Thangwi Yanji Dzina ya Yahova Ndi Yakufunika Kakamwe Kuna Yezu?

1-2. (a) Yezu acitanji namasiku mbadzati kufa? (b) Ndi mibvundzo ipi inafuna kutawirwa mu nsolo uno?

PIKHADOKA dzuwa n’Cinai, ntsiku 14 ya Nisane caka 33, Yezu akhali dhuzi na kusandukirwa, kutongwa, kuthabuswa na kuphiwa. Yezu na apostolo ace akukhulupirika akhadamala kucita Paskwa mu sala ya ndzulu. Pidamala iwo kwene kucita Paskwa, Yezu apereka uphungu wakumalisa, pontho alonga mafala akuwangisa kuna apostolo ace. Pidasala ndzidzi pang’ono toera abuluke panyumba ineyi, Yezu acita phembero. Mpostolo Juwau alemba phembero ineyi, pontho iyo isagumanika m’bukhu ya Juwau kapitulu 17.

² Kodi Yezu akhadzudzumika nanji pidacita iye phembero ineyi? Phembero ineyi inatiphedza tani toera kubvesesa cinthu cakufunika kakamwe kuna Yezu pikhali iye pa dziko yapantsi? Tendeni tione mitawiro ya mibvundzo ineyi.

“INE NDAADZIWISA DZINA YANU”

3. Yezu alonganji thangwi ya dzina ya Yahova, pontho mafalace asabvekanji? (Juwau 17:6, 26)

³ Mu phembero yace, Yezu alonga: “Ine ndaadziwisa dzina yanu.” Pyenepi pisapangiza kuti dzina ya Yahova ikhali yakufunika kakamwe kuna Yezu, thangwi iye alonga mafala anewa kawiri. (Lerini Juwau 17:6, 26.) Mphapo Yezu akhafuna kulonganji? Kodi iye akhafuna kupfundzisa anyakupfundzace kuti dzina ya Mulungu ndi Yahova? Anyakupfundza a Yezu akhali Ayuda, natenepa iwo akhadziwa kale kuti dzina ya Mulungu ndi Yahova. Dzina ineyi isagumanika maulendo cifupi na 7.000 m’Malemba Acihebheri. Pyenepi pisabveka kuti Yezu nee akhaapfundzisa kuti dzina ya Mulungu ndi Yahova. Mwandimomwene iye akhaapfundzisa kuti dzina ineyi ikhabvekanji. Yezu aphedza anyakupfundzace kudziwa mwadidi Yahova, cifuniro cace na dziko yapantsi na anthu, pinthu pidacita iye, pinthu pinafuna iye kudzacita na makhaliro ace. Basi ene ndi Yezu wakuti mbadapfundzisa mwadidi pyenepi, thangwi ndiye basi anadziwa mwadidi Yahova kupiringana anthu onsene.

4-5. (a) Perekani citsandzo cinapangiza kuti dzina ya munthu inakwanisa kukhala yakufunika kakamwe kuna ife. (b) Thangwi yanji dzina ya Yahova yadzakhala yakufunika kakamwe kuna anyakupfundza a Yezu?

⁴ Nyerezerani kuti mu mpingo mwanu muli na nkulu wa mpingo m’bodzi anacemerwa David, pontho iye ndi dotoro wakuti asacita operasau. Ntsiku inango imwe mukhanentseka kakamwe, pontho umaso wanu ukhali pangozwi, natenepa mukhafuna dotoro toera akuphedzeni. Imwe mwaenda ku xipitari kunaphata basa m’bale unoyu, pontho iye akukondzani mbamuwanga. Cincino imwe musanfuna kakamwe m’bale unoyu. Mungabva dzina yace, imwe musakumbuka pinthu pidacita iye kuna imwe. David asapitiriza kukhala nkulu wa mpingo m’bodzi ene adadziwa imwe mu pyaka pizinji, mbwenye cincino iyembo ndi dotoro adapulumusa umaso wanu.

⁵ Munjira ibodzi ene, anyakupfundza a Yezu akhaidziwa kale dzina ya Yahova. Mbwenye thangwi ya utumiki wa Yezu, dzina ineyi yadzakhala yakufunika kakamwe kuna iwo. Thangwi yanji? Thangwi Yezu akhapangiza makhaliro a Pai wace mu pinthu pikhalonga iye na pikhacita iye. Natenepa, mu ndzidzi ukhabva anyakupfundza pinthu pikhapfundzisa Yezu na kuona njira ikhatsalakana iye anthu, iwo akwanisa ‘kudziwa’ mwadidi Yahova.—Juw. 14:9; 17:3.

