Ndisafunika Kusiya Kutekenya?

Ndi pyenepi pinakucitikirani? Khala ndi tenepo, ninji pinafuna kukuphedzani kuona khala munapitiriza kutekenya peno nkhabe?

M’madziko anango, anyakutekenya angakalamba asafunika kutawiriswa na madotoro khala anapitiriza kutekenya peno nkhabe. Akristu anakhala m’madziko anewa, asabvera mitemo ineyi na pisankhulo pinacita mautongi. (Aroma 13:1) Mwakukhonda tsalakana kunakhala imwe, munakwanisa kuona khala mwathema kupitiriza kutekenya peno nkhabe.

NYEREZERANI NJIRA INATEKENYA IMWE

Nsoka unango unatsalakana anthu akukalamba walonga kuti anyakukalamba asafunika abvundzike tenepa:

• Ndisanentseka kuleri pidzindikiro pinagumanika mu nseu peno kuona mwadidi namasiku?

• Ndisakwanisa kuona masupeyu mwakucimbiza?

• Ndisakwanisa kubulusa mwendo pa asereladhore na kupwanda pa travau mwakucimbiza?

• Ndisatekenya pang’ono-pang’ono mbandipingiza anyakutekenya anango?

• Maulendo anango ndikhali cifupi na kucita cidengwa? Karu yanga yabofoka peno kukhudzika thangwi ya kudhima pinthu?

• Ndalimiriswa kale na apolixa thangwi ya njira ikhatekenya ine?

• Ndawodzira kale mu ndzidzi ukhatekenya ine?

• Ndisamwa mitombwe yakuti inandipingiza kutekenya mwadidi?

• Acibale anga na axamwali anga andipanga kale kuti ali akudzudzumika thangwi ya njira inatekenya ine?

Khala imwe mwatawira inde ubodzi peno miwiri ya mibvundzo ineyi, pyenepi pisapangiza kuti panango musafunika cita macinjo. Mwacitsandzo, panango munasankhula kutekenya pang’ono makamaka namasiku. Ndzidzi onsene onani mwadidi njira inatekenya imwe. Musaona tani muphembe m’bale peno xamwali wanu maonero thangwi ya njira inatekenya imwe? Cinthu cinango ndi kucita kursu yakupfundza njira yakutekenya karu mwakutsidzikizika. Mbwenye khala mwatawira inde mibvundzo mizinji, mphyadidi kusiya kutekenya.a

BHIBHLYA INAKUPHEDZANI KUCITA PISANKHULO PYADIDI

Panango pinakhala pyakunentsa kutawira kuti cincino nee mukutekenyabve mwadidi. Peno kunyerezera kusiya kutekenya kunakhala kwakunentsa kuna imwe. Mphapo Bhibhlya inakuphedzani tani toera kunyerezera makhaliro anu na kucita pisankhulo pyadidi? Tendeni tione pinthu piwiri pinalonga Bhibhlya.

Khalani akucepeseka. (Mis. 11:2) Ndzidzi unakalamba ife, mphambvu zisapunguka, maso nee asaona mwadidi, pontho nee tisabva mwadidi. Mwacitsandzo, anthu azinji asasiya kucita masendzekero akuwangisa manungo mu ndzidzi unakalamba iwo thangwi asagopa kuphekeka. Pinthu pibodzi pyene pisacitikambo pakutekenya. Munthu wakucepeseka, thangwi yakunyerezera ungumi wace panango anasankhula kusiya kutekenya. (Mis. 22:3) Kusiyapo pyenepi, munthu wakucepeseka asabvesera, pontho asatawira anango angalonga kuti asadzudzumika thangwi ya iye.—Onani 2 Samweli 21:15-17.

Lekani kukhala na mulando wa ciropa. (Dheu. 22:8) Karu ingakhonda kuphatisirwa mwadidi inapha peno kuphekesa anthu. Munthu wakuti nee asatekenyabve mwadidi, angapitiriza kutekenya anaikha pangozwi umaso wace na wa anango. Natenepa, angadhima munthu mbafa, iye anakhala na mulando wa ciropa.

Khala mwadzindikira kuti musafunika kusiya kutekenya, lekani kunyerezera kuti munakhala akupwazika na akusowa basa, Yahova asakufunani thangwi ya makhaliro anu adidi, ninga kucepeseka na kudzudzumika thangwi ya anango. (Iza. 46:4) Yahova cipo anakusiyani. Natenepa citani phembero toera akuphedzeni kukhala waudziwisi na kuphatisira pinalonga Bhibhlya toera kuona khala musafunika kusiya kutekenya.