Nyerezerani Mwacidikhodikho Ufuni Wakukhonda Mala Wa Yahova

‘Ndinanyerezera mabasa anu onsene.’​—SAL. 77:12.

NYIMBO: 18, 29

MUNATAWIRA TANI?

Ndi cinyindiro cipi ciri na ife cakuti Yahova asatifuna?

Thangwi yanji tinakwanisa kulonga kuti ufuni wa Yahova kwa atumiki ace ndi wakukhonda mala?

Tinapangiza tani kuti tisafuna Mulungu?

1, 2. (a) Thangwi yanji musanyindira kuti Yahova asafuna atumiki ace? (b) Kodi anthu onsene acitwa na cifuno cipi?

THANGWI yanji musanyindira kuti Yahova asafuna atumiki ace? Mbamudzati kutawira mbvundzo unoyu, dingani pitsandzo ipi: Mu pyaka pizinji, abale na alongo mwaufuni aphedza mulongo Taylene toera kukhala na maonero akulinganira kuti akhonde kudikhira pizinji kakamwe kwa iye ene. Iye alonga: “Khala Yahova nee asandifuna, abale na alongo nee mbadapitiriza kundiphedza.” Brigitte, adaferwa na mamunace mbakuza ekhene anace awiri alonga: “Kukuza ana mu dziko ya Sathani mphyakunentsa kakamwe, makamaka nyakubala angakhala ekhene. Mbwenye ndisanyindira kuti Yahova asandifuna. Ndathimbana na nyatwa zizinji, mbwenye iye cipo andisiya toera kuthimbana na nyatwa inacimwana ine kupirira.” (1 Akor. 10:13) Sandra asathimbana na utenda wakukhonda wanga. Pa nsonkhano wa gawo iye apangizwa citsalakano cakupambulika na nkazi wa m’bale unango wakudziwika kakamwe. Mamunace Sandra alonga: “Maseze nee tikhadziwa mulongo unoyu, citsalakano cace catitsandzayisa kakamwe. Ngakhale cinthu cing’ono caufuni cinacita abale na alongo, cisapangiza kwa ine kuti Yahova asatifuna kakamwe.”

² Anthu acitwa na luso yakufuna na yakufuniwa. Pifuno pyenepi pingakhonda kukwaniriswa thangwi ya pinthu pyakukhonda dikhira ninga kuphatiswa mwala, utenda, kusowa kobiri peno kukhonda pembera mu utumiki, mphyakukhonda nentsa kuti munthu atsukwale. Mu ndzidzi unoyu, tinganyerezera kuti Yahova nee asatifunabve, mphyadidi kukumbuka kuti ndife akufunika kakamwe kwa iye, pontho iye ‘asaphata nkono wathu wa madyo’ mbatiphedza. Tingakhala akukhulupirika kwa Mulungu iye cipo anatiduwala.​—Iza. 41:13; 49:15.

3. Ninji pinafuna kuwangisa cinyindiro cathu cakuti ufuni wa Mulungu kwa ife ndi wakukhonda mala?

³ Anthu adalongwa pakutoma akhali na cinyindiro cakuti Mulungu akhali na iwo m’midzidzi ya nyatwa. Ife tinakwanisambo kukhala na cinyindiro cakuti Mulungu ali na ife. (Sal. 118:6, 7) Mu nsolo uno tinadzadinga pinthu pinai pinapangiza kuti Mulungu asatifuna. (1) Pinthu pidacita iye; (2) Mafalace akupumirwa; (3) phembero; (4) ciomboli. Kunyerezera mwacidikhodikho pinthu pyadidi pinacita Yahova kunathimizira kupereka kwathu takhuta thangwi ya ufuni wace wakukhonda mala.​—Lerini Masalmo 77:11, 12.

NYEREZERANI MWACIDIKHODIKHO PIDACITA YAHOVA

4. Kunyerezera mwacidikhodikho pinthu pidacita Yahova kusatiphedza tani?

⁴ Kodi tisakwanisa kuona ufuni wakukhonda mala wa Yahova mu pinthu pidacita iye? Inde, thangwi pinthu pyenepi pisapangiza ufuni wa Mulungu. (Arom. 1:20) Iye acita dziko yapantsi na makhaliro adidi akuti tinakwanisa kukhala maso mwakutsidzikizika. Kusiyapo kukhala na umaso basi, iye asafuna kuti ticite pizinji. Tisafunika kudya toera kupitiriza kukhala maso. Yahova acita dziko na mphambvu yakubala miti yakusiyana-siyana yakuti mbidaphatisirwa ninga cakudya cadidi. Iye aticita munjira yakuti tinakwanisa kukomerwa na cakudya! (Koel. 9:7) Mulongo Catherine, asakomerwa kakamwe angaona pinthu pidacitwa, makamaka mu ndzidzi wa khoni ku Kanada. Iye alonga: “Mphyakudzumisa kakamwe kuona ntundu onsene wa umaso, maluwa adacitwa toera kubalikisa dziko na mbalame zinacita ulendo mbazibwerera, kuphatanizambo mbalame ya songo-songo inafika pa combo cinadyera mbalame cidamanikwa kuntsi kwa mbuto inaphikira ine. Pinthu pyenepi pyakutsandzayisa pidatipasa Yahova pisapangiza kuti iye asatifuna.” Babathu waufuni asakomerwa na pinthu pidacita iye, pontho asafunambo kuti titsandzaye napyo.​—Mis. 14:16, 17.