“THANGWI YA DZINA YANU IDANDIPASA IMWE”

6. Yezu akhafuna kulonganji mudalonga iye kuti apaswa dzina ya Yahova? (Juwau 17:11, 12)

⁶ Yezu aphembera tenepa thangwi ya anyakupfundzace: “Aonereni thangwi ya dzina yanu idandipasa imwe.” (Lerini Juwau 17:11, 12.) Kodi pyenepi pisabveka kuti dzina ya Yezu cincino mbidakhala Yahova? Nkhabe. Mudalonga Yezu thangwi ya dzina ya Yahova, iye alonga: “Dzina yanu.” Natenepa, pyenepi pisapangiza kuti Yezu nee akhafuna kulonga kuti dzina yace ndi Yahova. Mphapo thangwi yanji Yezu alonga kuti iye akhadapaswa dzina ya Mulungu? Thangwi iye akhaimirira Mulungu, pontho akhali nkwati mphangwa wa Yahova. Iye abwera mu dzina ya babace, pontho acita mabasa akudzumisa mu dzina ya Babace. (Juw. 5:43; 10:25) Kusiyapo pyenepi, dzina ya Yezu isabveka “Yahova ndi cipulumuso.” Natenepa, mabvekero a dzina ya Yezu asaphataniza dzina ya Yahova.

7. Thangwi yanji Yezu mbadalonga mu dzina ya Yahova? Perekani citsandzo.

⁷ Toera kubvesesa mwadidi, nyerezerani citsandzo ici: Embaixador ndi munthu anaimirira ntongi, pontho asalonga mu dzina yace. Na thangwi ineyi, mafala a embaixador ali na mphambvu ibodzi ene ya mafala a ntongi. Munjira ibodzi ene, Yezu akhaimirira Yahova, pontho akhalonga mu dzina yace.—Mat. 21:9; Luka 13:35.

8. Thangwi yanji Yahova alonga kuti dzina yace ikhali muna Yezu mbadzati kubwera pa dziko yapantsi? (Eksodho 23:20, 21)

⁸ Bhibhlya isalonga kuti Yezu ndi “Fala” thangwi Yahova aphatisira Yezu toera kufikisa mphangwa zace kuna aanju na kuna anthu. (Juw. 1:1-3) Pisaoneka kuti Yezu ndi anju akhadatumwa na Yahova toera kutsidzikiza Aizraeli pikhali iwo n’thando. Mu ndzidzi udapanga Yahova Aizraeli kuti akhafunika kubvera anju unoyu, iye alonga: “Thangwi dzina yanga iri muna iye.”a (Lerini Eksodho 23:20, 21.) Yahova alonga pyenepi thangwi Yezu akhalonga mphangwa zace, pontho akhali wakutoma kutsidzikiza na kucenesa dzina ya Pai wace.

“BABA, PASANI MBIRI DZINA YANU”

9. Yezu apangiza tani kuti dzina ya Yahova ndi yakufunika?

⁹ Ninga taona, dzina ya Yahova ikhali yakufunika kakamwe kuna Yezu ngakhale mbadzati kubwera pa dziko yapantsi. Pikhali Yezu pa dziko yapantsi, pyonsene pikhacita iye pikhapangiza kuti dzina ya Yahova ndi yakufunika kakamwe kuna iye. Kunkhomo kwa utumiki wace, Yezu aphemba Yahova: “Baba, pasani mbiri dzina yanu.” Mu ndzidzi ubodzi ene, Pai wace atawira mwakugaluza ninga kulira kwa njazi mbalonga: “Ine ndaipasa kale mbiri, pontho ndinadzaipasa mbiri.”—Juw. 12:28.

10-11. (a) Kodi Yezu apasa tani mbiri dzina ya Yahova? (Onanimbo foto.) (b) Thangwi yanji dzina ya Yahova isafunika kuceneswa na kupaswa mbiri?

¹⁰ Yezu apasambo mbiri dzina ya Pai wace. Munjira ipi? Njira ibodzi ndi kulonga makhaliro akudzumisa a Pai wace na pinthu pyakudzumatirisa pinacita iye. Mbwenye pyenepi basi nee pikhadakwana. Dzina ya Yahova ikhafunika kuceneswa, pontho Yezu akhafunikambo kupangiza kuti Yahova ndi wadidi. Yezu apangiza kuti pyenepi ndi pyakufunika mu ndzidzi udapangiza iye anyakupfundzace njira yakucita phembero. Iye alonga: “Babathu muli kudzulu, dzina yanu mbiceneswe.”—Mat. 6:9.

