyapo kulira kudacita Yezu na Mariya pabodzi na Marta, iye aabvesera mu ndzidzi ukhalonga iwo mbaabalangaza. Ife tinakwanisambo kucita pibodzi pyene kuna ale adaferwa. Dan, nkulu wa mpingo wa ku Australia alonga: “Pidaferwa ine na nkazanga ndikhafuna kakamwe ciphedzo. Abale azinji pabodzi na akazawo, ndzidzi onsene akhali dzololo toera kundibvesera. Iwo akhandisiya kulonga thangwi ya kutsukwala kwanga, pontho nee akhapasika manyadzo mu ndzidzi ukhalira ine. Kusiyapo pyenepi iwo akhandiphedza toera kucita mabasa anango, ninga kutsuka karu yanga, kugula pinthu na kuphika mu ndzidzi wakuti nee ndikhakwanisa kucita pyenepi. Pontho ndzidzi onsene akhacita phembero pabodzi na ine. Iwo apangiza kuti akhali axamwali andimomwene, pontho akhali dzololo toera kundiphedza ‘midzidzi ya nyatwa.’”—Mis. 17:17.

Ncenjezi 06.19 tsa. 23 ndima 15

Phedzani Anango Angathimbana na Nyatwa

William, wakuti aferwa na nkazace pyaka pingasi nduli alonga: “Ndisakomerwa kakamwe anthu angalonga pinthu pyadidi pikhacita nkazanga; pyenepi pisandipasa cinyindiro cakuti iye akhafuniwa, pontho akhalemedzwa. Njira ineyi yakubalangaza isandiphedza kakamwe. Mafala anewa asandibalangaza kakamwe, thangwi nkazanga akhali wakufunika kakamwe kwa ine, pontho akhacita khundu ya umaso wanga.” Bianca adaferwa na mamunace afokotoza: “Ndisakhala wakubalangazika anango angacita phembero pabodzi na ine, angaleri lemba ibodzi peno mawiri. Ndisaphedzeka kakamwe iwo angalonga pya mamunanga, pontho angandibvesera ndingalonga pya iye.”

Ncenjezi 07.17 tsa. 13 ndima 16

‘Lirani na Ale Analira’

Maphembero athu anakwanisa kuphedza abale na alongo athu akutsukwala. Tinakwanisa kuaphataniza m’maphembero anthu. Maseze pinakhala pyakunentsa kucita pyenepi thangwi panango musapibva kuti munalira, mbwenye phembero yanu yakubulukira muntima inakwanisa kuabalangaza kakamwe. Dalene asakumbuka: “Midzidzi inango alongo angabwera kudzandibalangaza, ndikhaabvundza khala ali akusudzuka toera kucita phembero. Iwo angatoma kuphembera, kazinji kene akhanentseka kulonga, mbwenye ndzidzi onsene angalonga mafala akucepa, mafala awo akhali akuwangisa kakamwe. Cikhulupiro cawo cakuwanga, ufuni wawo na mabvero awo pikhali pyakuwangisa kakamwe cikhulupiro.”

Ncenjezi 07.17 tsa. 13-14 ndima 17-19

Ndi pyakunentsa kudziwa mwadidi kuti munthu anathimbana na nyatwa mpaka lini. Anthu angaferwa na anyakufunika awo, pakutoma axamwali na acibale asapereka cibalangazo. Pakumala kubalangazwa na anthu anewa, iwo asapitiriza kufuna cibalangazo. Natenepa khalani dzololo toera kuphedza. ‘Xamwali anafuna midzidzi yonsene, ndi m’bale pa ntsiku ya nyatwa.’ (Misangani 17:17) Tisafunika kubalangaza anthu akutsukwala ndzidzi onsene.—Lerini 1 Atesalonika 3:7.