5. Kodi ufuni wa Yahova usapangizika tani kubulukira munjira idacitwa anthu?

⁵ Yahova aticita na luso yakucita mabasa akuphindulisa akuti asathimizira kutsandzaya kwathu mu umaso. (Koel. 2:24) Iye apasa anthu basa ya kudzadza dziko na kuitonga, kutsalakana nyama za m’madzi, mbalame na pinthu pinango pyaumaso pa dziko yapantsi. (Gen. 1:26-28) Yahova apangiza kuti asatifuna kakamwe thangwi yakutipasa maluso akuti tinakwanisa kuntowezera!​—Aef. 5:1.

PASANI NTENGO MAFALA AKUPUMIRWA A MULUNGU

6. Thangwi yanji tisafunika kupasa ntengo kakamwe Bhibhlya?

⁶ Mulungu apangiza ufuni ukulu kakamwe mu kutipasa Bhibhlya. Iyo isapangiza pinthu pinafunika ife kudziwa thangwi ya iye, na asatsalakana tani anthu. Mwacitsandzo, Bhibhlya isatipanga kuti Yahova atsalakana tani Aisraele, akuti kazinji kene nee akhambvera. Lemba ya Masalmo 78:38 isalonga: ‘Mulungu akhaabvera ntsisi, akhaalekerera mbakhonda kuafudza onsene. Kazinji kene nee aipirwa nawo, peno kupangiza ukali wace onsene.’ Kunyerezera mwacidikhodikho vesi ineyi kunakuphedzani toera kuona kuti Yahova asakufunani, pontho asakutsalakanani. Khalani na cinyindiro cakuti ndimwe wakufunika pamaso pace.​—Lerini 1 Pedro 5:6, 7.

7. Thangwi yanji tisafunika kupasa ntengo kakamwe Bhibhlya?

⁷ Tisafunika kupasa ntengo kakamwe Bhibhlya thangwi ndi njira yakutoma inaphatisira Mulungu toera kulonga na ife. Kucedza mwadidi munjira ya citsalakano kwa anyakubala na anawo ndi kwakufunika kakamwe toera kukulisa cinyindiro na ufuni kwa unango na ndzace. Ndiye tani pya uxamwali wathu na Babathu, Yahova? Maseze cipo tamuona na maso peno kubva fala yace, iye ‘asalonga’ na ife kubulukira m’Bhibhlya, pontho ife tisafunika kumbvesera. (Iza. 30:20, 21) Yahova asafuna kutitsogolera ninga atumiki ace akuperekeka na kutitsidzikiza toera tikhonde kuona nyatwa. Iye asafunambo kuti tindziwe na kun’nyindira.​—Lerini Masalmo 19:7-11; Misangani 1:33.

8, 9. Kodi Yahova asafuna kuti tidziwenji? Fokotozani pyenepi mukuphatisira citsandzo ca Bhibhlya.

⁸ Yahova asafuna kuti tindziwe ninga munthu wakuti asatifuna, pontho asaona pizinji kupiringana kusowa kwathu ungwiro. Iye asasaka pinthu pyadidi mwa ife. (2 Pya dziko. 16:9) Mwacitsandzo, iye acita pyenepi na Mambo Yosafate wa ku Yuda. Ntsiku inango, Yosafate mwakusowa ndzeru atawira kuperekera Mambo Akabu wa Israele toera kuenda kamenya nkhondo na Asirya ku Ramote-Gileade. Maseze aprofeta 400 apanga Akabu munthu wakuipa ntima kuti anawina ku nkhondo, Mikeya mprofeta wandimomwene wa Yahova alonga mwanyapantsi kuti iye mbadakundwa. Akabu afa ku nkhondo ineyi, Yosafate apulumuka mbwenye akhali cifupi na kuphiwa. Pidabwerera iye ku Yerusalemu, Yosafate asandikwa thangwi yakuphatana na Akabu. Ngakhale tenepo, mprofeta Yehu mwana wa Hanani, apanga Yosafate: ‘Piripo pinthu pyadidi pidagumanika mwa imwe.’​—2 Pya dziko. 18:4, 5, 18-22, 33, 34; 19:1-3.