¹¹ Thangwi yanji dzina ya Yahova ikhafunika kuceneswa na kupaswa mbiri? Thangwi m’munda wa Edheni, Sathani apswipisa dzina ya Yahova Mulungu mbalonga uthambi thangwi ya iye. Sathani alonga kuti Yahova ndi nyauthambi, pontho akakhondera pinthu pyadidi Adhamu na Eva. (Gen. 3:1-5) Sathani alongambo kuti njira ikhacita Yahova pinthu nee ikhali yadidi. Thangwi ya uthambi udalonga Sathani, anthu panango atoma kunyerezera kuti Yahova ndi wakuipa. Mukupita kwa ndzidzi, mu ntsiku za Yobe, Sathani apambizira ale anatumikira Yahova kuti iwo asacita pyenepi thangwi ya pifuno pyakumanungo. Iye apambizirambo anthu kuti nee anapitiriza kutumikira Yahova angathimbana na nyatwa, thangwi nee asafuna Yahova. (Yobe 1:9-11; 2:4) Pakhafunika ndzidzi, toera kuoneka kuti mbani nyauthambi: Yahova peno Sathani.

“NDISAPEREKA UMASO WANGA”

12. Yezu akhali dzololo toera kucitanji thangwi yakufuna Pai wace?

¹² Thangwi yakufuna Yahova, Yezu akhafuna kucita pyonsene pikhakwanisa iye toera kucenesa na kupasa mbiri dzina ya Yahova. Iye akhali dzololo toera kufa toera kupangiza kuti Yahova ndi wakulungama, pontho njira yace yakucita pinthu ndi yadidi.b Na thangwi ineyi, iye alonga: “Ndisapereka umaso wanga.” (Juw. 10:17, 18) Adhamu na Eva akhonda kubvera Yahova mbabvera Sathani. Mwakusiyana na iwo, Yezu akhali dzololo kubwera pa dziko yapantsi toera kupangiza ufuni ukhali na iye kuna Pai wace. Iye acita pyenepi mukubvera Yahova ndzidzi onsene mu umaso wace. (Aheb. 4:15; 5:7-10) Yezu apitiriza kukhala wakukhulupirika m’midzidzi ya nyatwa mpaka kufa pamuti wakusikimizira. (Aheb. 12:2) Munjira ineyi, iye apangiza kuti asafuna kakamwe Yahova na dzina yace.

13. Thangwi yanji ndi Yezu basi akhadathema kupangiza kuti Sathani ndi nyauthambi? (Onanimbo foto.)

¹³ Pinthu pyonsene pidacita Yezu pyapangiza kuti Sathani ndi nyauthambi, tayu Yahova. (Juw. 8:44) Yezu akhadziwa mwadidi Yahova kupiringana anthu onsene. Natenepa, uthambi udalonga Sathani thangwi ya Yahova, mbudakhala undimomwene, Yezu mbadapidziwa. Mbwenye pyonsene pidalonga Sathani pikhali pyauthambi. Natenepa, Yezu apitiriza dzololo mbatsidzikiza dzina ya Yahova. Ngakhale m’midzidzi ikhaona iye kuti Yahova nee akhantsidzikiza, Yezu akhatawira kufa m’mbuto mwakukhonda kubvera Pai wace waufuni.—Mat. 27:46.c

‘NDAMALISA BASA IDANDIPASA IMWE’

14. Yahova apasa tani nkhombo Yezu thangwi yakukhala kwace wakukhulupirika?

¹⁴ Phembero idacita Yezu namasiku mbadzati kufa, iye alonga: ‘Ndamalisa basa idandipasa imwe.’ Yezu akhali na cinyindiro cakuti, iye mbadakhala wakukhulupirika Yahova mbadampasa nkhombo, pontho ndi pyenepi pidacitika. (Juw. 17:4, 5) Yahova nee atawirisa kuti Yezu apitirize mu nthumbi. (Mabasa 2:23, 24) Yahova amulamusa muli akufa, pontho amuikha pa mbuto yakupambulika kakamwe kudzulu. (Afil. 2:8, 9) Mukupita kwa ndzidzi, Yezu adzakhala Mambo wa Umambo wa Mulungu. Umambo unoyu unadzacitanji? Yezu apereka ntawiro mu ndzidzi udapfundzisa iye anyakupfundzace kuphembera. Iye alonga: “Umambo wanu mbudze. Cifuno canu [peno ca Yahova] cicitwe pantsi pano ninga kudzulu.”—Mat. 6:10.