Kumbukani kuti panango munthu anatsukwala mwakukhonda dikhira. Pyenepi panango pinacitika thangwi ya ntsiku ya phwando, nyimbo, mafoto, mabasa, khwema, dzumbi peno thangwi ya pidacitika nkati mwa caka. Nzice wakutsukwala angawangisira toera kugumanika pa nsonkhano wa cisa peno pa Cikumbuso pa ulendo wakutoma, asatsukwala kakamwe. M’bale unango alonga: “Ndisakumbuka kuti pikhali pyakutsukwalisa kakamwe kukumbuka ndekha ntsiku yathu yakumanga banja. Mbwenye ntsiku ineyi, abale na alongo akucepa acita masasanyiro toera kugumanikana na axamwali anga apantima, pyenepi pyandicitisa kupibva kuti nee ndiri ndekha.”

Kumbukani kuti ale anatsukwala nee asafunika basi ene ciwangiso ntsiku zinagwerwa iwo na nyatwa. Junia alonga: “Kazinji kene kuphedzwa na kukhala na axamwali pa ntsiku yakuti nee ndi yakupambulika pisakhala pyakutsandzayisa kakamwe. Midzidzi ineyi ndi yadidi, pontho isabalangaza kakamwe.” Mwandimomwene, ife nee tinakwanisa kumalisa nyatwa zawo zonsene, mbwenye tinakwanisa kubalangaza ale anatsukwala mukuacitira pinthu. (1 Jwau 3:18) Gaby alonga: “Ndisapereka takhuta kakamwe kuna Yahova thangwi ya akulu a mpingo aufuni akuti andiphedza mu nyatwa zanga zonsene. Mwandimomwene, iwo andiphedza kupibva kuti Yahova asandifuna kakamwe.”

Mpfuma Zauzimu

Ncenjezi 03.23 tsa. 31 ndima 18

“Anthu Onsene Anadzindikira Kuti Ndimwe Anyakupfundza Anga”

Midzidzi inango, panango tinafunika kucedza na m’bale peno mulongo adatitsukwalisa. Mbwenye pakutoma pinakhala mwadidi kubvundzika tenepa: ‘Kodi ine ndiri na undimomwene onsene thangwi ya pinthu pidacitika?’ (Mis. 18:13) ‘Kodi iye anditsukwalisa mwakufuna?’ (Ekle. 7:20) ‘Ine ndacitambo kale madodo ninga anewa?’ (Ekle. 7:21, 22) ‘Ndingacedza na munthu unoyu adanditsukwalisa, pyenepi pinathimizira kukhonda bverana kwathu?’ (Lerini Misangani 26:20.) Tingakhala na ndzidzi toera kunyerezera mibvundzo ineyi, panango tinaona kuti ufuni unatikulumiza toera kusiya kunyerezera pinthu pidacitika mbatilekerera m’bale wathu.

SUMANA 20-26 YA OUTUBRO

MPFUMA ZA MAFALA A MULUNGU EKLEZIASTE 9-10

Khalani na Maonero Adidi Thangwi ya Nyatwa Zanu

Ncenjezi 01.23 tsa. 15 ndima 4

Yahova Asakuphedzani Toera Pinthu Pikufambireni Mwadidi

Bhibhlya isalonga kuti “pinthu pyakukhonda kudikhirwa pisacitika kuna onsene.” (Ekle. 9:11) Midzidzi inango ife tisathimbana na nyatwa zakuti ‘anthu anango asathimbanambo nazo.’ (1 Akor. 10:13) Panango ife tinathimbana na nyatwa thangwi yakukhala anyakupfundza a Yezu. Mwacitsandzo, panango tinasingirirwa peno kutcingwa thangwi ya cikhulupiro cathu. (2 Tim. 3:12) Mwakukhonda tsalakana nyatwa zinathimbana na imwe, Yahova anakuphedzani toera pinthu pikufambireni mwadidi. Kodi iye acita tani pyenepi kuna Zuze?

Ncenjezi 09.19 tsa. 5 ndima 10

Atumiki Akucepeseka a Yahova Ndi Akufunika Kakamwe Kuna Iye

Kucepeseka kunacitisambo kuti umaso wathu ukhonde kukhala wakunentsa. Midzidzi inango panango tinaona peno tinathimbana na pinthu pyakukhonda kulungama. Mambo waudziwisi, Salomoni alonga: ‘Ndaona mabitcu mbafamba na makavalo, mbwenye ana a mambo mbafamba na miyendo ninga mabitcu.’ (Koel. 10:7) Midzidzi inango ale akuti ali na maluso kakamwe nee asasimbwa. Pontho ale akuti nee ali na maluso mazinji midzidzi inango asasimbwa kakamwe. Mbwenye Salomoni adzindikira kuti tisafunika kukomerwa na makhaliro athu, mbatikhonda kuikha manyerezero athu ku pinthu pyakuipa. (Koel. 6:9) Tingakhala akucepeseka, tinakomerwa na umaso uli na ife, mbatikhonda kudzudzumika na pinthu pyakuti nee tiri napyo.

