Abale na Alongo Akukalamba, Ndimwe Akufunika Kakamwe mu Mpingo

Panango imwe nee musakwanisabve kucita pinthu pikhacita imwe kale, thangwi ya thunga yanu. Ngakhale musatumikira Yahova mwakukhulupirika mu pyaka pizinji, panango musakhala wakutsukwala mungalandanisa pikhacita imwe kale na pinacita imwe cincino. Khala musapibva tenepo, ninji pinafuna kukuphedzani?

NYEREZERANI PINAFUNA YAHOVA KUTI IMWE MUCITE

Bvundzikani: ‘Yahova asadikhira kuti ndicitenji?’ Panango mafala anagumanika pa Dheuteronomyo 6:5 anakubalangazani. Lemba ineyi isalonga: “Funa Yahova Mulungu wako na ntima wako onsene, na umaso wako onsene na mphambvu zako zonsene.”

Mwakubverana na vesi ineyi, Yahova asafuna kuti muntumikire na ntima wanu onsene, na umaso wanu onsene, na mphambvu zanu zonsene. Kudziwa pyenepi kunakuphedzani toera mukhonde kulandanisika na anango, pontho toera mukhonde kulandanisa pinacita imwe cincino na pikhacita imwe kale.

Nyerezerani basi: Pikhali imwe m’phale peno ntsikana, mukhacitanji m’basa ya Yahova? Azinji akuti ndi Mboni za Yahova asalonga kuti akhacita pyonsene pikhakwanisa iwo. Panango imwe mukhacitambo pyonsene pikhakwanisa imwe mwakubverana na makhaliro anu mu ndzidzi unoyu. Ninji pinacita imwe m’basa ya Yahova cincino? Panango muli kucita pinakwanisa imwe mwakubverana na makhaliro anu a cincino peno pinakwanisa imwe kucita cincino. Munganyerezera tenepo, panango munadzindikira kuti muli kutumikira Yahova munjira ibodzi ene ikhantumikira imwe kale. Imwe mwacita pyonsene pikhakwanisa imwe m’basa ya Yahova pikhali imwe m’phale peno ntsikana, pontho muli kupitiriza kucita pibodzi pyene lero.

PINTHU PIDAPFUNDZA IMWE PINAKWANISA KUPHEDZA ANANGO

M’mbuto mwakuona thunga yanu ninga mpingizo, onani ninga mwai. Undimomwene ndi wakuti cincino imwe muli na maluso mazinji, pontho munakwanisa kucita pinthu pyakuti nee mbamudakwanisa kupicita pikhali imwe m’phale peno ntsikana. Mwacitsandzo:

Pangani anango pinthu pidakucitikirani. Onani basi mafala awa adalembwa m’Bhibhlya:

Mambo Dhavidhi: “Kutomera uphale wanga mpaka kukalamba kwanga, cipo ndaona munthu wakulungama mbathawiwa, nee anace mbakaphemba cakudya.”—Mas. 37:25.

Yoswa: “Onani! Ine ndiri dhuzi toera kufa, pontho imwe musadziwa mwadidi kuti mapikiro onsene adidi adalonga Yahova Mulungu wanu kuna imwe akwanirisika. Pyonsene pidapikira iye kuna imwe pyakwanirisika. Nee pikiro ibodzi idakhonda kwanirisika.”—Yos. 23:14.

Panango imwe mwalonga kale mafala akulandana na anewa pikhali imwe m’phale peno ntsikana. Dhavidhi na Yoswa alonga pinthu pidaacitikira. Thangwi atumiki anewa akukhulupirika aona, pontho abvesera pinthu pizinji mu ndzidzi ukhatumikira iwo Yahova.

Imwembo, thangwi yakutumikira Yahova mu pyaka pizinji, mafalanu cincino ali na mphambvu. Kodi imwe mwabva nkhombo zinakhala na ale anatumikira Yahova? Musakumbuka ndzidzi wakuti Yahova aphedza atumiki ace mu njira yakupambulika? Khala ndi tenepo, pangani anango pinthu pyenepi. Kulonga pinthu pyenepi kunakutsandzayisani kakamwe. Pontho anango angabva pyenepi, cikhulupiro cawo cinakhala cakuwanga mbakhala na mphambvu toera kupitiriza kutumikira Yahova.—Aroma 1:11, 12.