⁹ Pakutoma kwa utongi wace, Yosafate apanga akadamu ace, Alevi na anyantsembe kuti aende m’mizinda yonsene ya Yuda toera kupfundzisa anthu Mwambo wa Yahova. Kampanya ineyi yaphedza kakamwe, mbicitisa anthu a madzindza anango kutoma kugopa Yahova. (2 Pya dziko. 17:3-10) Ndimomwene kuti Yosafate acita pinthu pyakuipa, mbwenye Yahova akwanisa kuona pinthu pyadidi pikhadacita iye. Mbiri ineyi ya Bhibhlya isatikumbusa kuti mwakukhonda tsalakana kusowa kwathu ungwiro, tingawangisira na ntima onsene toera kucita pinthu pinakomerwa na iye, Yahova anadzapangiza ufuni wakukhonda mala kwa ife.

PASANI NTENGO MWAI WA PHEMBERO

10, 11. (a) Thangwi yanji phembero ndi muoni wakupambulika udatipasa Yahova? (b) Kodi Mulungu anakwanisa kutawira tani maphembero? (Onani cithundzithundzi cakutoma.)

¹⁰ Baba waufuni asakhala na ndzidzi toera kubvesera anace angafuna kulonga na iye. Iye asafuna kudziwa nyatwa zawo na pinaadzudzumisa thangwi iye asatsalakana mabvero awo. Munjira ibodzi ene, Babathu wakudzulu, Yahova, asatibvesera tingaphembera kwa iye. Kulonga na Babathu ndi mwai ukulu kakamwe!

¹¹ Ife tinakwanisa kucita phembero kwa Yahova ndzidzi onsene. Iye nee atiikhira madire toera kucita pyenepi. Iye ndi Xamwali wathu wakuti ndzidzi onsene ali dzololo toera kutibvesera. Taylene adalongwa pakutoma, afokotoza: “Munakwanisa kulonga cinthu consene, pinthu pyonsene kwa iye.” Tingalonga mabvero athu kuna Mulungu mu phembero, iye anakwanisa kutitawira kubulukira m’Bhibhlya, mu nsolo wa revista, peno mafala akuwangisa a nyakukhulupira ndzathu. Yahova asabvesera maphembero athu akudembetera, ngakhale anango nee asabvesesa makhaliro athu. Kutawira kwace maphembero athu ndi cipangizo cadidi kakamwe caufuni wace wakukhonda mala kwa ife.

12. Thangwi yanji tisafunika kudinga maphembero adalembwa m’Bhibhlya? Perekani citsandzo.

¹² Tinakwanisa kupfundza pizinji kubulukira m’maphembero adalembwa m’Bhibhlya. Natenepa, midzidzi inango mphyadidi kakamwe kudinga maphembero anewa pakulambira kwa banja. Kunyerezera mwacidikhodikho maphembero akubulukira muntima a atumiki akale a Yahova kunatiphedza toera kuthimizira ntundu wa maphembero athu. Mwacitsandzo, dingani phembero ya Yona inapangiza kutcinyuka kwace idacita iye m’mimba mwa ntsomba ikulu. (Yona 1:17–2:10) Nyerezerani phembero ya Salomoni idacita iye kwa Yahova pa ndzidzi wakuperekwa kwa templo. (1 Am. 8:22-53) Nyerezerani mwacidikhodikho phembero yacitsandzo idacita Yezu toera kutipfundzisa. (Mat. 6:9-13) Kupiringana pyonsene, ‘citani phembero kuna Mulungu’ mwakukhonda phonya. Ninga maphindu, ‘ntendere wa Mulungu wakupiringana ndzeru zonsene unadzakoya mitima yanu na ndzeru zanu.’ Natenepa kupereka kwathu takhuta thangwi ya ufuni wakukhonda mala wa Yahova kunadzathimizirika.​—Afil. 4:6, 7.

PEREKANI TAKHUTA THANGWI YA CIOMBOLI

13. Ndi mwai upi uli na anthu kubulukira mu ntsembe ya ciomboli?

¹³ Muoni ukulu wa ntsembe ya ciomboli ca Yezu waperekwa toera ‘tikwanise kuwina umaso.’ (1 Jwau 4:9) Thangwi ya ufuni unoyu ukulu kakamwe wa Mulungu, mpostolo Paulu alemba: ‘Kristu afera ife anthu akuipa pa ndzidzi wakuthema. Thangwi mphyakunentsa munthu afere munthu wakulungama. Thangwi ya munthu wadidi, panango munthu anaperekeka toera kunfera. Mbwenye Mulungu apangiza kutifuna kwace, thangwi pa ndzidzi ukhali ife anyakudawa, Kristu atifera.’ (Arom. 5:6-8) Ufuni unoyu ukulu kakamwe wa Mulungu wafungula njira toera anthu akhale na uxamwali na Yahova.