Ncenjezi 15/8/15 tsa. 10 ndima 4

Nyerezerani Mwacidikhodikho Ufuni Wakukhonda Mala Wa Yahova

Kodi tisakwanisa kuona ufuni wakukhonda mala wa Yahova mu pinthu pidacita iye? Inde, thangwi pinthu pyenepi pisapangiza ufuni wa Mulungu. (Arom. 1:20) Iye acita dziko yapantsi na makhaliro adidi akuti tinakwanisa kukhala maso mwakutsidzikizika. Kusiyapo kukhala na umaso basi, iye asafuna kuti ticite pizinji. Tisafunika kudya toera kupitiriza kukhala maso. Yahova acita dziko na mphambvu yakubala miti yakusiyana-siyana yakuti mbidaphatisirwa ninga cakudya cadidi. Iye aticita munjira yakuti tinakwanisa kukomerwa na cakudya! (Koel. 9:7) Mulongo Catherine, asakomerwa kakamwe angaona pinthu pidacitwa, makamaka mu ndzidzi wa khoni ku Kanada. Iye alonga: “Mphyakudzumisa kakamwe kuona ntundu onsene wa umaso, maluwa adacitwa toera kubalikisa dziko na mbalame zinacita ulendo mbazibwerera, kuphatanizambo mbalame ya songo-songo inafika pa combo cinadyera mbalame cidamanikwa kuntsi kwa mbuto inaphikira ine. Pinthu pyenepi pyakutsandzayisa pidatipasa Yahova pisapangiza kuti iye asatifuna.” Babathu waufuni asakomerwa na pinthu pidacita iye, pontho asafunambo kuti titsandzaye napyo.—Mis. 14:16, 17.

Mpfuma Zauzimu

Tsandzayani na Umaso Kwenda na Kwenda! nsolo 29 khundu 1

Ninji Pinacitika Munthu Angafa?

Yezu alandanisa kufa na citulo. Munthu angagona, iye nkhabe dziwa pinthu pinacitika n’khundu mwace. Mphapo kufa kwalandana tani na citulo? Munthu angafa, iye nkhabe kubva kupha, pontho nee asatambabve nyatwa zinango. Bhibhlya isalonga kuti “anyakufa nkhabe cinthu cinadziwa iwo.”—Lerini Ekleziaste 9:5

SUMANA 27 YA OUTUBRO–2 YA NOVEMBRO

MPFUMA ZA MAFALA A MULUNGU EKLEZIASTE 11-12

Khalani na Umaso Wakutsandzaya, Pontho na Ungumi Wadidi

Ncenjezi 03.23 tsa. 25 ndima 16

Phatisirani Pinthu Pidacita Yahova Toera Kupfundzisa Ananu Thangwi ya Iye

Banja ingacedza pabodzi mukuphatisira pinthu pidacita Yahova isakhala yakusudzuka na yakutsandzaya, pontho pyenepi pisaaphedza toera kufunana kakamwe unango na ndzace. Bhibhlya isalonga kuti ‘pana ndzidzi wakuseka na ndzidzi wakubvina.’ (Ekle. 3:1, 4) Yahova acita mbuto zakubalika kakamwe pa dziko yapantsi zakuti ife tinakwanisa kucita pinthu pinakomerwa na ife. Mabanja mazinji a mu nzinda asakomerwa kuenda kunja kwa nzinda, ku mapiri peno ku praya. Anapiana anango asakomerwa na kuthamanga, kusendzeka mparki, kuona pinyama, kusambirira n’nyandza, nthawala peno m’bara. Pana njira zizinji zakuti tinakwanisa kuphatisira pinthu pidacita Yahova toera kuticitisa kukhala akutsandzaya.

