Ciphedzo Kuna Akazi Anatsalakanwa Mwakuipa

Mu saiti yathu ya jw.org muli na nsolo wakuti “As Mulheres e a Sua Segurança – O Que Diz a Bíblia.” Pa tsamba yakumalisa pali na link toera kubhaxari nsolo unoyu mu PDF. Imwe munakwanisa kuidhinda mbamuifunya mbibwera dhokumento ya matsamba manai. Mulongo Stacy anakhala ku Estados Unidos alonga: “Ine ndadhinda nsolo unoyu, buluka penepo, ine na mulongo unango takwata makopya anewa mbatiaendesa ku mbuto inakhala akazi mucisa cathu.”

Nkazi unango anaphata basa pa nyumba ineyi, abvundza mulongo khala anampasambo makopya anango toera apasembo akazi anango anakhala penepo. Maphindu ndi akuti matratadho anango akupiringana 40 agawirwa, pontho makartau 30 toera kupita mu saiti jw.org agawirwambo. Ntsiku inango, nyakuonera wa nyumba ineyi aphemba toera kupangiza akazi anakhala nyumba ineyi kuti pfundziro ya Bhibhlya isacitwa tani.

Stacy na alongo anango awiri akhalambo na maphindu kudaenda iwo. Kweneko iwo asiya makopya maxanu a tratadho ineyi, pontho anthu aaphemba toera abwerese anango. Nkazi m’bodzi akhaphata basa pa nyumba ineyi alonga: “Tratadho ineyi inaphedza kakamwe akazi pano. Ndi pyenepi pikhafuna ife.” Pa ulendo unango akazi azinji agumanikana pa nyumba ineyi toera kuona kuti pfundziro ya Bhibhlya isacitwa tani. Pontho awiri mwa akazi anewa alonga kuti akhafuna kugumanikambo pa misonkhano ku Nyumba ya Umambo.

Stacy alonga: “Pikhali pyakutsandzayisa kakamwe kuona anthu mbakaleri mwakutsandzaya mphangwa zenezi. Tratadho ineyi ingamala kudhindwa, mbimala kufunyiwa isacitisa anthu azinji kukhala na cifuno ca kuileri. Ineyi ndi njira yadidi kakamwe ya kumwaza mphangwa za Umambo kuna nsoka unoyu wa akazi. Pinakhala pyakutsandzayisa kakamwe kuona akazi anewa mbakatawira mwadidi mphangwa zenezi. Pontho tiri kudikhira na ntima onsene, toera kuona kuti Yahova anapasa tani nkhombo kuwangisira kunacita ife toera kupitiriza kuphedza akazi anewa na mphangwa zadidi.”