14, 15. Kodi ciomboli cisabvekanji kwa (a) Akristu akudzodza? (b) ale anadikhira kukhala pa dziko yapantsi?

¹⁴ Pana nsoka wakucepa wa anthu unaona ufuni wakukhonda mala wa Yahova munjira yakupambulika. (Jwau 1:12, 13; 3:5-7) Iwo asadzodzwa na nzimu wakucena, mbakhala “ana a Mulungu.” (Arom. 8:15, 16) Paulu afokotoza kuti Akristu akudzodzwa ‘asalamuswa muli akufa mbakhala kudzulu pabodzi na Yezu Kristu.’ (Aef. 2:6) Iwo ali na mwai unoyu wauzimu thangwi asaikhwa ‘cidzindikhiro na nzimu wakucena udapikirwa, unakhala ninga cinyindiro cakuti anatambira unthaka wawo,’ peno ‘cidikhiro cidakoyerwa iwo kudzulu.’​—Aef. 1:13, 14; Akol. 1:5.

¹⁵ Kwa anthu azinji anakhulupira ciomboli ali na cidikhiro cinango. Iwo anakwanisa kukhala axamwali a Yahova na cidikhiro cakukhala ana a Mulungu kwenda na kwenda mu paradizu pa dziko yapantsi. Natenepa, Yahova asapangiza ufuni wace kuna anthu onsene kubulukira mu ciomboli. (Jwau 3:16) Khala tisadikhira kukhala kwenda na kwenda pa dziko yapantsi mbatipitiriza kutumikira Yahova mwakukhulupirika, tinakwanisa kukhala na cinyindiro cakuti iye anadzacitisa umaso wathu kukhala wakutsandzayisa mu dziko ipswa. Mphyakuthema kakamwe kuona ciomboli ninga cipangizo cikulu kakamwe ca ufuni wakukhonda mala wa Mulungu kwa ife!

PANGIZANI UFUNI WANU KWA YAHOVA

16. Kunyerezera mwacidikhodikho njira zizinji zinapangiza ufuni wa Yahova kwa ife kunatikhuya tani?

¹⁶ Mphyakunentsa kulonga njira zonsene zinapangiza Yahova ufuni wace kwa ife. Nyamasalmo Dhavidhi aimba: ‘Kwa ine, manyerezero anu ndi akufunika kakamwe! Kunjipa kwawo ndi kwakukhonda lengeseka! Ndingayesera kualengesa, asapiringana matcetca.’ (Sal. 139:17, 18) Titawiriseni kuti manyerezero a Yahova atikulumize toera kunfuna na ntima onsene thangwi ya citsalakano caufuni cinapangiza iye kwa ife, mbaticita pyonsene toera kuntumikira mwakukhulupirika.

17, 18. Ndi zipi njira zingasi zakupangiza ufuni wathu kuna Mulungu?

¹⁷ Pana njira zizinji toera kupangiza ufuni wathu kwa Yahova. Mwacitsandzo, tisapangiza ufuni wathu kwa Mulungu na kwa andzathu mu kumwaza mphangwa za Umambo mwaphinga. (Mat. 24:14; 28:19, 20) Tisapangiza kuti mwandimomwene tisafuna Yahova tingapirira mayesero a cikhulupiro. (Lerini Masalmo 84:11; Tyago 1:2-5.) Maseze nyatwa zathu zitekere, tisanyindira kuti Mulungu asazidziwa, pontho anadzatiphedza, thangwi ndife akufunika kakamwe kwa iye.​—Sal. 56:8.

¹⁸ Ufuni wathu kwa Yahova usatikulumiza toera kunyerezera mwacidikhodikho pinthu pyonsene pyakudzumatirisa pidacita iye. Tisapangiza kuti tisafuna Mulungu na kupasa ntengo Mafalace tingapfundza Bhibhlya ndzidzi onsene. Kufuna Mulungu kusatifendedzeresa kuna iye kubulukira mu phembero. Pontho ufuni wathu kwa Mulungu usathimizirika kakamwe tinganyerezera mwacidikhodikho ntsembe ya ciomboli idaperekwa thangwi ya madawo athu. (1 Jwau 2:1, 2) Anewa ndi mangasi mwa mathangwi mazinji ali na ife toera kufuna Yahova na kupereka takhuta thangwi ya ufuni wace wakukhonda mala unapangiza iye kwa ife.