Ncenjezi 02.23 tsa. 21 ndima 6-7

Tinalemedza Tani Umaso Udatipasa Mulungu?

Maseze Bhibhlya nee ndi bukhu yakutsalakana ungumi na pinthu pinafunika ife kudya, iyo isapangiza manyerezero a Yahova thangwi ya pinthu pyenepi. Mwacitsandzo, iyo isatipanga toera ‘ticalire pinthu pyakuipa’ pyakuti pinaphekesa manungo athu. (Ekle. 11:10) Bhibhlya isakhondesa kudya kakamwe na kumwa kakamwe. (Mis. 23:20) Yahova asafuna kuti tikhale akudzitonga thangwi ya pinthu pinadya ife na pinamwa ife, pontho asafuna kuti tikhale akudzitonga thangwi ya njira inadya ife na inamwa ife pinthu pyenepi.—1 Akor. 6:12; 9:25.

Ife tinakwanisa kucita pinthu pinapangiza kuti tisalemedza umaso udatipasa Mulungu tingaphatisira luso yathu yakunyerezera. (Mas. 119:99, 100; Lerini Misangani 2:11.) Mwacitsandzo, ife tinapangiza kuti tisaphatisira luso yathu yakunyerezera tingasankhula mwadidi pinthu pinadya ife. Khala tisakomerwa na ntundu unango wa cakudya, mbwenye tisadziwa kuti cakudya ceneci cinaticitisa kuduwala, luso yakunyerezera isatiphedza toera kucalira cakudya ceneci. Kusiyapo pyenepi, ife tinapangiza kuti tisaphatisira luso yakunyerezera tingagona mwakukwana, kucita masendzekero akuwangisa manungo ndzidzi onsene, tingakhala na nsambo wakucenesa manungo athu na kucenesa nyumba zathu.

Ncenjezi 09.24 tsa. 2 ndima 2-3

Nyindirani Yahova Ninga Pidacita Samisoni

Ninga atumiki a Yahova, ndife anthu akutsandzaya. Thangwi yanji? Tiri na mathangwi mazinji, mbwenye thangwi yakufunika kakamwe ndi yakuti ife tisaleri Mafala a Mulungu ntsiku zonsene, pontho tisawangisira toera kuphatisira pinapfundza ife.—Lerini Tiyago 1:22-25.

Pali na njira zizinji zakuti tinakwanisa kuphedzeka tingakhala “anyakucita pinalonga mafala.” Mwacitsandzo, tingaphatisira pinapfundza ife m’Mafala a Mulungu tisatsandzayisa Yahova, pontho ife tisakhalambo akutsandzaya. (Ekle. 12:13) Kusiyapo pyenepi, tisakhala na banja yakutsandzaya, pontho tisakhala na uxamwali wakuwanga na abale na alongo athu. Panango pyenepi pyacitika kuna imwe. Kusiyapo pyenepi, ife tisacalira nyatwa zizinji zinakhala na anthu thangwi yakukhonda kubvera mitemo ya Yahova. Mwandimomwene, pisakhala ninga pidalonga Mambo Dhavidhi. Pakumala kulonga mitemo ya Yahova na matongero ace, iye amalisa na mafala akuti: “Kukoya njira zenezi kusabweresa nkhombo.”—Mas. 19:7-11.

Mpfuma Zauzimu

Tsandzayani na Umaso Kwenda na Kwenda! nsolo 3 khundu 1

Imwe Musanyindira Pinalonga Bhibhlya?

Bhibhlya iri na maprofesiya analonga “pinthu pyakuti pidzati kucitika.” (Izaiya 46:10) Mwacitsandzo, pinthu pizinji pidacitika kale pyalembwa m’Bhibhlya mbapidzati kucitika. Bhibhlya ikhadalongambo kuti pinthu mbapidakhala tani lero. Mu nsolo uno tinapfundza maprofesiya mangasi a m’Bhibhlya. Kuona kuti maprofesiya anewa akwanirisika mwakubverana na pikhadalonga Bhibhlya mphyakutsandzayisa kakamwe!