Njira inango yakuwangisa anango ndi kugumanika pa misonkhano pa Nyumba ya Umambo pingakwanisika. Pyenepi pinakuphedzani, pontho pinaphedzambo anango. Connie, adalongwa pakutoma, alonga: “Kuenda ku misonkhano kusandiphedza toera ndikhonde kukhala wakutsukwala. Ku Nyumba ya Umambo nee ndisatsukwala, thangwi abale na alongo asapangiza ufuni wawo kuna ine. Ine ndisawangisira toera kupereka takhuta kuna abale na alongo thangwi yakundipasa miyoni, pontho ndisawangisira ndzidzi onsene toera kucita mabasa auzimu pabodzi na abale na alongo.”

YAHOVA ASAPEREKA TAKHUTA THANGWI YA PYONSENE PINACITA IMWE M’BASA YACE

Bhibhlya isalonga anthu azinji akuti nee akhakwanisa kucita pizinji thangwi ya makhaliro awo, mbwenye Yahova akhaafuna kakamwe. Nyerezerani pya Simeoni, Muizraeli wakukalamba wa mu ndzidzi udabalwa Yezu. Pikhaenda Simeoni ku templo, panango iye akhaona aphale mbakacita mabasa akufunika kweneko. Kodi iye akhapibva tani? Panango akhanyerezera kuti thangwi yakukalamba, iye nee akhali wakufunika kakamwe kuna Yahova. Mbwenye Yahova akhaona pinthu mwakusiyana. Iye akhaona Simeoni ninga mamuna “wakulungama na wakugopa Mulungu” pontho ampasa mwai wakuona Yezu pikhali iye khombwani. Kusiyapo pyenepi, Yahova aphatisira Simeoni toera kulonga profesiya thangwi ya pikhafuna kucitikira Mesiya! (Luka 2:25-35) Pyenepi pisapangiza kuti “nzimu wakucena ukhali na iye,” pontho kuti Yahova nee akhaona basi ene manungo ace akusowa mphambvu, mbwenye akhamuona ninga munthu wa cikhulupiro cakuwanga.

Imwe munakwanisambo kukhala na cinyindiro cakuti Yahova asapereka takhuta thangwi ya pinacita imwe m’basa yace, mwakukhonda tsalakana mipingizo inathimbana na imwe. Kuna Yahova, ntsembe ‘ndi yakutawirika makamaka khala munthu aipereka mwakubverana na piri na iye, tayu kupiringana piri na iye.’—2 Akor. 8:12.

Nyerezerani pinthu pyakuti munakwanisa kupicita. Mwacitsandzo, ndi njira ipi yakumwaza mphangwa yakuti munakwanisa kuiphatisira, ngakhale mu ndzidzi wakucepa? Kodi imwe munakwanisa kuligariri abale na alongo peno kualembera tsamba toera kuawangisa? Pinthu pyakucepa toera kupangiza ufuni, pinakwanisa kuphedza kakamwe abale na alongo, makamaka pingacitwa na munthu ninga imwe wakuti ali kutumikira Yahova mu pyaka pizinji.

Mwakukhonda tsalakana mipingizo, abale na alongo akukalamba anakwanisa kucita pizinji m’basa ya Yahova. Lerini pidacitikira mulongo unango wa ku Afrika pa bokosi ya nsolo wakuti “Mulongo Apulumusa Umaso wa Munthu.”

Lekani duwala kuti kukhulupirika kwanu kunakwanisa kuwangisa anango. Imwe musapangiza kuti ife tinakwanisa kupirira, pontho munakwanisa kukhala na cinyindiro cakuti “Mulungu nee ndi wakukhonda kulungama toera aduwale basa yanu na ufuni udapangiza imwe kuna dzina yace pakutumikira anthu akucena, mbamupitiriza kuatumikira.”—Aheb. 6:10.

PITIRIZANI KUKHALA WAPHINGA MWAKUBVERANA NA PINAKWANISA IMWE

Anyakufufudza adzindikira kuti amuna na akazi akukalamba akuti asacita pinthu toera kuphedza anango, asakhala na ungumi wadidi, asanyerezera mwadidi, pontho asakhala m’maso mu ndzidzi uzinji.

Ndimomwene kuti kucitira anango pinthu pyadidi nee kunamalisa nyatwa zanu. Basi ene Umambo wa Mulungu ndi unafuna kumalisa kukalamba na kufa, pyakuti tapithapula na Adhamu.—Aroma 5:12.

Ngakhale tenepo, pinthu pinacita imwe m’basa ya Yahova, kuphatanizambo kuphedza anango toera kundziwa, pisawangisa cidikhiro canu, ngakhale kukuphedzani toera kukhala na ungumi wadidi. Abale na alongo akukalamba, taphata miyendo, lekani duwala kuti Yahova asapereka takhuta thangwi ya pinthu pinacita imwe m’basa yace, pontho kuti abale na alongo mu mpingo asaperekambo takhuta thangwi ya cikhulupiro canu.