‘ Khalani Akuphatana Kubulukira mu Nzimu Wakucena’
MPOSTOLO Paulu apanga Akristu a ku Efeso kuti akhafunika ‘kupirirana unango na ndzace mwaufuni, mbawangisira na ntima onsene toera kukoya kuphatana kwawo kubulukira mu nzimu wakucena, mbakhala akuphatana mu ntendere.’—Aef. 4:2, 3.
Ife tisakhala ‘akuphatana’ na ciphedzo ca “nzimu wakucena” wakuti ndi mphambvu ya Mulungu. Mpostolo Paulu alonga kuti tisafunika kupitiriza kukhala akuphatana. Natenepa, m’bodzi na m’bodzi asafunika kuwangisira toera tipitirize kukhala akuphatana kwakuti kusakwanisika na ciphedzo ca “nzimu wakucena.”
Mwacitsandzo, nyerezerani kuti munthu akupasani karu ipswa. Kodi mbani anafuna kuitsalakana toera ipitirize kukhala yadidi? Ndimwe. Thangwi nee munadikhira munthu adakupasani kuti aitsalakane toera ipitirize kukhala mwadidi.
Munjira ibodzi ene, maseze kuphatana kwathu ndi muoni udatipasa Mulungu, m’bodzi na m’bodzi wa ife asafunika kuwangisira toera kupitiriza kukhala akuphatana. Khala ife tatsukwaliswa na m’bale peno mulongo, tisafunika kubvundzika: ‘Kodi ndiri kucita pyonsene pinakwanisa ine toera tipitirize kukhala akuphatana, kwakuti kusakwanisika basi ene na ciphedzo ca nzimu wakucena?’
‘WANGISIRANI TOERA MUPITIRIZE KUKHALA AKUPHATANA’
Ninga pidalonga mpostolo Paulu, midzidzi inango tisafunika kuwangisira kakamwe toera tipitirize kukhala akuphatana. Pyenepi panango pinakhala pyakunentsa khala m’bale peno mulongo atitsukwalisa. Kodi toera kumalisa nkandzo na kupitiriza kukhala akuphatana, pisabveka kuti ndzidzi onsene tisafunika kucedza na munthu adatitsukwalisa? Nkhabe. Bvundzikani: ‘Ndingaenda kacedza naye, kodi ndinamalisa nkandzo peno ndinautekeresa?’ Midzidzi inango, cinthu cadidi toera kucita basi ene ndi kulekerera munthu adatitsukwalisa.—Mis. 19:11; Marko 11:25.
Bvundzikani: ‘Ndingaenda kacedza naye, kodi ndinamalisa nkandzo peno ndinautekeresa?’
Ninga pidalemba mpostolo Paulu, tisafunika kupitiriza ‘kupirirana unango na ndzace mwaufuni.’ (Aef. 4:2) Bukhu inango yalonga kuti mafala anewa anakwanisa kuthumburuzwa kuti: “Kupirira madodo a anango.” Pyenepi pisabveka kuti ife tisatawira kuti abale na alongo athu ndi a madawo ninga ife. Ndimomwene kuti ife tiri kuyesera “kubvala uunthu upswa.” (Aef. 4:23, 24) Mbwenye nkhabepo anakwanisa kucita pinthu pyonsene mwadidi. (Aroma 3:23) Tingadzindikira pyenepi, pinakhala pyakukhonda nentsa kupirirana unango na ndzace mwaufuni, kulekerera na ‘kupitiriza kukhala akuphatana na ciphedzo ca nzimu wakucena.’
Tingatsukwaliswa na munthu, mbatimalisa nkandzo unoyu, ngakhale mu ntima, tinapitiriza kukhala “akuphatana mu ntendere.” Fala Yacigerego idathumburuzwa kuti kukhala “akuphatana mu ntendere” pa Aefesi 4:3, isabveka pinthu pinaphataniza magogodo. Munjira ibodzi ene, ntendere unakwanisa kulandaniswa na pinthu pyenepi pinaphataniza magogodo. Ufuni wathu unatiphedza kupitiriza kukhala akuphatana mwakukhonda tsalakana madodo anaticitira abale athu.
M’bale peno mulongo angakutsukwalisani, yeserani kum’bvesesa, pontho mbvereni ntsisi m’mbuto mwa kuketesana naye. (Akol. 3:12) Nakuti tonsene ndife a madawo, imwe panango mwatsukwalisambo anango. Kukumbuka pyenepi, kunakuphedzani toera kucita pyonsene pinakwanisa imwe kuti mupitirize kukhala ‘akuphatana na ciphedzo ca nzimu wakucena.’