15. Ndi pinthu pipi pinango pinafuna kudzacita Yezu?

¹⁵ Thimize pano, Yezu anamenyana na anyamalwa a Mulungu, pontho anafudza anthu akuipa pa nkhondo ya Armajedhoni. (Apok. 16:14, 16; 19:11-16) Buluka penepo, Yezu anaponya Sathani “n’djenje yakuzika kakamwe,” pontho mwenemo iye nee anakwanisabve kucita pinthu, anakhala ninga wakufa. (Apok. 20:1-3) Yezu anakhazikisa pontho ntendere pa dziko yapantsi mbacitisa anthu kukhala pontho akulungama mu Utongi wace wa Pyaka Cikwi. Iye analamusambo anthu akufa mbacitisa dziko yonsene yapantsi kukhala paraizu. Pakumalisa, cifuno ca Yahova cinadzakwanirisika.—Apok. 21:1-4.

16. Umaso unadzakhala tani pakumala kwa Utongi wa Pyaka Cikwi?

¹⁶ Umaso unadzakhala tani pakumala kwa Utongi wa Pyaka Cikwi? Madawo na kusowa ungwiro nee pinadzakhalapobve. Anthu nee anadzafunikabve kuphemba kulekererwa thangwi ya madawo awo. Pontho toera iwo akhale axamwali a Yahova nee panadzafunikabve ciomboli, nee muimiriri wa cibverano peno nyantsembe. Pakumalisa, “nyamalwa anafuna kudzamalisira kufudzwa ndi kufa.” Anthu akufa anagumanika amala kulamuswa, pontho anthu onsene pa dziko yapantsi anakhala aungwiro.—1 Akor. 15:25, 26.

17-18. (a) Ninji pinafuna kucitika kunkhomo kwa Utongi wa Pyaka Cikwi? (b) Ninji pinafuna kucita Yezu pakumala kwa utongi wace? (1 Akorinto 15:24, 28) (Onanimbo foto.)

¹⁷ Pana cinthu cinango cakupambulika cinafuna kucitika pakumala kwa Utongi wa Pyaka Cikwi. Ndi cinthu cipi? Nkhabepo unango anafuna kupenula kuti Yahova ndi wakulungama. Munjira ipi? M’munda wa Edheni Sathani apambizira Yahova kuti nee ali kutonga anthu mwaufuni, pontho ndi nyauthambi. Kutomera ndzidzi unoyu, dzina ya Yahova yaceneswa mwakubwereza-bwereza na ale anampasa mbiri na kumulemedza. Kusiyapo pyenepi, iwo asapanga anango makhaliro adidi a Yahova. Natenepa kunkhomo kwa Utongi wa Pyaka Cikwi, dzina ya Yahova inadzaceneswa mwakukwana. Mwandimomwene, Yahova asapangiza kuti iye ndi Baba waufuni.

¹⁸ Pakumalisa, anthu onsene anadzabvesesa kuti pinthu pyonsene pidalonga Sathani thangwi ya Yahova ndi uthambi. Yezu anacitanji pakumala kwa utongi wace? Kodi iye anatowezera citsandzo ca Sathani mbasandukira Yahova? Nkhabe. (Lerini 1 Akorinto 15:24, 28.) Yezu anapereka utongi kuna Pai wace, mbatawira kutongwa na iye. Mwandimomwene, mwakusiyana na Sathani, Yezu ali dzololo toera kupereka pyonsene kuna Yahova thangwi asanfuna.

19. Dzina ya Yahova isabvekanji kuna Yezu?

¹⁹ Yahova akhali na mathangwi adidi toera kupasa Yezu dzinace. Pontho Yezu apangiza mwadidi makhaliro a Pai wace. Dzina ya Yahova isabvekanji kuna Yezu? Isabveka kuti ndi yakufunika kakamwe kupiringana pinthu pyonsene. Yezu apereka umaso wace thangwi ya dzina ineyi. Pakumala kwa utongi wace, iye anapereka pyonsene m’manja mwa Pai wace. Tinatowezera tani citsandzo ca Yezu? Tinaona ntawiro mu nsolo unatowera.